TBP Balochi

سر بیتگیں ھالانی رد ءَ روکپتی بلوچستان ءَ تپاکیں راجی گل ءِ بنھِشت ایر کنگ ءِ جار پِرینگ بیتگ جارانک ءَ گْوشگ بیتگ کہ مئے راجدپتر اے ایشی ءِ گواہ اِنت کہ بلوچستان کرنانی کرن ءَ بلوچ واکدارانی دست ءَ بیتگ – بلے انگریزاں ھوار ھندی واکدارانی ھمراھی ءَ بلوچستان نوزدمی سدی ءِ گڈسر ءَ بھر بھر کرتگ ءُ بلوچ ایردستی ءِ وڑالاں پِرینتگ ءُ بلوچ ءِ مڈیانی پُل ءُ پھانچی ءَ دست دراج کرتگ اَنت –

جار ءَ گْوشگ بیتگ کہ نود ءُ سَے سالانی تہ ءَ روکپتی بلوچستان درامدانی دست ءَ اِنت ءَ دراجیں مُدتے بیت کہ بلوچ راج وتی درستیں ھک ءُ اگبالاں چَہ زبھر کنگ بیتگ –

آئی ءَ گْوشت کہ زوراکیں سیاستکار ءُ آئی ءِ مزن واکاں مدام ھمے کرد ءُ سِنچ داشتگ ءُ پیداک اَنت بلوچ ءِ مڈیانی پُل ءُ پھانچی ءُ آئی ءِ چاگرد ءِ تہ ءَ ابید ءِ نابزانتی ءِ کرد ءَ دگہ ھِچ یلہ نہ کرتگ ءُ بلوچ راج ءِ ایردستی ءِ دارگ تھران ءِ واکدارانی مزنیں مول ءُ کردے ءِ پرمان اِنت –

جارانک ءَ گْوشگ بیتگ کہ ما ڈیھ ءُ دراں ڈیھاں نشتگیں بلوچ جھدکار مدامی ءِ رنگ ءَ بلوچستان ءِ ھکانی پانکجنی ءِ ھاتر ءَ بلوچ راجی دشمنانی بدیں کردانی پاشک کنگ ءِ ھاتر ءَ جھدانی تہ ءَ ھمتوار بیتگیں، وتی جھدانی ھواری ءِ درچ ےَ اے سیمی گام چِست کرتگ ےَ بلوچستان ءِ راجی تپاکی گل ءِ نام ءَ وتی راجداری ءِ گَل ءِ بنھِشت ءَ ایر کنگ ءَ اِیں –

آئی ءَ گْوشت کہ بلوچستان ءِ راجی تپاکی گل انسانی ھکانی جار ءُ جھان ءِ دمکراسی ءِ کانود ءُ رھبندانی رد ءَ کار کنت ءُ پہ بلوچستان ءِ وت واجھی ءِ برجاہ کنگ ءَ راجی جھد ءَ کنت، ھما وت واجھی کہ میرپنج ءِ لشکر ماں سال ۱۳۰۷ ھجری شمسی ءِ تاکریچاں چَہ بلوچ راج ءَ پُلگ بیتگ ءُ یک ھونی ءِ جاورے ءِ تہ ءَ پرینگ بیتگ –

ھمے وڑ ءَ روکپتی بلوچستان ءِ دمگ دزاپ ءَ ھم دگ ءِ میان ءَ بلوچستان ءِ بیرک مِک کنگ بیتگ

دیستگیں تامرانی تہ ءَ گِندگ بیگ ءَ اِنت کہ بلوچ ورناہ بلوچستان ءِ بیرک ءَ دگ ءِ میان ءَ مِک کنگ اَنت –

روکپتی بلوچستان ءِ جھمنندیں مولانا ابدلگپار نکشبندی ءُ مولانا مھمد امین آسکانی ءَ ایرانی پوج ءِ دست ءَ گرگ بیتگیں مولانا پزل الرھمان کوھی ءِ یل کنگ ءِ دزبندی کرتگ ءُ گْوشتگ کہ مولانا پزل الرھمان بے میار ءَ ایرانی پوج ءَ گپتگ ءُ برتگ بند کرتگ –

مولانا ابدلگپار نکشبندی ءَ ائید ءِ نماز ءِ ھُتبہ ءِ وھد ءَ تران کنان ءَ گْوشتگ کہ مولانا پزل الرھمان یک راجدوست ءُ مھمانداریں مردمے ءُ ایشی ءِ ھمراھی ءَ آ بلوچ راج ءِ جوانیں نمائندگے ءُ ناکہ آئی ءَ کسے ءِ کاراں گوں دزمانجنی ھست ءُ آئی تچکیں گپانی سر ءَ آ گرگ ءُ بندیگ کنگ مہ بیت –

