بلوچ گیرت مندیں کومے
نبشتہ کار: دیدگ بلوچ
دی بلوچستان پوسٹ
او منی گیرت مندین بلوچ براس، او منی گیرت مندین بلوچ زھگ ، منی گیرت مندیں بلوچ پِسّ ءُ کماش ، منی گیرت مندیں بلوچ ناکو ، منی گیرت مندیں بلوچ واجہ ، منی گیرت مندیں بلوچ وانندہ،منی گیرت مندیں آلم ءُ ملا ،منی گیرت مندیں دانشجو ءُ نودربر، منی گیرت مندیں استاد ءُ مئلم ءُ ماسٹر ءُ دبیر ،منی گیرت مندیں ڈاکٹر ءُ پرستار ءُ نِرس ، منی راج ءِ دکاندار ،بازاری ءُ کار والا کار ، منی اِلم ءِ لوٹوک ءُ وانوک ءُ نودربر ،او منی راج ءِ رھشون ءُ سردار ءُ کماش ءُ رھدربر ،او منی راج ءِ گازائیل کش ءُ باربر ءُ ڈرایور ،او ٹیکسی والا ءُ منی بلوچ راج ءِ گُھار ءُ ماساں مرچی ھبر ھمود ءَ رس اِتگ کہ بلوچ ءِ گیرت لگتمال اِنت بلے ما شما انچوش وتی چم جھل کرتگ اَنت ءُ ھچ نہ گوشیں ، مرچی اگاں دگرے ءِ ماس ءُ گھار ناپاکیں ،پاکستان ءِ رستریں پوج ءِ دست ءَ چست کنگ ءُ برگ بیتگ اَنت ھمے ماس ءُ گھار ءَ تیر ءُ تپنگ اِش دیم ءَ ایر کرتگ اَنت کہ اے بلوچ گھار، اے بلوچ ءِ ماس *تروریستے* ایشی ءَ تیر ءُ تپنگ گون بیتگ ، اے ھبر ءَ کے کنگ ءَ اِنت؟؟؟
ھمے پاکستان ءِ ناشرکاریں رستریں ءُ دروگ بندیں پوج اِنت ،اے دُز ءُ ناشرکار ءُ نامرد ءُ کبزہ گیریں پوج ءِ ھبر ءَ مرچی دنیا ءِ تہ ءَ کے باور کنت؟؟
اگاں ھم اے گپ راستے بہ بیت کہ بلوچ ماس ءُ گُھاران ءَ تیر ءُ تُپنگ ھوار بیتگ اشان ءَ توئیں نامردین پوج تَنگ آورتگ تو اشانی ڈیھ کبزہ کتگ تو اشانی چُک ءُ براس ءُ مردین ءُ پِسّ بے گناہ ءَ کشتگ اَنت کہ مرچی مجبور بیتگ اَنت کہ اے کار ءَ بہ کن اَنت بلے اے ماس ءُ گُھاران ءَ چُشین چیزے ھم گون نہ بیتگ ءُ نوں گپ پہ ھما جاہ ءَ رستگ کہ بلوچ ءِ زالبول چست کنگ بہ بیت گُڑا پہ من ءُ تو کہ وت ءَ را بلوچ ءِ گیرت مندین براس ءُ پِسّ ءُ ورنا ءُ نوک ورنا گوشیں انچوش یکدگرے چمان ءَ پہ چم جھلی ءَ چارین ءُ ھچ نہ کنیں؟
مرچی ھما کوماں کہ ما شما گوشتگ اے ھچ نہ اَنت ھمایاں مرچی وتی وت واجہ وت بیتگ اَنت پہ وتی راج ءَ پہ وتی ڈیھ ءَ پہ وتی ماس ءُ گُھار ءَ پہ وتی مادریں وتن ءَ پہ وتی گلزمین ءَ ھون اِش داتگ ءُ وتی ھون ءَ رتکگ اِش ءُ وتی وت واجھی ءَ گپتگ اِش، نوں مروچی آ کوماں آجو اَنت ءُ من ءُ تو کہ وت ءَ را گیرت مندیں بلوچ گوشیں من ءُ تو انگت ءَ دگہ گُلامانی گُلامیں ، گُلامی ایشی ءَ نہ گوش اَنت کہ مئے شُمئے یک بلوچ براسے رنگ ءَ سیاہ بہ بیت ما شما ھمے چیز ءَ ڈڈیں کہ وتی بلوچ براس ءَ گُلام بہ گوشیں کہ پرچا رنگ ءَ کموکے سیاہ اِنت منی واجھیں براس اے چیز دنیا ءِ ھچ کومے توک ءَ اے رُوژنائیں دور ءَ نیست اِنت دراھیں کوم ءُ راجاں اے چیز ءَ وتی توک ءَ گار کُرتگ بلے ما شما بلوچ انگت ءَ یکدگر ءَ کبول نہ کنیں یکے ءَ گُلام گوشیں ءُ یکے ءَ درزادگ دگری ءَ رئیس دگری ءَ ھوت دگرے رند دگرے ملازئی دگرے استا دگری ءَ لوڑیگ دگری ءَ نوکر دگری ءَ میر دگری ءَ ھاکم ، ھمے زھی زھی اَنت کہ ما شما چو ناتپاک ءُ سُست بیتگیں یک دگہ نادراھی یے مئے شُمئے توک ءَ ھست کہ یکے چھباری گوشین یکے گوادری یکے تربتی یکے سربازی یکے پنجگوری یکے ایرانشھری یکے زاھدانی یکے ءَ بولانی یکے ءَ ھارانی یکے ءَ واشی یکے ءَ آوارانی یکے ھَبّی یکے ءَ کراچی والا یکے ءَ جاشکی یکے ءَ سراوانی یکے ءَ ڈالبندنی یکے ءَ تپتانی یکے ءَ ڈیرہ مری والا یکے ءَ دلگانی یکے ءَ بزمانی یکے ءَ رودباری یکے ءَ ھزداری یکے ءَ کلاتی یکے ءَ مستونگی
یکے ءَ مکرانی یکے ءَ سرھدی یکے ءَ سیستانی یکے ءَ رکشانی ءُ یکے ءَ سلیمانی بلے مارا اے وڑ کنگی نہ اِنت منی واجھاں.
منی واجھیں براس ءُ بانُکین گُھاراں منی بلوچ راج ءِ کماش ءُ واجہ ءُ مکھین ماساں ما شما درست وت ءَ را بلوچ بہ گوشیں پرچا کہ مئے شمئے پھکانی زات بلوچ ،زبان بلوچی، ڈیھ بلوچستان گُڑا زھی زھی پرچا گوشیں ؟ پرچا وت ءَ را اے شھر ءُ آ شھر ءِ نام ءَ بھر بھر بہ کنیں، پرچا وت ءَ را اے زھی ءُ آ زھی ءِ سر ءَ بھر ءُ بانگ بہ کنیں ، پرچا وت ءَ را بلوچ مہ گوشیں، پرچا وت ءَ را بلوچستانی مہ گوشیں پرچا چوش دگہ دژمنانی پندلانی توک ءَ کپتگیں پرچا وتی اگل ءَ کار نہ بندیں پرچا گوں یک دگر ءَ تپاک نہ بہ ایں ؟، وھدے رودرآتکی بلوچان ءَ مشکلے گر اِیت پرچا بہ گوشیں کہ مارا کارے گوں آیاں نیست کہ آیاں دگہ ملکی اَنت ، آ دگہ ملکی نہ اَنت بلکیں آ ھمے یکیں بلوچستان ءِ بلوچ اَنت آیانی درد منی تئی درد اِنت آیانی مرک منی ءُ تئی مرک اِنت آیانی وژنامی منی تئی وژنامی اِنت، آیانی شری پہ من ءُ تو اِنت آیانی ھر چیز پہ من ءُ تو اِنت، اگاں روکپتی بلوچاں ءَ ھم مشکلے بہ گر اِیت رودرآتکی بلوچاں نباید بہ گوش اَنت کہ مارا کارے گون روکپتی بلوچاں نیست آیاں دگہ ملکی انت ما دگہ ملکی، بلے رودرآتکی بلوچاں اے چیز ءَ سک کم اگاں بہ گوش اَنت اول کہ نہ گوش اَنت اگاں بہ گوش اَنت گڑا سک کم بلکین یکے یکے بہ بیت بلے پد ءَ ھم من گوشان کہ رودرآتکی نیمگ ءِ بلوچ چوش نہ گوش اَنت پرچا کہ آیاں آگاہ تر اَنت سرپد تر اَنت آیانی توک ءَ اے زھی زھی گار بوتگ آیانی توک ءَ گوادری ءُ تربتی ءُ پنجگوری ءُ کویٹہ ئِے گار بوتگ آیاں درست وتارا بلوچ زان اَنت درستان وتارا بلوچستانی زان اَنت.
