TBP Balochi

نبشتانک: جنی آدم ءُ چاگرد

نبشتہ کار: سید مصطفیٰ احمد

رجانکار:باسِت اکبال بلوچ

دی بلوچستان پوسٹ

یک جنین آدمی ءَ وتی سے ماہ ءِ چُک ڈاکٹر ءِ گْور ءَ بُرت، کہ واجہ ڈاکٹر منی چُک ءِ گوش درد کنت، ڈاکٹر ءَ چُک چار اِت ءُ گْوشت ئِے کہ ایشی ءِ گوش ہ تہ ءَ ریشے ھست ءُ کاپی تاک ءِ تہ ءَ چیزے درمانانی نام نبشتہ کت ئِے ءُ دات ئِے جنین آدم شُت من ھبکہ ءُ ھیران بوت آں، جنین آدم روگ ءَ اَت من توار جت ءُ اوشتارینت، آ کہ اوشتات پُشت ءَ چارگ ءَ لگ اِت۔

من گْوشت گھار اے تئی چُک ءَ سے ماہ ءُ ھپت روچ اِنت اے گپ کُت ھم نہ کنت، تو چتور زان ئے کہ ایشی ءِ گوش ءِ تہ ءَ درد ھست؟آئی ءَ منی دیم ءَ دیم کت ءُ گْوشت ئِے لالا جان تو ایشی ءِ گوش ءِ درد کنگ ءِ سر ءَ ھیران ئے من ایشی ءِ چَہ رگ رگ ءَ زانتکار آں، اے کدی گریو اِیت،کدی پاد کیت، کدی وپس اِیت۔

من ءَ ایشی ءِ سرجمیں روچ ءِ پریچ مالوم اِنت چی ءَ کہ من ایشی ءِ مات آں، وھدے کہ بنی آدم ءَ درد بیت گڑا بنی آدم ءِ سرجمیں پریچ مَٹ بیت ءُ ورگ ءُ نوشگ، وپت ءُ واب ءِ وھد بدل بیت، تب ءِ ھراب بیگ ءَ بنی آدم ھر وھد بے تاھیر بیت۔

چَہ دوشیگ ءَ منی چُک گریوگ ءَ لگ اِتگ ءُ من جِدوابی گوں چُک ءَ پَجّی ءَ کَش اِتگ سھب ءَ من شرّی سر ءَ چار اِتگ چُک کہ گریوگ ءَ بیتگ گڑا آئی ءَ وتی نُنکیں گْوش نیم ءَ بُرتگ۔
من چُک کہ پت ءِ کِر ءَ بُرتگ ، من گْوشتگ ایشی ءِ گوش درد اِنت آئی ءَ چُک ءِ گوش ءِ سر ءَ دست ایر کُتگ چُک گوں زورگُٹ ءَ گریوگ ءَ لگ اِتگ۔ من چُک ءِ گریوگ دیستگ اَنت منی چم ھم ارسیگ بیتگ اَنت چی ءَ کہ من آئی ءِ مات آں!
جنین آدم شُت ءُ منی چم ھم ارسیگ بیت اَنت من کمو ھمد ءَ جیڑ اِت کہ مات سے ماہ ءِ چک ءِ درد ءُ دوراں زانت کُت کنت ءُ من ھمروچ مات ءِ کِرّ ءَ چینچو دْروگ بنداں، من دلجم آں کہ سجّھیں دروگاں زانت چی ءَ کہ آ منی مات اِنت، نی من ھچبر دروگ نہ بند آں۔

انچوش کہ مات مارا دوستدار اَنت مئے رگ رگ ءِ ھال ءَ سرپد اَنت، باید ما ھم آیاں دوست بہ داریں۔ اللہ پاک ھرکَسی ماتاں زندگ کنات ءُ اُمر اِش بِہ دیات اگاں کسی ءِ ماتاں دگنیا یلہ کتگ آیاں اللہ بھشت ءَ جاہ بہ دیات۔(آمین)
اَنچوش بات

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ روکپتی بلوچستان ءَ یک گاڑی ءِ دگ ءِ وئیل ءِ آماچ بیتگ ءُ کہ چریشی ءَ دو مردم بیران بیتگ اَنت ءُ سَے زدگ بیتگ اَنت –

وئیل دُزاپ ءُ نسر آباد ءِ میانی دمگ ھامون ءَ پیش اتکگ –

اھوالکار ءِ رد ءَ وئیل ءَ پد زدگ بیتگیں مردم امیر المؤمنین علی ءِ نادراہ جاہ ءَ برگ بیتگ اَنت –

