TBP Balochi

بلوچ لبریشن آرمی ءِ جارکش جیئند بلوچ ءَ گْوشتگ کہ مئے سرمچاراں شاھرگ ءِ دمگ کھوسٹ زرد آلو ءِ ھند ءَ پاکستانی لشکر ءِ کارمند دورجنگیں توپک ءِ گون ءَ نشانگ کرتگ چریشی ءَ چَہ ھما دمان ءَ آ مرتگ –

ٹی بی پی ءَ سربیتگیں ھالانی رد ءَ ھزدار ءِ شھر ءَ باپاری سَٹ ءُ مٹی ءَ تیرگواری بیتگ چریشی ءَ چَہ دھنی بکش زدگ بیتگ –

زدگ بیتگیں دھنی بکش درمان کنگ ءَ نادراہ جاہ ءَ برگ بیتگ ءُ پولیس ءَ ویل ءِ بارو ءَ پَٹ ءُ پول بندات کرتگ –

ھمے وڑ ءَ آواران ءَ رمزان ءِ دبوج گروکیں مردمانی سر ءَ پولیس ءَ پاتراپی کرتگ ءُ چریشی ءِ پشدر ءَ دمگی تاجراں زھرشانی ءُ روانککَش اِتگ –

تاجرانی روانک ءِ سر ءَ پولیس ءَ آسوگیس آس داتگ ءُ روانک ءَ بھر زیروکیں مردم دزگیر کرتگ ءُ وتی بنجل ءَ پہ لٹ شاپی ءَ برتگ اَنت-

آواران ءَ پولیس ءِ لٹ شاپانی پشدر ءَ راجدار ءُ چاگردی مردماں پولیس ءِ زورامندی ایر جتگ ءُ سرھاکماں چَہ پولیس ءِ نیزور کنگ ءِپرمان کرتگ –

 سربیتگیں ھالانی ردا بلوچستان ءَ مردمی اگبالانی پانک جنوکیں گل ہیومن راٹس کونسل آپ بلوچستان ءِ تندجاہ پاکستان ءِ نیمگ ءَ بندکنگ بیتگ –

ایچ آر سی بی ءِ شنگ کرتگین درشان ءَ گوشگ بیتگ کہ مئےتندجاہ ءَ سرکار ءَ بند کرتگ ءُ مارا بھتام جنی کرتگ کہ شمئے تند جاہ ءَ پاکستانءِ بگیری ءَ مواد مان اَنت –

ایچ آر سی بی ءَ گوشت کہ مارا ترس اِنت کہ بلوچستان ءَ نیشتگیں مئے باسکاں پاکستان تاوان بار کنت آئی ءَ گوشت کہ مئے تندجاہ ءَتھنا بلوچستان ءَ بیوکیں زوراکی ءُ بلوچ مھلوک ھکانی پدجنی مان اَنت بلے سرکار ءُ آئی ءِ کارمند چرے چیزاں ھم وش ءُ شاتمان نہ اِنت۔

بیگواھیں مردمانی ھاتر ءَ شدکشیں گدان ءَ 3954 روچ سرجم بیتگ –

بلوچستان ءِ بنجاھی شھر شال ءَ وائس پار بلوچ مسنگ پرسنز ءِ زھرشانی بنجل ءَ 3954 روچ سرجم بیتگ، چہ نوشکی ءَ اتکگیں راجداری باسک نور اھمد بلوچ ءَ دگہ مردمانی ھمراھی ءَ بنجل ءِ تر ءُ تاب کرتگ ءُ بیگواھیں مردمانی کھولاں دلپدری درشانیتگ –

وی بی ایم پی ءِ رھشون ماما کدیر ءَ گوں مردماں اھوال کنان ءَ گُشتگ کہ پاکستانی لشکر، چیریں ادارہ ءُ اشانی جوڑ داتگیں (قاتل) بزاں ڈیتھ اسکواڈ ءَ سرجمیں بلوچستان ءَ بیوکیں زوراکیانی تھ ءَ گیشی آورتگ ۔ ھمے وڑ ءَ بیگواھیں بلوچانی جونانی دور دیگ ءِ تھ ءَ ھم گیشی اتکگ۔

آئی ءَ گیشتر گْوشت کہ بیگواھیں مردمانی کھول پُر ایمنیں جھد ءِ بھر جوڑ بیتگ اَنت۔ زورگر ءُ آئی ءِ داشتگیں چاریگانی زلم ءُ زوراکی بلوچ پُسگاں چہ وتی لوٹاں یک تُش ئِے ھم پد کِنز کُت نہ کن اَنت۔ زور بیگواھیں بلوچانی کھولاں سرجمیں زند زھرشانیانی تھ ءَ گوازینتگ ءُ جھان ءَ اے کلوہ داتگ کہ بلوچ پُسگانی آجوئی ءِ ھاتر ءَ پُر ایمنیں جھد ءِ دیمھونی دیگ ءَ جزبگ ءَ چہ چکار اِنت ءُ آیانی زند ءِ ھمک وشی ھمک وشیانی روچ پُر ایمنیں جھد ءَ گوں بندوک اِنت۔

