TBP Balochi

وائس فار بلوچ مسنگ پرسنز ءِ نیمگ ءَ بلوچستان ءِ بنجاھی شھر شال ءَ زھرشانی گدان ءَ 3ھزار 9 سد ءُ شست ءُ دو روچ سرجم بیتگ – بلوچ اسٹوڈنٹس آرگنائزیشن ءِ گوستگیں سرکماش ءُ گوستگیں سینیٹر مھم ھان بلوچ ءَ بنجل ءِ تر ءُ تاب کرتگ ءُ بیگواھیں مردمانی کھولاں گوں پدردی درشانیتگ –

ھمے وھد ءَ وی بی ایم پی ءِ رھشون ماما قدیر بلوچ ءَ گْوشت کہ پاکستان ءِ ھونریچی چَہ بنداتی روچ ءَ برجاہ اَنت بلئے گوستگیں لھتے سالاں آئی ءَ بے کساس ءَ زُلمانی بار ایرگپتگ اَنت ھمک مٹ بیتگیں سیاسی سانبندی ءُ چاگردی تکاں زرکاری ءُ درستیں رویشانی تہ ءَ گیش بیان اَنت –

آئی ءَ گْوشت کہ آبادیانی سر ءَ لشکری کاروائی ءِ دروشم ءَ زُلمانی کوہ پروشی ءِ ھواری ءَ لٹ شاپی ءِ درچانی زور بلوچستان ءِ کُنڈ کُنڈ ءَ بیگواھی ءُ جتائیں رنگ ءُ دروشماں برجاہ اَنت –

آئی ءَ دیمترا گْوشت کہ بلوچستان ءِ بُتیں سرکار نا ایوک ءَ زُلم ءُ گیشانی سِلسلگ ئِے برجاہ کرتگ بلکیں ھما شَوربندیانی رنگ ءَ جمھوری ڈونڈ ءِ زور ءَ واک دزگپتگ ءُ ایشی ءِ پاسداری ءَ ھِچ وڑیں راہ پَش نہ گپتگ –

ماما قدیر بلوچ ءَ گْوشت کہ بلوچستان ءَ رودم گپتگیں سیاسی زانت ءِ تاک ءُ بلوچ مھلوک ءِ پُرایمنیں جد ءُ جھد ءَ میان اُستمانی دزرس ءَ پاکستان ءُ آئی ءِ ھمکستکارانی بے کساس ءَ پاشکی کرتگ ءُ وتی نوک آبادیانی زورانی پالیسانی بے سوبی ءَ لرزگی ءَ پاکستان ءُ آئی ءِ لشکری اُرد گپتگ اَنت سیول پوشاک ءُ ایندگہ اجکھی ءَ نوکیں رنگے ءِ دروشم ءَ بے وسی ءَ بلوچانی جان ءُ زندمان ءِ ھلاس کنگ ءِ پُشت ءَ کپتگ اَنت –

دی بلوچستان پوسٹ ءَ سر بیتگیں ھالانی رد ءَ کیچ ءِ دمگ مند ءَ پاکستانی لشکر ءِ چیک پوسٹ ءِ سر ءَ سلاہ بندیں مردماں اُرش کرتگ –

لشکر ءِ چوکی شیراز ءَ چوکاپ کور ءَ سلاہ بندیں مردماں کسان ءُ مزنیں سلاھانی گون ءَ نشانگ کرتگ ءُ واتر شتگ اَنت – اُرش ءِ آسر ءَ لشکر ءَ جانی ءُ مالی تاوانانی دیمپانی بیگ ءِ ھال اِنت بلئے تنی وھدی لشکر ءِ نیمگ ءَ چوشیں ھال شنگ نہ بیتگ –

اُرش ءَ پد لشکر ءَ دمگ ءَ پیش گامی کنان ءَ اُرشکارانی پَٹ ءُ پول بندات کرتگ –

دمگی مردمانی رد ءَ مند ءُ کش ءُ گوری دمگاں گوستگیں بازیں روچاں پاکستانی لشکر ءِ نیمگ ءَ لشکر کشی برجاہ اَنت ءُ اے وھداں لوگانی سر ءَ بیڑی ءُ بازیں جاھاں بمبگواریں بالگرد گِندگ بیتگ اَنت –

زانگ بہ بیت گوستگیں ماہ ءَ سلاہ بندیں مردماں پاکستانی لشکر ءِ کاروان ءِ سر ءَ اُرش کرتگ اَت کہ آئی ءِ زمہ واری بلوچ سلاہ بندیں ھمسنتیں گل بلوچ راجی آجوئی سنگر (براس) ءَ منّ اِتگ اَت –

