TBP Balochi

پونزگ سُنٹ ءَ پاکستانی پوج ءِ نوکیں پانگس ءِ سر ءَ اُرش کُتگ دو کارمند کُشتگ اَنت – بیبگر بلوچ –

دی بلوچستان پوسٹ

سربیتگیں ھالانی رِد ءَ گوستگیں روچ ءَ کولواہ ءِ دمگ ڈانڈار پونزگ سُنٹ ءَ برجاھیں پاکستانی پوج ءِ سر ءَ ناشناسیں سلاہ بندیں مردماں اُرش کُتگ – اُرش ءَ پاکستانی پوج ءَ جانی ءُ مالی تاوان رس اِتگ –

اُرش ءَ پد پاکستانی پوج ءُ سلاہ بندانی میان ءَ جنگ ءُ چوپ بوتگ بلے سلاہ بند درآیگ ءُ رؤگ ءَ سوبین بوتگ انت –

دومی نیمگ ءَ بلوچ راجی آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ گوستگیں روچ ءَ مئے سرمچاراں کولواہ ءِ دمگ ڈنڈار پونزگ سُنٹ ءَ پاکستانی پوج ءِ نوک جوڑ کرتگیں پانگس ءِ سر ءَ اُرش کُتگ – اُرش ءَ پاکستانی پوج ءِ دو کارمند مُرتگ –

جارکش ءَ دیمتر ءَ وتی درشان ءِ تہ ءَ گوشتگ کہ اُرش ءِ میان ءَ پاکستانی پوج ءَ مئے سرمچارانی انگیر کنگ ءِ جھد کُرتگ داں نیم ساھت ءَ پاکستانی پوج ءُ مئے سرمچارانی میان ءَ جنگ ءُ چوپ بوتگ بلے مئے سرمچار درآیگ ءُ رؤگ ءَ سوبین بوتگ انت –

گُڈسر ءَ جارکش بیبگر بلوچ ءَ گوشتگ کہ مئے اے وڑیں اُرش بلوچستان ءِ آجوئی ءَ تاں برجاہ مان انت –

دی بلوچستان پوسٹ

ٹی بی پی چاگردی اھوالکار ءِ رد ءَ جھانی وبا کورونا وائرس ءَ بیران بیتگیں مردمانی کَچ شانزدہ لَک ءُ چل ھزار ءَ گیش ءَ سر بیتگ اَنت –

کورونا وئرس ءَ گپتگیں مردمانی کَچ ھپت کروڑ ءُ سِی ھپت لَک ءَ گیش مردم کورونا نادراھی ءِ آماچ بیتگ اَنت –

ھالرسانی رد ءَ بیست ءُ چار ادارانی تہ ءَ امریکہ ءَ دوھزار ءُ پنچ سد ءُ پنجاہ مردمانی ساہ کورونا ءَ گپتگ اَنت ءُ یک لَک ءُ ھپتاد ءُ چار ھزار دگہ نوکیں نادراھانی پدراھی بیتگ اَنت –

ھمے وڑ ءَ اٹلی ءَ دوھزار ءُ ھشت سد ءُ پناہ، فرانس ءَ چار سد ءُ بیست ءُ پنچ ءُ برطانیہ ءَ پنچ اد مردم بیران بیتگ اَنت –

دومی نیمگ ءَ پیرس ءَ دربند جنگ بیتگ ءُ انگلینڈ ءِ بازیں جاھانی بندش جنگ ءِ جار پِرینگ بیتگ اَنت-

ڈیھانی سرکاراں کرسمس ءُ دگہ مُچیانی یکجاہ بیگ ءِ بندش جنگ ءِ پرمان ءُ ویلز، اسکاٹ لینڈ، ڈنمارک ءُ آسٹریلیا ءَ کورونا وائرس ءِ مٹ بیتگیں گمان دیم ءَ اتکگ اَنت –

پاکستان ءَ کورونا وائرس ءَ بیست ءُ چار ادارانی تہ ءَ یک سد ءُ پنچ مردم بیران بیتگ اَنت –

