کودکی،بی ایس او ءُ بانک کریمہ – سدو بلوچ

کودکی، بی ایس او، ءُ بانک کریمہ             

نبشتہ کار: سدو بلوچ

دی بلوچستان پوسٹ

من کسان اِتاں شر یات نہ انت بلے بگندئے اسکول ءَ دومی یا سیمی تبک ءَ وانگ ءَ اتاں۔ ھمے وھد ات کہ راجی جنز مئے ھند ءُ دمگاں وتی گاماں ھر روچ تیز تر کنان اَت، ھر روچ شور ودان ات۔ جھد اَت، آپریشن اَت، مھلوک اَت، زوراور اَت۔ یک ھالے اتک کہ فوج ءَ اینچو مردم برتگ، پد ءَ ھالے اتک کہ زھرشانی انت، ھالے اتک کہ فوج ءَ اینچو مردم ءِ جون پلاں ویرانگ ءَ دَور داتگ، پد ءَ ھالے اتک کہ ھرتال انت۔ آ زمانگ ءَ مئے دمگاں انٹرنیٹ ءُ سوشل میڈیا یے نیست اَت کہ کلوھے دو منٹ ءَ سرجمیں بلوچاں سر بہ بیت، نہ شھمیں راہ ءُ دگے ھست اَت۔ بلے ھمک ھال پہ وھد مھلوک ءَ سر بیت انت۔ چوش نہ اَت کہ یک ھالے روچے پشت بہ کپ اِیت یا ڈلگچار کنگ بہ بیت۔ ھمک کوچگ، کوہ ءُ گیابانانی ھال، شھر ءُ میتگانی ھال مھلوک ءَ سر بیگ ءَ اَت۔ اے ھالاں لس مھلوک ءَ سر کنوک بی ایس او اَت۔ اے نام (بی ایس او آزاد) ھرچ دیوال ءِ سر ءَ، ھرچ پمپلیٹ ءِ تہ ءَ نبشتہ ات۔ آ وھد ءَ ما بیدے اے بی ایس او ءَ دگہ بی ایس او  نہ زانت۔

ما کسان اتیں بلے مارا اے نارہ پہ دل یات ات انت،
بلوچستان پر قبضہ نامنظور
آزاد بلوچستان زندہ باد
نہ ایران نہ پاکستان،
بلوچستان بلوچستان
ما عہد ءُ قسم پیمان کنیں،
آزات بلوچستان ءَ کنیں

لیب لیب ءَ، راہ ءُ رواجی، برے برے وتسرا پہ بے انانی ھمے نارہ چہ مئے دپ ءَ دراتک انت۔ اے نارہ مارا دوست ات انت۔ برے ھمے نارہ ما وتی کاپیانی تہ ءَ نبشتہ کت انت، برے کہ سیالیچکے یا اسکول ءِ سراتکگیں چاکے مئے دست ءَ کپت ما ھمے نارہ ءُ نام ھما دیوالانی سر ءَ نبشتہ کت انت کہ ھالیگ ات نت۔ من ءَ باز براں انگت سما بیت کہ پہ آشوب ءَ ما گونڈو چہ پیریناں گیشتر ھدوناک بیتگیں بِلّے کہ ما نزانتگ ات آشوب چے یے۔ یا تو بگش کہ مئے دل ءَ آشوب ءِ وتی جتائیں مانایے بیتگ۔ ما جیڑ اتگ اسکول ءَ نوکیں ڈیسک کیت، مئے کر ءَ اسپتال ءُ روڈ جوڑ بیت، میتگ ءِ لوگ پکا بنت، آسراتی بیت ءُ پرے واست ءَ ما ھمینچو گیشتر کہ مردم یکجاہ کنیں، ھمینچو گیشتر کہ زھرشانی کنیں، گشتانک دئیں ھمینچو ذوت تر آشوب کیت۔

بلے ھیر! من گپ ءَ اتاں کہ آ زمانگ ءَ دیوال شھر ءِ کاسد بیتگ اَت۔ ھمے دیوالاں مارا برے برے اے ھال ھم دات کہ پلاں جاہ ءَ بی ایس او جلسہ کنت۔ اے ھال کہ شھر ءِ گوشاں کپت گڑا تیوگیں بازار سر گپت۔ سنگل ڈور ءُ ڈبل ڈور گاڑیانی سر ءَ بی ایس او ءِ سھریں بیرک مِک ات انت۔ جنین ءُ مردین، پیرین ءُ کسانیں ھرچ کس ءَ کہ جاگہ کت آ نشت۔ ما کہ کسان اتیں مئے دل ءَ مدام جت کہ بلکیں مارا نہ بر انت گوں، گڑا ما پیسرا لُنٹ لونجان کت انت ءُ ھمے کہ روگ ءِ وھد اتک وتی دپ پچ لگوشت کہ بِلّے مارا بر انت گوں۔

بی ایس او ءِ ھمراھی ءَ دگہ نامے کہ ھمے جلسہ ءُ جلوسانی تہ ءَ نامدار ات آ ”بانک کریمہ” اَت کہ برے گشتانک دیگ ءَ اَت، برے نارہ جنگ ءَ اَت، برے مردماں یکجاہ کنگ ءَ اَت۔ ءُ ما۔ ما گیشتر پہ ھمائی ءِ گندگ ءَ، ھمائی ءِ گوشدارگ ءَ ھدوناک اتیں۔ نی ھمے کہ جلسہ ءِ یا ریلی ءِ ھال بیتگ ات ما وتی لونس یک روچے پیسر ایر دیان کت انت۔ نی ڈیسک، ھسپتال، روڑ ءُ وشھالی ءِ واب ءَ ھوار مئے دل ءَ دگہ وابے ءَ ھم جاگہ کتگ ات: ما کریمہ ءِ چارگ ءُ گوشدارگ ءَ رویں۔