براس ءِ جارکش بلوچ ھان ءَ شنگ کرتگیں بیان ءَ گوشتگ اَت کہ سرمچاراں گوست ءَ پاکستانی لشکر ءِ یک کاروان ءُ شیزاز ءِ کوھی دمگاں چیک پوسٹ ءِ انگیر ءَ کرتگ ءُ اُرش کرتگ چریشی ءِ آسر ءَ دوازدہ لشکری کارمند مُرتگ ءُ بازینے زدگ بیتگ کاروان ءَ لشکری گاڑی سرجم ءَ پُرشتگ –

ھمے ماہ ءَ کیچ ءِ دمگ تگران کلگ ءَ پاکستانی لشکر ءِ یک گاڑی ءِ بمب ءِ گون ءَ نشانگ کنگ بیتگ اَت چریشی ءِ آسر ءَ پاکستانی لشکر ءِ یک میجرے ءَ ھوار شش کارمند مرتگ اَت ھمے وڑ ءَ اُرش ءِ زمہ وارہ بلوچ لبریشن آرمی ءَ منّ اِتگ اَت –

بیتگیں اُرش ءِ تامر بلوچ لبریشن آرمی ءِ میڈیا چینل 、ھکل، ءَ شگن کرتگ اَت –

گوستگیں روچ ءَ بلوچ لبریشن آرمی ءِ جارکش جیئند بلوچ ءَ بلیدہ ءِ دمگ نیوانو ءَ پاکستانی لشکر ءِ وردنی سامانانی گرگ ءِ زمہ واری منّ اِتگ اَت –

زانگ بہ بیت گوستگیں روچ ءَ ناشناسیں مردماں پاکستانی لشکر ءِ مڈی بروکیں ٹرک گپتگ اَت، سلاہ بنداں ٹرک ءِ ڈرائیور ءُ آئی ءِ ھمراہ گون وت برتگ اَت وردن مانداشتگ اَنت –

دومی نیمگ ءَ مند ءَ بیتگیں اُرش ءِ زمہ واری بلوچ ریپبلکن آرمی ءِ جارکش بیبگر بلوچ ءَ منّ اِتگ

بیبگر بلوچ ءَ شنگ کرتگیں بیان ءِ تہ ءَ گْوشتگ کہ مروچی سھب ءَ سرمچاراں مند ءِ دمگ چوکاپ کور ءَ پاکستانی لشکر ءِ چیک پوسٹ ءِ سر ءَ کسان ءُ مزنیں سلاھانی گون ءَ ھما وھد ءَ اُرش کرتگ کہ آ نوکیں سنگرے ءِ جوڑ کنگ ءَ دزبند بیتگ اَنت،اے اُرش ءَ دو کارمند ھما دمان ءَ مرتگ ءُ یکے زدگ بیتگ –

آئی ءَ گوشت کہ جتگیں چیک پوسٹ دمگ ءَ کَش ءُ گوری بلوچ آبادیانی سر ءَ لشکر کشیاں دزمانجن بیتگ –

بیبگر بلوچ ءَ گْوشتگ کہ اے وڑیں اُرش بلوچستان ءِ آجوئی ءَ برجاہ مان اَنت۔

بلوچستان لبریشن فرنٹ ءِ جارکش میجر گوھرام بلوچ ءَ کیچ ءَ یک لشکری کارمندے ءِ کوش ءِ زمہ واری منّ اِتگ –

میجر گوھرام بلوچ ءَ گْوشت کہ دوشمبے ءِ روچ ءِ ساھت دوازدہ ءَ کیچ ءِ دمگ تمپ آزیان ءَ لشکر ءِ چوکی ءِ سر ءَ سنیپر توپک ءِ گون ءَ اُرش کرتگ ءُ یک کارمندے کُشتگ –

آئی ءَ گْوشت کہ زیردستیں بلوچستان ءِ آجوئی ءَ داں زورگریں لشکر ءِ سر ءَ اُرش برجاہ مان اَنت –

آزمانک : ما انگت مِر اِیں

آزمانکار: سسّا رھگوز

دی بلوچستان پوسٹ

من بان ءِ دروازگ ءَ شوھازگ ءَ آں۔۔۔۔۔۔۔
من ءَ دیر اِنت کہ اِے تاکانی شم ءَ آں، آزمان نہ دیستگ  پہ آزمان ءَ زھیر بُوَگ ءَ ھم نہ اِنت بس پہ وت زھیر بُوَگ ءَ اِنت، من ءَ سما بُوَگ ءَ اِنت کہ نوں من وت ءَ نہ زاناں۔

