TBP Balochi

رژن ءِ تالان کنوکیں ھمبل شبیر جان

نبشتہ کار : فقیر بلوچ

دی بلوچستان پوسٹ

من سک باز کوشست کُرتگ اَت کہ تئی بابت ءَ دو لبز نبشتہ بِکناں بَلے منی کَد آ کَد نہ اَت کہ من تئی بابت نبشتہ بِکناں بَلے مرچی تئی ھما داتگیں سوج ءُ پنتاں تئی کِرد ءَ تئی مہراں مرچی منی وڑیں نابودے را پہ نَد ءِ چِست کنگ ءُ دو لبز ءِ نبشتہ ءَ کنگ ءَ لاچار کُرتگ من زاناں منی نَد تئی کِرد ءِ بابت انساپ نہ کنت . پرچہ کہ تو ھما چراگ ءِ پَدگیری ءَ را کُرتگ ءُ ھما رژنائیں چراگ ءِ رژن مرچی تو ہر یک گِدانے ءَ سر کُرتگ ھما گِدان بنی آدم تئی سر کُرتگیں رژن ءِ پدگِری ءَ کنگ ءَ اَنت مرچی ہر یک گِدانئے اندر ءَ چراگ روگ اِنت یک گِدان دومی گِدان ءَ چہ رژن تالان کنان اِنت مرچی ھمے رژن دگنیا ئے کُنڈ مہ کُنڈ ءَ سر بوتگ ءُ سر بوگ ءَ اِنت مرچی دگنیا سرپد اِنت کہ یک دیارے اَست آ بلوچستان ءِ نام ءَ زانگ بیت کہ آ دیار اے وھدی تھاری یے آماچ اِنت بَلے آئی یے پرزنداں یک چراگے روک کُرتگ ءُ گوں وتی رِتکگیں ھوناں گلزمین ءِ دلبند ءَ چراگ زندگ داشتگ ھما چراگ ء ِ رژن مرچی دگنیا ءِ تَہءَ وتی رژن ءَ تالان کنان اِنت ءُ مرچی ھما چراگ ءِ بھازگ ءَ ھزاراں پرزند سِلاہ بند اِنت ھزاراں زندانی اِنت ھزاراں مردم گوں وتی ھوناں گون ھمے چراگ ءَ زندگ دارگا اِنت . پرچہ کہ ھمے چراگ ھمے پرزندانی زند ءَ گوں بندوک اِنت ھمے چراگے رژن ھمے تہاریں دیار ءَ رژن ءَ کنت ءُ زندگ داراِیت.

ھمے چراگ ءِ پدگیر کنوک ءُ رژن ءِ تالان کنوکاں چہ یکّے منی ھمبل منی رھشون شبیر جان ما دوستی ءَ پہ لکی جان گُشتگَ لکّی جان یک سکیں وش روہیں سنگتے اَت مدام کندگ ءُ مسکرا کنگ ءَ اَت گوں وتی سنگتاں سک مہروان ئے اَت تو کدی لکّی جان ءَ دیم تھاری ءَ نہ دیست مدام دیم ءِ روشن اَت.

منی گوں منی ھمبل لکّی جان ءَ اولی گِند ءُ نِند جولائی 2015 ءَ رمزان ءِ ماہ ءَ کیچ ءَ کوہ ءِ مراد ءِ سرا بوت.ھمے وھد ءَ بی ایس او آزاد ءِ بنجائی ماٹو کُرتگیں باسک میرین ءُ ستار ءِ جیڑا بِندات بوتگ اِت اَنت یکبرے پدا بی ایس او آزاد ءِ پروشگ ءِ پُشت ءَ کپتگ اِت اَنت. یکّیں کیچ ھنکین اِناں بازیں ھنکین ءِ ھمے جیڑائے آماچ اَت بی ایس او ءِ آزاد بنجائی باسک ہر یک ھنکین ءِ ہی دوراہ کنگ ءَ اِت اَنت ھمے وڑ ءَ بنجائی باسکاں چہ لکّی جان کیچ ءَ مئے ھنکینی سنگتانی گوما مِلّگ اتک پرچا کہ مئے ھنکین ھم ھمے جیڑہانی آماچ اَت.
تاں سئے روچ ءَ لکّی جان ھمد ءَ بوت گوں ہر یک سنگتے ءَ گِند ءُ نِند ءِ کُرت ہر یک جیڑا ءُ جنجال ئےِ بابت ءَ سرپدی یے دات ءُ کُل سنگت لکّی جان ءِ گپاں دلجم بوتاں ءُ تاں سئے روچ ءَ مارا لکّی جان ءِ کِرّا دیوان ءِ موہ رس اِت سک مزاک کندگ بوت کس ءَ نہ زانت باریں اے سئیں روچ ءُ شپ پہ چوں زوت ھتم بوتاں ءُ لکّی جان ءِ ھمراہی ءَ بیگوائیں اھسام جان ھم گون اَت ھما وھد ءَ اھسام جان کیچ ھنکین ءِ کار گشاد اَت سک وش اَت ھما وھد کہ ما کُل سنگت یکجا اَتاں .

تاں لھتیں وھد ءَ چہ لکّی جان ءَ دور بوتاں ءُ یکبرے پدا ماں 1 نومبر 2015 ءَ بی ایس او آزاد ءِ بیستمی بُنجاھی لس مجلس ءَ یکجاہ بوتاں ایبری لکّی جان ءَ گوں ھوار دگہ بازیں سنگتانی دیدار بوت. چما سنگتاں چہ شہید کندیل کازی، شہید سلار جان، شہید شاکر جان ، بیگوائیں بی ایس آزاد ءِ مزن کارگُشاد ثنااللہ جان، بنجائی باسک چراگ جان، بنجائی باسک نودان جان ءُ دگہ بازیں سنگت ءِ کہ مرچی زندان ءَ بند اَنت ءُ دگہ بازیں سنگت ءِ مرچی آشوبی سیاستِ میدانَ نشتگ ءُ آشوب ءِ دیم ءَ برگ ءَ اَنت اللہ آھاناں سلامت بکنت!!

، ما کُل سنگت یکجاہ اِت اَنت بُنجاھی لس مجلس ءِ دیوان اَت ءُ پدا اگاں کمو پارگ بوت ایں گُڑا شئر ءُ شائری اَت مزاک ءُ کندگ اَت ھچ سرپد نہ بوتاں کہ اے سئیں روچ چون شُتاں اگاں شپ ءُ روچ گومن دارگ بوتین اِتاں گُڑا اَلّم من داشتگت آں کہ شُما ودار کن اِت کہ من انگت وتی ھمبلانی دیوان ءُ مزاکاں سیر نہ کُرتگ.

ھمے نُنجاھی لس مجلس ءَ لکّی جان بی ایس او آزاد ءِ بُنجاھی شِنگکار زورگ بوت ءُ پدا ھر یک سنگتے وتی وتی ھنکیناں روان بوتاں ما ھم وتی ھنکین ءَ راھی بوتاں. منی ھمراہ دگہ منی یک مہرونیں ھمبلے اَت سَپر سک وش اَت ما وتی ھنکین ءَ سر بوتاں ءُ لھتیں وھد ءَ پد یکبرے پدا گوں لکّی جان ءَ دیوان ءُ گپ بوت ایبری پدا ھم بیگواہیں نودان جان ھمراہ اَت اے مئے ھنکینی دیوان ءَ اتکگ اِت اَنت. ھنکینی دیوان ءِ تَہءَ گوں شرین وڑے ءَ گپ ءُ تِرّان بوت ءُ لَکّی جان ءَ دیوان ءِ تَہءَ تنظیمی امور ءُ آلمی ءُ دَمگی سیاسی جاور ھالانی سرا گوں شیریں وڑءَ گپ ءُ تِران ءِ کُرت گْوشت ءِ اگاں مرچی ما وتی راج ءِ بزگی ءُ لاچاری نہ مار اِت گلامی ھلاپ ءَ جُھد نہ کُرت ھاس کر ما بلوچ نوردبراں وتی پرز نہ زانت ءُ اے پدمنتگیں راج ءَ را یک زندے دات کُرت نہ کُرت گُڑا باندائیں روچ ءَ نہ ما زندگ بُوت کن ایں نہ مئے راج ءُ نہ زبان پشت کپ اِیت مرچی مارا وھد اَست کہ ما وتارا زندگ بِکن ایں ـ
ھنکین ءِ دیم ءِ کارانی واستہ یک نوکیں کابینہ ءِ ٹاھینت اِش ءُ دیوان ھلاس بوت پدا ما انفارمل دیوان کُرت مسکرا ءُ کندگ بوت آ روچ چہ بہیشت ءَ کم نہ اَت پرچا کہ ما ھمے وڑیں ھمبلانی گوما دیوان کنگ ءَ اِت ایں•

ھمے وڑ ءَ وھد روان اَت ءُ گوں لکّی جان و اے دگہ سنگتاں گِند ءُ نِند بوان اَت سک باز سرپدی چہ سنگتاں رس اِت ءُ مدام بلوچ جُنزئے بابت ءَ گپ ءُ تران اَت مسکرا ءُ کندگ اَت ھمے وڑ ءَ وھد روان اَت•

ستمبر 2016 ءِ ماہ ءَ یک روچ ءِ لَکّی جان ءَ من ءَ ھال کُرت کہ شُمے ءُ اے دگہ ھنکینانی یک ورکشاپ دیوان ءِ بُوگی اِنت سی پیک ءُ شوشل میڈیا ءِ بابت ءَ وتی سنگتاں تیار بِکن ئے من گْوشت شر کامریڈ اَلّمُ ما ھمے لوٹوکاں کہ اَنچیں دیوانے بہ بیت ھاھاھاھاھاھا اَلّم بیت پُل یکّے نہ باز بیت وت ءَ پریشان مَکن اِت مزنیں ٹَھکّے جَت ءِ گْوشت ءِ شر پُل گُڑا پدا ھال کناں کمو دگہ سنگت ھال کنگی اَنت.

