TBP Balochi

چاگردی رِسانکدار

نبشتہ کار: زبادی بلوچ

دی بلوچستان پوسٹ 

من وَ چُشیں  نبشتہ کارے نیاں ،بَلے  شُمئے  نبشتہ ءُ گْران کیمتی ئیں دانکاں اَلّم واناں ، بلکیں موہ بِہ رس اِیت گیش ءَ  گیش وتی راجی ادب دوست ءُ سیاسی سنگتانی نبشتانکانی وانگ ءِ جُھد ءَ کن  آں دانکہ  آیانی  زانت ءُ اِلم ءَ چہ چیزے در بِہ بَر آں۔

 اگاں ما دُگنیا ءُ مْیان اُستمانی لبزانک ءَ ونت نہ کن اِیں، بلے وت ءَ ، وتی لبزانک ، وتی  راج ءِ بابت ءَ اَلّم بزان اِیں کہ مارا وتی زندگ بُوَگ ءِ سپر کُجام دگ ءَ بُرگی اِنت۔

  اے زانت ءُ شیوّاری مارا چہ شُمئے وڑیں زانتکار ءُ کْواس، ادب دوستیں سنگت ءُ نبشتہ کارانی وانگ ءَ پد رس اِیت ۔

بلے ! چُش کہ گْوستگیں یک دو روچ اِنت  ما انچیں زانت ءُ اِلمے  پہ وت وانگ ءَ گِندگائیں  نہ زاناں  پرچا ؟

 بلوچ ءِ بد بَھتی۔۔۔۔۔۔۔۔۔ بِہ لیکاں  یا گُلامی ءِ داد۔۔۔۔۔۔۔؟

اے ھبر ءَ مارا شُمئے وڑیں زانتکار ءُ کْواس سرپد بِہ کن اَنت  کہ ایردستی ءِ سانکلاں بندگیں راج کُجام جیڑگ ءُ مارشتانی ڈل دپ ءَ وت ءَ بِہ شوھاز اِیت ، چیاکہ اے ھبر ما دائِمی چہ وتی سیاسی رھشُون ءُ لبزانکی سروکاں اِش کُتگ شائِر ءُ ادیب وتی  چاگِرد ءِ ترجمانی ءَ کن اَنت ، یا چو ڈاکٹرانی وڑ ءَ وتی نادْراھیں چاگِرد ءِ اِلاج ءَ کن اَنت کہ تئی نادْراھی ءِ دْرمان چی اِنت؟

ھوَ اے چاگِرد ءَ بِل ، وھدے ڈاکٹرانی جند نادْراہ بِہ بنت گُڑا …….آیانی اِلاج چون ءُ چتور کنگ بنت یا بِہ بنت ۔۔۔۔؟

 من وت ءَ آ بودشت سرپد نہ باں ، نہ زاناں  پرچا…….؟
ھمے جُست پہ  تاھِیر نندگ ءَ نیل اَنت کہ داں  یک دانشور ءُ کْواسے  ءَ جُست  کُت بکن آں.
مئے نابزانتی یا سسّا ءِ گُلامی کہ مئے تہ ءَ نادینگ ءُ رودینگ بوتگ ایشی ءِ سَوَب کَے اِنت ۔۔۔۔۔ یا چی اِنت ؟
بلے! اے جُست چہ استاد ءُ دانشوراں زیب دنت کہ ترا نیکیں  پسّویے دات بِہ کن اَنت ءُ ترا یک تچکیں ءُ راستیں راھے ءِ شون ءَ دات بہ کن اَنت ۔

 اے درگت ءَ  واجہ بسمل ءِ  نبشتانک ءِ پسّو ءَ  نبشتانکے  کسے ءَ نبشتگ کہ چہ لبزانکی ءُ شرگداری ءِ کیلو ءَ در اکلاکی ءُ چاگردی رھبنداں ھم در اَت۔ چیاکہ وھدے مئے نبشتہ کار زانت ءُ زانگ ءَ زات ءُ زُریات ءِ شاھم ءَ تور اَنت، گُڑا گوں بے زانتاں کَے گِلگ بِہ کنت۔

 واجہ منزور بسمل ما چہ ترا چہ کسانی ءَ زانگ ءُ پیداک اِیں،چیاکہ بلوچی زُبان ءِ مزن نامیں گُشندہ واجہ نورھان بزنجو ءِ کہ نوار مارا سر بوتگ اَنت یا واجہ آرپ بلوچ ءَ ھوار دِگہ گُشندھے ءِ مئے گوں ، گوں ترا بجّاروکی بوتگ۔ کمیں مستر بوتگاں دل ءَ پہ وتی شھدیں زُبان بلوچی کتاب ءِ وانگ ءَ چاڑبستگ گُڑا ترا من آ ود ءَ ھم دیستگ گوں گوھریں گال ءُ دستونکاں ۔ دومی اے ھبر ھم رد بوت نہ کنت کہ ھر بلوچ پُسّگ تئی نام ءَ زانت ءُ ترا جاہ کار اِیت کہ تو یک ادب دوست ءُ مزن نامیں شائِرے ئے، تئی شَیراں ھزاراں مردم وان اَنت ءُ گوشدار اَنت، بلے تو کہ وھدے زرگوات ، بزاں ھسا بجّار ءِ داب ءَ نبشتہ بکن ئے گوں گُڑا اے کیاس ءَ کے بِہ کنت ۔۔۔۔۔۔۔۔۔۔۔۔۔۔۔؟
تو کَے ئے ءُ زرگوات کَے اِنت…؟

وھدے کہ تئی نبشتانک پہ وانوکاں اےرنگ ءَ دیم ءَ کیت گُڑا من پہ سِتک گُشاں مئے پیمیں نوکباھندانی چے بستار کہ جاھے رد نبشتہ بکن اَنت….؟
نہ زاناں واجہ بسمل تئی اے نبشتانک ءَ کُجام نام ءَ بِہ دیاں جزباتی۔۔۔۔۔ اَنا۔۔۔۔۔ بیرگیری۔۔۔۔۔
یا چہ کُلاں گھتر۔۔۔۔۔۔

پمیشکا من گُشاں ایشی ءَ نام ءِ  دَیگ چہ منی بستار ءُ بالاد ءَ ھما دست اِنت۔ من وھدے کہ تئی نبشتانک ونت آ ؤد ءَ بلوچ چاگرد،  لبزانک ءُ بلوچ سیاست کُل ھَوار اِت اَنت ۔ھمے لبز تو پہ دِگرانی سر ءُ سوج ءَ کارمرد کُتگ اَنت ھمیشانی پاسداری وت کُت نہ کُتگ ۔ من پرے ھبر ءَ اجب ھیرانگی ءِ کورچات ءَ کپ آں کہ پرچا ما چرے بد بھتی ءَ در نیااِیں، گُڑا ھمے پسّو رس اِیت کہ مئے دیمروئی ءُ یکمُشت بُوَگ وابے زانگ بیت ….
واجہ من تئی نبشتانک سَے چار رند ء َونت ءُ پوہ بُوَگ ءِ مزنیں جُھدے کُت بَلے نہ……..

من ھچ نہ پھم اِت کہ تئی گِلگ گوں نبشتہ کار اَت، سلام سابر اَت،رسانکدر ءُ بلوچ سیاست اَت ، چاگرد ءُ گوں بی این ایم ءَ اَت…….. یاکہ پِلاں! ٹولی ءُ  سردار اِت اَنت؟ چیاکہ
شُمئے سکین ءُ درس ھر وھد ءَ ھمے بوتگ اَنت کہ مئے جیڑھانی گیش ءُ گیوار بُوَگ ءِ جاہ ءُ در چاگردی رِسانکدار نہ اِنت.