دل ءَ گْوشت بِہ گِریواں، بلے نہ گِریت۔۔۔۔۔۔ من گِریوگ ءَ پہ لج نہ کناں بلے نہ زاناں چی ءَ دل بَج اِت منی چماں ھم شُونز بستگ، من کہ مرچی گِریوگ ءِ ھُلّ کُت اِے ارس ھم گِشینت اَنت بلے دل اَت کہ پہ نہ گِریوگ ءَ اُوشتاتگ اَت۔

من کہ کسان اِت آں، من اولی بر ءَ مرگ دیستگ اَت۔۔۔۔۔۔۔مرگ۔۔۔۔۔۔۔بلے آدینک ءِ دیم ءِ مرگ، من وتی دُتُّک ءَ سُور ءَ برگ ءَ اِتاں، من مروا ءِ کمپان ءِ گُلامچوٹ ءَ سر بوتاں۔۔۔۔۔۔۔واہ ءُ زارے مچّ اِت، من وتی دُتُّک دور دات پہ تَگ مروا ءَ شُت آں، مروا ایوک ءَ گِریوگ ءَ اَت ءُ دُتُّک ءُ آدینک کپتگ اِت اَنت ۔۔۔ گْوات ءَ مروا ءِ گِریوگ انچو باوستی کُتگ اَت مردُم  گُمان کُت نہ کنت کہ یک مردمے ایوک ءَ چو گِریت ۔ مروا شکوندیم کپتگ اَت، نوں آئی توار ھم لبژگ ءَ اَت، آئی چم انگت دُتُّک ءَ سکّ اِت اَنت ءُ بژبژ ورگ ءَ اَت، دُتُّک ءِ دوچی ئیں گُد آئی ارساں تر کُتگ اِت اَنت۔

مہ گریو مہ گریو ۔۔۔
تو منی دُتُّک ءَ زیر سُور ءَ بِہ رَو ۔۔۔
گُڑا تو۔۔۔۔۔۔۔۔؟
من۔۔۔۔۔۔۔! من تئی دُتُّک ءَ پہ کَل کنگ ءَ جاھے چاراں۔۔۔۔۔۔
بلے تو کس ءَ ھال مہ دے کہ تئی دُتُّک مُرتگ۔۔۔۔۔۔۔

نوں من چتور سُور ءَ شُت کناں، من ءَ تئی دُتُّک گون اِنت ھرکس زانت منی دُتُّک نہ اِنت،اگاں من ءَ یکّے جُست بہ کنت من چے بہ گْشاں؟ کہ من ءَ اَمبر ءَ وتی دُتُّک داتگ ۔۔۔ اُو!  تو منی دُتُّک ءَ چون کَل کُت کن ئے؟
تو پہ اشی ءِ اَرداچ ءَ چے کُت کن ئے۔۔۔۔۔۔۔دنیگہ تو نہ زان ئے کہ دُتُّکانی مِرگ ءِ دود چے اَنت؟ نَے تو مُرتگ ئے نَے تئی دُتُّک۔

گُڑا اَمُل ءِ دُتُّک ءِ سُور ءَ نہ رَو ئے؟ بِلّے اَمُل گوں تو زھر بیت۔
اَمبر! منی دُتُّک مُرتگ من چون سُور ءَ بِہ رو آں؟
مروا گِلوتگ ءَ اَت۔۔۔
بلے من انگت وتی گپ جت۔۔۔۔۔۔
تو باریں وتی مَرگ ءَ منی دُتُّک ءِ سور ءَ اَتک ئے، آ روچ ءَ اَمُل ءِ دُتُّک ھم مُرتگ اَت، شُما وت من ءَ گْوشت کہ وتی دُتُّک ءِ سور ءَ اَلم بہ کن ات ما کائیں۔۔۔۔۔
اَمبر آ تئی دُتُّک ءِ اولی سور اَت ۔ منی باریں چینچومی مرگ۔۔۔۔۔۔
بلے نوں منی دُتُّک ءِ مرگ ءَ من ءَ ارس ھم نیست کہ دُتُّک ءَ سواب بِہ کناں۔
تو سور ءَ بہ رو من وت تئی دُتُّک ءَ سواب کناں ۔
اِنّا ۔۔۔۔
من ترا سواب کنگ ءَ نیلاں، اگاں تو وت بِہ مر ئے پہ تئی سواب ءَ کے وتی ارساں دنت؟
من ءَ سواب کنوکے بیت۔۔۔۔۔۔۔
اِنّا ۔۔۔۔
تئی وتی ارس ترا شرتر سواب کن اَنت، تئی جان ءَ نامھرمانی ارس مہ کپات اَنت، مروا گلوتگ ءُ وتی دُتُّک ءِ نیمگ ءَ چارگ ءَ اَت، من مُساں مُس مروا ءِ پُشت ءَ اُوشتاتگ اَت آں ءُ وتی گْوست شموشتگ اَت۔

