راجی جنگ ءُ بلوچ زالبول
نبشتہ کار: ماھروچ بلوچ
دی بلوچستان پوسٹ
گِند ئے اِے گپ ءِ سر ءَ ھچ شک نیست کہ مرچاں تیوگیں بلوچ گُلامی ءِ ھلاپ ءَ آگاہ اِنت۔ بلوچ راج پہ وتی راجی آجوئی ءَ دژمن ءِ ھلاپ ءَ گوں یک مُھکم ءُ سوبمندیں جنگے ءَ دژمن ءَ پّروش ءَ دیان ءَ دیم ءَ بران اِنت۔ اے جنگ ءِ تہ ءَ دژمن ھرنیمگے ءَ بیرانی ءِ آماچ اِنت۔ اگاں ھورت بچار ئے اے راجی جنگ ءِ تہ ءَ بلوچ زالبولانی ھم یک بلاھیں بھرے ھست پرچا کہ راج ءِ تہ ءَ دژمن ءِ ھلاپ ءَ نپرت زالبولاں ودی کنائینتگ ءُ اِے نپرت ءِ آس روچ ماں روچ جمبور ءُ روک بوگ ءَ اِنت۔ چوناھا بے زالبول ءِ ھمراھداری ءَ دنیا ءِ ھچ راجی آشوب ءُ آجوئی ءِ جُھد سوبین نہ بیتگ اَنت پرچا کہ زالبول راج ءِ نیم بھر اِنت پمیشکا راجی آشوب ءُ بلوچ آجوئی ءِ جنگ ءَ بلوچ زالبولاں ھم بھر زُورگ لوٹ ایت ءُ ماشااللہ ما گوں پھر ءُ ناز ءَ گْوش ایں کہ مئے بلوچ راج ءِ گْوھار بلوچ راجی آجوئی جنگ ءَ ھوار اَنت ءُ شریں وڑے ءَ بھر ھم زُورگ ءَ اَنت پمیشکا شُما ھرکَس ماں اِے راجی جنگ ءَ بھر زُرت کن اِت۔ شما ھم اے راجی جنگ ءَ گوں راجی سرمچاراں ھمدست ءُ ھمکوپگی کُت کن اِت۔ گِند ئے۔ ما شُمارا اے وَ نہ گْوش ایں کہ شما دْراہ تُپنگ چست بِہ کن اِت۔
گْوشگ ءِ مُراد تھنا ایش اِنت کہ شُما وتی وس ءُ واک ءِ رِد ءَ راجی سرمچارے بوت کن اِت بلے اِے درگت ءَ ترا کمیں وتی چمّ ءُ اگل پچ کنگی اِنت۔ ترا پہ راجی آجوئی ءَ کار کنگ لوٹ ایت کہ آ توری راج ءِ تہ ءَ دُژمن ءِ ھلاپ نپرت ودی کنگ ءِ کار بہ بیت، توری تُپنگ چِست کنگ بہ بیت یا توری زُبان دوستی ءُ راجدوستی بہ بیت، بزانکہ ھر وڑ ءُ دْروشم ءَ زالبولاں وتی براتیں سرمچارانی ھمکوپگ بوگ لوٹ ایت۔ شمارا وت ءَ اے مُھکمیں جُھد ءَ ھوار کنگی اِنت، پْروش نہ ورگی اِنت۔ گند ئے شُمئے راجی زمہ واری تھنا راج ءِ تہ ءَ زانت ءُ سرپدی ودی کنگی اِنت کہ بلوچ یک جُتائیں راجے ءُ ما گوں پنجابی ءَ ھچ وڑیں سْیادی ءُ نزیکی نہ دار ایں، بلوچ ءِ وتی جتائیں سرڈگار، رواج ءُ شاھگانیں زُبان ھست اَنت پمیشکا ما وتی ڈیھ ءِ آجوئی ءُ وتواجھی لوٹ ایں۔ گُڑا باید اِنت بلوچ راج پہ وتی پجّار ءُ ھستی ءِ واست ءَ یکجاہ، ھمکوپگ ءُ یکمُشت بہ بیت۔
اِے درگت ءَ بلوچ زالبولاں وتی راجی زمہ واری ءُ کِرد دلگوش کنگی اَنت۔ ھاس ما گوں کالج ءُ یونیورسٹی ءِ نودربراں دزبندی کن ایں کہ شما راج ءِ اُمیت ءُ باندات ءِ رھشون اِت۔ وتی موبائلاں پہ وھد ءِ زوالی ءُ ٹِک ٹوکاں ناں بلکیں پہ زبان دوستی ءُ راجدوستی ءَ کارمرز بکن اِت۔ چہ دُرستاں پیسر بلوچی دَرونت ءُ راجدوستی نبشتانکاں وانان ءَ وت ءَ راجی زبان ءِ سرمچار جوڑ بہ کن اِت۔ سرمچارے ءِ وڑ ءَ ھر روچ بلوچی وانگ ءُ دربرگ ءِ جُھد بہ کن اِت۔ وت ءَ راجی زبان ءِ شریں نبشتہ کار ءُ شائر جوڑ بہ کن اِت کہ شمارا راج آگاہ ءُ سرپد کنگ لوٹ ایت تو گجر ءُ پنجابی ءِ گُلام ئے، پارسی ءُ اردو ءَ تئی زُبان لگتمال کُتگ ءُ ھمے بے زبان ءِ وانگ ءَ تو گار بوگ ءَ ئے۔
چوناھا بلوچ یک بیرگِریں راجے پمیشکا باید اِنت ما آ دِگہ اردو، پارسی، سندھی ءُ سرائیکی ءِ وڑیں زُباناں چہ بلوچ راج ءِ دپ ءَ گار ءُ بیگواہ بِہ کن اِیں کہ ھمے زباناں مئے بلوچی زبان ءَ تاوان داتگ۔ البت ما یک گپے گْوش ایں کہ انگریزی زبان ءَ الم بہ وان اِت کہ انگریزی یک میان اُستمانی زبانے انچوشکہ توری میڈیکل سائنس ءُ انجینئرنگ بیت یا کارجاھی ءُ کارگِسی کار بہ بنت انگلیش ھرجاہ یک بلاھیں ارزشتے دار ایت پمیشکا دنیا ءِ راجانی دیمروی گوں انگریزی ءَ وازمندگ اَنت ءُ مارا ھم تھنا انگریزی ءُ وتی جِند ءِ راجی زبان وانگ ءُ نبشتہ کنگی اَنت۔ گِند ئے ما دژمن ءِ زبان ءَ مہ وان ایں ءُ وتی وھد ءَ زوال مہ کن ایں پرچا کہ دژمن وتی جِند ءِ زھگاں انگلش میڈیم ءَ وانین ایت ءُ مئے زبان ءَ گوں اردو ءُ سندھیاں گار کنت۔
شالا زبان دوست، راجدوست بات اِت۔ آزات ھیالیں بلوچ ءُ راجمستری ئیں بلوچستان شالا دیمروی بہ کنات۔ شالا انچوش بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-