آئی ءَ گوشت کہ من آیت اُلا ھامنہ ءَ گوں دزبندی کن آں ایران ءِ سنی برادری ءِ پتر ءِ تہ ءَ درستاں کستریں باسکے ء دروشم ءَ گون تو دزبندی کن آں ائید ءِ وشیں روچمانی ءِ دروشم ءَ مولانا پزل الرھمان ءَ یلہ بہ کنت کہ آ بلوچ راج ءِ جیڑھانی گیش ءُ گیواری ءَ درستاں چَہ جوانتر ءُ شرتریں انسانے ءِ بستار ءَ داریت، اُمیت کن آں کہ مئے دزبندی ءَ تو رد نہ کن ئے ءُ مئے دروھتی سلامانی ھمراھی ءَ تو مولانا پزل الرھمان ءَ یلہ کن ئے –

ھمے وڑ ءَ مولانا مھمد امین اسکانی ءَ چَہ پشامگ ءِ نیکراھی وانگ جاہ ءَ گْوشت کہ مولانا پزل الرھمان زنداناں بندیگ کنگ بیتگ باید آ زوت یلہ کنگ بہ بیت کہ چوشیں شیر مردانی بندگ راجماناں تاوان اِنت کہ اے وڑیں شیر مردانی جاگہ بندیگ جاہ نہ اِنت

آئی ءَ مولانا ابدلھمید امام جمہ زاھدان، کاک ھسن امینی ھاکم شرھی مردمی کردستان، مولانا مھمد ھسین گورگیج امام جمہ آزاد شھر، مولانا مھمد ازمان امام جمہ ءِ ھاش، مولانا پَتھ مھمد نکشبندی امام جمہ راسک ءُ ھوار دگہ لس نیکراھی مردماں گوں دزبندی کرت ءُ گْوشت کہ بندیگ کرتگیں مولانا پزل الرھمان ءِ دیمدراھی ءَ ھمتوار بہ بنت ءُ زوت ءَ چَہ زوت یلہ کنگ بہ بیت –

نمدی یے پہ نمیرانیں آھوگ گُل ءِ نام ءَ

نبشتہ کار: دیدگ گُل

دی بلوچستان پوسٹ

اَچ کوشکلات

روچ: دوشمبے ءُ وھد 06:00 بیگاہ۔

رمس:25 سوچکان (مئی)2020

دروتے پہ ترا آھوگ گُل

تئی مِرگ ءِ جار وھدے ماں گُلیں بلوچستان ءَ شنگ بُوت ءُ دومی روچ ءَ وھدے من پیسبک پچ کُت داں منی دیم ءَ تئی دُراھیں اکس زاھر بُوت اَنت کاروان،الھان ءُ کندیل تئی شَیر گوں اکساں شنگ اِت اَنت تاں من سک ھیران بُوت آں اَلم چیزے بوتگ درستیں مھلوک ءَ تئی اکس شنگ کتگ اِت اَنت ۔

آھوگ جان مب کدی چاگردی رسانکدار ءَ تئی اکس نہ دیستگ اَنت، البت ترا من دیم پہ دیم دیستگ پرچاکہ تو منی جْوانیں سنگتے بُوتگ ئے ۔ھمے روچ ءَ سھت ءُ دمان تئی اکس، مزاک ءُ کندگ منی ھیال ءِ تہ ءَ تَر ءُ گرد کنگ اِت اَنت، پرچا کہ تو منی دِلی دوستے بُوتگ ئے۔من چہ تو داں کیامت ءَ بے ھیال نہ باں، من زان آں ھمے روچ ءَ پہ مند ءَ کیامت بُوتگ۔

من ءَ شر یات اِنت کہ آ روچ ءَ تو مزاک کُت ءُ گُشت” من مِر آں تو پمن چے کن ئے”؟ من گُشت” اللّٰہ ترا ھچ مہ کنت کہ تو راج ءِ ھستی یے ئے”.تو گُشت مَرگ وَ پہ آدم زات ءَ برھک اِنت”.منی گور ءَپسو نیست اَت داں من ھاموش بُوت آں۔
منی آھوگ پل تو وت ءَ را چُش ارزانی ءَ بدوھانی دست ءَ مہ داتیں ،مردمانی دپ ءَ ھمے گپ اِنت کہ آھوگ ءَ وت ءَ را وت کُشتگ بَلے اے ھبر ءَ من نہ منّ آں کہ تو وت ءَ را وت کُشتگ پرچا کہ تو لگورے نہ بوتگ ئے۔

