TBP Balochi

گل ھان نسیر بلوچستان ءِ راجدپتر ءَ ھما نامانی تہ ءَ ھوار اِنت کہ آئی ءَ زُلم ءُ زوراکیانی ھلاپ ءَ وتی شائری ءِ لبزانی تہ ءَ وتی ھیال درانگاز ایوک ءَ نہ کرتگ اَنت بلکیں آئی ءَ ھر تک ءَ وتی بور تاچینتگ اے درگت ءَ بلوچستان ءِ پیشیگیں سروزیر ڈاکٹر مالک ءَ ھم گل ھان نسیر ءِ کرد ساڑاتگ اَنت –

وتی درشان ءِ تھءَ بلوچستان ءِ پیشیگیں سروزیر ڈاکٹر مالک ءَ گوشت کہ مروچی من بلوچستان ءِ نامی ئیں شائر گل ھان نسیر ءِ بوتن ءِ روچ ےِ درگت ءَ گل ھان ءِ راجی کرد ءُ داتگیں کربانیاں سھر چکیں سلام پیش کن آں –

دیمتر ءَ آئی ءَ گْوشت کہ گل ھان نسیر بلوچ نیشنلزم ءِ شعوری سیاست ءِ اولی رم ءِ کماشاں چہ یکے آئی ءَ وتی سرکاری ملازمت ءِ وشین زندمان یلہ کرتگ ءُ راجی سیاست ءِ کنٹگ ءُ ڈنگرانی تہ ءَ پاد ایر کرتگ اَنت –

ڈاکٹر مالک ءَ گْوشت کہ آ اے گپ ءَ جوان ءُ الکاپی ءَ پوہ بیتگ کہ راجی سیاست ءِ پِڑ ءَ سکی ءُ سوری ءَ ابید دگہ ھچ مان نیست، بلئے آئی ءَ وتی راجی گلامی، راجی بے وانندگی، شد ءُ گُژن، سردار ءُ نوابانی زُلم ءُ زوراکیاں لاچار کنان ءَ وتی زند ءَ گون لھتے سنگتانی ھمراھی ءَ بہ گوازین اِت کہ آ سامراجی ءِ ھلاپ ءَ راجی آجوئی ءِ ھاتر ءَ جھد کنگ ءَ اَنت ۔

آئی ءَ دیمتر ءَ گْوشت کہ گل ھان نسیر داں بنگیج ءَ بہ گر داں ھیدر آباد ءَ سازشی کیس ءَ بزاں کہ نوزدہ سد ءُ ھپتاد ءُ ھپت ءَ داں جتائیں وھد ءُ پاساں گوں وتی سنگتانی ھمراھی ءَ پاکستان ءِ جتائیں بندیگ جاھاں بند بوتگ –

آئی ءَ گوشت کہ گل ھان نسیر تھنا سیاسی جھدکارے نہ بیتگ بلکیں لبزانکی رد ءَ آ یک مزنیں راجدپتر نویس، شائر ءُ اھوالکارے بوتگ، آئی ءِ شائری سرکار ءُ سردارانی زُلم ءُ زوراکیانی ھلاپ ءَ یک جنگے ءِ دروشم ءَ بیتگ اَنت-

ڈاکٹر مالک ءَ گْوشت کہ گل ھان نمیران اِنت داں بلوچ ءُ بلوچی ھست اِنت گل ھان مان اِت، بیا اِت گل ھان ءِ پدریچاں روان بہ ایں دانکہ مکھین ڈیھ ءَ چَہ زُلم ءُ زوراکی، گژن، بے علمی ءُ جاھلی ھلاس بہ بیت بلوچ ءَ را دائمی وشھالیں زندے بہ رس اِت –

سر بیتگیں ھالانی ردءَ مند ءَ لشکر ءَ لشکر کشی کرتگ ءُ زالبول جتگ اَنت ءُ لوگانی گران نھادیں مڈی گوں وت بُرتگ اَنت ۔

ھمے وڑ کیچ ءَ چہ رس اتگیں ھالانی ردا کیچ ءِ دمگ دشت بلنگور ءِ بازار ءَ پاکستانی لشکر ءَ بیڑ برتگ ءُ مردم انگیر ءَ کرتگ اَنت۔

ھالانی تہ ءَ گوشگ بیگ ءَ اِنت کہ بل ءَ لشکر ءَ چار مردم آوار جتگ ءُ برتگ، آوار جنگ بیتگیں مردمانی پجار واھگ ء واھد، وسیم ء ابراھیم، بیبگر ء داد کریم ءُ زین ءِ شرپ شاد ءِ ناماں زانگ بیتگ اَنت۔