لھتیں روچ ءَ پد مئے ورکشاب دیوان بوت دیوان ءَ کراچی، ھب،اوتل، ملیر، گڈاپ، ھیدرآباد ھنکینانی سنگت دیوان ءَ ساڈی اِتاں. دیوان ءَ لَکّی جان ءُ آدل جان ءَ مارا سی پیک ءُ شوشل میڈیا ءِ بابت ءَ لیکچر اِش دات کہ پاکستان ءَ سی پیک ءِ سرا گوں چین ءَ مئے جونانی سودا جَتگ مرچی پاکستان ءَ مئے مال ءُ مڈیاں ھوار مرچی مئے زِر ءِ ھم بھاہ کُرتگ اگاں مرچی بلوچ راج ءَ سُد نہ کُرت ءُ ما وتی راج سرپد نہ کُرت وتی مال ءُ مڈیاں ھوار وتی زر ءِ اپازت نہ کُرت گُڑاں ما چو اے دگہ راجانی وڑ ءَ گار ءُ بیگواہ بنت انچوش کہ ھما راجاں وتی پرز نہ زانتگ ءُ زوراکاں ھما راج مرچی گار ءُ بیگواہ کُرتگ اَنت ما ھم ھما راجاں چہ ھرید نہ بنت.

سوشل میڈیا ءِ سرا ھم سنگتاں گپ ءُ تران کُرت کہ پاکستان ءِ مرچی پرنٹ میڈیا بہ بیت یا الیکٹرونک میڈیا کُل پاکستان ءَ وتی دست ءَ کُرتگ اَنت ءُ بلوچ راج ءِ چُک چینی کنگ ءَ اَنت مارا دگہ راہ ءُ در نیست ابید چہ سوشل میڈیا ءَ اگاں مارا وتی توار دگنیا ءَ سر کنگی اِنت گُڑا مارا سوشل میڈیا پہ بلوچ ءِ ھک ءَ کارمرز کنگی اِنت نہ کہ یکّے دومی یے ھلاپ ءَ مرچی بلوچ راج ءِ سرا بوھوکیں پاکستان ءِ زُلم ءُ زوراکی مارا دگنیا ءِ کُنڈ مہ کُنڈ ءَ سر کنگی اِنت.

ورکشاپ دیوان ءِ ھلاس بوگ ءَ پد ما کُل سنگتاں نان وارت ھمد ءَ چاہ اتک ماا کل سنگتاں یک ءُ یک کوپ چاہ زورت گُڑا لکّی جان ءَ منی دیم ءَ دگہ یک کوپے چاہے اِیر کُرت گُوشت ءِ تو ھوٹل ءَ دو دو چاہ ور ءِ مرچی ھم دو چاہ بور پکیر جان ھااھاھاھاھا کُل سنگتانی کندگ بُرز بوت لکّی جان ءَ گْوشت ھاں پکیر جان بارین تو ھما کِسہ ءَ بِکن تو بازار ءَ دکان والا ءَ را چے گْوشت ھاھاھاھاھاھاھا لکی جان آ گپ ءَ بِل ھاھاھاھاھاھا بُگْواش اگاں نہ گُڑا چائے کوپ یکّے بیت ھاھاھاھاھاھا یکبرے پدا سنگتانی کندگ بُرز ءَ شُت . گُڑا من لاچار بوتاں ھما گپ ءَ بِکناں پرچاکہ چائے کوپ ءِ واتر کنگ گِران اَت پمن پرچکہ من مدام دو کوپ چاہ وارتگ ھاھاھاھاھاھا من ھما گپ گْوشت گُڑاں کس چائے ورگی نہ بوت ھمے گپ ءِ سرا پرچاکہ انچیں مسکرائی گپےاَت سنگتانی کندگ ءُ مسکرا بوت آ روچ سک وش اَت بَلے اپسوس کہ گلامی ءَ وھد نہ دات لکّی جان روچے اے ھنکین ءُ روچے آ ھنکین ءَ ھمے بلوچ نودربرانی دیوان ءُ گِند و نِنداں اَت مدام گوں گَل ءِ کاراں دست گٹ اَت سکیں لاھکیںن سنگتے اَت•

دو اکتوبر 2016 ءِ روچ ءَ من ءَ پہ لکّی جان ءَ کارے ھستگ اَت من ھال کُرت کہ لکّی جان من ءَ کارے ھست تو منی ھمے کار ءَ بکن گوشی شر کمو رند ءَ ھال ءِ کُرت گْوشت ءِ تئی کار من کناھینت ءَ سنگتے تَرا ھال کنت بَلے نوں من نیٹ ءَ درکپگ ءَ اَنت اگاں سلامت بوتاں ھال ءُ اھوال بیت•

6 اکتوبر ءِ روچ ءَ من وتی گِس ءَ نشتگ اَت آں سنگتے اتک گْوشت ءِ کہ من ءَ سنگتے ءَ ھال کرتگ کہ لکّی جان چہ کیچ گورکوپ ءَ پوج ءِ دست ءَ 4 اکتوبر ءَ بیگواہ کنگ بوتگ ءُ دومی ھال اِیش اِنت کہ کندیل جان ھم ءَ کولواہ ءَ شہید کنگ بوتگ. وھد ءِ من اے گپ اِیش کُرتاں من ھمد ءَ ھُشک ءُ ھیران بوتاں.

مرچی لکّی جان زندان ءَ بندیگ اِنت چہ وتی چاگرد ءَ وتی راج ءُ سنگتاں دور اِنت ھاں مرچی زندان ءَ دگہ ھزاراں بلوچ پرزند بندیگ اِنت بَلے من زاناں کہ لکّی جان مرچی یک تاھاریں کوٹی ئے تَہءَ بندیگ اِنت چہ یکے دومی ءَ دور اَنت ءُ مرچی لکّی جان بندیگ اِنت. بَلے لکّی جان ءِ ھما کاروان وتی منزل ءَ روان اِنت ھما پشت کپتگیں کاران مرچی لکّی جان ءِ سنگت دیم ءَ برگ ءَ اَنت ھاں ریاست ءَ لکّی جان ءَ زندان ءَ بندیگ کُرتگ بَلے لکّی جان ءِ ھما رژن ، پگر ءُ سوچ ئے بند کُرت نہ کُرتگ مرچی ھما رژن تالاں بوان اِنت ھما رژن مرچی بلوچستان ءِِ کُنڈ مہ کُنڈ ءَ سر بوتگ ائی پِکر ودان انت.

بلوچی زُبان ءَ رجانک ءِ اَرزشت

تحریر:… ڈاکٹر شاہ محمد مری
رجانک:… ھلیل بلوچ

دی بلوچستان پوسٹ 

زبان راجانی شیرکنی ءُ ڈولداری بِیت- اے آئی واد ءُ تام ءُ آئی پجّار بِیت، آئی ءِ بُن ھِشت بِیت- زبان راجانی دِل ءِ تیاب بِیت- بلوچی زبان بلوچ راج ءِ پاگ ءِ ڈولداریں گْرنچ اِنت-

بلے مرچی بدن ءُ سر ءِ ھواری ءَ اے پاگ ھم شرّیں ھالت ءَ نہ اِنت- ھو بلوچ چاگرد کہ ساہ کُندن ءَ اِنت، اے نہ مرچیگیں اِنت نہ اناسری اِنت، ءُ نہ یک روچی اِنت- ما انچو گُشت کنیں کہ پانزدہمی کَرن ءَ بِگر داں روچ ء مرچی، بلوچ چاگِرد ءَ را یک رِد ءَ پانزدہ ماہ آرام ءِ ھم نسیب ءَ نہ بوتگ- بُن تَب ءِ ھلاپ ءَ تیوگیں انسانانی وڑا ما ھم جُہد کنگ ءَ ایں- بلے مئے چاگِرد گیشتر بزّگی ءِ آماچ اِنت- بلوچ ءِ زِر، آئی ءِ مادنی مڈّی ءُ “جغرافیہ” دور ءُ نزّیک ءِ کلاگاں وت توار کَنت ءُ مئے سرا اُرش کنائینیت- ھر وھدے چہ اے ڈَنّی اَزاباں مارا کمّو موہ رَسیت گُڑا برات کُشی چو سیچن ءِ تِرِکاں مئے جبین ءَ سُمبان بِیت- ھمے وڑا گُشئے مئے تیوگیں چاگرد ءَ زمین چَنڈے کیت- اے زمین چَنڈ ءِ مزنیں نشانگ مئے زبان ءُ دود ءُ ربیدگ بنت- زُبان ءُ ربیدگ کہ ایشاں بیست ءُ یکمی کَرن ءَ وانگِس، دربرجاہ، لیبارٹری، دیوانگِس، باسکوپ(سینما) کوٹی، لَئیب جاہ، اِزم کَدگ(آرٹس کونسل) ءُ وانگجاہ ءِ زلورت اِنت-
اے بد بھتیں پُشدر ءَ بلوچی زُبان ءِ تہا ساچِشتی ءُ نبشتانکی کار ءِ سکّ کمّی اِنت- مئے زبان تنے وھدی گیشتر دَپ گالی اِنت- مئے نبشتانکی لبزانک نہ بوھگ ءِ بروبر ءَ اِنت- پہ درور اگاں چہ بلوچی گِدار ءَ انّوگیں دہ سال ءَ در بکن ئے گُڑا بزاں ایشی سرا ھِچ کار نہ بوتگ- دُگنیا چے نبیسگ ءَ اِنت، گِدار ءِ بُنگپّ چے اَنت؟ کُجام تکنیک کارمرز بوھگ ءَ اَنت؟ مارا مالُوم ھم نہ اِنت-

ھمے وڑا مزنیں آزمانکاری ءُ نگد کاری نیست- کسمانک ءِ تہا انگت سرکاری ریڈو ٹی وی ءَ کمّو کار کرتگ اَت بلے انّی اَبیدے وش چینل ءَ دومی زَرّ ءُ مال ءِ پرائیویٹ چینل بلوچی زبان ءِ گار کنگ ءِ دُمب ءَ کپتگ اَنت-

