آزمانک:رُخصت اُف اوارُن سنگت
نبشتہ کار : نادیہ بلوچ
دی بلوچستان پوسٹ
کندیل ءَ باریں چینچو نمدی نبشتہ کُت پہ وتی مھروان ءَ ھمُک شپ نِشت رھمین ءِ سوت ئِے پِر کُت ءُ نبشتہ ئِے کُت آ ھمے ھاسٹل ءِ کُوٹی ءَ نِشتگ اَت اے کُوٹی ءَ دِگہ دو جِنک ھست اَت آ ھردو نادراه بلدی ءِ نودربر اِت اَنت کندیل ءِ جند آرٹس ءِ نودربرے اَت ، بلے آئی ءَ نہ زانتگ اَت کہ آئی ءَ چہ نکش ءُ نگار ءَ گیش نبشتہ کنگ ءِ شوک اَت، کندیل ءَ نہ زانتگ اَت کہ آ مھر ءِ آس ءَ سُچ اِیت ءُ بلدیں نبشتکارے جوڑ بیت، باز رند ءَ کندیل ءَ نمدی ءِ ھمبراھی ءَ آزمانک ھم نبشتہ کُت بلے نبشتگیں نمدی کندیل ءَ مُدام چیر دات اَنت ءُ آزمانک ءِ سر بُر ءَ کتابانی سر ءَ اِیر اَت اَنت. یک روچے شاری ءَ آئی ءِ نبشتانک ونت اَنت (شاری نادراه بلدی ءِ نودربرے اَت) ءُ گُوشت ئِے کندیل تو لبزانک چہ کُجا در بُرتگ تو وَ رنگانی درگت ءَ وانگ ءَ ئے ؟
-اے زیبائیں ھیال ءُ اے برھداریں سسّا تو چہ کُجا آؤرتگ اَنت ما ءُ تو نو دو سال سرجم اِنت کہ ھواریں ما ترا بھ نہ دیستگ کہ تو چُشیں جیڑوکیں مردُمے ءِ۔
اے جیڑگ اے لبزانی تہ ءَ گم ءِ کِسّہ تو چہ کُجا دربُرتگ باور کن ما نہ زانتگ کہ مئے کوٹی ءَ نبشتکارے ھست ھو اے راست اِنت کہ تو گپّ کمّ کن ئے بلے سِتک بہ کن من نہ زانتگ کہ تو کِسّہ ءِ ساچگ ءَ بلَد ئے تو چو بکن گیشتر نبشتہ بکن ءُ کتابے ءِ دروشُم ءَ شِنگ اِش بکن.
کندیل ءَ شاری چار اِت ءُ شر کند اِت
“شاری ءَ درّائینت من و ھرابیں گپّے نہ کُت “
شارُل منی شوکیں مردُم دوستیں گوھار من کند اِت پمِیشکا کہ تو منی پیمیں بے زانت ءُ ربودگیں مردمے ءَ نبشتکارے گوشگ ءَ ئے اگاں ناکو اے آر داد ءُ واجہ گُلزار سھیگ بہ بنت گُڑا دل ءَ کار اَنت کہ مئے پیمیں بے زانتیں مردمے ءَ نبشتکارے گوشگ بوگ ءَ اِنت –
من نبشتکارے نہ آں ، من تھنا وتی ھیالانی گرنچاں زُرت نہ کناں گُڑا تاکانی سر ءَ ریچان اِش ءُ اے الّم نہ اِنت کہ ھر کس نبشتہ کنت ءُ آئی ءِ نبشتانک شنگ کنگ بہ بنت۔
بلے چوناھائی ءَ کندیل ءِ جند سرپد نہ اَت کہ آ نبشتہ کنگ اِنت چے ءَ ، بیت کنت آ وتی تاھیر دیگ ءِ ھاتر ءَ نبشتہ کنگ اَت ءُ اے ھم بیت کنت کہ آئی ءَ نہ لوٹ اِت کہ آئی ءِ ھیال گار بہ بنت بلے کندیل ءَ نبشتہ کنگ ھما وھد ءَ بنا کُتگ ھردے مومن ءَ آئی ءَ اولی نمدی ءِ پسّو ھازر مُراد ءِ اے دوئیں گالاں چہ داتگ اَت
” اول ءَ زمین رند ءَ منی مات گُڈی تو
جنگ ءَ اگاں نہ مُرتاں تئی وامدار باں”
اے دوئیں گالاں داں دو ماه ءَ کندیل مزنیں جیڑگے ءَ دور داتگ اَت کندیل ءَ زانت کہ مومن ءَ آ دوست بیت بلے زمین ءَ چہ گیش اِناں مومن ءَ نہ لوٹ اِت کہ کندیل گوں آئی ءَ گپّ بہ کنت ءُ گیشتر مھر ءِ سانکُلاں بندیگ بہ بیت پمِشکا آئی ءَ ھردے کندیل دیست وتارا اَنديم ئِے کُت آئی ءَ نہ زانتگ اَت کہ کندیل نوں دلجم اِنت کہ آ آئی ءَ نہ رَس اِيت بلے چُشیں روچے نیست اَت کہ کندیل ءَ پہ مومن ءَ نمدی یے نبشتہ نہ کُت۔ پد ءَ دُراھیں نمدی آئی ءَ ایر کُت اَنت آئی ءَ ھرّوچ نوکیں گپّے نبشتہ کُت باریں چینچو گپّ آئی ءِ دل ءُ ھاٹیگاں مان اَت۔
کندیل ءَ نمدی گوں کسانیں اوستے ءَ ایر کُت اَنت کہ بلکیں روچے ناں روچے مومن واتر بہ کنت ءُ آئی ءِ چمّ پہ نمدیاں بہ کپ اَنت باریں چے ءَ آئی ءَ اوست اَت کہ مومن واتر کنت بلے جنگ آماچیں سرزمین ءَ تھنا وتی اندر ءَ ھون دیتگ شاتکامی پہ آیاں تھنا لبزے بیتگ ءُ ماتاں وتی بچّ گوں اے ارادگاں کوھاں دیم داتگ اَنت کہ اگاں واتر بنت گُڑا گوں بیرک ءَ ھاک ءِ میار اِش کنیں لگوری پہ بلوچ ءَ چو ھرامیں چُکّے ءِ وڑ ءَ اِنت کہ پت ءِ پجار ئِے نیست۔
کندیل ءِ اے اوست کہ مومن واتر کنت چو زدگیں مُرگے ءِ پیم ءَ اِنت کہ بال کُت نہ کنت، کندیل ءَ گوں نبشتہ کنگ ءَ وتی شپ روچ کُت اَنت ءُ وت ءَ تاھیر بکش اِت بلے مھر ءِ آس ءَ کے رکّ اِتگ کہ کندیل بہ رکّ اِتیں
یک روچے بیگاہ ءِ ساھت 5 ءَ کندیل ءَ وتی گوانکو ءَ رسانکدر چار اِت گِند اِیت مومن ءِ اکسے ءُ نبشتگ
“رُخصت اُف اوارُن سنگت ”
We depart to meet again
کندیل ءِ گوانکو لگُشت ءُ جھل ءَ کپت آئی ءَ نہ زانتگ اَت کہ آئی ءِ سرجمیں بالاد لگُشت اَنت مھر ءِ آس ءَ.
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-