TBP Balochi

دی بلوچستان پوسٹ

سر بیتگیں ھالانی رد ءَ روکپتی بلوچستان ءَ بنجاھی شھر دزاپ “زاھدان ” ءَ ایرانی آمیدگس ءِ پرمان ءَ دو بلوچ پاھو دیگ بیتگ اَنت –

اھوالکار ءِ رد ءَ زنداناں بندیگیں مردمانی کھول گوستگیں روچ ءَ دُزاپ ءَ لوٹائینگ ءُ وتی بندیگین مردمانی گون ءَ گندوک ءَ دُچار کپتگ اَنت –

اھوالکار ءِ رد ءَ پاھو داتگیں مردمانی پجار بھنام ریگی ءُ شئیب ریگی ءِ ناماں پجارگ بیتگ اَنت کہ ھردوک میر جاوہ ءِ نندوک اَنت –

اھوالکار ءِ رد ءَ ایرانی آمیدگس ءَ گوستگیں روچ ءَ یک جارے ءَ اے مردمانی پاھو دیگ ءِ پرمان شنگ کرتگ ءُ گوشتگ کہ اے مردم بانداتگیں روچ بزانکہ مروچی پاھو دیگ بنت ءُ اشانی ھواری ءَ دگہ یکے ءِ پاھو دیگ ءِ پرمان کنگ بیتگ بلے آئی ءِ نام تنی وھدی پجارگ نہ بیتگ –

اھوالکار ءِ رد ءَ ایرانی آمیدگس ءَ اے مردمانی سر ءَ نِشہ باپاری ءِ بھتام جتگ ءُ بازیں وھداں بندیگ کنگ ءَ پد مروچی آ پاھو دیگ بیتگ اَنت –

دومی نیمگ ءَ چاگردی مردمانی گوشگ اِنت کہ ھردوکیں مردم بے سریں بھتاماں پاھو دیگ بیتگ اَنت ءُ چاگردی مردماں انسانی ھکانی گلاں لوٹ کرتگ ءُ گوشتگ کہ آ روکپتی بلوچستان ءِ جاورھالانی سر ءَ دلگوش بہ دے اَنت ءُ چوشیں وئیلانی گر ءُ دار ءَ بہ کن اَنت –

دی بلوچستان پوسٹ

ٹی بی پی پتر ءَ سربوتگیں ھالانی رد ءَ ھرنائی ءِ دمگ کوسٹ ءَ اشکرانی کاریز ءَ پنچ کاریز کار چیر تر اِتگ اَنت کہ آھانی تہ ءَ سَے کاریز کار درکنگ بوتگ اَنت وھدیکہ کہ دو چیرتر اِتگ اَنت بلے پد ءَ رند ءَ کاریز کرود ءِ چیر ءَ بیران بوتگ انت ءُ آھانی جون در کنگ بوتگ انت –

وئیل ٹیکدار ملک قمرالدین پانیزئی ءِ اشکرانی کاریز ءَ دیم ءَ اتکگ ، وئیل ءَ کاریزکار اسلام ء بخت اللہ، شیرشاہ ء محمد امین، سید احمد شاہ ء نجب خان، عادل شاہ ء فضل ربی ءُ افتخار احمد ء فرمان ھوار بوتگ انت –

اھوالکار ءِ رد ءَ ھما دمان ءَ دمگی مردماں وت ءَ وئیل جاہ ءَ سر کُتگ ءَ اسلام، شیرشاہ، احمد شاہ چہ کاریز ءَ درکُتگ انت ءُ وھدیکہ دو کاریز کار عادل شاہ ءُ افتخار باز دیر ءَ داں کاریز ءِ تہ ءَ کرود ءِ چیر ءَ بیتگ اَنت ءُ پد ءَ رند ءَ آھانی جون درکنگ بوتگ انت –