اے ھبر ءَ واجہ تو وت بُگش من تئی اے نبشتانک ءَ کُجام نام ء َبِہ دیاں ، اَنا ءُ بیر گیری ،ایرجنی یا ھمے سرپد بِہ باں انچش گُشگ ءُ لِکگ بیتگ ……؟

ھما کہ لبز تو کارمرد کُتگ اَنت بائد اِنت اے داب ءَ مہ بوتین اِت اَنت۔ وھدے کہ تو یکّے ءَ را اوپار کُت نکن ئے گُڑا من ء نا پوہ ءُ کستر کجام داب ءَ میاریگ بہ باں……؟
چیاکہ وھدے ترا رد گُشگ ءُ پسّو دَیگ ءَ اے رنگ ءَ ری ایکشنری کُتگ گُڑا چہ بیر گیری ءَ کس نہ رک اِتگ ۔

    وھدے کہ ادب دوست ءُ دانشور ھما  سکین ءُ  درس ءَ دومیگ ءَ را دے اَنت گُڑا اِسلاہ ءُ شرگداری ءِ گپ ءَ کن اَنت ، اگاں ھما وت اے اَمل پابند مہ بیت چہ دگر ءَ چے اُمیت کن ئے۔
آ چاگرد ءُ آئی ءِ ورنا چے دربر اَنت ءُ کُجام راہ ءِ راھی بہ اَنت؟
ما شمار ءَ ونتگ ءُ زانتگ ، ھمے ادب دوست زانتکاراں گُشتگ کہ ھر جیڑھانی گیش ءُ گیوار ءِ جاہ چاگردی رسانکدار نہ اِنت، چیاکہ اے رنگیں اَمل مارا بھر ءُ بانگ کن اَنت.
من نہ زاناں اے بلوچ ءِ بد بھتی اِنت یا گُلامی ءِ داد اِنت؟
بلے اے ھبر ءَ پہ سِتک زاناں چرے کارپداں مارا تاوان بیت ۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

 پاد بیا بلوچ 

نبشتہ کار : ایس ڈی بلوچ

دی بلوچستان پوسٹ

کَر اَنت تئی گوش
ءُ
گُنگ اِنت تئی زبان

بلوچستان; آواران ءَ بے نیکراھیں پاکستانی پوج ءِ دست ءَ اِزت مندیں مئے بلوچ زالبول ءُ کسانیں زھگانی آوار جَنگ ءُ برگ ءُ تھاریں کوٹیانی تہ ءَ بند کنگ دل سوز ءُ دل پہ دردیں ھال ءَ چہ کم تِر نہ اِنت.

اگاں مرچی منی چُک…
تئی چُک ….
گوں ھمے وڑیں جاورانی دیمپان بہ بنت گُڑا من ءُ تو کَے ءِ دَرا ء َاُوشت ایں ؟
کَے ءِ دَر ءَ ٹُک اِیں ءُ کَے اے گْرانیں ساھتاں منی ءُ تئی ھم کوپگ بیت ءُ من ءَ ءُ ترا دل تسلہ بہ دنت ؟

اگاں یکڑے کیت پہ منیگ ءُ تئی پھریزگ ءَ گُڑا آ تئی ھمے بلوچیں برات بیت.
آ گُڑا ھمے زھگانی پِت, برات , سیاد ءُ وارس بیت کہ مرچی بندیگ جاھاں بند اَنت.
ھرکس بیت بَلے بلوچے الّم ءَ بیت کہ وتی بلوچ راج ءِ درد ءَ وارت…..

ءُ منیگ ءُ تئی سر ءَ ھرچ سکّی یے کہ کیت گُڑا زرور من تو ھرچ جاگہ ءَ بِہ بَہ اِیں، بَلے پہ وتی اَرز ءَ وتی بلوچ براتاناں سر کن اِیں.

پاکستان ءُ آئی ءِ پوج ءِ گْور ءَ ھجبر ما بلوچ وتی سکّی ءُ پریات ءَ نہ بَر اِیں ءُ سر نہ کن اِیں …

پرچا کہ مئے چم پچ اَنت ءُ شر گندگ ءَ اَنت، کہ پاکستان ءُ پاکستانی پوج ءِ ھپتاد سال ءِ کِرد چی اَنت ءُ گوں بلوچ ءَ چی کُتگ؟

بلے اِدا دْرستانی گوش کَر اَنت ءُ زبان گُنگ اَنت.

وھد مرچیگ اِنت پاد بیا بلوچ باندا پہ ترا ھچ پشت نہ کپ اِیت بلوچ ..
تئی ننگ ءُ آبرو تئی مات ءُ کماش تئی گھار ءُ برات تئی پُلیں گُلزمین بلوچستان پاکستان ءِ زوراکیانی آماچ اِنت.

اگاں مرچی ما ءُ شُما وت ءَ را گیرت مندیں بلوچ گُش اِیں گُڑا وھد ھمیش اِنت پاد بیا بلوچ
باندا کَے بزانت کہ پہ ترا چے پشت بہ کَپ اِیت ……؟

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ھبر چہ الوت ءَ گْوستگ

زِرگْوات بلوچ

دی بلوچستان پوسٹ

اے ھبر نوکیں ھبرے نہ اِنت ، بلے بژن پرے ھبر ءَ کہ ما چہ گْران وابی ءَ جھ نہ جنیں ءُ وتی رولہ اِیں کِبلہ ءِ پاند ءَ راھیگ نہ بَہ اِیں پرچا۔۔۔۔۔۔۔ ؟

چرئے جُست ءَ پد ھزار جُست باتِن ءِ دمکّاں سر کش اِیت ءُ ھمے پَسّو ءَ دنت کہ مئے مِنزل یک ، مکسد ، منّ ءُ مول ، لوٹ یک، لیکہ ءُ مارِشت یک گُڑا  پرچا ما چہ وتی مندوستی ءِ ماڑی ءُ بادگیر ءَ در نہ کپ اِیں ءُ راجی جُنز ءَ یکمُشتی ءِ دامُن ءَ گِرھن نہ دئیں۔

اگاں راستی ءَ ما لوٹ اِیں کہ بلوچ راج جہانی راجدپتر ءَ گوں سوبمندی ءَ زِندگ بِہ بیت گُڑا مارا چہ یکوئی ءِ پگر ءَ در کپگی اِنت ءُ گْواچنیں سسّا منّگی اِنت کہ راستی ءِ لوٹ چی اِنت ؟

اگاں نا ما انگت نِندیں ءُ چاریں گُڑا پکّ بزان کہ اے دوزھیں آس ءِ توسگ گوں یکوئی ءَ ارزان نہ اِنت ، چیاکہ اےدپتری راستی یے تاکت ءِ پسّو ترا گوں تاکت ءَ دیگی اِنت ۔ تشدد گوں تشدد ءَ ھلاس بیت ، اے زیکّین ھبرے کہ اُورماڑہ ءَ بلوچ راجی آجوئی ء سنگر “براس” کہ دُژمِن ءِ کارِندھاں تیر باران کنت گُڑا کْوزہ گیریں سرکار ءَ ھوار پارلیمانی کاسگ چٹّ ھم پہ ایر جنگ ءَ اولی سرپ ءَ گِندگ بنت کہ اے کارپد انسانیت ءُ پہ انسان دوستی ءَ دردناک ءُ تورناکیں ھبرے پوریاگِر ءُ مزور جنگ بوتگ اَنت۔

