TBP Balochi

بلوچستان ءِ جتاجتائیں دمگاں پاکستانی پوج ءُ چاریگ ءِ سر ءَ بیتگیں اُرشانی زمہ واری بی ایل اے ءُ بی ایل ایف ءَ منّ اِتگ اَنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں مستونگ ءُ پنجگور ءَ دو جتاجتائیں کاروائیاں زورگریں پاکستانی پوج آئی ای ڈی اُرش ءَ نشانگ کرتگ ءُ دزگیریں کارندہ کُشتگ-

جارکش ءَ گوشتگ بلوچ لبریشن آرمی ءِ سرمچاراں مستونگ ءِ دمگ مَرو کنڈ ءِ ھند سر ءَ زورگریں پاکستانی پوج ءِ بمب ڈسپوزل ٹولی ءِ پیادگ کارندہ ھما وھد ءَ اُرش ءِ نشانگ کتگ وھدے آ راہ ءِ کلیئرنس ءَ دلگوش بیتگ، تراک ءَ زورگریں پوج ءِ سے کارندہ جاہ پہ جاھی مرتگ اَنت-

جارکش ءَ مئے سرمچاراں سے شمبے ءِ روچ ءَ پنجگور ءَ زورگریں پوج ءِ یک کارندھے دودا خان ء دین محمد جھمنند وشبود، پنجگور پاردان ءِ دمگ ءَ ھما وھد ءَ دزگیر کرتگ وھدے آئی ءَ دروشم مٹ کتگ ءُ چاریگی ءِ نیئت دمگ ءَ سُر پُر کنگ ءَ بیتگ-

جارکش ءَ گوشتگ دودا خان ءَ پٹ ءُ پول میان ءَ زورگریں پوج ءِ سروس کارڈ ءَ ھوار ٹریکنگ چِپ دزکپتگ اَنت وھدے کہ اشی ءَ جُست ءُ پُرس ءِ میان ءَ آئی ءَ منّ اِتگ کہ آئی ءَ دروشم مٹ کتگ بازیں مدتے ءَ چہ زورگریں پوج ءِ واستا چاریگی ءُ کمکاری ءَ کنگ ءَ بیتگ- کارندہ ءَ منّ اِتگ کہ آئی ءَ را ٹریکنگ چِپ دمگ ءَ سر کنگ ءَ ٹاسک دیگ بیتگ بلے سرمچاراں راہ ءَ آ دزگیر کرتگ-

جارکش ءَ گوشتگ پوج ءِ کارندہ دودا خان ءَ منّ اِتگ کہ آ زورگریں پوج ءِ ھمراھی ءَ پوجی زوراکیاں تچکی ءَ ھوار بیتگ اود ءَ آ لوگاں ماندارگ ءُ ورنایانی زورانسری بیگواہ کنگ ءِ جرماں ھوار بیتگ-

جارکش ءَ گوشتگ کہ بلوچ لبریشن آرمی ءِ سرمچاراں زورگریں پوج ءِ کارندہ پاردان ءِ دمگ ءَ کُشتگ ءُ گُڈی آسر ءَ سر کتگ-

ھمے وڑ میجر گوھرام بلوچ ءَ وتی شنگ کتگیں درشان ءِ تہ ءَ گوشتگ مئے سرمچاراں تمپ ءِ ھند ملانٹ ءَ برجاھیں پاکستانی پوج ءِ پانگس گوں گرینیڈ لانچراں نشانگ کرتگ ، گرینیڈ لانچر بنجل ءِ تہ ءَ کپتگ انت زورگریں پاکستانی پوج ءَ جانی ءُ مالی تاوان بوتگ-

کاگدے پہ ترا

نبشتہ کار: سنگین بلوچ

دی بلوچستان پوسٹ

‏‎زَمین، جَنگ، وتن پھازی، پہ زمین ءِ وارساں تئی جَنگ ‏‎درست وتی جاہ ءَ مُھکمی ءِ جار ءَ جَنگ ءَ اَنت۔ آزمان، زَمین، زِر ءِ لھڑیں چول من سدّکاں کِہ تئی وپا ءِ گواھی ءَ دے اَنت پہ ھاک ءَ۔ شانتل، بُلبل، شال ءَ زھگے ءِ آزردیں بچکند، پیریں کماشے ءِ دَست ءِ ھسا کُل پہ تئی شیدائی ءَ کِسّہ کار اَنت۔ اِے مُچ راستی اَنت بَلے من ءَ تئی دروگ دوستِر بنت۔

