TBP Balochi

دی بلوچستان پوسٹ

ٹی بی پی پترءَ سر بیتگیں ھالانی بلوچستان ءِ نامی ئیں آزمانکار ءُ تامر ساچ حنیف شریف ءِ آزمانکانی نوک چاپ بوتگیں کتاب “حنیف نام ” اولی چاپ کنگ ءِ ھلاسی ءَ پد دومی چاپکاری بندات کنگ بیتگ –

زانگ بہ بیت حنیف شریف ءِ کتاب “حنیف نام” چیزوکے روچ ءَ پیسر علم و ادب پیبلیشع اینڈ بکسیلر ءِ نیمگ ءَ چاپ ءُ شنگ بیتگ ءُ آئی ءِ اولی چاپ ءَ پد دومی چاپکاری ءِ کار بندات بیتگ اَنت –

دومی نیمگ ءَ حنیف نام کتاب ءِ تہ ءَ نبشتگ آزمانکانی سر ءَ بلوچی زبان ءَ بندوکیں مردمانی ایراد ھم چاگردی رسانکجاھاں برجاہ اَنت ءُ جتا جتائیں مردم کتاب ءِ سر ءَ نگدی درشان ءُ گپ جنگ ءَ اَنت –

بلوچ لبزانکارانی گوشگ اِنت کہ حنیف نام ءِ شنگ بیگ ءَ پد بلوچستان ءَ بندوکیں وانوکاں نوکیں رنگیں سوگاتے سر بیتگ –

بلے کتاب ءِ اولی چاپگ ءَ پد دومی چاپگ ءِ کار بندات بیتگ ءُ چاپکارانی رد ءَ زوت دومی چاپ چریدگ بیت ءُ وانوکاں سر کنگ بیت اِنت –

حنیف شریف بلوچستان ءِ نامی ئیں تامرساچے ءِ ھواری ءَ یک آزمانکارے ھم ءُ آئی ءِ دو کتاب پیسر ءَ شنگ بیتگ اَنت –

حنیف شریف آزمانک ءُ تامر ساچی ءَ ھوار ھوار چاگردی رسانکجاھاں جتا جتائیں سرھالانی سر ءَ گپ ءُ تران ھم کنت ءُ آئی ءِ گوشدارک کچ بازیں رنگے ءَ گندگ ءَ کاینت –

ھمے وڑ بلوچ اھوالکار عابد میر ءَ وتی چاگردی رسانکجاہ فیس بک ءَ شکساتگیں گپانی تہ ءَ گوشتگ کہ حنیف شریف ءِ کتاب بلوچی ءَ چہ اردو ءَ رجانک کنگ بہ بیت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ چار ھزار یکسدو پنجاہ دو روچ سرجم بیتگ –

دی بلوچستان پوسٹ

کراچی ءَ چہ متحدہ قومی مومنٹ اھوالکاری باسک، گوستگیں ایم این اے عبدالوسیم، گوستگیں ایم این اے سلمان مجاھد بلوچ، صوبائی سرکماش ملک عمران کاکڑ، گوستگیں صوبائی سرکماش سلیم اختر ایڈوکیٹ ، نوراللہ سمالانی ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولاں گوں پدردی درشان اِتگ ۔

ھمے درگت گوستگیں ایم این اے عبدالوسیم ءَ گوشتگ کہ بیگواھیں مردم کسی یے چُک انت آ یل کنگ بہ بنت آھانی جیڑہ گشگیوار کنگ بہ بنت، پرچاکہ پاکستانی جاورھال انچو شر نہ انت کہ گیشتر اے وڈ بہ کنت ءُ جیڑہ جنجالانی تھا گیشی بیاریت ۔

ایم کیو ایم ءِ رھشون ءِ گوشگ ات کہ اگاں کسی ءِ دست ءَ ردی ءِ بوتگ گڈا کانودانی رِد ءَ آ سزا دئیگ بہ بیت یا یل کنگ بہ بیت۔

وائس فار بلوچ مسنگ پرسنز ءِ وائس چیئرمین ماما قدیر بلوچ ءِ گوشگ ات کہ بلوچ راج ءِ گم سکی سوری ءِ گندگ ءَ پد کزا یک سنگدلیں انسان ءِ وتی ارساں داشت بہ کنت بلے اے بلوچ راج انت کہ انچو درد ءِ سگگ ابید اوپار کنگ انت ۔

