سرگوست ءِ ھیروپ
نبشتہ کار: برزکوھی
رجانکار: مھروان کمبر
زمین ءِ وتواجھی ءُ آجوئی ءِ پیمیں گوھر کیمتی ءُ جتائیں مکسدے ءِ واستا وت ھیشی سرانی ببا دیگ ءِ کار تھنائیں ءُ ابید سانمندیں ٹِکے ءِ کش ءُ گور (چاگرد) ءِ ترگ ءَ چہ ڈن بیت ءُ مچی ءِ شھزانتی (فلسفہ) ءِ بنکی مارشتاں دست جنت ءُ ابدی رکینگ ءِ مارشتانی رنگانی تہ ءَ ھوار بیت۔ اے یک انچیں کارے کہ ھستانک ءِ ءُ بنیادمی زند ءُ زندمان ءِ ءُ پجار ءِ رکینگ ءِ ھلاپ ءَ زنگی ئیں ءُ بندیں تھتگ ءِ کُبل ءِ پروشگ ءَ گوں گواچنیں زندمان ءِ کُلہ (تاج) ءَ وتی نام ءَ کنت، گلامی ءُ ناراھی ءِ تنگی ءَ چہ رس اتگین ءُ گوشتگیں گپاں چو ارزن ءُ جو ءِ پیم ءَ کربانی ءَ مھر ءُ پائیداری ءِ وڑ ءَ پیش کنت ءُ زمین ءِ لاپ ءَ چہ در آتکگیں ھستی(سپوت) زند ءُ مرگ ءِ سرجمیں ھیالی ءُ پشتانکی چیزاں چہ وتی کارست ءَ نیست ءُ بے بزانت کن اَنت ءُ دگہ یک نوکیں لیکہ ءُ شھزانتی یے کہ راجدپتر ءِ تاج ءِ سر جوڑ کنگ بوتگ اَت ،بے شک اگاں مرچی “سارتر” زندگ بوتیں گڑا آئی ءِ ھستانکی شھزانتی (وجودی فلسفہ) کردانکی دابے ءِ پیشدارگ ءِ سر ءَ اجکھی ءُُ وشھالی ءِ مچیں مارشتانی تہ ءَ ھوار کپتگ اَت،پرچاکہ کہ پجار ءِ نزوری(epistemological crisis) ءُ ھستمان ءِ زندگ بوگ ءِ بنکی پگر ءُ شھزانتی ءَ چہ سرچکار ءُ مچی ءِ سربرزی ءُ سوبمندی ءِ دیم ءَ مکیں جیڑہ چو نزورین ءُ ڈیھ ءِ پدائی شھزادگیں برات ءُ گھار راجدپتر ءِ تہ ءَ گوں جوانیں گال ءُ سسایاں یات کنگ بنت ءُ مدام نمیران ءُ ھست بنت ءُ نمیران بوان اَنت۔ آپریشن ایروپ ءِ پدائیانی کسو ھما چاگردانی کش ءُ گور ءَ تر اَنت، راجی ءُ مچی پگر ءُ زانت ءُ زانشت ءَ یک جتائیں سوگاتے دات کرت کنت، بزاں مچی ءِ پجار ءُ ھستمان ءِ رکینگ ءِ واستا کربان بوگ ءُ ھلاس بوگ ءَ پد نمیران بوگ ءُ گوں ھمے ساہ ءَ گواچنی ءِ زندگ بوگ انت۔
وھدے گوادر ءِ تیاب ءِ لَمب ءَ بیگاہ ءِ ساھگ سُھر ءُ زردیں رنگاں امباز کنت گُڑا اے وڑیں دلکش ءُ براھداریں ندارگانی چارگ ءَ ھر زندگیں ارواہ وت ءَ پشت نہ گیج ایت. تیاب ءِ سر ءَ بالیں آجوئیں مُرگانی گندگ ءَ اَنچو گُمان بیت کہ ازمکارے ءَ وتی ازم ءِ درانگازی ءَ آزمان ءِ کینوس ءَ رنگانی گُبار شِنگینتگ اَنت یکشلیں چولانی روانی بے توار ءُ اُوشت آماچیں ارواہ ءَ سرگم ءُ سُر دے اَنت ءُ یک ءُ دومی ءَ گوں ھمتران بہ اَنت۔تریں ریکانی سر ءَ نرم ءُ نازرکیں پاد ءُ کدماں ماھل، وتی آسک وابیں چمّانی تہ ءَ ھزاراں ھار ءُ ھیروپ ءُ وابانی زِر، ءُ وتی وتن ءِ بے کچ ءُ کساسیں مھراں گون سریچیں سیمسراں ھما دیم تیاب ءِ لمب ءَ کیت ءُ نند ایت. آئی ءِ دست ءَ میکسم گورکی ءِ گدار ” مات” اِنت ءُ گدار ءِ بُنجاھی کارست پاول ولاسوف ءِ مات ءِ بے مٹ ءُ بے مُلیں جد ءُ جھد ءِ پھمگ ءَ پد وتی زیباھیں چمّاں زر ءِ نیمگ ءَ شانک دنت۔ دُور زِر ءَ یکدار ءِ زاھر اِنت کہ میزان میزان ءَ تیاب ءِ نیمگ ءَ چول وران ءُ پیداک اِنت. یکدار ءَ سواریں بلوچ ناھدا ءِ چمّانی ابیتکی، زُبان ءَ امبا ( ناھدایانی سوت) ءُ دل ءِ دریکگاں پھمگ ءُ ھمت ءُ توکل ءِ چیدگ، با سمائیں ماھل گوستانک ءِ روانی ءَ مٹ ءُ بدل کنگ ءَ جیڑان بیت ءُ پاد کیت ءُ وتی ھستی ءِ شوھاز ءَ درکپیت۔ سرڈگار ءِ مھر ءِ ھیالی ءُ دودی ارواہ ءَ را کرد ءِ پوشاک گور ءَ دیوکیں ماھل دیمھونی ءِ مارشتاں دل ءَ زوریت ءُ بے تواری ءَ دیم پہ مھیم ءَ رھادگ بیت، اے سپر داں گُڈی کنارگ ءَ ماھل ءِ پگر ءُ شھزانتی ءِ ھون ءَ چہ سیر آپ کنوکیں آؤکیں پدریچ ءِ وشھالی ءُ ڈیھ ءِ سربلندی ءِ ھاتر ءَ جنزان کنت-
