نبشتانک: تھاری ءُ منی زند
نبشتہ کار: فضل بلوچ
دی بلوچستان پوسٹ
من ءَ تَھاری سک باز دوست بیت منی زند ءِ تہ ءَ تھاری سک باز ارزشت دار اِیت ءُ پد ءَ تھاری ءِ مارگ ءِ وتی یک لزتے ھَمُک مردم پْوہ بوت نہ کنت تھاریگ ءَ آ یک نہ وشیں شے یے سرپد بیت تھاری ءِ کِسّہ کنگ نہ بیت کہ آئی ءِ تہ ءَ نندگ ءُ وتی جند ءِ گْون ءَ گپ کنگ دِگہ یک لزتے دار اِیت پد ءَ تھاری ءَ گوں من ءَ سک مھر اِنت، منی زند ءِ تہ ءَ تھاری سک باز رند ءَ اتکگ، منی زند پیسر ءَ چو تھار نہ بوتگ بلے مرچاں سک تھار اِنت چہ بے مھریں مھُرل ءَ منی زند ءِ تہ ءَ یک رندے وشّی آرت ءُ آ وشی ءُ وشھالی چو یک روکیں کندیلے ءَ روک اَت بلے اِے وشّی آ پیم وش نہ بوت چہ بے مِھری ءِ آسر اَت۔
وھدے کہ شپ بیت من ءَ سک وشّی بیت من ودار کن آں کہ کدی شپ بِہ بیت من انچو ودار کن آں کہ شپ کدیں کیت انچُش کہ یک مکّھیں ماتے وتی کسان سال ءُ بْیگواھیں بچ ءِ وداریگ ءَ بِہ بیت کہ کد منی بچ آجو بیت، ھمے پیم ءَ یک نرمزاریں بَچّے وتی سرڈگار ءِ آجوئی ءِ ودار ءَ بہ بیت، انچش کہ یک مِھر ءِ مُریدے وتی مِھرل ءِ آیگ ءِ ودار ءَ بِہ بیت وھدے کہ شپ بیت گڑا من تھاری ءِ آماچ بہ آں ءُ نند آں تھاری ءِ تہ ءَ جْیڑگ بِندات کن آں تھاری ءِ تہ ءَ نندگ ءُ ایوکی ءَ جیڑگ، سک باز وشّ اِنت، اِے لِزت ءِ تام ءَ ھما مردم زانت کہ آئی ءَ تھاری ءَ گْوں مِھر کرتگ وھدے کہ شپ بیت شپ ءَ من ءَ رژنائی ھچ وش نہ بیت، بس منی چم مدام تھاری ءَ گندگ لوٹ اَنت پرچاکہ اے زند ءِ تہ ءَ رژنائی ءَ ھچ لزت نیست منی دل گُشی انچو کہ منی دل تھار اِنت انچو کُل جھان تھار ءُ سیاہ بوتیں پرچہ کہ تھاری ءُ سْیاھی منی زند ءَ گوں بندوک اَنت۔
تھاری ءَ دگہ یک وشّی ءُ زیبائی یے مان اِنت، منی زند تھاریں شپ ءِ وڑ ءَ اِنت، بس من زندمان ءِ تہ ءَ ایوک ءَ من آں، شپ اِنت ءُ تھاریں شپ من ءَ دوست بیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