آئی ءِ گوشگ ات کہ ھمے اوپار ءِ پشدر ءَ لھتے سودابازی کنگ ءَ اِنت، زوراکی سگگ بلوچانی لاچاری انت پرچاکہ ایردستیں راج ابید اشی دگے ھچ کرت نہ کنت ۔

ماما قدیر بلوچ ءَ دیمترا گوشتگ کہ بلوچستان ءِ تھا پوجی آپریشن ھزاراں بلوچ پرزندانی شھیدی ءَ گوں بندات بوتگ کہ روچ مروچی یکشل ءَ برجاہ انت -بلوچستان ءِ تھا انسانیت سوز پالیسیاں چہ ریاستی رسانکدراں ھچبر سر چست نکرتگ ءُ نچارتگ ءُ ناکے اے درگت ھیال ءُ پگر کُتگ کہ بلوچانی سرا پرچہ انچو زوراکی کنگ بوھگ انت ۔

دومی نیمگ ءَ چاگردی ترامجاہ ٹوئیٹر ءَ بلوچ سوشل میڈیا ایکٹوسٹس آنی نیمگ ءَ بلوچ نودربر رھشونانی زورانسری آوار جنی ءِ بگیری ءَ سرپدی کمپین ءِ جنزینگ بوھگ انت بلوچ اسٹوڈنس آرگنائزیشن کمپین ءِ ھمراہداری جار جتگ ءُ کمپین ءِ تھا ھوار انت وھدیکے دگہ تکاں چہ سیادی داروکیں مردم ھم کمپین ءَ ھوار انت ءُ بھر زورگ ءَ انت ۔

کمپین ءَ بھر زوروکیں ریحان بلوچ ءَ نبشتگ کہ بلوچ نودربر رھشون پہ ھمے ھاتر ءَ زنداناں بندیگ کنگ بوتگ انت کہ آ وتی راج ءَ الم زانت نیمگ ءَ برگ ءَ بوتگ انت ۔ جھانے کجام ڈیھ انت کہ الم ءُ زانت ءِ ھاتر ءَ جھد کنوکاں زنداناں بندیگ کنت۔ انسانی ھکانی ھاترءَ کارکنوک وتی کرد ءَ پیلو بہ کن انت ۔

ھمے وڑءَ بلوچ سوشل میڈیا ایکٹوسٹ گروشک بلوچ ءَ بیگواھیں نودربر شبیر بلوچ، انسانی ھکانی باسک راشد حسین بلوچ، نودربر رھشون فیروز بلوچ ءُ بلوچ نودربر گل آزات ءِ گوستگیں سرکماش زاھد بلوچ ءِ اکس شنگ کرتگ ءُ گوشتگ کہ بیگواھیں مردمانی کھولاں انساپ ءِ ادارھانی دروازگ ٹُک اِتگ انت، آمیدگس آں شُتگ انت، زھرشانی کُرتگ بلے یک ادارہ ءَ ھم آھانی یک گپ ءِ ھم اِش نہ کُرتگ ۔

گوستگیں بیست ءُ چار ادارانی تہ ءَ ڈیھ ءَ کورونا وائرس ءَ ھپت ٹِک پنجاہ ءُ نُھ درسد گندگ ءَ اتکگ اَنت –

دی بلوچستان پوسٹ

پاکستان ءِ نیشنل کمانڈ اینڈ آپریشن سینٹر ( این سی او سی) ءِ نیمگ ءَ کورونا وائرس ءِ بارہ ءَ شنگ کرتگیں ھالانی رد ءَ بیست ءُ چار ادارانی تہ ءَ ایبٹ آباد ءَ درستاں گیشتر نادراھانی کچ دیم ءَ اتکگ اَنت کہ ھبدہ ٹِک پنجاہ ءُ ھپت ءَ سر بیتگ اَنت –

چریشی ءَ پد راولپنڈی ءَ بیتگیں درسد پانزدہ ٹِک بیست ءُ شش درسد بیتگ ءُ کراچی ءَ چاردہ ٹِک سِی ءُ یک بیتگ ءُ چریشی ءَ پد حیدر آباد ءَ دوازدہ ٹِک سیزدہ درسد بیتگ اَنت –