دمگی مردمانی گوشگ ات کہ ھما کاریز کار کہ مرگ ءِ آماچ بوگ ءَ پیسر درکنگ بوتگ انت آھانی درکنگ ءَ سرکار ءِ ھچ کمک گون نہ بوتگ دمگی مردماں وتی کمک وت درکرتگ انت –

زانگ بہ بیت چد ءُ پیش ھم ھرنائی ءَ اشکرانی کاریز ءَ چُشیں وئیل دیم ءَ اتکگ انت اے درگت ءَ کارکنوکیں کاریزکارانی گوشگ انت کہ آسراتی ءِ نہ بوگ ءِ سوب ءَ چُشیں وئیلاں آماچ بوتگیں بازیں کاریز کار ءِچہ وتی زند ءَ زبھر بوتگ اَنت –

دشت ءُ تربت ءَ پاکستانی پوج ءِ سر ءَ اُرش کرتگ ءُ شش کارندہ کُشتگ اَنت – میجر گْوھرام بلوچ

دی بلوچستان پوسٹ

سر بیتگیں ھالانی رد ءَ گوستگیں شپ ءَ کیچ ءِ بنجاھی شھر تربت ءَ بالی پٹ ءِ دگ ءَ ناشناسیں مردماں پاکستانی پوج ءِ سر ءَ اُرش کرتگ ءُ چریشی ءَ پاکستانی پوج ءَ جانی ءُ مالی تاوانانی دیمپانی کنگ کپتگ –

ھمے وڑ ءَ مروچی دشت ءِ دمگ جمازی کور ءَ ناشناسیں مردماں پاکستانی پوج ءِ سر بستگ ءُ اُرش کرتگ کک چریشی ءِ آسر ءَ ھم پاکستانی پوج ءَ جانی ءُ مالہ تاوانانی دیمپانی کنگ کپتگ –

دومی نیمگ ءَ بلوچ سلاہ بندیں گل بلوچستان لبریشن فرنٹ ءِ جارکش میجرگوھرام ءَ رسانکدراں شنگ کرتگیں درشانانی تہ ءَ ھردوکیں اُرشانی زمہ واری منّ اِتگ اَنت –

میجر گوھرام بلوچ ءَ وتی شنگ کرتگیں درشاناں گْوشتگ کک مروچی شمبے ءِ روچ ءَ پاکستانی پوج ءِ سَے گاڑیاں ھواریں کاروان ءِ سر ءَ سرمچاراں دشت ءِ دمگ جمازی کور ءَ سر بستگ ءُ راکٹ ءُ دگہ مزنیں سلاھانی گون ءَ اُرش کرتگ – اُرش ءَ ھواریں زورگریں پوج ءِ پنچ کارندہ مرتگ ءُ بازینے زدگ بیتگ اَنت –

میجر گْوھرام بلوچ ءَ گْوشت کہ اے کاروان ایران ءِ سیمسراں ٹٹ ءِ جنگ ءَ روگ ءَ بیتگ اَنت ءُ اُرش ءِ لھتے وھداں پد پاکستانی پوج ءِ جنگی بالگرد اُرش جاہ ءَ سر بیتگ ءُ جون ءُ زدگ بیتگین کارندہ اش برتگ اَنت –

میجر گْوھرام بلوچ ءَ دیمتر ءَ گْوشتگ کہ کیچ ءِ بنجاھی شھر تربت ءِ شھر ءَ بالی پٹ دگ ءَ چاراہ ءِ سر ءَ ھستیں پاکستانی پوج ءِ پانگس ءِ سر ءَ سرمچاراں گوستگیں شپ ءِ ساھت ھشت ءُ بیست دمان ءَ مزنیں سلاھانی گون ءَ اُرش کرتگ ءُ یک کارندھے کشتگ ءُ دو زدگ کرتگ اَنت –

آئی ءَ گْوشت کہ زورگریں پوج ءِ سر ءَ اُرش زیردستیں بلوچستان ءِ آجوئی ءَ برجاہ مان اَنت –