امُل ءِ دُتُّک ءِ مَرگ مروا ءِ مَرگ من ءَ ھِچّ یات نہ اَت، وتی دُتُّک یات اَت کہ سھتے ءَ پیش دور داتگ اَت، من پدتر اِت آں وتی دُتُّک ءِ نیمگ ءَ، دُتُّک گُلامچوٹ ءَ کپتگ اَت بلے مور اَت۔

من مور چنڈّ اِت آں ءُ دُتُّک وتی دستانی دل ءَ کُت، دُتُّک ھمے دستان اَت کہ لکیر گونگیں نشانے نزانت اَنت چے اَنت، اِشاں گوں زِندمان ءَ چے  سیالی ھست یا نا۔۔۔۔۔
من پد ءَ مروا ءِ کِرّ ءَ اتک آں، داں مروا آدینک ءِ دیم ءَ کپتگ، مورانی رمے منی ھٹّانی شونگ ءَ چہ رھادگ اَت،
من وتی دُتُّک ھم آدینک ءِ دیم ءَ ایر کُت ءُ چہ کمپان ءَ در اَتک آں۔

من ءَ مروا ءِ ھمے گپ مجگان اَت تئی جان ءَ نامھرمانی ارس مہ کپات اَنت، منی در آیگ ءَ گوں ھور ءَ ایر دات، من وتی جان ءَ چہ نامھرمانی ارسانی ساٹگ ءَ پہ تگ بانے ءَ پُتِرت آں، منی پُتِرگ ءَ گوں بان ءِ دپ بند بوت،
تْرمپ زمین ءُ دیوالاں لپاشان اِت اَنت، بلے زمین ءَ تْرمپانی لپاشگ دوست بوت، من زانت ھور منی رنداں گار کنت، من شموشکار بوتاں اَچ وتی رَنداں کہ ڈنّ پشگیجگی نہ اِت اَنت، من نہ لوٹ اِت، اَچ من درکپتگیں شے نامھرمانی دست ءُ دپّی بِہ بنت، بان ءِ تھ ءَ من ھیال کُت کہ زمین نامھرم ھم سواب کنت، زمین ءَ ھم نامھرم سواب کُت اَنت۔
زمین باریں چُنت بر ءَ مِریت، من بہ مراں پد ءِ زند ءَ چے باں۔۔۔۔۔۔۔۔
ھاھاھاھا۔۔۔۔۔۔۔۔
من وتی ھیالانی سر ءَ وت کند اِت۔۔۔۔۔۔۔۔

دیراں پد من وت وت ءَ گْوشت۔۔۔۔۔۔۔۔
من مَرگ ءَ پد تْرانگے وَ باں، دِگہ ھچ مہ باں، من لوٹ اِت کمے ڈَنّ ءَ بِہ چاراں باریں زمین ءِ جْون چون اِنت، بلے بان ءِ تہ ءَ چے ھچ گندگ نہ بوت، من جُھد کُت پہ ڈنّ ءَ رَوَگ ءَ بلے بان ءِ دروازگ ھم منی چمّاں نہ کپت، مُدتّے ءَ پد من کتابے دیست، کتاب ءِ دپ پچ اَت، من کتاب ءِ تھ ءَ پُتِرتاں، کتاب ءِ تھ ءِ پُتِرگ ءُ لھتیں تاکانی سپر کنگ ءَ پد من ءَ بدبویے سما بوت اِے بدبو ءَ من ءَ سک نگیگ کُت، من ھمے گُمان کُت بِہ گند ئے من نامھرمے آں، اِے تاکانی سات ءَ پد منی سر ماں لھتیں ھورک تاکاں کپت، اِے ھورکیں تاکانی ھمے جوانی اَت کہ اِد ءَ ھِچ گونگیں موسم نیست اَت، من انگت ھمے تاکانی شَم ءَ آں، نزاناں من ءَ چُنت وھد اِنت کہ اِے تاکانی شم ءَ آں، بلے پہ تاھیر اِے بے موسمیں تاکانی شم ءَ نشتگاں، مرچی وتی زھیراں زُرتگ کہ دل گْوش اِیت نوں چد ءَ بِہ جُنزاں، من سر چِست کُت، تاک ءِ لمب ءَ آدینکے ایر اَت منی وتی چمّانی جُپتی ءَ مورانی کتارے دیست۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