این سی او سی ءِ رد ءَ سرجمیں ڈیھ ءَ اے وھد ءَ کورونا وائرس ءَ دو ھزار ءُ چار سد ءُ چِل ءُ یک نادراھانی جاور نگیگ اَنت ءُ اے وڑیں نادراھانی کچ روچ پہ روچ گیش بیان اَنت –

این سی او سی ءَ گْوشت کہ ڈیھ ءِ اُستان ءُ دمگانی نادراھی ءِ کمی جاور ھال چارگ بہ بنت گڑا اشانی تہ ءَ زیردستیں کشمیر یازدہ ٹِک بیست ءُ چار درسد اولی رد ءَ اِنت ءُ چریشی ءَ پد سندھ دَہ ٹِک ھپتاد ءُ چار درسد، بلوچستان ءَ دَہ ٹِک چِل ءُ شش درسد، خیبرپختونخوا نُھ ٹِک شست ءُ ھشت درسد ، اسلام آباد پنچ ٹِک بیست ءُ ھپت درسد، پنجاب چار ٹِک پانزدہ درسد ءُ گلگت بلتستان ءَ سَے ٹِک نود ءُ دو درسد اِنت –

دی بلوچستان پوسٹ

سر بیتگیں ھالانی رد ءَ ایرانی لشکر ءِ تیرگواری ءَ یک مردمے بیران بیتگ ءُ یکے زدگ بیتگ –

اھوالکار ءِ رد ءَ پھرہ ءُ سرباز ءِ دگ ءَ ایرانی لشکر ءَ یک گاڑی ءِ سر ءَ تیرگواری کرتگ ءُ چریشی ءَ یک مردمے بیران بیتگ ءُ یکے زدگ بیتگ –

بیران بیتگیں مردم ءِ پجار مھمد رحیم ء عبدالرحیم دازاندر دھستان سرکور سرباز ءِ جھمنند اِنت ءُ دومی زدگ بیتگین ءِ پجار نہ بیتگ –

اھوالکار ءِ رد ءَ مھمد رحیم وتی گاڑی ءِ سر ءَ سرباز ءَ دیم پہ پھرہ “ایرانشھر ” ءَ روگ ءَ بیتگ ءُ راہ ءِ نیمگور ءَ ایرانی لشکر ءَ آیانی سر ءَ تیرگواری کرتگ ءُ اے ھردوک زدگ بیتگ اَنت –

اھوالکار ءِ زدگ بیگ ءَ پد مھمد رحیم زدگیں جاوراں ایرانی لشکر ءَ گپتگ ءَ لٹ شاپ کرتگ ءَ پد ءَ آ ٹپی ءِ جاورانی تہ ءَ ایرانی لشکر ءَ دوبر آئی ءِ سر ءَ تیرگواری کرتگ ءُ چریشی ءَ آ بیران بیتگ –

اھوالکار ءِ رد ءَ دومی زدگ بیتگیں مردم تچگ ءُ روگ ءَ زدگیں جاوراں سوبین بیتگ –

اھوالکار ءِ رد ءَ ڈاکٹرانی چار ءُ ٹپاس ءَ ھم آیانی رپورٹ ءَ گوشگ بیتگ مھمد رحیم ءَ تیر بیست انچ ءَ دور جنگ بیتگ اَنت –

دی بلوچستان پوسٹ

چمبور ءَ پاکستانی پوج ءِ یک کارمندے دور جنگیں توپک ءِ گون ءَ نشانگ کُتگ، ءُ پانگس ءِسر ءَ اُرش کتگ ءُ تاوان داتگ – میجر گْوھرام

سربوتگیں ھالانی رِد ءَ مروچی آدینگ ءِ روچ ءَ ناشناسیں سلاہ بندیں مردماں آواران ءِ دمگ چمبور ءَ برجاھیں پاکستانی پوج ءِ پانگس ءِ سر ءَ اُرش کُتگ، اُرش ءَ پاکستانی پوج ءَ جانی ءُ مالی تاوان رس اِتگ – اُرشکار درایگ ءُ رؤگ ءَ سوبین بوتگ انت –