اھوالکار ءِ رد ءَ وئیل بیگ ءَ پد پھزدارانی دیری ءِ سوب ءَ وئیل آماچ بیتگیں مردمانی تہ ءَ دو ءِ جاور نگیگ بیتگ اَنت ءُ نادراہ جاہ ءِ رسگ ءَ پیسر بیران بیتگ اَنت –

مروچی زورگر ءُ لٹ ءَ پُلی ٹولی پاکستانیانی دروشم ءَ بلوچ ڈیھ ءِ سر ءَ زورگر انت – ماما قدیر

دی بلوچستان پوسٹ

بلوچستان ءِ بنجاھی شھر شال ءَ پاکستانی گلانی دست ءَ گار ءُ بیگواہ بوتگیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ یک سد ءُ چل ءُ ھپت روچ سرجم بوتگ –

بلوچ نودربر گل ءُ پشتون تحفظ مومنٹ ءِ باسکاں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اِتگ –

ھمے وھد ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ اتکگیں مردمانی میان ءَ وتی ھیال درشان اِتگ ءُ گوشتگ کہ وھدیکے انسان لالچ ءُ وت پرستی ءِ تہ ءَ مین بہ بیت ءُ انسانیت ءِ رھبنداں چہ ڈن وتی زند ءَ گوازینگ ءَ بہ لگ اِیت گڑا ھستیں وھد ءَ بودِشت ءُ گھبودی ءَ گوزکیں رُستگیں جنکانی ٹولی ھما رھبندانی مسام ءَ بہ زور اَنت انسانی راجی پَرز ءِ سرجم کنگ ءَ چکروکی وراج کنت ءُ گوست ءِ رھبند ءِ سر ءَ روان کنت ءُ ھمے لَکیر ءِ تہ ءَ تَر ءُ مانتری ءَ بیت اِنت –

آئی ءَ گوشتگ کی مروچی زوراک ءُ لٹ ءُ پُلیں ٹولی پاکستانیانی دروشم ءَ بلوچ ڈیھ ءِ سر ءَ زوگر انت ءُ آئی ءِ دیم ءَ بند بستگ اَنت – زیردستی ءُ ایردستی ءِ سیاہ ءُ تھاریں شپ ءَ سھب ءِ رژن ءِ تہ ءَ بدل کنگ ءِ ھاتر ءَ پگر ءُ زانتکاری ءَ چہ سریچیں جنگ کنگ ءِ زلورت انت –

آئی ءَ دیمتر ءَ گوشتگ کہ اگاں شما بس وتی ھاتر ءَ زندگ ات گڑا ھمے بزان ات شما وتی راجے ھاتر ءَ بس مردگے ئے – مروچی بلوچ راج راجی زوراکی ءِ آماچ انت – دنیا ءِ تہ ءَ ھما مردم کابل کدر ءُ مزن اِنت کہ انسانی برابری ءُ وشھالی ءِ ھاتر ءَ وتی ھستی ءِ گار کنگ ءَ چک ءُ پد نہ بیت –

دی بلوچستان پوسٹ

سر بیتگیں ھالانی رد ءَ بلوچستان ءِ دمگ چمن ءَ دومی روچ ءَ ھم جاور نگیگ، مھلوک ءِ نیمگ ءَ زھرشانی برجاہ –

گیشیں ھالانی رد ءَ گوستگیں روچ ءَ ڈیورنڈلائن ءِ سر ءَ چمن گیٹ ءَ تاجرانی زھرشانی وھد ءَ پاکستانی پوج ءِ کارندھاں تیرگواری کرتگ ءُ چریشی ءِ آسر ءَ یک چُکے ھما دمان ءَ بیران بیتگ ءُ چار مردم زدگ بیتگ اَنت زدگ بیتگیں مردمانی تہ ءَ یکے ءَ مروچی ساہ داتگ اَنت –

لیویز بنشون ءِ رد ءَ چہ اوگستان ءَ چمن ءِ سیمسر ءَ پند ءَ آیوکیں تاجرانی دستی ازبابانی گرگ ءَ تاجراں زھدشانی کرتگ –

دمگی مردمانی رد ءَ زھرشانی ءِ وھد ءَ پوج ءَ مُچی ءِ سر ءَ تیرگواری کرتگ ےُ چریشی ءَ شش مردم زدگ بیتگ اَنت کہ چریشانی تہ ءَ دو مردم بیران بیتگ اَنت –

دومی نیمگ ءَ روزگار بحالی کمیٹی چمن ءِ رھشوناں اے وئیل ایر جتگ ءُ گوشتگ کہ تیرگواری ءَ دو شھری بیران بیتگ اَنت ءُ شش زدگ بیتگ اَنت، اے وڑیں وئیل پوج ءِ واستا مھلوک ءِ دلاں زھر ودین اَنت، سرکار ءَ ھمے لوٹ ایت جاوراں شر بہ کنت ءُ مھلوک ءِ گون ءَ وتی رویش ءَ شر بہ کنت –