‏‎کُجام دروگ! تو بہ گْوش ترا پہ من زھیر نہ کنت؟ ‏‎تو بھ منی ترانگاں نہ کپتگ ئے،تو کمّے جیڑ اِتگ کہ ھست کسے پہ من ودار ءَ اِنت؟ تو کمو سرگوز کُتگ زمین ءِ مِھر ءُ تھنا منی مِھر ءِ لالچ کُتگ ۔اناں! تو اِے ھم یات نہ کُتگ کہ تئی روگ ءَ کسے گنوک کُتگ، تئی روگ ءَ سان دَور داتگ زندمان ءِ سر ءَ یا چِنچو ارمان آدروی ءِ نشان بوتگ اَنت۔ جاناں تو اِے کوھانی میان ءَ، زمین ءِ دلبند ءَ، ھاک ءُ پُلکانی تہ ءَ کمو ھم وتی دیوانگ ءَ نہ مار ئے؟

‏‎تو جَنگی ساھتاں وھدے گُٹگیر بہ ئے ءُ جیڑ ئے نوں نیست ھِچّ وس ءُ درے، ناں اوستے مھکمیں، نا شناسیں راہ ءُ کشکے کہ ساہ ءُ جان بہ رکّ اَنت تَاں من تئی ترانگاں نیاں؟ اگاں من نا گڑا اکسے ھَم منی پشت نہ کپ اِیت آزمان ءَ کہ ترا توانگِر بہ کنت؟ منی بچکندگے ھم درا نہ بیت کہ تئی گرانباریں پند ءَ سُبک بہ کنت۔ یا کندگے جنگ ءِ میان ءَ نہ کپت تئی  گوشاں کہ ترا چہ ھمُک تُرس ءَ دور بہ کنت۔منی سنگھے ءِ توار! پادینکے ءِ برمش ھِچ نہ کپتگ تئی گوشاں انگت کہ ‏‎تو مار اِت بہ کن ئے من ءَ۔ من چہ تو دور ترا مارگ ءَ ‏‎آں۔

‏‎تئی ھیالاں گوں زندگی ءِ روچاں گْوازینگ ءَ آں ۔ پہ تئی توارے ءَ چینچو ھدوناک آں۔ کہ تو بہ گْوش ئے من ءَ پہ تو زھیر کتگ۔ اے جنگی ساھتاں، اے گرانیں پند ءُ گژنگی ءَ تو منی سکین ءُ ھاٹیگ بوتگ ئے، منی مھکمی بوتگ ئے۔ ‏‎جمبر کہ مان شان اَنت ساھیل بیت من تئی ترانگاں کپاں تئی نام ءَ گوں بالی مرگاں گران ءُ وت ءَ تسلہ دے آں کہ تو اے ساھتاں گوں من ھبر کنگ ءَ ئے۔

“‏‎تئی ودار ءَ زندگی ءِ روچاں چو بندیک ءَ تاب دیاناں کہ تو پرمن بْیا ئے”

‏‎تو دِلجم ءَ شموشتگ من ءَ۔ مھری ساھتاں من مُدامی ترا گیر کاراں۔وھدے دو مردم گِنداں یَک دومی ءَ پہ مھر چارگ ءَ اَنت، یکے دومی ءَ گوں بچکندگ ءَ اَنت، سُھریں پُلے، گُلابے، سنجے، ھوری ترمپے ھمُک زیبائیں چیز من ءَ تئی ترانگ ءَ گیج اَنت، من ترا اے زیبائیانی ساھتاں سما کناں گڑا تو چونی ءَ اَچ من بے ترانگ بوت کن ئے! من ھرکُجا بِہ باں گوں تئی ھوری ءَ پجارگ باں ۔ چہ تئی نام ءَ زانگ باں، تئی وَ نام ءِ شھرے آباد منی باتِن ءَ، تو کُجا کُجا گوں نہ ئے؟

