مئے چاگرد ءُ زالبول ءِ بستار
نبشتہ کار: ھمیدہ بلوچ
دی بلوچستان پوسٹ
زالبول ءَ را ءَ پرچا آئی ءِ ھک دیگ نہ بیت، پرچا آئی ءِ سر ءَ بندش جنگ بیت، پرچا آئی ءِ بنُکی ھک آئی ءَ دست ءَ پلگ بنت؟ ھر انسان ءَ بنکی ھک دیگ بوتگ اَنت ، توری مردینے بیت یا زالبولے بہ بیت،آئی ءَ را ھک ھست، آئی ءِ ھک ءَ کسے پامال کت نہ کنت۔
اسلام ءِ تہ ءَ ھم داتگ ھر انسان ءَ ھک ھست ءُ وتی ھک ءِ واستا( جہاد ) جنگ بہ کنت ، جد ءُ جھد بہ کنت، آئی ءَ ھک اِنت کہ آئی ءَ را ھر پڑ ءَ جھد کنگی انت،دانکہ وتی بنکی ھکاں پچ گپت بہ کنت۔
زالبول ءِ سر ءَ پرچا زلم ءُ زوراکی کن اَنت،وھدے کہ آ وتی ھک ءِ واستا توار چست کنت گڑا پرچا آئی ءَ را گیش ازاب کن اَنت ءُ آئی ءَ ڈن ءَ درایگ ءَ بند کن اَنت،لوگ کہ ترا چشیں ھک نیست کہ تو ڈن ءَ در بیا ئے، مدام آئی ءَ را ھمے تژن ءُ شگان جنگ بیت تو یک زالبولے ئے ءُ ترا ڈن ءِ روگ زیب نہ دنت، دگنیا ترا باپشت ءَ باز گپ ھبر گش اِیت، بلے پرچا گش اِیت ھمے کاراں مرد کت کنت ھمے کاراں زالبول( جنک)کت کنت،بچار اد ءَ کجام دگری بوت مرد ءُ زالبول ءِ توک ءَ ءُ لھتں کار ھست جتا جتا اَنت کہ پوشاک زاتی چیز ھست کہ جتا بنت کہ مرد چونیں پوشاک گور ءَ کنت ءُ زالبول چہ رنگیں گور ءَ کنت ، دگہ ھم انچیں کارھست۔ مرد گش اِیت بس ترا دگہ کاراں گوں واستا نیست تو بس لوگ ءَ روپ لوگ ءَ ھرچ زمہ واریاں پورا بہ کن، گد بہ شود ءُ چک پیداک بہ کن، بس تئی کار ھمیش انت، آئی ءِ کار اے نہ انت ھرچی کت کنت، بس اے کاراں گوں بندوک مہ کن وھدے کہ زالبول یک گپے بہ جنت آئی ءِ ازّت آئی ءِ زور درستاں چہ دیم ءَ بیت، مرد بیت یا کہ دگہ کسے بیت بلے آئی ءَ را ھینچو ھک نیست کہ آئی ءِ سر ءَ زلم بہ کنت ۔
انسان ءِ بندیگ کنگ، لوگ ءِ تہ ءَ بند کنگ ارزانے گپے نہ انت ، آ زھنی نادراہ جوڑ بیت،انچش کہ ما الجزائر ءِ درور ءَ بہ چار ایں کہ آ ود ءَ آجوئی ءِ جنگ ءَ چہ ساری زالبول لوگانی تہ ءَ بندیگ بنت،آواناں ھینچو ھک نہ بیت کہ ڈن ءَ برو اَنت ، بس ھمے یکیں موہ بوتگ کہ ھمک جمایانی روچ ءَ ھبادت/تاھت ءَ شتگ انت،جمایانی روچ درست گل بنت کہ شگرے کہ مئے واستا ھمے موہ ھست پرچا کہ چوناھا ءَ مارا ڈن ءَ نیل اَنت ،ھر جما ھبادت جاگہ ءَ روگی نہ بوتگ بلے درست شتگ انت کہ یکوئی لوگ ءِ تہ ءَ بند اَنت، آوانی بس ھمے یکیں موہ بوتگ،ایشی ءَ چہ ابید دگہ ھچ کسے ءَ را اجازت ھم نہ بوتگ کہ ڈن ءَ کدم چست بہ کنت، وھدے الجزائر ءَ آشوب کیت گڑا ھر دمگ ءَ آشوب تالان بیت ءُ دراھیں زالبولان ءَ شریں زانت دیگ بیت ءُ آواناں آشوبی بنجلاں( انقلابی کیمپس) سوج دیگ بیت ءُ آشوبی ادارھانی تہ ءَ ھوار کنگ بنت، زالبول ھر زمہ واریاں وتی کوپگاں کن اَنت ،وتی لوگ ءُ جاگھاں چہ وت ءَ را دور کن اَنت،آوانی تہ ءَ زانت ءُ سرپدی کیت آ اے نہ چار اَنت کہ ما زالبول ایں، ما اے کار کت نہ کن اِیں، پرچا کہ مرد ءُ زالبول وت ءَ برابر سرپد بنت، درست یک مشت ءُ تپاک بنت،آشوب ءِ تہ ءَ بھر زور انت، لکانی ھساب ءَ زالبول سوجی بنجلاں یکجاگہ بنت ءُ وتی گلامی ءِ زنجیراں پروش دے اَنت ، آشوب ءِ نیمگ ءَ جنزان بنت۔
مئے چاگرد ءِ تہ ءَ ھم زالبول ءَ کم لیک انت،وھدے کہ ھرچ پیسلہ بچک وت کت کنت بلے جنک وتی پیسلہ پرچا کت نہ کنت ءُ آئی ءِ ھر پیسلھانی سر ءَ پرچا ڈنگر دے اَنت؟ انچوں کہ بچک ءِ پیسلہ وتی دست ءَ اِنت، باید ھمش انت کہ جنک ءِ زندگی ءِ ھر پیسلہ وتی دست ءَ بہ بیت، انچو بچک را ءَ زندگی ھست، جنک را ءَ ھم زندگی ھست۔
مئے چاگرد انچو زیادہ بچک را ءَ کدر بستار دے اَنت بلے جنک ءِ کدر بستار باز کم انت پرچا؟جنک زاناں انسانے نہ اِنت ءُ انسانے لیکگ نہ بیت؟ مئے چاگرد نا سرپدی ءُ نا زانتی ءَ ایوک ءَ مئے چاگرد نہ انت بلکیں مئے ملک سوچ ھمے پیم انت، اے سلیں سوچ مارا ءُ شمارا درستاں تباہ کنت، اے اڑ ءُ جنجال روچ پہ روچ گیشاں چہ گیش بوان اَنت، درست مئے نا سرپدیانی وجہ اَنت.
توری بچک بیت یا جنک بیت، درست برابر انت، اے تپاوت مہ بیت کہ اے جنکے ءُ اے بچکے، اے تپاوت مہ بیت اے جیڑہ چہ بُن ءَ چہ روتگاں ھلاس کنگ بہ بیت ، اے جیڑہ مردم ءُ چاگرد ءَ تباھی ءِ نیمگ ءَ بارت ءُ ھلاس کنت، وانگ بیت یا دگہ کار بنت توری مردیں بیت یا زالبولے (جنکے)بیت، درستاں یک ھساب ءَ بہ بنت، درستانی کدر ءُ بستار یک پیم ءَ بہ بنت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