نبشتانک: جنرل اسلم ءِ کاروان

نبشتہ کار: اکیل مراد

ھپتمی بھر

دی بلوچستان پوسٹ

جنرل ءِ جنگ ءَ بلوچستان ءِ کوہ کوہ ءَ سان زوران کرت ءُ مکران ءَ داں سر بیت ھر بلوچ ءِ دپ ءَ تھنا بی ایل اے نامیں گلے ءِ نام شنگ بوان اَت-

بی ایل اے ءِ سان ءَ دگہ بازیں گل جوڑ بیت اَنت ءُ جھد ءِ سپر ءَ جنزان بیت اَنت بلے جنرل ءَ بی ایل اے ءِ دامن مُھر داشتگ اَت ءُ جنزگ ءَ اَت ءُ جنرل بی ایل اے ءَ ھواریں بامرداں دشمن ءِ دیم ءَ چو کوہ ءَ مِک اَت ءُ دشمن ءِ دل ءَ چہ بی ایل اے ءَ ترسے بنا بوت-

اے ھما وھد اَت دشمن ءِ نگاھاں جنرل بلوچ ھان ءِ نام ءَ زانگ بیت ءُ سال ءُ وھدانی گوزگ ءِ ھمراھی ءَ جنرل ءِ کاروان ءِ دامن پَراہ بیان بیت ءُ ڈنی ملک ھم نِی سھیگ بیگ ءَ اِت اَنت کہ بلوچستان ءَ زْرمبشتے ءَ ترومب کرتگ-

سال دوھزار ءُ پنچ ءَ کاروان گیش ترند بیت ءُ سرجم ءَ جکس اِت کہ بلوچستان ءِ آجوئی ءِ گُڈی جنگ بندات بیتگ ھرجاہ ھمے گپ ءُ باوست اَت بلوچانی دل ءَ یک ھنچیں بامردی یے پیداگ بیت کہ آئی ءِ تہ ءَ وشی ءُ وشی اَت-

بلوچستان ءِ کوھانی تہ ءَ پورو نوکیں نوکیں بازار جوڑ بیتگ اِت اَنت کوھانی تہ ءَ ھنچیں ساچست ءُ لزتے ءَ وتی شان ایر کرتگ اِت اَنت اود ءَ گیڈ ءُ تلمبانی چیر ءَ یاگیاں پہ وت ءَ منندی جوڑ کرتگ اَت جنرل ءِ کاروان سبز اَت ءُ جنرل ءَ وتی کاروان ءِ مردمانی تہ ءَ جوان جوانیں ھیلکاری بنا کُرت-

دشمن چہ جنرل ءَ نِی پھک ترسگ ءَ اَت ءُ دشمن ءَ ھم سُک سک بنا کت، اے وَ زانگی گپے کہ جنگانی پژدر چی بنت ءُ آئی ءِ زور کجا سر بنت-

“جنرل سرمتابیں زند “
“کوھی الگر ءُ بامرداں”
“شینکاں جمبری شر گورتگ “
“اُوستے پہ وتی سر داشتگ “

ھَے ھَے کہ جنرل ءِ دِھ دِھ ءَ پہ وتن چِنکس زور ءُ تمردی ءِ شاھوکاری ءَ روان اَت بولان ءِ مُلپدیں کوھاں جنرل ءَ گچینی ءِ ڈکے جوڑ بیتگ اَت سرمچاریں جنرل ءِ بامردی ھمد ءَ سھر ءَ بیت کہ آئی ءَ گِس ءَ گیش کوہ وتی گِس گچین کرتگ اِت اَنت-

اے جنگی بامردیں کمان ءَ وتی سرھیلیں سر ءِ ھچ پرواہ نداشت ءُ جنگ ءِ نیزوریانی تہ ءَ آئی ءِ پرکاری شرتر ءُ سوھو اَت-