‏‎من وَ اے ھم جیڑ اِتگ بِلّے زَمین ءَ پہ ھِچّ نہ کُتگ بلے اَچ تو پد من ھمُک ھما کار ءَ کناں کہ من ءَ اَچ تو ءُ زَمین ءَ نزیک کنت، پہ من نوں جلواناکی تئی ھمراھداری اِنت، پہ من نوں مِھر ھمیش اِنت کہ من ءُ تو ھردو جَنگ بِہ کنیں، پہ وتی واباں، پہ ھمُک ھما جیڑ اِتگیں ساھتاں کہ ما وتی ھیالانی توک ءَ نکش کُتگ اَنت ءُ جاوراں مارا آیانی پیلو کنگ ءَ وھد نہ داتگ، ھمُک ھما مِھراں سارت ءُ ھونکیں کِشکے بہ رند اِیں۔ ‏‎کِہ مُلگِر ءُ بدواھاں اَچ ما پُل اِتگ اَنت۔ نوں تئی اِے دیوانگ تئی پیم ءَ اِنت ۔ نوں اِیشی ءَ ھِچّ چُرت نیست زمانگءِ ۔ زمانگ ءَ ابید بَلے من ءَ وتی جھان ءِ چُرت پِر اِنت، ھما جھان کہ من تو ھوری ءَ اڈ کُتگ اَت، ھمود ءَ کہ تھنا من ءُ تو بہ ایں۔ آ جھان مروچاں ابیتک اِنت ابید تو۔ تئی رنگانی بُروش تھنا ترا گون اَت، بے تو من چون اِے ھامگیں جان ءِ رگ ءُ ریشگانی ٹپاں درمان کُت کناں۔

‏‎تو کہ ھمراہ مہ بہ ئے منی اندْر ءَ آ توانی ءَ کَے آؤرت کنت کہ جھان ءَ رنگین بکنت ءُ جلواناکی ءِ ھلوتاں سرجمیں جھان ءَ آتار بہ کنت۔ تو، مئے واب، ءُ کسانیں زندمان ئے کہ ما وتی وابانی انْدر ءَ ٹھینتگ اَت، آ جھان ءَ تئی پکار اِنت ءُ زان ئے من ءَ ھَم تئی ھستی ءِ مستاگ وتی زندمان ءِ توک ءَ الّم اِنت۔ واب ءُ کول درست مھتل اَنت ۔پہ تئی وش آتکی ءَ ساڑی آں۔ اِے رندی تئی کھولانی سرجمیں مِھر ءَ پُر مانا کنت، مھر ءِ نام ءَ ھما جوریں بٹاکانی واھُنداں بے ساہ کنت۔ گوں تئی آیگ ءَ کھولانی رنگ رُژنا بنت، سِتکے کہ دِل ءَ ھست اِنت پہ ترا آ سرجم بیت ءُ من پہ پھر گْوشاں، مِھر کَے ءَ گْوشتَگ دروگے۔
‏‎
نوں نیاں من کسی داب ءَ
نوں منی ھمُک داب تئیگ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

اوگان طالبان ءِ سرکار ءِ جارکش ءَ گوشتگ کہ پاکستان ءَ اے آپریشن کنڑ ءُ پکتیکا ءِ سیمسری دمگاں کتگ اَنت بلے پاکستان ءَ انگت ءَ اے بابت ءَ ھچ درشان دیم ءَ نیاؤرتگ انت۔

طالبان سرکار ءِ جارکش ءَ سئے شمبے ءِ روچ ءَ گوشتگ کہ اوگانستان ءِ جتا جتائیں دمگاں پاکستان ءِ بالی اُرشانی تہ ءَ کم چہ کم 10 مردم بیران بوتگ اَنت۔

اے ایف پی ءِ ھال رسانکی ادارگ ءِ رد ءَ اوگان طالبان ءِ جارکش زبی اللہ مجاھد ءَ وتی چاگردی پوسٹ ءِ تہ ءَ گْوشتگ: ’پاکستانی لشکر ءَ یک لوگے ءِ سر ءَ بمب تراک کتگ کہ ایشی ءِ آسر ءَ خوست ءِ اُستان ءَ 9 زھگ (پنچ بچک ءُ چار جنک) ءُ یک جنینے بیران بوتگ انت۔‘

آئی ءَ گیش گوشتگ کہ پاکستانی لشکر ءَ کنڑ ءُ پکتیکا ءِ سیمسر ءِ دمگ ھم گوں بالی اُرشاں نشانگ جوڑ کتگ اَنت کہ اود ءَ دگہ چار لس مردم ٹپیگ بوتگ اَنت۔

پاکستان ءَ انگت ءَ اوگان سرکار ءِ جارکش ءِ اے گپ ءِ سر ءَ ھچ گپ نہ جتگ۔

گمانی رنگ ءَ پاکستان ءِ اے کاروائی پشاور ءَ ایف سی ءِ ھیڈکواٹرز ءَ بیوکیں وتکش اُرش ءَ پد کنگ بیتگ-

ھچ گل ءَ اے اُرش ءِ زمہ واری نہ زرتگ۔ بلے پاکستان ءِ گوستگیں اُرشانی زمہ واری تحریک طالبان پاکستان ءِ سر ءَ ایر کنگ بوتگ انت کہ اسلام آباد ءِ گشگ اِنت کہ آئی ءَ اوگانستان ءَ ایمنیں پناہ گاہ ھست اَنت۔ کابل ءَ اے بھتام رد کتگ انت۔