گوستگیں روچ ءَ ھواریں زھرشانی کنوکاں کارگسے ھم سوتکگ ھمے وڑ مروچی ھم زھرشانی برجاہ بیتگ کہ چریشی ءَ مردماں بازیں کچے ءَ بھر زرتگ –

زانگ بہ بیت چریشی ءَ پیسر گم چمن ءَ ھمے سال ءِ جولائی ءَ ھمے رنگیں وئیلے پیش اتکگ کہ اود ءَ پاکستانی پوج ءَ زھرشانی کنوکانی سر ءَ تیرگواری کرتگ اَت کہ سَے مردم بیران ءُ بازینے زدگ بیتگ اِت اَنت –

واکداراں تنی وھدی بیتگیں وئیل ءِ بارہ ءَ ھچ نہ گوشتگ –

دی بلوچستان پوسٹ

روکپتی بلوچستان “بلوچستان و سیستان ” ءِ ھون ءِ گبھودی گل ءِ بنشون ءَ گوشتگ کہ بلوچستان ءَ ھون ءِ کمی ءِ نادراہ جنجالانی آماچ اَنت ءُ ھون ءِ نہ بوگ ءِ سوب ءَ نادراہ گیش بیان اَنت –

گل ءِ گھبودی بنشون ءَ گْوشتگ پیسر ءَ ھون ءِ کمکی گیش بیتگ اَنت ءُ کرونا ویروس ءِ سوب ءَ ھون ءِ کمکیانی تہ ءَ کمی اتکگ ءُ چریشی ءَ ھون جم کنوکیں بنجلانی ھوم کمتر اِتگ ءُ کم ھونیں نادراھاں ھون پُجگ ءَ نہ اَنت –

گل ءِ گھبودی ءِ بنشون ءَ گوشتگ کہ کم ھونیانی تہ ءَ گیشتر کسان کسانوکیں زھگ اَنت ھوار اَنت ءُ آ تالاسمی نادراھی ءِ آماچ اَنت –

ھمے وڑ ءَ ڈاکٹر سھیلا ھسروی ءَ گوشتگ کہ ھونی بنجلانی جاندراھی ءَ سَے ھزار ءُ دو سد ءَ شست مردم ھمے نادراھی ءِ آماچ اَنت ءُ اشانی واستا شست ءُ ھست درسد ھون کارمرد بیگ ءَ اِنت –

آئی ءَ ھپتگے ءِ تہ ءَ سَے لیٹر ھون آیگ اِنت بلے اے ھون باز کساس ءَ ھون کم اَنت ءُ گیشتریں ھونانی درکاری اِنت –

ڈاکٹر سھیلا ھسروی ءَ گوشت کہ کرونا ویروس ءِ سوب ءَ گیشتریں مردم لوگانی تہ ءَ بندی اَنت ءُ ھونی بنجل ءَ اتک کنگ بیگ ءَ نہ اَنت ءُ چریشی ءِ سوب ءَ ھون کم اَنت ءُ سرکار اے نیمگ ءَ گامگیج بہ زور ایت –

آئی ءَ گوشت باید چاگردی مردم گھبودی ءِ ھاتر ءَ جھد بہ کن اَنت ءُ جانمندیں مردم بنجلاں باینت ءُ ھون بہ دے اَنت دانکہ ھون ءِ پُجارینگ سرجم بیت بہ کنت –

