TBP Balochi

پوریاگرانی میان اُستمانی روچ ءُ بلوچ پوریاگرانی زند!

 نبشتہ: گنی ھیات

دی بلوچستان پوسٹ

شھدا ءِ شکاگو ءَ سُھرچکیں دروت!

یک مئی ءِ روچ ءَ پوریاگرانی میان اُستمانی روچ ءَ سرجمیں دگنیا ءَ سرکاری روچ ءِ وڑ ءُ پیم ءَ دارگ بیت
اے روچ ءَ پوریاگراں وتی وھد شانزدہ ءُ دوزادہ کلاک ءَ چہ ھشت کلاک ءِ کم کنگ ءَ پُر ایمنی روانک کش اِتگ ۔

چریشی ءَ پوریاگرانی دست ءَ امن ءِ اسپیتیں بیرک بوتگ بلے ریاستی کارندھاں پُر ایمنی روانک ءِ سر ءَ اُرش کتگ ءُ پوریاگرانی سر ءَ تیرگواری کتگ ءُ پوریاگرانی ھوناں چہ شکاگو ءِ دگ ھونین کتگ ءُ پوریاگرانی دست ءَ امن ءِ اسپیتیں بیرک سُھریں ھوناں گوں مینتگ ءُ ھمے روچ ءَ پوریاگراں سُھریں بیرک وتی بیرک جوڑ کتگ-

ھمے روچ ءَ یک مئی سرجمیں دگنیا ءَ پوریاگر روچ ءِ درگت ءَ دارگ بیت کہ ایشی ءِ سپارش “فریڈرک اینگلز ءَ انٹرنیشل ءَ داتگ-

مروچی سرمایاداری تاریک ءِ اے ھَد ءَ اَتکگ ءُ سر بوتگ انت کہ اود ءَ آ پوریاگرانی ھوناں گیش چوسگ ءَ اَنت کہ سرمایاداری ءِ تاریکی کردار اِنت – مروچیگیں ورناھانی پدریچ ءِ آؤکیں پوریاگر ءُ جھد کنوک اَنت – مروچی ھمے وڑ تُرندی ءَ چہ ورناھانی پدریچ جھد ءِ منڈی ءَ پُترگ ءَ اَنت کہ اشی ءَ چہ بے روزگارانی لشکر گوں ترندی ءَ گیش بوان اِنت ءُ اے نزام ءَ آؤکیں پدریچ ءِ دیَگ ءَ چیزے ھست-

نامداریں انکلابی روزا لیگزمبرگ راست گْوشتگ کہ مئی روچ داں ھما وھد ءَ دارگ بیت کہ داں پوریاگرانی وتی ھک ءِ ھاتر ءَ باپاریانی ھلاپ ءَ جد ءُ جُھد برجاہ بیت ءُ اگاں پوریاگر میان اُستمان ءَ وتی ھک ءِ رسگ ءَ چہ سوبمند بہ بنت اشی ءَ چہ پد اے جھد کنوکیں شھیدانی یات ءَ مئی ءِ روچ دارگ بیت-

بے شک یک پوریاگرے ءِ سِلّیں دست ائیرکنڈیشنڈ ءِ کمرہ ءِ توک ءَ نندوکیں لب زیروکیں آپیسر ءَ چہ گیش ساپ بنت –

مروچیگیں روچ تھنا اے بے وانند ءَ بلے ھُنر مندیں پوریاگرانی گوما یکجاھی ناں بلکیں ھما وانند ءَ ، جوانیں پوریاگرانی ھیال دارگی اِنت ھم کہ مزن مزن ڈولداریں ورگ جاہ ءُ دگہ مزن مزنیں مارکیٹ ءُ دگہ دکاناں دکانداری بوَگ دوازدہ ءُ چاردہ کلاک ءَ مدامی کار کن اَنت-

اگاں ما لَس مھلوک ءَ گیش ھم مہ کن ایں ، بلے تھنا مھر ءُ دوستی ءِ گوما آئی ءَ توار بہ کنت ءُ اِزت دیَگ بندات بہ کنت گُڑا واجکار اے ھم بلاھیں گپے بیت –

مروچگیں گران بھائی ءَ پوریاگر بدھال ءُ تکانسر کتگ اَنت روچ ءُ شپ ءَ بے چُٹی کار بہ کنت ھم پوریاگر ءِ کول ءَ دو وھد ءِ نان ھم نسیب نہ بیت-