دومی نیمگ ءَ بی این پی مینگل ءِ نمائندہ آگا ھَسن (آغا حسن ) گْوش اِیت اے پوریاگِرانی کوش ءِ ھِلاپ ءَ چنچو گپ ءُ ایر جنگ بِہ بیت کم اِنت ۔ چیاکہ بلوچ روایات اے گپّے موکل ءَ نہ دنت کہ تو بے گُناھیں مردماں دھشتگردی ءِ نِشانگ جوڑ بکن ، بلکیں بلوچ راجدپتر اے گپ ءِ گواھی دنت بلوچ ءَ ایردستیں انسانانی سر ءَ مھر ءُ مھبت ءِ دست مرز اِتگ ۔ ما اے واکیہ ءَ ایر جنیں ءُ بی این پی مینگل انسان دوستی ءِ منّوگِر اِنت ۔

بلے ! واجہ چرئے ھبر ءَ پکّ بے سما اِنت کہ زی ءَ چہ پیسر ، زی ھم  چہ آواران پیراندر زیلگ ءُ  ڈھل بیدی ءَ گْوستگیں روچ ءَ پاکستانی آرمی ءَ بلوچ روایاتانی دیوال ڈیرینتگ ءُ وتی بے میاریں دست پہ بلوچ ءِ لجّ ءُ ننگ شھار داتگ۔

بلوچ زالبُول بانُک شھناز ءُ آئی  کسانیں زھگ پرھاد، سنم ءُ آئی  دو چُک دہ روچ پیسر ودی بوتگیں ماہ دیم ءُ ملین ، بانُک نازُل ءُ آئی  ءِ دو چُک اِجاز ءُ دردانہ ءَ ھوار میتگ ءِ کماش میر ابدالھئی ھم آوار جتگ ءُ وتی بے نامیں زِندان ءِ تھارونکیں کُوٹی آں سانکلانی باھوٹ کُتگ اَنت۔

کُج اِنت تئی بلوچی ؟
کُج اِنت تئی بلوچی روایات کہ پہ وتی جندے ننگ ءِ پہازگ ءَ گُنگ ءُ کرّ۔۔۔۔۔ کور ءُ بے توار  ؟
پمیشکا اے ھبر مرچی ھم راست منتگ  کہ ۔۔۔۔۔۔ اول وتی گِدان ءِ آس ءَ توس رند ءَ پہ دِگر ءَ دِرکّ آں بند ۔۔۔۔۔
یا اول وتی جاندرہ ءَ   پوشاکے پوش رند ءَ پہ دِگر ءَ شالے شھار بِہ دئے۔۔۔۔۔۔۔۔

مرچی تئی جندے لجّ ھما درآمد ءِ زِندان ءَ ھیڈیسگ ءُ ھیسکارگانی دیمپان اِنت تو پہ دِگر ءَ لانک بَستگ، گُڑا اے ھبر بلوچ راجدپتر ءَ پہ بلوچ پُسّگ ءَ زیبناک نہ اِنت ۔

چیاکہ تو گْوش ئے بلوچ ءَ پہ دِگرے لجّ ءَ وتی سر ءُ ارواہ ببا داتگ، گُڑا اے ھبر  ھم ترا دپتر ءِ تاکدیم آں کدی گِندگ ءَ نئیت کہ درآمداں پہ بلوچ ءِ ننگ ءَ دست شھار اِتگ بلوچ ءَ نِشتگ ءُ چار اِتگ ۔

بلکیں بلوچ ءَ سر باھینتگ بلے درآمد گوں وتی لجّ ءُ ننگ ءَ لیب کنگ نیشتگ۔ مرچی شُما وت ءَ بلوچ گْوش اِت کہ دُژمِن ءِ ھمکوپگی ءَ اُوشتوک اِت ، تہ شُمارا بلوچ گْوشگ ءِ ھچ وڑیں ھکّ نیست کہ شُما وت ءَ را بلوچ بِہ گْوش اِت ۔

چیاکہ تھنا بلوچی پوشاک ءِ پوشگ بلوچ بُوَگ ءِ لوٹ ءُ گزراں پیلو نہ کنت  ، بلکیں بلوچ نام اِنت لجّ ءُ گیرت ءِ کہ مات ءَ شاگیں گوانزگ ءَ چنڈینتگ ءُ لیلو داتگ بچّیگ منی باندا رُد ایت ءُ ورنا بیت گُڑا منی لجّ ءُ ننگ ، ڈیھ ءُ راج ءِ پاسپانی ءَ کنت ۔۔۔۔

بلے بژن پہ مات ءِ ھما بچّاں کہ آ پہ ادارُکی زِند ءِ وشیاں وت ءَ دُژمِن پاداں چگل داتگ۔ پمیشکا زانتکار گْوش اَنت کہ راجدپتر ھر شر ءُ گَندگ ءَ گیر کار اِیت کہ آئی پہ وتی راج ءَ چے کُتگ ۔

من جزمّاں شُمئے اے بدّیں کارپد راجدپتر ءِ تاکدیم آں کدی شموشگ ءُ بے ھیال کنگ نہ بیت ، چیاکہ مرچی ھم مُلا ھَسن گوں وتی  بدّیں کارپداں یات کنگ بیت ۔۔۔

دومی نیمگ ءَ شھید نیٹو ھم گوں وتی وژنامیں کِردار ءُ نام ءَ گیر آرگ بیت ۔

پمیشکا ما ھم پہ سِدک بزان اِیں کہ راجدپتر مارا ھم یات کنت ءُ گیر کار اِیت، بلے کُجام نام ءَ ؟

اے گوں مئے جند ءِ بندوک اِنت کہ مارا پہ وت راجدپتر ءِ تاکدیم آں کُجام نام شات بیت ۔

راجی پاسپان ءُ مادر ءِ یلّیں بچّ ۔۔۔۔۔۔۔ یا لگور  ءُ چم چُٹّ کہ پہ وتی مات ءِ لجّ ءُ ننگ ءِ پُل ءُ پانچ ءَ دُژمِن ءِ ھمراھی کُتگ ۔

یا چو ھشتاد سالی ئیں کماش واجہ سدو مریؔ ءَ کہ سائجی ءِ مات بند ءُ تیھُرّ اِیں کوہاں دُژمِن ءِ گونڈلیں تیراں مُہکمیں ڈوبر‌ ءَ جاہ دنت ۔یا کہ کُنگُریں ھمید ءِ داب ءَ کہ پاھُو ءِ ساد ءَ پہ بچکند چُکّیت۔۔۔۔۔۔

یا پہ ھمے وژنام ءُ ابدمانیں زِند ءِ ھاتر ءَ منسورھَلاج (مصور حلاج) ءِ سر گُڈگ بیت ، اسکندریہ شھپگر ( فلسفی) پروپیسر بائی پیشیا ءَ را لٹ چوپ کنگ بیت ءُ جسم ءُ جان بوٹی ، بوٹی ءَ دمکّاں ایر  کُتگ ءُ آس مانداشتگ ، اِٹلی ءِ برونو گوں کمبہ ءَ بستگ ءُ زِندگ ءَ مانداشتگ پُر ماں گْوات ءِ چنکّاں داتگ ءُ شادمانی کُتگ ۔

بلے آیاں پہ وتی مکسد ءُ لیکو ءَ سرانی پرواہ نہ داشت ، چیاکہ آیاں اے سرپدی ھست اَت ما مرگ ءَ چہ پد نمیران بَہ اِیں۔

بَہ کَول ءِ سُکرات کہ آئرا زھر ءِ پیالگ نوشینگ بیت گُڑا آ وتی سزائے مرگ دیوکیں جیوری ءَ ھمے گْوش اِیت یات بکن تو من ءَ سزائے مرگ دَیَگ ءَ ئے بلے پہ مُجّتی زِندگ کنگ ءَ ئے ۔ نوں پہ جزم من گْوش آں من ءُ منی اِلم ءُ زانت، پگر کدی نہ مِر اَنت ، بلکیں پہ دائِمی زِندگ ءُ ابدمان بیاں ۔چیاکہ منی ھر کَول ءُ گُشتن نوں گوں راستی ءَ پدّر بنت ،پمیشکا من پہ دائِمی زندگ باں۔