ماما قدیر ءَ گیشتر گوشتگ کہ پاکستانی ادارہ ترُس ءِ تھ ءَ وتی پیدا کُتگیں سل کار پرُ ایمنیں جھد ءِ ھلاپ ءَ سر ءُ پر کنگ ءَ پرماتگ اَنت۔ گوستگیں ماہ ءَ بازیں بلوچ بیگواہ کنگ بیتگ اَنت ، پاکستان ءَ وتی گوستانک ءِ تھ ءَ میان اُستمانی گَل ءُ جھانی ایمنی ءِ ھیال نداشتگ کہ اے جھان ءِ ھاتر ءَ یک جیڑگی گپ اَنت۔

نبشتہ کار: جواد بلوچ

سرجمیں دنیا مروچی ماتانی روچ ( مدرز ڈے ) دارگ بوَگ ءَ اِنت. امریکہ ءَ اینا جاروس نامیں جنین آدم ءَ کہ آئی ءَ اوّلی جھانی جنگ ءِ تہ ءَ ٹپّی بوتگیں جنیانی ھزمت کُتگ ءُ نامدار بوتگ. اینا جاروس ءَ وتی مات ءِ مرگ ءَ رند آئی ءِ روچ داشت ءُ جھان ءَ اے یاتگیری روچ ءِ برجم دارگ ءِ واستا جُھدے بندات کُت ءُ امریکہ ءِ سرکار ءَ زور دات اِش کہ ماتانی روچ باید سرجمیں جھان ءَ سوچکان (مئی) ءِ دومی ھپتگ ءِ یکّ روچے ءَ دارگ بہ بیت.
اینا جاروس ءِ گُشتَنے کہ ” مات انچیں ھستی یے کہ پہ تو دُنیا ءِ تہ ءَ ھرچی کَنت کہ دگہ کَسّ کُت نہ کنت “
بلے امریکہ ءِ سرکار ءَ جاروس ءِ گپّ نہ مَنّ اِت ءُ گُشت کہ باندا دگہ یکّے پاد بئیت ءُ بُہ گُشیت کہ وسّیگ ءِ روچ ھم دارگ بہ بیت گُڑا چون کن ئے، بلے اینا جاروس ءِ جُھد بے مُزّ نہ بیت ءُ 1911 ءَ امریکہ ءِ ریاستاں ماتی روچ منّ اِت 1914 ءَ امریکا ءِ مستر (صدر) وُڈرووِلسن ءَ اے جار جتّ کہ سوچکان ( مئی) ءِ ھمّک دومی ھپتگ ءِ شمبے ءِ روچ ءَ سرجمیں جھان ءَ ماتی روچ دارگ بہ بیت ءُ پد ءَ جاروس ءَ اے گپّ ھم ایر کُت کہ مات ءَ گوں باید چہ دل ءَ مھر بہ بیت نیکہ ٹیکی ءُ نمدی دیگ بہ بیت. مرچی اے اینا جاروس ءِ جُھد ءِ برورد اِنت کہ سوچکان ءِ جُتا جُتائیں روچاں سرجمیں جھان ءَ برجم دارگ بوّگ ءَ اِنت.

وھدے کہ بلوچستان ءِ نام گرگ بیت یا کہ مئے گوشاں کپ ایت گُڑا اِد ءِ ماتانی دروشم چہ دُنیا ءِ آ دگہ ماتاں جُتا تر اِنت. بلوچستان ءِ ماتاں لھتے اکس گون اِنت ءُ اے ھمایانی (چُکّانی) اکس انت کہ چہ اِے ماتاں گِستا کنگ بوتگ انت ءُ ھمے اکس دست ءَ اَنت برے آ پریس کلب ءِ دیم ءَ نشتگ انت ءُ شُدّ ءِ زھرشانی کنگ ءَ انت ءُ برے آ دَگانی سر ءَ ویل انت. اے ماتانی گِندگ ءَ رند انچوش سما بیت کہ بلوچستان بہ گند ئے اے جھان ءِ بھر نہ اِنت ءُ پہ زور اِے جھان ءَ آرگ بوتگ بس پہ ھمے ماتانی درد ءُ رنجانی پیش دارگ ءَ.