ھمے روچ ءَ انچیں چوٹی بنت – مزن مزنیں دیوان ءُ مچّی اَڑ دیَگ بنت کہ اود ءَ زندگی لاچاری ءُ پوریاگری ءَ چہ بے سمائیں مردم گوں جوش ءُ جزبگ ءَ تران کنگ ءَ گندگ کاینت
بلے اے کس ءَ گندگ نیت کہ پوریاگر پوریاگری کنگ ءَ اِنت – چو زندگی ءَ ھرچ پڑّ ءَ سیادی داروکیں مردم وت ءَ پوریاگر سرپد بنت بلے منی نز ءَ پوریاگر ھما اِنت کہ وتی ھک ءَ چہ کم کارکنوک ءُ بے وس ءُ لاچاریں مردمے – سرکاری ءُ ابید سرکاری کارداریں مردم ءَ اے روچ ءَ چٹی رس اِیت بلے چریشی ءِ آسر ءَ چٹی رس اِیت کہ آئی ءِ آرام ءُ سکون ءِ ھچ وڑیں روچ پکس نہ اِنت-

ھمے وڑ ما بلوچ پوریاگراں بہ چار ایں آ چونیں زند گوازینگ ءَ اَنت آ کار گیش ءُ پکار کم دیَگ بنت وھدیکہ ھمے روچ سرجمیں دگنیا ءَ مھلوک ءِ چٹی اِنت بلے مئے بلوچ پوریاگر ھم ھمے روچ ءَ وتی لِچ کاری ءَ کن اَنت ءُ وتی لاپ ءَ شوھاز کن اَنت پرچاکہ اود ءَ نانکہ جُست کنوک ھست نانکہ انساپ ۔ کار چو ھر ءِ وڑ ءَ بند بلے پکار نیست اگاں ھست گُڑا نیم پہ ھم بزگ ءُ واری دست کپ اِیت اے مئے بلوچیں پوریاگرانی زند اِنت کجام جاور ھالانی تہ ءَ گْوزگ اَنت سیر کار اَنت بلے سیر لاپ نہ اَنت۔

دی بلوچستان پوسٹ: اس تحریر میں پیش کیئے گئے خیالات اور آراء لکھاری کے ذاتی ہیں، ضروری نہیں ان سے دی بلوچستان پوسٹ میڈیا نیٹورک متفق ہے یا یہ خیالات ادارے کے پالیسیوں کا اظہار ہیں۔

سمّو ءُ جنگانی کسہ

گزین بلوچ

دی بلوچستان پوسٹ

سمّو !
راجدپتر نویس گُش انت کہ دنیا ءِ اولی دودمان (تہذیب) ءَ بگر داں مرچیگیں اھد ءَ ، ھرچ وھداں دنیا جنگانی آماچ بیتگ ، مئے واستا آ جنگانی کسہ تھنا راجدپتر ءَ پَشت کپتگ انت ، مئے زمین ھم جنگانی آماچ انت ءُ ما مرچی اے جنگی کسّھانی بھر ایں ۔

سمّو ترا یات بیت کہ وھدے تو ھما ڈکّ ءَ سر کپت ئے من گشت ”سمو کپ ئے، ایر بیا جھلءَ“ تو گوشت کہ من نہ کپ آں، من کمانڈرے ءِ چک آں۔ سمو ءِ کماندار نورا ،

سمّو پلستین ءِ کواسیں زانتکار مھمود درویش گش ایت کہ جنگ مردم ءَ چہ کسانیءَ پُھتہ کنت، چوناھا مھمود درویش ھم چو مئے ڈول ءَ کسانی ءَ چہ وتی زمین ءَ در پہ در کنگ بوتگ، ھمے ھاتر ءَ آئی ءِ زمین ءُ جنگ ءِ کسہ گوش ئے کہ مئے کسھانی چھرگ ءَ جن اَنت۔

سمّو !
لھتے روچ پیسر ءَ منی سنگتے ءَ گوں ھال بوتگ اَت ءُ من آئی ءَ گُشتگ اَت کہ نورا ءَ منی سلاماں بدے، سرجمیں سالے بیت کہ منی گوں آئی ءَ ھال ءُ اھوال نہ بوتگ، نورا وتی کاراں کوہ ءُ کوچگاں گوں دژمن ءَ سر ءُ چیر اِنت ءُ من گیش وتی کتاباں گوں دلگوش۔