تھنا بلوچی شاھری پَشکپتگ کہ ایشی تہا چہ کلاسیک ءَ بِگر تاں مرچی یکشَل ءَ ڈولداری ءِ سرا کار بوھگ ءَ اِنت- بلوچی زبان ءِ تہا شہ زانتی (فلسفہ) ءِ سرا بزاں ھِچ نبیسگ نہ بوتگ- شہ زانتی ءِ بُنی جُست ءَ ھوار لبزانک ءِ اِزمی کارینکانی سرا باوست سکّ کم بوتگ- ھمے وڑا مارکیٹ ءِ زبان نہ بَیَگ ءِ سَوَب ءَ ایران ءِ بلوچ کندھ کوٹ ءِ بلوچی ءَ سرپد نہ بِیت ءُ دریا ء نہنگ ءِ بلوچ دریا ء بیجی ءِ گالوار ءَ سرپد نہ بِیت-

ساچِشت ءِ ھاترا زلورتیں نوکیں سازداب ءُ مواد نیست اِنت- بازیں مردمے ھمے ردی ءِ تہا اِنت کہ تھنا بلوچی گْوشوک ءُ نبیسوک بلوچی ءِ پاسپان اَنت- بلے اے وڑ نہ اِنت- گواچِن ھمیش اِنت کہ بلوچی زبان وت وتی گْوشوک ءُ نبیسوکانی پاسپان اِنت- —– بلے مئے اے پاسپان چہ اے کَرن ءِ زام ءُ اِسپراں زبھر اِنت-

گُڑا چے کنگ بہ بیت؟ دُگنیا ءِ کْوھنیں “تہذیب” ءِ کُربانی دیگ بہ بیت؟ وتی شیرکنیں کوتگال ءَ چہ گِستا بوھگ بہ بیت؟ کرنانی پیمکاری ءُ بیچار ءَ چہ جوڈ کرتگیں وازینک ءُ بتل شموشگ بہ بنت؟ مُھکمیں دود ءُ ربیدگانی بُنیاد ءَ اُوشتوکیں زُبان ءَ ھمے ھاترا پاھو دیگ بہ بیت کہ آئی ءَ امبروز ءِ بُن ھِشت نیست؟

بیا اِت چاریں کہ مئے پِت پیرُکاں وتی زمانگ ءَ ایشرا چتور پہریزتگ؟ پسّو ھمیش اِنت آھاں مئے زُبان ھماھانی زُبانانی بگل ءَ رودینتگ کہ آھاں مئے سرا اُرش کتگ- ھو! بلوچی باز رند ءَ زور آورانی بگل ءَ رُستگ ءُ مزن بوتگ-

مہر گڑھ “تہذیب” ءِ اولی نبشتہ کار ءِ باروا ما ھِچ نزانیں بلے چہ انّوگیں راجدپتر ءَ اندازہ بِیت کہ بلوچی ءِ اولی نبشتانک (اگاں تاکانی سرا بوتگ یا ڈگار ءِ سرا یا پیسر ءِ نبیستگیں وانگی یے ءِ تہا) اَرَبی یا پارسی ءِ وڑیں لیک وڑے ءِ تہا بوتگ- بزاں بازیں زبانانی وڑا مئے زُبان ءِ انّوگیں سیاھْگ یا لیک وڑ ءَ دومی زبانانی ھواری ءَ رُدوم زُرتگ- دومی زُبانانی زانگ ءُ چہ آھاں پائدگ زورگ ءَ زُباناں سکّ دیمروئی کُرتگ- ھمساھگاں یک دومی ءِ پَٹ ءُ پول رجانک کُتگ اَنت ءُ پائدگ زُرتگ اَنت- وتی ساچِشتی لیکہ پہ وام داتگ ءُ آھانی سائنس ءُ تیکنالوجی دیمروئی داتگ- ھمُک ھَتب ءِ راجی لبزانک ءَ را رُژنائی رس اِت- لبزانک ءِ شنگکاری بوت- گال گنج جوڑ بوت، شہ زانتی دیم ءَ اَتک ءُ دیمروئی ئےِ کُت- ھمے وڑا سیاسی، ربیدگی، مالی ءُ راجدپتری کارانی تہا یکبرا شہگامی اتک-

کمّو بیچار بہ کنیں اگاں رجانک مہ بوتیں گُڑا تیکنالوجی ءِ یک دومی جاگہہ ءَ سر بوھگ ءِ انّوگیں نوکیں بوتکن نہ بوتگ اَت- راجدپتر ءَ ما بہ چاریں گُڑا دُگنیا ءِ تہا پگری ھواری ءُ سیاسی، چاگردی، مالی انکلابانی تہا رجانکاراں یک شرّیں کِردے ادا کُرتگ- “کوانٹم تھیوری” ءِ چے بِیت، “بگ بینک” ءُ “بلیک ھولز” ءِ باروا مالُومات چہ کُجا اتکگ؟ انچو ما گْوشت کنیں کہ تیوگیں “سائنس” پیمکاری ءَ پَد رجانک ءِ سَوَب ءَ دیم ءَ شُتگ-

ما تھنا سائنس ءِ گَپّ ءَ کنگ ءَ نئیں- ما لبزانک ءُ زُبان ءُ راجدپتر ءُ ربیدگ ءِ گَپّ ءَ کنگ ءَ ایں- رجانکارانی کوشست ءَ ھیسوی وھد ءَ چہ پیسر چین ءُ روم ءِ درنیام ءَ تیکنالوجی ءِ سر کنگ بوتکن (ممکن) بوتگ- انچو میریائی لچّہ “گُل گامیش” مئے گور ءَ چہ رجانکاں سر بیتگ- کْوھنیں یونانی ءُ شامی کاگَدانی اَرَبی رجانک بوتگ- پدا ھمے رجانک لاتینی زُبان ءِ تہا رجانک بوت اَنت- ھندوستان ءِ اِلم تاں تِبت، چین، جاپان، ھند چین ءُ انڈونیشیا ءَ سر بوت- ھمے وڑا چہ رجانک ءَ یک ھتب ءِ مردم چہ دومی ھتب ءَ آشنا بوت اَنت- “افلاطون” ءُ “ارسطو” ءِ دیدانکاں ءَ تیوگیں دُگنیا ءَ رجانکاں سر کُتگ اَنت- اَبیدے رجانک ءَ ھومر ءَ کئے زانتگ اَت؟ رجانک ءَ ابید مزدک، شیکسپیر ءُ ٹالسٹائی کُجا اِت اَنت؟ رجانک رسانکدر ءِ اولی چابی اَت، ءُ مُجّتی بِیت- یک اُلُس یے دومی اُلُس ءَ یک راجے دومی راج ءَ چہ رجانک ءَ وتی زانشت ءِ نیمگ ءَ کاریت-

رجانکار اِلم ءِ، انسانیت ءِ، مھبت ءِ، ءُ کاسماس ءِ مزنیں رسانکار اَنت- ایشانی اَبید ءَ وَ مزن ھُشکی یک دومی ءَ سرپد نہ بوتگ اِت اَنت، انسان ءَ ھِنچو دیمروئی نہ کتگ اَت، اِلم انّوگیں سیمسراں نہ بوتگ اَت- رجانک ساچشت ءِ چَمَّگ ءُ بُن ھِشت اِنت-
اگاں بلوچی ءِ تہا رجانک مزنیں کساسے ءَ بندات بہ بیت گُڑا اے بلوچ ءِ پَدکِرد ءَ تیز کنت ءُ کار ءِ واھگ ءَ گیش کنت- اے بلوچ ءِ پدا زندگ بوھگ ءِ ھاترا بُن ھِشت ءِ ارزشت ءَ داریت- انسان یک کاری ایں جاندار یے- سائنس ایشی مزنیں دزگَٹّی اِنت- سائنس ءِ دودمان ءُ تَب انسانی ھواری ئیگ اِنت، کمک ءُ رسانک ئیگ اِنت-

رجانک ھمُک سائنسی ءُ چاگردی ساچِشت ءَ وتی جوڑ کنت- کہ آ چوناھا ھمُک وھد ءَ دری بنت- فلسفہ، سیاست ءُ سائنسی پَٹّ ءُ پولاں دری دارگ انسانیت ءِ ھلاپ ءَ جُرم یے بیت- زانگ بہ بیت سائنس راجی نہ بیت، لبزانک راجی نہ بیت، انّی وَ تیکنالوجی ھم راجی پشت نہ کپتگ- اے کُلّیں انسانانی میراس اَنت- انچو کہ بلوچی “تھیریم” منیگ اِنت، بلے اے تیوگیں جہان ئیگ اِنت، بارکھان ءِ “وھیل” ماہی، مہرگڑھ ءُ آئی ءِ “آثار” بلوچ ئیگ اَنت بلے ایشانی بَرورد ءُ سائنسی اِلم تھنا مئے نہ اَنت-

رجانک وَ چوناھا یک مُشکل ءُ گرانیں کارے- باز گْران(سنجیدہ) ءُ ساچشتی کارے- رجانک ءِ ھاترا تھنا دو لبزانک زانگی نہ اِنت ایشی ھاترا دو ربیدگی ھم بوھگی کپیت- پرچا کہ زبان تھنا لبز بلدے نہ اِنت، ناکہ اے تھنا لبزانک ءِ رھبندانی یک پرکوت یے- زبان وَ دودءُ ربیدگاں یک شرّیں وڑے ءَ درشان کنگ ءِ نام اِنت- رجانکار ءَ را اے زانت بہ بیت کہ آ دو “تہذیبانی” نیام ءَ یک پُھل ءِ کِرد ءَ ادا کنت- ءُ رجانکار ءَ را بُنگَپ ھم سرپد بوھگی اِنت-

بلے اے زانگ بہ بیت کہ رجانک تھنا گیگانی یے نہ اِنت- آ وَ اِزمکارے بیت- گِدار، آزمانک، کسمانک ءُ شائِری ءِ رجانک وت لبزانک ءِ تہا اِشمار بنت- ‘عمر خیام’ ءَ چہ ‘فٹز جیرالڈ’ ءَ کئے جِتا کُت کنت-