ھمت ءُ جوزگ ءِ دروشم، ھیروپ چکاریں دیدگاں گوں ماھل دو سال پیسر بی ایل اے ءِ بھر جوڑ بیت مُچی ءُ ھستانکی ءُ دودمان ءُ پجّار ءِ زندگ دارگ ءِ ھاتر ءَ سالے ءَ پد مجید برگیڈ ءَ ھوار بیت، گوں رازداری ءُ ھاموشی ءَ وتی سسّا ءَ سوھان کنان ءَ پہ وتی مِشَن ءَ ودار کنت، وھدے آئی ءَ مشن ءِ سرجم کنگ ءِ ھاتر ءَ ھال ءُ اھوال کنگ بیت گُڑا آ بلوچ راجی گھگیری ءِ گوستانگ ءَ نوکیں درے ءِ نبشتہ کنگ ءَ آپریشنل کمانڈ ءَ گُشیت: ” منی بلاھیں واھشتے کہ من وتی گُڈی مشن ءِ سرجم کنگ ءَ تھنا مہ رواں، بلکیں من ھمے لوٹاں کہ وتی ھمراھانی ھمکوپگی ءَ برو آں وتی گُڈی مشن ءَ سرجم بہ کناں. پرچا کہ من ھمے پھماں کہ مئے تہ ءَ اے سنچ ءُ بود ھست کہ ھمراھانی ھمکوپگی ءَ دُژمن ءِ گرور، اِزت، ھوسلہ ءُ تاکت ءَ ھاکاں ھوار بہ کناں. چھر ءُ شُبین ءَ در ءُ سما چہ سرچکار اے لبزانی پھمگ ءَ تھیوریٹیکل پریم ورک ءِ تہ ءَ چارگ ءِ بدل ءَ اگاں بلوچ راج ءِ تب، مُچی پِگر ءُ گوستانکی دروشم ءَ بچاریں گُڑا راستی وت پدر بیت، بانڑی، گُل بی بی ءُ ماھی بیبو ءِ پِگر بلوچ سرڈگار ءِ شیرزالانی زانت ءُ زانگ ءَ ھمگرنچ اِنت کہ ھچ وڑیں تاکت آیاں داشت نہ کنت، ھمل جیھند ءِ ھاک ءِ وارس نو آبادکاریں تاکتانی بگیر ءَ جنگ کنگ ءُ وتا سرڈگار ءِ آجوئی ءَ کُربان کن انت ماھل ءِ اے گپ گِھگیری زرمبشت ءَ پہ نوکیں جزبگ، نوکیں جوڑشت ءُ یک نوکیں کشکے ءِ پجار ءَ کن انت، اے ھبرانی سر ءَ اَمل کنگ ءَ ترا سما ءِ گُڈی سیمسراں سر بوھگی اِنت ءُ مکسد ءِ گون ءَ سد در سد آشنا بوھگی اِنت، کْوھنیں دیدانک ءِ مٹ کنگ، جنگجاہ ءِ زنگ زرتگیں تھتگ ءِ کُبل ءِ پُروشگ ءُ راجی جنز ءِ مِنُک (ستون)ءِ نوک جوڑ کنگ ءِ واستا ءُ نوکی ءُ لشکری شریانی سر ءَ ھیال ءِ گور کنگ ءَ ماھل آپریشن ھیروپ ءِ تہ ءَ وتی ایندگہ کامریڈیں ھمراھاں گوں مشن ءِ بندات کنگ ءِ واھگدار بیت ءُ سوبمندی ءِ ھمراھی ءَ وتی راجی زمہ واری ءَ ھم پیلو کنت۔
گوں گوستانک ءُ زرمبشت ءَ گیشیں مھر، راجی زرمبشت ءِ تہ ءَ مٹیانی لوٹ ءُ گوستانک ءِ تہ ءَ پجار ءِ چہ تباھی ءَ پھریزگ ءِ نگاہ آئی لیکہ ءَ پدر اِنت، بزاں کہ وھدے آئی ءِ گل ءِ پنام گچین کنگ ءِ گپ بیت گڑا آ کردستان ءِ پہ آجوئی ءَ سلاہ بندیں جھد کنوکیں گل کردستاں ورکرز پارٹی ءِ ( PKK ) ءِ پدائی Zeynep Kinaci پنام زیلان کرد ءِ پنام زیلان ءَ گچین کنت، کردستان ءِ آجوئی ءِ زرمبشت ءَ ھوار پہ آدگہ نزوریں راجاں Zenep Kinaci گھگیری ءِ چیدگ ءِ پیم ءَ زانگ بیت، زیلان کُرد، کرد راج ءِ پہ آجوئی ءَ ترکش لشکر ءِ سپاھیگانی بگیری ءَ 30 جون 1996 ءَ پدائی اُرش کرتگ ءُ پہ مدامی نمیران بوتگ۔