ھمے وڑ ءَ کیچ ءِ دمگ مند بلوچ آباد ءَ پاکستانی لشکر ءَ واھد ء نزر مھمد ءِ لوگ انگیر ءَ کرتگ ءُ لوگ ءَ مانریتگ ءُ جنین ءُ چُک چُپتگ ءُ لوگ ءِ گران بھائیں مڈیانی ھواری ءَ یک پَرپٹ ءِ ھم برتگ ۔

ھمے وڑ ءَ بیست ءُ نُہ اکتوبر دوھزار ءُ نوزدہ ءَ کراچی ءَ پرانا گولیمار ءَ اولیا ولیج ءَ آوار جنگ بیتگیں بی آر پی ءِ بنجاھی پتر ءِ باسک شیر مھمد ءِ زھگ مصدق مروچی یلہ کنگ بیتگ ءُ وتی لوگ ءَ سر بیتگ ۔

چم دیستگیں مردمانی ردءَ بی آر پی ءِ رھشون شیر مھمد بلوچ دوھزار ءُ نُہ ءَ بلوچ نیشنل مومنٹ ءِ سرکماش گلام مھمد بلوچ ءُ لالا منیر بلوچ ءِ ھمراھی ءَ ناشناسیں مردماں ءَ چہ آیانی وکیل ءِ دپتر ءَ بیگواہ کُتگ اَنت ءُ آیانی جون لھتیں روچاں پد مرگاپ ءِ کھور ءَ دست کپتگ اَنت۔آیانی وکیل کچکول علی ایڈوکیٹ ءِ ردءَ پاکستانی لشکر ءَ آئی ءِ چمانی دیما سئیں بلوچ رھشون بیگواہ کُتگ اَنت۔

سر بیتگیں ھالانی رد ءَ بلوچستان ءَ راجدار ءُ چاگردکاراں ھوار سرجمیں تکاں گوں سیادی کنوکیں مردمانی دل ءَ بیم ءُ ترس ءِ پیداک کنگ ءِ ھاتر ءَ ھمک روچ بلوچستان ءِ جتائیں جاھاں نودربر، استاد، ادبکاراں ھوار لس مردمانی بیگواہ کنگ ءِ ھالانی تھءَ یک بریں پدا ترندی پیداک اَنت۔

بلوچستان ءِ بنجاھی شھر شال ءُ وائس فار بلوچ مسنگ پرسنز ءِ زھرشانی بنجل ءَ 3ھزار 9 سد ءُ پنجاہ ءُ ھشت روچ سرجم بیتگ ۔ چمن ءَ چَہ دوست مھمد ھان ءَ بنجل ءِ تر ءُ تاب کرتگ ءُ کھولانی گون ءَ پدردی درشانیتگ ۔

وی بی ایم پی ءِ رھشون ماما قدیر بلوچ ءَ اے وھد ءَ وتی ھیال ءُ لیکہ درشان کنان ءَ گْوشت پاکستان ءَ بلوچ نسل کُشی ءِ میان اُستمانی ترامگیجانی بے تواری بے کساس کارمرد کرتگ ءُ داں انگت ءَ میان اُستمانی جھان ءِ چماں چادرے پرداتگ ءُ بلوچ نسل کُشی ءِ تھءَ وتی دست دراج تِر کتگ اَنت ۔

آئی ءَ گْوشت کہ پاکستان ءِ دو تل ءُ دو پوستی کردار دمگ ءَ ھوار جھان ءَ سرجمی ءَ بدامنی، مزھبی ناشری ءُ ناشرکاری ءِ شنگ ءُ تالان کنگ ءِ بے کساسیں کردار ھست بلے چرے کرداں باجود میان اُستمانی ادارہ پاکستان ءِ ھلاپ ءَ گپ جنگ ءَ منّوک نہ اِنت –

ماما قدیر بلوچ ءَ گْوشت کہ پاکستان دنیا ءِ بے تواری ءَ چارگ ءُ بلوچ نسل کُشی ءِ پالیسی دھے دھے ءَ برجاہ کرتگ اَنت – پُر امنیں جد ءُ جھد ءِ ھلاپ ءَ بہ جن ءُ دور دیگ ءِ پالیسیانی مسامانی دارگ ءَ پاکستان ءَ لھتے سالانی تہ ءَ ھزارانی بلوچ پُسگ آوار جنگ ءُ گار کنگ ءَ پد شھید کرتگ اَنت ۔

آئی ءَ گْوشت پاکستان وتی زورمندیں لَٹ شاپیں پالیسیاں دیم ءَ بران اِنت وتی سوھوئیں کارمنداں پِڑ ءَ آرگ ءُ بلوچ نسل کُشی ءَ یک دگہ ھونی ئیں رنگے ءَ چن ءُ لانچاں کنگ اِنت۔