آھوگ منی ساہ اسل گپ اش اِنت تو زانتکارے بوتگ ئے بِلّے مئے مُلک ءَ زانتکار ءَ ھچ کدر ءُ کیمت نیست مئے کوم وتی زانتکاراں وت کُش اَنت۔ھر کس گند ئے زانتکارے، بزانت کہ گناھگارے تو نہ مُرتگ ئے تو زندگ ئے مئے دِلانی تہ ءَ ئے، تو وتکُشی نہ کُتگ ترا بدوھاں شھید کتگ۔۔۔۔

آھوگ پُل من ءَ شر یات اِنت کہ تئی گُڈی گپ کُجام بُوتگ کہ تو من ءَ کلوہ کُت ءُ گُشت کہ وتی شَیرے روان کن من استاد مُنھاج مُکتار ءَ دیان ئِے۔من منّہ کُت من گُشت کہ من چُشیں زانتکاریں شائرے نہ آں ءُ من پہ دل ءِ وش کنگ ءَ نبشتہ کن آں “. تو پد ءَ من ءَ گُشت تو وتی شَیر ءَ راہ دے من اسلاہ ئِے کن آں بلے انگت من راہ نہ دات.

سنگت جان من تربت ءَ نشتگ آں ادِ ءَ تو زان ئے نیٹ نیست ءُ “پی ٹی سی ایل” اِنت برے ھست ءُ ماھے ءَ گار اِنت پد ءَ بچار کُدرت ءَ تئی مرگ ءِ جار ءِ واستا زاناں اللّٰہ ءَ بُرتگ اَت بزاں نیم ادار ءَ پد نیٹ ھم شُت ءُ بیگواہ بوت، لھتیں وھد ءَ پد نیٹ ءَ کار کُت تئی اکس شنگ اِت اَنت، من نہ زان آں تو منی کُجام گپ ءَ دلگران ئے کہ تو چہ من ءَ سک دور شُت ئے، بلے من داں کیامت ءَ تئی وداریگ آں،من نہ گُش آں کہ تو دائمی چَہ اد ءَ رپتگ ئے ، من گُش آں بلکیں تو جھان ءِ کاراں دست گٹ ئے پہ من اتک نہ کن ئے، اگاں باور کنت من ءَ تئی مرگ انگت باور نہ کنت پرچاکہ تو مئے دلانی تہ ءَ زندگ ئے، داں جھان ھست تو نمیران ئے، تو نیمران ئے بلے من انگت تئی وداریگ آں منی ارواہ.

تئی مھرانی راھچار ءُ وداریگیں ھمبل دیدگ گُل

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک:28 مئی چاگی ءُ بلوچستان

نبشتہ کار: سُمیہ بلوچ

دی بلوچستان پوسٹ

مردم (انسان) دوستیں اداره هما وهداں جوڑ بوتگ انت کہ مردم ءُ مردم دوستیءِ بستار دیمءَ اتکگ ءُ گلامیءِ ھلاپءَ آئیءِ هلاسیءِ جار جنگ بوتگ ات بلے دگنیا انگت وتی رھبندانی هسابءَ جنزان انت ، اے اداره ھما مھلوکءِ گپءَ کن انت کہ آ مھلوکءِ گپءَ دگنیا ءِ زور آوریں استان کنگ لوٹ ایت۔

اگاں ما دگنیا ءِ مُلبت بزان کہ World map ءَ بِہ چار ایں گڑا آئیءِ تہءَ بلوچستان جیوگرافی هوالہ ءَ یک سکّیں بلاھیں بستارے دار اِیت، بلے بلوچ مھلوکءِ زند ءُ آئی لوٹ دگنیا ءِ انٹرسٹزانی لَڑ ءِ توکہ نیست انت ، اے گواهیءَ چاگیءِ راسکوه ءُ ڈیره گازی ھان ءِ هاک ءَ چہ گیش ھچ جاہ دات کُت نہ کنت (ڈیره گازی ھان دنیاءِ جوانتریں یورینیم بزان کہ Yellow Cake ءِ پروڈکشن کنوکیں زمین انت بلے آ دمگءِ مهلوک اے مڈی ءِ در کنگ ءُ آئیءِ کارمرز کنگءِ سوبءَ مروچی هم نا دراھیانی آماچ انت)۔