تنیگا بلوچستان ءَ چوشیں مات چمّاں نہ کپتگ کہ آ چہ اے آس ءَ پھریز اِتگ ءُ وشھالیں زندے گوازینتگ. چاریں نیمگا چمّاں شانک دے ئے گندگ بیت کہ بس بلوچستان ءِ ماتانی مکسد ھمیش اِنت بچّ ودی بہ کن بُہ رودین ءُ پد ءَ ھمے ءُ بچّاں چہ ماتاں گستا کنگ بہ بنت ، گار ءُ بیگواہ کنگ بہ بنت سالانی سال سیاہ ءُ تھاری‍ں کوٹیانی تہ ءَ بند کنگ بہ بہ بنت ءُ ھمے مات چہ لوگ ءَ در کپّ اَنت وتی بچّانی سلامتی ءُ آجو کنگ ءِ واستا برے آ جُتا جُتائیں پولیس ءُ کورٹانی دیم ءَ رَو انت وتی بچّانی رکّینگ ءُ آجو کنگ ءِ واستا جُھد کن انت ءُ در پہ در بہ اَنت ءُ برے پریس کلبانی دیم ءَ نند انت شُدّ ھرتالی ءُ زھرشانی کن انت ءُ برے آ کوئٹہ ءُ کراچی ءِ دگانی سر ءَ ویل بہ اَنت بلے جُست کنوک نیست ـ

مِچّ البوم ءِ گُشتنے کہ ” وھدے کہ تو مات ءِ چمّاں چار ئے گُڑا تو زان ئے کہ ترا زمین سر ءَ ھم زگریں مھر رس اِت کنت ” بَلے من گُش آں کَسّے کہ وھدے بلوچستان ءِ ماتانی چمّاں چار ایت گُڑا آ زانت درد ءُ رنج چی یے ءُ ایشانی اسلی دروشم ءَ گند ایت ءُ پھم اِت کنت ـ من کہ وھدے چاگردی رسانکدار ءَ پچّ کن آں گُڑا بس لھتے اکس گِنداں گوں درداں چُوش وَ اکس بازینے دیم ءَ کپ ایت بلے لھتے اکس انچیں بہ اَنت ھما اکسانی دست ءَ اکس انت ءُ اکسانی تہ ءَ درد مان اِنت اگاں کسّے مار اِت بہ کنت. آ اکس گلام پاروک ءِ مات ءِ اکس بہ بیت کہ آئی ءَ ماھے ساری اے کوڑھیں دُنیا یلّ داتگ بلے اے مات ءَ وتی زند ءِ گُڈّی روچ کوئٹہ ءِ پریس کلب ءُ دگانی سر ءَ گوازیتگ اَنت بس پہ وتی چُک ءِ آجوئی ءَ . اے ماتانی پریات بہ گند ئے ارش ءَ ھُدا ءَ سرّ بیتگ انت بلے بَژن کہ زمین ءِ سر ءَ نشتگیں ھُدایاں اے پریات ءِ توار اِش نُہ کُتگ اَنت ـ آ اکس زاکر مجید ءِ مات ءِ بہ بیت کہ آئی ءِ سرجمیں زند ھمے درد ءُ رنجانی تہ ءَ گوستگ زاکر مجید ءَ کساس چہ دہ سال ءَ بُرز اِنت کہ تھاریں کوٹیانی ءِ تہ ءَ بندیگ اِنت ءُ زاکر ءِ مات اے درد ءَ وتی اندر ءَ مارگ ءَ اِنت دگہ ھزاراں چُشیں مات ھست کہ وتی لاڈکیں بچّانی واستا روچ ءُ شپاں پہ پہ اُمیتے ماں ودار گوازینگ ءَ اَنت .

اے روچ ھما ماتانی نام ءَ ندر اِنت کہ جُھد کنگ ءَ اَنت. پریس کلب ءُ دگانی سر ءَ نشتگ انت وتی چُکّانی پہ سلامتی آجو بُوَگ ءِ ودار کنگ ءَ اَنت.

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانکدار ایشانی منّوک بہ بیت یا اے گل ءِ پالیسیانی درشانی اِنت۔