من ءَ انگت شر یات انت کہ یک روچے من مسیت ءَ جُز ءِ وانگ ءَ پد لوگ ءَ واتر بیتگ اتاں، شھید صالح اتکگ ات مئے لوگ ءَ، ءُ آئی ءَ مارا ھال دات کہ باندا تمپ ءَ بی ایس او ءِ جلسہ انت۔ من مات ءِ گشان ءِ  لمب داشت ءُ مات مجبور کت کہ من الم کایاں گوں۔ دومی روچ ءَ جنین، چک، بچک، پیرین ھرچ کس وتار ءَ جاگہ دیان ات۔ گاڑی پُر بیتگ ات انت ءُ من ھم گاڈی ءِ تہ ءَ نشتگ اتاں۔ گاڑی ءِ سر ءَ بی ایس او ءِ سُھریں بیرک مک ات ءُ ما نارہ جنان اتیں “ماتانی سریگ اِنت ،بی ایس او” ۔۔۔”ایک سرخ سمندر، بی ایس او” داں تمپ ءَ سر بیت ایں۔

تمپ ءَ ھرچ دیوال ءِ سر ءَ ڈاکٹر اللہ نذر ءُ شھید اکبر خان بگٹی ءِ نام نبشتہ ات، ءُ مردم۔۔۔ مردم ھمینچو باز ات کہ لٹ ءَ بجن لٹ زمین ءَ نہ کپ اِیت۔ اے ھزارانی تہ ءَ ات انت۔ من بھہ اینچو مردم مُچّی ءَ نہ دیستگ ات۔ گوں جلسہ ءِ بندات بیگ ءَ منی جان ءَ لرزگے زرت۔ مردمانی بازی ءَ یک تُرسے منی جان ءَ پاد اتکگ ات ءُ وھدے کہ بانک گپ ءِ جنگ ءَ اتک تہ مردمانی نارہ اجب گیشتر بیان بیت انت۔اے اولی رند ات کہ من بانک دیم پہ دیم دیستگ ات۔ بانک گپ ءَ ات ءُ مھلوک گوشداران ات، وھدے کہ بانک ءَ  کَلھے بس کت مھلوک ءَ نارہ جت۔من بانک ءَ چارگ ءَ اتاں ءُ جیڑگ ءَ اتاں گندئے من ھم انچو زبر بیتیناں، انچو گشتانک بداتیں ءُ مھلوک ءَ منارا ھم انچو دلجمیءَ گوش بداشتیں ۔

اسل ءَ اے منی کودکی واھگ ات۔ آ زمانگ ءَ من نہ زانتگ ات کہ اے تھنا اسٹیج ءِ سری گپ نہ انت، گشتانک ءُ نارہ نہ انت،  بانک عمل کنگ ءَ اِنت، پند بُرّگ ءَ اِنت، بیوانکیں راج ءِ توار جوڑ بیتگ ءُ راج ءَ را گشگءَ انت کہ دیم ءَ مناں، شما گوں بہ ات۔ مارا تھنا ھور بیگی انت، مئے ھوری ءُ تپاکی مئے منزل ءَ نزیک تر کنت۔ مارا چہ گُلامی ءِ نہ وشیں جاوراں رکّین اِیت۔

آئی ءَ تھنا ھبر نہ کُت، زوراکی ھم سگّ اِت، کار ھم کُت۔ لوگانی چاپہ، گرانیں راھانی دراجیں پند، ایف آئی آر، وڑ وڑیں پابندی، یکشلیں سرویلینس۔ بلے اے زوراکیاں آ نزور نہ کُت۔ اگاں بہ دیستیں، آ مُدام شھر پہ شھر، کوچگ پہ کوچگ تنظیم کاری کنگءَ اَت، پہ وتی ایردستیں مھلوکءَ اوشتاتگ اَت، دگانی سرا، کیمپسانی تہ ءَ، سیمینار ھالاں گشتانک دیگءَ اَت۔ مردماں پاد کنگ ءَ اَت۔

بانک کار ءَ مدام دیما اَت۔ چہ درستاں بودناک تِر، چہ درستاں توانا تِر اَت۔ آ راجءِ توان ءُ ھاٹیگ جوڑ بیتگ اَت چو کندیلے ءِ وڑ ءَ کہ مُدام تھاری ءَ بے ھاٹیگ کنت۔ گوں وتی شھیدی ءَ آئی ءَ کودکانی چم پچ کت انت، کودک سرپد کت انت کہ عمل چی یے؟ ءُ عمل ءُ واھگ ءِ میان ءَ تپاوت چی اِنت۔

مرچی آ اِد ءَ نہ اِنت، بلے اے آئی ءِ جھد ءِ برورد اِنت کہ مروچی بلوچستانءَ پہ جنین ءَ سیاست گران نہ اِنت، جنین بے توار نہ اِنت، آ اندیم نہ اِنت۔ من جیڑاں اگاں بانک مہ بیتیں، مرچی بگندئے مئے جھد ءِ رَنگ اے نہ بیتگ اَت۔