چیاکہ اے ھما کِرد اَنت راجدپتر ءِ تاکدیم آں انسان ءَ را زُلم ءُ زُوراکی ءِ ھِلاپ ءَ پاد آیگ ءُ یکمُشتی ءِ سِکین ءَ دنت ءُ توکل ءُ ھاٹیگ ءَ مُہکم کنت ۔

اگاں ھمے داب ءَ بلوچ راج گوں ایمانداری ءَ جُھد ءُ کُوشست بِہ کنت گُڑا پہ سِدک بزان ترا کسے پہ ابد ایردست ءُ گُلام داشت نہ کنت ، چیاکہ زُوراک ءُ کْوزہ گیر چرئے ھبر ءَ پکّ نابلد ءُ ناسرپد اِنت کہ ھونانی دْرد ءِ ھر تْرمپ وھدے گُلزمین ءِ دامُن ءَ کپ اَنت یک نوکیں راجدپترے نبشتہ کنت۔

ھمے ھبر ءِ پُژدر ءَ اے ھبر ارزِشت ءُ دلگوش کرز اِیت کہ دُژمِن پہ بلوچ ءِ زیردست کنگ ءُ گاروٹی ءَ ھر پِڑ ءَ یکدست ءُ تپاکی ءِ جار ءَ پِرّینگ ءَ اِنت ،

بلے مئے بلوچ رھشُون انگت چہ وتی مندوستی ءِ گْورم ءَ لیپگ نہ بنت گُڑا پہ زِر ءَ کئے اُوست بِہ بند اِیت کہ دُژمِن ءَ لیپگ بِہ کنت

پمیشکا مرچی اے جاورانی تہ ءَ بلوچ رھشُوناں جیڑگ ءُ مارگ کپ اِیت کہ گْوست ءَ چونیں ردی بوتگ آیانی آسرا بلوچ راجی جُنز ءَ تاوان وارتگ مرچی آ دو بَرمہ بنت ۔

اگاں ھما کِشک ءُ ھما گُڑا چرئے ھبر ءَ کس چہ کس ءَ گِلگدار مہ بیت ، چیاکہ ” آس کپ اِیت تر ءُ ھُشک نہ زانت ” مرچی زھگ ءُ زالبُول آوار جنگ بنت باندا پہ ترا اے ڈیھ ءِ آپ بنداں، زید ءُ کھچراں ھچ نہ مان اِیت ۔

پدا رندے نندگ ءُ اہسوز ءِ درشان کنگ ھچ درد ءِ درمان نہ بیت ، بلکیں مرچی مارا زیم ءُ آزگّیں ٹپّاناں دارو ءُ درمان ، ملم مُشگی اِنت  تہ باندا وتی گُلزمین ءِ سر ءَ اباشکُو مہ بَہ اِیں ۔

گوں بابا کازی ءِ اے پِربند ءَ۔۔۔۔۔۔۔۔۔

پمّن ھچ پشت نہ کپتگ دِگہ میراس ءُ متاه
دِل زھیراں منی سُپتگ ، تو سر ءَ سِند منی !!

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

اورماڑہ ءِ مرتگیں پوجیانی پژدر ءُ بلوچانی ھون

اکیل مراد

دی بلوچستان پوسٹ 

یک چارگردے ءَ کورے راہ دربر بہ بیت گڑ ءَ الّم ءَ آ راج ھم کورانی میاری ءَ چہ گِسر بیان ءُ گار بیان بنت.

ھنچش کہ گْوستگیں روچاں اورماڑہ ءَ پانزدہ “پوجیانی ” مرگ کہ مروچی ھما بلوچاں تورینگ ءَ اِنت کہ آھانی لوگ سرکار ءُ ھمے پوجیاں ماڑی کرتگ اَنت چرے واست ءَ ھمے “پوجیانی ” مرگ ءَ بژنیگ ورگ ءَ اَنت.

بابائے بلوچ نواب ھیر بشک مری یک جاھے ءَ وتی گشتنے ءِ تہ ءَ گْوش اِت کہ ھما روچ ءَ پنجاپ ءِ مھلوک ءَ ھونانی سما بیت کہ وھدیکہ آیانی جند ءِ لوگاں جسد “جنازہ ” چِست بنت گڑا آ زان اَنت کہ ھونریچی ءِ ھونانی ندارگ کجام رنگ ءَ گران اِنت.

ھمے کوسٹل ھائی وے مزن شھدگ کہ جوڑینگ بیتگ ھمیشی ءَ چنکس بلوچ ءِ ھون چُسیتگ، تُری وئیل ءِ آماچ بہ بیت یا سرکاری دستاں برتگیں بلوچ ورنا ءُ کماش بہ بنت.

ھمے دَگ کہ پنجاپ ءُ پاکستان ءِ ایندگہ جاھاں جوڑینگ بیتگ اَنت، آیانی ھمک جاہ ءَ جْوان جْوانیں آسراتی ءِ نِزام جوڑینگ بیتگ، بَلے بلوچستان ءِ مھلوک ءَ چی جوڑینگ بیتگ مرگ، دگانی سر ءَ گِری بندی، تْرند روکیں گاڑیانی مھارانی یلہ کنگ.

ھمک روچ ھزارانی کساس ءَ مردمانی مرگ ءِ تچوکیں ھون ھرکسی چماں کپ اَنت، بَلے چی؟ زبان گُنگ ءُ چَم کُور اَنت پرچاکہ مِروکیں مردم بلوچ اَنت، بلوچانی لوگاں گِریوْاسکانی توار بندات بنت مارا چی………….؟

مئے چُک آسودگی واب اَنت، ما آسودگی ءَ آرامیں زندگی ءَ شھاب اِنت .مئے گردن چُو پُراپیں گْوسک ءَ اِنت. ما پرچی ءَ ھوناں چہ وتی چماں اندیم بہ کن ایں…..؟

چِد ءَ در ءَ بُریں ھمے شھدگ ءَ ھمے شھدگ ءِ کَش ءُ گوراں نیشتگیں مردمانی کساس ءَ بازیں مردمے ھمے جُست ءُ پُست/ پَٹّ ءُ پول کنوک ءُ دگانی سر ءَ اوشتاتگیں چیریں ادارھانی کارندھاں بلوچانی تاسپیں بَچ ءُ بلوچانی آریپں کماش چِست کُرتگ ءُ چُنت چُنت ماہ ءَ لَٹ داتگ ءُ آیانی ژانگولیں کُنٹ ھمے شھدگ ءِ کَش ءُ گوراں چگل دَیَگ بوتگ اَنت، بَلے یک نامناکیں بلوچے ءَ زھرشانی نہ کرتگ بیدے چہ بلوچ آجوئی ءِ دوستاں ابید کہ ھمے مردماں وتی کُنٹانی سر ءَ توار چِست کرتگ، ھمے مردم پد ءَ ھمے دگانی سر ءَ چِست کنگ ءُ کُشگ بیتگ اَنت.

یک پارلمینٹ پرستے ءِ چشیں ایرجنی بیان کسے ءِ چماں نہ کَپتگ چشیں ھم ھیال ءِ نہ بیتگ کہ بلوچ میتگاں گریوْاسکانی توار پیداک اِنت، کجام پارلیمنٹ پرستی ءَ اے برزی ءُ جھلی نہ زانتگ کہ نوک سیریں بانور جنوزام اَنت ،ھِنی ئیں دستاں مروچی وتی جنوزامی پشک ءَ مانپوشگ ءَ اَنت.