اے گپ ءَ ھرکسے زان ایت کہ ھما راجانی زبان دیمروی کن اَنت کہ ھما راج وتی راجی زبان ءِ بستار ءُ ارزِشت بِہ زان ایت، راج ءِ لس مھلوک ءِ تہ ءَ راجی زبان ءِ آگاھی بِہ بیت، راج وتی راجی زبان ءَ ماں وانگجاھاں، دربرجاہ ءُ شھدربرجھاں وان ایت، انچوش کہ وتواجہ ءُ آجوئیں راجانی راجی زباناں سرکاری درجگ دیگ بیت چمیشکا دیمروی ءِ واست ءَ وڑ وڑیں آسراتی بنت انچوشکہ پہ زھگاں کارٹون، روتاک، وتگُش، گِندگُش ءُ پہ زبان ءِ دیمروی ءَ بلاھیں کتابجاہ ءُ تامُری ءُ گِندگُشی رسانکدر ءِ ترامگیج بنت بلے پہ بلوچ راج ڈولیں زیردست ءُ گلامیں راجانی زبان ءِ دیمروی واست ءَ ناں کہ اے وڑیں بُنکی آسراتی بنت ءُ نیکہ جْوانیں وانگجاھاں بنت بلکیں گلامیں راج ءِ ھر دمگ، شھر ءُ ھنکین ءَ راج ءِ لس مھلوک زورآور ءِ زُلم ءُ کھر ءِ آماچ بیت، زورآور گلامیں راج ءِ پدریچ ءَ وتی زبان وانینگ ءَ بے وس کنت ءُ زیردستیں راج ءِ زبان بیگواہ کنگ ءَ وڑ وڑیں پندلاں ساز کنت چی ءَ دژمن زان ایت کہ اگاں اے گلام وتی راجی زبان ءَ وان ایت گُڑا راجدوست بیت ءُ وھدیکہ کہ راجدوستی یے گلام ءِ پدریچ ءُ لس مھلوک ءِ تہ ءَ ودی بیتگ گُڑا آ راج گلامی نہ سَگّ ایت بلکیں گلامی ءِ سانکلاں سند ایت ءُ وت آجو کنت پمیشکا مرچی ھر زانتکاریں بلوچ اے گپ ءَ جْوان پوہ انت کہ دژمن ءَ مُدام بلوچ راج گوں ھر وڑیں ناروائیں زورانسری کتگ۔ دژمن ءَ ناں کہ ایوک ءَ بلوچ راج ءِ تُلُب سندھ ءُ پنجاب ءِ نیمگ ءَ بھر ونڈ کتگ اَنت کہ نزورتر ایت ءُ دومی بلوچ راجی زبان ءِ تہ ءَ بازیں اڑ ءُ جنجال ودی کتگ ءُ بلوچ ءِ پدریچ چہ ماتی زبان ءِ وانگ ءُ نبیسّگ دِیر ءُ گِستا داشتگ چمیشکا بلوچ راج ءِ پجّار ءُ آئی ءِ راجی زبان چہ بلوچ ءَ بے کساس ڈالچار بیتگ ءُ دژمن ءَ بلوچ راج مجگی گلام جوڑ کت۔

البت بلوچ راج ءَ وتی گلامی نہ منّ ات بلکیں مُدام یکشل ءَ وتی راجی آجوئی ءِ جُنز ءَ گوں ھوناں ھاٹیگ دیان ءَ بیتگ ءُ دومی نیمگ ءَ زبان دوست ءُ راجی کواساں بلوچ راجی زبانانی زندگ دارگ ءَ شپ داں روچ بے کساس جُھد کتگ کہ راج زبان دوست ءُ راج دوست بِہ بیت۔ مرچیگیں تیزیں ءُ دزگٹّیں دگنیا ءَ دامگ ءِ زمانگ انت پمیشکا ھچ کسے ناں کہ ھندی ءُ پارسی ءِ روتاکاں وان ایت، ناں کہ وتگُشاں دلگوش دار ایت ءُ نیکہ تب ھر وھد ءِ وانگی یے کسے وان ایت بس چہ وتی گوانکو ءُ کارگِساں بی بی سی، الجزیرہ، نیویارک ٹائمز ءُ سی این این وڑیں جھانی تندجاھاں اھوال ءُ اھوالاں وان انت ءُ جھان ءِ جاوراں سرپدی زیر اَنت گُڑا اے درگت ءَ بازیں زبان دوستاں چہ وتی رسانکدری تندجاھاں بلوچی سیکشن، بلوچی بھر اڈ کتگ انت کہ پہ راجی زبانانی دیمروی ءَ بلوچ نبشتہ کارانی نبشتانک ءُ آزمانک ھم چہ ھمے تندجاھاں شِنگ ءُ شانگ بِہ بنت کہ بلوچ راج وتی ماتی زبان ءِ وانگ ءُ نبیسّگ ءِ نیمگ ءَ بئیت۔ چوناھیگا اے باز جْوانیں گامگیج انت کہ چریشی ءِ آسر ءَ مرچی بلوچ چاگِردی ءَ بلوچی وانگ ءُ نبیسّگ ءِ یک بلاھیں آشوبے ودی بیتگ۔

بلے چہ اے درستیں جُھد ءُ گامگیجاں بلاھیں کار دی بلوچستان پوسٹ ءِ راجی زبانانی جتا جتائیں رسانکدری تندجاھانی بندگ ئیگ انت کہ نی بلوچ راج پہ گیدی ءِ ھال ءُ اھوال ءِ وانگ ءَ ھندی ءُ پارسی ءِ تندجاھانی وازمندگ نہ انت بلکیں نی بلوچ راج وتی جِند ءِ راجی زبان براھوئی ءُ بلوچی زبان ءِ تہ ءَ تب ھر وھد ءِ ھال ءُ اھوالاں وان ایت ءُ زان ایت۔

