TBP Balochi

دی بلوچستان پوسٹ

بلوچستان ءِ دمگ پنجگور ءَ پاکستانی پوج ءِ لشکر کشی برجاہ، لشکر کشی ءِ وھد ءَ بمبگواریں بالگردانی تیرگواری ءِ آسر ءَ ھپت مردم بیران بیتگ اَنت –

ھالانی رد ءَ مروچی بیگاہ ءَ کیلکور ءِ دمگ مراد بکش بازار ھَ یک لوگے ءِ سر ءَ بمبگواریں بالگردانی تیرگواری ءِ آسر ءَ چُک ءُ زالبولاں ھوار ھپت مردم بیران بیتگ اَنت –

بیران بیتگیں مردمانی پجار نہ بیتگ اَنت –

زانگ بہ بیت پنجگور ءِ جتا جتائیں جاھاں ھوار نوشکی، کلات ءُ ھاران ءِ کوھی دمگاں چہ گوستگیں روچاں پاکستانی پوج لشکر کشیاں دزبند اِنت کہ اود ءَ جنگی بالگرد ھم بھر زورگ ءَ اَنت –

نوشکی ءُ کش ءُ گوری دمگاں گوستگیں روچاں چہ انگیری ءِ سوب ءَ داں انگت ءَ جانی ءُ مالی تاوانانی ھال سر نہ بیتگ اَنت –

کولواہ ءَ پاکستانی پوج ءِ کاروان ءِ سر ءَ اُرش کُتگ دہ پوجی کارمند کُشتگ ءُ بازینے زدگ کُتگ اَنت – بلوچ خان

دی بلوچستان پوسٹ

گوستگیں روچ ءَ ناشناسیں سلاہ بندیں مردماں آواران ءِ دمگ کولواہ جت بازار ءَ پاکستانی پوج ءِ کاروان ءِ سر ءَ اُرش کُتگ –
اھوالکار ءِ رِد ءَ سلاہ بندیں مردماں پیسر ءَ پاکستانی پوج ءِ راہ ءِ سر ءَ سنگر بستگ ءُ نشتگ بوتگ انت ، اُرش داں دیراں برجاہ بوتگ – اُرش ءَ بازیں پوجی کارمندے مرتگ ءُ زدگ بوتگ اَنت ءُ سلاہ بندیں مردم درایگ ءُ رؤگ ءَ سوبمند بوتگ انت –

دومی نیمگ بلوچ آجوئی لوٹوکیں سلاہ بندیں چار گلانی ھواریں آجوئی سنگر (براس) ءِ جارکش بلوچ خان ءَ وتی شنگ کُرتگین درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ گوستگیں روچ ءَ براس ءِ سرمچاراں پاکستانی پوج ءِ پرپٹ سوار ءُ گاڑیانی سر ءَ سواریں کارمندانی سر ءَ کولواہ ءِ میتگ جت بازار ءَ اُرش کُتگ –
جارکش ءَ گوشتگ کہ اے اُرش ءِ آسر ءَ پاکستانی پوج ءِ دہ کارمند ھما دمان ءَ مُرتگ ءُ بازینے زدگ بوتگ اَنت –

جارکش ءَ دیمتر ءَ وتی درشان ءِ تہ ءَ گوشتگ کہ پاکستانی پوج ءِ سر ءَ ھما وھد ءَ اُرش کنگ بوتگ کہ آ جت بازار ءُ ایندگہ دمگاں پہ لشکر کشی ءِ ھاتر ءَ رؤگ ءَ بوتگ – آئی ءَ گوشتگ کہ اے دمگاں پیش ءَ ھم پاکستانی پوج ءَ زوراکی کُتگ ءُ ھزارانی کچ ءَ لس مھلوک در پہ دری زندے گوازینگ ءَ لاچار کُتگ اَنت –

گڈسر ءَ جارکش بلوچ خان ءَ وتی درشان ءِ تہ ءَ گوشتگ کہ بلوچ سرمچار بلوچ راج ءُ راجی مڈیانی پھازگ ءِ ھاتر ءَ مدامی ساڑی انت – زورگریں پوج ءُ آیانی کمک کاراں ھوار لُٹ ءَ پُلی شوربندیانی بگیری ءَ مئے اُرش برجاہ مان انت –