ھمے ماہ ءَ اسلام آباد ءَ دگہ وت کُش اُرشے ءَ 12 مردم بیران بوتگ اَنت کہ ایشی ءِ زمہ واری پاکستانی طالبان ءَ زرتگ ات۔ اسلام آباد ءَ گشتگ کہ اُرش ءَ ھواریں جنگولی سیل ءَ ھر گام ءَ اوگانستان ءَ ھائی کمانڈ ءِ رھشونی کتگ۔

پاکستان ءَ اے اُرش اکتوبر ءَ سرحد ءِ سر ءَ بوتگیں جنگ ءُ جیڑہ ءِ پد ءَ بوتگ انت کہ آ جنگ بندی ءِ گوں نزوریں جنگ بندی ءَ آسر بوتگ انت۔ دوحہ ءُ استنبول ءَ گپ ءُ تران ءَ پد ھم ھچ وڑیں مھکمیں تپاکی ءِ سر ءَ دست نہ کپتگ ءُ ایمنی ءِ جیڑھانی سر ءَ دوئیں ملکانی نیام ءَ جیڑہ برجاہ اَنت۔

دومی نیمگ ءَ خیبر پختونخوا ءِ سر وزیر محمد سھیل آفریدی ءَ فرنٹیئر کانسٹیبلری ءَ بیران بوتگیں مردمانی جنازہ ءِ نماز ءَ بھر زرتگ۔ بنجاھی وزیر ءَ آھاناں سھر چکیں دروت ءُ ستاشانی کتگ –

بلوچستان ءِ دمگ چہ پنجگور ءُ کراچی ءَ پاکستانی پوج ءَ دگہ شش مردم آوار جتگ ءُ بیگواہ کتگ اَنت-

گیشیں ھالانی رِد ءَ پنجگور ءِ تھسیل پروم ءَ ءَ پاکستانی پوج ءَ پنچ مردم کہ آیانی تہ ءَ عبدالغفار ء ملنگ، حامد ء داد محمد ءُ مجید ء رشید ءَ ھوار ءَ مری ٹک ءَ چہ سیادی داروکیں دگہ دو مردم ھوار اَنت- کہ آوار جتگ ءُ ناشناسیں جاھے ءَ برتگ اَنت اے مردم پروم ءَ پہ کار ءُ روزگار مزدوری ءِ درگت ءَ جھمنند بیتگ اَنت-

ھمے وڑ کراچی ءِ دمگ چہ لیاری سرگوات ءَ پاکستانی پوج ءَ رکشہ ڈرائیور شاہ زیب صمد ھم آوار جتگ ءُ ناشناسیں جاھے ءَ برتگ-

بیگواہ کنگ بیتگیں مردمانی کھولاں وتی دوستناکانی یل کنائینگ ءِ لوٹ کتگ- زانگ بہ بیت بلوچستان ءَ اَبید کراچی ءُ بلوچانی زورانسری آوار جنی ءِ درچ یکشل ءَ برجاہ ءَ اِنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ 24 نومبر ءِ سُھب ءَ مشکے ءِ دمگ پروار ءَ پٹرول پمپ ءِ نزیک ءَ بند ساچی شرکت ءِ بُنجل سر ءَ اُرش کتگ کہ پوجی سُر پُرانی ارزان کنگ ءِ ھاتر ءِ پوج ءِ سروکی ءَ دگ ءَ جوڑ کنگ ءَ بیتگ- بُنجل ءَ ساڑی چار گاڑی ءُ سرجمیں مشینری سرمچاراں مانداشتگ اَنت وھدے کہ یک گاڑی یے دستیگ کتگ ءُ سرمچاراں وتی ھمراھی ءَ برتگ گوں-

جارکش ءَ گوشتگ بند ساچی شرکت ءِ سر ءَ اُرش ءَ پد پوج ءِ شش گاڑی، نُھ پرپٹ ءُ پیادگ ٹولی ءَ ھمگرنچیں کاروان ءَ سرمچارانی رندگیری کتگ- سرمچاراں چیرجنگی رپکاں چہ چرچری ءِ دمگ ءَ سنگر گپتگ ءُ رندگیری کنوکیں پوجی کارندھانی سر ءَ نوک ءُ مزنیں سلاھاں چہ اُرش کتگ، چریشی ءِ آسر ءَ آرمی ءُ ایف سی ءِ ھشت کارندہ جاہ پہ جاھی مرتگ وھدے کہ درزنانی کارندہ سک ٹپیگ بیتگ اَنت-