28 مئی 1998 ءِ روچءَ راسکوهءِ دمگءَ نیوکلیر ٹیسٹ کنگ بیت ءُ پاکستان هم دگنیا ءِ زوراکیں استانانی اے ریسءَ وت ءَ هوار کنت بلے پُشتءَ بلوچستان ءُ چاگیءِ مھلوک ءِ زند ءِ هاتر ءَ جوانیں گامگیجءِ زورگءَ بے هال بیت کہ آئیءِ سوب روچ مروچیءَ تاں بلوچ وتی نہ کتگیں گُناہءِ سزا ءَ ورگءَ اَنت ءُ نہ دگنیا ءِ ایش انسان دوستیں ادارهاں پدا چاگی ءِ انسانانی هال گِپت۔
آ روچ پاکستانءِ واستا یک وشی یے ءِ روچے اَت بلے پہ بلوچستان ءِ ھاتر ءَ یا تاراجیءِ تھاری اَت۔
چہ اے ٹیسٹءَ پد چاگیءِ مهلوکءَ بازیں نہ وشّیں نا دراھیاں گپت ءُ چاگیءِ زمینءَ ڈُکّالے ءَ کپت ، ایش ڈُکّالءَ نہ مردم پشت گیتک ءُ نیکہ دگہ دلوتے۔

ھما روچءَ بگر تاں روچ ء مروچی چاگیءِ زمینءَ چہ پاد آؤوکیں  Rediation یک وبا یےءِ وڑ ءَ مهلوکءَ گران اِنت چوشکہ اود ءِ چِلّگی زالانی لاپءِ تہءِ چُک مرگءِ آماچ بنت یا میڈیکل زبان ءَ ئِے Molar Pragnency ءِ چوشیں کیسز سک باز انت ، اگاں ودی بنت گڑا گوں یک نا دراھی یے ءِ گومءَ هوار پیداک بنت۔ Rediation ءِ سوب وڑ وڑیں کینسر ءِ نادراہ هم سک باز انت  چوشکہ سائنس Skin Cancer ءِ سوَب هم همیش Rediation آں گوش اِیت ءُ چاگی چُک ءُ کماش 1998 ءَ پد ایش Skin Cancer ءِ آماچ بوگ ءَ انت، بلے ایش کیسز میڈیکل ریجسٹرانی تہا درج نہ بنت نا ایشانی رپوٹ جوڑ بیت نہ ایشانی هاترءَ Survey کنگ بیت۔
چوشکہ چاگیءِ مھلوکءَ ورگءَ پہ نان نیست آ کُجا  کیت  ءُ در شھراں ایش نا دراھیءِ الاجءَ کُت کنت ءُ بلوچستانءَ کینسر هسپتالءِ واب یک نہ سرجمیں وابے پہ بلوچ مھلوک ءِ هاترءَ.

نوں اد ءَ چہ اے جُست چست بیت کہ اگاں بیست ءُ دو سال مئے گورءَ یک Survey Team ءِ جوڑ بوت نہ کنت کہ چاگی ءِ کیسانی رپوٹ دیمءَ آرت کت بہ کنت گڑا ماں یک عالمی وبایے بزاں کہ کورونا ءِ کیساں بلوچستانءِ دمگءَ چون زانگ ءَ انت پد ءَ واپس کیت گپ Survey Team ءُ Testing اے دوئیں موجود نہ انت ، تھنا شال ءِ دمگ ءَ ایش کورونا ءِ ٹیسٹ وتی منّءَ بوگ ءَ انت بلے چون ءُ چے هسابءَ بوگءَ انت آ کس زانت کُت نہ کنت چیءَ کہ ڈاکٹر وت زار جنگءَ انت پہ فیسیلیٹیزاں گڑا شال ءِ دمگ ایش  فیسیلیٹیز موجود نہ انت گڑا کجا انت چاگی ءُ پروم کہ اودءَ یک کلگے ءِ الاج نہ بیت نہ میڈیا شُت کنت ، گڑا اودءَ کورونا ءِ کیسز شرّیں رنگے ءَ چون زانگ بنت ءُ چون الاج کنگ بنت یا کہ آ مهلوک ھمیش ھسابءَ هاموشیءِ گوما ایش دگنیا ءَ چہ روت اِنت۔؟