ھَو اگاں تو یک نیکراھی نبشتانکے ءَ رجانک کنگ ءَ ئے یا ھِساب ءُ شہ زانتی ئے گُڑا ترا تچک ءَ تچک رجانک کنگ کپیت، ءُ یک وپاداریں رجانکارے جوڑ بوھگی کپیت- بلے من ادا ھم گْوشگ لوٹاں کہ انسان ءِ رجانک ءُ گوگل ءِ رجانک ءِ تہا پَرک بائدیں بہ بیت- بلے اگاں یک گِدارے لبز پہ لبز رجانک بہ بیت گُڑا آئی ءِ رَوانی پْروشیت بلے اے ھیال کنگ ھم بہ بیت کہ چہ رجانک ءَ گِدار ءِ اِزم گار مہ بیت-

مارا مُشکل ءُ گرانیں بلوچی یا وَ کارمرز کَنَگی نہ اِنت یا گُڑا انچو کارمرز کنگی اِنت کہ وانوک ءِ ھاترا مُشکل مہ بیت- انّوگیں گلوبلائزیشن ءُ ایشی دودمانی ءُ زُبانی زوراکی ءِ دیم ءَ بلوچی وتی جاگہہ ءَ دگنیا ءِ ھر زبان ءِ تاگت سکّ کم اِنت- مئے زبان ءِ اَستی ھم نزور اِنت- ما اے گَپّ ءَ نہ منّیں کہ زُبان ءَ لبزانکار ءُ دانشور جوڑ کن اَنت- راستی ایش اِنت کہ زُبان لَس مھلوک ءِ ھَید، تْراول، وشّی ءُ گَم ءِ درشان کنگ ءِ نام اِنت- اے ھماھانی ساچِشت اِنت- ھما ایشی تہا شیرکنی کارَنت ءُ ایشرا پلگارنت- لبزانکار ءُ دانشور گوں یک پیمکاری ءَ ءُ تیکنالوجی ءِ کارمرزی ءَ زُبان ءِ دیمشت ءِ ھاترا کار کن اَنت- لبزانک ءِ لوٹ ھمنچو گیش اَنت کہ نوکیں زمانگ ءِ زلورتاں گوں ھمرنگ بوھگ ءِ ھاترا بلوچ ءِ لبزانکار ءُ دانشوران ءَ سکّ باز کار کنگ کپیت- بلوچی زبان ءِ تہا انّوگیں اَھد ءِ دیدانک ءُ بُنگَپّانی مان کنگ ءِ ھاترا شرّیں گامگیج ءِ زورگ ءِ زلورت اِنت- کاروبار، تیکنالوجی ءُ سیاست ءِ تہا انگریزی سکّ باز ارزشت داریت- بلے مئے بدبھتی ھمیش اِنت کہ مئے راج چہ انگریزی ءَ نزانتکار اِنت- ما چہ سامراج ءِ دربرجاہاں گوں گیگانی، سپارت ءُ ریپینگ ءَ وانگداد زُرتگ- آسر ھمیش اِنت کہ چُشیں دو سئے مردُم ھم دست نہ کپیت کہ چہ بلوچی ءَ انگریزی ءِ تہا رجانک کُت بکنت- ھمے وڑا انگریزی نہ زانگ ءِ سَوَب ءَ ما چہ اردو ءَ بلوچی ءِ تہا رجانک کنیں- ءُ ایشی تہا مزنین جنجال ایش اِنت کہ اردو ءِ رجانک وت پُورا ءُ سرجم نہ اَنت-

بلے اے راستی ءَ اَبید بلوچی ءَ نا دلگوشی ءِ تہا دارگ ءِ ھِچ نیمون پَشت نہ کپیت- میاں اُستمانی باپار ءُ “سفارت کاری” ءِ میدان ءَ بلوچی ءَ وتی پادانی سرا اوشتگی اِنت… تَچک، وشّال ءُ راست!!ـ

رجانک دگہ چاگرد ءُ اَھد ءِ مردمانی مارشت ءُ ھیالاں سرپد بوھگ ءِ ھاترا مئے زانت ءُ بودشت ءَ مزن کنت- اے مئے پگر ءُ سسّا ءَ بازیں وڑا درانگاز ءُ جُہل کنت- رجانک گْوش اَنت کہ بلوچ ھر چیزے وت نبیسگ ءَ اِنت جہانی لبزانک ءِ تہا آئی ءِ ارزشت چے اِنت- رجانک ءِ سَوَب ءَ مئے وانوکاں ءَ دُگنیا ءِ جتا جتائیں زُبانانی ساچشتاں وانگ ءُ سر پد بوھگ ءِ موہ رسیت- ما چہ جہانی لبزانک ءِ ساچِشت ءُ لبزانکی تام ءَ وتی شیرکن ءُ شادیں بلوچی زبان ءَ آژناگ کُت کنیں-

رجانک مارا انسان ءِ مزنیں ءُ ھَواریں چاگردانی سرپد بوھگ ءِ موہ دَنت- شکر اِنت کہ مئے زبان بازیں گالوار ءُ لبزانی سَوَب ءَ دگنیا ءِ سیریں زباناں چہ یک یے، ھمے ھاترا ایشی تہا رجانک کنگ سکّ ارزان اِنت- رجانک بلوچی زبان ءِ میدَگ ءَ چہ دومی انسانانی تجربہ ءِ ترونّ ءِ ناناں چِکار کنت-

“ایکسچینج ٹرانسفیوژن” تھنا درمانے نہ اِنت، اے مئے نوکیں دگنیا ءِ بدن ءِ بھر جوڑ بوتگ- زبان ءَ را چہ نوکیں ساچشتاں چِکار بوھگی اِنت- زبان ءِ دیمروئی ءَ را ھِچبر بریک نہ لگّیت- رجانک بلوچی ءَ سائنس، اِزم ءُ ربیدگ ءِ جارکشّی ءِ ھاترا مُھکم کنت- رجانک تھنا گیگانی نہ بنت- اے تئی زبان ءَ ورزش دئے اَنت، ءُ آئی ءَ استومند جوڑ کن اَنت- آئی ءِ زِند ءَ مزن کن انت-
انچو ما چاریں کہ انگریزی زُبان چہ رجانک ءِ سَوَب ءَ پھلوان اِنت، روسی، اَرَبی، پرانسیسی زُبان چہ رَجانک ءِ تاگت ءَ جہانی زُبان جوڑ بیتگ اَنت- چہ رجانک ءَ ما سسّا ءِ دیمروئی ءَ زُوریں، ما چہ لبزاں سیر بہ ایں ءُ بازیں بتل یے ھیل کنیں- آ کُجام بلوچ اِنت کہ آئی ءَ بلوچی ءِ دیمروئی شرّ نہ لگّ ایت- ما سرکار ءَ وَ منّارینت نہ کنیں کہ آ داں پنچ سال سرکاری بجٹ ءِ یک مزنیں بھرے رجانک ءِ سرا ھرچ بکنت، بلے ما وتا چہ پَرماش کُت کنیں کہ ما وتی دل ءِ تیاب ءَ اجازت بدیں کہ آ وتی زِر ءِ چولاں گوں ھوار دومی دود ءُ ربیدگاں ھم وتی بگل ءَ بداریت-

بلوچی ءَ گیشتر دلکش، استومند، شیرکن ءُ وشرنگ جوڑ کنگ ءِ ھاترا رجانک بکن اِت، رجانک کنائین اِت ءُ رجانک بہ وان اِت-

شاکرمراد ءُ شائری

نیامت کریم

دی بلوچستان پوسٹ 

زِبھریں موسمانی ژندیں ارواہ بہ گندئے انگتءَ بازیں کئیپ ءُ روکیں زگالانی تُستگیں دوتانی وازمندی انت بَلے اے سال ءُ ماہ وتی بے رنگیں کشکاں راھی اَنت اَنگت ءَ دم نہ بُرتگ اَنت پروشانءُ اَڑان اَنت کپان اَنت بَلے پہ دلجمی امروزءِ تہ کُشیں منزلے ءِ نیمگ ءَ رھادگ اَنت اوست ءِ روکیں کندیلانی رژناھی ءِ ودار ءَ باندات ءِ اُمیت ءَ سَر ءُ رند اَنت بالوانی شپ کپتگیں جیڑگاں دور نہ داتگ اَنت پُرسِلاہ اَنت ءُ جُنزءِ ھمرائی ءَ روان اَنت لبز ءُ گال لچہ کاری راجی چِست ءُ ایر وتی کوراسیں چاگردءِ بے دریں باھنداں گوں پیوست اَنت وھد بگندئے ایشاں ڑرینگ ءِ کُوشست ءَ کنگ ءَ بہ بیت بلے ایشاں گیدی ءِ چاریں رنگ ءُ موسم دیستگ اَنت ایشانی دمبرگ چوں ھَما کربلاہ ءِ میدان ءِ داواءِ ھساب ءَ اِنت ۔

لچہ کاری زندمان ءِ مارشت ءُ سساساچانی درنگازی ءِ نام اِنت شاکرمراد ھمے ازم ءُ نام ءَ زندگ کنگ ءِ جُھدءَ ھرروچ کنگ ءَ اِنت شاکرءِ شائری ءُ آئی لبزانی گالریچ من ءَ ھمے ھاترءَ دوست بیت کے آ، مدامی وتی دِرتہ پُچیں راج ءُ مھلوک ءِ کُلوہ ءَ دیم ءَبرگ ءِ رپک ءَ زانت بگندئے شاکر منی انچیں نزیکیں مونس ءُ ھمسپرے چہ براتے ءَ من ءَ دیم ءَ تِر انت من اے چاریں دانکاں پہ اے ھاترا اے کاگداں سیاہ کنگ ءَ نہ آں کے من چنچو گوں آئی ءَ آشناہ ءُ ھم روان آں من ءَ آئی ءِ متلب ریچیں لبزاں سَک تکانسر ءُ مجبور کتگ کہ من مرچی اے بے سریں باوست ءُ تراناں کنگ ءَ آں برے برے شاکرءَ واناں دل گُشیت زندگی بلے آسر بیت بلے دگہ ھچ مہ وان ءُ مانا مکن بس ھمے لبزاں گوں وتی تھنائی ءِ امبازاں مُلما بہ بو ازم ساچی ءُ لبزانی کچ ءُ کساس کنگ من گُشاں شاکرءِ راستی دست ءِ لیب انت منی نِز ءَ ۔