وت ءَ را بھر بھر مہ کن اِت یک بہ اِت وت ءَ را بلوچ بزان اِت ھچ کس ءَ مہ گوش اِت کم زات سل زات سیاہ اسپیت زرد گلام استا میر ھاکم درست بلوچ اِت کوم بلوچ زات بلوچ زبان بلوچی مُلک بلوچستان وھدی دراھیں چیز بلوچ ءُ بلوچی ءُ بلوچستان بیت اَنت زانگ بیت کہ دراھیں راج بلوچ راج گوشگ بیت.
ھنچوش کہ مئے شُمئے اھدیگیں گوستگیں بلوچ پت ءُ پیرُکان ڈڈین بلوچ بیتگ اَنت شما ھم وت ءَ را ھنچوش ڈڈ ءُ تپاک بہ کن اِت اے ناشرکاریں ناپاکیں ناپاکستان ءِ رستریں پوج ءَ ھنچوش شھمات کن اِت کہ وتی راہ ءَ پد ءَ مہ زانت ھنچوش ھترمال ئِے بہ کن اِت کہ دگہ بر ءَ بلوچ ءِ زالبول ءَ ناں بلوچ ءِ مردین چُک ءَ چار اِت مہ کنت ،مردم ھنچو چم ءَ چم بہ چار اِیت اود ءَ مئے شُمئے مات ءُ گُھار رستریں پوج ءِ دست ءَ بندیگ اَنت.
اگاں مرچی آ گُھار اِنت آ ماس اِنت ایشی ءَ بزان اِت کہ باندا مئے شُمئے بیت بلے آ مات ءُ گھار ھم منی ءُ تئی مات ءُ گُھار پرچا کہ بلوچ اَنت ، بلوچاں پہ دگہ کوماں در راینتگ چون پہ وتی بلوچ ءَ مرچی من ءُ تو در نہ کپ اِیں ءُ وت ءَ را ھچ کارہ کنیں؟
بیا اِت تپاکی ءِ ساھگ ءِ چیر ءَ وت ءَ را یک کن اِت ءُ وت ءَ را بلوچ کن اِت، وت ءَ را بلوچستانی کن اِت وتی گلزمین ءَ چہ رستریں پوج ءِ دست ءَ رَکّین اِت وتی مات ءُ گُھاران ءَ چہ اے رسترانی دست ءَ رَکّین اِت ، گُلامی ءِ سانکلان ( زمزیلان ءَ ) بہ سِند اِت ءُ وت ءَ را آجو کن اِت، گوں آجوئی جُنز ءَ ھوار ءُ ھمکوپگ بہ بہ اِت.
وھدے کومے سرجم ءَ تپاک بہ بیت آ کوم ھما کہ وت ءَ را امریکن گوش اِیت کہ من دنیا ءِ مستریں کدرتاں ھما امریکن ھم تپاکیں کومانی دیم ءَ ھچے نہ اِنت شما کموکے اگاں دلگوش بہ کن اِت اے امریکنے کہ وت ءَ را چشین بلاھین کدرتے زانت امریکن یک کسانین پاٹی یے دست ءَ شکست وارتگ پہ گُہ ورگ ءَ کپتگ امریکن تالبانے دست ءَ شکست وارتگ امریکن الکائدہ دست ءَ شکست وارتگ امریکن دائِش ءِ دست ءَ شکست وارتگ گُڑا پاکستان چون بلوچ ءِ دست ءَ شکست نہ وارت.
نوں امریکن اے تنزیمانی دست شکست وارتگ شُمئے ھیال ءَ اے بے وس ءُ ناکس ءُ ندار ءُ شُدیکیں پاکستان کہ یک ماھے پاکستان پنڈگ مہ رس ایت وت ءَ وت نابود بیت گڑا ما شما بلوچ یک نابودیں پاکستانی ءَ شکست دات مہ کن اِیں ؟
اَلّم ءَ کہ شکست وارت بس ما شما وتی دل ءَ ڈڈ بہ کنیں ما شما تپاک بہ بہ ایں بس تو بگر شکست ئِے وارتگ.
بلوچستان آجو بات
بلوچ راج تپاک بہ بات کہ راجانی مستریں مانزمان تپاکی اِنت
مانزمان ءِ آسرال ھم راج ءِ آجوئی اِنت
آجوئی ءِ نشانی ھم تئی وت واجھی اِنت
سوبین بات اِت
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
