نوکیں سال پہ بلوچ راج ءَ چونیں مستاگے بیت؟
نوہان نور بلوچ
دی بلوچستان پوسٹ
مرچی من اِنّاں کُل بلوچ راج ھمے جیڑگ ءَ اِنت کہ نوکیں سال پہ بلوچ راج ءَ چونیں سالے ءُ مستاگے بیت ءُ بلوچ راجی رھشون ءُ پارٹی بلوچ راج ءَ چونیں مستاگے دَے اَنت. مرچی کُل بلوچ پرزندانی چمّ پہ وتی رھشون ءُ پارٹیاں سک اَنت.
مرچی ھزازاں ماتانی بچ ماں کھرّیں زنداناں بندیگ اَنت.مرچی ایوک ءَ ماتانی بچ اِنّاں بلکیں ماتانی جِند گوں وتی زھگاں بندیگ اَنت.
مرچی دو ماہ ءَ بُرز اِنت کہ ماں شال ءَ مئے مات ءُ گھار گوں وتی تپلھیں زھگاں اے سارتیں موسم ءَ دگانی سر ءَ کپتگ اَنت پہ وتی کوپگّانی آجوئی ءِ واستا .بَلے پاکستان ءِ گوشاں مورے نہ وارت ءُ کس مئے مات ءُ گھارانی گپّانی گوشدارگ ءَ ساڑی نہ اَنت. مرچی پاکستانی رسانکدار ھم ھاموش اَنت. مئے توار ءَ دیم ءَ برگ ءَ نہ اَنت.پاکستان ءَ رسانکدارانی سر ءَ بندش جتّگ گُڑا ما وتی ھمے توار چوں دگنیا ءَ سرکُت کن اِیں؟
مرچی ماما قدیر بلوچ ءَ دہ سال ءَ بُرز اِنت کہ ماں شُد ھرتالی بُنجل ءَ نشتگ پہ گار ءُ بیگواھیں پُسّگانی آجوئی ءِ ھاتر ءَ ءُ دگہ ھزاراں بیگواھیں بلوچ پرزند پاکستان گوں دورگیں پندلاں آیاناں شھید کُرتگ ءُ پد ءَ ھمے گُشتگ کہ اِیشّاں منی سر ءَ اُرش کُرتگ من آیاناں جتّگ ءُ شھید کُتگ.
مرچی اِنّاں گوستگیں ھپتاک ءُ یک سالانی تہ ءَ پاکستاں بلوچ راج ءِ سر ءَ زُلم کنگ ءَ اِنت. پاکستان ءِ زُلم ھما روچ ءَ بندات بیت کہ پاکستان بلوچ راج ءِ وتواجھیں سرڈگار ءَ وتی مشت ءَ کنت ءُ بلوچ راج ءَ وتی ابدّی گلام جوڑ کنت.
مرچی بیست سال ءَ بُرز اِنت کہ بلوچ راج گوں نوکیں وڑے ءَ دیم ءَ اَتکگ آ تنظیم ءُ پارٹیانی دروشم ءَ اِنت ءُ مرچی اے جنگ تنظیم ءُ پارٹیانی پابندی ءَ گوں دیم ءَ روگ ءَ اِنت . مرچی پاکستان ءَ ھمے پارٹی ءُ تنظیمانی ھزاراں راھشون شھید ءُ بیگواہ کُتگ.
مرچی پاکستان چین ءِ کمّک ءَ سی پیک ءِ نام ءَ ھزاراں پرزند شھید ءُ بیگواہ کُتگ ءُ کنگ ءَ اِنت، مرچی سی پیک ءِ ھما دگّ کہ ھمے دمگانی تہ ءَ گْوزگ ءَ اِنت.مرچی ھما میتگانی میتگ سوچّگ ءُ بلڈوزر کنگ بوتگ اَنت ءُ میتگانی زھگ ءُ زالبولاں ھوار دگہ بازیں پیر ءُ کماش زندانی کنگ بوتگ اَنت.یکّیں سی پیک ءِ دگّانی سر ءَ انّاں بلکیں بلوچ راج ءِ ھر یک میتگ ءُ لوگانی تہ ءَ پاکستانی ناشرکاریں فوج سر بوتگ ءُ زُلم ءُ زوراکی کنگ ءَ اِنت.