کولواہ، گچک ءَ ھوار ایندگہ دمگاں پاکستانی پوج ءِ لشکر کشی برجاہ، مروچی سھب ءَ لشکر کشی بندات کنگ بوتگ، لشکر کشی میان ءَ بازیں دمگ ءَ دامگ ءُ رؤگ آھگے راہ ءُ در بند کنگ بوتگ انت –

گیشیں ھالانی رِد ءَ کولواہ ءِ گوریچانی بند ءِ کوھی دمگ مادگ، گٹیں مادگ، جکی کور، ھیرونک ءُ کلگ ءَ لشکر کشی میان ءَ پاکستانی پوج ءَ چک ءُ زالبول ھم لٹ کُٹ کتگ انت ءُ شانزدہ مردم زروانسری آوار جتگ ءُ بیگواہ کُتگ وھدیکے آھانی مال ءُ مڈی دستیگ کرتگ انت –

زورانسری آوار جنگ ءُ بیگواہ بوتگیں مردمانی پجار لیمبو ء دوستیں، اللہ داد ء خالق، دلجان ء مدد، رکّو ء مدد، واھگ ء مدد، بخشو ء غمانی، حیدر ء غلام محمد، بشیر ء کریم داد، دین محمد ء رحمت، حمل ء بشیر، پیر بخش ء مولا بخش، چارو ء حیدر، رشید ء حیدر، غمانی ء گاجیان، امام ء گاجیان ءُ شوکت ء تلاہو ءِ ناماں چہ بوتگ انت ۔

ھمے وڑ پنجگور ءِ دمگ گچک ءَ ھم پاکستانی پوج ءَ رؤگ ءُ آھگے راہ بند کُرتگ ءُ لشکر کشی ءِ بندات کرتگ، دمگ ءَ دامگ ءِ سرا بندش جنگ ءِ سوب ءَ دنیگت ءَ جانی ءُ مالی تاوان ءِ ھال سربوھگ ءَ نہ انت –

بیگواھیں بلوچانی واستا توار چِست کنوکیں گل وائس فار بلوچ مسنگ پرسنز (وی بی ایم پی) ءِ زھرشانی بنجل چہ شال ءَ سندھ ءِ بنجاھی شھر کراچی ءَ برگ بیتگ کہ اود ءَ زھرشانی برجاہ اِنت-

دی بلوچستان پوسٹ

یک دھکے ءَ گیش بیگواھیں بلوچانی واستا توار چِست کنوکیں گل ماما قدیر ءِ سروکی ءَ شال داں کراچی ءُ اسلام آباد ءَ پند اش بُر اِتگ- وھدیکہ ھمک سال ءِ سارتیانی موسم ءَ زھرشانی بنجل کراچی ءِ پریس کلب ءِ دیم ءَ برگ بیت اِنت –

مروچی کراچی پریس کلب ءِ دیم ءَ زھرشانی بنجل ءَ چار ھزار یک سد ءُ شست ءُ ھپت روچ سرجم بیتگ- اود ءَ جتا جتائیں تکاں بندوکیں مردماں ماما قدیر ءَ گوں گند ءُ نند کرتگ ءُ بیگواھیں مردمانی کھولاں گوں پدردی درشان اِتگ –

چہ لیاری ءَ سیادی داروکیں انٹرنیشنل باکسر وسیم ءَ گوں وتی ھمراھانی ھمراھی ءَ ماما قدیر ءِ گون ءَ دوچار کپتگ- ھمے وھد ءَ ماما قدیر بلوچ ءَ گْوشگ اَت کہ زھرشانی بنجل چہ شال ءَ داں کراچی ءَ آرگ ءِ سوب مولمی جاورانی ھوار اد ءَ نندوکیں مردم ءُ کراچی ءِ پریس کلب ءِ زور ءَ میان اُستمانی رسانکدر بیگواھیں مردمانی جیڑہ ءِ دلگوش دیگ اِنت –

آئی ءَ گْوشت کہ بلوچستان ءَ رسانکدر بندشی ءِ آماچ اَنت، شال ءِ پریس کلب ءَ بازیں سالاں زھرشانی ءَ ابید ھم اود ءِ اھوالکار ءَ دمگی روتاکاں ھوار جھانی رسانکدر مارا بے دلگوش کن اَنت بلے ما اُمیت کن ایں کہ سندھ اے جیڑہ ءِ تالان کنگ ءَ وتی کرد ءَ پیلو کنت –