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ نیشنل موومنٹ ءِ سرکماش چیرمین ھلیل بلوچ ءَ ڈنک تربت ویل گوں ترندی ءَ ایرجتگ ءُ گْوشتگ کہ بلوچستان ءَ مردمی اگبالانی لگتمالی ءِ تہ ءَ ھمروچ گیشی آیان اِنت. میان استمانی تْرامگیج ءُ رسانکدر ءِ بلوچستان ءَ آیگ ءِ سر ءَ مکن ءُ پاکستانی رسانکدر ءِ بے تواری ءَ اے کارپد نہ ایوک ءَ جھان ءِ چماں چہ اندیم بہ اَنت بلکیں ایشانی تہ ءَ گیشی آرگ بیت۔ ڈنک تربت ءَ لوگ ءِ سر ءَ ارش، تیرگواری، جنین آدم یے ءِ شھید بیگ ءُ چکے ءِ ٹپی بیگ پردردیں ویل اِنت۔

آئی ءَ گْوشتگ کہ اے رنگیں ویل پارلیمانی گلانی بدیں کردگاراں گیشتر پدّر کن اَنت پرچا کہ آ ھمے پارلیمان ءِ بھر اَنت آیانی بستار ءُ سیتمندی چہ کس ءَ چیریں چیزے نہ اِنت۔ وتگڑیں گچین کاریاں سوبین بیتگیں جھگیر اے رنگیں کارپدانی ردوم دئیگ ءِ ھاتر ءَ نامینگ بنت۔ پارلیمانی گلاں وتی بدیں ھستی ءِ زندگ دارگ ءَ پہ پاکستانی لشکر ءِ وشنودی ءَ پہ بلوچ چاگرد ءَ ناسور جوڑ بیگ ءَ تشے ھم لج مھسوس نہ کرتگ۔گْوستگیں دو دھکاں اے ناسوراں سدانی کچ ءَ ڈودار نز آرتگ اَنت داں کہ آجوئی ءِ جھد ءِ دیم ءَ بند بست بہ کن اَنت۔ اے ٹولی پاکستانی پوج ءِ ھمکاری ءَ بلوچ راج ءِ بگیری ءَ تچکیں وڑے ءَ جنگی جُرماں ھوار اَنت۔ ایشاں بلوچ ءِ چک چینی ءِ دین ءَ وتی مال ءُ مڈیانی گیش کنگ ءُ ھر وڑیں سلکاری ءِ آزادی دیگ بیتگ۔

ھلیل بلوچ ءَ گوشتگ ڈنک ءَ ھما رستراں کہ بے میارانی سرا ارش کرتگ آیانی گوں پارلیمانی گلانی سروکاں اکس اے گپ ءِ گواچن اَنت کہ وتگڑیں جمھوری سیاست نام ءِ سر ءَ اے رستر گوں بلوچ راج ءِ جان، مال ءُ ننگ ءَ لیب کنگ ءَ اَنت۔اے ٹولی پہ پاکستانی پوج ءِ وشنودی ءَ چونائیں ھم کپتگیں کارے ءَ چک ءُ پد نہ بہ اَنت۔

بی این ایم ءِ چیئرمین ءَ گوشتگ کہ پاکستانی واکدار ءُ آیانی داشتگیں کشندھانی نیمگ ءَ لوگ، جنین ءُ چکانی سر ءَ ارش ءِ اے اولی ویل نہ اِنت چد ءُ پیش ھم ھاران ءِ ھنکین ءَ بانک ھلیمہ، تمپ ءَ بی بی شھناز، مشکے ءَ نازگل ءِ پجیگ ءَ بازیں دمگاں جنین آوار جنگ ءُ شھید کنگ بیتگ اَنت۔

آئی ءَ گْوشتگ کہ ما زان ایں پاکستان ءُ مئے سیادی واجہ ءُ چیردست ءِ سیادی اِنت ءُ چہ واجہ کارانی نیمگ ءَ چُشیں کرد ھم ناگمان ءِ کار ءِ نہ اِنت۔ بلے پاکستان ھم اے گپ ءَ بہ زانت کہ بلوچ راج ءَ آ ھجبر وتی واجہ نہ من اتگ بلکیں آئی ءِ بگیری ءَ سرمتابی کُتگ۔ اے سرمتابی ءُ سرمچاری دنیگت برجاہ اِنت۔ بلوچ راج ءِ زانت ھما ھد ءَ سر بیتگ کہ آ زانت نی بید چہ آجوئی ءَ نہ بلوچ ءِ گس ءُ چُک پھریز اَنت نا لج ءُ ننگ۔