مرچی پاکستان ءُ چین بلوچ راج پرزندانی شھید ءُ بیگواہ کنگ، مال مڈّیانی دُزگ ءُ برگ، درَی مھلوک ءِ بلوچ سرڈگار ءِ تہ ءَ آرگ ءُ نِندارینگ، بلوچ راج ءِ ایدگہ مال ءُ مڈّیاں ھوار نیلیں زِر ءِ برگ ، بلوچ راج ءِ دود ءُ ربیدگاں ھوار بلوچ راج ءِ شھدیں زبان ءِ ھتم کنگ ءَ پہ لانک بستگ.
مرچی اے دگہ دمگانی گپ ءَ یل کن ،ھما زِر کہ پاکستان ءُ چین ءِ واستا یک مزّنیں دادے بَلے ھما زِر ءِ مردمانی یدّاراں پہ زِر ءَ روگ ءُ آھگ ءَ موکل نیست, ھما زِر کہ مردماں وتی ھپت پُشتی زند گْوازینگ. مرچی پانزدہ روچ ءَ بُرز اِنت ھما مائی گِر زھرشانی کنگ ءَ اَنت ,آیانی بس ھمے لوٹ اِنت، مارا شُمئے اے دگہ داداں چہ بے زار اِنت، مارا بس دیمّی زِر ءَ تیاب دپ ءَ یک 800 میٹر پرائی ءُ 1500 میٹر دراجی گودی (بریک واٹر) جوڑ کنگ ءَ ھوار گوں 40 فٹ پرائی ءُ 80 فٹ دراجی آکشن ھالے جوڑ بہ کن اِت دانکہ ما وتی یدّاراں تیاب ءَ آروت بہ کن اِیں ءُ بلوچ وارڈ ءَ ھم سَے راہ جوڑ کنگ ءِ لوٹ اِش کُتگ، بَلے پاکستان اے کسانیں لوٹاں پورا کنگ ءَ ساڑی نہ اِنت. پاکستان ءِ مول ءُ مراد اِیش اِنت کہ زِر ءِ کُل جاہ مند چہ وتی بُنکی میتگاں لڈ ءُ بار بہ کن اَنت ,دانکہ ما وتی مردماں ھمِد ءَ بہ ٹائین اِیں.
نوں مئے رھشون ءُ پارٹیانی زمواری اِنت کہ آ چوں پاکستان ءُ چین ءِ اے پندلاں پروش دات کُت کن اَنت ءُ بلوچ راجی توار ءَ دگنیا ءَ سر کُت کن اَنت. مرچی بلوچ راج ءِ چم پہ وتی رھشوناں سکّ اَنت.
مارا اُمیت اِنت مئے راجی رھشون اے کاسک چٹّانی پندلاں بے سوب کن اَنت ءُ ھمے نوکیں سال ءَ یک جْوانیں یکجائی یے دیم ءَ کار اَنت ءُ بلوچ راج ءَ یک مستاگے دَے اَنت. گْوستگیں 2018 ءِ سال ءَ بلوچ راج ءَ را یک مزّنیں سوبمندی یے رس اِتگ، بَلے تاوان ھم باز بوتگ، دوھزار ھژدہ گوں بلوچ راج ءِ پرزندانی ھوناں گْوستگ.اگاں ما سوبمندیاں بچار اِیں ھم کم نہ اَنت, آ بلوچ لبریشن آرمی ءَ را یک ادارھے نیمّگ ءَ آرگ ءُ بلوچ لبریشن آرمی ءُ یونائٹڈ ِبلوچ آرمی ءِ سلاہ بوگ ءُ بلوچ لبریش آرمی ءُ بلوچ لبریشن فرنٹ ءِ یکجائی پد ءَ بلوچ ریپبلکن گارڈ ءِ گوں بلوچ لبریش فرنٹ ءُ بلوچ لبریشن آرمی ءَ یکمُشت بوگ ءُ دومی دیم ءَ بلوچ ریبپلکن آرمی، بلوچ یونائیٹڈ آرمی ءُ لشکرِ بلوچستان ءِ ھم یکمُشت بوگ، سیمی دیم ءَ بلوچ سِلاہ بندیں تنظیمانی بلوچ لبریشن فرنٹ، بلوچ لبریشن آرمی ءُ بلوچ ریپبلکن گارڈ ءِ براس( بلوچ راجی آجوئی سنگر) ءِ نام ءَ یکّے سنگر ءَ نِندگ پہ بلوچ راج ءَ مزّنیں اُمیت ءُ مستاگے ءَ چہ کم نہ بوتگ، پد ءَ بلوچ راجی تنظیمانی گوں نوکیں تور ءُ رھبنداں دالبندین ءَ چینی کاریندھانی سر ءَ فدائیں اُرش کنگ ءُ پد ءَ کراچی ءَ چینی کونسلیٹ ءِ سر ءَ ھم فلائین اُرش کنگ ءُ بلوچ راج ءِ توار دگنیا ءَ سر کنگ ھم بلائیں سوبمندی اَنت.