شَیر: گریشگ ءِ نام ءَ

شائر: امجد بیکس

دی بلوچستان پوسٹ

دل ءَ گُشت یل بکن
در ءَ بُرو چَہ گریشگ ءَ
داں زندگ ئے پد ءَ میا
اد ءَ میا
نہ تو جھان ءِ دژمنے
نہ تو واھگانی مھترے
نہ وتی آسیگیں دل ءِ جنگلے
نہ الکاپیں سمین ءِ شانتولے
نہ ماڑیانی بانوکے
نہ شائرانی پدگرے
نہ مساپرانی نوبتے
نہ ھانیانی شے مُرید
نہ گریشگانی زِرے
نہ چمّگانی ھُلکھے
نہ جنوزامی آسگواریں دلے
نہ مھتلے نہ کاملے
نہ ایشی یے
نہ آئی یے
نہ مزھبی، نہ ھدائی یے
نہ شرابیانی ایمانداریں دل ءِ کلمھے
نہ وتسرے
نہ بُنگرے
دل ءَ گُشت در ءَ بُرو چہ گریشگ ءَ
داں زندگ ئے پد ءَ میا
اد ءَ میا
اد ءَ نہ گپ بیت
نہ تران بیت
نہ وانگے نہ زانگے
نہ واھگے نہ جنتے
نہ مھر ءِ مھروانی یے
اد ءَ واھگاں زنہ کنت
اد ءَ شدادی داوا کنت
اد ءَ کس کسی نہ اِنت
اد ءَ مساپرانی نوبت ءَ
گوں پد جنت ھرکس ءَ
دل ءَ گُشت در ءَ بُرو چہ گریشگ ءَ
داں زندگ ئے پد ءَ میا
اد ءَ میا
گریشگ زِبھر اِنت
چہ وشیانی جنت ءَ
شپ ءُ روچ کار بکن چو ھر ءَ
بار بزور چو ھُشتر ءَ
برداشت بکن چو ھزرت یوسپ ءَ
بلے انگت ءَ اد ءَ ھچ نہ بیت
پرچاکہ اد ءَ پرئونی داوا گر انت
اد ءَ ھٹلرانی بادشاھی انت
اد ءَ منیگ ءُ تئی بستار چے؟
من ءَ ءُ ترا گوں ایشانی کاراں کار چے؟
اگاں تئی دل نہ من ایت چو اے وڑ ءَ
گڑا پَلّو ءَ بند بنگ ءُ چادر ءَ
بلے زاھر ءَ ھرکس ءَ را جی ءُ جان بکن چو مادر ءَ
مناپکی بکن اندر ءَ
زاہ بدے چو رستر ءَ
بس بُڈوبار وتسر ءَ
ھرچی دپ ءَ کیت چگل بدے
اگاں گوں تو چوش نہ بیت
گڑا در ءَ بُرو چہ گریشگ ءَ
داں زندگ ئے پد ءَ میا
اد ءَ میا
بیکس ما شر زانیں
تئی زات ءُ زُریات چے
تو شئر بند ئے وتسر ءَ
ایرجن ئے مئے راجی لیڈراں
تو ھکدار ئے پاھو ئے
تو آس ماندارگ ئے
دل ءَ گُشت یل بکن
در ءَ بُرو چہ گریشگ ءَ
داں زندگ ئے پد ءَ میا
اد ءَ میا

بلوچستان ءَ پاکستانی پوج ءُ چیریں ادارھانی نیمگ ءَ ھمک روچ استاد ءُ چاگرد ءَ بندوکیں ھمک ءَ تک ءَ بندوکیں مردمانی لوگانی سر ءَ بیڑ ءُ آیاں دزگیر کنت ءُ بیگواہ کنگ اِنت –

دی بلوچستان پوسٹ

ٹی بی پی ءَ سر بیتگیں ھالانی رد ءَ کیچ ءِ بنجاھی شھر تربت ءَ پاکستانی پولیس ءِ چیریں ترامگیجاں نامی ئیں بلوچ اھوالکار ءُ نبشتہ کار ءُ تربت پریس کلب ءِ باسک مقبول ناصر ءِ لوگ ءِ سر ءَ بیڑ برتگ –

شال ءِ دمگی اھوالکار ابرار احمد ءَ چاگردی رسانکجاہ ءَ ٹویئٹر ءَ مقبول ناصر ءِ سر ءَ پوج ءِ بیڑ ءِ ھال شنگ کنان ءَ گْوشتگ کہ پوج ءَ مقبول ناصر ءُ آئی ءِ برات لٹ ءُ کُٹ کرتگ اَنت –

مقبول ناصر ءَ وتی لوگ ءِ سر ءَ پولیس ءِ بیڑی بے رھبندی گوشتگ –

زانگ بہ بیت بلوچستان ءَ پاکستانی پوج ءُ چیریں تراگیجاں داں انیگ ءَ بازیں کچے ءَ بلوچ اھوالکار دزگیر کنگ ءَ پد بیگواہ کرتگ اَنت ءُ کہ اشانی تہ ءَ بازینانی زانگول کرتگیں جون ھم دزکپتگ اَنت –

دی بلوچستان پوسٹ

گوستگیں روچ ءَ مستونگ ءَ بیگواہ بیگواہ بیتگیں بلوچستان شھدربرجاہ ءِ پروفیسر لیاقت سنی یلہ کنگ بیتگ –

ٹی بی پی ءَ سر بیتگیں ھالانی رد ءَ بلوچستان ءِ مزن شھدربرجاہ ءِ براھوئی ءِ سروک پروفیسر لیاقت سنی کہ گوستگیں روچ ءَ مستونگ ءَ دگہ دو استادانی ھمراھی ءَ بیگواہ بیتگ اَت ءُ پد ءَ آئی ءِ ھمراہ دو پروفیسر آوار جنوکاں یلہ کرتگ اِت اَنت ءُ لیاقت سنی وتی ھمراھی ءَ برتگ اَت –