دی بلوچستان پوسٹ

پوجی لشکر ءَ پاکستانی پوج ءَ برزی کمک گون اِنت، گوستگیں روچ ءَ بازیں جاھاں بمبگواریں بالگرداں تیرگواری کرتگ وھدیکہ سلاہ بندیں مردمانی میان ءَ جنگ ءُ چوپانی ھال بیتگ –

دمگی مردمانی رد ءَ پوج ءِ ھمراھی ءَ سرکار ءِ چیردست کمکیں مردم ڈیتھ اسکواڈز ءِ کارندہ جاڑیگ بیتگ اَنت –

وھدیکہ لشکر کشی بازیں جاہ منجرو، ریکو، نیام درگی، مھمدی، سینکری، گوربرات، شور ءُ پارود ءَ داں دراج کش کنگ بیتگ – جنگ زدگیں دمگاں روگ ءُ آیگی راہ ءُ در بند کنگ بیتگ اَنت ءُ ھواریں دمگاں شھدگانی سر ءَ بکتر بند گاڑیاں ھواریں پوجی کارندہ جاہ جاہ ءَ اوشتاتگ اَنت –

دمگی مردمانی رد ءَ پوجی کارندھاں دمگ ءِ ٹرانسپورٹ ھم دستیگ کرتگ ءُ آیانی زور ءَ کوھی دمگاں جاڑیگیں پوجیانی واستا وردنی ساز ءُ سامان برگ ءَ اَنت –

چریشاں ابید اے لشکر کشی ءَ پیسر شمبے ءِ شپ ءَ نوشکی ءِ دامگی ھال بند کنگ بیتگ اَنت ءُ داں گوستگیں روچ ءَ بند بیتگ اَنت –

لشکری بنشونانی نیمگ ءَ لشکر کشی ءِ بارہ ءَ ھچ ھال دیم ءَ نیاتکگ اَنت –

دی بلوچستان پوسٹ

نادراہ جاھاں شریں آسراتی ءِ نہ بیگ ءِ سوب ءَ چار سد جِنکیں ڈاکٹر کورونا وائرس نادراھی ءِ آماچ بیتگ اَنت –

دزاپ “زاھدان ” شھدربرجاہ ءَ درمانجاہ ءِ پروفیسر ھاشمی شھری ءَ گوشتگ کہ چار سد ءِ نزیک ءَ روکپتی بلوچستان ءِ جتا جتائیں جاھاں کارکنوکیں ڈاکٹر کورونا وائرس ءِ آماچ بیتگ اَنت –
ڈاکٹر ءَ گوشت کہ بلوچستان ءِ نادراہ جاھاں نادراھانی جاندراھی ءِ واستا کارکنوکیں ڈاکٹر وائرس ءِ آماچ بیتگ اَنت –

پروفیسر ھاشمی شھری ءَ گوشت کہ اے نادراھی ءَ یک سالے بیت ڈیھ ءُ جھان ءَ کپتگ بلے نادراہ جاھاں پہ نادراھاں شریں تھت ءُ دگہ آسراتی ھم نیست ءُ دار ءُ درمان ھم نہ بیگ ءِ بروبری ءَ اَنت –

آئی ءَ سرکار ءَ چہ لوٹ کرتگ ءُ گوشتگ کہ آ ھما” نرس ” ڈاکٹرانہ واستا گامگیج بہ زور ایت کہ آیاں دگہ انسانی رکینگ ءَ چوشیں کارے ءَ دزمانجن بیتگ اَنت –

نبشتانک: مھروان پدا واتر کن

نبشتہ کار: مھروان کمبر

دی بلوچستان پوسٹ

مھرو!
رولہ ءِ ساھتاں ایر روانیں روچ ءُ گیش بوتگیں تھاری، پہ کتار اُوشتاتگیں ھاموشیں درچک، پہ کدوھاں واتر بیتگیں مُرگ ءُ ویرانیں دریگے ءِ دپ ءِ اُوشتاتگیں من۔
اے ابیتکیں ساھتاں گْوش ئے منی تہ ءَ یاتانی پُرشتگیں کبرستانے آباد اِنت۔ من اے یاتانی کبرانی سر ءَ روگ ءِ جُھد ءَ کن آں، گُڑا منی لبزانی ارواہ چیھانٹ جن اَنت۔ ھما ساھت ءُ دماناں کہ تو ھمراہ اِت ئے، گُڑا ھما ساھتانی کانچیں بیگھاں گوں من کند اِتگ۔ نوں مُدّتے بیت تو ھمراہ نہ ئے، گْوش ئے منی دیم ءَ تھنائی نندوک اِنت کہ ھمُک رولہ ءَ روچ ھمے تھنائی ءِ تہ ءَ اِیر کپ اِیت ءُ ھمُک شپ کِسّہ رج اِیت گوں من ءَ۔

