نبشتانک: اَچ تو پد جیڑھے مانگیشتگ
نبشتہ کار: سعید احمد بلوچ
دی بلوچستان پوسٹ
در کپگ ءَ پیش آئی ءِ لُنٹ لھم لھم ءَ لپرزگ ءَ اِت اَنت من مار اِت کہ الّم چیزے گوشگ لوٹگ ءَ اِنت بلے ناں کہ من جُست گپت ءُ ناں کہ آئی ءَ اے درگت ءَ گپے گوشت — وتی لُنٹانی لپرزگ ءَ گوں ھما بوت دیدگاں چہ مُجتی اندیم بوت ءُ رؤگ گوں رؤگ ءَ کُت ئِے، نزاناں آئی ءِ گُڈی دانک چی اِت اَنت کہ آ من ءَ گوشگ لوٹگ ءَ اَت آ چو بے انانی ءَ مئے دیدگانی دنیا ءَ اندیم بوت ءُ گار بوت-
نزان آں ترا چی پَد من چوں زندگ آں تئی سِدگ ءَ رند نزاناں وشی کجام چیز ءِ نام اِنت تئی رؤگ ءَ رند نزاناں ائید چی یے ءُ نزاناں اے کوراسیں زندمان ءَ شادمانی کجام شے ءِ نام اِنت ترا چہ پَد تئی گرانیں ترانگاں گوں زندگی کنان ءُ اوشتاتگیں روچاں میزان میزان ءَ تیلانک دیان آں-
زندگی ءَ برے برے من جیڑ آں تَہ هیال کن آں ءُ پد ءَ دل ءَ لھتیں هیال چِست بیت کہ زندگی من ترا چو دستونک ءِ داب ءَ بہ سینگاراں ءُ ترا گوں شوکیں گالاں بہ نازیناں بلے پد ءَ جیڑاں کہ زندگی تو وَ یک وابے ءِ مرچی ناں باندا چو گار بوتگیں مردمے ءِ وڑ ءَ الّم پُرش اِت تئی سینگارگ ءُ نازینگ ءَ هچ نپ ءُ سیت نیست گڑا دل وتی هیال کُتگیں سوڑگ ءَ کوتاہ کنت ءُ پہ ملوری پد کنز ایت-
ترا هبرے بہ گوش آں زندگی ءَ من ءَ درستاں چہ گیش کُجام چیز آزارانی دیمپان کنت همے کہ من جیڑاں باریں تئی گُڈی دانک پہ من چی بوتگ اَنت دریگتیں من اے دنیا ءِ هما مردماں هوار بوتین آں کہ وتی گِسر کپتگیں مردمانی گُڈی نمدی ونتگ اِش یا وانگ ءَ اَنت اِش، دریگیتں تئی گُڈی دانک من ءَ سر بوتین اَنت — – دریگتیں
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