دی بلوچستان پوسٹ

بلوچستان ءِ دمگ پنجگوڑ ءَ پیش اتکگیں تیرگواری وئیل ءَ پنچ مردم بیران ءُ سَے زدگ بیتگ اَنت –

سر بیتگیں ھالانی رد ءَ تیرگواری ءِ وئیل پروم ءَ ڈیم ءِ ھند ءَ پیش اتکگ –

ڈپٹی کمشنر پنجگور ءَ وئیل راست کرتگ ءُ گْوشتگ کہ وئیل ءَ پنچ مردم بیران بیتگ اَنت – بلے تنی وھدی آئی ءَ وئیل بارہ ءَ دگہ گپ نہ گوشتگ –

بیران ءُ زدگ بیتگیں مردمانی پجار تنی وھدی نہ بیتگ اَنت ءُ جون ءُ زدگ بیتگیں مردم ڈی ایچ کیو ءَ سر کنگ بیتگ اَنت –

دی بلوچستان پوسٹ

سر بیتگیں ھالانی رد ءَ بلوچستان ءِ دمگ پسنی ءُ نوشکی ءَ پیش اتکگیں دگ وئیلاں یک مردمے بیران ءُ شش زدگ بیتگ اَنت –

گیشیں ھالانی رد ءَ پسنی ءَ ترند رؤکیں گاڑی شادی کور ءَ ڈرائیور ءِ دست ءَ لگوشتگ ءُ کلٹی بیتگ چریشی ءَ چہ مھبوب جھمنند تربت بیران ءُ ھمے وڑ گاڑی ءَ سواریں دگہ سَے مردم زدگ بیتگ اَنت کہ آیانی تہ ءَ فیصل جھمنند کراچی، نور بخش جھمنند پسنی ءُ شبیر جھمنند پسنی ھوار اَنت –

دمگی مردمانی رد ءَ جون ءُ لاش پسنی ءِ نادراہ جاہ ءَ سر کنگ بیتگ اَنت –

ھمے وڑ نوشکی ءَ شھدگ ءَ ترند رؤکیں ٹرکے ءَ پرپٹ سوار دام کرتگ اَنت کہ چریشی ءِ آسر ءَ مھمد یونس، مھمد یوسف ء مھمد خان، مھبوب ء عیسیٰ خان جمالدینی جھمنند جورکین زدگ بیتگ اَنت –

زدگ بیتگیں بنداتی دارو درمان ءَ نوشکی ءِ نادراہ جاہ ءَ برگ بیتگ اَنت ءُ جاورنگیگیں زدگ بیتگیں شال ءَ برگ بیتگ اَنت –

نبشتانک: جنرل اسلم ءِ کاروان

نبشتہ کار: اکیل مراد

سیمی بھر

دی بلوچستان پوسٹ

جنزگ زندگی ءِ نام اِنت جنزگ ءَ ابید زندگی بے سرجم اِنت آ کہ نہ جنز اِیت آ لنگ اِنت آ چہ زندگی ءَ زبھر اِنت کہ وتی جنزگ ءَ زانت مہ کنت، جنرل ءِ بامردی ءِ تہ ءَ جنزگانی مارشت سربار بیتگ اَنت کہ آئی ءَ جنزگ ءَ را مَٹ ءُ زندگی ءِ شوھاز ءَ درکپت نِی اد ءَ دلگوش کنگ لوٹ ایت راجدپتر ءِ زندگ کنگ ءَ آئی ءِ جنزگ ءِ نام بندات کرتگ اَت ءُ جنزگ تامدار کرتگ اَت آئی ءِ ھاک ءِ وشبو، زمین ءِ زیبائی ءُ بزگی ءِ ندارگ مان اِت اَنت –

