بی ایس او ءِ راجدپتر ءُ نودربرانی زِمہ واری
کمال بلوچ
دی بلوچستان پوسٹ
بی ایس او ءِ تہ ءَ نودربر وتی کِرد ءَ یک شرّیں وڑے ءَ پیلو بکن اَنت ، چے ءَ کہ بی ایس او بلو چ راجدوستی ءِ چیدگ اِنت۔ پرے ھاتر ءَ پہ بلوچ ورناھاں اے چیدگ ءِ پھریزگ راجی ڈُبّہ ءُ زِمہ واری اِنت کہ آئی ءَ بِہ پلگار اَنت ءُ دیم پہ دیمروئی ءِ نیمگ ءَ گامگیج بکن اَنت ، چے ءَ کہ بی ایس او ءِ پلیٹ پارم ءَ ھزاراں بلوچ پُسّگ شھید ءُ ھزاراں زِندانی اِنت ، پمیشکا گوں بی ایس او ءَ بلوچ ورناھانی یک دلیءُلیکھی ھمگرنچی یے ھست۔ ایشی ءِ مکسد ھمیش اِنت کہ بی ایس او ءَ ورنا سیاسی، چاگردی ، معاشی ءُ چہ راجدپتری زانت ءُ زانگ ءَ سرّیچ کُرتگ اَنت ، پریشکا بلوچ راج مرچی پھربند اِیت کہ بی ایس او آزاد ءِ رنگیں گلے مرچی راجکاری ءِ پِڑ ءَ پہ مُھکمی ساڑی اِنت ۔ اگاں من بِہ گْوش آں کہ مرچی بلوچ سیاست ءُ مزاھمت ھست ءُ دیم پہ مِنزل ءَ راھی اِنت رد نہ بہ آں کہ اے ھمے مدَر گل ءِ برورد اِنت کہ دُژمِن ءِ زُلم ءُ زُوراکیانی دیمپانی ءَ کنان ءُ نوکیں راجدپترے نویسگ ءَ اِنت ، چے ءَ کہ بلوچ ورناھانی گوں بی ایس او ءَ یک انچیں سْیادی یے ۔ ھمے سْیادی ءِ ھُنڈالانی آپ دَیَگ ءُ سبزینگ مارا مئے راجدپتر ءَ ڈسّ اِیت ءُ نزّیکی یے ودی کنت ۔ پرے ھاتر ءَ اے ھبر مزنیں ارزِشتے دار اِیت کہ بلوچ کواس ءُ زانتکار اے نگیگیں جاور ھالانی تہ ءَ وتی کردار ءَ پیلو بکن اَنت ءُ راجی پرز ءَ پوہ بِہ بَہ اَنت دانکہ باندا راجدپتر ءِاندر ءَ زِندگ بکن اَنت ۔
بی ایس او ءِ تاریخ ۲۶ نومبر ۱۹۶۷ بِندات نہ بوتگ ، بلکیں آئی روچ پہ بلوچ نودربراناں نوک ءُ واناکیں راہ شون داتگ۔ نگیگیں جاورانی سر ءَ جیڑگ ءُ مارگ ، چار ءُ بچار بوتگ ، بزاں مردُماں وتی زاتی سیت ءُ نپّانی ھاتر ءَ ھمے گل ءَ را کارمز کرتگ ءُ وتی بے سوبیں ارمان پیلو کُتگ اَنت ۔ ھمے ھبر مرچی پدّر اِنت کہ گلیں راج دیم ءَ اِنت ءُ وتی راجی جُھد ءُ کُوشست ءَ مُلمہ اِنت ۔ پاکستان ءِ کْوزہ ءَ چہ پد پاکستانی زُلم ءُ ناشرکاریانی ھِلاپ ءَ بی ایس او یک پُر زُوریں تاکتے بوتگ ءُ وتی کردارے بلوچ سیاست ءِ تہ ءَ ادا کُرتگ ئِے ۔ مرچی ھمے مئے دیم ءَ اِنت ۱۹۷۰وھد ءَ ڈاکٹر حئی بلوچ ءَ را پاکستانی پارلیمنٹ ءَ سر کنت ، کجام کہ بی ایس او ءِ اولی چیئرمینی ءِ گپ ءَ کنت بلے راست نہ اِنت ، چے ءَ کہ من ھمے گْوش آں بی ایس او ءِ تارِیک اے وھد ءَ بِندات نہ اِنت ، بلکیں اے تاریخ ۱۹۳۱ بُنگیج بوتگ ۔ کجام وھد ءَ انگریز بلوچستان ءَ ھاکم بوتگ ایشی ءِ بُن ھِشت سنڈے من اسکول کوئٹہ ءَ ایر کنگ بوتگ کہ آئی ءِ نام ” بلوچ اسٹوڈنت ایسویشن بوتگ۔ ھمے مارشت بوتگ کہ بلوچ ورنا سیاست ءِ نیمگ ءَ آرگ بوتگ اَنت۔ ھما وھد ءَ ورنا تنزیم کاری بُنگیج کرتگ ایشی ءَ پد مکران اسٹوڈنٹ آرگنائزیشن یا بلو چ ورنا وانندہ گل کوئٹہ ءَ بوتگ۔ بلوچ اسٹوڈنٹ ایجوکیشن آرگنائزیشن کراچی ءَ بوتگ ، چے ءَ کہ راجدپتر وتی آشناھی ءَ وت کنت ءُ راستی ءَ دیم ءَ کار اِیت ۔
اگاں اے درگت ءَ بلوچ نودربر لوٹ اَنت کہ وتی راجدپتر ءَ پٹ ءُ پول بکن اَنت من گْوش آں آ بی ایس او ءَ بِہ وان اِیت ، چے ءَ کہ بی ایس او مرچی اے وھد ءَ یک زانت بکشیں پُژدر ءُ تارِیکے دار اِیت ، پمیشکا اِیشی ءِ زانگ ءُ پُولگ پہ بلوچ ورناھاں ھژدری اِنت ۔ چے ءَ کہ بی ایس او ءَ سر گپ ءُ رپ ، شرگداری ءِ نام ءَ بے سر ءُ پادیں چِست ءُ ایر ھر نوبت ءُ بارِیگ ءَ بوتگ ءُ بُوَگ ءَ اِنت ۔ وھدے بی ایس او ءِ بھر ءُ بانگ ۱۹۶۷کراچی ءَ کنگ بیت ، گُڑا اِے وھد ڈاکٹرحئی ءِ کُمکّ ءَ میر گوس بکش بیزنجو کنت ۔ دومی نیمگ ءَ سیدان مری ھم بوتگ کہ آئی بی ایس او ءِ بُنِکُی دْروشم ءُ ھستمانی برجاہ داشتگ ، چے ءَ کہ گوس بکش ءَ ڈاکٹر حئی دیم ءَ آرگی بوتگ ءُ آرتگ ئِے۔ آئی ءِ سر ءَ ردیں گپ ھم باز بوتگ ، ھمے ھاتر ءَ سیدان مری ءِ بارو ءَ مردم باز کم زان اَنت کہ اے بھر ءُ بانگ دانکہ مرچی ھم ھست ءُ ساڑی اِنت ۔ اگاں ورنا پٹ ءُ پول نہ کن اَنت گُڑا پہ وتی پجّار ءِ رکّینگ ءَ بازیں اڑاندانی دیمپان بَہ اَنت ، چے ءَ کہ بلوچ سیاست ءِ تہ ءَ سرپدی لوٹ اِیت گُڑا تو وتی پُژدر ءِ بابت ءَ زان ئے ءُ سرپد بَہ ئے ، چے ءَ کہ راجدپتر ءِ زانگ پد مردُم نُوں نوکیں راجدپترے جوڑ کنت ءُ دیم ءَ کار اِیت ۔
بلوچستان ءِ تہ ءَ مرچی جاورھال ھمے رنگ ءُ داب ءَ اَنت کہ پہ بلوچ ورناھاں سیاست کنگ سک گْران اِنت ، چے ءَ کہ اے وھد ءَ بی ایس او آزاد ءِ وڑیں یک پُراِیمنیں جمھوری تنزیمے ءِ بازیں باسک ءُ کارکُن ریاست ءِ ٹارچر سیلانی تہ ءَ بند اَنت ءُ دردناکیں زندے گْوازینگ ءَ اَنت ۔ ھمے رنگ ءَ بازیں مھنتی ئیں کارکُن ءُ رھشُون شھید کنگ بوتگ ءُ آیانی جون ماں ویرنداناں چگل دَیَگ بوتگ اَنت ۔ چرئے ھبر ءَ مارا ھمے درس رس اِیت کہ ھمے مردُماں بلوچ راجدپتر زانتگ ءُ پہ راجدپتر ءِ ساٹگ ءَ وتی کُربانی داتگ بلے سرجھل نہ کُتگ دانکہ اے مارِشت پہ آیوکیں پدریچ ءُ نودربراں سر کُتگ ، پمیشکا اے ھبر پاکستان ءَ وش نہ بوتگ کہ آئی اے زانتکار ءُ شیواریں ورناھاناں زِندانی شھید کُتگ دانکہ اے راجی پگر ءَ چہ ھُنڈالاں ولگوج بکن آں بلے داں روچ ء مروچی بے سوب اِنت ۔