26 اپریل ءِ سھب ءَ ھال اَتک کہ بلوچستان ءِ دمَگ پروم ءَ سنگتانی گوں دژمن ءَ جنگے بوتگ، نہ زاناں پرچی ءَ بلئلے منی گُمان وت سر ءَ پہ نورا ءَ شت، وھدے کہ نورا ذھن ءَ اتک گڑا من تئی ترانگ ءَ کپت آں۔ سمّو من وتی موبائل مٹ کتگ ءُ تئی دُراھیں اکس من گار کتگ اَنت ءُ یک پیم ءَ ودار ءَ بوتگ آں کہ کدی نورا ءِ گوما ھال بیت گُڑا من آئی ءِ گور ءَ تئی نوکیں اکسے لوٹ آں، اے روچ ءَ من ھمے ھیالانی تہ ءَ سر ءُ چیر اتاں سنگتے ءَ ھال کت کہ نورا گوں سنگتاں شھید کنگ بوتگ، من ءَ باور نہ بوت، گَل ءِ جار ونت کہ میجر نورا گوں سَے سنگتاں شھید بوتگ، بلے انگت باور کنگ ءَ نہ اِت آں، سمو اے ساھتءَ کہ من اے گالاں نبشتہ کنگ ءَ آں، من ءَ انگت باور بوگ ءَ نہ انت کہ نورا شھید کنگ بوتگ۔

سمّو !
من نورا ءِ اکسے دیست، آئی ءِ اے اکس ءِ گندگ ءَ گوں من ءَ یکبرے گمان بوت کہ پیڈل کاسترو اِنت، پد ءَ کہ اکسءَ را شرّی ءَ چار اِت تاں نورا اِنت، چوناھا پیدل کاسترو منی دوستیگیں ھستی یے (شخصیتے) ءُ نورا ھم ھمے اکس ءِ تہ ءَ منءَ نورا گیشتر دوست بوت چی ءَ کہ پیڈل کاسترو ءِ چھرگ ءَ جنگ ءَ ات، سمّو نورا پیڈل کاسترو ءِ ڈولیں بامردے بوتگ(ادا”بوتگ“ نبشتہ کنگ منءَ دوست بوگ ءَ نہ انت، بلے جنگ باز انچیں گالانی نبشتہ کنگ پرمائیت کہ آ ترا دوست نہ بنت) من ھیال کت کہ اگاں اے اکس تو من ءَ دیم بہ داتیں گُڑا من ءُ تو اے اکس ءِ سر ءَ باز گپ کتگ اَت، پد ءَ تو من ءَ گوشتگ ات کہ منی ابا کوہ ءَ اِنت۔

سمّو… ! من ءُ نورا مدام گپ ءُ گالانی میانءَ اڑ اِتگیں، اے پالیسی رد اَنت، اد ءَ چوش بوتگ، اود ءَ اے ڈول بوتگ، شپ روچ بوتگ ءُ روچ شپ بلے مئے گپ ءُ گال برجاہ بوتگ اَنت، برے برے انچو گمان بوتگ کہ ما سوگند وارتگ کہ یکے دومیءِ ھبر مَنّگی نہ اَنت، مئے گپ ءُ گالانی درستاں چہ وشتریں بھر ھما بوتگ کہ ما تئی سر ءَ گپ کتگ، تئی کسہ آؤرتگ اَنت، سمّو ما ایش گپ ھم کتگ سمّو مزن بیت بی ایس او ءِ چیئرپرسن بیت ،سمّو کہ مزن بیت مئے رھشونی ءَ کنت۔

سمّو ، اے ساھتاں منءَ تئی ءُ وتی کلیں ھبر گیر آیگءَ اَنت، نوراءِ گوما گوستگیں کُلیں ساھت ذھنءِ تہءَ تامرےءِ رنگءَ گوزگءَ اَنت، یاتاں نویس آں پد ءَ گالاں گار کن آں، چوناھا گران انت دوستیگیں سنگتےءِ چوشیں سِدگ، سک گران اِنت، پہ چیزےءِ نبشتہ کنگءِ ھاتر ءَ گال اوں ھمبراہ داری نہ کن اَنت۔

سمّو…!
1955ءَ امریکہ ویتنامءِ سر ءَ اُرش کنت، اے جنگ تاں 1975ءَ برجاہ دار ایت، اے جنگءَ امریکہ باز تاوان وارت، ھمے جنگءِ یک اکسے باز نامدار بیت، ھورٹس پاسءِ کش اِتگیں ایش اکسءِ تہءَ یک امریکی سپاھی یے اِلمیٹءِ سر ءَ نبشتہ اِنت کہ ”War is Hell“ ،من ھمے کہ اے اکسءَ گند آں گڑا جیڑ آں کہ راستیءَ ”War is Hell“۔ جنگ مردمءَ چہ وتی درستیں دوستیگیں مردماں سند اِیت، جنگ در پہ در کنت، جنگ مردمءِ کسانیءَ پچ گِپت۔