جنرل ءَ بلوچستان ءِ ڈک ءُ در ءُ وڈانی زیبائی شریں رنگے ءَ دیستگ اَنت ءُ اے پُلکانی چِست بیتگیں دنزانی تہ ءَ وشبوئی ءِ سما کنگ یک نابودیں مردمے ءِ سِنچ ءَ باز در اِنت آ ایشی ءَ پھم اِت نہ کنت کہ کوہ ءُ ڈک ءُ در، میدان ءُ پُر ارسیگیں مات ءِ چمانی پھک کنگ ءَ الم یک دیمے ءَ جنزگ وَ لوٹ ایت بلے آ جنز ءَ کجام نام پِر بہ بیت آ جنز ءِ پُشدر چی بیت کن اَنت –

جنرل ءَ اے ھم ھما وھد ءَ زانتگ اَت ءُ وتی گامانی تہ ءَ گشینتگ اَت اے جنگ ءِ گامانی تہ ءَ منی کرد ءِ ھواری ءَ منی سما ھم یک ناں یک وھدے ءَ آؤکیں پدریچ ءِ تہ ءَ زندگ بیت کنت ءُ دیم ءَ ھم شت کنت –

جنرل ءَ اے ھم زانتگ اے جنگ ءِ گڈی سپاھی من بیت نہ کن آں من ءَ چہ پد ھم اے جنگ ءِ گرانیں بار بامردانی بڈ ءَ بیت کنت ءُ اے جنگ گامے ءَ برزتر بیت کنت –

جنرل ءَ چوشیں واب وتی چماں دیستگ اَت باندات ءِ پگر گیشتر پھتہ بہ اَنت ءُ آیانی نوکیں دور “جدید یت” ءَ کواسی دروشمے ءِ چھرگ ءَ دیم ءِ لکیرانی تہ ءَ شُبین کنت –

جنرل ءَ اے ھم مار اِتگ اَت چہ من ءَ پد بولان ءِ کوہ ءُ در چورو نہ بنت بلکیں اے کوہ ءُ ڈکاں یک چراگے ءِ رژن ءُ مسک ءُ امبریں بوھے ءِ تالان بیگ ھم جنرل ءِ سنچ ءِ سما ءِ تہ ءَ گون اَت –

اے بالاچ پِگریں جنرل ءَ بابا ھیربکش مری ءِ زانتجاہ ءَ المیں پگر ءُ ھنرے گون اَت ءُ بلوچستان ءِ مات کوھیں گَراں تران اَت اے سما ءِ تہ ءَ جنرل ءِ شاھزانتی ءَ بندیں راھانی پَچ کنگ ءَ ٹِکم ءُ دگہ اوزارانی درکاری نہ اَت آئی ءِ سسّا زانت مزن مزنیں سِلاہ رنگیں جنگانی کِسھاں گون اِت اَنت –

“اُفتادگان خاک” تاک دیم بیست ءُ شش ءَ فرانز فینن” نبشتگ کنت اشی ءَ یک گامے ءَ دیم سرجم ءَ جنی منزل کیت راستی ءَ جنی پریانی ءُ ھُنڈالانی سرجمی ءِ زاھری ءِ بیت اشانی تہ ءَ ھونواریں جنانی پریانی، ٹک نامان بیت اِنت دیوتایانی جن ھوار اَنت دھشتانی بے سنچی، اے پُرشت ءُ پروشی اے درست نوک آباد بیتگیں نزام ءِ جان ءُ رگانی یک بنکی کارے سُرین ایت –

روگ ءِ وھد ءَ مردین ءُ جنین ایمنی ءِ رنگ ءَ شانے ءَ گوں وتی پاداں ترپ ترپ کنان ءَ روان ءَ رو اَنت واتری ءَ پد سرجمیں میتگ بے توار بیت ءُ یک رندے پد ءَ بے وسی ءِ چھرگ لُنٹانی سر ءَ گندگ ءَ کاینت –

آجوئی ءِ جھد ءَ اے وڑیں سُر ءُ پر رجگ ءِ رنگ ءَ ھلاسی ءِ نیمگ ءَ رو اَنت بنکی جھمنندانی لاپ ھُش اِتگیں دار ءَ بیت کارچ آیانی گُٹ ءِ سر ءَ ایر بیت اِنت –