کردستان ءِ گھگیری (مزاحمت) ءِ چیدگ ءَ آشنا، بلوچ راجی جنز ءَ میاں استمانی تک ءَ برجاھیں ایندگہ آجوئی ءِ واھگداریں راجاں، ھاس کرد راج ءَ گوں آشنا کنگ ءِ ھاترا ماھل بلوچ زیلان کرد ءِ نام ءَ گچین کنت، وھدے آ جست کنگ بیت تو اے پنام پرچہ گچین کتگ گڑا آ گشیت ” من کردستانءِ آجوئی ءِ جھد ءَ ھمگرنچیں جھدکاراں اے کلوہ ءَ دئیگ لوٹاں کہ ما اوں آیانی وڑیں دلیر ءُ نترسیں راجے ایں ءُ آجوئی ءِ ھاتر ءَ گوں دژمن ءَ جنگ ءَ ِانت، من آیاناں وتی ِکرد ءَ چہ بلوچ راجی جنز ءِ بابت ءَ سرپد کنگ لوٹاں”اے گشتن آئی ءِ زانت ءُ زانشت ءُ سما ءُ سرپدی ءَ پدر کنت۔ بلے وھدے گشتگیں گپ کتگیں کار ءِ دروشم ءَ دیم ءَ مئیت گڑا وتی جند ءِ وش کنگ ءَ ابید مچانکی پگر ءُ جنگ ءِ میدان ءَ رژنائی ءِ شھمے بکش ات نہ کنت۔ برازیلءِ نامداریں وانگءُ زانگءِ زانوگر پاولو فریرے وتی کتاب pedagogy of the Oppressed ءِ تھ ءَ ھم گپ ءَ dialogue ءَ praxis کار(عمل) ءِ نیمگ ءَ برگ ءَ پہ گش ایت، “داں وھدے گشتگیں گپ پٹ و پول ءُ کرد ءَ گوں ھمگرنچ مہ بنت گڑا آشوبے اتک نہ کنت” ۔ ماھل اے راستی ءَ پھمیت ءُ کربانی ءِ راہ ءَ جنزان بیت ءُ داں ابد نمیران بیت۔ بلوچ ءِ تب جنگ ءِ بنجاہ ءُ منزل ءِ آتراپ ءَ مدام نزیکی کنت،ایشی ءِ بنکی سبب بلوچ راجی دپتر ءَ بوتگیں ویل ءُ واکیا انت۔ کہ آبادکار ءِ بگیر ءَ مدام راج ءِ کنگر وتن ءِ رکینگ ءَ سلاہ بند بوتگ انت، دومی تک ءَ جنین ءُ مردین ءِ تپاوت ءَ چہ آجو ءُ بالاتر بوھگ انت۔ پانزدھمی کرن ءَ( ع) دھلی ءِ سر ءَ ارش ءِ وھد ءَ چاکرخان رند ءِ گھار بانڈی ھم لشکر ءِ ھمراھی ءَ سر گیپت گوں دلیری ءَ دژمن ءَجنگ کنت۔ بلے رند ءَ انگریزانی آپیسر سنڈیمن ءَ بگر داں پنجابی نوک آبادکاراں (colonial discourse) بیا نیکراھی مکتب ءُ بینکنگ وانگی راھبند ءِ وسیلگ بلوچ راجی پجار، ھواریں تب، دود ءُ ربیدگ ءُ ادب ءَ اسرمند کنت، “فرانز فینن” ءِ گشگ ءِ رد ءَ آبادکار وانگی راھبند ءَ ٹریپ ہاوس ءِ وڑ ءَ کارمرز کنت داں ایردستیں راج ءِ پدریچ وتی زگریں پجار ءُ راجی تب ءَ چہ آشنا مہ بنت۔
نیکراہ ءِ بابت ءَ کینیا ءِ نامداریں نبشتہ کار ءُ گدار نویس گوگی و تیانگو ءِ تہ ءَ درائین ایت “نوک آباد بوتگیں ترام ءِ مھکم دارگ ءُ وتی لٹ ءُ پلی ءِ سوبینی ءِ ھاتر ءَ آبادکار نیکراہ ءَ سلاھے ءِ دروشم ءَ کارمرز کنت داں ایردستیں راج ءِ بنکی پگر ءُ پلسپہ ءَ ھلاس بکنت”۔ بلے بلوچ گھگیری ءِ جنز ءَ گوں ھواریں سنگت باسمائیں رنگے ءَ دژمن ءِ بدیں واھگاں گٹگیر کنان انت۔ ھمے وانگجاھاں چہ درآوکیں بلوچ ءِ شیرزال ماھل کالونیل ڈسکورس ءِ داتگیں ٹیکیاں مان نیار ایت ءُ بانڑی، گل بی بی، سمّو ءُ شاری ءِ رندپداں جنزان بیت، آ ھمے چیز ءَ پدر کنت کہ گھگیری ءَ نوکیں جوڑشت ءُ ھواری بلوچ راج ءَ decolonized کنگ ءِ ھاتر ءَ کربان بوھگ راجی زمہ واری یے۔
بیست ءُ پنچ اگست ءِ بیگاہ ءَ ایس ٹی او ایس ءُ پتھ اسکواڑ ءِ ھشت سد دلیر ءُ نہ تُرسیں پُسگ کہ آ جنگی کار چال، رپک ءُ ھُنراں چہ سرچکار اِت انت پراہ ءُ شاھیگانیں بلوچستان ءِ سیزدہ دمگاں، چل ءُ چار جتا جتاھیں نشانگ بزاں وتی ٹارگٹ ءِ نیمگ ءَ در کپ انت. نوکیں جنگی سلاھاں چہ سنجیں وتن ءِ نہ تُرسیں شھزادگ Coordinative اُرشانی ھمرائی ءَ دُژمن ءِ لشکری بنجل(تزویراتی تنصیبات) پانگس، مادن بروکیں گاڑی، دُژمنیں لشکر ءِ کارمند ءُ ایندگہ سرکاری بُنجلانی سر ءَ یکشل ءَ اُرش کن انت. دگاں بند اَنت ءُ دُژمن ءِ چیریں کارمنداں کُش انت۔