دومی نیمگ ءَ بلوچ راجی آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ مروچی آدینگ ءِ روچ ءَ مگرب ءِ وھد ءَ مئے سرمچاراں آواران ءِ دمگ چمبور ءَ برجاھیں پاکستانی پوج ءِ پانگس سر ءَ دور جنگیں توپک ءَ گوں یک پوجی کارمندے نشانگ کُرتگ کُشتگ –
جارکش ءَ گوشتگ دورجنگیں توپک اُرش ءَ پد سرمچاراں ھما دمان ءَ پوجی پانگس ءِ سر ءَ راکٹ ءُ دگہ مزنیں سلاھاں گوں اُرش کُتگ، چریشی ءِ آسر ءَ پاکستانی پوج ءَ جانی ءُ مالی تاوان رس اِتگ –

گڈسر ءَ میجر گْوھرام بلوچ ءَ گوشتگ کہ زورگپتیں بلوچستان ءِ آجوئی تاں مئے اُرش برجاہ مان انت –

یاسر گوستگیں یک سالے ءَ بی آر اے ءِ پتر ءَ راجی آجوئی ءِ ھاتر ءَ سلاہ بندیں جنگ ءَ گوں بندوک بوتگ آئی ءِ داتگیں دیمونی پہ ورنایاں یک روکیں چراگے ئے بستار داریت آئی ءَ سھر چکیں دروت ندر کنیں – بیبگر بلوچ

دی بلوچستان پوسٹ

بلوچ سلاہ بندیں گل بلوچ ریپبلکن آرمی ءِ جارکش بیبگر بلوچ ءَ وتی شنگ کرتگیں درشان ءِ تہ ءَ گوشتگ کہ گل ءِ جوانیں سرمچار یاسر ابراھیم پنام گل محمد جاھمنند کیچ ناسرآباد نادراھی سوب ءَ مکران ءَ اوتاک ءَ شھید بوتگ – آ گوستگیں یک سالے ءَ گل ءِ پتر ءَ راجی آجوئی جنگ ءَ گوں بندوک بوتگ – یاسر ابراھیم وانندہ ءُ سسّا زانتیں سنگتے بوتگ آئی ءَ شھیدی پہ ورنایانی ھاتر ءَ روکیں چراگے ءِ بستار ءَ داریت –

جارکش ءَ گوشتگ گل آئی داتگیں دیمونیاں سھر چکیں دروت ندر کنت –

گڈسر ءَ جارکش بیبگر بلوچ ءَ گوشتگ کہ پہ راجی آجوئی ھاتر ءَ دیمونی دیگ یک آجوئیں ڈیھے آرگ ءَ تاں برجاک مان انت –

دی بلوچستان پوسٹ

سر بیتگیں ھالانی رد ءَ بلوچستان ءِ دمگ کیچ ءِ بنجاھی شھر تربت ءَ پریس کلب ءَ انسداد منشیات کمیٹی ءِ نیمگ رھشونانی نیمگ ءَ یک پریس کانفرنسے کنگ بیتگ –

پریس کانفرنس ءَ آئی ءَ گپ کنان ءَ نشہ باپاری ءِ گر ءُ دار ءِ سر ءَ وتی بژنی گپ درشان کرتگ ءُ گْوشتگ اَنت کہ اے ھمے سرپد بہ ایں کہ سرکار ءُ آئی ءِ واکدار نشہ باپاری ءَ ھوار اَنت –

آیاں گْوشت کہ انسداد منشیات کمیٹی بلیدہ زامران ءَ ھمے سال ءِ مئی ءَ وتی جد ءُ جھد بندات کرتگ ءُ اے کاروان ءِ بازیں جد ءُ جھداں دمگ ءَ نود ءُ پنچ درسد نشہ ءِ باپاری بند بیتگ اَنت –

آیاں تران کنان ءَ گْوشت کہ مئے مول ءُ مراد تھنا اے نہ اِنت کہ بلیدہ زامران ءَ نشہ بند بہ بیت بلکیں سرجمیں بلوچستان ءَ نشہ ءِ باپاری دارگ بہ بیت-

آیاں گوشت کہ مئے واھشت اِنت بلوچستان ءِ ورناہ نشہ ءِ نیمگ ءَ یلہ بہ کن اَنت ءُ بلوچستان ءِ آ دگہ دیمری ءُ زانتانی نیمگ ءَ وتی دلگوش ءَ بہ کن اَنت ءُ آیان گوشت کہ ما چاگردی رسانکجاھانی زور ءَ وتی توار ءَ بلوچستان ءِ جاہ جاہ ءَ سرکنان بہ ایں ءُ سرجمیں بلوچستان ءِ مھلوک نشہ باپاری ءِ ھلاپ ءَ توار چِست بہ کن اَنت –