سمّو جنگ راستے کہ تاراجی یے ، بلے چے کن ئے؟ بلوچءِ گور ءَ جنگ کنگءَ ابید دگہ ھچ پشت نہ کپتگ، ھپتاد سال اِنت کہ بلوچءِ زمینءِ سر ءَ دری زور آور اَنت، بلوچءِ مال ءُ مڈّی پُلگ بوگءَ اِنت، بلوچءِ زِر بلوچءِ دستءَ نہ اِنت، زبان گاریءِ سیمسراں سر بوتگ، شال پیسر سگار ءِ ھرجان اَت ءُ نوں گوادرءِ سر ءَ چینءَ وتی چم ایر کتگ اَنت، جنگ تاراجی یے بلے بلوچءِ جنگ اِنت کہ بلوچستان، بلوچءِ دستءَ اِنت، اگاں اے جنگ مہ بوتیں گڑا بلوچءِ زمین پہ بلوچءَ گیش تنک تر اَت، جنگ کہ بیت گڑا سر ھم رو اَنت، بیست سال اِنت کہ بلوچ وتی سراں ببا دیگءَ اِنت، ھزاراں پیر، کماش ءُ ورنایاں وتی سر ببا داتگ اَنت، بلے جنگ برجاہ اِنت ءُ اے جنگ ھمے ھاتر ءَ برجاہ اِنت کہ نورا ءِ ڈولیں بامرد گوش اَنت کہ سر ءَ دئیں بلے زمینءَ نہ دئیں۔

سمّو نورا ءَ مدام بامردانی کسہ کتگ، نورا ءِ سنگت شیھو وَ کسہ کارے بوتگ، آئیءِ پُتینک پر بوتگ اَنت چہ بامرد ءُ جنگانی کسہ ءَ، چوناھا منءَ کسانیءَ چہ کسہ ءِ گوشدارگ وش بیت، زمینءِ کسہ، جنگانی کسہ، بامردانی کسہ، بگندئے ھمے ھاتر ءَ منءَ نورا ءِ ھمراہ داری وش بوتگ، بلے پد ءَ کہ منی تئی گوما ھال بوت، گڑا مئے کسہ مٹ بوت اَنت، بامردی کسھانی جاہءَ پٹ بال، ھور ءُ تَر ءُ گردانی کسہ بوت اَنت (نورا ءِ کسھاں ابید)۔

سمّو….! ھنوں دنیا ءُ جھانءَ کرونا ءِ کسہ اِنت۔ سرجمیں جھان اوشتءِ آماچ اِنت۔ پٹبالءِ کلیں گوازی Cancelبوتگ اَنت(بلے اے سیزن وش نہ اِنت، ال کلاسیکو ءَ بارسلونا دو گولءَ برگ بوت گڑا من گوازیءِ چارگ یلہ کت) اے وھدءَ گوں تو ھال نیست اَت کہ ترا ھال بدے آں، ایش ھم جنگءِ سوب اِنت کہ منی ءُ تئی ھال بوگءَ نہ اِنت۔

سمّو ، ھژدہ ماہ اِنت کہ منی ءُ تئی اولی ءُ گڈی دیوان بوتگ، سالےءَ گیش اِنت کہ منی ءُ تئی ھال نہ بوتگ، بلے سمّو اے ھژدھیں ماھاں من چہ تو بے ترانگ نہ بوتگ آں۔ سمو ءِ سر ءَ نبشتگیں شَیر ھم وتی گور ءَ ایر کتگ اَنت کہ اے منءَ تئی ترانگءَ گیج اَنت، من ھمے دوریانی ساھتاں چنچو کسہ جیڑ اتگ، چنچو کتاب ونتگ، چنچو سپر کتگ، تئی گوما اے کلیں کسہ کنگی اَنت، بازیں جاھانی اکس تئی سر ءَ دیم دیگی اَنت ءُ ترا جُست کنگی اِنت کہ اِنیچو وھد اِنت کہ مئے ھال نہ بوتگ تو چے چے کتگ؟ بلے جنگءَ انچیں جاور پیداک کتگ کہ من تئی گوما ایش کسھانی کنگءِ واستا ھال کنگءِ جاگہءَ ایش تاکاں سیاہ کنگءَ آں۔

سمّو کسہ باز اَنت بلے وھدے کہ زمینءَ جنگ بیت گڑا کلیں کسّہ گار بنت ءُ جنگ وت کسہ کار اِیت، بامردانی کسہ، زمینءِ پھازوکانی کسہ، زِرپھازانی کسہ، درویشءِ کسہ، نبی دادءِ کسہ، شیھو ءِ کسہ، نوراءِ کسہ۔