گْوستگیں سال ءِ بندات ءَ امریکہ ءِ نیمگ ءَ پاکستان ءَ ناشرّکاریں ءُ دوکا دیوکیں ملکے گُشگ ءُ پاکستان ءِ کمّک ءِ بند کنگ ءِ جار ءُ پد ءَ فنانشل ایکشن ٹاسک فورس ءَ پاکستان ءِ نام گرین لسٹ ءَ آرگ ءُ دیم ءَ اُمیت اِنت بلکیں بلیک لسٹ ءَ ھم ھوار بہ بیت، اے کُل پہ راج ءَ مِستاگ اَنت. اگاں ما گْوستگیں سال ءِ تاواناں بچار اِیں ھم باز اَنت. آ مزّنیں تاوانانی تہ ءَ چہ یک مزّنیں تاوانے 25 دسمبر 2018 ءَ بلوچ لبریشن آرمی ءِ کماش واجہ شھید جنرل اسلم بلوچ اِنت کہ گوں دگہ پنچ سنگت ءَ پاکستان ءِ یک وتکُشے ءَ شھید بنت. اے پہ بلوچ راج ءَ یک مزّنیں تاوانے بوتگ. دومی بلوچستان ءِ تہ ءَ پاکستانی لشکر ءِ دست ءَ مئے ھزاراں بلوچ مات ءُ گھار ءُ ھزاراں بلوچ پرزند شھید ءُ بیگواہ کنگ بوتگ ءُ ھزاراں لوگ ماندارگ بوتگ اَنت.
مرچی مئے بلوچ راج ءِ چمّ پہ وتی رھشوناں سکّ اَنت ءُ وداریگ اَنت کہ باریں اے نوکیں سال ءَ پہ بلوچ راج ءَ چونیں مستاگے دَے اَنت ءُ ھاسکر ھما پارٹی ءُ تنظیمانی باسک ءُ رھشون کہ ڈنّ ءَ نشتگ اَنت، باریں آ اے نوکیں سال ءَ بلوچ راج ءِ توار ءَ دگنیا ءِ تہ ءَ چِینکس سر کنگ ءَ سوبمند بنت یا چو ساری ءِ وڑ ءَ اے سال ءَ ھم انچوش گوازین اَنت؟
مرچی بلوچ راج ھمے اُمیت ءَ چہ وتی رھشوناں کنگ ءَ اَنت کہ بلوچ راجی رھشون اے نوکیں سال ءَ وتی گِست ءُ کینّگاں ھتم بہ کن اَنت ءُ شھید جنرل اسلم بلوچ ءُ ایدگہ شھیدانی لوٹ ءُ ارماناں منزل ءَ سر بہ کن اَنت ءُ سیاسی ءُ سِلاہ بندیں گَل کُل یک مُشت بہ بنت ءُ سِنگل پارٹی ءِ نیمگ ءَ برو اَنت.پرچاکہ مرچی دگنیا ءِ لوٹ بدل بوتگ اَنت مرچی زوراکیں راج نزّوریں راجاں ایردست کنگ ءَ اَنت.اگاں مہ یکدست ءُ یکمشت نہ بوت اِیں، گُڑا بلوچ راج اے دگنیا ءِ تہ ءَ گار ءُ بیگواہ بیت. پد ءَ گِست ءُ گینگ نوابی سرداری ءُ لیڈری ءِ داوا کُل گار بنت ءُ شھیدانی ھون ءُ ماتانی بدوائی مدام مئے پُشت ءَ گون بنت ءُ مارا کدّی شھیدانی ھون نہ بکش اَنت۔
بلوچ راج زندگ بات
بلوچ ءِ تپّاکی زندگ بات
دی بلوچستان پوسٹ: اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