اِشکءَ تَب ءَ نہ زانت من ءَ گم مدام دنت
تو بے وپا بہ بئے من ءَ اے دل ملام دنت

کاسد برو بگش تو منی ماھیں ھانی ءَ
تئی شئے مرید گنوکیں دمکاں سلام دنت۔

شئے مرید ءِ بِرتکگیں ٹپانی نبشتہ کنگ ءُ درشان کنگ وشیں بلے آھاں مانا ءُ پُرساچ کنگ بگندئے گران بہ بیت پہ ھَما مردم ءَ کہ انگت اشک ءِ بازار ءَ پہ سواد درنہ کپتگ۔

پہل کن جان من پہ تو گیشتر نبشتہ کت نہ کت
وھدءَ اگاں مُوہ دات تَرا سرجم ءَ واناں ءُ نبشتہ کناں

تپاکی منزل اِنت

نبشتہ کار : نوہان نور بلوچ

دی بلوچستان پوسٹ 

مرچی بلوچ راجی جنز ھما جاگہ ءَ سر اِنت کہ واتر بوگ ءِ ھچ راہ ءُ در پشت نہ کپتگ.ساری ءَ پاکستان مئے لوگانی سرا اُرش کتگ مئے مات ءُ گہاراناں لٹ ءُ شاپ کتگ مئے برات کماش ورنا ھر تبکہ ءِ مردم آ ڈاکٹر، ماشٹر، نودربر، بزگر، شپانک یا دہکان بہ بنت ریاست ءَ گارءُ بیگواہ ءُ شہید کرتگ انت ءُ انگت کنگ ءَ اِنت. بلے نوں پاکستان ءَ را بلوچ نوجواناں بلوچ راج ءِ جہد ءَ بلوچ ءِ کربانیاں انچو بیوار کتگ ریاست مرچی لوگانی توک ءَ دور کنت مئے مات ءُ گہاراں گار ءُ بیگواہ ءُ شہید کنگ ءَ بندات کتگ مرچی بلوچ راج ءِ چُشیں لوگ ءِ پشت نہ کپتگ کہ آ لوگ ءَ یک راج ءِ پرزند ءِ شہید ءُ گارءُ بیگواہ نہ بوتگ ھمے وڑ ءَ مرچی ریاست لانک بستگ پہ مئے مات ءُ گہارانی گار ءُ بیگواہ ءُ شہید کنگ ءَ پیسرا ھم ریاست ءَ مئے مات ءُ گہار بیگواہ ءُ شہید کتگ اَنت ءُ کنگ ءَ اِنت بلوچ زالبولانی گارءُ بیگواہی نوکیں گپ ءِ نہ اِنت بلکین ءَ 1973 ءَ چہ بنا بوتگ بلے مرچی ریاست ءَ را بلوچ راجی جنزا ھمنکس تنگ کتگ کہ ریاست ءِ کُلین راہ ءُ در بند اَنت کہ ریاست ءِ سر ھچ پِر نہ بیت کہ من بلوچ راجی جھد ءَ چوں پُروش دات بکناں ریاست ءِ بازین راہ ءُ درانی بند بوگ ءِ سبب ءَ ریاست پہ وتی پہریزگ ءَ یکیں آکری آپشن ھما راج دوست ھما نوجوان ھما گلزمین ءِ پرزند کہ مرچی ریاست ءِ دیم ءَ چو کوہیں کلات ءَ مِک اَنت پہ ماتیں گلزمین ءِ واستہ وتی ھرچ وڑیں واہشت کُشتگ انت پہ وتی گلزمین ءَ ءُ پہ وتی پدمندتگیں راج ءِ باندات ءِ ھاترا وتی نُگرہیں جان ندر کتگ انت ءُ کنگ ءَ اَنت ریاست نوں راجی جنز ءِ هتم کنگ ءِ واستہ آجوئی لوٹوکیں پرزندانی زھگ ءُ زالبولانی ءُ سیاد ءُ واریسانی گار ءُ بیگواہ کنگ بنا کتگ دانکہ آ چہ وتی آجوئی ءِ لوٹ ءَ وتی مکسد ءَ دست بِردار بہ بنت بیا انت مئے دیم ءَ چم جہلی بکن اَنت بلے گلزمین ءِ ھما پَرزند کہ وتی کُلیں واھشت کُشتگ اَنت وتی کُلیں استی وتی گلزمین ءِ واستہ ندر کتگ اَنت نوں آ پرزند کجا وتی راجی لوٹ ءَ دست بردار بنت ریاست ءِ دیم ءَ وتی دستاں بُرز کنت . وتی باندات ءَ تہار کنت آ کہ گلزمین ءِ پَرزند اَنت آ کدی ریاست ءِ دیم ءَ چم جہلی نہ کن اَنت بلکین ءَ چو بولان ءِ کوہ ءَ ریاست ءِ دیم ءَ مِک بنت.

مرچی بلوچ راج ءِ توک ءَ یک مزانیں آشوب ءِ اتک ءَ مرچی ھر یک پرزند ءِ کُربانی ئے دیگ ءَ چک ءُ پد نہ بیت بیدئے ریاست ءِ کاسگ چٹاں.

مرچی ماتیں گلزمین بلوچستان ءِ توک ءَ 40 ھزار ءَ گیش بلوچ پرزند گار ءُ بیگواہ اِنت ءُ 10 ھزار ءَ گیش ژانگولیں کُنٹ دست کپتگ ءُ مرچی مئے ھزاراں گُہار جنوزام اَنت ھزاراں ماسانی بچ شہید ءُ گار ءُ بیگواہ اَنت ھزاراں زھگانی سر ءِ ساھگ بزاں پِت شہید گار ءُ بیگواہ کنگ بیتگ اَنت ءُ بوگ ءَ اَنت.

اے کُربانیاں چہ ابید مرچی یک سوال ءِ چِست بیت کہ مئے راجی رہشون ءُ پارٹی پرچہ یک ءِ دومی ئے گوما نندگ ءَ ءُ تپاک بوگ ءَ دیما نہ کِنزاں؟

مرچی بلوچ ءِ ھر یک پرزند ءِ پہ تپاک بوگ ءَ تلوس اَنت مرچی ھر ھما ماتانی چم رھچار اَنت کہ آھانی بچ شہید ءُ گارءُ بیگواہ اَنت ھما مات مرچی تپاکی ءِ مستاگ ءِ رھچار اَنت کہ مئے رھشون یک مُشت بنت ءُ شہیدانی لوٹاں منزل ءَ سرکن اَنت.

مرچی پہ بلوچ راج ءِ ھزاراں سالی تاریک ءِ گار ءُ بیگواہ کنگ ءِ واستہ پاکستان ءَ لانک بستگ ءُ مرچی بلوچ راجی جُنز ءِ ءُ تاریک ءِ گار ءُ بیگواہ کنگ ءِ واستہ پاکستان ءُ چین ءَ دوئیناں لانک بستگ مرچی پاکستان گوادر پورٹ ءَ چین ءِ حوالہ کنت کہ تو بیا بلوچستان ءِ توک ءَ کار ءُ بار بکن ءُ پیسرا ھم چین بلوچ راجی مڈیانی لڈ ءُ بار کنگ ءَ اِنت بلے پاکستان ءَ بلوچ راجی مڈیانی بھا کنگ ءَ گوں ھوار مرچی بلوچ ءِ دریا ھم بھا کُتگ مرچی گوادر ءِ مردمانی زمیناں پہ زور پچ گرگ بوگ ءَ اَنت مرچی گوادر ءِ مردم پہ ترمپ ءِ آپ ءَ مھتاج اَنت مرچی ایوک ءَ گوادر ءِ مردم نہ بلکن ءَ مرچی بلوچ ءِ ھر گِدان ءِ ھست پاکستان ءَ وتی دست ءَ کُرتگ اَنت بلوچ راج در پہ دری ئے زند گوازینگ ءَ اِنت.

مرچی کہ چین پاکستان ءَ را 65 بلین ڈالر پہ گوادر پورٹ ءِ واستہ دنت گُڑاں اے یک جیڑگی گپ ءِ کہ چین ءُ پاکستان ءَ را تنگ کنت ءُ کرتگ کہ آ بلوچ راجی جنزا کتم بکن ءُ سی پیک ءَ کامیاب بکن ءُ پاکستان ءَ چونا ءَ ھم بلوچستان ءِ توک ءَ 70 سال اِنت زلم ءُ زوراکی کنگ ءَ اِنت بلے وھد ءِ پاکستان ءُ چین اپریل 2015 ءَ سی پیک ءِ نام ءَ 56 بلین ڈالر ءِ معاہدہ ءَ کن اَنت ھما روچ ءَ بگر تاں روچ ءِ مرچی پاکستان ءَ بلوچ راج ءِ سرا ھما زلم کرتگ اَں ءُ کنگ ءَ اِنت آ تاریک ءِ توک ءَ نہ بوتگ اَنت مرچی ھما میتگ ءَ کہ سی پیک ءِ دگ روگ ءَ اِنت ھما میتگانی میتگ بلڈوزر کنگ بوتگ اَں ءُ ھما میتگانی مردم گار ءُ بیگواہ ءُ شہید کنگ بوت اَنت ءُ میتگانی میتگاں ویران اَنت ءُ ھما میتگانی مردماں مرچی وتی بُنکی جاگہ یل کرتگ اَنت دومی شہر ءُ میتگاں شُتگ اَنت در پہ دری ءِ زند گوازینگ ءَ اَنت.