“لینن “سامراج اور سامراجی” تاک دیم یک سد ءُ یازدہ ءَ جنگ ءُ انکلاب ءِ بارہ ءَ نبشتگ کنت۔ جنگ ءِ دومی نیمگ ءِ نام اِنت کمک ھمک جنگ وڑے ناں وڑے ءَ راجداری ءَ گوں بندوک بیت ءُ پیداگ بیت ھما رھبند کجام ھم زورے بیت اے زور ءِ تہ ءَ یک لَڑے جنگ ءِ بارہ ءَ بازیں وھدے ءَ روان کنت ھما لَڑ جتائی ءِ رنگ ءَ جنگ ءِ وھداں برجاہ دار ایت ءُ بس کاروائیانی دروشم ءَ مٹ کنت”

اگاں فرانسیسی شھری آشوب ءَ آشوبی دھکانی ھژدمی کرن ءِ گڈسر ءَ اود ءَ شاھی تھت ءِ پروشگ ءَ آشوبی رنگ ءَ پروشگ ءُ جمھوری رپبلک برجاہ کنگ، وتی شاھی کلات ءِ پروشگ ءُ آشوبی کیلو ءَ وتی واجھاں چہ سبک سِک اِتگ اَت-

جنرل ءِ جنگ ھما نام ءَ بندات بیتگ کہ آئی ءِ ڈیھ ءِ راج ءُ راجمان ءِ وشھالی اِنت، ھرکجا اگاں ما بہ چاریں گڑا ڈیھی جنگاں راجدپتر مٹین اِتگ اَنت ءُ وتی راج اش وشھال ءُ آباد کرتگ اَنت اِش-

جنرل ءِ مھکمیں جنگ ءَ بلوچستان ءَ آشوب ءِ بوہ پیداگ کرت اَت سال دوھزار ءُ دوازدہ ءَ جنرل ءَ ماں الجزیرہ چینل ءَ جوان ءُ سسائیں پگر ءُ پُرشانیں رنگے ءَ درشان دات کہ اے جنگ تھنا بلوچ ءِ آجوئی ءِ واستا بیگ ءَ اِنت-

جنرل ءِ بے کچوئیں درشان ءَ جھان ءِ کُنڈ کُنڈ جکسینت ءُ اے کلوہ ھرکسی گوشاں کپت شاھی زوراکانی پروشگ ءَ یک جنگے بندات بیتگ آ جنگ ءِ نام بلوچستان ءُ بلوچ اِنت-

گڑا ھمے درشان ءَ جنرل ھم پدر کنت کہ اے جنگ ءَ تھنا یکے کنگ ءَ نہ اِنت بلکیں بلوچستان ءِ کنڈ کنڈاں چہ بندوکیں ورناہ ءُ کماش ھوار کپتگ اَنت-

جنرل وتی پُرشانیں درشان ءِ تہ ءَ ھم اے گپ ءِ پدراھی ءَ کنت مئے جنگی رھبند ءُ دشمن ءِ جنگی رھبندانی تہ ءَ جتائیں پرک ھست اِنت-

جنرل وتی گپاں ساپ ءُ سلوئیں رنگے ءَ گوش ایت کہ ھمینکس اے جنگ ءَ دشمن مئے سر ءَ زوراکی کنت مئے مردمانی سر ءَ زوراکی کنت مئے چُک ءُ جنیانی سر ءَ زوراکی کنت ما ھمینکدر گیشتر ودان بہ ایں-

جنرل اے گپ ءِ ھم درشانی ءَ کنت، اے جنگ ءِ تہ ءَ دشمن مئے چُک ءُ زالبولانی سر ءَ زوراکی کنگ ءَ اِنت بلے تنی وھدی ما انگت ءَ چوشیں گام چِست نہ کرتگ ءُ آئی ءِ زالبولانی کدر انگت ءَ بیگ ءَ اِنت-