یکیں وھد ءِ اے اُرشاں، دگ بندیاں ءُ کارشونی اُرشاں چہ بے سما دومی نیمگ ءَ بیلہ ءِ ساچ بے تواری ءِ جُھلیں زر ءَ ایر بُک اتگ اَت. مردم، مُرگ وتی لوگ ءُ کُدوھاں وپتگ اِت انت ءُ دگہ نوکیں شُد کشیں، ویل آماچ ءُ گُلامیں بانداتے ءِ بارو ءَ جیڑگ ءَ اِت انت کہ تُرندیں تراکے ءِ توار ءَ بیلہ ءِ بے تواری پروش دات. تراک ءُ تیرانی توار ءَ دُژمن ءِ لشکری کارمند جھسر اَنت ءُ یکیں دمان ءَ بلوچ پُسگانی توپکاں چہ در اَتکگیں تیرانی آماچ بہ اَنت ءُ زمین ءَ کپ انت. پدائی ماھل شش سد کلو شوروھاں چہ پُریں گاڑی ءَ دُژمن ءِ بُنجل ءَ ڈیک دنت ءُ پہ مُدامی زمین ءِ ھاک ءُ گوات ءِ تہ ءَ چو وشبو ءَ ھوار بیت ءُ نمیرانی ءِ تاج ءَ سر ءَ کنت. لھتیں دمان ءَ پد دومی نیمگ ءَ پدائی رِزوان چار سد کلو شورو ءَ پُریں گاڑی ءَ دُژمن ءِ بُنجل ءَ جنت ءُ گوستانک ءِ تاکانی سر ءَ پہ مُدامی زندگ بیت. دُژمن ءِ سنگر گرگ ءَ چہ پیسر پنچ پدائی دومی راہ ءَ چہ بُنجل ءِ تہ ءَ پُتر اَنت ءُ ٹوھیں اُرشے ءِ بندات ءَ کن انت ءُ بُنجل ءِ یک مزنیں بھرے ءَ وتی کوزہ ءَ کن انت۔بیلہ ءِ مزنیں بُنجل ءِ سر ءَ اُرش کنگ ءَ پیسر مرگ ءُ زند ءِ گواچنیں مانا ءِ شوھاز کنوکیں پُسگ یک ءُ دومی ءَ گون گپ ءُ تران ءَ اِت انت. پنجگور ءِ زیبائیں ندارگ، وشکوش پروم ءِ دلکش ءُ وشبو چکاریں گوات، چتکان ءِ ھاک رنگ ءُ براھداریں کوھانی امباز ءَ در اَتکگیں شھزادگ پدائی موند بلوچ اُرپ میرک ماھل ءَ گُش ایت کہ: گودی، شُما مارا چہ پیسر نمیران بہ ات، انچو کہ شُماشھیدیں ھمبلانی گور ءَ سر بہ ئے آیاں ھمے کُلوہ ءَ بدئے ءِ کہ ما شُمے رند پداں گران ءُ دُژمن ءَ ٹوھیں تاوانے دے این ءُ پہ شُمے امباز ءَ زوت پیداک ایں، مئے وش اَتکی ءُ شاتکامی ءِ تیاری کنگ بہ بیت۔
آپریشن ھیروپ ءِ چن ءُ لانچ ءِ میان ءَ یکشل ءَ پانچ ادار ءِ پیادگ ءِ دراجیں سپر ءُ دو رُوچ ءَ بس پنچ ادار ءِ آرام کنگ ءَ ابید پدائی ماھل ءِ لُنٹانی سر ءَ زیباھیں بچکندے تالان بیت ءُ پدائی میرک ءَ پسہ دنت کہ “بس دُوا بہ کن سنگت کہ منی کار ءَ چہ بے گُناھے شھید مہ بیت.” سما ءِ شاھیم ءَ تور اِتگیں اے لبز پدائی ماھل ءِ پگر ءُ ھیال، زانت ءُ زانگے جوانیں رنگے ءَ درشان ءَ کن انت. اے لبزاں گوں روک الدین بیبرز ءِ ھمے گُشتن گیر کیت کہ ” یک تچکیں جنگولے اے ھاتر ءَ جنگ نہ کنت کہ آ وتی دیم ءِ اوشتوکیں مردماں چہ کینگ دار ایت بلکیں ھمے ھاتر ءَ جنگ کنت کہ آ وتی پشت ءَ اوشتوکیں مردماں گوں مھر کنت.”کبزہ گیر ءِ درشاناں، چہ زانت ءُ سما ءَ زبھریں وتگڑیں دانشور ءُ کواساں پہ ماھل ءِ اے لبز بے تواری ءِ شار ءَ مانپوشتگیں توپانے ءِ کُلو اَنت، مھر ءِ کُلو، ایمنی ءِ کُلو، آجوئی ءُ بلوچ راج ءِ پجّار ءِ کُلو انت۔
راجی آجوئی ءِ مکسد ءِ نیام ءَ ودی بوتگیں درد، رَنج، گم، جیڑہ، جنجال ءُ مُشکلانی دیم ءَ چو تمرد ءَ اُوشتاتگیں پدائی وتی چمّاں گُلامی ءِ آس ءُ سینگ ءَ کبزہ گیرے نپرت ءِ ڑیواہ ءَ بالین انت ءُ سگ ءُ اُوپار ءِ گُڈی سیمسراں رس انت ءُ سپر ءَ در کپ انت. یک پیچ ءُ تاب ءُ دراجیں مشنے ءِ ھاتر ءَ وت ءَ جاڑیگ کن ات۔