پاکستانی لشکر ءِ سروک جنرل کمر جاوید باجوہ ءَ شال ءِ تر ءُ تاب کرتگ آئی ءَ وتی گپانی میان ءَ گُشتگ کہ بلوچستان پاکستان ءِ باندات اِنت پُرایمن ءُ وشھالیں بلو چستان ءِ واستا ءَ اُستانی سرکار ءُ مھلوک ءِ پھریزگ مئے پرز اِنت –

پاکستانی لشکر ءِ جارکش(آئی ایس پی آر) ءِ رد ءَ مزن جنرل کمر جاوید باجو ءَ سدرن کمانڈ ہیڈکوارٹر شال ءِ تر ءُ تاب ءَ سر بیتگ اود ءَ سدرن کمانڈ لیپٹیننٹ جنرل مھمد وسیم اشرپ ءُ وش اھت کرتگ –

آئی ایس پی آر ءَ گْوشت کہ تر ءُ تاب ءِ وھد ءَ لشکر ءِ مزن سروک ءَ سیکیورٹی ءِ جاورھالانی سر ءَ ورداسی گپ جتگ اَنت وھدےکہ مزن سروک ءَ را اژدری چِن ءُ لانچ ءُ سیمسری بند ءُ دار گیشتر اوگستان ءُ ایران سیمسراں ٹٹ ءِ جنگ ءِ بارو ءَ گپ جتگ –

،آئی ایس پی آر ءَ گوشت کہ پاکستانی لشکر ءِ نیمگ ءَ کورونا ءِ پروش دیگ ءَ سول انتزامیہ پھریزگ ءُ دمگ ءُ چاگردی ءُ وردنی دیمرویانی واستا پیش پیش گامی بیتگ –

آئی ایس پی آر ءَ گْوشت کہ گیریژن کورنٹین ءَ برجم کرتگیں مسام ءُ گائٰیڈلاننز ءِ رد ءَ پاکستانی لشکر ءِ نیمگ ءَ کنگ بیتگیں کار ستاہ اَنت –

پاکستانی لشکر ءِ جارکش ءِ رد ءَ جنرل کمر جاوید باجوہ ءَ آپسر ءُ سپاھیانی دست ءُ دروھتی ھم بیتگ ءُ آپسر ءُ سپاھیانی کرد ساڑاتگ ءُ آیانی ساڑایگ ءَ کرتگیں کارانی دلبڈی داتگ اَنت –

ھمے وھد ءَ لشکری جنرل کمر جاوید باجوہ ءِ گوشگ اِنت بلوچستان پاکستان ءِ باندات اِنت، وشھال ءُ پُرایمنیں بلوچستان ءِ اُستانی سرکار ءُ مھلوک ءِ پھریزگ مئے پرز اِنت –

زانگ بہ بیت جنرل کمر جاوید باجوہ ءَ شال ءِ تر ءُ تاب ھما وھد ءَ کرتگ کہ گوستگیں روچاں بلوچستان ءِ دمگ کیچ ءَ بلوچ آجوئی دوستانی اُرش ءَ پاکستانی لشکر ءِ یک آپسرے ءَ ھوار شش کارمند کُشگ بیتگ اَت –

پاکستان ءِ لشکر ءِ سروک جنرل کمر جاوید باجوہ ءَ ایشی ءَ پیسر کیچ تگران ءَ میجر ندیم بٹی ءَ ھوار بازیں کارمندانی بیرانی ءَ پد ایران ءِ کمک لوٹ کرتگ لشکری سروکاں گپ ءُ تران کرتگ

فورم ایشیا ءِ گپ کنوکیں ایشین فورم ہیومن رائٹس ءُ ڈویلپمنٹ ءَ گْوشت کہ پاکستان ءَ انسانی ھکانی باسکانی واستا انساپ ءُ پھریز ءِ سرجمی ءِ واستا گامگیج زورگ اژدری اِنت –

فورم ایشیا ءَ وتی یک پریس ریلیزے ءَ سَے مئی ءَ سیاسی باسک عارف وزیر ءِ کوش ءُ دَہ روچ ءَ پیسر، ساجد ھسین سویڈن ءِ کور ءَ دز کپتگیں جون ءِ بارو ءَ گپ بیتگ –

بہ کول ءِ فورم ایشیا انسانی ھکانی واستا توار چِست کنوکانی واستا پاکستان بیمناک بیان اِنت –

