آزمانک: تئی گیمُرتگیں زھیر
نبشتہ کار: بیبگر بلوچ
دی بلوچستان پوسٹ
او مھروان !
تو زان ئے یک گپے؟
من مدام ترا نبیسّاں ،ترا جیڑاں ءُ ترا یات کناں، تو برے یک دروشمے ءَ منی دیم ءَ کائے، تو گپے زان ئے ؟ تو من ءَ سک دوست بہ ئے پرچا کہ تو منی زمین ءِ بوہ ءَ کن ئے، تو پُورا زمستانی شپے ئے، انچو کہ ترا یات کناں دل گُش اِیت کمبل ءَ وت ءَ را مانپوش تو یک انچیں ھیالے ئے چہ زند ءِ دْرائیں ھیالاں من ءَ دوسترے،
تو چی ءَ اشتاپی ءِ؟
منی ھیال ءُ وابانی تہ ءَ دیراں نہ جَلّے؟
بلکیں چہ من رَدی یے بیتگ؟
اگاں انّاں! گُڑا سھتُکے گوں من بہ نند من وتی دْرائیں جیڑھاں تئی گُشان ءِ دامُن ءَ کَلّ کن آں، من ءُ تو منی دردانی ،منی جیڑھانی، منی سکّیانی جنازہ ءَ وان اِیں ۔من تئی ساھگ ءَ یک دمانے وپساں ۔ تو وت زان ئے من ءَ کرنے بیت بے واب آں، منی چمانی تہ ءَ مُدام تو مُلور مُلور ءَ نشتگ ئے تئی ھمے مُلوری من ءَ واب ءَ نیل اِیت، بلے من انگت وپساں ، چی ءَ کہ تئی دیدار من ءَ وابانی توک ءَ بیت ءُ من ءَ وپسگ پمِشکہ سک وش بیت۔
من گِندئے ترا گُشتگ اَت کہ بے تو منءَ ھچ وَش نہ بیت ، من چہ تو کہ وهدے دور باں سما بیت منی ارواه چہ من ءَ سستگ من پورا ملکموت ءِ پنجگانی تہ ءَ زندانی آں ، من پِگر کناں کہ چہ اے زندان ءَ من ھچبر آجو نہ باں ءُ ترا جیڑاں داں زند ءِ گُڈی ساھت ءَ چہ وتی ارواه ءَ آجو باں، دمانے ءَ پَد من ٹھک دے آں کنداں پرچا کہ من چہ ھمے جیڑگ ءَ چہ دنیا ءَ پچ لرزاں ءُ پد ءَ دوبر زندگ باں ءُ ھمے زندگ بُوگ من ءَ سک رِیپین اِیت۔
منءَ پھل کن من بیهال آں، ترا من هال نہ داتگ ۔ نوں من مزن ، لاھک ءُ ورنایاں۔ من نوں چو بالاچ ءُ دودا ءَ مات کوهاں سنگاں وتی سرجاه کت کن آں۔ نوں من پہ زمین ءَ گُژن ءُ تُنّ ءُ دگہ ھر وڑیں سَکّی سَگّ اِت کن آں۔ من نوں پَکّا رُستگ ءُ مزن آں۔نوں پہ دل تئی ننگ ءُ ناموس ءَ رکّینت کناں۔نوں پہ دل من ترا بانور کُت کناں۔ نوں پہ دل تو سمبھین ئے وت ءَ را۔۔۔۔۔ نوں تو پہ دلجمی چو ماہ ءَ روک بہ ئے۔
بلے نوں تو سک دیر کُت، من وداریگ آں تو واتر کن ئے، تئی مھر منی دل ءَ زندگ اَنت ءُ من ءَ زندگ بوگ ءِ سِکین ءَ دیگ ءَ اَنت بلے تئی زھیر گیمُران اَنت ، من وت اوں نوں پیر بُوان آں، من تئی گیشیں وداراں نوں چَنگ تَرّ اِتگ آں ءُ چو زِرد ءِ پکیر ءَ ویل آں ، من ھمک شپ تئی ودار ءَ داں دیراں مھتل آں بلے مُدام شپ ءِ نیم ءَ واب کپاں، من ءَ مرچاں تُرس اِیت کہ تئی ودار ءَ پہ مُدامی واب مہ کپ آں ، اِنشپی پد ءَ ترا جیڑانان ءُ کلم ءَ زور پِر دیاناں من داں آگھاں ترا نبیسان باں، گِندئے ھر وھد ءَ منی نبشتگیں کہ گار بوت اَنت بزاں من تئی ودار ءَ واب کپتگ آں۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