منی نز ءَ اے پہ بلوچ راج ءَ یک بلاھیں ٹیکی یے ءُ ما ایشی ءَ ایوک ءَ یک تندجاھے نہ گْوش ایں بلکیں پہ گلامیں راج ءَ اے یک ترامگیجے چریشی ءَ ماتی زباناں بے کساس پائدگ ءُ دیمروی رس انت۔ نی ھر بلوچ ءِ اے راجی زمہ واری انت کہ ما وتی سْیاد ءُ وارساں ھم ھمے سرپدی بہ دے ایں کہ براھوئی ءُ بلوچی تندجاھاں تب ھر وھد ءِ ھال ءُ اھوالاں بِہ گِر ایں ناں کہ ھندی ءُ پارسی ءِ تندجاھانی رند ءَ تچ ایں۔ چہ ایشی ءَ مستریں پائدگے رس ایت کہ بلوچ راج وتی ماتی ءُ راجی زبانانی وانگ ءُ نبیسّگ ءَ ھیل کنت ءُ بلوچ راج ءِ تہ ءَ یک بلاھیں راجدوستی ءُ ڈیھ دوستی یے ودی بیت ءُ بلوچ راج ءَ یک روژنائیں بانداتے دنت۔

گُڈسری بلوچ راج ءِ رھشوناں ھم دزبندی انت کہ گُلیں راج ءَ راجی زبانانی وانگ ءُ نبیسّگ ءِ کڈن بِہ کن انت کہ ایشانی ٹکر ءُ منّوگر بلوچی زبان ءِ دیمروی ءِ پِڑ بیا اَنت۔
بلوچ راجی زبان شالا دیمرویاں سر بات اَنت ءُ بلوچستان زندگ بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانکدار ایشانی منّوک بہ بیت یا اے گل ءِ پالیسیانی درشانی اِنت۔

دی بلوچستان پوسٹ

نیشنل پاٹی ءِ کیچ ءِ ھنکین ءِ سروک مھمد جان دشتی، جنرل سیکریٹری ھلیم بلوچ ءَ شمبے ءِ روچ ءَ نیشنل پاٹی ءِ دمگداری گل ءِ نیمگ ءَ پیرا میڈیکل اسٹاپ ایسوسی ایشن ءَ کیچ ءَ پھریزگی دپبند بھر کرتگ، پیرا میڈیکل اسٹاپ ایسوسی ایشن کیچ ءِ کسان کمک سرکماش سبزل ھان کولواھی ءَ نیشنل پاٹی کیچ ءِ نیمگ ءَ پھریزی دپبندی زر زرتگ –

ھمے وھد ءَ مھمد جان دشتی ءَ اھوالکاراں گوں گپ کنان ءَ گْوشت بلوچستان ءِ راجدپتر ءَ اے بے سما ءُ نادلگوشتریں ھاکمانی ٹولیانی پنجگ کپتگ اَنت اے مھلوک ءِ نمائندگ اَنت ناکہ اشاں مھلوک ءِ سد ءُ سما گون اِنت ھمے سبب اِنت کہ اے ٹولی مھلوک ےِ جان ءُ مالانی پھریزگ ءَ دلجمی نہ اِنت –

آئی ءَ گْوشت کہ اگاں ناگتی ءُ ناوشی ءَ نیشنل پاٹی واکانی تہ ءَ بیت اِنت گڑا ھما وڑ ءَ کہ دوھزار ءُ سیزدہ ءَ آواران ءَ زمین جُمب ءِ وھد ءَ ڈاکٹر مالک ءُ میر ھاسل ھان ءَ لندن ءَ واتری کرتگ ءُ لندن ءَ چَہ تچک ءَ آواران ءَ وت ءَ رسینتگ ءُ دَہ ءُ پانزدہ روچ ءَ ھمود ءَ نندوک بیتگ ءُ سرکاری مشینری کارانی سر ءَ دلگوش گور کرتگ ءُ زوتی ءَ اے کار سرجم کرتگ اَنت-