اے زلم ءُ زوراکیاں چہ ابید مرچی پرچہ مئے رھشون ءُ پارٹی یک مُشت ءُ تپاک نہ بنت مرچی اگں ما تپاک نہ بوت اَں مرچی اگں مئے رھشوناں تپاکی نہ کُرت گُڑا مئے اے داتگین کُربانی گوں مئے ھزاراں سال ءِ تاریکی دود ءُ ربیدگ زبان ءَ ھوار گار ءُ بیگواہ بنت.

مرچی من وتی رھشوناں گِنداں منا ھما میتگ یات کئیت کہ میتگ ءِ لوگ 40 بنت بلے مسیت 10 بنت میتگ ءِ کُل مردم مسلمان بنت یکیں الله ءِ منوگر بنت بلے مسیت 10 بنت بزاں میتگ تپاک نہ بیت مرچی من وتی رھشون ءُ پارٹیاں گِنداں ھمے وڑا اَنت ءُ مرچی وھد است کہ مئے رھشون یک مُشت ءُ تپاک بہ بنت اگاں مرچی یک مُشت ءُ تپاک نہ بوت اَنت گُڑاں اے نازرکیں تاریک کسر ءَ ماپ نہ کنت پرچہ کہ مرچی بلوچ راج ءِ وجود ءِ مسئلہ اِنت.

آزمـــانــک
بے سماہی مـئے راج ءِ تـبـاھـی نـہ انـت گُـڑا چـی انـت؟

آزمانک کار: بالاچ خان

دی بلوچستان پوسٹ 

مئے ھمُک روچ ھمے یکیں پترءِ سرءِ نند ءُ نیاد وتی کوم راج ءِ زندگی بارہا جیڑگ مئے راج ءِ واستہ اّلم یک وشیں مستاگ ءِ بیت.اگاں ما بچاریں! سنگت اں ما سک دور پُشت کپتگیں کمیں ما بجیڑیں الّم یک پسّو یے مار دست کپیت. سنگت اں! مئے نازانتی یے بُن ھما وت پرستیں انسان انت کہ وتا بلوچ ءُ بلوچ راج ءِ دوزاہ ءُ لیڈر گُشنت.

بلے اگاں ما بچاریں اے ؤ پدر انت کہ اے درو ھما پندل ءَ گوں ھوار انت کہ آ مئے گار ءُ بیگواھی یے پندل انت کہ دری لشکر ءَ سازتگ. سنگت اں! ایشاں مئے راج ءِ بانداتے سما نیست.
بس وتی لاپے پُرکنگ ءَ روچ ءِ یک شومی یے ساز انت.
اگاں ایش اں پما بوتیں گڑا دیری بوتگ ات.

مروچی مئے دیم گوزگ ءَ انت انکس اسکول اڈ دیگ نہ بوتگ کہ اینکس سیلیں نشہ یے سہولت ءِ اڈہ جوڑکنگ بیتگ. بے روز گاری انچش ھام انت کہ مردم پہ لاپے شوہاز ءُ وتی گلزمین ءَ یل کنگ ءُ ڈنی ڈیھ اں روگ ءَ انت. سے سے سال ءَ پد باریں کا ینت یا نا؟
اے مئے راج ءِ تبائی نہ انت گُڑا چی انت؟

مروچی مئے ھما سرمچاریں ورنا کہ زلم ءِ ھلاپ ءَ چِست انت ھمانی جُھد ءِ ھلاس کنگے ھاتر سرجمیں پنجاپ ءِ پوج بلوچستان ءَ مان اتکگ ھروچ مئے ھر لوگ ءَ گوں ھاس بندیان انت. مئے مات ءُ گہارنی گشان ءَ پاد مال کنان انت.
ما بچاریں ھر ھما ماتءِ مزاریں بچ کہ ھق ءِ گپءَ جنت ھمائی ءَ چست کنت ءُ بارت کس نزانت کجا بُرتِش.
بارت زندان ءَ ازیت ئے دنت ءُ چیزے ماہ ءَ پد وتی نسگیں درداں شھید بیت ءُ پدا لاشا یے ما ءُ ویرانگ اں دور دنت.

سنگت اں! بیا ات یکجاہ بئیں ھما زوراکیانی ھلاس کنگ ءِ جھدا کنیں کہ آ مئے راج ءِ لوٹ ءُ واھگ اں آس دیان انت.وتی راج ءِ ھما دژمن ءَ ھلاس کنگے ءُ تاچینگ ءِ جھدا کنیں. اگں نہ سنگت اں! مئے بلوچ راج ءِ واستہ ھچ نہ مانیت. ھچ نہ مانیت. سنگت بالاچ ءَ وتی گپ جت اَنت ءُ ما درس پدا دیم پہ وتی لوگاں رہادگ بوتیں.

بس ھمے روچ ءَ پد سنگت بالاچ کس ءَ نزانت کہ کجا شُت دوسال ءِ بُرز ات بلے ھال ءِ نیست ات.

ھمک دو مایے سرا من اتک اں سنگت بالاچ ءِ لوگ ءَ گنداں کہ بالاچ ءِ پِت بالاچ ءِ گار ءُ بے گوائی یے گماں روچ پہ روچ کمزور تر ءُ بزگ تر بوان ات کار ءُ روزگاری نہ ات سک کماش ءُ آجز ات. لوگ روچ پہ روچ گشے چو سیاہ مارا تہار ءُ سیاہ بوان ات.
ہر نیمگ ءَ اُمیدے درچک گیمران ات انت. آزمان ءُ زمین گشے یکجاہ بوتگ ات انت.

ھمے گمو اندوہانی تہا جکگ ءُ اسکگے بیماری ءَ ھم سرا زرتگ ات.
دست ءُ پادانی لرزگ ءُ سرے چکرگ گوشے آئی بچے داتگیں داد ات انت. وتی بچے گاری یے نہ سگیں درداں سک بے وار ات. بلے ھمک روچ شت ءُ مردم ءَ ناں جستے کُت گشے کس ءَ شریں پسّو یے دات نہ کُت کہ آئی یے دل کمو بساڈیت. ھر کس گشے وت تُرس ءُ بیم ءِ

آماچ ات. انچیں جاور ءِ بنگیج ات کہ کس ءَ گوں کسی کارا گشے کار نیستی ءِ برابر ات. ھمک روچ بس آئی کار ھمیش ات روچ پہ جُست ءُ پد شپ گوں بالاچ کوھیں گماں گوزان ات. ھمے وڑءَ یک روچے دراتک پہ جُست ءُ پدا بلے گشے اے گم پہ بڈ گران بوان ات چہ میتگ ءُ لوگ اں دور چو زھریں مردمے ءَ پہ نا اُمیدیں دل ءِ یک ویرانگیں کورے ءَ مانتران بوت ءُ راہ ءُ نیم ءَ گشے روچ برانز بوت ءُ زمین جل درچک ءُ دار ءُ دازءُ پیش سیا بوان بوت انت ھمدا واجہ ءَ چہ بالاد ءَ کپیت پدا پاد نئیت۔ اچانک ءَ یک دار چینوکیں مردکے ءَ دیست پہ تچگ شُت لوگے مردم ءِ ھال دات انت. لوگ ءِ مردما نی گم گیش بوت انت گیش گموار ءُ پریشان بیت اں۔ لہتیں مردم پہ پُرس پاتیای روگ آیگ بندات بوت۔ ایندگہ کوم ھاموش تماشائی بوت۔ انچش کہ پیسرا بوتگ ات. دو روچ ءَ پد گنداں یک اسپیت پچی ایں ورنایے لاش انت کہ جان ءِ پہ تیر سُپتگ چپی ءَ دور داتگ اِش. اے جون بالاچ ءِ جون اَت، تئی ءُ منی جون اَت .

پرچہ کے تو بالاچ ئے من بالاچ اں
ما بالاچ ایں

کئے اِنت بدیں کردانی زمہ وار؟

اکیل مراد

دی بلوچستان پوسٹ 

یک راجے ءِ چاگرد ءَ تو ھما وڑ ءَ کشان کن ئے ھما وڑ ءَ ھما چاگرد رنگ زیر اِت ءُ وت ءَ ھما داب ءَ کنت۔

اگاں تو چاگرد ءَ ردیں کِشک ءَ بہ پِرین ئے ردیں کشک ءَ چاگرد وت ءَ کشان کنت اگاں تو چاگرد ءَ شَر ءُ تچکیں کشک ءَ بہ پرین ئے چاگرد الم وت ءَ رنگ دنت ءُ وتی کرداں شَرے وڑے ءَ روان کنت۔

نِی بلوچ چاگرد ءِ سر ءَ کپتگیں اَسر ھنچش ودان اَنت کہ بے ھساب اَنت آئی ءِ دراھیں کرد، دود، ربیدگ چہ جھان ءِ وڑ ءُ پئیماں جتا اَنت بلوچ چاگرد ءِ سر ءَ کپتگیں اَسر ءَ ھرکس زانت کہ کجام وھد ءَ کپتگ کئے ءَ؟ اے اسر آھورتگ اشی ءِ پدر کنگ سک ارزان اِنت ۔

مروچی ھمک جاہ ءُ ھمک کنڈ ءَ کپتگیں اَسر پدّراں ھنچش شُمک ءِ نادراھی بہ بیت یا زھر آماچیں نشہ بہ بیت اے ھردوکیں نادراھیانی ھساب یک اَنت یک وڑ ءَ تر ءَ کشان کن اَنت۔

شُمک ءِ نادراھی تر ءَ مرگ ءِ زھریں پیالہ نوشین اِنت ءُ نشہ ھم تر ءَ ءُ تی چاگرد ءَ بے سماہ کنت ءُ گڈی ءَ تر ءَ مرگ ءِ زھریں پیالہ نوشین اِنت۔

اگاں یک اُلسے ءِ تہ ءَ شریں وڑے ءَ گر ءُ دار بہ بیت ءُ راجی کار بہ بنت اے ھردوکیں نادراھی ءَ انسان رَکیت کت کن اَنت، بلے وائے اے بدیں بھت کہ تر ءَ ھنچش بے سماھے کُرتگ کہ تو اے دویں چیزاں وت ءَ چہ پھریز کت کنگ ءَ نہ اِت۔