روان اِنت سپر ماں جنرل اسلم ءِ کاروان ءَ دسمبر –

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

شال ءَ ھوار بلوچستان ءِ گوریچی دمگ ءُ گوریچی روکپت ءِ دمگاں سارتی ءِ زور گیش بیتگ ءُ مولم ھشک اِنت، شال ءَ گرم ءِ زور چار رکاڈ کنگ بیتگ ءُ کلات ءَ شش سینٹی گریڈ رکاڈ کنگ بیتگ اَنت –

مولم شناسانی رد ءَ شال ءُ کش ءُ گوری دمگاں ساپیں آسمان ءِ ھواری ءَ مولم سارت ءُ ھشک اِنت ءُ سھب ءَ شھر ءِ گرم ءِ زور چار ڈگری سینٹی گریڈ رکاڈ کنگ بیتگ –

ھمے وڑ ءَ اُستان ءِ گوریچی ءُ گوریچی روکپت ءِ دمگاں مولم سارت ءُ ھُشکی ءِ جاورھال اَنت-

سھب ءَ ژوپ ءَ گرمی ءِ زور سَے، دلبندین ءَ یکے، سبی ءَ چار ءُ ھزدار ءَ چار ڈگری سینٹی گریڈ رکاڈ کنگ بیتگ اَنت –

مولم شناسانی رد ءَ آؤکیں بیست ءُ چار ادارانی تہ ءَ بلوچستان ءِ گوریچانی دمگاں موسم ءِ سک سارت بیگ ءِ گمان اِنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ پھر ءَ ایرانی چیریں ادارھانی کارمنداں یک لوگے ءَ بیڑ برتگ ءُ لوگ ءِ سامان پُرشت ءُ پروش کرتگ اَنت –

اھوالکار ءِ رد ءَ پھر ءِ دمگ رسول آباد ءَ جلیل براھوئی ء ھواستی نامیں مردمے ءِ لوگ ءِ سر ءَ ایرانی چیریں ادارھاں بیڑ برتگ ءُ لوگ ءِ ساز ءُ سامان برتگ اَنت –

اھوالکار ءِ رد ءَ جلیل براھوھی تندورے ءَ کار ءَ اِنت ءُ وتی لاپ ءِ والینگ ءَ کنگ ءَ اِنت –

اھوالکار ءِ رد ءَ جلیل ءِ لوگ ءَ ایرانی چیریں ادارھاں دو ملین “تُمن ” ھم گوں وت برتگ اَنت ءُ لوگ ءِ ساز ءُ سامان پَٹ ءُ ھنڈ کرتگ اَنت –

اھوالکار ءِ رد ءَ جلیل بازیں وھدے بیت مہ نگن پچیں تندوری ءَ کار ءَ اِنت ءُ چریشی ءَ اے سوب زانگ نہ بیتگ –

دمگی مردماں اے جلیل ءِ سر ءَ بیتگیں بیڑ ایر جتگ ءُ چیریں ادارھانی بگیری ءَ زھر درشان کرتگ ءُ گوشتگ کہ چیریں ادارھانی بیڑ ءُ دزی ءَ پد ھم رسانکدر بے توار اَنت –

دی بلوچستان پوسٹ

مستونگ کیڈیٹ کالج ءِ نزیک ءَ دُکانے ءِ تہ ءَ تیرگواری ءِ وئیل ءَ دو برات بیران بوتگ –

سربیتگیں ھالانی رِد بلوچستان ءِ دمگ مستونگ ءَ کیڈیٹ کالج ءِ نزیک ءَ ناشناسیں مردماں دُکانے ءِ سر ءَ تیرگواری کُتگ، تیرگواری آسر ءَ دُکان ءَ نشتگیں دو برات علی احمد ءِ چُک بیران بوتگ انت – تیرگواری وئیل مستونگ ءِ دمگ کلی چکل ھاروان ءَ دیم ءَ اتکگ –

وئیل ءِ ھال ءِ سربوگ ءَ دمگی پولیس ءَ وت ءَ ھما جاہ سر کُتگ ، ھمے گوشگ بوگ انت وئیل پیسری وت ماں وتی دشمنی ءِ سوب ءَ بوتگ –

