آزمانک: امروز ءِ بھشت
نبشتہ کار: طاہر میؔر
دی بلوچستان پوسٹ
منی نام جیئند اِنت۔ من مدام ڈنّ ءَ یلہ چراں پرچا کہ منی لوگ سک گرم اِنت ھنچو کہ سگگ نہ بیت۔ بوت کہ گرم نہ اِنت بلے من ءَ گرم کنت۔اسل ءَ چیزے روچ بیت من آپ وریں نُک ءَ ھون ءِ تام کئیت ،منی ھیالاں من وش وش نیاں۔
زی من اناگہ ءَ جیڑ ات کہ وتی ھروڑ بہ بیت کہ وتی اِنت۔ گرم اِنت بلے درامد نہ اِنت۔ نو واتر کنگی اِنت ۔من ڈَکّ ءَ را مُھر ڈک دات ءُ بڈ ءَ کت رہادگ بوتاں پہ وتی لوگ ءَ ۔
کشک آ وڑ نہ اَت کہ من پیسرا اتکگ اَتاں۔ پُلک ءَ روچ ھنچو پچگ ءَ ات کہ گشے تین ءِ آس ءِ سر ءَ ۔ سُچگ پاداں ایر روان ءُ سر ءَ در آھگ ءَ اَت۔ منی دل اَت کہ دیم ءَ بزیں چِشے ءِ ساھگ ءَ داراں دمے بالا کناں ءُ پد ءَ درکپاں بلے من روان اتاں ءُ کشک روان اَت۔نُک ھشک اَت پاد تراول اتاں ڈَکّ ءَ کوپگ لپّڑ کتگ اَت۔
نہ چِشے چماں کپت نہ کہ بُنڈے نہ کش ءُ گوراں سبزیں کھیریں نہ کپوتی کوکوے نہ بلبلے نہ ھدرکے ءُ نہ کہ کُلیڑے ابیتک اَت پرسیگ اَت مزن شانیں جنگل۔
اے ھما جنگل اَت کہ مردماں نام امروز ءِ بھشت کتگ اَت۔منی جند ءِ تہ ءَ ناں وشّی ھست اَت کہ چو دوزہ گندگ آھگ ءَ ات یا اسل ءَ اے بھشت ءَ دوزہ ءِ رنگ پوشیتگ اَت۔ اے جیڑگی گپے اَت بلے من جیڑگ ءَ نہ اتاں ، بوت کنت کہ من شرّی ءَ
سرپد اتاں کہ جیڑہے جند چی ئے پمیشکا من جنزان اتاں ، تھنا جنزان اتاں۔
روان روان ءَ یک بے سریں ڈاکے ءَ سر بوتاں ہر نیمگ ءَ چم کہ چست کتنت اسپیت اسپیتیں ڈاک اَت، من اتاں ءُ منی ساھگ۔ اناگہ ءَ من دیست کہ یک بلُکے ڈاک ءَ دزموش کنگ ءَ اِنت گشے چیزے شوہازگ ءَ اِنت۔ یکبرے دل ءَ گُشت کہ آیتُ الکرسی ءَ بوْان ءُ واتر کن بلے پدا جیڑ اِت کہ مرچی انسان انچو بیمناک اِنت کہ جِن ءُ جاتواں دیر اِنت کہ لڑیتگ۔
من بلُک ءِ دیم ءَ اوشتاتگ اتاں بلے بلُک منی سُد ءَ نہ اَت یک دزموش کنان اَت۔ ”بلّی چے گار اِنت؟ ھینک کپتگ؟” بلْک ءَ دست وتی داشتنت ءُ چم چست کت انت چم انچو گیمرتگ اَتاں گشئے چم نہ اَتاں دو ھورتیں سیاہیں مُھرگ اتاں۔ لنٹانی ھشکی چہ ڈاک ءِ ھشکی ءَ دیم اتاں من زانت کہ مدّتے بیت چہ اے لنٹاں یک لبزے در نہ اتکگ۔ من بلُک ءِ دیم ءَ نشتاں ءُ چہ کوپگ ءَ چاگل ایر کت پہ بلّی ءَ شہارگ ءَ کہ منی دستِ داشت ءُ گشتے۔”انّا ابّا ! ھینک گار نہ اِنت دید گار اَنت۔”
من گشئے گُنگ بوتاں تُرک ءُ نُرک بس بلّی ءَ چارگ ءَ اتاں کہ یک امیتے بے دیدیں چمّاں رژنا اَتے۔ اناگہ ءَ ابیتکیں ڈاک ءَ پاد برمشے اَتک من چم چست کتاں تہ چاراں یک مردکے کہ نوک ریش ءِ تاک اَنت ٹور اِنت تتران اِنت کپان اِنت بلے جنزان اِنت ۔ من اشتاپ اشتاپ ءَ پاد اتکاں وتئی گونیں لَٹ ناکو ءِ نیمگ ءَ ٹال کُت ءُ گُشت۔”ناکو بوشت اے لَٹ ءَ چیر دیان بو کہ مہ کپئے۔”
یک دم اوشتات ءُ پہ بے وسی گشتے۔
”بابی لَٹ کوپگ لوٹ ایت کوپگ دوئیں گون نہ اَنت۔”
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