یک پارلمنٹ پرستی ءَ وتی بیان ءَ چشیں ھَبرےِ نہ کرتگ، بژن ھمے بیت کہ ھمے پوجی ھمے کارندھاں ھزاراں کساس ءَ بلوچانی لوگ مانداشتگ اَنت، ھمے پوجیانی دست ءَ مئے پیر ءُ کماشیں مھلوک ءِ کمشرپی بُوَگ ءَ اَنت ھمے پوجیانی دست مئے مات ءُ گھارانی سریگ ءِ سرجنگ ءَ دست اِش شھار اَنت، ھمے پوجیانی دراتکگیں توپنگ ءِ تیراں کسان کسانوکیں زھگانی ھون ریچگ بیتگ اَنت، بازیں کساسے ءَ جنوک ھمے پوجیانی بندیگ جاھاں بند اَنت ءُ آیانی گون ءَ بے ھودیں کردگار بُوَگ ءَ اِنت.

بَلے وتگڑیں رھشوناناں انگت ءَ اے سما ءَ نہ اِنت کہ بلوچ جنین جنوزام بُوَگ ءَاَنت پرچاکہ بلوچ ءِ کُشت ءُ کوشاں وتگڑیں رھشونانی دست ھونییگ اَنت….؟

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

زَرگُل ءِ زِند

نبشتہ کار: سخی ساوڑ بلوچ

ھشتمی بَھر

دی بلوچستان پوسٹ

ھپتمی بَھر

من چار اِت زَرگُل واب اِنت،باریں چُنت وھد ءَ پَد زَرگُل واب کپتگ ءُ باریں زَرگُل وتی زِند ءَ اَپالیں واب دیستگ کہ نا ،باریں زَرگُل ءَ را کسّے ءَ پہ واب ءُ آرام ءَ اِشتگ کہ نا، باریں زَرگُل اے وھد ءَ چونیں واب گِندگ ءَ اِنت ، چُوش اوں بوت کنت زَرگُل پہ وتی جان دْراھی ءِ واستا واب گِندگ ءَ اِنت. اے وڑ ھم بوت کنت کہ پیسر ءَ زَرگُل ءِ نادْراھی ءَ زَرگُل ءَ پہ واب ءُ آرامی ءَ نیشتگ ءُ بلکین ءَ نوں دَوا ءُ درماناں واب گِپتگ ،پیمشکا زَرگُل مروچی واب کپتگ ………….

من زَرگُل ءِ تھت ءِ سرون ءَ اُوشتاتگ اَت آں بس جیڑگ ءَ اَت آں ءُ من زَرگُل پاد کرت نہ کرت بوت کنت زَرگُل وشیں وابے گِندگ ءَ اِنت یا بوت کنت دْرائیں شپ ءَ چم ءِ لوڑ نہ کرتگ اَنت ءُ نوکی واب کپتگ. ھیر من توار نہ کرت، اِسٹاپ روم ءَ اتک اوں داں سنگت روگ ءِ واستا ساڑی اِت اَنت.

سنگتاں شما من ءَ ھالاں بہ دے اِت کہ باریں دوشی دگہ نوکیں نادْراہ اتکگ کہ نا ءُ دوشی زَرگُل تب چون بوتگ؟

چوں وَ تو زان ئے سرکاری نادْراھجاھے ،نادْراہ سک باز بیت ءُ بَزگیں راج وَ ھمروچ نادْراہ اِنت ءُ نہ آیانی میتگ ءُ گْوراں دگہ اَپالیں نادْراھجاھے ھست ءُ نہ دگہ آسراتی یے کہ مھلوک ھمود ءَ وتی اِلاج کرت بہ کنت ،جی ھَو دگہ دو نادْراہ اتکگ، بَلے زَرگُل ءِ تب دوشی کمو وش نہ بوتگ، گُڑا دَوا ءُ درمان کرتگ ءُ سُھبی پَد ءَ دگہ ڈرپ ءُ سوچِن جَتگ نوں کمو گھتر اِنت.

اے گپ ھست جگر راج ءِ بَزگی ءِ گپ کنگی نہ اِنت کہ یک ھزگاریں ڈیھے ءِ تہ ءَ نیزگاری ءِ بادشاھی اِنت، تو ھمے بزگی ءِ گپ جَت من ءَ یک ڈیھے ءِ یات اتک آ ڈیھ مَزّن بَرّ اپریکہ ءِ تہ ءَ اِنت نام اِنت ئِے گَنی بساؤ کہ ھنچوش گْوش اَنت کہ پرتگیزاں پنچ سَد سال ءَ تاں گیش گَنی بساؤ ءِ سر ءَ بادشاھی کرتگ، زان ئے سرجمیں ڈیھ ءِ تہ ءَ چُنت نادْراھجاہ ءُ وانگجاہ بوتگ اَنت…….؟بس دو نادْراھجاہ ءُ دوانزدہ وانگجاہ بوتگ اَنت ءُ آ نادْراھجاہ ءُ وانگجاہ گَنی بساؤ ءِ پہ بزگیں مھلوک ءَ نہ بوتگ اَنت بلکین ءَ آ پہ پرتگال ءِ ءُ آئی ءِ کاسگ چَٹّیں مھلوک ءَ پہ بوتگ کہ آ ھمود ءَ آباد بوتگ اَنت، بَلے گَنی بساؤ ءِ راج دوست ءُ راستیں رھشون امیلکار کیبرال ءَ وتی راج ءِ بزگی وتی چمّانی دیم ءَ دیستگ ءُ راج ءِ درد ئِے ماراِتگ ءُ پہ بزگیں راج ءِ واستا جھد کرتگ ءُ اگاں آ وت شھید بوتگ، بَلے راج ءَ را یک راھے پیش داشتگ کہ زندگ بُوَگ ءِ راہ اِش اِنت، سَے سال ءِ تہ ءَ گَنی بساؤ ءَ پانزدہ ھزار وانگجاہ ءُ نادْراھجاہ اَڈ دیگ بیت، بَلے مئے رھشون گچین کاری ءِ وھد ءَ کاینت ووٹ ءِ پِنڈگ ءَ پد ءَ ھنچو گار بنت ھنچوش کہ تو کُنٹے زمین ءِ دلبند ءَ کَل بہ کن ئے ءُ گچین کاری ءَ سوبین بُوَگ ءَ پَد ھچ گِندگ نہ بنت داں گُڈی گچین کاری ءَ، بَلے مئے رھشوناں مارا ھچ آسراتی نہ داتگ ءُ نہ دے اِنت. پمیشکا مروچی ما چو بَزّگ اِیں.مروچی نادْراھجاہ ءَ بَزّگیں راج ءَ را درمان دست نہ کپ اَنت، یک بژن ءِ گپّے ءُ باریں کدی مئے راج ءِ تہ ءَ امیلکار کیبرال ءِ وڑیں رھشونے ودی بیت………….؟

شَرّیں گُڑا شمارا نوں موکل اِنت ءُ ما اے بزّگین راج ءُ آئی ءِ چُنڈ پِنڈانی سر ءَ گپ بہ کن اِیں شپ روچ بنت ءُ روچ بیگاہ.

سنگت شُت اَنت، من بی پی آپریٹر زُرت نادْراھانی بی پیّانی چارگ ءَ شُت اوں.

ڈاکٹر باریں مئے بادْراہ ءِ بی پی مروچی چون اِنت؟

مروچی ماشاءاللہ کمو شرتر اِنت.
من دْرستیں نادْراھانی بی پی چار اِت آں ءُ زَرگُل ءِ کمرہ ءَ اتک آں داں زَرگُل انگت واب اَت.من توار نہ کرت ءُ اِسٹاپ روم ءَ اتک اوں، نادْراھانی فائیل میز ءِ سر ءَ ایر کرت اَنت.من چار اِت زَرگُل واب اِنت ءُ دہ ءِ ساھت ءَ ڈاکٹر کیت نادْراھانی چارگ ءَ ءُ زَرگل اَلّم پاد کنگی اِنت.من گُڑا کینٹین ءَ شُتاں کہ پہ زَرگل ءَ ارزبند کاراں کہ پد ءَ زَرگُل ءِ درمان دَیگی اَنت.

