TBP Balochi

مُکبر – بھادین بلوچ

نبشتکار۔ بھادین بلوچ

دی بلوچستان پوسٹ

جہان ءِ تہا دو رنگءِ مکبر ھست اَنت، یکے ھما اِنت کہ وتی زمین ءُ مہلوک ءِ رکینگءِ واستءَ ناشرکار ءُ دری ملک دُژمنانی سرا مکبری کن اَنت ءُ وتی مہلوک ءُ زمین ءَ پہاز اَنت۔دگہ یک مکبرے ءِ دابے اش اِنت کہ آ وتی ءُ وتی سرڈگار ءُ مہلوک ءِ پہازوکانی مُکبری ءَ کن اَنت ، جہان ءِ تہا بژناک تریں مُکبر ھمیش اَنت۔کہ مرچی باندا ما گوں وتءَ گندگ ءَ ایں کہ مئے جند ءِ بلوچ وتی سرڈگار ءُ مہلوک ءِ مکبری ءَ پہ ارزانی ءُ پہ وت ءَ شانے سرپد بنت۔وائے بے وانندھی ءُ وائے ایردستی کہ ترا ہزار لانت اِنت۔

مکبر بازیں رنگ ءُ درُوشمے ءَ بنت، لہتیں سیاسی رنگ ءَ بنت، لہتیں چیراندری بنت، لہتیں ھنچیں بنت کہ تُپنگ ءُ گاڑی ءِ شوکین بنت ءُ لہتیں سرعام مُکبری کن انت، بلے مُکبر مُکبر اَنت تُری کُجام رنگ ءُ دُروشم ءَ بہ بنت۔ سیاسی مکبر آ مکبرانءَ نہ گُش اَنت کہ لشکری آپریشن آں گون انت یا کہ شپ ءُ روچ ایم آئی ، آئی ایس آئی ءِ کیمپانی گیٹانی دپ ءَ ٹُک انت بگندئے سیاسی مُکبر سیاسی رنگ ءُ دُروشم ءَ بلوچ کاز ءِ بگیری ءَ اوشت ایت ءُ بلوچ کاز ءَ تاوان بار کنگ ءِ کوشست ءَ کنت۔

مکبر وت هچبر نہ گُش اَنت کہ ما مُکبر ایں، پرچہ کہ اے گپ ءَ آ هم شرّی ئے سرا زان اَنت ءُ سرپد انت کہ مکبری وشّیں نامے نئے۔ ما اگاں بلوچستانءِ تہا بچاریں مارا دُرستیں داب ءِ مکبر دیمءَ کاینت۔ کجام هندے بہ بیت یا دمگے یا کہ شہر ءُ بازار بہ بنت ، پاکستانءِ چیریں ادارهاں هر کُجا مکبر اڑ داتگ اَنت۔ بلوچ جُہد ءِ آجوئی ءِ کاؤنٹر کنگ ءَ پہ همک مُکبرے وتی کُنش ءَ کار کنگ ءَ اِنت۔لہتیں سیاسی رنگ ءَ وتی کاراں دیم ءَ برگ ءَ اَنت ءُ لہتیں لشکری آپریشناں گون انت گوں بلوچ ورناهانی چست کنگ ءُ بلوچ لوگانی ماندارگ ءَ دُژمنیں سپاهی آنی همبراه اَنت۔

دُژمنیں ریاستءِ کجام روانک بہ بنت آ پاکستانءِ بیرک ءَ وتی گاڈی ءُ موٹلانی سرا جن اَنت ءُ آھانی همبراه بنت۔ مرچیگیں مکبر گیشتر ٹِک ءُ نشان انت۔پاکستانی ریاست ءِ سپاهی کہ بلوچستانءِ کُجام جاگہے ءَ آپریشن بکن انت آ هما هندے مُکبراں وتی همبراه کن اَنت گوں۔چیا کہ همک مکبرے وتی بازار ءِ هند ءُ دمگاں گیشتر زانت۔دُژمنیں سِپاهی وهدے کہ بازار ءُ دمگاں انگیر کن اَنت گڑا درُستاں چہ پیسر لس مہلوکءِ لوگاں دور کن انت ءُ مرماں کشّ اَنت ءُ یک جاگہے ءَ مُچ کن اَنت، مکبر گاڈیءِ تہا نشتگ ءُ دُرستاں چاران انت کُجام مردم سرا کہ شک بوت دستءَ هما نیمگ ءَ ٹال کنت۔

پدا سِپاهی مرد ءِ دست ءُ پاداں بند انت ءُ گاڈی ءِ تہا دور دینت ءُ گوں وت برنت ے۔ مکبر گیشتر لس مہلوکءِ گورا بلوچ جُہدکارانی بگیری ءَ وڑ وڑیں پروپکنڈه کن انت کہ پِلان کمانڈر ءَ سرنڈر کُتگ ءُ پلان کمانڈر گوں چیریں ادارھاں تچک ءَ ھال ءُ اھوالءَ اِنت۔بلوچ جہدکار دُز انت۔بلوچ جہدکار زالم انت، وت سرا وت بلوچاں کُش اَنت، منشیات پروش انت ، وتی همبراهاں وت کُش اَنت۔مکبر گیشتر لس مہلوک ءِ تب ءَ چار اَنت ءُ هما رنگ ءُ ڈول ءَ گپ کن انت تا کہ لس مہلوک چہ بلوچ جہدکاراں دلپروش بہ بنت ءُ گوں آهاں نزدیکی مہ کن اَنت۔آ گیشتر لس مہلوکءِ دیم ءَ وت ءَ پارسائیءَ گوں پیش کن انت ءُ بلوچ مہلوک ءَ وتی نیمگءَ ترّینگ ءِ جُہد ءَ کن اَنت ءُ بلوچ نوجواناں بلوچ کاز بگیری ءَ اوشتارینگ ءِ جہد ءَ کن اَنت۔آ گیشتر بلوچ جہدکارانی کُتگیں کاراں چو پاکستانءِ رسانکدر ئے وڑا چیر دینت یا کہ دگہ رنگ دینت۔بازیں مکبر سوشل میڈیا ءَ هم سرگرم انت۔لہتیں مُکبر تچک ءَ وتی آئی ڈی آنی سرا پاکستانءِ بیرک ءَ جن انت ءُ بلوچ جہد کاراں بد ءُ رد گُشنت ءُ لہتیں وت ءَ بلوچ آجوئی پسند کن اَنت ءُ وتی آئی ڈی آنی سرا بلوچ شہید ءُ بلوچ رہشونانی عکساں جن اَنت ءُ پروپکنڈه بندات کن اَنت۔ دوری پیداک کنگ ءِ کوشستءَ کن اَنت ،یکے دومی ئے میڈینگ ءِ جہد ءَ کن انت، یک بلوچ لیڈرے ءِ عکس ءَ جن انت گڑا دومی بلوچ لیڈر ءَ بد ءُ رد کن اَنت تا کہ وت ماں وتی پُرشت ءُ پروش بئیت، اے درستیں پروگراماں اشاں چیریں اداره دینت۔چیریں ادارهانی کیمپاں اشانی مَنڈی ءُ نہاد ایر کنگ بوتگ انت، کُجام مُکبرے کہ فوجی آپریشن آں روت گوں پنچ ءُ ده هزار کلدار آهانی بستگ۔