بلوچستان ءِ بازیں جاھاں وت ماں وتی دشمنی ءِ وئیلانی ھال چاگردی رسانکاجاھاں پیداک اَنت کہ چریشانی سر ءَ بازیں ھردوکیں نیمگاں بازیں مردم زوال بنت –

دگہ یک تیرگواری وئیلے کلات ءَ دیم ءَ اتکگ اود ءَ ناشناساں یک مردمے کُشتگ –

ھالانی تہ ءَ گوشگ بیتگ کہ کلات ءِ دمگ توک میتگ ءَ ناشناسیں مردمانی تیرگواری ءَ نور اھمد ء رسول بکش کیازئی جھمنند توک بیران بیتگ –

وئیل ءَ پد بیران بیتگیں مردم ءِ جون چِست کنگ ءُ دمگ ءِ نادراہ جاہ ءَ سر کنگ بیتگ ءُ اود ءَ آئی ءِ ھژدری چار ءُ ٹپاساں پد آئی ءِ جون کھول ءِ گور ءَ سر کنگ بیتگ –

ھمے وڑ ءَ گوستگیں روچ ءَ شال ءِ رودراتکی شھدگ ءَ اناگتی ءَ تیر لگگ ءِ سوب ءَ علی ء رضا مھمد زدگ بیتگ –

پولیس بنشون ءِ گوشگ اِنت اناگتی درگت ءَ گیشیں پَٹ ءُ پول بیگ ءَ اِنت –

نبشتانک: جنرل اسلم ءِ کاروان

نبشتہ کار: اکیل مراد

ششمی بھر

دی بلوچستان پوسٹ

باج بروکیں راج ھما وھد ءَ باج ءَ برت کنت کہ آئی ءِ تہ ءَ یک ھمسنتیں زورے مان بہ بیت گڑا ھما وھد ءَ زیردستیں راج ءِ دست سر بُرزی ءِ نیمگ ءَ روان کنت ءُ دشمن ءِ چماں آ یک تاکتے جوڑ بیت-

جنرل ءَ کسانیں تاکت ءَ را یک مزنیں نامے ءِ دیگ ءِ بارو ءَ جیڑ اِتگ اَت اے نزوریں تاکت ھنچیں رنگے بہ زور ایت کہ آئی ءِ تہ ءَ دشمن ءِ واب ءُ دراھیں چیز بے سوب بہ بنت-

کوھلو ءِ کوھانی تہ ءَ جنرل ءَ ھواریں سنگتے ءَ گپ کرت کہ ھما وھد ءَ اے جنگ نوک بیتگ گڑا جنرل ءَ مدام وتی سرکلانی تہ ءَ اے گپ ایر کرتگ مارا ھمے جیڑگ لوٹ ایت ما چون ءُ چے پیم یک تاکتے جوڑ بیت کن ایں-

اے تاکت ءِ واستا مارا چنکس گام ءَ دیم ءَ روگ لوٹ ایت ءُ چنکس پند بُرگ لوٹ ایت اے چارگ نہ لوٹ اَنت بس ھما کار ءِ واستا تو درگپتگ ئے گڑا ھمائی ءِ ھاتر ءَ جنزان کن ، نوں تئی تاکت ترا شموشکار بیت نہ کنت آ وت تئی نیمگ ءَ جنزان کنت ءُ تئی تہ ءَ یک زورے ئے زرمبشت جَھ جنان کنت-

جنرل ءِ جَھ جتگیں زرمبشت ءَ کوھلو، بولان بارکھان نہ گپت اَنت بلکیں بلوچستان ءِ بازیں ھند وتی ھم پتار ءَ زرت ءُ ھار ءَ ملان بیت ءُ سال دوھزار ءُ چار ءَ انگت ءَ جنرل ءِ جند کوھانی تہ ءَ چیر جنگے ءِ دروشم ءَ اَت بلے آئی ءِ جھد ءَ گوشگ ئیگ ءَ نِی آئی ءِ جنگ ءَ بلوچستان ءِ میتگ میتگ شھر شھر مان روپان کرتگ اِت اَنت –