مھرو!
برے برے تئی یات چو بھار ءَ کاینت ءُ من ءَ زندگ بُوَگ ءِ مارِشت ءَ دے اَنت۔ بیا بچار بید ءِ ترا من چینچو ابیتک بوتگ آں، بِِہ گِندئے کندگ ءُ ٹھکّانی جنَگ ءَ بیھال بیتگ آں۔ نوں من بِید ءِ ترا بچکند، وشّی، کرار ، بلکیں ھر چیز شموشتگ اَنت۔وتی میتگ ءَ مرگ ءِ ساھگ ءَ زندگی ءِ پش کپتگیں روچاں گْوازینگ ءَ آں۔ جنگ آماچیں میتگ ءِ ھر ھما دمک کہ منی ءُ تئی کسانی ءِ یات بندوک اَنت۔۔۔ ھمے دمکاں کہ من ءُ تو کسانی ءِ وش تِریں روچ گْوازینتگ اَنت، کْوزہ گیریں لشکر ءِ بکتر بنداں، ٹرکاں، بوٹانی تواراں چہ پچلرز اَنت۔۔۔
ھما اِنت تو کہ چِداں چِہ رپتگ ئے، گُڑا ابیتکیاں مئے کپتگیں، سُتکگ ءُ پُر بوتگیں لوگانی پیژگاہ ءُ مئے دِلانی تہ ءَ چو بوٹ پادیں سپائیانی وڑ ءَ وتی بُنجل کُتگ۔ کبرانی سر ءَ رُوکیں ڈیوا مُرتگ اَنت۔ بندیں دریگ ءُ دروازگاں بے تواری گْوانک ءَ اِنت۔ ابیتکی ءُ بے مھری ءِ تیاب ءَ جان شُشتگیں گْوات ویرانگ چکاریں دمکاں شیکگ ءَ اِنت۔ سال ءُ کرن چو گروک ءَ شھم کنان ءَ گْوزگ ءَ اَنت۔ لوگانی پیژگاہ ءَ لھتیں پُرشتگیں کانچی ٹُکُّر اَنت کہ پشت کپتگ اَنت۔۔۔ وھد ءَ چہ پیسر پیر بیتگیں گونڈوانی لیبوک آیانی چمانی تہ ءَ پُرشتگ اَنت ۔ چاردہ ءِ ماہ ءَ دمبُرتگ ءُ واب کپتگ، بلے من انگت ھما جاہ ءَ کندیلے روک کُتگ ءُ نشتگ آں، بِہ گِندئے۔۔۔

مھرو!
مئے میتگ ءِ ھمُک دیوالاں درد ءِ جمبراں بستگ ءُ دمک ءُ دراں بے تواری ءِ گروک شھمگ ءَ اَنت۔ منی رھچاریں چمّانی درستیں چراگ ودار ءِ برپ بادینتگیں سارتیں گْوات ءِ شیکگاں گوں مِران بَہ اَنت۔ ھر گْور ءَ گم ءُ دردانی آس جمبور اِنت۔ اگاں گیگ ءُ گوم بوت ئے، گُڑا پد ءَ واتر بیا میتگ ءَ چہ کمے گِستا رودراتک ءِ نیمگ ءِ ھما تھنائیں درچک ءِ چیر ءَ نِند اِیں ءُ ناسرجمیں مھر ءِ کسھاں سرجم کن اِیں۔ پد ءَ کسانی ءِ یات ءَ دوبر نوک کن اِیں، مھر ءِ ھما کِسّھاں کہ زمین ءَ گوں بندوک اَنت ءُ ھما کسانی کہ وھد ءَ چہ پیسر آسر بوت۔