پروفیسر لیاقت سنی ءِ آوار جنگ ءِ ھلاپ ءَ بلوچستان ءِ سیاسی پاٹیاں ھوار نودربر ءُ وانگی گلاں ترندیض رنگے ءَ زھرشانی بندات کرتگ اَت –

جتا جتائیں گلانی زھرشانی ءَ پد مروچی سھب ءَ مزن شھدربرجاہ ءِ پروفیسر لیاقت سنی بنجاھی شھر شال ءَ یلہ کنگ بیتگ ءُ وتی لوگ ءَ سر بیتگ –

نزیکیں مردماں لیاقت سنی ءِ یلہ بیگ ءِ ھال راست کرتگ –

دی بلوچستان پوسٹ

ٹی بی پی ءَ سر بیتگیں ھالانی رد ءَ بلوچستان مزن شھدربرجاہ ءِ پروفیسر لیاقت سنی ءِ بیگواھی ءِ بگیری ءَ بلوچستان ءَ جتا جتائیں سیاسی ءُ ادبی ءُ نودربرانی گلاں زھرشانی کرتگ –

بلوچ اسٹوڈنٹس آرگنائزیشن ءَ بلوچستان شھدربرجاہ ءِ پروفیسر لیاقت سنی ءِ یلہ کنگ ءِ لوٹ کرتگ ءُ گْوشتگ کہ وانندہ ءُ زانتکاریں مردمانی زندگی ءِ رکینگ ءَ سرکاری ھاکمانی بُتی ءُ بے سوبی اِنت، استاد ءُ نودربرانی ریتکگیں چھرگ بے وسی ءِ دروشماں گندگ بیت بلے بلوچستان ءِ جیڑہ بس تلوانی سر ءَ گشتانکانی تہ ءَ بیگ ءَ اَنت – سروزیر بلوچستان جام کمال اُستان ءِ کانودانی سروک اِنت بلے مروچی باندات ءِ رژنائیں چراگ ءِ رژناہ کنوکیں استاد ءِ بیگواھی ءِ سر ءَ آئی ءِ بے تواری اجکہ کنت –

اے گپانی درشان بی ایس او ءِ نیمگ ءَ شال ءِ پریس کلب ءِ دیم ءَ پروفیسر لیاقت سنی ءِ بیگواھی ءِ بگیری ءَ زھرشانی ءَ بلوچ اسٹوڈنٹس آرگنائزیشن ءِ بنجاھی جوائنٹ سیکرٹری شوکت بلوچ، وائس فار بلوچ مسنگ پرسنز ءِ نصر اللہ بلوچ، ماما قدیر بلوچ، بی این پی ءِ آغا خالد دلسوز، بلوچ اسٹوڈنٹس ایکشن کمیٹی ءِ عالم بلوچ، چاگردی باسک نمرہ پرکانی، میمونہ بلوچ، بی ایس او ظریف ءِ محسن ظریف، شال ھنکین ءِ ڈپٹی آرگنائزر نذیر بلوچ،اُتھل ھنکین ءِ سروک ریاض بلوچ ءُ دگہ مردماں تراناں گُشتگ اَنت –

زھرشانی کنوکاں تران کنان ءَ گْوشتگ کہ وتی گرنبھائیں مڈی ءِ واستا زھرشانی ءَ اِنت، آیاں گْوشت کہ لیاقت سنی یک لس مردمے نہ اِنت بلکیں وانگی درچانی واستا یک کتابجاہ ءُ بلوچستان ءِ مڈی اِنت –

زھرشانی کنوکان تران کنان ءَ گوشت کہ یک چار ءُ پجارے ءَ پندلے ءِ رنگ ءَ مئے شاہ زانتان گچین کنگ ءُ نشانگ کنگ ءَ اَنت –

آیاں گْوشت کہ مئے شاھزانت ھمے واستا گرگ ءُ گار کنگ بیگ ءَ اَنت کہ آ بلوچستان ھکانی واستا جوانیں رنگے ءَ توار چِست کرت کن اَنت، استاد، نودربر ءُ چاگردی باسکانی دست ءَ نَد اِنت اے وڑیں مزنیں دستانی گون ءَ بلوچانی زانت ءُ سرپدیں توار گیش چیر ترینگ نہ بیت اِنت -ما اشی ءَ گشینگ لوٹ ایں کہ ما وتی ھکانی گرگ ءِ واستا جد ءُ جھد ءَ دزکش بیت نہ کن ایں –