یا پد ءَ آیانی راستی ایش بیت کہ آیانی ناوشیں جاھاں بجلی ءِ کرنٹ پِر دارگ بیت ءُ گڑا اے وڑیں وھم ءُ گماناں سرگوز کن اَنت ءُ بنکی جھمنند وتی دستاں توپک کن اَنت ءُ اے وڑیں زورانی پروشگ ءَ کوہ ءَ مِک بنت ءُ وتی زند ءَ آسری ءِ گڈسر ءَ بر اَنت -“

نِی جنرل اسلم ءَ بالادیں سنچ ءِ تہ ءَ سما کُت نوک آبادکاریاں مئے سر ءَ ھاکمی ءِ مِہ مِک کرتگ ءُ مئے دراھیں بنکی آبادی ءَ کمتر ءُ جھل کنگ ءِ لانک بندگ بیتگ –

اے ھژدری لیکگ بیت آؤکیں ورنا زانت ءِ ساھگ ءِ چیر ءِ ھواری ءَ سرپتگیں چیراں ردان بہ کنت تانکہ نوک آبادکاری ءِ نزام مئے وشی ءِ تماھاں گِستا بہ بیت ءُ بنکی آبادی ءَ ھک ءُ ایمنی ءِ واب چماں اتک بہ کنت –

جنرل ءِ کاروان ءِ وابانی واھشت ءِ سرجمی ءَ آئی ءِ رھبند وت بس اِنت ءُ اے سھرائی ءَ کنت ءُ سدکی ءَ دنت بانداتیگیں روچ ٹِک دنت ءُ ٹک ءِ سھری ءَ ھونی یے جاور مَٹ بیت کن اَنت –

سپر روان اِنت ماں جنرل اسلم ءِ کاروان ءَ دسمبر –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

زندگ ءُ ازت داریں راج ءِ پرزند ازتیں مرگ ءَ کبول کن انت ایردستی زند گوازینگ چہ وتی جان ءِ پرواہ ءَ نہ کن انت رنگراھاں پند جن انت – ماما قدیر بلوچ

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ چار ھزار ءُ یک سد ءُ شست دو روچ سرجم بوتگ –
نیشنل پاٹی ءِ اُستانی جنرل سیکٹری خیربخش بلوچ، ملک نصیر شاھوانی ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولاں گوں پدردی درشان اِتگ ۔

وائس فار بلوچ مسنگ پرسنز ءِ وائس چیئرمین ماما قدیر بلوچ ءَ جار پرینتگ ءُ گوشتگ کہ شانزدہ دسمبر ءَ چہ وی بی ایم پی ءِ شدکشیں زھرشانی بُنجل شال ءَ چہ کراچی ءَ برگ بیت کہ ھر سال ھمے ماہ ءَ کراچی ءَ برگ بوتگ –

آئی ءَ گوشتگ کہ بنجل ءِ بدل کنگ ءِ مول ءُ مراد موسمی ھالاتاں ھوار کراچی پریس کلب ءِ نیمگ ءَ چہ دنیا ءِ دلگوش وتی نیمگ کنگ انت تانکہ بلوچستان ءِ تہ ءَ انسانی ھکانی لگتمالی ءِ درگت ءَ جوانیں توار چست کنگ بہ بیت –

ماما قدیر بلوچ ءَ دیمتر ءَ گوشتگ کہ زندگ ءُ ازت داریں راجانی پرزند ازتیں مرگ ءَ کبول کن انت چہ ایر دستی ءَ رکگ ءِ ھاتر ءَ وتی جانانی پرواہ ءَ نہ کن انت ءُ رنگراھاں پند جنان ءُ دیم پہ وتی منزل ءَ روان بنت – آ دراجیں پند جنگ ءَ پیسر زوراکانی جوڑ کرتگیں زنداناں ازیت نشانگ جوڑ بنت –