آیاں تران کنان ءَ گْوشت کہ اے بژنیں رنگے ءَ گوشگ بیت کہ مردمانی بازیں جد ءُ جھد ءَ ابید ھم سرکار ءِ کرد ھچ رنگ ءَ دیم ءَ نیایگ اِنت، آیاں گْوشت کہ اگاں سرکار ءَ تُشے ءَ ھم نشہ باپاری ءِ بند کنگ ءِ نیمگ ءَ وتی مشینری ءَ کار بہ بند اِیت گڑا بلیدہ زامران ءَ ھوار سرجمیں مکران ءُ بلوچستان ءَ اے سِلگتیں نادراھی ھلاس بیتگ اَت –

آیاں گْوشت کہ اے درگت ءَ دمگدار ءُ سرکار ءِ بے تواری، بے دلگوشی اجکہ کنت نِی گڑا مھلوک ھمے سرپد بیت کہ سرکار اے سِلگتیں کاراں دزمانجن اِنت ءُ اے باپاری ءِ پلامرزی ءَ کنگ ءَ اِنت –

پریس کانفرنس ءَ تران کنوکیں مردماں بلیدہ زامران ءَ نشہ گورجتگیں مردمانی ٹپاستگیں جاورھال پیش کرتگ ءُ گوشتگ کہ وتی کمک ءَ گیشتریں نشہ آماچیں مردمانی جاندراھی بیتگ ءُ آیاں گوشت کہ اگاں سرکار ءَ اے سِلگتیں نادراھی ءِ ھلاس کنگ ءَ گامگیج نہ زُرت اَنف گڑا مئے زھرشانیانی پتر دراج تِر بیان کنت –

آزمانک: زاکر جان من ءَ پَھِل کن

آزمانکار: کندیل بلوچ

دی بلوچستان پوسٹ

روچ ءَ ٹک دات چاہ ءِ پیالہ یے وارت دیم پہ شھر ءَ دات کہ روان راشن ءِ پہ چُک آں کار آں
روڈ ءِ سرا اوشات اوں لاری یے اتک من دست دات سوار بوت اوں دیم پہ شہر ءَ روان اَت اوں نیم کلاک ءِ سپر ءَ شت آں نیم راہ ئے سرا پوجی ءِ بنجل ءِ نزیک ءَ سر بوت آں یک پوجی اے چہ وتی بنجل ءَ در اتک دست ءِ برز ءَ کت کوکار ءِ جت ءِ چہ لاری ءَ ایر بہ کپ اِت پند ءَ بیا ات وتی پجار ءَ بہ کن ات ۔

ما گاڑی ءَ چہ ایر کپت آں اندازگ بیست ءُ سی کدم بُر ات بنجل ءَ سر بوت آں ۔ پوجی ءَ آواز دات وتی پجار کارڈ آں کیسگ ءَ چہ بہ کش ات منا پیش بہ دار ات۔

درائیں آں وتی پجار کارڈ چہ کیسگ ءَ در کت دست ءَ کت پوجی ءَ گشت وتی دست آں برزا بہ کن ات من شمے کیسگ آں پٹ ءُ پول کن ایں ۔ ایدگہ درائیں مردم آں وتی پجار کارڈ کش ات دست ءَ کت بھلے من وتی پجار کارڈ لوگ ءَ شموشتگ اَت۔

درائیں مردم آں وتی پچار کارڈ دست ءَ کت آں ما دراہ ریسگ ءَ اوشات آں ہر کس ئے پچار کارڈ دست ءَ ات آں یک پوجی ءِ پجار کارڈ آں چارگ ءَ ات یک پوجی ءِ کیسگ آں پٹ ءُ پول کنگ ءَ لگ ات۔