نادْراھجاہ ءَ نادْراھانی مُچّی اَت ھرکس ءَ را وتی نادْراہ گون اِت اَنت او پی ڈی ءَ روگ ءَ اِت اَنت، لھتین ءَ وتی نادْراہ زُرتگ اِت اَنت ایمرجنسی ءِ وارڈ ءَ روگ ءَ اِت اَنت ءُ لھتیں پہ ڈاکٹرانی ودار ءَ دْرچکانی ءُ او پی ڈی ءِ ھال ءِ تہ ءَ بے کُرشی ءُ بے ٹاٹیں سِمنٹ ءِ پَرش سر ءَ نشتگ اِت اَنت کہ باریں ڈاکٹر کدی کاینت کہ مئے نادْراھاں بچار اَنت کہ پَد ءَ مئے جاگہ دور اِنت ءُ میتگ موٹل رو اَنت.

من کینٹین ءَ نشت اوں کہ چاھے ور آں ءُ بلکین ءَ تنا وھد ءَ مھروان بئیت، گُڑا ما ھمد ءَ کینٹین ءَ چیزے ور اِیں ءُ پَد ءَ جنرل وارڈ ءَ رو اِیں. بَلے دومی دیم ءَ من ءَ سک اِشتاپ اَت کہ چو مہ بیت کہ سر( وارڈ ءِ زمہ وار) بئیت بچار اِیت جنرل وارڈ ءَ کس نیست.

ھیر من چاھے وارت پہ نادْراہ ءِ واستا ارزبند زُرت شُت اوں وارڈ ءَ داں منی ھمراہ اتکگ اِت اَنت. دْراہ ءُ دْراھباتی ءَ رَند من شُت اوں زَرگُل ءِ کمرہ ءَ داں زَرگُل آگاہ اَت، من ءَ آپ ءُ ارزبند گون اَت آں ،من زَرگُل ءَ آپ دات ءُ ازربند اوں دیم ءَ ایر کرتگ اَنت.

اماں تئی تَب نوں چون اِنت؟

شگر اِنت زات پاک ءِ نوں کمو وشاں ءُ دوشی کمو نہ وش بوتگ اوں گُڑا ڈاکٹران درمان ءُ سوچِن کرتگ نوں رھم اِنت اللہ ءِ ءُ پد ءَ سُھبی واب ھم کپتگ اوں.

روان اِنت

اِدارہ ءُ زِمّہ واری

منظور بسمل

دی بلوچستان پوسٹ

بلوچ چہ ازل ءَ زند ءِ ہر پِڑ ءَ پدمنتگ ءُ پیداگ اِنت۔ بلوچ ءِ پدمنتگی ءِ بازیں سببانی تہا یکے بے اِدارہی بوتگ ءُ است اِنت۔

اگاں کسے بُگشیت کہ تنیگا بلوچ راج ءَ مُہکمیں راجی ادارہ نیست کہ آ کُل بلوچ ءِ جہگیری ءُ گورَسی ءَ بکنت تہ دْروگ بند نہ بیت۔

راجی، سیاسی، لبزانکی ءُ زند ءِ اے دگہ تَک ءُ پہناتاں ہچ چُشیں سرجم ءُ برجمیں اِدارہے نیست کہ آ گوں اے راج، زبان ءُ زمین ءَ سد در سد ایماندار بہ بیت۔۔

جاہے نہ جاہے الّم مصالحتے، مجبوری ے یا زورے اِشاں لاچار کنت کہ اے پہ رَدی یا پہ زانت کارمرز بہ بنت۔۔

کاگدانی تہا وَ سدانی حساب ءَ پہ نام بلوچ ءَ گل ءُ ادارہ اَست، بَلے جْوانیں کارپد نیست۔۔

بے کارپدیں ادارہ ءُ گَل راجے ءِ جنجال ءُ اڑاں جَہندمء کم کنگ ءَ گیش کننت۔۔
”پمیشکا مرچی بلوچ اِیسُپ ءِ کَتب ءَ سر اِنت”

ادارہ ءِ باسک ءُ کارمند کہ وتی کار ءُ زمہ واریانی تہا سنگین ءُ سنجیدہ نہ بوت اَنت، آیانی بُوہگ ءَ نہ بُوہگ۔۔

زند ءِ کجام ہم پِڑ ءِ کارمان ءُ ادارہ بہ بنت، اولی شرط ادارہ ءِ باسکانی ایماندار ءُ وتی کار ءِ تہا زانتکار بُوہگ اِنت، اگاں کجام ہم گَل ءُ ادارہ ءِ باسک، کارندہ ءُ اُگدہ دار وتی کار ءَ، وتی فرض ءَ مہ زاننت یا گوچلی بہ کننت، پہ ایمانداری وتی کار ءَ دیما مہ برنت یا سرا بہ گْوازیننت، آ ادارہ ءُ کارمان ءِ مانا ءُ شمبو ءِ شگزّ۔۔۔

مروچی بلوچ راج ءَ شمبو ءِ شگزّ حُدا ءَ باز داتگ، تُری لبزانک بہ بیت یا زبان، سیاست بہ بیت یا صحافت، ہرکجا کہ چماں شانک دیئے نیم بُندگ ءُ نیم شَلوگیں ٹولی ءُ کارمان گندگ ءَ کاینت، بلے سلامتیں کارپد نہ گْواہیت۔۔

منی دزبندی اِنت گوں تچک ءُ راستیں سنگتاں کہ آ راستی ءِ منّوگر اَنت، وتی کارانی تہا پہکی ءُ پلگاری بیارنت۔۔ ہچ رنگیں رُمب ءُ گَلگانی گُشگ ءِ پد ءَ پہ زانت یا پہ ردی کارمرز مہ بنت ءُ وتا پولنگی ءُ ایلنگی مہ کننت۔

اے گپ چہ کس ءَ چیر نہ اِنت کہ بلوچ ءِ گیشتر سیاسی ءُ لبزانکی اِدارہ نہ تہنا پہ زانت یا پہ نازانتی نیم بُندگ ءُ ناسرجم اَنت، بلکیں گروہ بندی ءُ پسند ءُ ناپسند ءِ بُنیاد ءَ گامے دیما، دو گام پُشتا جُنزان اَنت۔۔ بلے مُردنی ئیں ما گُمان نہ کتگ کہ احوالکاری ءِ پڑ ءَ ہم بے ایمانی بیت۔۔۔
دو تل ءُ دوپوستی بیت۔۔
ٹولی بازی بیت۔۔
مَداری والا کاینت وتی شادواں لیب دارنت۔۔
شکاری کاینت وتی کُچکاں اُشو دینت۔۔
تماشہ چاروک تماشہ چارنت۔۔
من ءُ تو حیران ءُ اَبکّہ یکے دومی ءِ دپ ءَ چاریں ءُ وتی راہ ءَ گِریں۔۔

من امید کناں کہ بلوچ ءِ راجی ادارہ ہچ رُمب ءُ ٹولی ءِ ہاترا کارمرز نہ بنت ءُ یکے دومی ءِ سر ءَ حاک مانریچ ءُ کائی ءِ بے ارزِشیں گْوازی ءَ بہر نہ زُورنت ءُ وتا پہک ءُ پلگار کننت۔

بلوچ، بلوچی ءُ بلوچستان
سرجم ءُ برجم بات اَنت

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ راجکاری لبزانک ءُ بلوچ دانشور