گڈسر ءَ ماما قدیر بلوچ ءَ گوشتگ کہ مارا چہ بے زانتی ءُ تنگ نزری ءُ ماژگی گلامی ءَ چہ رکگی انت پرچاکہ بے زانتی ءُ ماژگی گلامی درساں چہ مستریں ماژگی گلامی انت –

دی بلوچستان پوسٹ

پاکستانی پوج ءُ ایجنسی راجدوستیں باسکانی گس آں دور کن انت زالبولانی بے شرپی کن انت ءُ آھانی زھگاں آوار جن انت – سوڈھو سندھی

سندھودیش روولیوشنری آرمی ءِ جارکش سوڈھو سندھی ءَ رسانکدراں وتی شنگ کرتگیں درشان ءِ تہ ءَ مروچی کراچی کلفٹن ءَ چینی انجینیرز ءِ گاڑی ءُ کراچی یونیورسٹی دگ ءِ سر ءَ برجاھیں رینجرز بنجل ءِ سر ءَ بوتگیں اُرشانی زمہ واری منّ اِتگ –

جارکش ءَ گوشتگ کہ چائینہ ءُ پاکستان سی پیک ءُ دگہ منسوبھانی پشدر ءَ چہ سندھ ءِ جزائر ءُ زِر ءِ مال مڈیانی سر ءَ اُرش کنگ ءُ وتی زوگری انت –

جارکش ءَ دیمتر ءَ گوشتگ کہ پاکستان ءِ پوج ءُ چیریں ادارہ سندھ ءِ راجدار ءُ راج دوستیں باسکانی لوگاں دور کن انت زالبولانی گوم ءَ کم شرپی کن انت آھاں لٹ ءُ کٹ کن انت ءُ آھانی دیم ءَ آھانی چُکاں زورانسری آوار جن انت ءُ بیگواہ کن انت –

سوڈھو سندھی ءَ وتی درشان ءِ تہ ءَ گوشتگ کہ سندھ ءِ سرڈگار پاکستان ءُ چین اُرش ءُ ایردستی آماچ انت ھمے ایردستی ءِ بگیری ءَ سندھی راج سلاہ بندی ءُ راج رکینگ ءِ جھد کنگے ھک ءَ داریت –

گڈسر ءَ جارکش ءَ گوشتگ کہ ایس آر اے سندھو دیش ءِ آجوئی تاں وتی سلاہ بندیں جد ءُ جھد ءَ ھمے وڑ برجاہ داریت.

دی بلوچستان پوسٹ

سربیتگیں ھالانی رِد ءَ بلوچستان ءِ دمگ پنجگور پروم ءَ پاکستانی پوج ءِ لشکر کشی برجاہ، آئل ٹینکراں ھوار بازیں گاڑی گرگ ءُ بیگار کنگ بیتگ اَنت، مردمانی سر ءَ زوراکی ءُ لٹ ءُ کُٹ ھوار لُٹ ءُ پُل برجاہ اِنت-

چار روچ اِنت کہ پنجگور ءِ دمگ پروم ءِ گیشتریں میتگاں پاکستانی پوج ءِ لشکر کشی برجاہ اَنت-

مرچی سُھب ءَ پاکستانی پوج ءَ پروم رھیم آباد ءَ بیڑ بُرتگ ءُ ھدامُرزی ءِ عبدالرشید ءِ گس انگر کُتگ ءُ لُٹ ءُ پُل بندات کُتگ، زھگ ءُ جنینانی سر ءَ ھم زوراکی کُتگ۔

دمگی مردمانی رِد ءَ پاکستانی پوج ءَ اود ءَ چہ دو ھالیگیں ٹینکر ھم دستیگ کُتگ ءُ گوں وت بُرتگ اَنت۔