بلوچستان ءِ جنگ ءَ ھرچ ناں ھرچ مردمے ءَ یک ناں یک نیمگے ءَ سکین زرتگ اَت ءُ آجوئی ءِ سَر ٹُلان اَت دیمے ءَ اکبر ھان ءِ بامرد کوہ سریگ اِت اَنت ءُ دیمے ءَ جنرل گوں وتی بامرداں زمین ءِ آجوئی ءَ جنگ ءَ اَت-

ھَنچش ھمے سما بیگ ءَ اَت وھد ءَ گیش جنرل ءِ کاروان دیم ءَ روان اَت ءُ اے وھد ءُ زمانگ ءَ ھم مئے نودربری ءِ شوک ءُ شان اَت ما ھم ھمے داب ءَ تھنا بی ایل اے نامیں گلے ایش کرتگ اَت نانکہ آئی ءِ جنگ کنوک دیستگ اِت اَنت نانکہ آئی ءِ جنگانی وھد ءَ آئی ءِ اُرشانی تامر بلے اے مئے گوشاں الکاپ ءَ پُج اِتگ اَت کہ بلوچستان ءَ جنگے بیگ ءَ اِنت-

جنرل ءِ سنگتے گپ جنت ءُ گوش ایت کہ جنرل ءِ تہ ءَ یک مزنیں شیواری ءِ اے بیتگ کہ آئی ءِ جنگانی وھد ءَ پیسر وتی ھمراھانی کَچ ءُ کیلو الکاپ ءَ چکاس اِتگ اَنت ءُ آیانی ھرچ چیز ءِ سر ءَ یک مزنیں نگاھے آئی ءِ بیتگ آ نگاہ جنگانی رپکاری، جنگ ءِ تہ ءَ دم نہ برگ، جنگ ءِ کنگ ءَ رند وتی درایگ ءُ بنجل ءِ روگ اے چیزانی ھیال جنرل ءَ بے کساس گور بیتگ اَنت-

آ گوش ایت جنرل ءِ گور ءَ بلکیں مرگ وَ کسانیں چیزے ءِ ھساب ءَ بیتگ بلے آئی ءَ اے زانت وتی تہ ءَ ودینتگ ءُ وتی دیوانانی تہ ءَ ھم برے برے گوشتگ جنگانی دیم ءَ برگ ءِ واستا ھژدری ایش اِنت زندگ بیگ بلکیں ھنچش وت ءَ زندگ دارگ تنا وھدی تانکہ تئی جنگ یک راھے ءِ سِنچ ءَ روان بہ کنت-

جنگ ءِ تہ ءَ کس ایشی ءَ نہ گند ایت کہ کَے پیسر ءَ کُشگ بیت کَے رند ءَ بلے الم جنگول جنگ ءِ پڑ ءَ مرگ ءَ دیم پہ دیمی ءَ گند اِیت ءُ سما کنت-

جنرل ءَ وتی تہ ءَ اے ساچست ھم ایر کرتگ اَت جنگ ءِ میان ءَ ھچ بر آئی ءِ بَھ ءُ بگڑی نہ بیتگ ھروھد ءَ دشمن ءِ نشانگ ءَ پیسر آئی ءِ تیرکمان ءَ پیسر ءَ دشمن ءِ دلبند ءَ پیوست کرتگ-