اگاں کُجام مکبرے بلوچ سلاہ بندیں جہدکارے سرنڈر بکنائین ایت گڑا آئی نہاد کمو گیشتر انت لک ءُ دو لک کلدار رسیت یے۔لہتیں مُکبر کسان کسانیں ردیانی سرا بزاں آهانی پون کمو بند بوت هبر ءُ زاه هم سک وارت، لہتیں مُکبراں لہتیں کُتگیں کارانی سرا چہ چیریں ادارهانی نیمگ ءَ فری هینڈ رسیت، آ گیشتر تیاب دپی دمگاں گریبانی زمینانی سرا کبزه کن اَنت ءُ ڈنّی مردمانی کرّا بہا کن اَنت، لہتیں مُکبراں چیریں ادارھاں ھنچیں کار گر اَنت کہ منی بلوچی ءَ منی دست داشتگ اَنت کہ آ باروا چیزے نبشتہ بہ کناں۔چیریں ادارہ وتی داشتگیں مُکبراں وتی سورس مردم گُشنت، آ اشاں چو ٹشو پیپر وڑا کارمرز کن انت ءُ دور دینت۔ بلوچستان ءِ کُجام کُنڑ دمگاں کُجا نندوکیں کہولے بہ بیت آ زانت ءُ سرپد انت کہ منی پِلاں مردم چے کنگ ءَ انت چے کنگ ءَ نہ اِنت۔کئے پمن مُکبری کنت ءُ کئے نہ کنت، بلے کجام مُکبرے کہ کُشگ ءُ گار کنگ بہ بیت گڑا آهانی مات ءُ پت یا کہ برات ءُ گوھار همے گپّءَ جن اَنت کہ آجوئی لوٹوکیں گلاں مُپت ءِ نا ھکّ ءَ مارا جتگ، لہتیں همے گپّءَ جنت کہ آجوئی لوٹوکیں گل ثبوت بیار انت ءُ پدا ھنچیں مردم ھست اَنت کہ آ وت ءَ آجوئی لوٹوکیں پیغمبر گُشنت آ هم بندات بنت گوں پروپکنڈه ءَ کہ بلوچ آجوئی لوٹوکیں گل بلوچاں کُشگ ءَ انت۔وتی براتاں کُشگ ءَ انت۔بائید انت کُجام براتے ءَ کہ وتی برات دوست انت یا کہ ٹک وتی مردم گڑا پیسرا وتی برات یا وتی مردم دارگ کوشست ءَ بکن اَنت۔پرچہ کہ هر کس وتی لوگ ءِ مردم ءَ وت شر زانت کہ چے کنگ ءَ انت،اگاں مُکبر وتی برات یا کہ ٹک ءِ مردم گپ گوشدارگ ءَ ساڑی نہ انت ءُ کُشگ بوت گڑا آئیءِ برات ءُ مردم وتی دل ءَ بزان انت کہ مئے مردم گنہگار بوتگ گڑا آ بائدیں بے توار بہ بنت ءُ بہ نِند اَنت پدا بلوچ آجوئی لوٹوکیں گلانی سرا ایراد گیری مکن اَنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ میوزک پروموٹر سوسائٹی اناگھی دیما اَتک ءُ جلدی نام دار بوت، اشی سبب چی اِنت۔

رحیم مولداد آواران

دی بلوچستان پوسٹ

اے گپ پدا مارگی اِنت کہ بلوچ پروموٹر سوسائٹی اناگھی دیما کئے ءَ آورت؟ چونیں پلاننگ ءِ سرا کارے بندات کُت ؟ گوادر ءَ بلوچستان ءِ وزیر اعلی جام کمال ءَ ملاقات ءُ اِشی ءِ فنڈنگ ئے جار جنگ اے چون؟ بلوچستان ءِ تہا لبزانگی دو سے مزنیں گَل ھست اَنت کہ چو جلدی درسیں کاراں کنان بکنت ءُ وزیر اعلی آشروادے گون بہ بیت ءُ پدا رجسٹر کنئگ بوت ۔ ءُ پدا لہتیں میوزکی دیوان جلد جلدی اڈ دیگ بوت کہ ھما کوھنیں گشندہانی نامہ، یا آہانی علاج ءِ نامہ کیش کنان بوت۔ پدا یکے ہم چہ ھمے نادراہاں نہ بچیت ءُ دلترک بوان بیت اَنت اے چون ؟
کئی سازش انت ؟

اشانی کئے کمک کنئگ ءَ بوتگاں اے درس مُرتاں پشکپتگیں ابراھیم مزار انت کہ تنیگی کپتہ لوگ ءَ بونڈانی باہوٹے مرچی باندات ءِ ۔۔۔

پدا اے ہم چارگی اِنت کہ بلوچ پروموٹر سوسائٹی ءِ باسک کئے ءُ کئے اَنت ؟
اے ساری ءَ کجا بیتگاں ءُ چے کتگ ئے انچو وھدیں ؟
اشان انچو وھد ءَ نزانتگ کہ بلوچ شاعر ءُ گلوکار چو بزگ انت کہ اچانک ءَ بلوچی زبانے شاعر ءُ گشندہانی سرا مہربان بوتاں ؟

اشی ءِ سرجمیں باسک سرکاری مردم انت ءُ زاہر انت ہرکس زانت اِش کہ اے درس شرین سرکاری پوسٹانی سرا اَنت ، ھمے گلزار کچگی انچو وھد ءَ نماریت کہ منا زبانے ھست ءُ آھی ازمگر چو بزگ انت یا ساری ءَ نزانتگے کہ ھچ ءِ نہ گشتگ ؟
یا پلاننگ ءِ تہت ءَ بیا ءُ بلوچ ازمکارانی نام ءَ زر کیش کنان کن، یا کہ ادب ءَ مکمل سرکار نیمگا ترینگے اے راہ باز آسانیں راہ اِنت ۔۔۔ ادب ءِ زریہ مہلوکے رُجہان ءَ وتی نیمگا کنگی اِنت ھمے کارانی پشدار وتی ٹاسک پورا کنگی اِنت ،
بیا لھتیں باسکانی پجار ءَ کنیں ۔