نبشتہ کار : هسابجار

دی بلوچستان پوسٹ 

بلوچ راجی جنز کہ بلوچ راجمان ءُ بلوچ دود مان ءِ است بوهگ ءِ مان زمان انت ، روچ ءِ هما روچ ءَ بگر کہ اے درگت ءَ جیڑگ بوتگ کہ بلوچ ءَ وتی عاقبت ءُ پدریچ ءَ شاہستگیں زندے دئیگی اِنت – بلوچ سرڈگار کہ تهی ءُ ڈنی ، درامد ءُ وتیگانی، دست ءَ آئی ءِ لُٹ ءُ پُل ءُ پلو پانچ ءِ بگیری ءَ بلوچ ءِ جنز ءِ بُن ھشت چائے کجام هم دروشم ءَ بوتگ چے هد ءَ تونگر ءُ چے هدا نزور ، بلے روچ ءِ هما روچ ءَ اشی ءِ بگیری ءَ چست ءُ ایر کنگ، ( منفی پروپیگنڈه) بندات بوتگ –

پہ راجی جنز ءِ پروش دیگ ءَ هما واکاں اے کار دست ءَ کتگ کہ همے جنز پرایاں مرگ ءِ کلوهے بوتگ ۔ همے کد ءَ کہ جنز ودان بوتگ همے هساب ءَ آئی ءِ بگیری ءَ چست ءُ ایر کنگ ءِ دروشم هم ودان بوتگ ، آئی ءِ داب ءُ دروشم هم مٹان بوتگ انت۔انگریز ءَ وتی وس ءُ واک ءَ هما وهد ءُ زما نگ ءِ لوازامات کار گپتگ اَنت ، میر سردار ءُ کهده ءُ آیانی هاہُر نیژگار روچ ءِ مروچ هم منتگ انت ، پدا پاکستان ءَ وتی زیر دستی ءَ راجکاری ءُ پارلیمنٹ ءِ دروشم ءَ وتا بلوچ ءِ پِت بوهگ ءُ پیشدارگ ءِ جهد کُتگ ۔

همینچک کہ دور مٹ بوآن بوتگ کارانی وڑ مٹ بوان بوتگ انت ، بلے اینچک کہ دومی نیمگ ءَ پہ چست ءُ ایر کنگ ءَ گوں شور بندی ءَ سوڑگ ساچگ بوتگ ، اے درگت ءَ اے نیمگ ءَ اے کار نہ بئیگ ءِ هساب ءَ بوتگ ، اشی ءِ سوب یکے وَ اش کہ جنز ءِ جند انچیں مردمانی دست ءَ بوتگ کہ آ بلوچ دودمان ءِ ردا کل شے آنی هستی بوتگ انت، ءُ بوت کنت آهانی لوٹ ءُ گزر وتی زمانگ ءِ هساب ءَ سہی بوتگ انت ، بلے آهانی همے کرد یا جنز ءَ را رُدوم دیہگ ءُ اسل منزل ءِ نیمگ ءَ پرینگ ءِ بگیری ءَ همے کدر چست ءُ ایر کنگ ءِ وتی وسان بوتگ انت کہ اے کار ءِ کنگ اینچک ارزان نہ بوتگ۔

وهدے وهد دیما جُنزان بوتگ تہ زانت ءُ آگهی سر کشان بوتگ مردم پیداک بیان بوتگ، کُهنّی ءِ دیم پہ نوکی ءَ وتی ابرمی رنگ ءَ روان بوتگ، مدان مدان ءَ جنز ءِ دروشم مٹ بواں بوتگ ، بلے اے کُہن ءُ نوکی ءِ سپر ءِ میان ءَ یک بلایں گڑبڑے ایش بوتگ کہ بلوچ راجی جنز ءِ تب ءِ مٹ بوهگ ءِ گام سک سُست بوتگ ءُ دنیا باز دیما شتگ ۔
اے چست ءُ ایر ( منفی پروپکنده ) ءِ سپر چہ نپر ، کاگد ، پنتاک پدا ریڈیو ، پدا ٹی وی ، ءُ دان انٹرنیٹ ءُ سوشل میڈیا ءَ اتکگ سر بوتگ ،
بلوچ راجی جنز ءِ چریشاں گستہ آئی ءِ وتی تہا اے تک ءَ هچ چشیں دلجمیں کارے ءِ ، زانشتی بنیاد ءَ سوڑگ کنگ نہ بوتگ ، آ گیش ءِ وتی گر ءُ دار ءَ نہ بوتگ آ هوں کل شے آں گوں روایتی دروشم ءَ ۔

آھودا ند ءِ بدل ءَ دلیری ساڑاهگ بوتگ ، آئی ءِ گورا لبزانک ءُ نبشتہ ءِ گمان اوں نہ بوتگ کہ کجام هم جنزے ءَ پہ آئی ءِ مات هڈ ءِ بستار ءَ انت ۔

زمانگ ءِ باز دیما شتگیں پند ءَ گوں همگام نہ بوهگ ءِ سوب ءَ زانشتی هساب ءَ پشت کپگ ءِ وجہ ءُ بلوچ راجی جنز ءِ دیران تب ءِ مٹ بوهگ ءُ آئی ءِ تها زانت ءُ زانگ ، زانشت ءُ وانگ ، مردمانی جاگہ ادارهانی لیکہ ءِ ودی بوهگ ، اے کلانی یک مُشت ءَ آیگ ءُ رش بوهگ ، دومی چست ءُ ایر ءَ پہ دیما شتگیں زمانگ . انٹر نیٹ ءُ سوشل میڈیا ، اشاں چہ ابید بلوچ راجی جنز ءِ تہا اے مارشت ءُ زانشت ءِ گوں شدّت ءَ لوٹ ءُ گزر کہ بلوچ راجی جنز ءَ پہ راجکاری لبزانک المی انت ، کہ آ ادا آرت ءِ تها واد ءِ هساب هم نہ گواہیت ۔

درستاں چہ بدنسیبی اش انت کہ بلوچ راج ءِ لبزانک شعراں گون گٹ بوتگ جنز گوں جنگ ءَ زیک ءَ بگر دان روچ ءِ مروچ بلوچ راجدپتر شعراں گوں بندوک انت ءُ کیت ءُ جنز گوں جنگ ءَ ۔

ردانکی مردمانی نہ بوهگ ءَ بلوچ راجی جنز ءَ اوار لبزانک هم چہ دانشور ءَ هورک انت ، چیزے مردم ءُ چندے کتابانی بوهگ استی ے نہ انت ، همے سوب ءُ جیڑهانی بنیاد ءَ نہ لبزانک ءَ آ کدا دیمروی کرت کتگ ءُ نہ راجکاری لبزانک است ۔

راجکاری لبزانک ءِ نہ بوهگ ءِ همے پگر ءُ مارشت ءَ یکبر ءَ جاه جتگ، ءُ تو گشت کنے کہ بلوچ گُڑتگ چہ کرنی ایں وابے ءَ مردمے کہ وتی کار ءَ پشت بہ کپیت ءُ واب بروت ، وهدے یکبر ءَ آگہ بی ببت تہ سربتگ بیت نزانت چے بکنان ۔ همے هساب ءَ بلوج راج ءِ استیں زانشت ءُ آگهی ئیگ انت ، وهدے همے هیال کہ پیداک بیت کہ راجکاری لبزانک نیست بیگ لوٹیت ۔ کہ اے پہ کجام هم راجی جنزے ءَ پہ المی انت ءُ چست ءُ ایر ( پروپیگنڈه ) ءِ مستریں نیمون هم همیش انت، وهدے زانت نہ بیت آگهی نہ بیت وانگ نہ بیت ، نہ پہ وتی راج ءُ راجکاری ءَ ءُ نہ پہ چاگرد ءِ گهتری ، یا کجام هم چیزے ءِ تو مثبتیں کارے کنگ بہ لوٹ ئے کُت نہ کنے ، همے درچ ءَ بلوچ راجی جنز ءَ پہ سوشل میڈیا تبائی ءِ سامانے جوڑ بوت ۔