مھرو!
اے ساھت ءَ نوں شپ اِنت، ڈنّ ءَ سک سارت ءُ من تئی یاتانی شالے مانپوشتگ ءُ دل ءِ آسدان ءَ گم روک کُتگ ءُ دست تاپگ ءَ آں۔ اے آسریچیں دوریانی موسم ءَ ھمُک شپ من ءَ تئی ءُ زندان ءَ بندیگیں ھمبلانی گم بُن دے اَنت۔ کترہ کترہ چو برپ ءَ آپ بہ آں ءُ شپ ءِ کُٹّ ءَ رِیچاں، ھمے کہ شپ تھار تِر بیت گُڑا بے تواری گیش بوھان بیت۔ اے بے تواری میتگ ءِ بالینتگیں چراگاں کُشان اِنت ءُ بالواں ابیتک کنان اِنت۔

مھرو!
پد ءَ واتر بہ کن بیا کہ زندگی تئی یاتانی وشبوھاں چہ مینتگیں انچیں شھرے، کہ اُود ءَ تھنائی، مُلوری، مُونجائی ءُ ویراندانیاں وتی ھَنکین کُتگ۔ پد ءَ واتر بہ کن بیا کہ من ءُ منی تھنائی ءِ مْیان ءَ انگت تئی واتر بُوَگ ءِ ھیال ءُ تئی پادانی پادبرمش نشتگ اَنت۔ منی کُوٹِی ءِ دروازگ انگت گْوات ءِ شیکگاں گوں پچ بیت ءُ من ءَ منی جیڑگانی دُگنیا ءَ چہ در کنت۔ من انگت ھما پچیں دریگ ءِ دپ ءَ اُوشتاں ءُ ڈنّ ءِ ندارگاں چاراں،زان ئے پرچا؟؟
پرچا کہ تو مُدام گْوشتگ اَت ھردیں من روگ ءَ بہ آں ھمے دریگ ءِ دپ ءَ بِہ اُوشت ءُ من ءَ بچار، بلے نوں نِدارگ بدل بوتگ اَنت۔ بس میتگ ءِ ویرانیں دمک اَنت، ءُ دمکاں لھتیں بوٹ پادیں سِپائیگاں اُوشتاتگ اَنت۔۔۔ کُوٹِی ءَ پش کپتگیں من، لھتیں کتاب اَنت ءُ زندگی ءِ گار بُوَگ ءِ تُرس اِنت۔۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سربیتگیں ھالانی رِد ءَ بلوچستان ءِ دمگ آوارن ءَ پاکستانی پوج ءِ لشکر کشی ءِ چِن ءُ لانچ لس مھلوک ءِ گاڑی ءُ ھشتر ءُ ھر پوج ءَ دستیگ کرتگ انت-

گیشیں ھالانی رِد ءَ آواران ءِ دمگ مشکے، سولیر کولواہ، گچک ءِ درسیں رؤگ آیگی راہ ءُ در پاکستانی پوج ءَ بند کُرتگ انت – ھمے گمان بیت کہ مزنیں پوجی لشکر کشی ءِ کنگ بوگ ءِ گمان انت –

اھوالکار ءِ رِد ءَ پاکستانی پوج ءَ مشکے کوھانی درسیں راہ ءُ در بستگ ءُ نشتگ، وھدیکہ پاکستانی پوج ءَ کولواہ ءُ چپ ءُ چاگرد ءِ دمگانی مھلوک ءِ ھُشتر ءُ ھر وتی دستیگ کرتگ انت –

اھوالکار ءِ رِد ءَ گوستگیں روچ ءَ نوزدہ دسمبر ءَ چہ پاکستانی پوج ءَ مشکے دمگ تنک، چٹوک، وائٹیل کورانی تہ ءَ سنگر بستگ ءُ نشتگ، وھدیکہ آواران ءَ دراسکی آزور کور، پسھیل، ھت ھیل، کیل کور، گوارگو، سولیر پشتکو ءَ رؤکیں ھم کور ءُ کلگاں چہ گوزوکیں راھانی سر ءَ نشتگ –
وھدیکہ کولواہ مادگ ءَ چہ بگر آواران ءَ درسیں مھلوک ءِ ھُشتر ءُ ھر پوج ءَ وتی دستیگ کُرتگ انت –
اھوالکار ءِ گوشگ انت کہ پاکستانی پوج ءِ کولواہ ءُ آواران ءِ روکپتی کوھاں مزنیں لشکر کشی ءِ چن ءُ لانچ کنگ بوگ انت – ھمے درگت ءَ مھلوک ءِ ھُشتر ءُ ھر پیک اپ گاڑیاں پچ گرگ انت ، ھمے وڑ دمگی باجو بوتگیں مردم اواران ءِ کولواہ ءِ نزیکیں پانگساں لوٹائینگ بوتگ انت – تانکہ کوھانی تہ ءَ چارگری ءِ کار آسان بہ بنت –
ھمے وڑ ھمے لشکر کشی ءِ پشدر ءَ گوستگیں دو روچاں چہ دراسکی، آواران ءُ مشکے ءَ چہ گچک ءَ رؤکیں درسیں کور کوھاں گوزوکیں راہ ءُ در بند کنگ بوتگ انت –