بجار بلوچ ھم بلوچ پروموٹر سوسائٹی ءِ باسک ءِ ۔۔ واجہ ءَ داں زی ءَ تربت ءَ شہید فدا احمد چوک ئے سرا یک بلاھیں جلسہ ئے اڈ دات ءُ ھمے مردمانی خلاف ءَ نارہ بازی کتگ کہ کوہ ءَ نشتگاں وتی زمین ءِ پہازگ ھاترا توپک ءِ دستہ انت، واجہ ءَ چی نہ گشتگ ہمے سرمچاراں وازھیں سبوت ھست اَنت ویڈیو ءِ شکل ءَ، آیا اے واجہاں گون زمین ءَ ہچ مہر نیست بلے زبانے سک دوست اِنت، اے چون بیت کنت ؟

ھلیل تگرانی ہم ھمے پروموٹر سوسائٹی ءِ باسکے کہ سرکار ءِ ھاس ءُ ناسیں ورکرے ءُ پدا ٹھیکدارے کہ اشی ءَ گوکدان کیچ ءَ گیشتریں بزگر ءُ نادسرسانی زمین ہڈپ کرتگ انت ءُ بہا کرتگاں ، اشی ءَ وتی راج ءِ بزگرانی ہچ گم نئیں بلے واجہ ءَ زبان دوست انت، اے چون ؟

اے دگہ کلیں باسکاں بچار اِت ءُ وت فکر بکنے کہ اے کردارانی مردم پہ زبان ءَ چون سیاہ ءُ گار بیت کن اَنت ؟ یا اشان یک ٹاسکے گون ءُ روان دئیگ بیتگاں۔ بہرھال
کچھ تو ہے جس کی پردہ داری ہے۔

بزگیں اسحاق خاموش پمیشہ گون اِنت کہ آئی ءَ وتی لاپ ءِ فکریں بس ۔۔ اُو اشاں ہم اسحاق ئے زرورت ءِ کہ اسحاق ادبی فیلڈ ءِ مردمے ءُ کارانی ترتیب ءَ زانت، اُو دگہ باسک ھمے بلوچ زمین ءِ نندوکیں مردما شما کُلاں شرتر زانے ءُ درسانی بابت ءَ شر سرپد اِت ،

اے چیز بیھال کنگی نیاں ، شموشگی نیاں ، بلوچ انچیں قومے کہ جلدی رد دئیگ بیت ، وھد کہ گوزیت پدا دستان سرا کنت کہ کاش من بزانتیں رندے ایٹیڈے ءَ ہچ مقصد نیست ءُ وھد ہم واتر نکنت ، بھتر ھمشیں ساری ءَ اے گپانی سرا گور کنگی انت ءُ چارگی اِنت کہ اے زمین دژمن چون زبان دوست بیت کن اَنت ۔۔۔۔۔۔

ماہ ء اگست ءُ بلوچ

نبشتہ کار: ریاض بلوچ

دی بلوچستان پوسٹ

اگست ءِ ماہ ءَ پہ بلوچ ءَ وڑ وڑ ءَ وتی رنگ ءُ دروشم مٹینتَگ، برے وشی ءُ گیشتر نہ وشیانی جمبری ساچان کتگ اَنت، بلے ماہ ء اگست ءِ گیشیں رمس پہ بلوچ ءَ سیاہ ءُ تھاریں روچ زانَگ بنت.

ھمے اگست ءِ یانزدہ رمس 1947 ءَ بلوچ انگریز سامراج ءِ در آیگ ءَ پد استان ء کلات ءِ آجوئی ءِ روچ ھم داریت کہ ھمے روچ ءَ استان ء کلات ءِ آجوئی ءِ جار پرّینگ بیت، گڑا چہ آ روچ ءَ بلوچ اے روچ ءَ بلوچستان ءِ آجوئی ءِ روچ نامینیت ءُ شاتکامی کنت ءُ ایدگہ راجاں پیش داریت کہ ما ھم یک زندگیں راجے اِیں ءُ وتی وشیں روچاں چہ ھم شموشکار نہ بہ اِیں.

یانزدہ اگست ءَ ریڈیو ءُ ھالتاکاں استان ء کلات ءِ آجوئی ءُ وت مستری ءِ جار جنَگ بیت، کَش گور ءِ بازیں ملک کلات ءِ آجوئیں بستار ءَ منّ اَنت کن، ھان ء کلات ریاست ءَ گچیں کاریانی جار جنت، کلات نیشنل پارٹی گچیں کاری ءَ سوبمند بیت تاں 27 مارچ 1948 ءَ استان ء کلات ءِ پارلیمنٹ برجم بیت ءُ ریاستی پارلیمنٹ ءِ دوئیں ایوان ھما وھداں کہ نوک جوڑ بوتگیں پاکستان ءَ گوں ھَوار بُوَگ ءِ کرارداد پیش کنگ بیت، گڑا دوئیں ایواناں چہ پاکستان ءَ گوں ھَوار بُوَگ ءِ کرارداد نہ منّ اَنت. بلوچانی آجوئیں ریاست چیزے ماھانی کسانیں مدتے آجوئی ءَ پد پد ءَ پہ زور کَوزہ کنگ بیت، گڈ تاں ھما روچاں بلوچستان ءِ آجوئی ءِ جُھد بندات بیت.

بلوچ مھلوک ءِ سر ءَ کَوزہ گیریں پاکستانی ریاست ءِ زلم ءُ زوراکی چہ 1948 ءَ یک شلہ برجاہ انت، چشیں روچے ایمن ءَ نگوستگ کہ یک بلوچ پُسگے آوار جنگ مہ بیت یا تیر باران کنگ مہ بیت، گس ماندارگ بُوَگ ءَانت، ھلک ویران کنگ بوگ ءَ انت، بلوچ راج ءِ چُک چینی چیزے سالاں نوں گیشتر ودّیتگ.

اے دوئیں دھکّاں ھزارانی ھساب ءَ بلوچ کشگ و دور دیَگ بوتگ ، اشانی توک ءَ مزن نامیں سیاسی سروک، سیاسی جھدکار ءُ مزاھمتی جنگول ھم ھَوار اَنت.

2 اگست ءَ بلوچ پِدائی مجید بلوچ (سینئر) ارش یا شھید بیت، شھید مجید بلوچ جُھد ءِ آجوئی ءِ اولی پِدائی ارش کار اِنت.
شھید مجید ءِ دوئیں کستریں برات شھیدِ سگار امیر بکش ءُ شھید مجید جونیئر ھم پد ءَ ھمے جُھد ءَ پہ دیم ھونی دے اَنت ءُ تاں ابد نمیران بنت.

پنچ اگست 2015 ءَ بلوچ گوریلا کمانڈر ڈاکٹر اللہ نظر بلوچ ءِ کستریں برات ءُ بی ایل ایپ ءِ سلاہ بندیں راجی جُھدکار اَلی نواز گوھر گجلی مشکے ءَ گوں دژمن ءَ دیم پہ دیم جنگ دنت ءُ شھید بیت.

