TBP Balochi

گوستگیں روچ ءَ انسانی ھکانی ھاتر ءَ کارکنوکیں مزن نامی ئین نبشتہ کار ءُ یو این واچ ءِ ترامکار ھیلیل نیویر ءَ چاگردی رسانکدر ٹوئیٹر ءَ ٹوئیٹ کنان ءَ گُشتگ کہ مروچی یک میان اُستمانی نامی ئیں ھالتاکے ءِ تھ ءَ چین ءِ ورلڈ ھیلتھ آرگنائزیشن ءِ سر ءَ سان ءَ پدر کنگ بیت ۔ آئی ءَ گُشت اے سان چہ شمئے جیڑگاں چہ گنتر اِنت ۔

Today in a leading international news magazine we will unmask the depth of China's influence over the World Health Organization.

It's far worse than you imagined.

— Hillel Neuer (@HillelNeuer) May 19, 2020

ھیلیل نیویر ءَ پد ءَ وتی نبشتانک دی نیوز ویک ءَ شنگ کُتگ ءُ دگہ لھتیں ٹوئیٹ کنان ءَ گُشت کہ ڈبلیو ایچ او ءِ گُڈ وِل ایمبیسیڈر جیمز چاھو ءَ چائینہ زر دیگ ءَ اِنت دانکہ چین ءِ نیمگ ءَ چہ کرونا وبا دارگ ءِ ھاتر ءَ کتگیں گپانی بارو ءَ دروگیں ھال شنگ بہ کنت، بیجنگ ءِ گناھانی یک جھانی ٹی وی ءُ بازیں سوشل میڈیا پترانی سر شودگ ءِ ھاتر ءَ ۔

گُڈ ول ایمبیسیڈر جیمز چاھو ءَ گُشتگ اَت کہ ووھان ءَ وبا ءِ کساس ءُ ھترناکی ءِ بارو ءَ رسانکدراں گیشی کُتگ ۔ ووھان ءِ نادراہ جاھانی نگیگیں جاورانی تامر نا دلجمین اَنت ءُ گوں ووھان ءَ چِست بیتگیں وبا ءَ گوں سیادی نہ دار اَنت۔

ھیلیل نیویر ءَ گُشت من اد ءَ جینیوا ءَ ڈبلیو ایچ او ءِ گور ءَ بیتگ آں کہ آیاں یک میان اُستمانی پَٹ ءُ پولی ءِ بندات کُتگ کہ گل ءِ کووڈ-19 وبا ءِ بارو ءَ کُتگیں گامگیجاں ٹپاسیت۔ من ڈبلیو ایچ او ءَ دزبندی کُتگ کہ ٹی وی سر ءَ چین ءِ داشتگیں پروپیگنڈہ کنوکیں جیمز چاھو ءَ چہ آئی ءِ گُڈ ایمیسیڈر ءِ اگدہ ءَ چہ کَشگ بہ بیت ۔

ھیلیل نیویر ءَ دیمتر ءَ ٹوئیٹ کنان ءَ گُشت کہ اے گپ بوت کنت مسکراہ گندگ بنت، بلے نہ اَنت، ڈبلیو ایچ او ءِ گُڈ ول ایمبیسیڈرزاں پجاروکی بہ کن اِت۔ پینگ لیوان، کہ چینی ڈکٹیٹر شی جن پینگ ءِ جنین اِنت، ءُ پیپلز لبریشن آرمی ءِ میجر جنرل اِنت۔ ڈبلیو ایچ او ئے گُڈ ول ایمبیسیڈر اِنت۔

جیمز چاھو، کہ چین ءِ استانی ٹی وی ءِ ھاتر ءَ پروپینگڈہ کنوک اِنت۔

آئی ءَ چائینہ ءِ درملکی کارانی وزیر دوھزار ءُ شش ءِ درشان ءِ بھر ءِ ٹوئیٹ کُتگ اَت “ اے اولی رند اِنت کہ چین ءِ نامینتگ ءِ مردم ءِ اوشتاتگ ءُ یو این ءِ گچینتگیں ایجنسی ءِ سروک گچین کنگ بیتگ…”
“چین ءِ سرکار ءَ وتی مھکمیں کمک ءُ ھمراھداری مارگریٹ چین ءِ گچین کاری ءِ سر ءَ داتگ…”

دیمترءَ ھیلیل نیویر ءَ وتی ٹوئیٹ تھ ءَ دوھزار ءُ سئے ءَ داں دو ھزار ءُ شانزدہ ءَ چین ءُ ڈبلیو ایچ او ءُ سیادی ءِ سر ءَ چمشانک دیان ءَ گُشتگ کہ