سمو….! ترا یات بیت من ترا گشتگ ات کہ CPECءِ دَگءِ سوبءَ شُمئے میتگءِ مردم در پہ در کنگ بوتگ اَنت، نوں اد ءَ چینءِ مردم کاینت ءُ نند اَنت تو گوشت کہ ابا اشاں نیل ایت، مرچاں کلیں سنگت تئی ابا(نورا) ءِ بامردیءِ کسہ ءَ کنگءَ اَنت، بی ایس او ءِ سیاستءَ بگر تانکہ آئیءِ شھادتءَ، تئی ابا (نورا) ءِ ایمان اَت کہ ما وتی منزلءَ روچے نہ روچے الم سر بیں، بامرداں ایش جنگ داں گُڈی منزلءَ دارگی اِنت ءُ تئی ابا (نورا) ءَ ایش جنگ داشتگ اَت یک بامردےءِ پیمءَ تاں وتی گڈی ساھتاں۔

سمّو…! نورا ءِ بامردیءِ کسہ باز اَنت، دانکہ ایش جنگ ھست اِنت نورا ءِ وڑیں بامردانی کسہ برجاہ بنت، من اے وھد ءَ اے گالاں کہ پتو نویسگءَ آں، من ءُ منی سنگتے نشتگاں ءُ جنگانی کسہءَ کنگءَ آں، بلوچءِ جنگءِ کسہ، سوریاءِ جنگ، اوگانستانءِ جنگ، کُردانی جنگ، بلے کلیں جنگانی کسہ اَنت۔

سمّو من جیڑگءَ آں کہ چو مہ بیت جنگءِ کسہ منی ءُ تئی پیسر ءِ کسھانی جاہءَ بگر انت، اے جنگ آماچیں زمینءَ دگہ کسہ چوناھا نیست اِنت، پشت کپتگیں کسھانی جاہءَ جنگی کسہ بگر اَنت گڑا پہ منی تئی درشان ءُ بیان کنگءَ کسہ نہ بیت،

سمّو من چوناھا جنگی کسھاں ابید دگہ کسہ ایوکءَ تئی ءُ تئی ھمرنگءِ گوما کن آں، تئی گوما ھال نیست اِنت ءُ تئی ھمرنگءِ گوما زھر آں، نوں منی کر ءَ پشت کپتگیں کسہ ایوکءَ جنگی کسہ اَنت،

سمّو … تئی ھال کنگ ءِ وداریگ آں ۔۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

چو چی ءَ اشتاپ کت گلابو؟

نبشتہ کار : شے ھک جلیس

دی بلوچستان پوسٹ

گوش اَنت کہ ماں سیہ شپاں گوں ترند ءُ تیزیں توپاناں دچار کپوک گوں وتی ھونانی سھری ءَ مرمرانکیں چراگاناں بلین اَنت ءُ گوستانک ءِ تہ ءَ نمیران بنت۔ زیکیں روچ ءَ منی ھمبلیں گلابو تو گوں وتی برات ءُ سنگتانی ھوری ءَ وتی مسکیں ھوناں چہ بلوچ راج ءِ زرمبشت ءِ چراگ ءَ را روکتر کت ءُ ابدمان بوت ئے۔

منی ھمبل ءُ بیلی نواز جان اے گیدی ءِ تہ ءَ یک بلوچ پسّگے ھست تئی جھد ساڑاھگ ءُ نازینگ بنت ءُ اچ ترا گوستانک کدی شمشکار نہ بیت۔

منی نواز گلابو جان تئی نند ءُ نیاد ءُ مجلس ءُ دیوانانی گپ من ءَ مروچی یک پہ یک گیر آیگ ءَ اَنت۔ اچ ھمے یات ءُ گیراں چہ تئی اے ھما نگرھیں گپ من ءَ سک گیر آیگ ءَ انت کہ یک روچے کپتگ آپ ءُ لگوریں سنگتانی روَگ ءِ ماھولے اَت تو گشت کہ پرومی سنگت بے اوست ءُ بے بروسا ئیں سنگت انت کجام نیمگ ءَ کہ پُلّ ءُ بھار بیت ھما نیمگ ءَ لیٹ اَنت۔ بزاں بلوچ راج آجوئی گل مھکم ءُ توانا بنت گڑا گوں ھمے گلاں ھوار انت وھدے کہ گل نزور تر اَنت گڑا پاکستان ءِ ناپاکیں بیرک ءِ چیر ءَ وت ءَ را من پوش اَنت۔
بلے من تئی سر ءَ مسکرا کت ءُ گوشت تو ھم پرومی یے ئے تو ھم چو ایدگرانی پیم ءَ کن ئے۔
بلے تو من ءَ گشت من ھنّی ھرچی بہ گوش آں پائدگ نیست۔ تو اگاں سلامت بوت ئے انشاءاللہ منی سرانڈری ءِ ھال ترا سر نہ بیت۔ دیمتر ءَ بے ریائیں وھد ءَ اگاں موکل دات من پہ وتن سالونک بہ آں ءُ وتی مادریں گلزمین ءِ مسکیں کُٹ ءَ وش واب بہ آں۔