7 اگست 2007 ءَ زوراکیں پاکستانی لشکر یک لشکر کشی یے دوران ءَ ڈاکٹر ھالد ءُ دلجان ءَ شھید کنت، شھید ڈاکٹر ھالد ءُ دلجان بی ایل ایپ ءِ دو بامردیں ءُ نہ ترسیں سرمچار بنت ءُ مزنیں ساھتے تاں گوں دژمن ءَ میڑ دارنت، مزنیں سنگرے یا دژمن اش شکست داتگ ات تاں ساہ ءِ گڈی وھداں گوں زوراکیں دژمن ءَ دیم پہ دیم جنگ دے اَنت ءُ وتی نگرھیں جاناں پہ وتن ندر کن انت.

11 اگست ءَ بلوچ بلوچستان ءِ چہ برطانوی سامراج ءَ آجوئی ءَ ابید ھم یک جْوانیں روچے ءِ بستار ءَ زانگ بیت.
11 اگست 2018 ءَ شھید ریھان جان چینی سامراج ءِ کانوائے ءِ سر ءَ پِدائی ئیں ارشے کنت ءُ دگنیا ءَ تچک ءَ اے کلوہ ءَ سر کنت کہ بلوچ ءِ سر زمین ءَ اَبید بلوچ ءِ رزا ءُ واھشت ءَ ھچ وڑیں دری زوراک گوں کَوزہ گیریں ریاست پاکستان ءَ ھچ وڑیں نام گپتیں دیمروئی ءِ کاراں بھر زرت نہ کنت.

بلوچستان پہ زور کَوزہ کتگیں سر ڈگارے چائنا یا دگہ ملک بید بلوچ ءِ رزا ءَ اد ءَ ھچ رنگ ءَ وش اتک کنگ نہ بیت. اگاں چائنا میاں استمانی کانودانی منوک ءُ وت ءَ را یک سوشلسٹ ملکے سرپد بیت، گڑا دگہ راج ءُ ملکانی آجوئیں ءُ وت واجھیں سیمسرانی ھیال ءَ گوَر بکنت. بلوچستان بے واجھیں سر ڈگارے نہ اِنت،بلوچ راج پھاز یں پسگاں مدام اشی رکھینگ ءِ ءُ پھازگ ءِ ھاتر ءَ گوں دری کَوزہ گیراں میڑ داتگ ءُ انگت ساڑی اِنت .

شہید ریھان جان جنرل شھید استاد اسلم بلوچ ءِ زھگ بوتگ کہ شھید جنرل ءُ لمّہ یاسمین ریھان جان ءَ پہ بانوریں وتن پر بند انت ءُ پہ سالونکی راہ دے اَنت. ریھان پہ وتن سالونک بوت.

انچوش ھمے ماہ ءِ 14 رمس پہ کُل بلوچاں یک سیاہ ءُ تھاریں روچےءِ بستار ءَ دارَگ بیت ، اے روچ ءَ ھمے شُومیں ملک دگنیا ءِ سر ءَ پہ زور ایر مُشگ بیت. دنیا سامراج اے ریجن ءِ توک ءَ وتی نپ ءُ سیتانی رکھینگ ءُ ھمساھگیں ملکانی بلیک میل کنگ ءِ ھاتر ءَ پاکستان ءِ وڑیں یک گیر پِتّری ریاستے 14 اگست 1947 ءَ جوڑ کنت. دو راجی نظریہ ءِ نام ءَ یک ردیں ءُ وت گڑیں نظریہ ءِ دیم ءَ آرَگ بیت. پاک ءِ نام ءَ یک ناپاکیں ملکے وتی وجود ءَ کیت. بلوچستان پہ زور کَوزہ کنگ ءُ مذھب ءِ نام ءَ جوڑ بوتگیں اے نوکرودیں ملک ءَ ھَوار کنگ بیت.

گڑا تاں آ روچ ءَ انچوش کہ بلوچ ءِ آجوئی ءِ جُھد برجم اِنت، ھمے رنگ ءَ ھچ بلوچ ءَ پاکستان ءِ روچ نداشتگ ءُ ناکہ کس یا پاکستانی بیرک پہ وشی ءُ رزا چست کتگ، بلے مرچی باندا پاکستان ءِ زورگریں لشکر پہ زور ءُ زبردستی بزگیں بلوچ مھلوک ءَ پاکستانی بیرک ءَ دستا دنت ءُ اکس گیپت ءُ شنگ کنت.

دگنیا ءِ چماں ھاک پر ریچیت ءُ وتی رسانکدراں گل ءُ شاتکامی پیش داریت.

14 اگست پہ بلوچ ءَ دو وڑ ءَ سیاھیں روچے ، دومی چش کہ بی ایس او آزاد ءِ بنجاھی کارگُشاد رزا جھانگیر ءُ بی این ایم ءِ سنگت امدا بجیر ھم ھمے روچ ءَ دژمن ءَ اچ ما پُلیت . شپ ءِ تھاروکی ءَ دژمن ءِ لشکر ءَ تربت ءَ لوگی یے سر ءَ ارش کت ءُ دوئیں سیاسی جھدکار گوں بیدردی شھید کت انت. دوئیں سنگتانی بلوچ راجی آزادی ءِ سیاست ءَ مزنیں بھرے ھست، شھید رزا جھانگیر ھمے نگیگیں جاوراں شپ تاں روچ شھر ءُ دمَگ، کوہ ءُ کلگ دورہ کنان ءُ گَل ءِ راجی آجوئی ءَ پیگام ءَ سر کنان کنت ، تنزیم کاری ءِ گرانیں بار وتی نزوریں کوپگاں گوں سگّیتگ.

8 اگست 2016 پہ بلوچستان ءَ ھما سیاھیں روچ انت کہ شال ءِ دلبند چہ بلوچ سسّا ءُ سوھوئیں وکیلانی ھوناں گوں شودگ بوت، ریاست ءِ پراکسی ئیں دشتگردیں ٹولی بلوچستان ءِ وکیلانی مچی ءِ سر ءَ وت کشیں تراکے ءَ پنجاہ ءَ چہ گیش سینئریں وکیل شھید بیت، اشانی توک ءَ بلوچ پشتون ، کماش ءُ ورنائیں سنگت ھم ھوار اِت اَنت.
چہ 8 اگست ءِ شھیداں شھید سنگت جمالدینی منی باز نزیکیں ءُ مھروانیں سنگتاں چہ یکے اَت،ما وانگ ءِ وھداں تاں دو سے سال ھَوار وانندہ سیاست کتگ ،مے مدام سیاسی نشست گپ ءُ ھبر بوتگ ، باز بودناکیں ءُ سرپدیں سنگتے اَت کہ آئی ءِ کمی ءَ ما مدام مار اِیں.