جارکش ءَ گوشتگ کہ دگہ یک کاروائی یے سرمچاراں پنجگور ءِ دمگ وشبود ءَ شھدگ سر ءَ ناکہ بندی کتگ گاڑی پٹ ءُ پول کتگ اَنت وھدے کہ سرمچارانی دومی ٹولی ءَ وشبود کسٹم چیک پوسٹ سر ءَ اُرش کتگ کارندہ دزگیر کتگ ءُ آیاں چہ سرکاری سلاہ ءُ دگہ پوجی ساز ءُ سامان ءُ سے سرکاری گاڑی دستیگ کتگ اَنت بلے کسٹم کارندہ انسانیت ءِ بُنیاد ءَ یل داتگ اَنت-

بی ایل ایف ءِ جارکش ءَ سرجمیں بیتگیں اُرشانی زمہ واری منّ اِتگ گوشتگ کول کن ایں کہ بلوچستان ءِ وتواجھی ءَ تاں مئے اے وڑیں اُرش برجاہ بنت-

نوکاپ لبزانکی مجلس ءِ اِمبری داد دیوان 23 نومبر 2025 ءَ بلوچی زبان ءِ کواس ءُ شائر اسحاق خاموش ءِ شرف ءَ ماں بلوچ ویلفیئر سوسائٹی فقیر کالونی کراچی ءَ برجم دارگ بوتگ ۔ اے دیوان ءِ گچینی مھمان اسحاق خاموش ءُ سرمستر مسکان مجید بوتگ انت ۔ اے دیوان ءِ دو بھر بوتگ کہ آئی ءِ اولی بھر گُشتانکی ءُ دومی بھر شئر ءُ شائری بوتگ ۔ دیوان ءِ اولی بھر ءِ جارچین بختاور امیر ءُ دومی بھر ءِ شعیب رحیم بوتگ ۔

دیوان ءِ اولی بھر ءَ میر ساغر رحمان ءُ غلام رسول کلمتی ءَ اسحاق خاموش ءِ شائری ءُ لبزانکی کارانی سرا ءَ تْران کُتگ۔ میر ساغر رحمان ءَ اسحاق خاموش ءِ شائری ءِ سرا تْران کنان ءَ گُشتگ کہ اسحاق شائری ءِ کبیلہ ءِ ھما مردمان اِنت که مارشتانی زبان ءَ سرپد اِنت، پدا شائری ءِ بُنگپ ھم اَنچیں اَزیت ناکیں لبزاں گوں گْرنچ دَیگ بیتگ که آئی ءِ اَندر ءَ بید ء اَندوه ءُ مارشتاں دگه ھچ چیز جاگه کُت نه کنت۔

آئی ءَ گوشتگ کہ بُن اَسل ءَ اسحاق ءِ شئیری درشان گیشتر دستونک اِنت، البت درمیان ءَ چندیں لچّهے ھم پِربستگ، بلئے چوش که غزل آئی ءِ شُناس ءِ بھرے جوڑ بوتگ، لچّه آ رنگ ءَ آئی ءِ ٹَپّانی درمان نه بیتگ ۔

ھمے رنگ ءَ غلام رسول کلمتی ءَ وتی ھیال درشان کنان گوشتگ کہ اسحاق خاموش ماں بلوچ راجمان ءَ گیشتر په شائری ءَ نامدار اِنت۔ شائری راجانی مزنیں مَڈّیاں ھساب کَنگ بیت، په زبان ءِ پْراه پَھناتی ءَ شائری چه زِند ءِ مستِریں لوٹاں یکے۔ شائری لبزاں سَمبھینیت ءُ زبان ءِ تک ءُ پَھناتاں پْراه تِر کنت۔ زبان ءِ گلستان ءَ شائری پُلانی پیم ءَ اِنت۔ ھَمُک شائر ءِ شائری ءِ وتی یک رنگے، چه ھمے رنگ ءَ اسحاق ءِ شائری ءِ جتائیں رنگے۔

اولی بَھر ءِ گُڈسر ءَ دیوان ءِ سرمستر مسکان مجید ءَ دیوان ءَ ساڑی ئیں مردمانی مِنّت گپتگ ءُدیوان ءِ اولی بھر ءِ ھلاسی ءَ رند یک کسانیں ساز ءُ زیملی بَھرے ٹَھینگ بوتگ کہ اِشی ءِ تہ ءَ بشیر حیات، ناصر ءُ شئے نضرت ءَ وتی اِزم ءَ گوں دیوان وش کُتگ ۔