گلابو جان تو وتی کتگیں کول ءُ وتی مکھیں گلزمین ءِ ھک سرجم کت۔ گلابو جان مروچی من پھریگ آں کہ تو منی ھمبل بیتگ ئے۔ تھنا من نہ پروم ءِ ھمک کس ءُ سنگت پہ تئی کربانی ءَ پھریگ اَنت۔

گلابو من جزم آں زیکیں روچ پہ تئی وش نیتکاں نہ وشیں روچے اَت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ناوشیں ھال اِشکت سک بے تاھیر بوتاں

نبشتہ کار: شیردل بلوچ

دی بلوچستان پوسٹ 

شھید میجر نورا جان پنام پیرک بلوچ ءِ شھیدی ءِ ھال اِشکت سک بے تاھیر بوت آں،جْوانیں تَمردیں رھشونے چہ بلوچ راج ءَ گستا کنگ بوت، آئی ءِ سوگات کرتگیں کلواھاں چونیں مردمے گوش بہ داریت انچو سرپد بیت بلوچ ءِ ماتاں بچّ ودی کرتگ مدام چَہ وتی جند ءِ لوٹ ءُ واھگاں دَر اتکگ اَنت، وتی گِس ءِ وشھالی نہ چار اتگ اِش راج ءِ آکبت ءِ سر ءَ جیڑ اتگ اِش ءُ جیڑاگ ءَ اَنت ـ

آوانی پگر ءُ لیکہ سرجمیں راج ءِ وتواجھی اِنت انچو دل ءَ سدّک اَنت یکروچے بلوچ ءِ شھیدانی رِیتگیں ھون بلوچ وتن ءِ آجوئی ءِ مستاگ بنت، ماں ھستیں جھان ءَ بلوچ وتن پد ءَ یکرندے آجو بوت ـ

شھید میجر نورا جان ءِ ودی بوگ ءَ مات ءُ پِت ءِ ایر کرتگیں نام رَد نہ بوتگ نورا مینگل ءِ نام مرچی پد ءَ راجدپتر ءِ تہ ءَ دوبر نورا جان ء پیرک زندگ کرتگ دلیری ءِ دگہ کسھے ایر ئِے کت ـ
بَلے! نورا جان پنام پیرک وتی مات ءُ پت ءِ ھما زرد ءِ توک ءِ راجی درد زانتگ اَنت آوانی واھگ وتی ڈیھ ءِ پھازگ ءُ دودمانی رکیّنگ بوتگ ـ

مرچی جھان جَسکتگ نورا جان گوں وتی دلیریں سنگتاں زند ءِ گرانیں ساھتاں انگت بلوچ راج ءِ ءُ راجی گلانی نام ءَ کلوہ دیم داتگ،وھدیکہ من ھمے کلوہ گوش داشت اَنت چَمّانی ارس گُلگل بوت اَنت،نورا جان مُھکمیں زانتکار ءُ تَمردی ءِ چیدگے بوتگ ـ