بلوچ سر ڈگار ءِ سر ءَ بلوچ ءِ وت واجھی ءِ جُھد ءَ پہ بلوچ ءِ پیر ءُ جوان، بلوچ سردار ءُ بزگر کُلاں وتی کُربانی یک ھساب ءَ داتگ ، بلوچ ءِ آزاتی ءِ جھد یک پلگاریں راجی جھدے، اشی توک ءَ کُل یک ھساب اَنت.

26 اگست 2006 ءَ بلوچ راجی رھشون نواب اکبر ھان بگٹی ماتیں وتن ءِ چہ دژمناں رکھینگ ءِ ھاتر ءَ پیراں سالی ءَ گوں استانی لشکر ءَ میڑ دنت ءُ ابد مان بیت، اکبر ھان بگٹی بلوچیت ءِ یک برزیں چیدگ ءُ استالے اَت ، دژمن ءِ دیم ءَ کدی سر ئِے جھل نہ کت ءُ گوں پیراں سالی مزنیں نامے کَٹ اِت ئِے،ھرچ بلوچ پسگے ءِ سر ئِے بُرز کتگ.

اکبر ھان ءِ شھادت ءَ بلوچ راجی زرمبش ءَ یک مزنیں تاگتے ءُ سرپدی یے رس اِت، ھر بلوچے ءِ دل ءِ توک ءَ پہ کَوزہ گیریں ریاست ءَ نپرتے ،نہ تُسوکیں یک آسے روک کت ، اکبر ھان ءِ شھادت ءَ بلوچ زرمبش ءُ پاکستانی کَوزہ ءَ دگنیا ءِ دیم ءَ پیشداشت.
اکبر ھان ءِ شھادت سجھیں تبکہ ءِ بلوچاں یک راھے پہ ھَوار کت ءُ دیم پہ یک منزلے راھی اَنت،اکبر ھان ءِ شھادت ءَ پاکستانی اسٹیبلشمنٹ ءِ دپ ءُ دیماں لَگوکیں یک زوریں شھماتے کہ آئی ءِ توار انگت آیانی گوشاں جکس اِیت.

شھید اکبر ھان بگٹی ءِ سالروچ ءِ درگت ءَ 25 اگست ءَ تربت ءَ بلوچ نیشنل فرنٹ شھید ءَ سھرچکیں دروت ءُ سلام پیش کنگ ءِ ھاتر ءَ راجی مچی ءِ برجم کنت، ریاستی لشکر بلوچانی پُر ایمنیں مُچی ءِ سر ءَ تیر گواری کنت ءُ بی این ایم بلیدہ ءِ باسک ورنا التاپ بلوچ شھید بیت ءُ بازیں کَسے ٹپی بیت.

اگست ءِ ماہ ءَ شَلا چشیں روچ ءِ نگوستگ کہ پہ بلوچ ءَ ارزشت مداریت.

ھمک روچ بلوچ ءِ گدان بُن دیگ بوگ ءَ اَنت ، ورنا، زھگ ءُ زالبول چست کنَگ ءُ گار کنگ بوگ ءَ اَنت، پیر ءُ کماش بے آبرو ءُ بے ننگ کنگ بوگ ءَ اَنت.

ھمے دلاریں ریاست پاکستان کہ مرچی کشمیر نام ءِ سر ءَ دگنیا ءِ دیم ءَ ڈرامائی سیاست کنگ ءَ اِنت ، گڑا دومی نیمگ ءَ بلوچ ءُ ایدگہ بزگیں راجانی سر ءَ زلم ءُ زوراکی کنگ ءُ اِنت گُڑا چِہ پیم اندیم کت کنت ؟

مرچی بلوچ ءَ چہ کَوزہ گیریں ریاست پاکستان ءَ وتی ھرچ شھیدیں پسگ ءُ وتی سر ڈگار ءِ ھرچ پرشتگیں سنگ ءُ ڈوک ءِ ھساب گرگی اِنت.

درملک ءَ منا شاعرے کُت ءُ شاعری ءَ منا لٹ وارینت

ظہورفضل

دی بلوچستان پوسٹ

مُلک ءَ من چٹ یل ءَ چَر تاں ، نہ روزگارے نہ دگہ کار ءِ بس یک ھُنرے منا گون اَت کہ آ درزی گِری اَت بزان گُد دوچی من زانت ، ھمے کہ من سک لات بیتاں گڈا شُتاں سلیم ی درزی دوکان ءَ ماھے ماھے کار کُت پہ وتا چیزے زَر کمائینت ءُ پدا نشت ءُ وارتاں ، سرجمیں شپ ءَ نشتگ تاں ءُ روچ ءِ وپسگ منی عادت ءَ ، تعلیم اتکگ ءَ میٹرک ءَ ، ھما ناوانندھی برابر اَت بلہ ھمے گنج اَت کہ اردو وانگ زانت ءُ بلوچی ہم من گاجیلی کُتہ ، پت ءَ چارے چُک ملک ءَ کپتہ کُچکی پاد پروشیت چوّک اِنت ہچ نکنت چو مہ بیت کہ شیشہ ءُ کریشتالے سرے بکپیت ءِ بھتریں اشی ءَ چید ءَ چہ بِکشاں ، بزان نکنے کہ پت ءِ سنگتے ھست امارات ءَ اھی ہم درزی دُکان ءَ ھمودا پچ کتہ دیریں ھمشی ءَ منی پت ءَ پمن ویزائے گشتگ ءُ منی پاسپوٹ نَکل ہم روان داتگاں کہ منی چُک دَرزی گِیری زانت بےبرے ہمودا وتی دوکانے کار بگر ، اھی ہم گشتہ شر