ءُ دومی ھمے نشہ ءِ زور ءَ چہ وت ءَ ساد ءَ درنجگ منی نز ءَ اے مزنیں اھمکی ءِ اشی ءِ جرم واجہ ھدا ءَ ئے گور ءَ ھم سک باز اِنت کہ ھساب کنگ نہ بیت، پد ءَ دومی ھمے بیت کہ تو وتی مکسد ءَ ھم سوبین نہ بئے پرچاکہ تو وت ءَ یک مکسدے ءِ واست ءَ نمیران کنگ ءَ نہ اِت۔

تو بس ھمیشی ءَ جیڑگ ءَ ئے من بزگاں من بزگ کنگ بیتگاں، ءُ من ھمے بزگی ءِ تہ ءُ مِرگ لوٹ آں منی ھیالاں اے بزگی ءِ واست ءَ ھم واجہ ھدا ترا ھوش ءُ پکر داتگ ءُ جوانیں کِشک ءُ در ھم ھستاں بزگی ءِ ھلاپ ءَ ترا چی کنگی اِنت ۔

بلے نادانیں انسان بس ھمے پکر ءَ جَنت منی زندمان گلام اِنت من ھمے گلامی ءِ وڑ ءُ پئیم ءَ تراں گڑ ءَ کدی ءُ کجام وھد ءَ تر ءَ وتی گلامی ءِ سماہ بیت ھما وھد ءَ کہ تو ھمے زھرناکیں نشہ ءِ آماچ ءِ یا ھما وھد ءَ تو وت ءَ ساد ءَ کُٹ ءَ دیگ ءَ ئِے۔

اناں بیلاں چُش نہ انت کہ ھمے گلامی ءِ ھاتر ءَ تو وت ءَ گیش گلام بہ کن آھوکیں پدریچ ءَ کجام کلوہ ءَ دات کُت بہ کن آں۔

مئے زگریں رھشونانی ءُ راجی گلانی تہ ءَ نشہ ءِ جوانیں رنگے ءَ ھستیں کہ نشہ ءِ آسر چی انت؟ ءُ نشہ تر ءَ کجام وڑ ءَ سر کنت ھمے راجی جنز ءِ سرمچاراں میتگ میتگ ءَ تریتگ ءُ ھیروینیانی ءِ نوکیں واست ءَ جھد کرتگ اے گپ راستگی اِت گوستگیں سَے سال ءَ پیسر اے اکس ماں سوشل میڈیا ءَ شنگ ات اَنت ھم آیانی جاندراھی ءَ کنگ ءَ اَت ۔

مروچی کہ بلوچستان ءِ کنڈ کنڈ ءُ میتگ میتگ ءَ پاکستان ءِ پلیتیں لشکر ءِ چوکی ءُ بدکردیں ءُ بلوچ ءِ بدیں دشمن ءِ سپاھی جاڑیگاں مروچی ھمے میتگانی تہ ءَ آرت ءُ شکر ءِ دکان بند اَنت بلے منشیات ءِ “ساکی ” پچ اَنت پرچا؟

مروچی دنیا ءِ تہ ءَ منشیات ءِ بھاکنوکانی تہ ءُ امام بیل کہ اولی سْرپ ءَ ھوار انت کہ مروچی پاکستان ءِ وتگڑیں اسمبلی ءِ تہ ءَ ھمیشی ءِ چک وزیر ءُ گزیر اِنت پرچا؟

اگاں تر ءَ وتی پدریچ رکینگی اِنت تر ءَ آھوکیں زھگ رکینگی اَنت تر ءَ وتی لوگ رکینگی انت، تر ءَ وتی گیریت رکینگی اِنت گڑ ءَ تچک ءَ وتی شون ءَ بہ دے ءُ پاکستان ءِ پلیتیں لشکر ءِ ھلاپ ءَ وتی زبان ءَ پچ کن ءُ آئی جگر ٹکر ٹکر بیان بنت۔

اسما بلوچ لیاری ءِ وابانی باندات

حمید بلوچ

دی بلوچستان پوسٹ

عِلم ءُ زانت ءُ بودشت کسّی پت ءُ پیرُکی میراس نہ اَنت۔ کسے جُہد کنت محنت کنت دیما کئیت ءُ کسے کہ مرچیگیں تہاری ءِ تہا باندات ءِ رُژنائیں واباں گِندیت تہ الّم سوبمند بیت۔ بلئے مئے چاھگرد ءِ تہا بازین انچیں بُودشتی ءُ ٹیلنٹڈ جنک ءُ بچک است اَنت کہ پہ وتی چاگرد ءِ باندات ءِ رُژنائی ءَ واب گندنت بلئے آہانی دست نہ رسیت ۔ اے رِد ءَ بائد اِنت کہ مئے چاگرد ءِ وانندگین مردُم دیما بیا اَنت ءُ وتی وتی بَہر ءَ ہوار بکن اَنت پہ وتی راج ءِ باندات ءِ چاگرد ءِ گہبُودی ءَ۔ مئے چاگرد ءِ تہا اسما بلوچ اوں وتی چگرد ءِ باندات ءِ رُژنائیں وابے گِندگ ءَ اِنت ۔

اسما بلوچ لیاری ءِ یک راج دوست ءُ انسان دوستے کہ ہر وھدے نشتگ ہبر بوتگ گڑا بس ہمے یکیں ہبرئِے کتگ ۔بزگی ءِ لاچاری ءِ حق ءُ ناحق ءِ۔ گیشتر ہمے گشتگ ئِے ” اگاں ما ہرچ ڈوبہ ءُ ذِمّہ واری ءَ دگرءِ سرا دور بہ دئیں مئے ہچ وڑیں کار ہچبر یک گامے ءَ دیما شت نہ کنت۔من ہر وھدے چہ وتی گس ءَ در کایاں 7 یا 8 دمک گوازیناں من ءَ ہر رنگ ءُ گونگ ءِ کسانیں چک دیما کئیت کہ آ چہ وانگ ءَ زبہر انت منی مستریں ھب ءُ واھگ ہمیش انت کہ من اگاں دگہ ہچ کت نہ کناں ہمے زھگاں، ہمے جنکیں زھگاں دست گپت کناں ءُ ہرچی زاناں اشاں سرسوج کناں ءُ دگہ وتی دوست ءُ دزگہاراں گشاں داں من ءَ کمک بکن انت“۔ اسما بلوچ وت اوں ہنر مندیں جنکے کہ ہمے جنکیں چکانی وانگ ءُ زانگ ھاترہ 5 اگں 6 سال جہد ءِ اوں کتگ۔لیب ءُ گوازی ءِ سرا باز جہدئےِ کتگ۔ وت اوں ہمے سال ءَ ومن ایکسیلنس ءِ ایوارڈ ئِے گپتگ ۔

ما اے گپ ءَ اوں پہر بندیں کہ مئے جنکیں زھگ چہ کسے ءَ کمتر نہ انت لیاری ہما جاہ انت کہ چہ وڑ وڑیں بودناکی ءَ سرچکار انت لیب گوازی، سیاست، ساز ءُ زیمل، شعر شاعری، ادیب ءُ گشندہ کہ مروچی ہرکس پہر بندیت۔ انچو جنکیں زھگ دیما انت پہ وتی راجی کاراں۔ ماھین بہ بیت۔حانی بہ بیت یا اسما بلوچ ءِ دروشم ءَ بہ بیت ءُ دگہ بازینے۔ نوں کائیں اسما بلوچ ءِ دیستگیں واب ءِ نیمگ ءَ کہ ہروھد ءَ ہدوناک بوتگ پہ ہمے کار ءَ ۔ہمے سال 2018 ءَ یک آرگنائزیشن اے جوڑئِے کتگ کہ نام ئِے( وان ومن ایسوسیشن اینڈ نرچرنگ )لیاری ءَ اے آرگنائزیشن ءِ مول مراد ہما کسانیں جنکیں چک کہ چہ وانگ ءَ زبہر انت آہان ءَ مپت وانینگءُ دگہ دستی ہنر ءِ سِکارینگ اِنت ۔ انوں داں اے کار برجاہ انت 4 یا 5 ماہ بیت گوں سوبمندی ءَ روان انت ۔بلے ما راج ءُ انسان دوستیں گل بائد ایں اے وڑیں کاراں گوں گشادی ءَ بہ ساڑائیں ءُ اخلاقی ءُ مالی کمک ءِ ہاترا وت ءَ مُدام ساڑی بکنیں۔

نبیل کادر

همل چراگ

دی بلوچستان پوسٹ

نبیل کادر تئی مرگ ءَ من ءَ هچ درد بوهگ ءَ نہ انت، اگاں بگشاں تئی مرگ ءَ من دردیگاں پدا دل ءَ کیت بس درد بوهگ دو روچ ءَ تئی نام ءَ گرگ ءُ پدا بیهال کنگ ایں؟؟؟

اے ما نوں عادت کتگ کسے بہ مریت ما دلپدردی درشان کنیں،دو روچ ءَ بژنی بئیں اگاں کمے زیاده مہر بوت گڑا آئی ءِ اکس ءَ ایر کنیں یا آئی ءِ سالروچ ءُ یات ءَ دیوانے کنیں دل ءِ زنگاں ریچیں پدا بیهال بئیں۔

مرچی ما دراه مهروان انت، دردی انت کہ مئے چاگرد ءِ هستی چوں ارزانی ءَ یک یک ءَ روگ ءَ انت ما هچ کت کنگ ءَ نہ انت،بلے اے وڑ هم نہ انت نبیل ءِ الاج کنگ نہ بیتگ، سمبالگ نہ بیتگ، نبیل ءِ چندے سنگت ءُ سیاداں بگندے کوشست کتگ بلے انگت نبیل همینچو لاچار بیت دانکہ پاهو ءِ ساد ءَ گُٹ کنت وت ءَ کُشیت،اسل نادرهی ءِ جند چی انت کہ هرچ الاج ءَ پد نادراه وش نہ بیت؟؟

