بْرمش ءِ واب – ھُسنہ اسھاک

الم بوانیت

نبشتانک:بْرمش ءِ واب

نبشتہ کار: ھُسنہ اسھاک

دی بلوچستان پوسٹ

بْرمش واب اِنت، واب ءِ تہ ءَ آئی ءِ مات کیت، بْرمش ءَ پاد کنت ءُ گْوش ایت” بْرمش۔۔! برمش پادا۔۔”.

بْرمش وتی چمّاں پچ کنت ءُ گْوش ایت”
اماں تو کُج ءَ شُتگ ئے”؟

مات گْوش ایت” وابیں راج ءِ پاد کنگ ءَ شتگ آں بلَے تو نُوں مہ تُرس، تو نُوں مہ ترُس کہ تو نُوں ایوک نہ ئے۔۔ من وَ شُتگ آں، نُوں دُبر نیا آں۔۔ بلَے تئی واست ءَ ھزار مات، گْوھار ءُ بْرات پیداک کتگ۔۔ بچار تئی پُشت ءَ چینچو مردم اوشتاتگ۔۔ یک مزنیں راجے وَ “.

منی بْرمش! تئی بْرمش من دُور سر کتگ۔۔

بْرمش گْوش ایت”امّاں گُڑا تو کہ واترّ نہ کن ئے، من ءَ بے تو وش نہ بیت”.

مات گْوش ایت”جی ھو منی چُک، انچیں گامے کہ چست کن ئے، چہ آئی ءَ راجے، مُلکے ءُ انسانیت ءَ سِیت رس ایت، گُڑا ترا تئی زاتی وشی گُٹگیر کنگ کپ انت۔۔ اے چاگرد، اے شھر ءُ میتگ کہ اد ءَ تیوگیں انسانیت ءِ جند نہ گْواہ ایت، رسترانی جنگلے جوڑ بوتگ۔۔ اد ءَ ھچ انسان، ھچ ساہ دار، رک نہ اِنت۔۔ مزن تا کسان، کماش، زالبول، ورنا، تئی لوگ، تئی مال ءُ مِلکت، تئی دلوت، ھچ۔۔۔ من بزانتیں کہ منی ساہ ءِ کُربانی ءَ اے راج، اے وڑ ءَ پاد کیت، من وت ءَ دگہ دیری کُربان کتگ ات”۔۔

بْرمش گْوش ایت”اماں! تو گُڑا پد ءَ نیائے”؟

مات گْوش ایت”من جسمانی سُورت ءَ چہ تو جتا بہ آں بلے ارواھی سورت ءَ ھر ساھت، ھر دمان، ھر پاس ءَ ترا پانگ بہ آں، ھردیں من ءَ یات کار ئے، گُڑا مہ گْریو ئے بلکیں بہ کند، گَل بُو کہ تئی مات ءَ پہ آشوب ءَ شھیدی نسیب بوتگ یک نامے، یک کردے، یکیں شپے ءِ تہ ءَ چینچُکیں بدلی یے آؤرتگ ئِے۔۔ کہ نُوں ھر جنین ءِ تہ ءَ ھمے ھمت، ھمے جزبہ پیداگ بوتگ کہ نُوں ھرکس وتی ھک ءِ ھاتر ءَ وتی ھک ءِ سر ءَ اے رستراں پْروش دات کنت۔۔ کہ اے رستر نوں چہ ترُس ءَ سْرین پْروش انت”۔۔

گُڈسر ءَ بْرمش گْوش ایت”اماں تو کہ دائمی رو ئے، من ءَ گُڈی رند ءَ امباز بکن”۔۔

مات گْوش ایت”منی چُک! من رو آں۔۔ ترا موکل اوں نہ کن آں۔۔ پمیشکا ترا امباز اوں نہ کن آں کہ نُوں تو پہ منی امبازاں ھیلدار مہ بُو۔۔ سبر ءُ سگّ ءُ اوپار ءِ ساھگ ءَ بہ رُد۔۔ داں مزن بہ بُو۔۔ دلیر بہ بُو۔۔ ھرکس بزانت کہ تو شگید ملک ناز ءِ زھگ ئے۔۔ تئی سر ءَ تئی راج ناز ءُ پھر بکنت”۔۔

بْرمش چہ واب ءَ گُڑ ایت ءُ چار ایت مات اد ءَ نہ اِنت۔ آئی ءَ یات کار ایت ءُ بہ چکند ایت۔۔ گْوش ایت”اماں تو زندگ ئے۔ !
من تئی بگل ءَ زندگ آں”.


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نوکتریں