آیاں گْوشت کہ ھاکم بلوچستان ءِ ایمنی ءِ ٹاہ ءَ دیگ ءَ دم نہ بر اَنت بلے دومی نیمگ ءَ ایمنی ءِ جاور ایش اَنت راہ ءَ رؤکیں استاد، نودربر ءُ لس مھلوک مھکم نہ اَنت، کجام ھم ڈیھ ءِ زمہ واری بیت اِنت آ وتی مھلوک ءِ جان ءُ مالانی رکینگ ءَ بہ کنت –

آیاں گْوشت کہ ما اد ءَ ھپت ھزار سالاں آباد اِنت ءُ گداری ءِ نام ءِ دیگ ءَ ما وتی ھکاں زبھر بیت نہ کن ایں ءُ وتی استاد، نودربر ءُ بلوچ راج ءِ ھکانی واستا جد ءُ جھد کنوک یلہ کنگ بہ بنت اگاں ناں گڑا ترندیں گامگیج زورگ بیت اِنت –

آیاں گوشت کہ اے بژنی رنگ ءَ گوشگ بیت اِنت بلوچ راج ءِ یک جوانیں سرے ءِ یلہ کنائینگ ءِ واستا دگانی سر ءَ زھرشانی کنگ ءَ ایں، مستونگ ءَ سَے پروفیسر آوار جنگ بنت کہ اشانی تہ ءَ دو یلہ کنگ بیت اِنت ءُ آیاں گوشت کہ آوار کار سَے گاڑیاں سوار بیتگ اَنت بلے بدبھتی ءَ مروچی ھر ھما پروفیسر، نودربرانی دیم ریتکگیں رنگے ءَ بے وسی ءِ ھرسانی تہ ءَ گار اِنت –

آیاں گوشت کہ بلوچستان ءِ مھلوک وتی لاپاں سِنگ بند ایت ءُ وتی چکاں وانینگ ءَ اَنت ءُ المی بیت اِنت ریاست ءُ آئی ءِ ادارہ پروفیسر لیاقت سنی ءِ یلہ کنگ ءَ گامگیج بہ زور اَنت اگاں ناں ما ترندیں رنگے ءَ زھرشانی کن ایں –

ھمے وڑ ءَ لیاقت سنی ءِ بیگواھی ءِ ھلاپ ءَ بی اے، بی ایس سی ءَ ھوار دراھیں چکاسانی چار ءُ گزاری کمیٹی ءَ اداروکی کرتگ ءُ سرکار ءَ را بیست ءُ چار ادارانی ترندیں مُھلت داتگ ءُ گوشتگ کہ بیگواہ کرتگیں پروفیسر سلامتی ءَ یلہ کنگ نہ بیت گڑا یک دسمبر ءَ سرجمی ءَ چکاسکاری ءَ دزکشی بیت اِنت ءُ گورنر ھاؤس، بلوچستان پتر، شال ءِ پریس کلب ءَ ھوار سرجمیں ڈیھ ءَ زھرشانی کنگ بیت اِنت –

اے گپانی جار اکیڈمج اسٹاف ایسو سی ایشن ءِ سروک پروفیسر ڈاکٹر کلیم اللہ بڑیچ، پروفیسر شبیر شاھوانی ءُ بلوچستان پروفیسر ءُ لیکچرار ایسو سی ایشن ءِ سروک ھمید ھان ءَ اے ایس اے ءِ جنرل سیکرٹری عبدالباقی جتک، بی پی ایل اے جنرل سیکرٹری عارف بلوچ، پروفیسر ڈاکٹر منظور بلوچ، کنٹرولر بلوچستان شھدربرجاہ ڈاکٹر عین الدین آغا ءَ ھوار دگہ ھمراھانی ھمراھی ءَ شال ءِ پریس کلب ءَ پریس کانفرنس ءَ تران کنان ءَ گْوشتگ اَنت –

ھمے رنگ ءَ بلوچ اسٹوڈنٹس آرگنائزیشن آزاد ءِ بنجاھی جارکش ءِ شنگ کرتگیں بیان ءِ تہ ءَ گوشگ بیتگ کہ گوستگیں روچ ءَ بلوچستان شھدربرجاہ ءِ براھوئی ءِ سروک لیاقت سنی ءِ زورانسرء بیگواھی بلوچ زانت ءُ اِلم ءِ سر ءَ اُرش اِنت –

جارکش ءَ وتی درشان ءِ تہ ءَ گْوشتگ کہ چریشی ءَ پیسر پروفیسر سبا دشتیاری، پروفیسر رزاق زھری، زاھد آسکانی، ماسٹر نذیر مری، ماسٹر علی جان ءَ ھوار بازیں کچے ءَ بلوچانی کواس شھید کنگ بیتگ اَنت –

