نبشتانک: سمّو ءَ گوں دیوانے
نبشتہ کار: سلال سمین
دی بلوچستان پوسٹ
دوشی سمّو منی واب ءَ اتکگ اَت گوں وتی بانُوری داباں زمین ءِ دُروشُمے وتی گیوار ءِ میان ءَ رَستگ اَت ءُ گوناپے وتی ارواہ کُتگ اَت ، سمّو ءَ من ءَ گُشت ” تو باندا روزرد ءِ وھد ءَ کُلبر ءِ کوھاں بیا من ترا ھمودا دست کپاں ، گوں تو دیوانے کناں ، سُھب ءِ سمین ءَ کہ ایر دات ءُ روچ ءِ برمش منی بدن ءِ سر ءَ کپت اَنت گُڑا سمّو ءِ دوشی ایں گپ من ءَ گیر اَتک ، من زوت زُوتّ ءَ شُت ءُ چاگل آپ کُرت ھمے کُمب ءِ آپاں چہ کمّو وتی سر ءَ ھم پِرِّیتک ، اتکاں جابہ گور ءَ کُرت کہ نُوں تُپنگ ءَ زوراں پہ سپر ءَ در کپاں بلے منی چمّ سنگتے ءِ داتگیں سوگاتانی سر ءَ کپت اَنت کہ آئی ءَ چہ شال ءَ منی واستا یک بلوچی چادرے ، جوڑھے پُچ ، جوڑھے بلوچی پاد پُوش ، جُپتے تزبیھ ءُ یک چشمِکے روان داتگ اَت ، منی چمّ کہ اے شَے آں کپت اَنت گُڑا دِل ءَ گُشت مرچی کہ سمّو ءِ کِرّا روگ ءَ آں گُڑا وتی اے پُوشاکاں مَٹ بِکناں کہ سک دیر اِنت اِش ، چاک اِش ھم باز بِر ءُ پوجی بُوٹّاں پاد ھم سگّگ ءَ نہ اَنت بلے پد ءَ جیڑ اِت کہ سمّو منی نوکیں پُوشاکاں بِگند ایت چے جیڑ اِیت باریں؟ ، ھمدا من جیڑگ ءَ اِتاں دِل ءَ گُشت مٹّ اِش کن کہ سپر دُور اِنت پد ءَ چُو مہ بیت سمّو باز ودار بِکنت ءُ واتر بُروت ، من اِشتاپی ءَ وتی پُوشاک مٹّ کُرت آں ءُ وتی کُلیں شے زُرت آں رھادگ بُوتّ آں دیم پہ سمّو ءَ ، ھما جاہ ءَ کہ سمّو ءَ من ءَ گُشتگ ات نُوں آ جاہ ءَ کمّو سپر پش کپتگ اَت ، من ھما اِنت یکشل ءَ سپر کنان اِتاں کہ چہ سمّو ءَ پیسر سر بِہ باں ، چُش مہ بیت سمّو پیسر ءَ ھما جاہ ءَ منی ودار ءَ بِکنت، من کوہے ءِ سر ءَ کہ سَرکپت آں داں سمّو ءِ نام گِپتگیں جاہ کمو زاھِر اَت منی چمّاں ، من دُور گِند کشّ اِت ھما جاہ چار اِت داں چاراں سمّو ءَ لھتیں دار گون گوں آس ءَ دِلگوش اِنت ، پد ءَ دُور گِند گورا کُرت ءُ رھادگ بُوتّاں دیم پہ سمّو ءَ ءُ راہ ءَ من دار چِنان بُوتّاں تانکہ سمّو ءِ روک کُرتگیں آس ءَ مِرگ ءَ مَئیل آں ، وھدے کہ من سک نزّیک ءَ سر بوتاں داں گِنداں سمّو ءَ بلوچی چادرے سرین بند کُرتگ ، کسانیں دار دست ءَ انت آس ءَ شر کنگ ءَ اِنت ، جِند ندرانی سُوتے دپ ءَ ئے کُرتگ ءُ جِند ندراں نازینگ ءَ اِنت ، من کہ سر بُوتّ آں ، گوانک جت کہ سمّو من سر بُوتّاں گُڑا پاد اتک ءُ گُشتے ”بیا ترا ھُدا بیار ایت “ من دور کُرت بگل ءَ کُرت ، دست چُکّ اِت آں ءُ سر ءَ را بُوس اِت ، من ءَ گُش ایت ” بیا مِنِند دمے بالا کن ، سیاہ چاہ تیار بؤگ ءَ اِنت “ گلاسے آپے آؤرت ءُ وت منی دیم پہ دیما نِشت ، من آپ وارت ، وتی چمّ ءِ چشمک کشّ اِت ، تزبیھ چہ جیب ءَ کشّ اِت دست ءَ کُرت آں ءُ سمّو ءَ را داں دیراں چار اِت ، من ءَ گُش ایت ” چے چار ئے چُو ، من ءَ نہ دیستگ زاناں پیسر ءَ “ من گُشت تئی شورھیں ارواہ ءَ چارگ ءَ آں کہ اے ارواہ ءَ گوں جِند ندری ءِ سسّا آں باریں چونیں پند بُرّ اِتگ ،؟ گُڑا ھمے گپانی تھا دیدگے منی نُوکیں پوشاکاں کپت اَنت من ءَ جُستے گِپت ، تو گوں نوکیں پوشاکاں سکّ شوک ئے ، ھمدا بِچکند اِت ئے ، من گُشت اے سنگتے ءِ داتگیں سوگات بُوتگ اَنت من گُشتگ تئی دیوان ءَ گَورا اِش بِکناں شوک تِر اِنت ، من ءَ گُش ایت ” پہ تُو بازیں سوگات من ءَ ھم گُون اِنت ءُ لھتیں کُلوہ اَنت من ءَ گون اَنت ، من گُشت ، سنگت چُون انت؟ ، ریھان چُون اِنت؟ ، مات شارُل چُون اِنت ؟، اُستاد ءَ چے گُشتگ؟ ، آ دِگہ سنگت کُل دیستگ اَنت ،؟ پسّویے دات ” لاڈُکیں ریھان ٹیٹ اِنت ، من گُشتگ من روگ ءَ آں سنگتے ءِ دیوان ءَ گُڑا یک شوکیں امریکی تُپنگے داتے کہ سنگت ءَ را بِدئے ءُ بگُش بس جُنزان کن ما تئی وداریگ ایں ، اُستاد ءَ پہ تُو تَرملے ءُ جابہ یے گوں لھتیں مِیگزیناں داتگ ءُ تیر گوں وتی دستاں میگزینانی تہ ءَ مانے کُرتگ اَنت ءُ گُشتگے سنگت ءَ را بگُش داں گُڈی تیر ءَ جنگ کنگی اِنت ، دُژمِن ءَ را گیش ءَ چہ گیش پُروش دیگی اِنت ءُ ھمنچو مَجبُور کنگی اِنت کہ اے شے آں بِزانت شھیدانی ھون پہ وتی زمین ءِ آجو کنگ ءَ ھِچبر زوال نہ بنت بلکیں چو گواڑگانی داب ءَ رُد انت ءُ اے زِیدانی بَھار جُوڑ بنت-
مات شارُل ءَ گُشتگ کہ من وتی بچّ ءِ تُپنگ ءَ گوں ھوسلہ ، تمردی ءُ گوں جنگی مڑاھاں سینگار کناں ، تئی مات ءَ تئی تُپنگ ءُ مِیگزین زُرتگ اَنت ، تیلے داتگ اَنت تانکہ جنگ ءِ وھد ءَ بند مَہ ور اَنت ، جابہ ءَ را تئی چاکے مان بُوتگ ھمے چاکے دُوتکگ تانکہ جنگ ءِ وھد ءَ مِیگزینے مہ کَپ اِیت ءُ ھمے لھتیں ورد ءُ وراکی شے یے مان کُرتگ ءُ گوں وتی توار ءَ پہ تئی سالونکی ءَ نازینک جتگے ، گُشتگے منی بچّ ءَ را بگُش من زاناں اِشک زمین ءِ تئی اندر ءَ رُستگ ءُ نُوں لائِک اِنت کہ وتی بانُور ءَ وتی امبازاں بِکنت ءُ وھدے کائے مات ءِ واستہ ماھو ءُ مِیرو ءِ بُوس اِتگیں ارواہ ءَ بیار گوں ۔
منی چمّ کمو ارسیگ بُوتّ انت گُڑا من جُست کُرت تو پمّن چے آورتگ گوں ؟،
گُش ایت ”منی دست ءَ دِگہ ھِچ نہ بُوتگ ھما ریھان جان ءِ بڑّ ءِ بیرک آورتگ پہ تُو، گِندے! لُمہ یاسمین ءَ آئی ءِ بڑّا داتگ اَت ءُ من ھمے جیڑ اِتگ کہ وھدے ترا گِنداں گُڑا بیرک ءَ تئی بڑّا دیاں ، من گُشت کُربان دِگہ من چے لُوٹاں ، منی واستہ ھمے گنج اِنت کہ من تئی دیدار کُرتگ ، گُڑا ھمدا پاد اتک ءُ من ءَ گُشیت ” بیا ترا بیرک ءَ بڑّا دیاں کہ سپر ءَ روگی اِنت ءُ جِند ندرانی ھمے شئیر ءِ گُشگے بِندات کُرت ،
“صدخئی گُنگ مَرے چٹ سلے حیران وفا”
“ابکّہ عشق مرے گر خنے دا مِہرے نُما”
ھمے شئیر ءَ گُشان اَت ءُ وتی سریگے زُرت منی راہ ءِ ھاک ءُ دنزے ساپ کُرت اَنت ءُ جابہ یے منی سینگ ءَ بَست ، تُپنگے منی بڈا دات ، چشمِکے منی چمّاں دات ، تزبیھے منی دست ءَ دات ءُ بیرک ءَ را بُوس اِتے ءُ منی بڈ ءَ ئے دات ءُ دستے منی بڈ ءَ جت کہ تو بُرو ما تئی وداریگ اِیں ۔
من گُشت رُخصت اَف آوارُن سنگت
آ دیم پہ اُستاد زئی ءِ نیمگ ءَ روان بُوت ءُ من دیم پہ وتی سپر ءَ جُنزان بُوتّ آں ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