اُستان پکتونواہ ءَ گوریچانی وزیرستان ءِ دمگ میر الی ءِ میتگ ءَ اَئیدک ءَ پاکستانی لشکر ءِ گاڑی ءِ سر ءَ تیرگواری ءُ بمب اُرش کنگ بیتگ، چریشی ءِ آسر ءَ یک کارمندے مرتگ ءُ سَے زدگ بیتگ اَنت –

سرکاری بنشون ءِ رد ءَ میر الی ءَ ھواریں دمگ اَئیدک ءِ بازار ءِ نزیک ءَ ناشناسیں سلاہ بندیں مردماں لشکر ءِ گاڑی ءِ سر ءَ دیرواگ بمب تراکے کرتگ چریشی ءِ آسر ءَ یک کارمندے بیران ءُ سَے زدگ بیتگ اَنت – زدگ بیتگین درمان کنگ ءَ نادراہ جاہ ءَ برگ بیتگ اَنت –

دمگی مردمانی رد ءَ لشکر ءِ تیرگواری ءَ یک شھری ءِ کہ آئی سئید اُلا بیران بیتگ ءُ شش مردم زدگ بیتگ –

ویل ءَ پد لشکر ءَ دمگ انگیر ءَ کرتگ ءُ پَٹ ءُ پول بندات کرتگ، وھدےکہ دمگ ءَ کرفیو جنگ بیتگ –

بلیدہ ءَ لشکر ءِ واستا وردن بروکیں ٹرک سلاہ بندیں مردماں گپتگ ءُ دو مردم دزگیر کُتگ ۔

تربت ءَ یک ٹرکے کہ چریشی ءَ پاکستانی لشکر ءِ واستا مڈی ءَ پُربیتگ کہ بلیدہ ءِ دمگ نیوانو ءَ سلاہ بندیں مردماں سر بستگ ءُ مڈیاں ھوار دو مردم دزگیر کرتگ –

ٹی بی پی ءَ سر بیتگیں ھالانی رد ءَ کیچ ءِ دمگ بلیدہ ءَ ناشناسیں سلاہ بندیں مردماں ایپ سی ءِ واستا بروکیں ٹرک گپتگ ءُ آئی ڈرائیور ءُ ھمراہ ھم گوں وت برتگ اَنت –

دزگیر بیتگیں مردمانی پجار باھوٹ ء ھسا جھمنند ڈانڈل شاپک ءُ رھمدل جھمنند بزداد آواران ءِ ناماں زانگ بیتگ اَنت –

دومی نیمگ ءَ بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشان ءَ اے ویل ءِ زمہ واری منّ اِتگ –

جیئند بلوچ ءَ گْوشت کہ مئے سرمچاراں بلیدہ ءِ دمگ نیوانو ءَ پاکستانی لشکر ءِ واستا مڈی بروکیں ٹرک گپتگ ءُ ٹرک ءِ ڈرائیور ءُ آئی ءِ ھمراہ ھم گون وت برتگ اَنت –

جیئند بلوچ ءَ گْوشت کہ مئے سرمچاراں بلوچ بوگ ءِ سبب ےَ ٹرک واتر واھند ءِ گور ءَ سر کرتگ ءُ گپتگیں وردنی مڈی سوتکگ اَنت ءُ دزگیر کرتگیں ڈرائیور ءُ آئی ءِ ھمراہ ءِ بارو ءَ پَٹ ءُ لوٹ برجاہ اَنت ءُ اگاں آ بلوچ راجی جنز ءِ بگیری ءَ کجام ھم ھلاپی ءَ دزمانجن نہ اِنت گڑا آ یلہ کنگ بنت –

بی ایل اے بلوچ راج ءَ ترندی ءَ گوں سرپد کنت کہ آ وت ءَ ءُ وتی زھگاں پاکستانی لشکر ءَ چَہ دور بہ دار اَنت ءُ چندے دپارے ءَ آئی ءِ کمکار جوڑ مہ بنت – مارا وتی راج ءِ ھمک مردم دوست اِنت بلئے کَس ءِ زوراک ءِ ھمراھداری کنت گڑا ھچ وڑیں اوپاری نہ بیت –