مشن ءِ چن ءُ لانچ ءِ میان ءَ مستونگ ءَ وتی ٹارگٹ ءِ نیمگ ءَ جُنزانیں پدائی آسپ نیچاری اُرپ نوید ءُ پدائی مھمد بکش سمالانی اُرپ ھالد دُژمنیں لشکر ءِ انگیر ءَ کاینت ءُ گوں دلیری ءَ جنگ دیان ءَ نمیران بہ اَنت، مشن ءِ سرجم بوھگ ءَ پیسر جنگی ھُنر، ھُوسلہ ءُ دیمھونی ءِ شھزانتی ءَ چہ سر ھیلیں ھمرایانی گسر بوھگ سک ءَ تورناک اِنت. ھما ھمراہ ءُ سنگت کہ ھواری ءَ میڑے چن ءُ لانچ ءِ میان ءَ دُژمن ءَ گون دیم پہ دیم بوھگ ءَ نوکتریں کارشونی ءِ سر ءَ کار ءَ اَنت، پہ آیا اناگہ ءَ دو ھمراھانی گسر کپگ ءَ سینگ ءَ گمانی جمبوریں آسے ءِ داب ءَ اِنت، بلے وھدے سما ءِ آس ءِ برانز دل ءِ جُھلیں زِر ءَ چو چول ءَ چِست بہ اَنت، گُڑا اَمل ءِ دروازگ پچ بہ اَنت. اَمل درستیں جیڑہ ءُ جنجالانی گیش ءُ گیوار کنگ ءِ سبب جوڑ بیت ءُ وتن ءِ شھزادگ ءُ شیرزال وتی مکسد ءِ سوبمندی ءَ سر ءَ کپن بند انت. ھمے پگر ءِ دیم ءَ مکسد ءِ اَرزشت ءُ جنگی جاورھالاں ودی بوتگیں تکلیپیں ویلاں پوھ بیتگیں پدائی ماھل ھوسلہ ءُ نرمی ءَ پدائی مھمد بکش سمالانی اُرپ ھالد ءِ مستریں برات، پدائی گوس بکش سمالانی ارپ ءِ تالب ءَ گُش ایت “ما جنگی جاورے ءَ گوں دُچاریں ءُ جنگانی تہ ءَ اے وڑیں ویل مُدام بہ اَنت. مارا توکل ءُ سبر ءِ دامن یل کنگی نہ اِنت بلکیں گوں وتی مکسد ءَ ھمگرنچ بوھگی اِنت ءُ وتی مشن ءِ نیمگ ءَ دلگوش گور کنگی اِنت.” پدائی گوس بکش سمالانی اے گپانی اِشکنگ ءَ گوں وتی ھمبل پدائی آسپ ءُ برات پدائی مھمد بکش سمالانی ءِ دیمھونی ءَ دل ءَ جاہ دنت ءُ گُش ایت: “گودی، تئی وڑیں ھوسلہ مندیں شیرزال مئے ھمکوپگی ءَ اُوشتاتگ گُڑا ھمت ءُ ھوسلہ ءِ پُرشگ ءَ سوال پیداک نہ بیت. “اے لبز یک رُژنائیں بانداتے ءِ مستاگ اِت انت: اے لبز ھمت، ھوسلہ، بھادری، دیمھونی، گل ءُ راجی مکسد ءِ جتائیں رنگانی اَکسے اِت انت، اے لبز اَمل ءِ کینوس ءَ کش اِتگیں اَنچیں نکش اِت انت کہ دُنیا ءِ ھِچ تاکت آیاں دُور کُت نہ کنت۔
ھیرّوپ ءِ آپریشن ءَ ھواریں ساہ ندریں پدائیانی کِسہ گوھر کیمتی ءُ جتائیں کُربانی ءِ دروشم ءَ اِنت، گُلزمین ءِ پھازگ ءَ گَل ءِ سرمچار میشدار سمالانی دیم پہ دیمی میڑ ءَ شھیدی ءِ نام ءَ کَٹّ ایت، بلے گُلزمین ءِ آجوئی ءِ مُرادانی دَر اے جاگہ ءَ سکراتی نہ بیت بلکیں شھید میشدار سمالانی ءِ بے بھائیں کُربانی یکشلیں پگرے ءِ رنگ ءَ آئی ءِ دوئیں جند ندریگیں پُسگ گوس بکش سمالانی اُرپ تالب ءُ جندندری مھمد بکش سمالانی اُرپ ھالد ءَ وتی پِت ءِ زیبائیں رند پداں گام ایر کُت اَنت ءُ بلوچ راج ءِ بُرزشانی ءِ ھاتر ءَ کُربانی اِش دات راجی پگر ءُ ھیال ءِ اے سپر ءَ دوئیں برات وتی امبازاں زُرت اَنت ءُ وتی منزل ءِ سربوّگ ءِ نزیک ءَ رسینت اَنت۔