منی باری اتک ءُ من ءَ گشتے وتی پجار کارڈ ءَ بہ کَش من ترا کوکار داتگ ءُ چے گوشتگ تو کر ءِ نہ اُش کن ئے یاں گنوک ئے ۔من گشت من وتی پجار کارڈ لوگ ءَ شموشتگ منا گشت ئے شما زان ات کہ مردم ءَ را وتی پجار الم کنگ لوٹ ایت شما وتی پجار کارڈ ءَ پرچہ ہر وھد ءَ جیب ءَ نہ کن ات ۔ من گوشت من روچ ءَ وتی ڈگار آں کار کن ایں ۔ من پمیشکہ لوگ ءَ ایر کتگ کہ ھاکی بیت ءُ لیکہ ئے گار بنت یاں جاگھے ءَ کپیت گار بیت ۔ پمیشکہ لوگ ءَ ایر کتگ، مروچی دیم پہ شھرا روگ اوں بلے من زورگ ءَ شموشتگ۔

ہمے پوچی کہ مئے کیسگ آں پٹ ءُ پُول کنگ ءَ ات ۔ ہمیشی منی گپ اش کت منا شَت کش ات شھمات ءِ گوْشت ءِ ترا من یک سبق ءِ دیاں دگہ وھد ءَ وتی پجار کارڈ ءَ لوگ ایر نہ کنے ءُ نہ شموش ئے۔
منا ھمدا دو سئے شھمات گرم ایں جت اِش من کپت اوں دو سئے لگت ھم جت اِش۔

۔لاری ءِ واھند ءَ را کوکار ءِ جت ئے گوْشت ءِ مروچی بہ بر ئے دگہ وھد ءَ ہر کس ءَ پجار کارڈ گون نہ بوت بزان آئی ءِ ھیر نہ انت ۔

شت اوں شھر ءَ سر بوت اوں راشن گپت شپ ءَ اتک اوں لوگ ءَ سر ءُ جان ہمے زالم ءِ جنّگ ءِ وجہ ءَ ہنچو بزان ٹُکر ٹُکر بیگ ءِ گواہی دیگ ءَ ات انت سک دم ھم برتگ ات ۔سر ایر کت پہ بے سمائی واب شت اوں

واب ءَ دیست یک برز ءُ مڑاہ داریں مرد ءِ اتک سیاہیں کلاہ ءِ سر ءَ ات ئے ءُ پیسرا منی سرے بر داتگ ایں دزمال دور کت ءِ منا یک ترندیں لگت ءِ شت کش ات ئے من پچ درشْپت سماء کت وتی چمان ءَ مشت سر چست کت

اوھو زاکر جان تو اے!!!

پہ زہر ءُ بیہارے گون ءَ منا گوْشت ءِ مرگ بات ئے گون شپ روچ ءِ واب ءَ

من گوشت زاکر تو بندیگ بوتگ ءِ تو کدی آجو بوت ءِ ؟

پدا گون زہرگے گون ءَ گشت ءِ من بندیگ نہ بوتگ آں منی ھیالا شما بندیگ ات ۔

من پھم ات کہ زاکر منا چیا چش گشگ ءَ ایں۔
من چہ بازیں جیڑگ ءَ چہ رند پھم ات کہ زاکر گشگ ءَ انت کوم گلام انت کوم کربانی لوٹ ایت جہد لوٹ ایت تو چیا چو بے سمائے ءِ واب ءَ چہ کدی سماءَ کن ئے
من چہ واب ءَ سماء کت چارت کہ زاکر ادا نہ انت ۔

دل ءَ جیڑگ ءِ چست بوت کہ راست اِنت زاکر جان بندیگ نہ انت ما بندیگ آں کہ مارءَ ہچ سُد پر نہ انت ما نزا ایں کوم گلام انت کوم ءِ آجوئی ءِ واستہ مردم ہرچ وڑیں کربانی ءَ آسرا نہ کنت۔
زاکر مروچی بندیگ ایں آئی وتی کوم ءِ ھق سرجم کتگ اَنت ما راجی بندیگانی ءُ شھیدانی وام دار انت ۔

ھمے ھیال چست بوت ءَ منا واب نئیتک ءُ پاد اتک اوں تاس زرت مشک ءَ آپ ئے وریں ءَ شت اوں ماس ءَ منی پاد برمش اِش کت آ ھم پاد اَتک ۔

منی بچ ترا واب آیگ ءَ نہ انت، من زان ایں ہمے زالم ءِ لگت آں ترا نا دراہ کتگ ھال بہ دئے کجام جاگہ تکانسر ایں۔
من رئیں تئی بلوک ءِ گوْرا سنچ ءُ پکی کاریں بؤر ۔