جارکش ءَ گْوشت کہ بی ایل اے ءِ شِست پاکستانی لشکر ءُ بلوچ راجی گدارانی ھلاپ ءَ برجاہ اِنت کجام ھم جاہ ءُ ھند ءَ سرمچار کجام ھم وھد ءَ دشمن ءِ سر ءَ اُرشکار بیت کن اَنت –

شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی بنجل ءَ 3ھزار 9 سد ءُ شست ءُ یک روچ سرجم بیتگ – نیشنل پاٹی ءِ رھشون جان مھمد بلیدھی ءُ چہ پشین ءَ رھمت اُلا کاکڑ، جما ھان ءُ دگہ ھمرھاں بنجل ءِ تر ءُ تاب کرتگ ءُ بیگواھیں مردمانی کھولاں گوں دلپدری درشانیتگ –

وی بی ایم پی ءِ رھشون ماما قدیر بلوچ ءَ ھمے وھد ءَ گْوشت کہ پاکستانی زوراور انسانی ھکانی واستا توار چِست کنوکیں کہ چریشانی تہ ءَ سیاسی باسک، دانشور، نودربر ءُ دگہ تکاں سیادی کنوکیں مردمانی کُشت ءُ کوش ءُ بازیں پُسگانی بیگواہ کنگ کہ روچ پہ روچ گیش بیان اَنت –

آئی ءَ گْوشت کہ مئے پُر ایمنیں جد ءُ جھد روچ پہ روچ بلوچ مھلوک ءُ جھان ءَ اے سرپدی ءَ سرکنگ ءَ ایں – چریشی ءِ دیم ءَ پاکستان ءَ پروش وارتگ ءُ زوراگ وتی بدماشیاں نوکیں رنگ ءُ ڈولاں کامرد کنگ ءَ اِنت ءُ میان اُستمانی جھان ءَ چماں ھاکین کنگ ءَ اِنت –

آئی ءَ گْوشت کہ بلوچ مھلوک ءُ جھان پاکستان ءُ آئی ءِ بدماشانی دراھیں رِپک ءُ ھنراں شری ءِ سر ءَ زانت –

ماما قدیر بلوچ ءَ گْوشت کہ نوزدہ سد ءُ نود ءُ ھپت ءَ دانشوراں وتی ھمگرنچیں پَٹ ءُ پولاں ڈیتھ اسکواڈ ءِ ھمے ستا کرتگ کہ کجام ھم زوراکیں سرکاری مسامی کانوداں ڈن وتی بگیری ءَ پُرایمنیں جد ءُ جھد ءِ ھلاس کنگ ءَ ھمے وڑیں ٹولی جوڑ کن اَنت کہ آوار جنی، کُشت ءُ کوش، لٹ شاپی ءِ دروشم ءَ کاراں بہ کَش اَنت ایشی ءَ ڈیتھ اسکواڈ گْوش اَنت –

آئی ءَ گْوشت کہ اولی رند ءَ ڈیتھ اسکواڈ ھما وھد ءَ جھانی ھالانی سرھال جوڑ بیتگ کہ وھدےکہ برتانیہ ءِ سرکار ءَ اے پئیمیں ڈیتھ اسکواڈ ءِ ٹولی ءِ جوڑ کرتگ کہ چریشی ءِ بدنامیں زمانگ ءِ سرکار گامگیجی ءِ کُشت ءُ کوش ءِ آس جمبور کنگ ءَ بازیں بے گناھیں مردمانی کُشت ءُ کوش کرتگ –

آئی ءَ گْوشت کہ بلوچستان ءَ پُرایمنیں جد ءُ جھد ءَ گیش ردوم زورگ ءَ لس مھلوکی پلامرزی ءَ ترس ءَ پاکستان ءَ وتی گڈی ساہ ءِ رکینگ ءَ وتی گیر انسانی ڈیتھ اسکواڈ جوڑ کرتگ، بلوچانی کُشت ءُ کوش ءُ آوار جنی ءِ واستا ۔

سر بیتگیں ھالانی رد ءَ پنجگور ءِ دمگ کیلکور ءَ یک مردمے ءِ تیرسپتگیں جون دزکپتگ کہ تیرجنگ ءُ کُشگ بیتگ –

