نمدی یے پہ وتی مکّھیں مات ءَ
نبشتہ کار: کوھسار کندیل
دی بلوچستان پوسٹ
دْروت ءُ دراہ بات ئے امّا جان، اُمیت کناں تو وش ءُ جوڑ ئے ،بگند ئے گمیگ بہ بہ ئے۔۔ بلے گمانی سَگگ ماتانی مستریں ھُنر اِنت۔ من نہ زاناں تو اے درد ءُ دوراں اوپار کنگ ءَ ئے باریں چُنت سال اِنت تو من ءَ نہ دیستگ، ءُ من ھم ترا نہ دیستگ۔ مئے میان ءَ اے دُوری باریں داں کد مان اِیت، بلے تلوسگ چہ دوئیں دیماں، یکیں کساس ءَ اِنت۔ تو وَ ماتے ئے زاھر اِنت چو جیڑ ئے کہ منی بَچ باریں چون اِنت۔۔ ورگ ئِے دل ءَ کیت، وپس اِیت واب کپ اِیت؟ گَل اِنت؟ بچکند ءُ کندگ زانت؟ سرجاہ ھست اود ءَ یا وتی سستگیں چَوٹّاں سر ءِ چیر ءَ کنت؟ امّا من زاناں تو پہ منی آسودگیں سورت ءَ تلوس ئے۔۔۔بلے من پہ تئی سورت ءِ آسودگی ءَ دست ءُ پاد جنگ ءَ آں۔
مُدّتے بیت کہ من چہ تئی چماں چہ اندر آں، بہ گند ئے تو پاس جن ئے ءُ من ءَ گیر کار ئے کہ بازیں درد ءُ اندو تو پہ منی دُوری ءَ کمایگ ءَ ئے۔ زاناں کہ تئی دست ءِ تزبی ءِ مُھرگ نوں رنگ یل دیگ ءَ اَنت کہ مدام من ءَ جیڑ ئے ءُ گریو ئے، پد ءَ دل تئی کودکے کہ دوا اِنت سھتکیں ارس ریچ اِیت گُش ئے مات مرات(بلوچ ءِ مات چک ءِ گماں یا مرگ ءَ وتی کنت) بہ گند ئے پہ من ءَ اے چیزُوکے سال بوت کنت، بلے تو ماتے ئے پہ ترا اے دُوری کرنے ءَ چہ ھم گیش اَنت، تئی مھرانی یک پاسے ءِ ھک ھم من پیلو کُت نہ کُتگ۔
زندگی ءَ ھر انسان ءِ وتی مارشت بنت وتی واب بنت، یک گُھارے پہ برات ءَ ھزار واب گند اِیت انچو یک ماتے ھم وتی بدن ءِ ٹُکّر ءَ پہ وتی چُک ءَ ھزاراں واب گوں آگھیں چماں گند اِیت۔ من کہ چہ تئی دلبند ءَ ساہ زورگ بندات کُتگ داں گُلزمین ءَ وتی پاد دَور داتگ اَنت، بازیں جاھاں تئی دُوری، تئی مھر، تئی ودار دُرست مار اِتگ اَنت، زمین ءِ ھر رنگ ماتی تئی چھرگ ءَ جنت، من کہ چہ دوریں سپراں واتر اَتکگ آں گلزمین ءِ دلبند ءَ سَر ایر کتگ، منی دمبرتگیں ھر بند بند ءَ تئی مھر مارِ اِتگ اَنچو تئی مھرانی وڑ ءَ گلزمین ءَ وتی دلبند سر ءَ من ءَ اَمبازاں زُرتگ ءُ لیلو داتگ۔
ماتی تئی مھر ءِ رنگ ءَ گلزمین ءَ اَبید کس نہ جنت، مرچی ساہ دستانی دل ءَ کُتگ بس پہ ھمے مھرانی رکینگ ءَ کہ ھچ درآمدے ءِ پاد مئے ماتین گلزمین ءِ دلبند ءَ ایر مہ بیت ھما گلزمین کہ ھما من ءَ ترا گوں ھوار دُرستاں وتی اَمبازاں جاگہ دَنت۔ماتی! جنگ ایر بارت من ءَ، من ءَ گوں ھوار تئی دُرستیں واباں، بلے جنگ اِنت کہ ما ھست اِیں، جنگ اِنت کہ مرچی من تئی یک یک مھر ءَ مارگ آں۔
ماتی من کہ وھدے تئی بان ءِ پیژگاہ ءَ سر باں وتی سر ءِ چادر ءَ منی دیم ءَ ایر بکن، من پہ تئی مھر ءِ وشبو ءَ باز تلوستگاں، پد ءَ وتی دست ءَ منی پیشانی ءِ سر ءَ ایر کن، من ءَ لیلو بدے وتی زانسراں چہ من ءَ واب گیج ءُ گلزمین ءِ دلبند ءَ ایر کن، بس ماتی دُوا کن کہ تئی بچ داں گڈّی ساہ ءَ وتی پرز ءَ پیلو کُت بہ کنت ءُ مدام چو البرز ءِ کوہ ءَ مھکم بہ بات، دگہ منی نیمگ ءَ سلامتی اِنت، مرچی ماھکانی اِنت ءُ دُور چرتانی توار اِنت، ءُ گْوات نرم نرم ءَ کشگ ءَ اِنت، اے سھت ءَ من چہ ترا اجازت لوٹاں کہ من لھتے ھمراھانی پانپایاں ءُ آ پہ منی آگاھی ءَ واب اَنت۔
تئی ءُ گُلزمین ءِ بَچ
کوھسار قندیل
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-