گڈا یک سھب ءِ من واباں داں منی مات ءَ منا پاد کت کہ پاد ءَ بابُل کمبہ تو سیی ءِ تئ ویزا اتکہ دبئی ءِ ، من گُڈئتہ گون ھیرانگی وتی مات چار اِت ءُ گُشت کہ منی ویزا پدا دبئی ءِ ؟ تھت سرا پاد اتکہ ءُ چماں لگشاں بوتہ شتہ لوگ برانڈہا چم شودگ ءَ لئگتہ ،ھمدا منی گہار نشتہ وتی گُد دوچگ ءَ اَت من چہ گہار ءَ جست کت کہ منی ویزا کئے کَشئتگ ؟ پرچاکہ من ہچ ءَ سہی نئیت اں ، گڈا منی گہار ءَ درسیں گپ پت ءِ منا ھال داتاں ، من بی گَل بیتاں کہ شرتریں مردم روت درمُلک ءَ ادا ہچ نیست ،
او منی ٹکٹ ہم پت ءَ گپتگ ءَ گڈا من تیاری کرت ، یک شمبئے روچ ءَ منی جہاز بوت ءُ من دراتکہ دیم پہ دبئی ءَ ،
اودا کہ من ائیرپوٹ ءَ سر بیت اں پت ءِ سنگت بزان دُکان واجہ پدا منی ارباب اَت اتکگ ءَ منی دیما ، من دروت سلام کُت ارباب گاڑی ءَ سوار بوتاں شتیں دیم پہ ارباب لوگ ءَ ، ما کہ اودا سر بیتیں ارباب لوگ ءَ ، منا مہمان خانہ ءِ نندارینت ءُ وت شت لوگ ءَ ، من نشتگ تاں کہ دگہ دو منی عمرے بچک اتک گومن سلام ءُ دُوراہ ءِ کت اے ھم بزان ارباب ءِ درزی دُکان ءِ کاری اَنت گون ، ما وارگ وا ارباب منا گشت اے تئ ہم کار انت تو برو گوں ھمشاں گوما وتی کمریہ پدا سہب ءَ من کایان دُکان ءَ ، ما دراتکیں شتیں دیم پہ وتی کمرہ نیمگا ، راہا سیل کناں اے ماڑیانی بُرزی ازمان دومی تبک ءَ گشئے سر تاں ، دنیاے موٹل و گاڑی چہ کفن پوش ءَ بزان عرب ءَ پُر تاں ، ما سر کہ بوتیں داں ہمے یکیں کمریہ ما چار مردمیں ، یک تھت ءِ منی اَت ، من اے بیگاہ ءَ رسٹ کت ءُ اے پاٹی شتہ دوکان ءَ

گڈا دومی سہب ءَ من وتی ہمکارانی ہمراھی دیم پہ دوکان ءَ بزان من وتی کار گرئگ ءَ شتاں گون ، دو سئے روچ منی بتاکہ متاکہ یانی اڈ کنگ ءَ گوست ، نوں روچ ءَ مئے کار ءُ شپ ءَ کمرہ بیا ءُ بکپ یہ گُداں شود یہ ورگے باری اتک ورگ اڈ کنت ھمے روٹین بوت ، پدا جمعہ ءَ چھٹی ، روٹین ھمے جوڈ بوت زندگی ءِ ، برے برے مگرب ءَ چھٹی کہ کت اتکیں کمریہ نشت ءُ پتائی کن یہ شراب بیئرے ور گون ہمے سنگتاں ۔۔۔

یک مگرب ءِ من اتکہ وتی کمریہ داں مئے کمرہ ءَ بلوچی گشندھے مرچی اتکہ ھمدیں کش ءَ بجائے ایر اِنت ، من بلوچی سلام دروت ءِ کت ءُ نشتاں ، کمو وھد گوست سنگتاں بیئر اورتگ مُرگ پچئگ شروع کُت ، سوت جنوکائی بندات بوت ، اے شپ گوست گڈا دومی روچ ءَ من جست کہ اے گشندہ مئے سنگتانی تہا کئ سنگت اَت ءُ مہمان اَت ، سنگتاں گُشت کہ ھلیل ءِ سنگت بوتگ ، پدا ھلیل ءَ بلوچی سوت اِش کنئگ ءِ بلاھیں ھُب ءُ واھگے ھستہ کہ مدام کمریہ اشی ٹیپ ءَ بلوچی سوت چالو اَت ءُ دُکان ءَ مدام موبائل ءِ ویروک ءِ گوش ءَ تاں ، منا ہم بلوچی سوت اش کنگ ءِ باز شوق اَت ، گڈا امارات ءَ ھمے کہ گشندھے اتک الم ءَ ھلیل دعوتے دات ءُ یک شپ ءِ دیوان ءِ کت ،

اے گشندہ پاٹی منی ھم واقف ءُ سنگت بوان بوتہ ، یک رندے یک گشندھے ءَ منا چہ کسانیں تلب ءِ کُت من وتی وس واک ءَ شتاں مارکیٹ ءَ اھی تلب پورا کت گڈا ھمے گشندہ ءَ منا گُشت کہ تو بلوچی شعر نبشتہ کنے ؟ اگاں شاعری کنے یار منا شعرے بدئے من گوشان تئ شعر ءَ ،

من پسّو دات کہ منا بس بلوچی ءِ اِش کنئگ ءِ سک باز ھُب واھگ اِنت بلہ من نبشتہ کُت نکنی ، گڈا ھمے گشندہا منا گُشت کہ مشکل نئے ڈے من شعرے یکے کرا لکارین ءَ تئ نامے جناں ہچ فکر مکن ، من بی زانت کہ اشی پمن انچو چیا ھُب واھگ بوگائیں من ڈارک سمجھے ، من ائی پسو دات ءُ گشت کہ شر پُل منی دلسرد بیت ،

من ھمے ھبر ھلیل کرا جت ، ھلیل منا گو اے پتو اینچو ھودوناک نئے اشی ءَ تو مارکیٹ ءَ بُرتگ ھما سامان گپتہ داتہ پمیشا اشی ترا چو گشتگ ، اے دبئی انت ادا تو زر ءُ سامان اے گشندہان بدئے اے ترا دمان ءَ شاعرے جوڈ کن اَنت ، دگہ چیزے نبی بلہ تو مشہور بئے تئ نام بیت بس اشاں دعوت بدئے سامان بگر بدے گڈا تو بچار وتی نام ءَ ۔۔

من ھم گَل بیتاں کہ اے شریں کارے پہ پنچ ھزار ءَ بیت ۔۔۔ من گڈا انچو کناں بیتہ ھمےکہ گشندھے اتک من دعوت ءِ دات پدا بُرت مارکیٹ ءَ سینٹ ءُ سابون ءِ زورت دات ، اشاں منی نامہ شعر نبشتہ کنائینت جناں کُت ،

منی نام ہمک نوار ءَ گونا من نام کپتہ ، منا بازار ءَ باز مردم ءَ دیست منی توسیپ کت ، مھفلانی تہا منی نام گِرگ بوت ہرکس ءَ گومن دست مِلارینت ، من دل ءَ گَل ءَ بال تاں کہ ہمک گشندہے البم ءَ منی سوت ءِ الم مان ، من ءَ مہلوک ءَ فیس بُک ءَ میسج کت ، منی اکساں پنچ سد ھفت سد کمنٹس اَتک ، چنچو مردما منی وٹس اپ لوٹ اِت ، من گروپاں ھوار تاں از شاعر ، ھمے وڈا منی تنکاہ نیم ھمے گشندھانی لاپ ءَ اَت ، برے عاشقی سوت برے درملکی برے انکلابی ،

بازیں مدّتے ءَ پد من اتکہ چھٹی ءَ مُلک ءَ ، منا ھمک کَس ءَ دیست گُلائش کُت کہ من شاعرے اں پدا دبئی والائے اں ، منی بگل گوات تاں ۔ ملک ءَ ہم ہمک دو روچ سرا گون گشندہاں پکنک ءُ پاٹی اَت ۔۔