انا جیجہ بوپس اے درد آں سنچ ءُ پکی دراہ نہ کن انت ۔
ہمے واب ءِ گندگ ءَ پد من زانت مارا پجار نیست ۔من زی پوجی ءَ را گوشتگ کہ منی پجار کارڈ لوگ ءَ انت ۔اسلی ءَ منا پجار نیست مئے پجار چہ ما پچ گرگ بوتگ۔
اگاں پجار ءِ بوتیں چہ وتی لوگ ءَ چہ در کپگ ءَ مارا کس ءَ جست نہ کتگ ات کہ وتی پجار ءَ بہ کن ات ۔

مئے پجار مئے سر زمین بوت ءَ چہ ما پچ گرگ بوتگ، ہزاراں سال جھمند ایں کوم را وتی لوگ ءَ چہ در آیگ ءَ چونیں پجارے لوٹ ایت ؟ جیڑگی گپ ئے۔

من پھم ات کہ زاکر دری کوماں وتی سرا ھاکم بیگ نہ من اِتگ پمیشکہ مروچی چہ ما جتا ایں۔
مئے سر زاکر ءُ آئی سنگتانی عکس ءِ دیم ءَ جھل انت پرچہ کہ ما آھانی پگر ءَ پیلو نہ کنگ ءَ آں۔

مروچی راجۓ بندیگاں ءُ شھیدآں وتی نگرھیں جان پہ مئے باندات ءِ واستہ ندر کتگ ما نزا ایں کہ مئے زمہ واری چی انت ۔آھانی پگر چے بوت ءَ ؟ مارا آھانی پگر چتور سرجم کنگی انت ۔

مروچی اگاں ما شر بے جیڑ آں ما وتی وتن ءَ آجو کنگ ءِ واستہ سر ءِ ندر کنگ ءَ چَک بہ جن انت مئے آؤکیں نسل مئے کبر آں نالت دنت ۔ پرچی کہ مئے مروچی ایں پکر، نظریہ، جیڑگ، کربانی مئے آؤ کیں نسل ءِ زند انت ۔ اگں ما وتی آؤکیں نسل ءَ یک آزاتیں زندیں بکشاھگ لوٹ آں گُڑا مروچی، پہ ہرچ پیمیں کربانی ءَ آسرا مہ کن آں ۔ انچش کہ زاکر جان ءُ آئی سنگتاں وتی راجی آجوئی واستہ ہرچ وڑیں اڑ ءُ جنجالانی باوست ءَ نہ جیڑتگ وتی آجوئی ءِ پگر ءُ زمہ واری پورا کتگ اَنت نوں مارا زمہ واری داتگ اِش ۔

اگاں ما انگت سما نہ کت بزان ما اے مہ پھم اِنت کہ ایوک ءَ زاکر جان، زاہد جان ءُ آھانی ایدگہ ہزاراں سنگت بندیگ انت، ہمے بہ پھم اِنت کہ ما دراہ بندیگ آں پرچہ کہ ما گلامی ءَ نہ مار انت۔
دگنیا ءِ تہا ہزاراں کوم گلام بوتگ اَنت بلے نون آزات انت آھاں گلامی ءِ سانکلانی پروشگ ءَ ہرچ وڑیں کربانی دیگ ءَ آسرا نہ کتگ

زاکر جان آجو بات ئے

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

دی بلوچستان پوسٹ

سر بیتگیں ھالانی رد ءَ روکپتی بلوچستان ءَ ایرانی سپاہ ءِ تیرگواری تیل کَشیں کُردے بیران بیتگ –

اھوالکار ءِ رد ءَ مگس ءِ دمگ آشار ءَ ایرانی سپاہ ءَ تیرگواری کرتگ ءُ کردستان ءِ جھممندیں مردمے کُشتگ-

بیران بیتگیں مردم ءِ پجار بیزاد مھمدی جھمنند بانہ کردستان ءِ نام ءَ زانگ بیتگ –

اھوالکار ءِ رد ءَ بیزاد مھمدی ءِ گاڑی ءِ تیل مان بیتگ ءُ ھمے وھد ءَ ایرانی سپاہ ءَ تیرگواری کرتگ ءُ آئی ءَ تیر لگ اِتگ ءُ بیران بیتگ –