تنقید ءِ نام ءَ پاد کش ءُ کائی بندات بوت . یکے بے علمی دومی اسد ءُ کینگ، سیمی دانشوری ءِ زوریں شوک ءَ بلوچ راجکاری لبزانک گرک ءُ ترک کُت ءُ نشت ۔

سوشل میڈیا کہ دنیا ءِ تها استین دور ءِ کلاں چہ گشاد تریں وسیلہ ئے وتی کلوه ءَ سر کنگ ءِ ءُ ہر کسی دست رسان انت ءُ ارزان انت هم ، دنیا نپ زورگ ءَ انت . بلوچ نشت وتی شوک ءِ پورو کنگ ءُ زوریں دانشوری کنگ ءَ وت وتا رُزوائےِ کت ، همے کار انچو کنگ بوت کہ ہرکسی دل مان روس اِت کہ من چی ءَ پشت کپتگاں همے تها انچیں مردمانی هم دل مان رُوس اِت وسریں دانشوری ءِ شوک ءَ تها کپت انت کہ نہ سیاست ءَ پوہ ءُ سرپد اِت اَنت نہ دنیا ءِ استیں جاورھالان ، ءُ نہ ردانک نویسی ءِ رپک ءُ راهبنداں ، شریں شریں شاعراں هم وتا پندینت ءُ بلوچ راجی سروک بے بُنیں بہتام جت اَنت ءُ آهانی درگت ءَ بے پکراتیں هبر ءُ بداں گوں وتی دل اِش وش کت ءُ ودلیں دانشوری اِش کُت، کبگ ءِ رواج ءِ شوک ءَ چو گولو ءَ وتا کپگ کُت ۔

ہر یکے واب ءَ پاد ءَ چماں مہ شود لپٹاپ ءُ موبایلاں زیر ہرچی دل ءَ کئیت لنکُکانی میار کن ، شاپ فیسبک ءَ کہ بلوچ راجی جنز شمبو ءِ شگز انت، هینده هینده ناه ءِ چرینده انت ۔

اے شمبو ءِ شگز داں داه دوازده سال ءِ برجمی ءَ پد کم کم تمان بوت ءُ دان انسرت، همے گرک ءُ ترکی ءِ سپر ءِ تها شور ءُ شار ، جکہ جکی ءِ میان ءَ پہ راجکاری لبزانک ءُ بلوچ راجی ءِ جنز ءِ گهتری ءُ دیمروی ءِ هاترہ راستیں چست ءُ ایر ءِ ( مثبت پروپیگنڈه ) ءِ هاتر ءَ رسانکدری سنگین ایں کار بندات بوت انت چو کہ بندات ءَ توار ، سنگر ، زرمبش پدا ریڈیو زرمبش ، ریڈیو بلوچستان ، بلوچستان ٹائم ءُ دی بلوچستان پوسٹ ءُ دگہ بازینے ، بلے انگت هم برے برے گندگ بی کہ سنگر ءُ دی بوچستان پوسٹ اے زمہ داریں ادارهانی تها انچیں نکان هم شنگ بیت کہ پہ راجی جنز ءَ هما چست ءُ ایرا اے کار ءَ کنگ ءَ انت ، کہ زی کجام هم دروشم ءَ انگریز ءِ دور ءِ واجکاری ءِ بہ بنت یا بلوچ ءِ وت ماں وتی جنگ ءُ جدلانی چاکری دور ءِ بہ بنت یا استیں دور ءِ پرو پاکستانی بلوچ ءِ ۔

اینچو سپر جنگ ءُ لَٹ ورگ ءَ پد کہ بلوج راجی جنز یک اداره تی منزلے ءَ اتکگ سر انت گو همرائے آئی ءِ اے دگہ لوازماتاں کہ یک هدّے ءَ است بوهگ ءِ گمان ءَ دی انت ، باید وتی هما زمہ واری کہ بلوچ راجنز ءِ گهتری ءَ زورگ بوتگ انت پیلو اش بہ کن انت۔ پدا هما هراں بوستی کہ زی سوشل میڈیا ءَ بوتگ اے ادراهانی تہا کنگ مہ بیت ۔ هچ چشیں مواد ءُ نکین ئے کہ جنز ءُ جنز ءِ راهشون ءُ راهبرانی بگیری ءَ بس پہ چست ءُ ایری ( منفی پروپیگنڈه ) ءُ وتی بے سر ءُ پادیں دانشوری ءِ شوک ءِ هاتر ءَ نبشتہ کنگ بوتگ هچ رنگ ءَ شنگ کنگ مہ بنت ءُ اے وڑیں بے سر ءُ پادیں دانشورانی وسریں دانشوری ایر جنگ بہ بنت ۔ تہ بلوچ راج ءَ هما کہ اسل دروشم انت راجی جنز ءِ سرکنک بی بیت ۔

بلوچ راجی رسانکدر میزران بات

بلوچ راجی جُنز سوبین بات

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بہ جیڑ 

نبشتہ کار: بہار زہری

دی بلوچستان پوسٹ

مناں بہار ءِ گوما گپ جنگی انت, سک باز گپ, بّڈے گِلہ کنگی انت سک باز جُست کنگی اِنت, درستانی پسو گوشدارگی انت.

بلئے من نزاناں ھبرا چہ کجا بندات بکناں, گِلہ آں کجا ایر بہ کناں, مناں وتی دل سُبک کنگی انت تہنا من پرچہ بہ سَگّاں،بلے جیڑگ ءَ آں، اگاں مناں جست بکنت کہ ترا تئی دوست تریں مردماں گُشت نشہ مکن، تو کت، نو چیا یلاداتگ گڑا من چے گشاں؟ اگاں بُہ گشیت تو وا ھُدا نہ منّئے نماز چیا وان ئے؟ بلکیں مَہ گُشیت ھیر اے گپ وا ترّینگ بنت.

بلے گندئے بُہ گُشیت راستیں کسہ چی اِنت تو فیروزہ دروہتگ یا فیروزہ ءَ ترا؟ نو من پوڑے بوتاں ءُ آپ ءَ کپتاں دست ءُ پاد لرزگ ءَ آں دل ءَ یلہ داتگ پیشانی ءَ ھیدے ءَ سر کتگ. ھمے جُست مناں پہ بہار ءَ گون اَنت ءُ بہار ءَ پہ من، نا کہ بہار ایر بُرتے کنت نا کہ من.

وتی جندئے پد جنگ ھم گران انت؟ما وتی جندا پرچہ جُست ءُ پرس نہ کنیں؟
من زاناں ما دل ءَ کاریں، ایب ءُ کمزوری کئی توکا نیست؟ بلے ھرکسی چیر دئیگ ئے جتائیں رنگے. درست وتی مانپوشگ ءَ زاناں.
ما دگرا چیا پِر نَدی ایں؟ چیا کہ ما ما اِنت دگر دگر اَنت، مئے مجبوری مئے بیوسی گیشتراں ما دگرئے جاگہ ءَ بیت کنیں. دگر مئے جاگہ ءَ بیت نہ کنت؟

ھمے عزت ءُ شَرپ ءِ کہ من لوٹوکاں ھمے شَرپ ءَ من دگرے ءَ دات کناں؟

منی دل ءَ ات من بہار ءِ گوما گپ جناں بہار ءَ جُست پُرس کناں. بلے نو مناں بہار ءِ گِلہ ءِ کنگ ءِ ھِچ حاجت نیست من وتی جُِند جُست کت وتی دل سُبک کت بہار وتیگ ءَ وت زانت وتا جُست کنت یا کہ گِلہاں دل ءَ داریت ءُ لِبز ایر بارت.