یک روچے من بیگاہ ءَ دراتکہ وتی سئیکل ءَ سوار بوتاں شتہ ھوٹلانی دیما چاھے وارت پدا شتہ جمیل ی دُکان دیم ءَ کرسی سرا نشتہ تاں منا جمیل جُست کُت ۔۔۔ انی ہمے زوتاں کئ نوکیں نوار پیداکیں ؟
من پسو دات کہ دو نوکیں نوار پیدا فلان فلان گشندہانی
جمیل پدا چمن جُست کت کہ ،۔ گڈا تئ شعرے اے نواراں مان ؟
من پسو دات ،،، ہو ڈے بس تئ دعا ببی من مارکیٹ ءَ انچو جاگھ کتہ داں منی شعر نواراں مان مہ بیت نواراں کس گوش نداریت منی لوٹوک سک باز اَنت ،،

ھمے گپاں گون من چارے یک سیاھیں کُرولہ گاڑی ءِ اسپیڈ ءَ اتک اوشتات سئے مردم ءَ توپنگ منا سَک دات ءَ منی چم ءُ دست بستہ گاڑی ءَ کت ، من نزانت کئے اَنت ءُ چونین ءَ ، من کوکار کت کہ شما کئے چے لوٹے بلہ اشاں ہچ نگشت ءُ منا جت توپنگی کونداک ءُ جت لگّت شر داں من تُست ءَ ،،،
من کہ بُود کرتگ ءَ اے انچیں جاگھے اَت کہ من نزانت شگرب اِنت یہ مگرب پدا ہمدا لھتیں لگئت مئگت ءِ منا جت ءِ ۔۔۔
ہمدا یکے ءَ منا گشت کہ
تئ نام وکیل چھوٹا اِنت
من پسو دات ، جی سر
پدا دگرے ءَ جُست کُرت کہ ،، یہ انکلابی گانا آپ نے لکھا ھے ، ہمے
سوتے پِر کُت

من گُشت کہ اے شعر منی نام ءَ اِنت بس بلہ من شاعری جند نزانا مات کسمیں ، من بس سوت گوشداشتگ گڈا من سنگتے گشئگ ءَ چہ ھمے گشندہاں بس زر داتہ اشاں منی نام ءَ سوت لئکارینتگ ءُ جتگ ، ھمے کہ کیسٹ اتکگاں من بس دیستہ کہ اے سوت منی نام ءَ اِنت ،،

اے گپاں گون منی دو سے مردم ءِ کندئگ من اِش کتہ ،،

اشاں منا سئے روچ ءَ داشت ءُ چارمی روچ ءَ لوگانی کرا یل دات ، ھمے گُشت کہ مرچیگ ءَ پد تئ نام ءَ یک شعرے مگندیں ما ، گندے تئ نام ءَ شعر اتک گڈا تو زانے کہ ما ترا چون کنیں ،، من گشت ۔۔ شر

چھٹی منی ہلاس بوتہ اتکہ دبئی ءَ من ،، یکے روچے گشندھے منا فون کت کہ من نوکیں نوار تیاری کنگاون پمن چیزوکے روان دے تئ شعرے گون ،
من پسو دات.. منا بیزارے منی سرا بکپ دگہ براں منا فون ہم نکنے
گشت ءِ ۔۔۔۔ پرچا ؟
من پسّو دات کہ

اے درمُلک ءَ منا شاعرے کُت ءُ شاعری ءَ منا لَٹ وارینت ، نوں گومن نبی چو بلے کہ من گریبی ءِ کناں ۔۔۔۔
گڈا ھما منا کہ من یک گشندہے وتی نزیک ءَ نیلاں

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

شھید لال بکش بلوچ پنام شمبے

نبشتہ کار: سرباز وفا

دی بلوچستان پوسٹ

دگنیا ءِ ھر مردمے بہ بیت آئی ءِ لوٹ ھمیش اِنت کہ من شریں نامے ءِ واھند بہ باں ، اے جُھد ھر مردم ءِ تہ ءَ ھست ، بلے شریں چیز نام ءِ دارگ اِنت۔

منی نّزا شریں نام مردم ءَ را راجی جھُد ءِ تہ ءَ نسیب بیت، اگاں مردم زندگ اِنت آئی ءِ نام چہ وتن دوست ءُ راجدوستی ءَ زانگ بیت، اگاں مردم دُژمن ءِ دست ءَ جَنَگ بہ بیت گُڑا راجی شھیدے زانگ بیت۔

راجی جھُدکار ءِ لوٹ ھمیش اُنت ، وتن یاں کپن ، اگاں مردم دُژمن ءِ دست ءَ شھید کنگ بہ بیت ، آ وتی مکسد ءَ سوبین اِنت۔ اے آجوئی ءِ جنگانی تہ ءَ ھست پہ آجوئی ءَ جھد کنوکیں سرمچارانی تہ ءَ مدام کندگ ءُ دلوشی بہ بیت۔ اے ھبر راستے کہ آجوئی لوٹوکیں جھدکارانی تہ ءَ تہ لہتیں ھنچیں سنگت بیت کہ آ مدام گوں مھروانی وتی سنگتانی تہ ءَ ساڑی بنت، آھانی مھروانی ءُ دلوشی ہر سنگت ءِ دل ءَ وتی نیمگ ءَ ترین اِیت۔

مدام ھر سنگت ءِ لوٹ ھمیش بیت کہ اے سنگت چمن ءَ ھچ دور مہ بیت ، بلے جَنَگ یک زالمیں چیزے ،بازیں سنگتاں چہ یکجائی ءَ دور کنت، تھنا آھانی پگر پشت کپ اِیت۔ چونائی ءَ مردم بگْوش اِیت، من یک راجی جھدکارے ءِ سر ءَ نبشتہ بکن آں، گڑا کتابانی کتاب نبشتہ بکنت ءُ آئی ءِ زند ءِ کسہ ءُ کرد سرجم نہ بیت، بلے راجی شھید ھما کرد ءِ نام اِنت پہ منی وڑیں نزوریں نبشتہ کارے واستا سک گران اِنت، بلے پہ وتی راجی شھیدانی سرءَ نبشتہ کنگ الّمی اِنت کہ آھانی زند ءِ درگت ءَ مردم چیزے نبشتہ بکنت۔
من یک ھنچیں شھیدیں سنگتے ءِ نام ءَ نبشتہ کنگ لوٹاں کہ منی وڑیں ناچیزیں مردمے ءَ گوں آئی یک مزنیں مدتّے ءَ ھوار بوتگ۔ من ھر وھد ءَ کہ کلم چست کُتگ کہ آئی نام ءَ چیزے نبشتہ بکن آں، گُش ئے آئی ترانگاں من ءَ یک رندے پروشتگ۔ منی زھن ءَ کار یلہ داتگ چہ کجا بندات بکن آں، مرچی پد ءَ آئی ءِ ترانگاں من ءَ لاچار کرت کہ من چیز ءِ نبشتہ بکن آں، اگاں منی نابزانتیں لبزانی تہ ءَ نزوری یے بوت من ءَ پھل کن اَت۔