مھمد جان دشتی ءَ گْوشت کہ بژنی رنگے ءَ گوشگ بیت کہ اے کساس ءَ تاوانباری ءَ ابید جام ھاسب ءَ انگت ءَ سرپدی نیست اِنت اے جیڑہ پی ایم ڈی سی ءِ نہ اِنت بلکیں جانسلامتی ءِ جیڑہ اِنت ءُ جانسلامتی کارکنوک مھکم کنگ ءُ اے نادراھی ءِ دیمداری ءَ کڈن کنگ لوٹ اَنت بلے جام ساھب انگت ءَ ڈاکٹر ءُ تبکاراں تنی وھدی شریں ءُ جوانیں پوشاک دیگ ءَ جاڑیگ نہ اِنت ءُ ناکہ شال ءَ ابید دگہ ھند ءُ دمگانی نادراھی بنجلاں پوشاک ءُ درمانی گیش ءُ گیواری روان داتگ –

دی بلوچستان پوسٹ

بلوچستان ءِ بنجاھی شھر شال ءَ وائس پار بلوچ مسنگ پرسنز ءِ نندانکی بنجل ءَ 3ھزاد 9 سد ءُ پنجاہ ءُ سَے روچ سرجم بیتگ – نال گریشہ ءَ چَہ ابدلرزاک بلوچ ءَ بنجل ءِ تر ءُ تاب کرتگ ءُ بیگواھیں مردمانی کھولاں پدردی درشانیتگ –

وی بی ایم پی ءِ رھشون ماما کدیر بلوچ ءَ ھمے وھد ءَ گْوشت کہ پاکستانی لشکر ءَ سرجمیں بلوچستان ءَ ناشری کاروائی ترند کرتگ اَنت –

کلات، مشکہ، آواران، پنجگور ءَ ھوار بلوچستان ءِ دگہ ھند ءُ دمگاں زوراکیں لشکر وتی دمگی کاسگ چَٹانی ھمراھی ءَ ھوار بیتگ ءُ بلوچ آبادیانی سر ءَ اُرش ءُ مردمانی لَٹ شاپیانی کنگ یکشل ءَ برجاہ اَنت –

آئی ءَ گْوشت کہ بلوچستان ءَ پاکستان ءَ میان اُستمانی راھبند ءُ مردمی اگبال سرگوز کرتگ اَنت بلے مردمی اگبالانی پانکجن تنی وھدی بے سما اَنت کہ چریشی ءَ بلوچ سرڈگار ءِ سر ءَ مردمی اگبال ءُ میان اُستمانی راھبند بس دپی گپانی تہ ءَ پَشکپتگ اَنت –

ماما کدیر ءَ گْوشت کہ میان اُستمانی راھبند داروکیں ڈیھانی تلوسکانی بے تواری ءَ مردمی اگبالانی پانکجنی ءَ بلوچستان ءِ جاورھالاں کور دیدانکی مانا کتگ اَنت – بلوچستان ءَ مردمی اگبالی لگتمالیاں مردمی کُشت ءُ کوشی جاور گپتگ اَنت –

آئی ءَ گْوشت کہ بلوچستان ءِ سر ءَ پاکستان ءَ زوگری کرتگ ءُ بلوچ راج ءِ مڈیانی سر ءَ پنچگ جتگ ءُ ھما وھد ءَ بہ گر داں مروچی ءَ پاکستان بلوچ راج ءِ توار ءَ نسل کُشی ءِ دروشم ءَ دزبند اِنت بلے مردمی اگبال پانکجن پاکستانی زوراکیاں نادلگوش اَنت –

نبشتہ کار: علی جان بلوچ

شھداد ترا یات بیت مزنیں مدتے ءَ پد کائد آزم مزن شھدربرجاہ ءِ مجید(Huts) ھٹس ءَ مئیگ ءُ تئی نند ءُ نیاد بوت۔ شھداد منی ھیال ءَ ترا شر یات بیت کہ مئے بنداتی نند ءُ نیاد 2012ءِ جنوری ءَ وانگ ءُ زانگ ءِ درگت ءَ اتاء شاد ڈگری کالج تربت ءِ نوکیں ھاسٹل ءِ کتابجاہ ءِ مزنیں ھال ءَ بوت، چو کہ آ دیوان ءَ سنگت وَ باز اِت اَنت تو منءَ ھمے ھاتر ءَ یات بہ ئے کہ دیوان ءِ جارچین تو اِت ئے۔

اے نند ءُ نیاد ءَ پد ما یکے دومی ءَ گوں باز نزیک بوان بوت اِیں ،چی ءَ کہ تو ھما سنٹر ءَ کہ وانینگ ءَ اِت ئے من اود ءِ نودربرے اِتاں.