مجید برگیڈ ءَ ھوار بوھگ ءَ پد میڑ ھیروپ ءِ چن ءُ لانچ ءِ میان ءَ دوئیں براتانی واھشت ھمیش بیت کہ آ وتی گُڈی مشن ءَ ھمرائی ءَ سرجم بہ کن اَنت ءُ دوئیں برات ھمدستی ءَ پہ وتن کُربان بہ بنت ءُ گوستانک ءِ تاکانی سر ءَ نمیرانی ءِ درے گیش بہ کن انت، آ مجید برگیڈ ءِ آپریشنل کمانڈ ءِ دیم ءَ وتی اے واھشت ءِ مکسد ءَ درشان کن انت ءُ گُش انت “ ما گُلزمین ءِ درستیں پُسگاں ھمے باور کناھینگ لوٹیں کہ آجوئی ءِ ھاتر ءَ دیمھونی دیگ ءِ اَمل پراہ ءُ شاھیگان( لامحدود) بیت. پہ اے مکسد ءِ گرگ ءَ پت، چُک، برات ءُ گھار درستاں وتی بھر مان کنگی اِنت. پرچا کہ آجوئی درستاں یکیں وڑ ءَ دیمھونی دیگ ءِ لوٹ ءَ کنت. پدائی ھالد سمالانی مشن ءِ سرجم بوھگ ءَ پیسر اَچ ما جسمانی دروشم ءَ جُتا بیت، بلے اے ویل ءَ میڑ ھیروپ ءِ آپریشنل کمانڈ پدائی تالب سمالانی ءِ ھوسلہ گیش مھکم بہ اَنت. آ وتی پت شھید میشدار سمالانی ءُ برات شھید پدائی مھمد بکش سمالانی اُرپ ھالد ءِ ڈس اِتگیں کِشک ءَ جُنز ایت ءُ پہ مُدامی نمیران بیت ءُ گوستانکے تاکانی سر ءَ دیمھونی ءِ کسھانی نوکیں درے بندات کنت۔
جان فوسٹر ڈیلس گوش اِیت کہ جھان ءَ یکشل ءَ ایمنی تاں ھما وھد ءَ ممکن نہ بیت وھدے تاں مردم جوانیں بودناکی ءَ کردی پوشاک گور ءَ مہ دے اَنت، ایمنی جنگ ءِ وڑ ءَ پگری، دیمھونی ءُ یک تچکیں ءُ پُرکار ستک ءِ لوٹ ءَ کنت، اے لبزانی کردی جارکشی مارا گھگیری ءِ سرڈگار نوشکی ءَ چہ سیادی داروکیں پدائی سنگت تئیب پنّام لالا ءِ دیمونی ءِ بے بھائیں کسّہ ءِ تہ ءَ دزکپ اِیت، آ ایردستی ءِ کم شرپی، دُژمنین لشکر ءِ کم شرپی، بیڑاں، دزگیریاں، ٹپ ءُ ٹوریں لاشانی، ھون ءِ تُنگیں ارادگ دیستگ ءُ ایپ سی ءِ کار ءَ یل کنت ءُ درانڈیھ ءَ روت بلے زورگپتگیں بلوچستان ءَ دُژمنیں لشکر نیمگ ءَ چہ کنگ بیتگیں زوراکیانی پرکاری ءِ یات ءُ سرڈگار ءَ گوں مھر ءِ لوٹ اشی ءِ سسّا ءِ سر ءَ جُھلیں نکشے یل دنت۔ پدائی تئیب 2022 ءَ وتی وشھالیں زندمان ءَ یک کر کنت ءُ بی ایل اے ءِ بھر بیت ءُ دیم پہ کوھاں جُنز اِیت – یک سالے ءَ پد مجید برگیڈ ءَ ھوار بیت تسلہ ءُ اوپار ءِ ھمراھی ءَ وتی گُڈی مشن ھاتر ءَ سسّائی دروشم ءَ وت ءَ جاڑیگ کنت۔
آپریشن ھیروپ ءِ چن ءُ لانچانی میان ءَ آ کوھنیں ویلاں یات کنت ءُ گوش اِیت کہ ” منی واستا مچی کم شرپی، ٹپ ٹوریں لاشانی سر ماں سر، آوارجنی، لشکر کشی ءُ ایردستی اوپار کنگ نہ بیت، پاکستانی لشکر ءِ دزکشی ءَ پد ھم اے ویل من آں ڈرانڈیھ ءَ آسودگ ءُ وشھالی ءَ نندگ ءَ نیل اَنت، ھمے ھاتر ءَ من سوڑگ کتگ کہ من جنگ ءِ بھر باں ءُ وتی کرد ءَ چہ اے دردناکیں یاتاں پروش دیان ءُ ماتیں سرڈگار ءِ کار ءَ کایاں ” مُچی پجار ءِ رکینگ، راجی بیرک ءَ مہ بُرز ءَ دارگ ءُ سوبمندی ءِ ستک ءِ جوڑ کنگ ءِ بے دروریں کردانی ھُدابندیں کارست تئیب پہ مُدامی یک انچیں کسھے جوڑ کتگ ءُ جسمانی دروشم ءَ گستا بیتگ کہ آ چریشی ءَ آؤکیں پدریچ ءَ پائدگ بہ رس اِیت۔