آ سنگت ءِ نام لال بکش بلوچ اَت، جاہ ءِ آھو بدرنگ ءَ واجہ ریکو بلوچ ءِ گس ءَ ودی بیت ، وتی زند ءِ گوستگیں وھداں گیشتر کیچ ءِ دمگ ءَ روت کار ءُ روزگار کنت ، وھدیکہ وتی دمگ ءَ کیت آئی ءِ روزگار زمینداری بیت ، ھمے داب ءَ وھد گوزاں کنت ۔
وھدیکہ بلوچ راجی جنُز شریں وڑے ءَ دیم ءَ کیت، گڑا لال بکش بلوچ ھمے ماریت من ءَ پہ بزگیں راج ءَ جھد کنگ لوٹ اِیت ، 2013 ءَ بلوچ راجی آجوئی لوٹوکیں گل بی ایل ایپ ءَ کیت وتی راجی جھد ءَ بندات کنت ، وھدے بی ایل ایپ ءَ کیت آئی ءَ شمبے نام دیگ بیت ، لال بکش بلوچ ھما مھروانیں سنگت اَت، مدام گوں وتی سنگتاں کندگ ءُ دلوشی کنگ ءَ اَت، اگاں کجام دیوان ءَ نندوک بوتین اَت آ دیوان ءِ تہ ءَ کندگ ءُ دلوشی ھستگ اَت، ھچ ھاموش نہ بوت، سکیں دل پھکیں سنگتے اَت۔

من یات اِنت 2016 اَت، چہ لال بکش بلوچ ءِ شھیدی ءَ لھتیں روچ ءَ ساری ما جاھے ءَ نندوک اِت اِیں، کندگ ءُ دلوشی کنگ ءَ اِت اِیں، سنگتے اَھت، من ءَ گُشت ئِے” پاکستانی پوج ءَ شمبے ءِ دوئیں براس چست کُتگ ءُ برتگ اَنت،گڑا سنگت شمبے ھال دیگی اِنت۔
گڑا من گُشت” شریں من ئِے ھال دیاں ، گڑا من گُشت شمبے بیا من ءُ تو پون ءِ نیٹورک رو اِیں ءُ دمگ ءِ ھالے گر اِیں باریں دمگ جاور چون اَنت۔
شمبے گُشت” شریں رو اِیں ھالے گر اِیں باریں چونیں ھالے بیت۔
گڑا ما موٹر سائیکل زُرت ءُ دیم پہ نیٹورک ءَ شُت ءُ سر بوت اِیں ءُ شمبے ءَ فون جت ءُ ھال گپت گڑا ھما مردم ءَ گْوشت”کہ پاکستانی پوج ءَ تئی دوئیں براس بُرتگ اَنت۔
وھدے کہ شمبے ءَ ھمے گپ اِیش کرت گُڑا کندگے جت ءُ گُشت ئِے” اے ھم ھُدا ءِ شُکر اِنت کہ دُژمن ءَ من ءَ یک راجی بامردے سرپد بوتگ کہ منی دُمب ءَ کپتگ ءُ منی براس برتگ اَنت، اے منی وش بھتی اِنت، اگاں دُژمن منی براساں شھید کنت گڑا منی براس چَہ راج ءِ ایدگہ شھیدیں پُسگاں چَہ گھتر نہ اَنت،من ءَ چُشیں بھت کج اِنت کہ منی براس پہ وتن شھید بہ بنت ، اگاں دُژمن یلہ اش کنت آئی تب اَنت۔

ما چہ نیٹورک ءَ پارگ بوت اِیں ءُ سنگتانی کرّ ءَ شُت اِیں، بلے شمبے کمیں اوں پریشان نہ اَت ءُ انگت ھما ساری وڑ ءَ اَت،شمبے یک دریا دلیں سنگتے اَت، آئی ءِ ھمت ءَ مارا یک توکلے دات۔
مئے سنگتاں چَہ یک سنگتے جُست کرت” شمبے ھالاں بدے دمگ ءِ چے ھال ءُ ھوال اِنت؟
شمبے ءَ کندگے جت ءُ گُشت ” پوج ءَ منی براس بُرتگ اَنت دگہ ھیر اِنت، بَلے اے دْرست جنگ ءِ بھر اَنت، من ءَ سَے سال اِنت کہ من گوں دُژمن ءَ جنگ کنگ ءَ آں، بائد اِنت نوں وَ دُژمن من ءَ یک راجی جھدکارے بہ پھم اِیت ءُ کمیں تاوان اوں بہ دنت، وھدے کہ دُژمن ھچ مکنت گڑا منی جنگ مُپت اِنت۔ وھدے کہ دُژمن اے وڑیں کارے کنت گڑا ما وت ءَ سرپد بہ اِیں کہ راجی جھد ءِ تہ ءَ مئے چنکسیں ارزشتے ھست ءُ ما پہ دژمن ءَ جنکسیں سردردے اِیں۔

9 ساچان ( اگست ) 2016 ءَ شمبے گوں سنگتاں جاھے ءَ نندوک بیت ، گڑا سنگتاناں گْوش اِیت” کہ من ءُدگہ سنگتے کورک ءِ بازار ءَ رو اِیں ءُ پہ سنگتاں سامان زور اِیں ءُ کا اِیں، وتی موٹر سائیکل ءَ زوریت گون سنگت ءَ دیم پہ کورک ءَ رھادگ بیت، وھدے کہ کورک ءِ بازار ءِ نزیک ءَ سر بنت گڑا پاکستان ءِ داشتگیں جھادی ملا ساری ءَ آوانی راہ ءَ بند اَنت ءُ شمبے ءَ توار کن اَنت ،وتی بڈ ءِ تُپنگ ءَ دور دے، ما ترا دستگیر کن اِیں۔
شمبے وتی سنگت ءَ را گْوش اِیت” جنگ ھمیش اِنت نی بے ھمت مہ بو۔
شمبے ھمے وھد ءَ دُژمن ءَ را ھکل دنت ءُ گْوش اِیت” اے تُپنگ تئی پس ءِ نہ اِنت ، ھیال بکن ما پاکستان ءِ سپاھی نہ اِیں ، بلکین ءَ ما بلوچ اِیں۔ گون ھمے گپاں جنگ بندات بیت ، دُژمن ءِ بیست مردم بنت ءُ سنگت ھمے دوئیں بنت ، داں ساھتے ءَ جنگ بیت گُڑا شمبے وتی سنگت ءِ کَشگ ءَ سوبیں بیت ءُ وت پہ وتن شھید بیت، داں جھان ھست شھید شمبے گوں راجی ایدگہ پُسگاں ابدمان اِنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