شھداد کیچ ءَ تئی آوار جنگ ءِ لھتیں روچ پیش من ترا دیستگ ات۔ ھمے درگت ءَ ناگہ ءَ یک روچے منی ناکو زتک ءَ من ءَ ھال دات کہ “سر شھداد برگ بوتگ۔” چی ءَ کہ آ ورنا بولان سنٹر ءَ تئی نودربر ات ءُ چو کہ آئی ءَ زانتگ ات کہ تو منی سنگتے ئے پمیشکا آ ڈن ءَ چہ اتک ءُ تچک ءَ ھمے گپ ئِے من ءَ ھال دات۔ گڑا من ھیران بوت آں۔ چی ءَ کہ رسول جان جنوری دوھزار چاردہ ءَ برگ بوتگ ات بازیں سنگتے دراتک ءُ تو بس وتی سنٹر ءُ اسکول ءِ وانینگ ءَ گوں بندوک ات ئے، سھباں اسکول ءُ بیگاھاں سنٹر ءُ دگہ کار ءُ چست ءُ ایراں گوں ھوار نہ ات ئے بلے اے میان ءَ مئے نند ءُ نیاد وھد وھدانی سر ءَ بوت انت۔پد ءَ لھتیں روچ ءَ پد تو یل کنگ بوت ئے، ھمے وھد ءَ ھالانی تہ ءَ اتک شھداد ممتاز نیشنل پارٹی ءِ بھر بوتگ۔
ھمے روچ ءَ چہ من سک ءَ ھیران بوت آں ءُ پد ءَ ھمے وھد ءَ بازیں کسے ھاموش بوتگ ات ، منی دل ءَ گشت تو ھم بگند ئے پہ ھاموشی ءِ ھاتر ءَ نیشنل پارٹی ءِ بھر بوتگ ئے ءُ راستی ھمیش انت کہ منی دل ءَ نہ گشت چہ ایش ءُ پد گوں تو نند ءُ نیاد بکن آں پد ءِ کمیں وھد ءَ رَند من ءَ ھال سر بوت کہ تو اسلام آباد ءَ ئے۔ راستی اش انت اے وھداں ھم دل ءَ نہ ات کہ گوں تو نند ءُ نیاد بکن آں پرچا کہ من ءَ نہ وش بوتگ ات کہ تو چی ءَ نیشنل پارٹی ءَ شتگ ئے بلے وھد ءَ پد ءَ من ءَ تئی نیمگ ءَ سرکت دو یا سے سال پیسر کہ من اسلام آباد اتک آں گڑا منی دل ءَ گشت گوں ترا نند ءُ نیادے بہ کن ، کمے اُش جت کہ نند ءُ نیاد بکن آں یا نا بلے۔۔۔۔ مجید ھٹس ءَ نند ءُ نیاد بوت۔۔۔ منی ھیال ءَ تو پیسر ءَ سرپد ات ئے کہ من تئی گوں نند ءُ نیادے ءَ پیداک آں من دگہ سنگتے ءَ گشت شھداد ءَ بہ گش کہ گوں تو نند ءُ نیادے کن آں ،من ءَ مزنیں مدتے بوتگ ات کہ گوں تو دچار نہ کپتگ آں۔
ترا یکین باور کنت تئی گندگ ءَ گوں من سک باز پشومان بوت آں کہ ترا من پیسر ءَ شرّی ءَ نہ پھم اِتگ بلے نوں من زانتگ ات کہ تو بلوچ ءِ دائمی مردم ئے۔
تو کہ من ءَ دیست اولی گپ ھمے گشت شر کتگ اتکگ ئے ، بلے راستی ایش اِنت کہ من انگت نہ زان آں کہ تو پرچا اے گپ من ءَ گشت۔۔۔اگاں پہ من اسلام آباد ءِ روگ شر ات گڑا پہ تو چی اود ءَ نندگ شر نہ ات؟
چوش کہ لھتیں گش اِیت شما چہ اسلام آباد لٹ دیگ بوتگ ات پمیشکا شما سلاہ بندیں جد ءُ جھد بندات کتگ ءُ دگہ لھتیں ھمے گش اِیت، شما نہ وانندگ ات کہ شما فینن شری ءَ نہ ونتگ ءُ سرپد نہ اِت کہ فینن تشدد ءُ راجدوستی ءِ بارو ءَ چے گش اِیت ءُ ابید سرپد بوگ ءَ تشدد نیمگ ءَ شتگ ات۔۔۔۔شدّو کسم اِنت کہ تو ءُ اھسو ھنوں نزیک ءَ بوتین ات شما ایشان ءَ ھمینچو زاہ بہ داتیں کہ پد ءَ ایشاں شمئے بارو ءَ دوبر چشیں گپ کت نہ کتگ ات بلے اھسان گیش زاہ داتگ ات پد ءَ سک ءَ کند اتگ ات ئے۔۔۔پرچا کہ کسے ءَ ھم ترا ءُ اھسان ءَ را دیستگ آ زانت اگاں اسلام آباد ءِ بلوچ ورنایانی تہ ءَ چہ شما گیش فینن ءَ را کس سرپد بوت نہ کنت شما امل کت ءُ پیش داشت کہ تشدد ءَ مستریں تشددے ھلاس کت کنت۔۔۔۔ اڑے شدّو تو ھمے مردم ءَ شر زان ئے کہ گش اِیت شما فینن ءِ تشدد ءِ “فلسفہ” نہ ونتگ ءُ شمئے گْور ءَ پروگرام نہ بوتگ، اڑے ھمے کہ تو آئی ءِ نام”بلوچستان ءِ لال ھان” کت ءُ دگہ زالے گشگ ءَ ات کہ ترا ءُ اھسان ءَ را چہ اسلام آباد ءَ لٹ دیگ ءُ کشگ بوتگ پمیشکا جنگ ءِ بھر بوتگ اِت۔۔۔شدّو اے زال تئی ٹیچر بوتگ۔۔۔بلے شما ھنوں اد ءَ نہ ات منی دل گش اِیت شمئے بدل ءَ ایشاں زاھے بہ دے۔۔۔یکے کیت فینن ءَ وتی وڑ ءَ بیان کنت ءُ دگہ یکے کیت گش ایت شما لٹ دیگ بوتگ اِت پمیشکا جزباتی پیسلہ ءِ نام دیگ ءِ جھد ءَ اَنت.