زانگ بہ بیت گوست ءَ ھم ھمے رنگ ءَ آواران ءَ ھوار بلوچستان ءِ بازین ھند ءُ دمگاں پاکستانی پوج ءِ لشکر کشی ءُ زوراکیانی ھال چاگردی رسانکدراں پیداک اَنت ءُ سیاسی ءُ چاگردی مردمانی گوشگ اِنت کہ دمگاں رسانکدرانی نہ بیگ ءِ سوب ءَ پاکستانی پوج ءِ زوراکی گیشتر بیان اَنت –

دی بلوچستان پوسٹ

بلوچستان ءِ دمگ کلات، نوشکی ءُ ھاران ءِ کوھی دمگاں ھواریں دمگاں پاکستانی پوج ءِ لشکر ءِ لشکر کشی برجاہ اَنت –

گیشیں ھالانی رد ءَ پوجی لشکر کشی ءِ بندات مروچی سھب ءَ کنگ بیتگ ءُ چریشی ءَ زمینی پوج ءِ ھمراھی ءَ برزی کمک ھم گون اِنت – لشکر کشی ءِ وھداں سلاہ بندیں مردمانی میان ءَ جنگ ءُ چوپانی ھم ھال اِنت بلے چریشی ءِ راستیں ھالانی آیگ ءِ ودار اِنت –

دمگی مردمانی رد ءَ شوروپارود ءُ کش ءُ گوری دمگانی نیمگ ءَ پاکستانی پوج ءِ گاڑی روگ ءَ گندگ بیتگ اَنت – ھمے وڑ نوشکی ءُ ھاران ءِ کوھی دمگ مھمدی ءُ سینکری ءَ ھوار دگہ دمگاں بمب گواریں بالگرد تیرگواری کنگ ءَ گندگ بیتگ اَنت –

پوجی بنشونانی نیمگ ءَ لشکر کشی ءِ ھال ءِ بارہ ءَ تنی وھدی ھچ ھال شنگ کنگ نہ بیتگ اَنت ھمے وڑ پوجی لشکر کشی ءِ سوب ءَ راہ ءُ بند بیگ ءَ جانی ءُ مالی تاوانی ھال سر نہ بیتگ اَنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ پھرہ “ایرانشھر ” ءَ ایرانی پولیس ءِ تیرگواری ءَ یک مردمے بیران بیتگ –

اھوالکار ءِ رد ءَ ھبدہ دسمبر ءِ شپ ءَ ایرانی پولیس ءَ یک بلوچے ءِ سر ءَ تیرگواری کرتگ ءُ کُشتگ –

بیران بیتگیں مردم ءِ پجار افشین آبادیان ء امین جھمنند شھرک پھرہ ءِ نام ءَ زانگ بیتگ اَنت –

اھوالکار ءِ رد ءَ افشین ءِ سر ءَ ایرانی لشکر ءَ ھما وھد ءَ تیرگواری کرتگ کہ آ آروسی دیوانے ءَ واتر وتی لوگ ءَ آیگ ءَ بیتگ کہ پھرہ ءَ آئی ءِ سر ءَ ایرانی پولیس ءَ تیرگواری کرتگ ءُ کُشتگ –

اھوالکار ءِ رد ءَ ایرانی پولیس ءَ افشین ءِ جون آئی ءِ کھول ءِ رسینتگ ءُ مردم بیھار داتگ اَنت کہ افشین ءِ بیرانی بارہ ءَ ھچ گپ مہ جن اِت –

ڈاکٹرانی پوسٹ مارٹم رپورٹ ءِ رد ءَ افشین ءَ یک میٹر ءُ نیم دوری ءَ تیر آئی ءِ سر ءَ جنگ بیتگ اَنت –