تیر کمانیں جنرل ءِ سوھوئیں پگر ءَ تھنا واب بے سرجم نہ کرتگ اِت اَنت بلکیں ھرچ جنگ ءِ میان ءَ دشمن ءَ را وتی جون چِست کنگ کپتگ، سال دوھزار ءُ پنچ ءَ جنگ ءَ پد ءَ وتی دپتر نوک کنان کُرت جنز ءَ مزنیں گامے جَت اے گامانی ھواری ءَ جنرل ءِ سھرائیں گام تچک ءَ مھکم اِت اَنت آئی ءَ وتی سوبمندی ءِ گام سنگتانی دیوان ءَ یک نیادے ءَ کُرتگ اَت ءُ ھمے پُرشانیں رنگے ءَ درشان کرتگ اَت کہ ما داں ھدے ءَ سوبمندی ءِ نیمگ ءَ روان اِیں ءُ اے پگر بلوچستان ءِ کوہ کوہ ءِ پَسہ ءَ کنگ ءَ اِنت-

روان اِنت سپر ماں جنرل اسلم ءِ کاروان ءَ دسمبر –

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بان پیر ڈک ءَ پاکستانی پوج ءِ کارمندے دور جنگیں توپک ءِ گون ءَ نشانگ کُتگ ءُ کُشتگ – میجر گْوھرام بلوچ

دی بلوچستان پوسٹ

سربیتگیں ھالانی رِد ءَ بلوچستان ءِ دمگ تمپ ءَ مروچی ناشناسیں سلاہ بندیں مردماں پاکستانی پوج ءِ پانگس ءِ سر ءَ اُرش کُتگ – اُرش اپسی کھن ءِ دمگ بان پیر ءَ کنگ بوتگ – اُرش ءَ پاکستانی پوج ءَ جانی تاوان رس اِتگ، سلاہ بندیں مردم درآیگ ءُ روگ ءَ سوبمند بوتگ انت –

دومی نیمگ ءَ بلوچ سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ مروچی آدینگ ءِ روچ ءَ اِدار سَے ءُ بیست ءَ مئے سرمچاراں اپسی کھن ءِ دمگ بان پیر ڈک ءَ برجاھیں پاکستانی پوج ءِ پانگس سر ءَ دورجنگیں توپک ءِ گون ءَ اُرش کُتگ – اُرش ءَ یک پوجی کارمندے مُرتگ –

آئی ءَ گوشتگ کہ پاکستانی پوج سر ءَ مئے اُرش ایردستیں بلوچستان ءِ آجوئی ءَ داں برجاہ مان انت –

مسلم ٹاؤن عیسی نگری ءَ پاکستانی پوج ءُ فرنٹیرکور ءِ کاروان تراکناکیں شورانی نشانگ کُرتگ – جئیند بلوچ

دی بلوچستان پوسٹ

سربیتگیں ھالانی رِد ءَ مروچی بلوچستان ءِ بنجاھی شھر شال ءَ ناشناسیں سلاہ بندیں مردماں پاکستانی پوج ءِ کاروان ءِ سر ءَ اُرش کُتگ –

اُرش شال ءَ بروری ءِ دمگ مسلم ٹاؤن عیسی نگری ءَ کنگ بوتگ، اُرش ءِ آسر ءَ پاکستانی پوج ءَ جانی ءُ مالی تاوان رس اِتگ –

اُرش ءَ پد پولیس ءُ فرنٹیر کور ءَ دمگ وتی انگر کُتگ، بلے دنیگت ءَ ھچ وڑیں دزگیریانی ھال نیست –

دومی نیمگ ءَ بلوچ سلاہ بندیں بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں شال ءَ بروری ءِ دمگ مسلم ٹاؤن عیسی نگری ءَ زورگریں پاکستانی پوج ءُ فرنٹیر کور ءِ یک کاروانے ءِ سر ءَ آئی ای ڈی اُرش ءِ نشانگ کُتگ –

جارکش ءَ گوشتگ اے اُرش ءَ زورگریں ءِ پوج ءِ بازیں کارمندے مُرتگ ءُ ٹپی بوتگ اَنت وھدیکہ اُرش ءَ پاکستانی پوج ءِ گاڑی ءَ سک باز تاوان رس اِتگ –

گڈسر ءَ جارکش ءَ گوشتگ کہ مئے جد ءُ جھد آجوئیں ڈیھے ءِ بستار ءَ تاں برجاہ مان اِت –