شما نوں فینن ونتگ، فریرے ءُ تشدد “فلسفہ” ونتگ بوتگ ءُ ھمے فلسفہ ءَ املی دابے دیگ ءَ بوتگ ات۔۔۔شھداد اگاں ترا یات بہ بیت گوستگیں رمزان ءَ من ءُ تو دو پہ دو اِت ایں۔۔۔ترا من جست کت کہ تو نیشنل پارٹی ءَ پرچی ءَ شتگ ئے ؟ تو گشت کہ من وَ نہ زانتگ چے بوگ ءَ انت منی وتی مردمے ءَ من ءَ لوٹائینتگ کہ بیا۔من شتگ آں مردمے ءِ لوگ ءَ بازیں مردمانی دیوانے بوتگ گپ ءُ گال بوتگ دگہ چشیں ھچ چیز نہ بوتگ ، پد ءَ ایندگہ روچ ءَ منی نام روتاک ءَ اتکگ کہ نیشنل پارٹی ءِ گوں بندوک اش کتگ، پد ءَ تو گشت کہ من سک ءَ جزباتی بوتگ آں کہ من وتی دگہ بیانے جاری کن آں بلے منی وتی مردمے ءَ من ءَ نہ اِشتگ کہ تئی سر ءَ مسئلہ بوت کنت۔پد ءِ ھمد ءَ تو من ءَ گشت ناسرآباد ءِ سنگتے ھست روگ لوٹ اِیت من نہ زانت کہ آ مردم اھسان انت بلے نوں من کمیں مھسوس کت تئی جند ھم سلاہ بندیں جد ءُ جھد کنگ لوٹ اِیت۔۔
ترا من گشت وت ءَ سمبال ات بلوچ ءِ مردم شما ات کہ وانندگیں مردم ات ، تو کند ات۔۔۔پد ءَ من گشت کہ تو کوہ ءَ مرو زمین ءَ (سرفیس ءَ)تئی زرورت انت۔۔۔تو بس ھمے گشت کہ:اے نندگ ءَ نیل اِیت(بزانکہ ریاست نندگ نیل اِیت سرفیس ءَ)
من ھم دگہ ھچ نہ گشت
بلے شدّو من وت دل ءَ مار ات کہ تو بلکیں نہ رو ئے۔۔۔بلے نوں ترا ھال دیاں کہ من ءَ ھما روچ ھم تئی گپ ءِ سر ءَ سد در سد تپاک ات کہ۔۔۔اےنندگ ءَ نیل اِیت۔۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانکدار ایشانی منّوک بہ بیت یا اے گل ءِ پالیسیانی درشانی اِنت۔

دی بلوچستان پوسٹ

ٹی بی پی ءَ سر بیتگیں ھالانی رد ءَ پنجگور ءِ دمگ سراوان ھدابادان ءَ یک چاتے ءِ روپگ ءِ وھد ءَ زھریں گیس ءِ پُر بوگ ءَ یک ءِ دومی ءِ رکینگ ءَ پنچ مردم بیران بیتگ –

بیران بیتگیں مردمانی پجار نسیر، پٹان، وزیر اھمد، اَتیک ءُ نوراللہ ءِ ناماں زانگ بیتگ اَنت ءُ یکے ءِ جاور نگیگ اَنت

ھر پنچیں مردمانی سیادی یکیں ٹک ءَ اِنت ءُ اے چات ءِ روپگ ءَ بیتگ اَنت کہ چات ءَ زھریں گیس دراتکگ ءُ یک ءِ دومی ءِ رکینگ ءَ پنچیں مردم بیران بیتگ اَنت-