یک نیمگے ماھل دُژمن ءِ دل ءَ ٹوھیں ڈَک ءِ جنت ءُ جنگ ءِ بندات ءَ کنت، دومی نیمگ ءَ پدائی رزوان اُرپ ھمل وتی مکسد ءِ نیمگ ءَ جُنزان کنت. آئی ءِ ھر کدم یک بے تواریں اَھدے اَت، آئی ءِ ھر ساہ گُلزمین ءِ گون ءَ نہ پُرشتگیں کول ءُ کرارے اَت، آئی ءَ زانتگ اَت کہ دُژمن ءِ نگاہ تیز اَنت، دیم ءِ راہ ھترناک اِنت، پد ءَ ھم اشتاپ اشتاپی ءَ دیم ءَ جُنزان کنت، نی آئی ءِ بالاد وتی نہ بیت، بلکیں آئی ءِ بالاد مُھکمیں ارادہ ءِ سلاھے جوڑ بیت. وتی دل ءِ ھر دریکگ ءِ ھمرائی ءَ وتار ءَ اے ٹوھیں مکسدے ھاتر ءَ ندر کنت، ءُ دُژمن ءِ بُنجل ءِ دومی نیمگ ءَ یک ٹوھیں تراکے بیت ءُ رزوان اے گُلامی ءِ اَھد ءَ یک اَنچیں رُژن ءِ ودی کنت کہ آئی ءِ آھوکیں پدریچ ءَ منزل ءِ ڈس ءَ دنت۔ دیار ءِ شھید سپر ھان زھری ءُ ٹک تیر زیا اُرپ ءِ دلجان ءِ ڈگار زھری ءِ دو گوھر کیمتی ءُ شھید پدائی ھاپز زیشان ءِ کزن پدائی جُنید زھری اُرپ کامی ءُ پدائی پزل گُل زھری اُرپ شاھویز ھم پدائی کارون ءِ بھر بنت۔
وتی یکجاھی بوتن جاہ زھری ءِ بے تواریں امبازاں یکیں ھاک ءِ دو بچ کامی ءُ شاویز یک ھنچیں سپرے ءَ رھادگ بنت کہ آھاں زانتگ اَت کہ پد ءَ چہ ھود ءَ ھچبر واتر نیاھاں۔ چہ ھون ءَ مانپوش اتگیں گوات ءَ کہ آھانی میتگ ءَ کَش اتگ ئِے، ءُ یک ھنچیں گلزمینے ءَ گوں مھر کہ آئی ءِ دل ءِ دریکگانی داب ءَ باتن ءَ توار ءَ بوتگ آ گُڈی مشن ءَ یک ءُ دومی ءِ سیادیں ارواہ جوڑ بوتگ اَنت، انچو کہ جنگ ءِ سیاھیں جمبر یکجاہ بہ اَنت، آیانی ھمت جاڑیں استالانی وڑ ءَ درپشنت، آدوئیں ھمکوپگی ءَ دُژمن ءِ دیم پہ دیمی ءَ کن انت ءُ وتی نگرھیں ساہ ءَ پہ وتی آھوکیں پدریچ ءِ ایمنی ءُ آجوئی ءَ کُربان کن اَنت، آیانی دیمھونی چیھالے نہ اَت بلکیں یک ھلوتے اَت کہ آیانی بُنکی میتگ زھری ءِ مسک آتاریں سمین ءِ شیکگانی تہ ءَ اِشکنگ بیت۔
دگ بندی ءِ میان ءَ مستونگ ءِ ھلک کھڈکوچہ ءَ پتھ اسکواڑ ءِ جانبازیں سپاھیگ سنگت شپکت وتن ءِ پھازگ ءَ وتی نُگرھیں جان ءَ دنت ءُ شھید بیت. بازیں جنگی سنگراں دُژمن ءِ سر ءَ چو بیر ءَ کپتگیں شپکت وتن ءِ لُڈوکیں کشارانی، دلکشیں کوھانی، کوچگ، جنگل ءُ گیابان، درستاں چہ گیش وتی سرڈگار ءَ سر ءَ نشتگیں بلوچ راج ءِ ھاتر ءَ وتی درستیں واھشت ءُ ارمان یل داتگ اِت انت ءُ ابدمانی ءِ کیپ نوش اِت انت. مروچی ناگ ءِ مھلبیں ھاک نازان اِنت ءُ واشک ءِ گوات ءِ تہ ءَ پھرانی وشبو مارگ بیت؛ ناگاھو ءِ مُھکمیں کوہ وتی جنگولے یاتاں استالاں گوں تران ءَ اَنت؛ شند ءُ چمّگ شھید شپکت ءِ بچکند چکاریں کسھانی شیرکنی ءَ یات کن انت ءُ جُھلیں بیتواری ءَ پروش دے اَنت ءُ یک ءُ دومی ءَ ھمتران بنت، درچک وتی ساھگاں وپتگیں سرڈگار ءِ پُسگانی وشبوھاں مار اَنت ءُ گوات ءَ گوں ناچ کن انت. گوستانک بلوچ راج ءِ بھادری، دیمھونی، ھوسلہ، سگ ءُ اوپارانی کسہ دُنیا ءِ ایندگہ زوراکی ءِ آماچیں راجاں پہ روکیں چراگے ءِ داب ءَ اَنت۔
بیست ادار ءَ گیش بیلہ ءِ بُنجل ءِ دستیگ کنگ ءُ دُژمن ءِ شست ءُ ھشت لشکری کارمندانی کُشگ ءَ پد ساہ ندریں پدائی گُڈی تیر ءَ وتی نام ءَ کن انت ءُ پہ مُدامی نمیران بہ اَنت، دوازدہ اِدار ءَ بلوچستان ءِ جتا جتائیں دمگانی دگ ءُ کِشک ءُ چار راھاں ناکہ بندی ءَ پد ایلیٹ یونٹ، پتھ اسکواڈ ءُ اسپیشل ٹیکٹیکل آپریشن اسکواڑ ءِ سرمچار دُژمن ءِ لشکری کارمند، چیریں ادارھانی کارمند، کارچالی( تنصیبات)، لشکری کارمندانی ھم کوپگ پولیس ءُ لیویز اسٹیشنانی سر ءَ سوبمندیں اُرشاں پد واتر وتی جاھاں رو اَنت. دُژمن ءِ یک سد ءُ سی کارمندانی کوش ءَ پد آپریشن ھیروپ ھلاس بیت۔۔