بلوچستان لبریشن فرنٹ ءِ سروک ڈاکٹراللہ نزر ءَ وتی درشان ءِ تھءَ گْوشتگ تربت ءَ ڈنگی ءِ کارپد گوں ترندی ءَ ایرجتگ ءُ گْوشتگ بلوچستان ءَ چوشیں کار ھمروچ بیگ ءَ اِنت۔ اے بری میتگ ءِ مردم گوں دلیری ءَ ڈنگانی دیم ءَ اوشتاتگ اَنت پمیشکا گپ پاشک بیتگ۔ ما باز رند ءَ اے پدراھی کرتگ کہ بلوچستان ءَ گیشتریں چاگردی سلکاری ءُ لٹ ءُ پل ءِ پشت ءَ زورگریں پوج ءُ آئی ءِ چاریگ اَنت کہ پارلیمانی گل ھم آیانی پلہ مرزی کنگ ءَ اَنت۔

ایم آئی ءِ سروکی ءَ سرکار ءِ کشندھاں ڈنک تربت ءَ جاسم ء امیر ءِ لوگ ءَ دُزی ءِ نیت ءَ ارش کرتگ۔ ایشانی دیما اوشتگ ئے سوب ءَ ایشاں یک جنین شھید ءُ چکے ٹپی کرتگ۔ بلوچستان ءِ جتائیں دمگاں چشیں ٹولی کوش، دزی ، ڈنگی ءِ پجیگ ءَ دگہ کارھرابیاں گون اَنت بلے بلوچ آجوئی لوٹوکانی بگیری ءَ پاکستانی پوج ءُ چیریں واکانی ھمکار بیگ ءِ بنیاد ءَ پارلیمانی گل ایشانی دیمپانی کنگ ءَ اَنت۔ ناشرکاری کنگ ءَ پد اے پاکستانی پوج ءِ باھوٹ بہ اَنت ، پاکستانی پوج ءِ بنجل پہ ایشاں مدامگیں چیر جاہ اَنت۔

بلوچ آجوئی دوستیں رھشون ءَ گوُشتگ ڈنک ءَ لوگ ءَ اُرش جنین آدم ءِ کوش ءُ چکے ءِ ٹپی کنگ ءِ کار ایرجنگ ءُ نادوست لیکگی کار اِنت۔ ایشی پجیگءَ اے ویلانی یکشلی اِنت کہ بلوچستان ءِ کُنڈ کُنڈ ءَ ھم روچی کسہ جوڑ بیتگ اَنت۔ اے چیردستی ءِ رژناھیں چیدگ اَنت۔ چیر دستیں راجاں گوں گْوستانک ءِ تہ ءَ چوشیں درور الم رس ایت بلے اے نوکیں باریگ ءَ یک ڈیھے ءِ وتی چیر دست کنگ ءُ گوں مردماں گلامانی رنگ ءَ پیش آیگ 21 می کرن ءَ مردمی دودمانی روشت ءُ ربیدگانی ھلاپ اِنت۔پاکستان اے نوکیں عھد ءَ ھم بلوچستان ءَ زیردست ءُ کالونی کنگ ءُ ھما زوراکیاں کنگ ءَ اِنت، کہ نوکیں جھان ءَ ایشی ءِ درور گمان نہ اِنت کہ رس ایت۔

آئی گوشت کہ جھان ءَ ھمے وڑ گوں تیزی ءَ سائنس ءُ ٹیکنالوجی ءِ تھءَ دیمروی، ھمے پیم مردمانی ھق ءُ اھترام ءِ ھاترءَ ھم بازیں گل اڈ بیتگ اَنت کہ مردمانی زند ءَ ھاسیں جاہ ءِ دیگ ءِ ھاترءَ جھد کنگ ءَ اَنت۔

آئی ءَ گوشتگ اے مردمانی سیادی تچک ءَ گوں پاکستان ءِ ملٹری انٹیلی جنس ءَ اِنت۔ پیش ءَ ایشاں گوں میجرندیم ءَ کار کرتگ۔میجر ندیم بلوچ سرمچارانی ارشے ءَ کشگ بیتگ۔ بلے دانکہ پاکستان ءِ زروگری بلوچستان ءَ برجاہ اِنت، پاکستان چہ وتی داشتگیں سلکارانی کار گرگ ءَ دست ءَ نہ کش ایت ءُ ایشاں ماں بلوچستان ءَ یک جنگ سلاہ ءِ وڑ ءَ کارمرز کنان بیت ءُ مئے دودمان ءُ ننگ ءُ منگہ ءَ لگتمال کنان کنت۔