اولی رند ءَ وھدیکہ من نورا جان دیستگ اَت من ءَ ھم سک دوست بوت اِنت منی نّز ءَ دوھزار شانزدہ ءَ ماں راجی رھشون جنگی کماندار واجہ شئے اکتر ندیم ءِ اوتاک ءَ دُچار کپت ایں ،چَہ گندگ ءُ گپّاں زانگ بوت شَرّیں ءُ زمہ دار ءُ زانتکاریں سنگتے، ھما روچ ءَ پد ءَ ھرجاہ نورا جان پیرک ءِ نام دیواناں گرگ بوتگ ـ
بیست شش کرّا ءَ من سھب ءَ مھلہ واب ءَ پاد اتک آں کسانیں ھالے انچو دو گالرد نبیسوک اَت آشوب ءَ اھتک اَت من وانت ءُ دومی دیوان ءَ دیم داتاں ھمے نبیسوک اَت مرچی بانگواہ ءَ پروم پنجگور ءَ استان ءِ پوج ءُ سرمچارانی میانجی ءَ جنگ ءُ چوپ برجاہ اِنت
جست ءُ پد برجاہ اَت باریں چونیں ھالے کیت ءُ گوشاں کپ ایت ، اداروکے ءَ رند پد ءَ ھمے ھال ماں دیواناں شنگ اَت ترندیں جنگ انگت یکشل ءَ بوگ ءَ اِنت دوئیں نیمگاں جانی تاوانے گماں ھست، دل ءِ دِریکگ گیش بُوان بوت سرمچار اللہ ءِ باھوٹ اَنت، انگت ھچ سرپدی نیست اَت ھمے انگیر بوتگیں سنگت کے زی اَنت؟
دیر ءَ پد پمن ءَ سنگتے ءَ کلوھے دیم دات سنگت شھید بوتگ اَنت
جُست کت پجار بوتگ اَنت ؟
گُشت ئِے ھاں پیرک جان، گلاب جان ءُ آئی ءِ برات ءُ چارمی بشام نامے سنگتے دل ءَ دِریکگ گیش بوت اَنت ،یکبرے تیوگیں ھال جُست کنگ نہ بوت سک گمیگ ءُ ملور بوت آں ،بَلے ھچ تاھیر نہ اتک، پد ءَ من سنگتے ءَ را جُست کت ھمے ھال پکاّ اِنت کہ سنگت شھید کنگ بوتگ اَنت ؟
گوشت ئِے ھاں ،دل پہ دراھیں سنگتاں تلوسگ ءَ اَت پہ پیرک جان سک نَگیگ اَت پرچاکہ آئی ءَ یک ھدے ءَ پجاروکی بوتگ
دومی آئی ءِ لھتیں جنگولیں سنگت چیسل جان ، جلال جان ءُ سمیرجان پیسر ءَ شھید بوتگ اِت اَنت ءُ دلیریں سنگت اَت اَنت
بَلے پیرک جان ھست اَت دل چو ساھجی ءَ کوہ ءَ مُھکم اَت ،چد ءُ ساری آجوئی ءِ جنگ ءَ پڑ ءَ لھتیں انچیں سنگت گیش اتگ آوانی کمی انگت راجی جُنز ءِ تہ ءَ ھست اَنت وھدیکہ پیرک جان ءِ نام گرگ بوت دل ءَ انچیں ھیال آیگ لگ ات اَنت،پد ءَ دل گوشت بوت کن دگہ پیرک نامیں سنگتے بلکیں اے پیرک جان نہ اِنت، گڈی ھال اتک ھبر پکا بوتگ نورا جان پنام پیرک ھما سنگت اِنت کہ دل ءَ ترس کپتگ ،بس انچو سرپد بوتاں دلیر ءُ لائکیں دگہ رھشونے چَہ بلوچ راج ءَ جُتا کنگ بوتگ ـ
شھید نورا جان پنام پیرک بلوچ، شھید نواز جان پنام گلاب بلوچ، شھید مومن جان پنام بشام بلوچ ءُ کسان سالیں شھید ابدلمالک جان ءَ گوں سرڈگار ءِ درستیں شھیداں گوں ھوار سھرچکیں دروت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گلابو تو من ءَ یل کت