چاگردی مردمانی گوشگ اِنت کہ کردستان ءُ روکپتی بلوچستان ءَ سیمسری ءَ لاپ ءِ والینگ ءَ تیل ءِ باپاری کن اَنت کہ چریشی ءَ بازیں مردم بیران بنت –

آئی ءَ گوشت کہ روکپتی بلوچستان ءِ جھمنند ءُ کردستان ءِ سیمسری ءِ بندوکی ءَ بازیں بلوچ ھم ایرانی لشکر ءِ تیرانی آماچ بیتگ ءُ بیران بیتگ اَنت –

آئی ءَ گْوشت کہ گیشیں روزگار ءِ نہ بوگ ءَ مردم پہ لاچاری اے بیمناکیں باپاری ءَ کنگ ءَ اَنت کہ ایشی ءِ بند کنگ ءَ ھم مردمانی جان ءُ ساھاں تاوان دیگ ءَ اَنت –

شال ءَ بیگواھیں مردمانی ھاتر ءَ زھرشانی برجاہ –

دی بلوچستان پوسٹ

وائس فار بلوچ مسنگ پرسنز ءِ رھشون ماما قدیر بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ بلوچ زالبولانی زورانسری آوارجنی پاکستانی ریاست ءِ بلوچستان ءِ درگت ءَ پالیسیانی درنگازی بلوچ راج زالبولانی زورانسری آوار جنی ءِ بگیری یکجاہ بہ بنت ءُ توار چست بہ کن انت –

ماما قدیر بلوچ ءَ دیمتر ءَ گوشتگ کہ بلوچستان ءِ تہ ءَ ھچ کس ایمن نہ انت- گوستگیں روچاں بلوچستان یونیورسٹی ءِ پروفیسر ءُ مروچی پنجگور گچک ءَ چُک ءُ زالبولانی زورانسری آوارجنی وت اشی گواہ انت –
آئی ءَ گوشتگ کہ اشی ءَ پیش ھم پاکستانی پوج ءُ چیریں ادارھاں لشکر کشی ءَ چُک زالبول شھید کُتگ ءُ بیگواہ کرتگ انت – اشی ءَ پیش آواران ءَ ھم زالبول آوار جنی ءَ پد آ ناشرکار گوشتگ ءُ دیم ءَ آؤرتگ انت – وھدیکہ ھرنائی ءِ دمگ نشپا ءَ لشکر کشی ءِ میان ءَ پاکستانی پوج ءِ دست ءَ شھید بوتگیں جنکو ءِ وئیل ھم دپتر ءِ تہ ءَ ھست انت –

آئی ءَ گوشتگ کہ زالبولانی زورانسری آوار جنی پدرد ءُ کابل ایرجنگ انت ءُ بگیری ءَ توار چست کن ایں –

زانگ بہ بیت بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ مروچی چارھزار ءُ یک سد ءُ پنجاہ روچ سرجم بیتگ ءُ جتائیں پگر ءِ منوگراں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ پدردی درشان اِتگ –

اشی ءَ پیش ماما قدیر بلوچ ءَ وتی شنگ کرتگیں تامر درشان ءِ تہ ءَ گوشتگ کہ پہ عمرے ءِ ھاتر ءَ وھدے من کاگدانی جم کنگ ءَ پاسپورٹ آفس ءَ شُتگ انت گڑا من ءَ گوشگ بوتگ کہ منی نام دوبر ای سی ایل ءَ تہ ءَ کنگ بوتگ –

ماما قدیر بلوچ ءَ گوشتگ من نزاناں منی نام چی ءَ ای سی ایل ءِ تہ ءَ کنگ بوتگ، وائس فار بلوچ مسنگ پرسنز پہ بیگواھیں مردمانی ھاتر ءَ ملکی کانودانی رِد ءَ ھک ءُ انساپ لوٹ ایت، ناکہ ما سلاہ بستہ انت ناکہ ما جرمے کتگ کہ مئے نام ای سی ایل ءِ تہ ءَ مان کنگ بوتگ –

زانگ بہ بیت اشی ءَ پیش ھم ماما قدیر بلوچ ءِ نام دو رند ءَ ای سی ایل ءِ تہ ءَ مان کنگ بوتگ ھمے سوب ءَ آئی ءَ جنیوا، امریکہ ءَ انسانی ھکانی گلانی مراگشاں بھر زرت کرت نہ کتگ –