آئی ءَ وتی درشان ءِ تھءَ دیمترءَ گُشت کہ تربت ءَ پیش اتکگیں ویل ءَ لوگ ءِ مردماں ، ھمساھگاں ءُ سیاداں گوں بھادری ءَ ایشانی دیم گپتگ ءُ پاکستانی چیریک دزگیر کرتگ۔ ویل ءَ پد چاگردی رسانکدر ءَ اے ڈنگاں سلاھبندیں اکس ءُ اے رمب ءِ باسکانی گوں پاکستانی وزیر ءَ اکس چاگردی رسانکدر ءَ تالان بیتگ اَنت۔ اے ھرچ کار ھرابی ءَ پد وتگڑیں وزیرانی لوگ ءُ پاکستانی لشکر ءِ بنجل ءَ سراں چیر دئے اَنت۔ اے بلوچ چکچینی، بلوچ دودمان ءُ مئے لج ءُ میار ءُ مئے منگہ ءِ سر ءَ ارش اِنت۔

سلاہ بندیں مردماں تیرگواری کرتگ ءُ اھوالکارے کُشتگ

دی بلوچستان پوسٹ پتر ھال ءَ سر بیتگیں ھالانی رد ءَ سندھ ءِ شھر جیک آباد ءَ سلاہ بندیں مردمانی تیرگواری ءَ چَہ دمگی اھوالکار بیران بیتگ –

پولیس ءِ رد ءَ ویل دودا پور ءَ پیش اتکگ، کہ اود ءَ سلاہ بندیں مردماں تیرگواری کرتگ ءُ اھوالکار زُلپکار مندرانی کُشتگ ءُ چریشی ءَ پد کوشکار ءَ تچگ ءِ جھد کرتگ ھما دمان ءَ پولیس ءَ کاروائی کرتگ ءُ مجرم سلاھانی ھمراھی ءَ دزگیر کرتگ –

ایس ایس پی ءِ رد ءَ زلپکار مندرانی ءِ جون پوسٹ مارٹم ءِ واستا نادراہ جاہ ءَ سر کنگ بیتگ ءُ ویل ءِ گیشیں پٹ ءُ پول برجاہ اِنت –

شال ءَ چہ بندش ءَ ابید مھلونک ءَ ائید ءَ پکنک کتگ ءُ کانود ءِ نہ مَنّوکانی سر ءَ پولیس ءَ گامگیج چِست کتگ ۔

کرونا وائرس ءِ سوب ءَ شال ءِ پکنک جاہ بند کنگ بوتگ اَنت ءُ ملھونک کوئلہ پاٹک ءِ نزیک ءَ ویرانیں جاھاں شُتگ ءُ گوں اکس کَشی ءُ موج ملار ءُ ورگاں دزگٹ بوتگ اَنت ۔

پولیس ءَ وت ءَ ھما جاہ ءَ رسینتگ ءُ مھلونک ءَ را تاچینتگ ۔

چوریگاں گُشتگ کہ لاک ڈاؤن ءِ سوب ءَ سرجمیں پارک بند اَنت ءُ دگہ چُشیں جاگھے نیست کہ ما سیل ءَ بہ رو اِیں ءُ شاتکامی بہ کن اِیں ۔ اَئید ءَ پکنک ءِ نہ بوگ ءِ سوب ءَ ما سیل ءَ اِد ءَ آتکگ اِیں ۔

ادارہ ءَ گُشتگ ما کسّ ءَ لاک ڈاؤن ءِ نہ منّگ ءَ نیل اِیں۔

بلوچ اسٹوڈنٹس آرگنائزیشن آزاد ءِ بنجاھی جارکش ءَ ھشت جون ءَ بلوچ مسنگ پرسنز ءِ روچ ءِ درگت ءَ شنگ کرتگیں بیان ءَ گْوشت کہ ھشت دو ھزار ءُ نُہ ءَ بلوچ اسٹوڈنٹس آرگنائزیشن آزاد ءِ بنجاھی پتر ءِ کسان کمک سرکماش زاکر مجید بلوچ سکیورٹی لشکر ءَ ابید ارزی نامہ ءَ دزگیر کرتگ ءَ بیگواہ کتگ -مروچی آئی ءِ بیگواھی ءَ یازدہ سال سرجم بیتگ بلے زاکر مجید ءِ بیگواھی ءِ بارو ءَ ناں آئی ءِ کھول سرپد کنگ بیتگ نا کہ آمدگس ءُ دگہ جاھاں پیش کنگ بیتگ- راجداریں باسکانی زورانسری بیگواھی وت پاکستان ءَ ھوار میان اُستمانی رھبندانی رد ءَ ترندیں بگیری اِیت – ءُ آ راجداری ءِ بنیاد ءَ یازدہ یازدہ ءَ سال ءَ تھاریں جاھاں کرتگ ءُ کھول مازگی نادراھی ءِ آماچ کنگ ھررنگ ءَ ریاستی ءُ میان اُستمانی رھبند ءُ انسانیت ءِ بگیری اِنت –