نبشتکار ۔ مُھتاج بلوچ

دی بلوچستان پوسٹ

من نہ لوٹ آں تئی ھَڈاں بہ سُریناں یا ترا جکانسر بہ کن آں !
ترا یات بیت دوھزار ھژدہ ءَ سنگت ھیر بکش ناز پنام ءِ بابا گھرام شھید کنگ بوتگ اَت تو گُشت یار بابا ءَ چہ شھیدی ءَ پیسر ، بزاں ھمے روچ ءَ دیگر ءِ وھد ءَ کہ سنگت بابا دیم پہ بنجل ءَ شتگ ترا سک یات کتگ ئے ءُ سک گِلگ کتگ ئے ۔
ھمے دمان ءَ اے اوں گُشتگ ئے یار مُھتاج مئے گِندُک ءَ نئیت ،
وھد ءُ جاوراں سرپد اِنت ءُ بے وپائیں ملکموت ءِ ھال ءَ اوں شر زانت بلے نہ زاناں پرچا نئیت ۔ اگاں تو ھال کت منی سلاماں بہ دے ءُ بہ گُش ئے بابا سک گلگدار اِنت اَچ ترا ۔
ترا یات بیت ھمے کلوہ ءَ رند داں دیر ءَ تو گار بوت ئے ؟
منی جُست ءَ رند تو پسو دات ، یار بابا ءِ روگ ءَ من ءَ سک پروشتگ ، ھمے کہ بابا ءِ نام زبان ءَ کیت چمانی اَرس شل بنت ءُ ھیسکارگ بنا بیت من پمیشکا کمو گار بوت آں ۔
اے دمان ءَ من تئی ھال ءَ سرپد اِت آں اے اوں زانت کہ تئی ءُ بابا ءِ سنگتی چہ برات ءَ دیم ءَ تِر بوتگ ، بلے پھل کن منی کِر ءَ چُشیں گال نیست اَت کہ ترا تسلہ بہ دیاں ۔
بابا ءَ رند تو سک پُرشتگ اَت ئے مدام بابا ءِ اکس ءَ چارگ ءَ اَت ئے ءُ تھنائی ءَ تئی چمانی اَرس رچگ ءَ اِت اَنت ۔
اے گپ چو منی وڑ ءَ بازینے ءَ جیڑ اَتگ تو گنوک ئے !
بلکیں چو منی وڑ ءَ ترا بازینے ءَ ھم گُشتگ گنوک اے راہ ءِ ھمسپر پہ نندگ ءُ وش گپی ءَ نہ اَنت بلکیں پہ زمین ءُ راج ءِ باندات ءَ ندر بنت ءُ اے مئے ایمان اِنت ما کہ شھیدانی رِتکگیں ھونانی سوگند ءُ مُسّام کتگ مارا ندر بوگی اِنت !
من اے اوں سرپداں کہ تئی پسو ھمے بوتگ ،
” ھو من گنوکاں من ءَ زمین زادگ دوست بنت ءُ من پھر بنداں وتی گنوکی ءِ سر ءَ ، بلے شما ھما وھد ءَ منی گنوکی ءَ سرپد بہ اِت کہ شمئے درمیان ءَ ساڑی نہ باں ۔۔
گلابو ترا یات بیت تو دوھزار بیست ءِ پروری ءَ سنگتے ءِ کر ءَ کلوہ کُتگ اَت ؟
تو گُشتگ اَت ، ” مُھتو ءَ منی سلاماں بہ دے ءُ بہ گُش اگاں تو زند ءَ نیتک ءُ دیدارے نہ کُت گڑا مرگ ءَ رند منی مانش ءِ سر ءَ میا ءُ اَرس مہ گوار پرچا کہ من سک تکانسر باں !
باریں منی ھال چے بیت ترا پہ گریوگ ءَ بہ گند آں ؟
مُھتو ءَ اے اوں بہ گُش ، ابید تئی دیدار ءَ منی ساہ در نہ اِیت من زاناں سکرات ءِ وھد ءَ ساہ پہ تو مَھتل بیت ءُ من ءَ سک جکانسر کنت ۔
چہ شھید سلمان پنام ءِ گوڈا ءَ رند اگاں کَسّے بوتگ پہ تسلہ دیگ ءَ گڑا مُھتو ، آ تو ءُ شھید بابا بوتگ اِت بلے بابا ءَ من ءَ نیم راہ ءَ یل دات نوں چم ترا سک اَنت ۔
گلابو ! من ھیراناں منی بستار چی اِنت تئی وڑیں تمردیں نرمزارے ءِ دیم ءَ ؟
تو من ءَ پرچا وتی وشی ءُ گمانی رازدار لیک اِتگ ؟
ناں من پہ تو زھمے جتگ ءُ ناکہ پہ راج ءَ !
بلے انگت تو من ءَ وتی اَرواہ ءِ ٹُکر پھم اِتگ ۔
گلابو ترا گپے بہ گُش آں ؟
تو جکانسر نہ بئے ؟
گپ ایش اِنت تئی شھیدی ءِ ھال من ءَ سر بوت من سک پروشت آں ، زیکینیں من تئی ھمک کتگیں گپاں دل ءِ دنیا ءَ نوک کنگ ءُ گریوگ ءَ آں !
گیشتر ھمے گپ من ءَ دردیگ کنگ ءَ اِنت باریں تیرانی سُمبگ ءُ سکرات ءِ وھد ءَ تو منی نام چینچو رند ءَ گپتگ ءُ چینچو تکانسر بوتگ ئے ۔
من بے کساس بژنیگ آں !
بلے کَس نیست تسلہ بہ دنت ، چہ سلمان ءُ بابا ءَ رند تو تسلہ دات بلے تو اوں من ءَ یل دات ؟
پہ کئی اوستا ؟
زاناں من اَنچو مُھکم اِت آں ؟
ھیر اے گپ ءَ یل کن ۔
بلے دلجم بو تئی تُپنگ ءَ من دور نہ دے آں اے منی مُسّام اِنت گوں تئی رِتکگیں ھوناں ۔
الم شھیدانی رِتکگیں ھونانی جُست ءَ کن آں چہ بدیں دژمن ءُ آئی داشتگیں دلُکاں ۔
تئی واھگانی اَجگیں چنالاں پہ گیمُرگ نیل آں ۔
من ءَ پھر اِنت شمئے دلیری ءُ سر بُلندی ءِ سر ءَ ۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