دیوان ءِ دومی بھر ءِ ھاسیں مھمان اسحاق خاموش ءُ حسن علی حسن بوتگ انت ءُ سرمستر ظفر کریم بوتگ ۔

شئیر ءُ شائری ءِ بھر ءَ مُحب بسمل، جام پکیر، امتیاز کمال، سمین غلام، کامران حیدر، جاسب جهان، سیدمحمد فقیر، یاسر کریم، ملناز منیر، سهیل میرانی، رحمان آزگ، بشیر بشارت، سرور آدم، عیسیٰ بلوچ، میر ساغر رحمان، حسن علی حسن، اسحاق خاموش ءُ ظفر کریم ءَ وتی شئیر ونتگ انت ءُ دیوان وشنود کتگ ۔

ھندی تامرانی نامداریں ازمکار ، تامر ساچ ءُ سیاست دان دھرمیندر کیول کرشن دیول بیران بوتگ ۔

انڈیا ءِ رسانکدرانی رد ءَ 8 دسمبر 1935 ءَ ودی بوتگیں دھرمیندر کیول کرشن دیول ء کیول کرشن مروچی 24 نومبر 2025 ءَ ماں ممبئی ءَ وتی گس ءَ بیران بوتگ ۔ ھمے گوشگ بوگ ءَ انت کہ آ ھمے ماہ ءِ بنداتی روچاں دم ءِ نادراھی ءَ گور جتگ بوتگ ءُ بریچ کینڈی نادراھجاہ ءَ داکل ھم بوتگ بلے پری زیتاں وتی گس ءَ بوتگ ۔

ھندی سنیما ءِ تہ ءَ نام کٹ اتگیں دھرمیندر ءَ 1960 ءَ تامر ساچی ءِ تہ ءَ وتی گام ایر کتگ ءُ آئی ءِ اولی تامر ”دل بھی تیرا ہم بھی تیرے“ انت ءُ آئی گڈی تامر ”اکیس“ انت کہ بیست ءُ پنچدسمبر ءَ شنگ بوگی بوتگ ۔

شش دھکاں تامر ساچی ءِ پڑ ءَ کار کنوکیں نامدار ازمکار دھرمیندر ءَ بازیں سوبمندیں تامر چوش کہ ”شعلے، یادوں کی بارات، میرا گاؤں میرا دیش، پرتگیا، چپکے چپکے، نوکر بیوی کا، پھول اور پتھر، دل نے پھر یاد کیا، آئے دن بہار کے، آنکھیں، آیا ساون جھوم کے، جگنو، چرس، دھرم ویر، آزاد، لوہا، حکومت ءُ اپنے ءِ تہ ءَ وتی ازم پیش داشتگ ءُ سال 2012 ءَ انڈیا سرکار ءِ نیمگ ءَ آئی ءَ سیمی مزنیں سویلین داد پدم بھوشن دیگ بوتگ ۔

خیبر پختونخوا ءِ شھر پشاور ءَ فیڈرل کانسٹیبلری ءِ ہیڈ کوارٹر ءِ سر ءَ جنگولانی اُرش ءَ ایف سی ءِ سئے کارندہ بیران ءُ ھشت ٹپیگ بوتگ انت۔

سی سی پی او پشاور ءَ ایف سی ءِ سئے کارندجانی بیرانی ءِ ھال راست کتگ ءُ گشتگ کہ جنگولانی اُرش ناکام کنگ بوتگ ءُ سئیں اُرش کنوک بیران بوتگ اَنت۔

آئی ءَ اے گپ ءِ ھم پدر کتگ کہ اے اُرش ءَ ایف سی ءِ سئے کارندھاں ھوار 8 مردم ٹپیگ بوتگ اَنت۔

سی سی پی او پشاور ڈاکٹر میان سعید ءَ بی بی سی اردو ءَ گوں تران کنان ءَ گْوشتگ کہ دوشمبے ءِ روچ ءَ سھب ءَ سئے اُرش کنوکاں ایف سی ءِ بنجاھی کارگس ءَ سر بوتگ اَنت، اولی رند ءَ یک اُرش کنوکے ءَ گیٹ ءِ سر ءَ وت ءَ تراک کتگ، ایشی ءَ پد دو اُرش کنوکاں ماڑی ءِ تہ ءَ ھوار بوھگ ءِ کوشست کتگ۔

سی سی پی او ءِ رد ءَ گیٹ ءِ سر ءَ بوتگیں تراک ءَ ایف سی ءِ سئے کارندہ بیران بوتگ اَنت ایشی ءَ پد دو اُرش کنوک ماڑی ءِ تہ ءَ شُتگ اَنت کہ اودا 15-20 منٹ ءِ دیم پہ دیم بوھگ ءَ پد ایف سی ءِ کارندھاں ھم دوئیں سلاہ بندیں اُرش کنوک کشتگ اَنت۔