بی ایس او آزاد ءِ جارکش ءَ وتی بیان ءِ تہ ءَ گْوشت: کہ بلوچ کواسانی زورانسری بیگواھی ءِ درچ نوکیں وئیل ءُ گپ نہ اَنت دو دھکاں بلوچ کواس ریاستی زوراکیانی آماچ اَنت –

آئی ءَ گْوشت کہ بازیں کَچے ءَ استاد ءُ اھوالکارانی زانگول کرتگیں جون دور دیگ بیتگ اَنت ءُ ھمے رنگ ءَ ھزارانی کَچ ءَ نودربر تنی وھدی بیگواہ اَنت ءُ سدانی کَچ ءَ نودربرانی زانگول کرتگیں جون دزکپتگ اَنت-

آئی ءَ گْوشت کہ ریاستی زوراکیانی مول ءُ مراد بنکی پِڑ ءَ پرکاریں بلوچ کواس ءُ نودربرانی ھلاسی اِنت ءُ بلوچ چاگرد اش سربتگ جوڑ کنگ اِنت –

آئی ءَ گوشت کہ کواس ءُ استادانی بیگواہ کنگ وانگی ادارھاں بندوکیں مردمانی دل ءُ لاپاں ترس ءِ ودینگ اِنت –

آئی ءَ گوشت کہ گوستگیں روچ ءَ پروفیسر لیاقت سنی ءِ بیگواھی ءَ پد اُستانی سرکار ءِ جارکش ءَ اے بیگواھی ءِملامی ءِ نام ءَ رنگ دیگ ءِ جھد کرتگ بکے بلوچ مھلوک ریاست ءُ آئی ءِ ادارھانی پندلاں الکاپ ءَ سرپد اِنت اے وڑیں وئیل بلوچانی کواسانی سر ءَ دو دھک ءَ برجاہ اَنت ءُ ما بلوچ مھلوک ءَ ھوار دراھیں زیردستیں راجاں گوں دزبندی کن ایں کہ پروفیسر لیاقت سنی ءِ زورانسری بیگواھی ءِ ھلاپ ءَ دگانی سر ءَ در بہ کپ اَنت ءُ اے زُلم ءِ ھلاپ ءَ توار چِست بہ کن اَنت –

ھمے رنگ ءَ بلوچ نیشنل مومنٹ ءِ جارکش ءَ چہ مستونگ ءَ شائر، کواس ءُ بلوچستان شھدربرجاہ ءَ براھوئی ءِ چیئرمین ڈاکٹرلیاقت سنی ءِ زورانسری بیگواھی ترندیں لبزاں گوں ایر جتگ ءُ گْوشتگ کہ بلوچستان ءَ پاکستان بلوچ راج ءِ زندمان ءِ جتائیں تکاں بندوکیں مردمانی سر ءَ زوراکی ھروھد ءَ برجاہ اَنت ءُ ڈاکٹر لیاقت سنی ءِ بیگواھی ءَ یک دگہ دردے گیش کرتگ –

آئی ءَ گْوشت کہ پاکستان ءَ یک نوکیں گامگیجے ءِ رنگ ءَ ڈاکٹر لیاقت سنی ءِ آوار جنی ملامی ءِ نام ءَ دیگ ءِ جھد کرتگ دانکہ ریاست ءِ نام مئیت ءُ بلوچ راج ءِ جزبگانی نیمگ دگہ نیمگے ءَ بہ تر اَنت –

آئی ءَ گْوشت کہ ریاست نِی کجام رنگ ءُ پیماں اگاں وتی زوراکیاں رنگ بہ دنت بلوچ راج الکاپ ءَ اشاں زانت ءُ پجاہ کارگ اِنت – لیاقت سنی ھما رنگ ءَ روچ ء رھمانی سَے گاڑیاں سواریں مردماں برتگ، اے ترز پاکستانی چیریں گلانی نشانی اَنت –

جارکش ءَ گْوشت کہ لیاقت سنی ءِ آوار جنگ اِلم ءُ زانت ءِ بیگواہ کنگ ءِ جھد اِنت – دانکہ بلوچ راج اِلمی پِڑ ءَ سربتگ بہ بیت ءُ اے شوربندی کرناں چہ برجاہ اَنت – شال ءَ اِلم ءُ زانت ءِ چراگ قندیل ء بلوچ سبا دشتیاری پاکستان ءَ کُشتگ- ھاجی رزاق، استاد علی جان، پروفیسر رزاق ءُ زاھد آسکانی ءَ ھوار سدانی کَچ ءَ اِلم ءِ رژنائیں چراگ مارا چہ جدا کنگ بیتگ اَنت –

