راجی شھیدانی کرد ءُ بستار
نبشتہ کار: زھیر بلوچ
دی بلوچستان پوسٹ
ندر بوت اَنت بچ مزاریں گُلزمین ءِ ھاتر ءَ
پہ شھیدی سوگات ءُ گوں ماتی نازینکاں
دنیا ءِ تہ ءَ ھما راج زوت گار بیت کہ آ وتی راجی پجار ءَ گار کنت ءُ باروٹیانی رند پداں کپ اِیت۔ راجی پجار، بزاں تئی زبان، دودمان، گُلزمین ءُ تئی راجی ھستانکی۔ ھمُک راج ءِ پجار آئی ءِ بُنلادی ریشگاں گوں بندوک اِنت۔ ھمے وڑ ءَ بلوچ راج ھم چہ کرناں وتی راجی پجار ءِ رکینگ ءِ ھاتر ءَ جھد کنگ ءُ دیمونی دیگ ءَ اَنت۔ ھمل کلمتی بہ بیت یا مرچیگیں ھمُک بلوچ پرزند کہ پہ گُلزمین ءَ ندر بوگ ءَ اَنت اے دِرچ ھمے ھاتر ءَ برجاہ اِنت کہ بلوچ ءَ وتی گُلزمین ءُ راجی پجار دوست بیت۔ بلوچ زمین ءِ سر ءَ زورگریں زوراکاں مدام ھمے جھد کتگ کہ وڑے ناں وڑے ءَ بلوچ راج ءَ چہ وتی زمین ءُ راجی پجار ءَ بہ سِند اِیت ءُ گستا بہ کنت۔ بلے بلوچ راج ءَ دائم اے زوراکانی بگیر ءَ وتی گھگیری برجاہ داشتگ۔
مرچی ما اگاں بلوچ سرزمین ءِ سر ءَ ھستیں زورگِریں استان پاکستان ءِ روشت ءَ بہ چاریں گُڑا مارا گندگ ءَ کیت کہ اے زورگِر چہ گوستگیں زورگراں باز جُتا اِنت بزاں پیسر ءَ انگریزیں زورگراں ھمے جھد کتگ کہ ما ایردستیں راجانی مال ءُ مڈیاں بُہ پُلین ءُ وت ءَ ازگار بہ کنیں۔ بلے زورگرں پاکستان مئے مال ءُ مڈیانی پُلگ ءَ ھوار مئے راجی پجار ءَ ھم گار کنگ ءِ جھد ءَ اِنت۔ مئے زبان ءُ دودمان ءَ گار کنگ ءَ اِنت مئے زمین ءِ سر ءَ باروٹیاں آرگ ءُ جھمنند کنگ ءَ اِنت دانکہ ما ڈلگ چار بہ بہ این ءُ باروٹیانی دروشم ءَ زندگی بہ کن ایں ءُ ھمایانی رنگ ءَ بہ بہ ایں۔ اے زورگر یک نیمگے بلوچ راج ءِ سر ءَ وتی زور ءَ کارمرز کنگ ءَ اِنت دومی نیمگ ءَ بلوچ ءَ ریپینگ ءَ اِنت۔ بزاں یک نیمگے بلوچ ءِ چُکچینی ءِ تہ ءَ وتی سرجمیں زور ءَ جنگ ءَ اِنت دومی نیمگ ءَ بلوچ ءِ چیر ءَ پُترگ ءُ وت ءَ بلوچ ءِ دوزواہ پیش دارگ ءِ جھد ءَ اِنت۔ یک کسانیں نپے ءِ واستا بلوچ ءَ چہ وتی راجی جھد ءَ دور دارگ ءِ جھد ءَ اِنت۔
بلے مرچی بلوچ راجی جھد ءِ مستریں سوبمندی ھمیش اِنت کہ بلوچ راج ءَ اے زورگریں استان ءِ دراھیں پندل زانتگ ءُ پوہ بوتگ۔ بلوچ ورنا مرچی انچو با سما اِنت کہ زوراک ءَ ھمائی ءِ جند ءِ پندلانی رِد ءَ جنَگ ءُ پروش دیگ ءَ اِنت۔ بلوچ ورنایانی تہ ءَ مرچی دیمونی ءُ کُربانی دیگ ءِ سِنچ مھکم بوتگ۔
مرچی ھمُک بلوچ ورنا پہ وتی راجی آجوئی ءِ ھاتر ءَ کُربان بوگ ءِ واستا ھدوناک اِنت۔ چی ءَ کہ زورگِریں استان ءَ بلوچ راج ءِ سر ءَ ھمینچو زوراکی کتگ کہ مرچی ھمُک بلوچ پُسگ آشنا بوتگ کہ ابید چہ راجی آجوئی ءَ پہ ما ھچ در پشت نہ کپتگ۔ مرچی بلوچ بچ ءُ جنکاں ھوار مئے پیریں مات ھم پہ وتی بچانی شھیدی ءِ سر ءَ پھر بند اَنت۔ وتی تاسپیں بچانی لاشاں گوں نازینکاں مانش ءَ واپین اَنت ءُ موتگ آرگ ءِ بدل ءَ وتی شھیدیں بچاں سالونک کن اَنت ءُ ھالو جن انت۔
مرچی ھمُک بلوچ پُسگاں وتی راجی شھیدانی ارزشت زانگ لوٹ اِیت ءُ آیانی داتگیں دیمونیانی سر ءَ پھر بندگ لوٹ اِیت ءُ راجی شھیدانی سِنچ ءُ لیکہ ءِ رِد ءَ جھد ءِ پِڑ ءَ ھوار بوگ لوٹ اِیت۔
چی ءَ کہ اے دیمونی ءُ کُربانیانی مُز تھنا یک کھول ءُ ھندے ءِ واستا نہ اِنت بلکیں سرجمیں راج ءِ وشھالیں باندات ءِ واستا اِنت۔ مارا مرچی وتی زاتی واھشتاں چہ درایگ لوٹ اِیت ءُ راجی مُچانکی زندمان جیڑگ لوٹ اِیت۔ راجی شھیداں وتی زند، کھول وتی وشی دُرست پہ راج ءَ ندر کتگ اَنت۔ دانکہ مئے آیوکیں پدریچ چو مئے وڑ ءَ ایردستی ءِ ساھگ ءَ زند مہ گوازین اَنت۔
انچو کہ مئے گوستانک ءَ مارا گھگیری ءُ دیمونی ءِ درس داتگ انچو مارا وتی آیوکیں پدریچ ءِ سر ھم بُرز کنگی اِنت ءُ آیانی واستا ھم ھمے پیام ایر کنگی اِنت کہ پہ وتی گُلزمین ءُ راجی پجار ءِ رکینگ ءِ ھاتر ءَ ابید گھگیری ءَ ھچ راہ نیست ءُ راجدپتر ءِ تاکاں نمیران بوگی اِنت۔
من جزماں مئے راجی شھیدانی واب الم سرجم بیت ءُ مئے گُلزمین چہ اے باروٹی زوراک ءَ آجو بیت۔
راجی شھیداں دروت ندر کن آن ءُ اھد کن آں دانکہ زندگاں وتی راجی شھیدانی ملپداں جُنزاں۔ بلوچستان آجو بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