آئی ءَ گوشت کہ ارش کنوک نوکیں سلاھاں گوں سلاہ بند بوتگ انت ءُ ھینڈگرینیڈز گون بیتگ۔

آئی ءَ گوشتگ کہ اے وھد ءَ ماڑی ءِ تہ ءَ کلیئرنس آپریشن برجاہ اِنت ءُُ بمب ڈسپوزل اسکواڈ ءَ ھوار دگہ کانود ساز کنوکیں ادارگانی کارندہ وئیل جاہ ءَ سر بوتگ اَنت۔

دومی نیمگ ءَ پاکستان ءِ تھ ئِے کارانی وزیر محسن نقوی ءَ پشاور ءَ فیڈرل کانسٹیبلری ءِ ہیڈ کوارٹر ءِ سر ءَ اُرش ءَ سئے کارندھانی بیرانی ءِ سر ءَ دلپدردی درشان کتگ۔

بلوچستان ءِ جتاجتائیں دمگاں پاکستانی پوج ءِ لشکر کشی ، ڈیتھ اسکواڈ کارندھانی تیرگواری چہ یک مردمے بیران، بیگواھیں ورنا ءِ یل کنائینگ ءِ ھاتر ءَ زھرشانی، دگہ دو لاش دزکپتگ انت-

گیشیں ھالانی رِد ءَ وڈھ ءَ یکرندے پد ءَ ورنا ءِ آوار جنگ ءَ پد بُنجاھی شھدگ پد ءَ بند کنان ءَ زھرشانی کتگ-

ھالانی رِد ءَ ھُزدار ءِ تھسیل وڈھ ءِ چہ کلی براھمزئی ءَ سیادی داروکیں ورنا غلام سرور ء اسداللہ براھمزئی مینگل چہ کاکاھیر ءِ دمگ ءَ آوار جتگ ءُ ناشناسیں جاھے ءَ برگ بیتگ-

وئیل ءِ ھلاپ ءَ آوار جنگ بیتگیں ورنا ءِ کھول ءُ دمگ مردماں کلی براھمزئی ءِ ھند ءَ بُنجاھی شھدگ زھرشانی کنان ءَ بند کتگ چریشی ءِ سبب ءَ گاڑیانی روگ آیگ بند بیتگ-

زانگ بہ بیت گوستگیں روچ ءَ شمبے ءَ ھم چہ وڈھ ءَ عبدالباری ء عبدالخالق نامیں مردمے بیگواہ کتگ، چریشی ءِ ھلاپ ءَ بُنجاھی شھدگ سر ءَ نندانک دیگ بیتگ، بلے انتزامیہ ءِ گوم ءَ گپ ءُ دیوان ءَ پد مروچی سھب ءَ زھرشانی ھلاس کنگ بیتگ-

ھمے وڑ کیچ ءِ دمگ ناسر آباد ءَ سرکاری پلامرزی سلاہ بندیں ٹولی ءِ تیرگواری ءَ چہ جلال ء دین محمد نامیں مردمے بیران بیتگ-

پولیس ءِ رِد ءَ اُرشکار دیمپوش بیتگ اَنت پرپٹ ءَ سوار بیتگ اَنت- آیاں سروس اسٹیشن ءِ سر ءَ گاڑی ءِ سپائی ءِ وھد ءَ جلال دین تیر جتگ ءُ کُشتگ-

دمگی اِھوالکار ءِ رِد ءَ جلال دین محمد یک زمیاد گاڑی یے ڈرائیور بیتگ- اِھوالکار ءِ گوشگ اِنت کہ آئی ءِ دو برات پیسر ءَ ھم زورانسری آوار جنگ بیتگ اَنت ءُ دراجیں مدتے ءَ بیگواھی ءَ پد یل کنگ بیتگ انت وھدے کہ جلال دین ءِ دومی برات کمال ھم زورانسری بیگواہ کنگ بیتگ کہ انگت ءَ بیگواہ ءَ اِنت-

ھمے وڑ یکشمبے روچ ءَ کلات ءِ دمگ منگچر ءِ ھند بدرنگ کوھی ءِ ھند ءَ دو لاش دزکپتگ انت ، پولیس ءِ رِد ءَ مردم تیر جنگ ءُ کُشگ بیتگ اَنت-