پروم ءَ روکپتی بلوچستان ءِ سیمسر ءَ گْوستگیں بازیں روچاں پاکستانی پوج ءِ تر ءُ گَرد ءُ لشکرکشی برجاہ اَنت۔ دمگی مردمانی رد ءَ چہ ایران ءَ ٹیل ءِ باپاری کنوکیں مردماں پاکستانی پوج زوراکی ءِ نشانگ جوڑ کنگ ءِ ھواری ءَ بازیں مردمے ءِ گاڑی ھم گِپتگ اَنت-

نبشتانک: گوادر بلوچانی اِنت

نبشتہ کار: زهیر بلوچ

دی بلوچستان پوسٹ

“رتکگیں هونانی سوگِند وارتگاں
پہ گُلزمین ءُ زِر وتا کُربان کناں”

گوستگیں هپتاد ءُ دو سال انت کہ زورگریں اِستان بلوچ گلزمین ءِ پُلگ ءِ هاتر ءَ همک روچ هُنر ءُ هیلا کنگ ءَ اِنت بلے انگت ءَ سوبمند نہ بوتگ ءُ بلوچ تاسپیں بچانی دیمونی ءُ جُهد ءِ دیم ءَ سیرین پروش بوتگ-

نوں زورگریں بدواه ءَ نوکیں هُنرے دست ءَ پتاتگ کہ گوادر ءَ چاریں آتراپ ءَ ٹَٹ کنگ ءَ انت
چوناھیگا ما اگاں بچاریں دو هزار ءَ بگر داں روچے مروچی سرجمیں بلوچستان ءَ همک داں گام ءِ سر ءَ زورگریں پوجیانی پانگِس ءُ بُنجل ہست انت اد ءَ دانکہ دربرجاه ءُ نادُراه جاه ءُ مردمانی گِس اوں زورگریں پوج ءَ وتئی بُنجُل جوڈ کتگ انت-

بلے پدا اوں نر مزاریں بلوچانی دیمے داشت نہ کتگ چیا بلوچ مرچی زانت کہ بلوچ گُلام انت بلوچے گلزمین مال ءُ مڈی پُلگ بوهگ ءَ انت بلوچے نّنگ لگتمال انت. نوں زورگِر گوادر ءَ ٹَٹ کنئگ ءُ چین ءَ آرگ ءُ جاگہ دهئیگ ءَ انت دانکہ بلوچ ءِ گلزمین ءِ سرا وتئی زورگری ءَ گیشتر مُهکم کُت بکنت دُگنیاه ئے تہ ءَ هچ زورگر پہ تُپنگ ءِ زور ءَ زیردستیں راجاں گُلام داشت نکنت-

مروچی پاکستان گوادر ءَ ٹَٹے تہ ءَ کنگ ءَ همیں سرپد بیت بلکیں اے وڑ ءَ آ وتئی مول ءُ مُراد ءَ سوبمند بیت بلے چو بیت نکنت. بلوچ وتئی گُلزمین ءِ پهازگ ءِ هاتر ءَ هرچ وڈیں دیمونی دهئیگ ءَ ساڈی انت. بلوچاں وتئی هون اے گُلزمین ءِ سر ءَ رتکگ ءُ بدواه ءُ باروٹی زوراکانی دیم داشتگ-

گوادر ءِ ٹَٹ کنگے باپُشت ءَ چین ءِ دست مان اِنت چیا کہ چین زانت بلوچ پہ وشیں دل وتی گلزمین ءِ سر ءَ چین ءُ پاکستان ءَ ایمنی ءَ نیندگ ءَ نیل ایت چین لوٹیت کہ گوادر ءِ تہ ءَ وتی پوجی بُنجُل ءِ جوڑ بکنت ءُ بلوچستان ءِ تہ ءَ بہ اِت بہ نندیت ءُ بلوچستان ءِ مڈیانی پُلگ ءَ هوار ہندوستان ءُ امریکہ ءِ دیم ءَ داشت بکنت چیا کہ سرجمیں ایشیا ءِ تہ ءَ بلوچستان نیام ءَ انت ءُ بلوچستان ءِ زِر سرجمیں ایشیا ءِ تہ ءَ باپاری کنگ ءَ مزنیں ارزشت ءِ داریت پمشکہ چین لوٹیت چو سری لنکا ئے وڈا بلوچانی زِر ءَ اوں وتی پنجگانی تہ ءَ بکنت ءُ وتی سامراجی زور ءَ سرجمیں ایشیاه ءِ تہ ءَ مھکم بکنت-