جارکش ءَ گْوشت کہ بلوچستان ءِ لس مھلوک ءُ راجداریں باسکانی زورانسری بیگواھی ناوش تِر بیان اِنت ءُ ھمک روچ ءِ ٹِک ءَ نوکیں ناوشیں ھالے ءِ ھال رسگ ءَ اَنت – بیگواھیں مردماں نا آمدگساں پیش کنت ءُ ناکہ آیانی بارو ءَ کرتگیں جرماں پدر کنت ناکہ کھولاں ھال دنت بلکیں زورانسری آیاں چِست کنگ ءَ برگ اِنت ءُ لَٹ شاپ کنگ ءَ پد یا آیانی جوناں چگل دنت یا آیاں نیمردی جاوراں یل کنت چُشکہ بے کساس دردیگی یے – زاکر مجید ءَ ھوار دراھیں راجداریں باسک ءُ دگہ بیگواھیں مردمانی زندمانی ءِ واستا باز ترس اِنت ما باز وھد ءَ چَہ دزبندی کنگ ءُ پیداک اِنت کہ بیگواھیں مردماں آمدگساں پیش بہ کن بلے ریاست ءُ آئی ءِ ادارہ بیگواھیں مردماں آمدگسانی پیش کنگ ءَ ابید زورانسری ءِ بیگواھیاں گیش کنگ ءَ لَگ اِتگ اَنت- گوستگیں لھتے سالاں بلوچ نودربرانی چِست کنگ ءُ بیگواھی ءِ درچانی تہ ءَ گیشی اتکگ –

جارکش ءَ گْوشت کہ بلوچستان ءَ ھزارانی کَچ ءَ مھلوک زورانسری ءِ بیگواھی ءِ آماچ کنگ بیتگ اَنت کہ چریشانی تہ ءَ راجداریں باسکاں ھوار ھمک تک ءَ گوں سیادی کنوکیں مردم ھوار اَنت، زورانسری ءِ بیگواھی ءِ سبب ءَ بلوچستان ءِ راجداری ءِ بیرک جھلی ءِ میان ءَ چگل دیگ بیتگ -راجداری ءَ بلوچ نودربر بندش جنگ بیتگ ءُ بلوچ راجداریں گل بی ایس او آزاد ءِ سر ءَ بندش جنگ بیتگ ءُ آئی ءِ باسک ءُ رھشون بیدے آمدگسی نامہ ءَ دزگیری ءَ پد شھید کنگ بیگ ءَ اَنت – زاکر مجید، ڈاکٹر دین مھمد، رمزان بلوچ، زاھد بلوچ، گپور بلوچ ءُ شبیر بلوچ ءَ ھوار ھزاراں مردم زورانسری بندیگ جاھاں بند اَنت –

جارکش ءَ گْوشت کہ گل ءَ دوھزار ءُ ھبدہ ءَ بلوچ مسنگ پرسنز ءِ ناوشیں جیڑھے سر ءَ میان اُستمان ءِ دیم ءَ پدر کنگ ءُ اے توار ءِ گیش برز کنگ ءَ گل ءِ نیمگ ءَ ھشت جون ءَ بیگواھیں بلوچانی روچ داریت اے سال ءَ گل بیگواھیں بلوچانی بارو ءَ سرپدی دیگ ءَ بندات کنت چریشی ءَ چَہ سرجمیں زندانانی واستا توار ءَ چِست کنت گل سرجمیں راجدار، چاگردی باسک ءُ انسانی ھکانی باسکاں گوں دزبندی کنت کہ آ بیگواھیں بلوچانی روچ ءِ درگت ءَ سرپدی ءِ بھر جوڑ بہ بنت ءُ پاکستان ءَ زورانسری گپتگیں مردمانی واستا توار چِست بہ کن اَنت ءُ اے ناوشیں جاورھالاں میان اُستمان ءِ دیم ءَ پدر کنگ ءَ وتی پرز ءَ پیلو بہ کن اَنت –