وئیل ءِ ھال ءِ سر بیگ ءَ پولیس ءَ لاش آر ایچ سی منگچر ءَ برتگ انت اود ءَ آئی ءِ پجّار قطب علی ء محمد اکبر جھمنند شیخری ءُ علی محمد ء محمد حیات جھمنند جوھان ناماں چہ بیتگ انت-

زانگ بہ بیت گوستگیں روچ ءَ ھم کلات ءَ دو لاش دزکپتگ اَت بلے آیانی پجّار نہ بیتگ اَنت-

دومی نیمگ ءَ کیچ ءِ زامران ءَ پاکستانی پوج ءِ جھلی ٹولی ءَ جتاجتائیں دمگاں پیشگامی کنگ ءَ اِنت، وھدے کہ اے دمگاں پوجی لشکر کشی بندات کتگ-

اِھوالکار ءِ رِد ءَ پاکستانی پوج ءِ نیمگ ءَ چہ زامران ءِ دمگاں نوشمان، تگران، جھلی گٹ، چرپان، بانکو ءُ کش گوراں لشکر کشی کنگ ءَ اِنت-

بلے تنی وھدے ھچ وڑیں دزگیری ءُ جانی تاوان ءِ درگت ءَ ھچ وڑیں ھال سر نہ بیتگ وھدے واکدار نیمگ ءَ ھم اے درگت ءَ ھچ وڑیں درشان شنگ کنگ نہ بیتگ-

ھمے وڑ ریکوڈک منسوبھ ءَ کار کنوکیں دو بلوچ ملازم پاکستانی چیریں ادارہ ءُ کاؤنٹع ٹیررازم ڈیپارٹمنٹ ( سی ٹی ڈی) ءِ کارندھاں کمپنی ءِ گاڑی ءَ ایر گپتگ ءُ بیگواہ کتگ انت-

دمگی مردمانی رد ءَ اولی ویل شمبے ءِ روچ ءَ پیش اتکگ، وھدیکہ مھر اللہ موسیٰ زئی بلوچ موکلانی واستا وتی لوگ ءَ روگ ءَ بیتگ – کمپنی ءِ گاڑی ھنچش مزنشھدگ ءَ توزگی ءِ ھند ءَ سر بیتگ اود ءَ پاکستانی پوج ءِ کارندھاں زورانسری گاڑی ءَ ایر گپتگ ءُ بیگواہ کتگ-

ھمے وڑ دومی ویل یکشمبے ءِ روچ ءَ پیش اتکگ وھدیکہ آصف مندزئی بلوچ ریکوڈک کمپنی ءِ بس ءَ ایر گیجگ بیتگ ءُ کارندھاں گوں وت برتگ – ھمے وھد ءَ کارندھاں بس داں دیراں داشتگ آئی ءَ سواریں دراھیں ملازمانی پجار کاڈ چِک کتگ انت ھردوکیں ملازم موکلاں چہ ریکوڈک ءَ نوکنڈی ءَ روگ ءَ بیتگ انت-

بلوچ یکجھتی کمیٹی ءِ سروک ڈاکٹر مھرنگ بلوچ ءَ گْوشتگ کہ پاکستانی لشکر ءِ دست ءَ 15 سالی ئیں نسرینہ بلوچ ءِ زورانسری بیگواھی بلوچستان ءِ تہ ءَ زُلم ءُ زوراکی ءُ نسل کشیاں پاشک کنت۔

آئی ءَ گْوشتگ کہ آواران ءِ نندوکیں نسرینہ بلوچ ھب ءَ نندوک بیتگ ءُ 22 نومبر 2025 ءِ شپ ءَ 12بج ءِ نزیک ءَ آئی ءِ لوگ ءِ سر ءَ پاکستانی لشکر یَ اُرش کتگ ءُ پد ءَ آ آوار جتگ ءُ ناشناسین جاھے ءَ برتگ کہ چہ ایشی ءَ پد آئی ءِ بابت ءَ ھچ وڑیں ھال ءُ اھوال دست نہ کپتگ۔

ڈاکٹر مھرنگ بلوچ ءَ دیمترا گْوشتگ کہ شش ماہ پیش کوئٹہ شھر ءِ پولیو ءِ آماچیں نودربرے ماہ جبین بلوچ پاکستانی لشکر، سی ٹی ڈی ءُ انٹیلی جنس ادارگانی دست ءَ چہ ھاسٹل ءَ پہ زور بیگواہ کنگ بیتگ۔

آئی ءَ گْوشتگ:بلوچستان ءَ پاکستانی زور بے دروریں رنگ ءَ انسانیت ءِ ھلاپ ءَ روچ پہ روچ جرم کنگ ءَ اَنت ءُ اے درست بلوچ نسل کشی ءِ بھر اَنت۔