ادارہ ءِ ایگزیکٹو ڈائریکٹر، شمینی دارشنی ءَ گْوشت کہ پاکستان ءَ ھنچیں یک راہ ءُ رھبندے ودینگ لوٹ اِیت کہ چریشی ءَ انسانی ھکانی واستا توار برز کنوکیں مردم انتزامیہ ءِ کاروائیاں ابید ترس ءَ وتی کاراں شریں رنگے ءَ کُت بہ کن آں –

آئی ءَ بھتام جتگ کہ پاکستان ءَ انسانی ھکانی باسکاں بے رھبندیں چاگردے ءَ کار کنگ کپگ اِنت –

فورم ایشیا ءِ شھری ءُ انسانی ھکانی واستا کار کنوکیں بازیں گلاں ھواری ءَ پد جوڑینگ بیتگ، اے وھد ءَ بیست ءُ یک ءُ ڈیھاں کار برجاہ اَنت -ایشی ءِ ھواری ءَ فورم میان اُستمان اکنامک ءُ سوشل کونسل ءُ آسیان ءِ انٹر گورنمینٹل کمیشن آن ھیومین رائٹس رھبندانی مساماں ھوار اِنت –

بیان ءَ گْوشگ بیتگ پشتون تحفظ موومنٹ (پی ٹی ایم) ءِ رھشون عارف وزیر پشتونانی واستا شھری ھکانی واستا سرپدی دیگ ءَ بیتگ – پی ٹی ایم ءِ قبائلی دمگاں پاکستان ءِ پالیسیانی رویش بے رھبند اَنت –

پی ٹی ایم ءِ زرمبشت ھما وھد ءَ بندات بیتگ ستمبر دوھزار ءُ یک ءَ پاکستانی سرکار ءَ قبائلی دمگاں ناشرکاری ءِ بگیری ءَ لشکری کاروائیانی بندات کرتگ، چریشی ءِ آسر ءَ بازیں قبائل بے لوگ بیتگ ءُ لھتے مردم بیگواہ کنگ بیتگ اَنت -اے درچ ءَ بیدے آمدگِسی پرمان ءَ کوشانی بھتامی جتگ، کہ چرایاں پاکستانی پوج ءِ سر ءَ راستگیں گپ ھلاپ گوشتگ ءُ رد کرتگ اَنت –

پی ٹی ایم ءَ تچک ءُ پشدری ءَ پٹ ءُ لوٹانی کمیشن ءِ برجاہ کنگ ءِ پرمان کنگ ءِ دزبندی کرتگ، دانکہ بیگواہ بیتگیں مردمانی بیرانیانی بارو ءَ سرپدی کنگ بہ بیت –

پریس ریلیز ءَ گوشگ بیتگ کہ عارف وزیر قبائلی دمگاں کاروائیانی سبب ءَ پشتونانی سر ءَ کپتگیں اسرانی گپ کرتگ ایشی ءِ تہ ءَ گوشگ بیتگ کہ شکایت دیگ بیتگ پی ٹی ایم ءِ نیمگ ءَ گپ سر بیتگ اَنت گپ دیگ نہ بنت –

اود ءَ پاکستانی اھوالکار ءُ بلوچانی ھکانی واستا کارو کنوکیں باسک ساجد ھسین ءِ جون بیست ءُ سَے اپریل ءَ سویڈن ءَ یک کورے ءِ تہ ءَ دزکپتگ اَت گوشگ بیتگ کہ بیھارانی رسگ ءَ پد ساجد ھسین دوھزار ءُ دوازدہ ءَ سویڈن ءَ سیاسی پناھے واستا شتگ آ بلوچستان ءَ بیگوھیانی سر ءَ نبشتگ کنوکیں مردمے بیتگ –

لھتے اھوالکارانی گلانی نیمگ ءَ پاکستان اھوالکارانی واستا بیمناک اِنت،پرچاکہ بہ کول ءِ آیانی اھوالکارانی پھریزگی ءِ واستا ھچ وڑیں راہ ءُ رھبند نیست-

فورم ایشیا ءِ گوشگ اِنت پاکستان ءِ نیشنل کمیشن فار ہیومن رائٹس ءِ کانودی واک داروکاں ابید بے رھبند اَنت –

فورم ایشیا ءَ پاکستان ءِ بالاے دست ءَ زور داتگ ئِے کہ الکاپ ءَ عارف وزیر ءُ ساجد ھسین ءِ بیرانیانی سر ءَ بے واھگدار ءُ آجوئیں پَٹ ءُ پولے ءِ بندات ءَ نہ کنت ءُ ایشانی کوشی ءَ ھواریں مردماں بہ گپت ءُ آمید ءِ سر ءَ بہ اوشتارین اِت –