دزکپتگیں جون ءِ پجار منزور ء ارزو ءِ نام ءَ زانگ بیتگ کہ آئی ءِ جون کیلکور چوٹین ءَ دزکپتگ کہ گوارگو ءِ جھمنند اِنت –

دمگی مردمانی رد ءَ دزکپتگیں جون ءِ سیادی گوں سرکاری چیردستی ءَ جوڑ کرتگیں ٹولیانی اِنت کہ گوستگیں لھتے روچ ءَ پیسر سلاہ بندیں مردماں دزگیر کرتگ ءُ گوں وت برتگ –

دومی نیمگ ءَ بلوچ ریپبلکن آرمی ءِ جارکش بیبگر بلوچ ءَ شنگ کرتگیں درشان ءِ تہ ءَ منزور ءِ کوش ءِ زمہ واری منّ اِتگ۔

بیبگر بلوچ ءَ گْوشت کہ مئے سرمچاراں ریاستی ڈیتھ اسکواڈ ءِ باسک منزور ھما وھد ءَ پنجگور ءَ دزگیر کرتگ کہ آ کوھی دمگاں لشکریانی گوشگ ءَ سرمچارانی بنجلانی شوھاز ءَ درکپتگ بیتگ –

آئی ءَ گْوشت کہ کُشتگیں مرد پیسر ءَ ھم مئے گل ءِ دیم ءَ چیر بیتگ ءُ دزگیری ءَ پد آئی ءَ وتی کرتگیں جرم منّ اِتگ اَنت ءُ گوشتگ کہ من تچک ءَ سلاہ بند بیتگ ءُ لشکری لشکر کُشیاں ھوار بیتگ اَنت –

جارکش ءَ گْوشت کہ منزور پروم، گوارگو ءُ گچک ءِ کش ءُ گوراں جھدکارانی شھیدی ءُ ورنایانی آوار جنگ ءَ زورگریں لشکر ءِ ھمراہ بیتگ اے درستیں کارانی منّگ ءَ پد منزور گوستگیں روچ ءَ پنجگور کیلکور ءَ سرمچاراں تیر جتگ ءُ کُشتگ –

بیبگر بلوچ ءَ گْوشت کہ ما یک رندے پد ءَ کاروباری مھلوک ءُ لس مھلوک ءَ دزبندی کن ایں کہ آ ریاستی ڈیتھ اسکواڈ ءِ نزیک ءَ چَہ دور بہ بنت کجام ھم وھد ءَ آ نشانگ کنگ بنت –

بلوچ نیشنل مومنٹ ءِ بنجاھی جارکش ءَ رسانکدراں وتی شنگ کرتگیں درشانے ءِ تہ ءَ گُشتگ بیست ءُ ھشت مئی ءَ آسروک ءِ درگت ءَ ھرسالے وڑ ءَ بلوچ راج اے سال ءَ ھم سیاھیں روچ ءِ داریت. مروچی ءَ چہ بیست ءُ دو سال پیش پاکستانی ریاست ءَ بلوچ سرزمین ءِ سر ءَ ایٹمی بمب تراک کُتگ چاگی ءِ مادان ءَ پُریں راسکوہ مدامی ءِ ھاتر ءَ ویران کتگ –

1998ءَ وھدےکہ پاکستان ءَ وھدےکہ ھندوستان ءِ ایٹمی تراک ءِ چکاس ءِ پسو ءَ پسھی تراک کنگ ءِ جار پرینتگ اے ویرانی ءِ مول ءُ مراد اے ھاتر ءَ آھاں زورگپتیں بلوچستان ءِ سرزمین گچین کُتگ. اے میان ءَ نہ لس مھلوک پھازتگ ءُ ناکہ وتی رکینگ ءِ ھاتر ءَ آ ھال دیگ بوتگ انت. بس پانزدہ روچ ءِ تھا ھندوستان ءِ پسو دیگ بوتگ-

اشی ءَ چہ اے اندزہ جنگ ھچ مشکل نہ اِنت کہ کجام وڑ ءَ گیر مھپوزی کنگ بوتگ-

جارکش ءَ دیمتر ءَ گُشتگ کہ پاکستان ءِ کِر ءَ ویرانیں ریگستان ھم سک باز ھست – بلے آئی ءَ بلوچ راج ءِ نسل کشی ءِ ھاتر ءَ یک آبادیں دمگے گچین کتگ-