پمیشکا من اے ھبر ءَ پہ سِتک گْوش آں اگاں شُما وتی راجدپتر پٹ ءُ پول نہ کُرت گُڑا شُمئے راجدپتر کروجگ بیت ءُ شُما پہ نام ھم کدی نہ مان اِت ۔ اگاں کسے مرچی جھانی راجدپتر ءَ وان اِیت گُڑا الم زانت کہ درباری نبشتہ کار واجہ ءِ دانکانی پد ءَ راجدپتر ءَ چون ءُ چتور رد نویس اِیت دانکہ تو وت ءَ ءُ چہ وتی پجّار ءَ شموشکار ءُ بے زانگ بِہ بَہ ئے ۔ مرچی ھم گوں بی ایس او ءُ راجدپتر ءَ ھمے رنگیں رِپک ءُ پندل بُوَگ ءِ اِنت ، اگاں بلوچ پُسّگ ءُ ورنا انگت وت ءَ زانگ لوٹ اَنت گُڑا وتی راجدپتر ءَ بِہ پول اَنت ، چے ءَ کہ بانداتے پشیمانی ھچ درد ءَ نہ وارت کہ ما وت ءَ بِہ سھڑینیں ءُ تسلّا بِہ دے اِیں ۔ گھتر ھمیش اِنت کہ مرچی وتی دگ ءَ تچک ءُ راات بکن اِیں دانکہ باندا ملامت مہ بَہ اِیں ۔
اے راستے کہ انسانی راجدپتر گوں زُلم ءُ زُورانسری ءَ جوڑ کنگ بوتگ ،بلے راجدپتر ءِ تہ ءَ اے ھم گِندگ کَیت کہ نِزوُر ءُ ایردستاں گوں وتی کُربانیاں ، گوں وتی ھوناں راجدپتر نبشتگ کُتگ ءُ لیکہ زِندگ داشتگ ۔ پمیشکا مرچی اے چکّاس ءِ دیمپان بلوچ ورنا اَنت کہ آیاناں وتی اِیمانداری ءُ بودناکی ءِ بیرک بُرز دارگی اِنت دانکہ دُژمِن بے سوب آ پہ سوب بِہ بہ اَنت ۔
مرچیگیں روچ ءِ درگت ءَ من ھمے گْوش آں کہ مرچی ھم بازیں مردُم گْوش اِیت کہ بلوچ نودربر بی ایس او ءِ نام ءَ مٹ بکن اَنت ، چے ءَ کہ آ بلوچ ورناھاناں ھر ساھت ءُ دمان مانگیشّینگ ءُ چہ راجدوستی ءِ لیکہ ءَ برگشینگ لوٹ اَنت ، بلے پہ اے چکّاس ءِ دیمپانی ءَ بلوچ ورناھاناں لوٹ اِیت کہ راجدوستی ءِ لیکہ ءَ زندگی بزان اَنت اگاں نا چہ راجدوستی ءِ لیکہ ءَ در دو کدم دیم ءَ مرگ پہ ابد تئی گار ءُ بیگْواہ کنگ ءَ میلانک اِنت ۔ پرے ھاتر ءَ پہ بازیں مردُماں راجدوستی ءِ لیکہ گْران بوتگ کہ آیاں اے پاکیں لیکہ پد جتگ ءُ وتی واھشتانی کِشار آپ داتگ ، بلے مرچی راجدپتر کُلّاں یک یک ءَ پدّر کنگ ءَ اِنت کہ کَے کَے بوتگ ءُ کَے کَے اِنت!! پمیشکا ما مرچی بِہ زان اِیں کہ راجدپتر ھر شِر ءُ شرّ ءَ وتی ڈوبر ءَ جاگہ اَنت بلے نامدار ءُ رُزوائی ءِ مانزمان ھر یکّے وت اِنت ۔ پرے ھاتر ءَ من گُڈّی ءَ بلوچ ورناھاں اے کلوہ دے آں کہ آیانی رُوژناھیں آکبت بلوچ گُلزمین اِنت ، پمیشکا پہ آیاں بی ایس او ءِ رکّینگ ءُ پھازگ ھژدری اِنت۔ چے ءَ کہ مرچی اے راجی جُنز دیم پہ مُرادانی مِنزل ءَ رھادگ اِنت اے ھمے بی ایس او ءِ داتگیں برورد اِنت کہ دُژمِن پہ راجی جُنز ءِ پُروش دَیگ ءَ بے سوب بوتگ ءُ مُدامی بیت ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