آئی ءَ گْوشت کہ گلامی ءِ سیاھیں شپ ءِ ھلاپ ءَ آجوئی ءِ جد ءُ جھد برجاہ بیتگ ءُ انگت ءَ برجاہ بیت اِنت – اے گپ راستی ءِ کہ پاکستان ءِ بھر ءَ استاد، نودربر، زالبول ءُ چکانی آوار جنگ بنّامی ءُ شِری بھر ءَ بیت اِنت –

آئی ءَ گْوشت کہ مارا یکین اِنت ڈاکٹر لیاقت سنی ریاست ءَ برتگ ءُ آ نی وتی پشلی ءِ چیر دیگ ءَ اے وئیل ءَ ملامی لوٹ ءِ نام ءَ دیگ ءَ اِنت –

آئی ءَ گوشت کہ بلوچستان ءَ گرگ ءُ برگ ءُ گار کنگ ءَ ریاستی ادارہ تچک ءَ ھوار اَنت بلوچستان یک بندیگیں رنگے ءَ کنگ بیتگ ءُ ھمک میل ءِ سر ءَ پوج ءُ دگہ ادارھانی چوکی ءُ بنجلانی جاڑیگ بیگ ءَ مردماں چِست کنگ وت اے گپانی پدراھی ءَ کن اَنت – اے کار ریاست ءِ گوشگ ءُ لوٹانی سر ءَ بیگ ءَ اَنت بلے ڈاکٹر لیاقت سنی اے رنگ ءَ برگ پاکستان وتی کرتگیں کاراں چیر دات نہ کنت –

ھمے رنگ ءَ رھشون ادبی ءِ کسان کمک سرکماش اسرا ءَ وتی شنگ کرتگیں بیان ءِ تہ ءَ گوشتگ کہ پروفیسر لیاقت سنی ءِ بیگواھی بلوچستان ءِ الم ءُ زانت ءُ کتاب ندانی بیگواھی اِنت ءُ ما لیاقت سنی ءِ بیگواھی ءَ ایر جن ایں –

اسرا شوھاز ءَ گوشت کہ اگاں لیاقت سنی ءَ چیزے بیت آئی ءِ زمہ وار سرکار اِنت ءَ آئی ءَ پروفیسر ءِ یلہ کنگ ءِ واستا دراھیں تکاں گوں بندوکیں مردماں گوں دزبندی کرتگ ءُ گوشتگ کہ وتی کرد ءَ پیلو بہ کن اَنت –

زانگ بہ بیت گوستگیں روچ ءَ مستونگ ءَ سے گاڑیاں سواریں مردماں پروفیسرلیاقت سنی گوں دگہ دو پروفیسرانی ھواری ءَ آوار جنگ بیتگ ءُ پد ءَ آ دوئیں پروفیسر یلہ کنگ بیتگ اَنت ءُ لیاقت سنی تنی وھدی بیگواہ اِنت –

لیاقت سنی ءِ بیگواھی ءِ ھلاپ ءَ بلوچستان ءَ ھوار چاگردی رسانکجاھاں سیاسی ءُ چاگردی مردمانی زھرشانی برجاہ اَنت ءُ آئی ءِ یلہ کنگ ءِ لوٹ ءَ کنگ ءَ اَنت – بلے مروچی دومی روچ ءَ ھم لیاقت سنی ءِ بارہ ءَ ھچ ھال دیم ءَ نیاتکگ اَنت ءُ بلوچستان ءِ سرکار اے وئیل ءَ زری ملامی ءِ نام ءَ دیگ ءَ اِنت ءُ بلوچستان ءَ بندوکیں سیاسی مردماں اے گپ رد کرتگ ءُ آئی ءِ بیگواھی سرکار ءِ سر ءَ لڈ اِتگ –

پاکستان پیپلز پاٹی ءِ چیرمین بلاول بھٹو زرداری ءَ مزن شھدربرجاہ بلوچستان ءِ پروفیسر ءِ زورانسری آوار جنی ایرجتگ ءُ آئی یل کنائینگے لوٹ کرتگ –

دی بلوچستان پوسٹ

بلاول بھٹو زرداری ءَ وتی شنگ کرتگیں درشان ءِ تھا مزن شھدربرجاہ بلوچستان ءِ پروفیسر لیاقت سنی ءِ زورانسری آوار جنی ایرجتگ ءُ گوشتگ کہ بلوچستان یونیورسٹی ءِ سئے پروفیسرز آنی آوار جنی ءِ وئیل پدردی اِنت، ھنچوش سما بیت اے وڑیں گامیگیجانی مول مراد بلوچستان ءِ مردماں چہ وانگ جاھاں گیشتر دور دارگ انت –

آئی وتی درشان ءِ تھا لوٹ کتگ کہ پروفیسر ڈاکٹر لیاقت سنی یل کنائینگ بہ بیت –