ھمے تراک ءِ تباہ کاری ءِ سوب ءَ روچ مروچی ءَ بلوچستان ءَ تباھی تالان بوان اِنت- تراکانی کنگ ءِ ھاتر ءَ چاگی ءِ گچین کنگ اے چیز ءَ پدر کنت کہ پاکستان ءَ ادا ھستیں بلوچ لس مھلوک ءِھچ گم نہ بوتگ بلکیں آ تباھی ءِ چات ءَ دور دیگی بوتگ انت-

جارکش ءَ گُشتگ زورگپتیں بلوچستان ءِ دمگ چاگی ءَ ایٹمی تراک ءَ انسانی ءُ راجی ھکانی پدریں بگیری ءِ چاگی ءِ تھا بلوچ ڈیھے ئے سر ءَ ایٹمی چکاس سوب ءَ ھما تباہ کاری کہ تالان بوتگ آئی ءِ اسر روچ مرچی ھست اَنت –

جارکش ءَ گْوشت یک زیردستیں سرڈگارے ءَ آس روکیں تراک ءَ انسانی ءُ راجی ھکانی ھلاپ ورزی اِنت – چاگی ءَ بلوچ سرڈگار ءَ تابکاری ءِ چکاس ءِ سبب ساپیں آپ ءَ دگہ پیداگکاریانی نہ بیگ ءِ بروبری ءِ اسر کپتگ اَنت ءُ ھمک وھد ءَ لَکانی ھساب ءَ باگ ءُ پس ءُ گوک تباہ بیتگ اَنت ءُ ڈگالی ءِ سبب ءَ بازیں مردم لاچار بیتگ اَنت ءُ وتی ھند ءُ دمگ اِش یلہ کرتگ اَنت –

آئی ءَ گْوشت کک تراک ءِ سبب ءَ انسانی زندگی، موسم ءُ چاگردی ءُ ھیوان ءُ دگہ چیزانی سر ءَ اسر کپتگ تابکاری ءِ سبب ءَ موسم ءِ بدل بیگ ءَ دو دھک ءَ ڈگالی ءَ تچوکیں چمگ ھُشک بیتگ اَنت ءُ چریشی ءِ سبب ءَ سبزاوگیں جنگل سُتکگ ءُ ھلاس بیتگ اَنت –

تابکاری ءِ سبب ءَ بلوچستان ءِ بازیں جاھاں شومک ءِ نادراھی ءِ زورمند بیان ءُ بازیں چُک پیدائشی لنگ ءُ دگہ نادراھیانی آماچ اَنت ءُ malnutrition ءُ زالبول birth premature ءُlow birth weght پیداگی ءِ جوڑ بیتگ اَنت –

جارکش ءَ گْوشت کہ بلوچ راج بیست ءُ ھشت مئی نوزدہ سد ءَ نود ءُ ھشت ءَ اے ویل ءَ پد ھمک روچ ءَ یک سیاھیں روچے ءِ رنگ ءَ یات کنت – اے سال ءَ کورونا ویروس ءِ سبب ءَ بی این ایم یک آن لائنی مراگشے بندات کنت ءُ بلوچستان ءَ ھوار درملک ءَ نیشتگیں باسک ءُ ھمدرد بھر بہ زور اَنت ءُ پاکستانی زُلم ءُ تابکاری ءِ بارو ءَ جھان ءَ سرپد بہ کن اَنت –

بی این ایم ءِ جارکش ءَ گْوشت کہ یک راجے ءِ بستار ءَ جھان ءِ سازمان “آئی اے ای اے agency intenational ءَ گوں دزبندی اِنت کہ بلوچستان ءَ بیتگیں تابکاری ءِ سر ءَ دلگوش بہ کنت ءُ یک پَٹ ءُ پولی باسکی ءِ دیم بہ دنت دومی ادارہ پاکستان ءِ گیر زمہ واریں کار ءُ رھبنداں پاکستان ءَ آمید ءَ سر ءَ بیار اَنت ءُ بہ اوشتارین اَنت –

جارکش ءَ گْوشت کہ بی این ایم ءِ نیمگ ءَ چاگردی رسانکجاہ ءَ بیست ءُ ھشت مئی ءَ یک آن لائنی سرپدی دیگ NukeAfterMathlnBalochistan ھیش ٹیگ کامرد کنگ بیت ما دراھیں انسان دوستیں مردم، راجداریں باسک ءُ انسانی ھکانی باسکاں گوں دزبندی اِنت مئے کمپئن ءَ بھر بہ زور اَنت ءُ انسانی دوستی ءَ پیش بہ دار اَنت