نبیل من ءَ یات انت اسکول ءَ ڈسک ءِ جنگ پدا گوں وش گُٹی ءَشئر گُشگ،برے برے ماسٹر ءِ دست ءَ لٹ ورگ، کہ اسکول انت ادءَ وانگی انت( بلے ما کس زانگ ءَ نہ اتیں کہ مارا چے وانگی ءُ دربرگی انت بس هرکسی هنر ءُ زانت گُٹگیر بوهگ ءَ ات) سوت ءُ شئر ءِ جاگاه نہ انت۔ اگں دگہ آزاتیں ملک ءُ راجے بوتیں تئی دست گپتگ ءَ ترا راه شون داتگ ءَ، بلے تو وت جہد کت دیم ءَ شتے دانکہ ترا هر کس زانگ ءَ ات بلے تو تہ ءَ چہ تہنا اتے،ایوک ءَسر جنان اتے دانکہ نشہ ءِ آماچ بوتے۔

بازیں جُستاں نبیل کادر پرچا نشہ کنت؟ نشہ پرچا چوں ارزانی ءَ دست کپیت هرکس بلوٹیت کت کنت ؟کئے ءَ مئے چاگرد ءَ نشہ تالان کتگ؟ ما پرچا هچ کت نہ کنگ ءَ ایں؟ ما اگاں تہنا نبیل ءِ نشہ کنگ ءُ بیرانی ءَ بس بژنی بہ بئیں کہ ما نبیل نہ سمبال ات الاج نہ کت ،نبیل ءِ وڑیں هستی ءِ چہ ما شت، بلے مئے چاگرد ءَ دگہ بازیں نبیل هست اگں ما همے وڑ بوتیں گڑا همے وڑ زوال بنت رواں۔

ما اسل نادرهی ءِ هلاس کنگ ءِ هچ کوشست ءَ کنگ نہ ایں اسل نادراهی مئے راجی گلامی انت کہ ایدگہ نادراهی درست همے گلامی ءَ چہ پیداک بوتگاں۔ تو چینچو نبیل ءِ الاج ءَ کنے، تئی چاگرد اے وڑیں هستی ءَ چہ پُر انت نادراهیں چاگرد ءِ نادراهی ءَ گور جتگ انت۔ راشد دیدار ءِ الاج نہ بوتگ، رستم نود ءِ الاج نہ بوتگ دگہ باریں چینچو هستی هست انت کہ نشہ ءُ ایدگہ چاگردی نادراهی آنی آماچ آں۔ ما شریپ واهگ، راشد دیدار، رستم نود، نبیل کادر ءِ الاج ءِ کنگ ءِ کوشست ءَ انت،اسل نادراه مئے چاگرد ءُ ما وت انت ۔ مارءَ اول وتی الاج کنگی انت کہ ما چوں برداشت کنگ ءَ ایں چوں زندگیں، رند ءَ چاگرد ءِ الاج کنگی انت۔

ما درست زانیں سرکار ءُ واجہ کار مئے چاگرد ءِ هستی آں سِندگ ءُ برگ ءَ انت مارا بس دومی ءِ کار ءَ گوں کار نیست ما تماشہ چارگ زانیں پدا نندگ ءُ گریوگ۔ ما شائر،گشنده، نبشتہ کاراں گوں چاگرد ءَ کار نیست مارا گوں وتی ازم ءَ دلگوش دیگی انت بس کسے مریت پدا بژنی بوهگ،ملامتی ءُ دوزواه بوهگ ءِ رواج چار روچ ءَ دارگ ءُ بیهال کنگی انت۔

ما زانیں بازیں چیز مئے دست ءَ نہ انت سرکار پہ زانت پہ بلوچانی گار ءُ بیگواه کنگ ءِ واستہ کنگ ءَ انت،بلے بازیں چیزاں مئے هاموشی نندگ ءُ تماشہ چارگ پہ سرکار ءُ واجہ کاراں چد ءُ گیشتر آسانی پیداک کنت ۔

مارا وتی سوچ مٹ کنگی انت اے هاموشی پروشگی انت ما باز کت کنیں جلدی هچ شر نہ بیت بس همے درد،گم،مهر کہ ما هر وهد ءَ کسے مریت درشان کنیں مارا هر وهد ءَ وتی تہ ءَ دارگ ءُ جیڑگی انت دانکہ

همے روک کتگیں آس ءَ ما وت یک روچے سوچاں مہ بئیں۔

سَرپتگّیں پُلّانی وَشبو

نَدکار : زِرگوات بَلوچ

دی بلوچستان پوسٹ 

تانسِریں شَپ پَہ جیڑگ،جیڑگ ءَ وتئی گُڈّی پاس ءَ جان کَشان اَت کہ مُلّا ءَ بانگ دات من گوں بے چاڑیں واھگاں سُھب ءِ اُمیت ءَ بِگندئے رِیزاں بَستگیں لَجّانی ھُدا بُند مادِنیں کِشک ئے رَنداں مئے ڈیرتگیں اُوستانی کوٹ ءُ کَلات مُھکم بیت۔

بام ءَ ساپی دات ءُ روچ ءَ ٹِکّ کُرت دِل ھَڈّی ءَ پَد من دِھّ،دِھّ ءَ وتا گیگ ءُ گْوم کُرت دیم پَہ مَچکدگ ءَ راہ گیپت آں ،وھدئے مَچکدگ ءَ سر بوت آں کہ آمین چِتور اِنت چاراں داں ھَر نیمگ ءَ اَلگَشگ ئےماں کَپتگ،بَروار پَہ سرئےدِھکان پَہ سرئے۔من اے نَدارگ کہ دیست تَہ اَجکّہ ءُ ھیران بیتاں سر منی بَنی آدمانی چونیں جَنگلے ءَ کَپتگ آمین ءَ بِل ھَرکس گوں وتا مانگیشتگ باریں چونیں گپّے۔۔؟

من شگنزاں ماندیان دیم پَہ مَردُماں کہ جُستے گِراں اے چونیں اَلوتے سرجَمّیں مَچکدگ پُرسیگ اِنت،بیدئے شانتُلانی زھیری نالگ ءُ بُلبُلی شینزارگاں ھر یکّے گوں دومی ءَ سُک،سُک ءُ اَلوت اِنت۔
من وھدئے اے بَنی آدمانی جَنگل ءَ سر بیتاں تَہ کماشیں جَنین آدمے ءَ گریوگ ءُ زار بِنا کُرت۔من گیشتر ھیرانگی ءِ چَنڈیں کَوار ءَ کَپت آں کہ کئے ءَ جُست بکن آں چے بیتگ،ھَبر چی اِنت۔۔۔۔؟

کمّیں اُوشتگ ءَ پَد من اِنگو آنگو چارت داں رُودِرآتکی نیمگ ءَ مَچّانی چیرا کماش مَلّگ ءُ دھکان لِوار نِشتَگ اَنت۔من کسانیں گینسارتے کَش اِت ءُ دیم پَہ کماش مَلّگ ءُ دھکان لِوار ءِ نیمگ ءَ تیمیچ کُرت۔گوں سلام ءُ دْروت ءَ ھَوار من دَرائینت ناکو مَلّگ ھال کن ھَیر اِنت کہ مَچکدگ آمین ءِ بَدل ءَ پُرسی پَتّرے جوڑ بیتگ۔؟

کماش مَلّگ ءَ پَسّو گوں پُرشتگّیں گالوارے ءَ ترّینت منی بَچّ ھاک ھیر اِنت کہ دِل چو تین ءَ سُچ اِیت ،رَستراں مروچی پَد ءَ مُپت ءُ بیرَگ ءَ گَریبیں شاھل ءِ ذال گوں دُو جَنین چُک ءُ شیرمِچّیں زھگے ءَ آوار جَتگ ءُ وتئی بَندی جاہ ءَ بُرتگ۔

گوں اے نَہ وشیں ھالے اِیش کنگ ءَ منی ھَیال ءُ گُمان دُور ماں گیابانے ءَ پِیچ وَران بوت کہ اے ھَبر چَہ دَرد ءُ اَندوھاں سَرّیچ اِنت بلئے پَمن پَہ منی راج ءَ نوکیں ھَبرئے نَہ اَت،چیا کہ ھَمک سُھب گوں ھمے اھوالاں آشنا بوت۔

چہ اے جَگرسِندیں ھالے اِیش کنگ ءَ منی بالاد ژَند ءُ ژُول بوت ءُ باتِن ءَ جیڑگانی آس جَمبور اَت۔ رَنگ،رَنگیں ھَیال ءُ لیکّہ گُوش پَہ گْوش اَلوت کنگ ءَ اَت کہ ناگھاں پادبْرمشے بوت ءُ من گُڈت آں ۔۔۔!!

چارِیں آتراپاں چارت داں کس نَہ گِنداں۔۔! ۔دَمانے بے تَوار ءُ وانگّی ءَ پَد ،پَد ءَ گوں جیڑگاں سَر ءُ پُٹ بیتاں ،داں کَسانیں ساھتے ءِ پِر گْوزگ ءَھَوارمنی دیما گُبارانی ساھگے گوست ءُ زِرد ءَ تْرانگے جَکس اِت ءُ ھمے گُشتے کہ مَہ جیڑ اے کَہرّانی تاموریں شَپ آسر بیت ءُ بام سرا کش اِیت ، روچ ٹِکّ دَنت ءُسرپتگیں پُلّانی وَشبوھاں آتاریت ۔بَلئے پَہ اُوشتگ ءُ چارگ ءَ کار گیگ ءِ گْوم نَہ بنت،بَلکیں گاماں دیما شَھار دَئے ءُ جُنز مِنزل نَزیک اِنت۔شہیدانی رِتکگّیں ھُون گوں ھاکاں ھَوار نَہ بنت۔

من پَچلرزتاں۔۔۔۔۔!!!
چارت داں من ءُ مَچکدگ تھنا دِگہ کس نَہ گْواھیت،بَس آزمان ءَ شینکاں دَرائی کُرتگ ءُ دُور ماں کُوہ ءِ بُن ءَ گواتے لُڈان اِنت۔۔۔۔۔۔۔۔