گوستگیں 72 سال انت کہ زورگریں پاکستان ءَ بلوچ ءِ ڈیهہ وتئی زوراکیں پنجگانی چیر ء کتگ ءُ همک روچ بلوچ بچاں بیگواه کنئگ ءُ شہید کنئگ ءَ انت. بلوچ ءِ میتگ ءُ گِساں ماندارگ ءَ انت بلئے انگت ءَ بے سوب بوتگ نوں زورگر لوٹ ایت کہ گوادر ءَ چہ بلوچاں پہ ابدی بہ سِندیت ءُ چین ءِ دست ءَ بدنت. چونہی ءَ انوں گوادر ءِ تہ ءَ مزنیں کساسے ءَ چینی آرگ ءُ جھمنند کنگ بوتگ انت- بلے نوں زورگِر لوٹ ایت کہ گوادر ءِ تہ ءَ چین وتی پوجی بُنجُل ءَ جوڑ بکنت ءُ گوادر ءَ هوار سرجمیں بلوچستان ءِ مهلوک پاکستان ءُ چین ءِ لگتانی چیر ءَ بہ بیت-
پیسر ءَ وتگڑیں سی پیک ءِ نام ء سر ءَ بلوچانی زِر چہ بلوچاں پُلیتگ اشاں نوں بلوچانی لوگے تہا آهگ ءُ نیندگ لوٹنت ءُ بلوچاں وتی جندے گُلزمین ءِ باروٹی کنگ ءُ در پہ در کنگ لوٹ اَنت-

نوں بلوچ راج ءَ وتی گلزمین ءُ راجے پهازگے هاترا گیشتر جُهد کنئگ ءُ تُرندیں گامگیج زورگ لوٹیت زورگرانی بگیری ءَ-

بلوچستان آجو بات
بلوچ راج ابدمان بات
بلوچی میزران بات.

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

بلوچستان پاکستانی پوج ءُ چیریں ادارھانی لشکر کشی، بیڑ ءُ زورانسری آوار جنی برجاہ اَنت –

سر بیتگیں ھالانی رد ءَ گوستگیں شپ ءَ کیچ ءِ دمگ الندور بلیدہ ءَ پاکستانی پوج ایف سی ءَ یک لوگے ءِ سر ءَ بیڑ برتگ یک ورنایے دزگیر کنگ ءَ پد بیگواہ کرتگ –

بیگواہ بیتگیں ورناہ ءِ پجار دیدگ ء پیرداد جھمنند شھرک ءِ نام ءَ زانگ بیتگ –

زانگ بہ بیت دیدگ بلوچ کھول ءَ لھتے سال ءَ پیسر پاکستانی پوج ءُ چیریں ادارھانی لشکر کشی ءُ بیڑانی سوب ءَ شھرک ءَ لڈ اِتگ ءُ الندور ءَ جھمنند بیتگ اَنت –

زانگ بہ بیت بلوچستان ءَ اے وھد ءَ ھزارانی کچ ءَ مردم پاکستانی پوج ءِ دست ءَ بیگواہ بیگ ءَ پد ھزاراں کھول تہ ئِے بلوچستان ءَ ابید اوگستان ءُ سندھ ءَ شتگ اَنت –

دومی نیمگ ءَ بیگواھیں مردمانی یلہ کنائینگ ءِ ھاتر ءَ شال ءِ پریس کلب ءِ دیم ءَ گوستگیں یک دھکے ءَ گیش کھولانی زھرشانی بنجل ءَ ماما قدیر بلوچ ءُ نصر اللہ بلوچ کنگ ءَ اَنت –