اے آپریشن بلوچ راجی زرمبشت ءَ یک بے مٹیں درے گیش کنت ءُ اوست ءُ جوزگ ءَ سریچیں نوکیں گامگیجے ءِ رژنائی ءَ پیش کنت پہ بلوچستان ءِ دوبر دستیگ کنگ ءَ اے کار چہ دیم ءَ بیوکیں کاراں ترند ءُ نوکی ءِ یک نمونگے۔
آپریشن ھیروپ نوکیں جنگی رِپک، کارچال ءُ فوجی اُرشانی یک انچیں درورے کہ نوکیں بلوچ گھگیری ءِ جنز ءَ چشیں درور دست نہ کپ ایت، ترندیں راھگیری، ھمکاری ءُ آؤکیں شونداتانی سر ءَ یک ءُ ٹکیں گامگیج زورگ گل ءِ تاکت ءِ یک جتائیں دروشمے۔سنزو ءِ گشتن انت کہ جنگ سلاھاں چہ کٹگ نہ بیت بلکیں جوانیں کارچال، راھگیریں کمانداری، وھد ءِ لُوٹانی ھساب ءَ پیسلہ، ھوت چاری ءَ گوں اُرش ءُ رازداری ءَ گوں کٹّگ بیت۔ دژمن ءِ سرین پروش کنگ ءِ واستا آئی ءَ را ھما جاہ ءَ بہ جن کہ آئی ءِ وھم ءُ گمان ءَ مہ بیت، ھمے ھبر ءَ رابرٹ ٹیبر دیمتر ءَ شرتر گیشین ایت ءُ نبشتہ کنت کہ چیر جنگیانی تھا وھدے کہ تئی دژمن چہ تو زورآور تر بہ بیت گڑاں پہ جنگولاں شرتریں کاردربری، باسمائیں رھدربر ءُ اِزم ءُ ھنر پہ آئی ءَ جوانیں سوبمندی ءِ مانزمان بیت۔ آپریشن ھیروپ ھمے گپانی کردانکی بزانت ءِ یک جوانیں دروشمے، کہ ھَستیں آجوئی جنز ءِ تھا یک نوکتریں باریگے ءِ گیشی ءَ کار ایت۔
آپریشن ھیروپ جنگ ءِ گُڈسر نہ انت بلکیں بندات انت، اے یک تُرندیں اُرشے ءِ اولی ءُ بنداتی دروشم انت، اے آپریشن دژمن ءِ دیم ءَ الکاپیں تاکت ءِ یک درورے۔۔نوکی ءُ ترندی ءِ یک انچیں اکسے کہ پد ماں پدی ءَ زورگیریں دژمن ءِ ھاٹی ءَ چو ریک ءِ کلات ءَ پروش ایت، اے توپان ءِ پُشت ءَ دژمن ءِ زورگیری ءَ ھوار آئی ءِ ھمکوپگیں کبزہ گیری لوٹوک ءِ تھت ءُ تاج ءِ چپی کنگ ءُ راجی پجّار ءِ بیرک ءَ بُرز دارگ ءُ رکینگ ءِ واستا یک ترندیں توپانے چو آس ءُ چر ءَ روک بوگ ءَ ساڑی انت، زورگیر ءُ آئی ءِ ھمکوپگیں زورگیریں تاکتانی واستا تچگ ءِ واستا مرچی اوں راہ پچ انت، اگاں آ وتی ارادھانی سر ءَ اوشت انت ءُ زوراکی ءَ گیش کن انت، گڑاں سرڈگار ءِ دیمپانی ءَ آئی ءِ تاسپیں بچ گوں ھواری ءِ لیکہ ءُ شھزانتی ءَ گوں نوکیں جنگی رِپکاں ھر وھد ءَ پہ اُرشاں جاڑیگ گندگ بنت، آ یک نوکیں سُھبے ءِ مستاگی ءَ گوں بدواہ ءِ زورگیری ءِ سیاھیں شپ ءَ گوستانک جوڑ کن انت ءُ ماں راجدپتر ءَ وتی یک جتائیں نامے درآرگ ءِ واستا داں گُڈی وھد ءَ جنگ کن انت. گُڈی سوب الّم مئے بیت.
آپریشن ھیروف ءِ بنگیج بوھگ ءَ چہ لہتیں ادار پیسر، دراھیں پدائی نشتتگ ءُ وت ماں وت ءَ گپ کنگ ءَ انت ءُ پدائی جنید زہری ءِ ھمے جست ءِ پسہ ءَ ہر کس وتی وڑ ءَ دیگ ءَ انت کہ “پہ ترا زند چے یے؟” گُڈسر ءَ گودی ماھل گُش ایت، “چِد ءُ پیسر زند، زندے نہ بوتگ، منی زند واَ مروچی بندات بیت”۔ دمانے ءِ ھاموشی ءَ پد ماھل گش ایت “من لوٹاں کہ مرچیگیں ورگ منی دل دوستیں بریانی بِہ بیت کہ من وت بہِ گراداں ءُ وتی پدائی سنگتاں بوارینان اش” ماھل بچکندان پاد کیت ءُ بریانی جوڑ کنگ ءَ بندات کنت ءُ دراھیں پدائی ماھل ءَ کمک کن انت، پد ءَ دُرست گپ کنان ءُ کند انت، وتی زند ءِ گُڈی ورگ، ماھل ءِ بریانی ءَ ور انت ءُ پہ وتی مشن ءَ در کپگ ءِ چِن ءُ لانچ ءَ کن اَنت۔۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-