2003: ءَ ڈبلیو ایچ او سروک گُرو برٹڈلینڈ ءَ چائینہ ترندی ءَ گوں ایر جتگ ایس اے آر ایس جیڑہ ءِ چیر دیگ ءِ سر ءَ
2006: ءَ چین ءِ گچینتگیں مارگریٹ چین ڈبلیو ایچ او ءَ سروک جوڑ بیت۔

2011: چین چائنہ ءِ ڈکٹییٹر ءِ جنین ءَ ڈبلیو ایچ او ءِ گُڈ وِل ایمیبیسڈر نامین اِت۔

2016: چین چینی ٹی وی ءَ پروپینگڈہ ءِ کارکنوک ءَ ڈبلیو ایچ او ءِ گُڈ ول ایمبیسیڈر گچین کنت۔

اوگستان ءِ تالبان ءِ سروک شِیک ھیبت اللہ ءَ کسانیں اَئید ءِ بارو ءَ وتی شنگ کرتگیں کلوہ ءِ تہ ءَ گْوشتگ کہ ھما ٹولی یا مردم “جارحیت ” بزاں جنگ ءِ ھلاسی ءَ پد آیوکیں رھبندانی بارو ءَ ٹول ءُ مٹولے ءِ آماچ اِنت –

تالبان ءِ سروک ءَ وتی کلوہ ءَ گُشت کہ تالبان یک رندے ءَ پد ءَ سرجمیں مردماں اوستی ءَ گوش آں کہ مئے پالیسی ءِ رھبند یکے ءِ تہ ءَ بند نہ اِنت ءُ ھمک مردین ءُ جنین ءَ آئی ءَ وتی بنکی ھک رس اَنت –

آئی ءَ گْوشت کہ اے رھبندانی تہ ءَ ھچ وڑیں کمی ءُ گیشی آرگ نہ بیت ءُ اے درستیں ھکدارانی سر ءَ چار ءُ گزاری بیت ءُ ھما کہ چاگرد ءِ وشھالی، مکھمی ءُ دیمروی ءِ واستا اژدری بیگی بنت –

آئی ءَ وتی کلوہ ءَ گْوشت کہ میان اُستمانی ءُ ملکی ڈیھاں تالبان ءِ سیاسی ھمبستگی گوست ءَ باز دیم ءَ شتگ – تالبان ءِ پالیسی ءُ بنگپ ءِ سر ءَ ھمے پدراھی بیتگ کہ چیریشی ءِ بنیاد ءَ اوست ءُ ھمگرنچی ءِ در پچ بیان اَنت –

آئی ءَ گوشت کہ ما وتی پالیسی ءِ رد ءَ اسلامی ڈیھ ءُ اسلامی براتانی ریشگ، ھمساھیگیں ڈیھاں شریں ءُ ھمساھیگی ءِ رنگ ءَ نزیکی ءُ دمگ ءُ دنیا ءِ دراھیں ڈیھانی گون ءَ وتی سیادی ءَ گیشتر مھکم کنگ لوٹ ایں، دانکہ دمگی ءُ میان اُستمانی زرکاری وشھالی، ایمنی ءُ ھمگرنچیں زندمان ءِ تکاں اژدریں زمہ واری پیلو کنگ بہ بیت – آ دگہ ڈیھاں ھم ھمے اُمیت ءَ داراں کہ اے بارو ءَ اے گام ءَ دیم ءَ بران کن اَنت –

امریکہ ءِ گون ءَ ایمنی ءِ منّگ ءَ پد تالبان ءِ سروک ءَ ڈیھی بندوکی ھمسنتیں امریکا ءِ گون ءَ راجدپتری مسامے ءِ سر ءَ دزنویس کرتگ ءُ ھما کچ ءَ کہ جنگولی ءِ ھلاسی تالبان ءُ دراھیں اوگانیننی واستا یک جوانیں سوبمندی ءِ سرپد بہ ایں اگاں ایشی ءَ تچکی ءَ بہ چاریں گڑا سرجمی ءَ سرجمیں مردمانی ھک ءَ اِنت –

تالبان ءِ سروک ءَ وتی کلوہ ءَ گْوشت کہ امریکہ کجام وتی پرد ءَ اے اجازت ءَ مہ دنت کہ مئے میان ءَ میان اُستمانی تک ءَ مسام بندی ءِ بیتگ ءُ ایشی ءِ سر ءَ بے بنیں گپ بہ کنت ءُ چُش مہ بیت کہ اے مسام ءِ دیم ءَ ڈنگر جوڑ بہ بیت –

تالبان ءِ سروک ءَ گوشت کہ اے میان اُستمانی مسام ءَ دزنویس کنگ بیتگ کہ ھردوکیں نیمگ ءَ ھرچی بیگی بیتگ آ اوگان ءُ امریکہ ءِ مھلوک ءِ پھریزگ ءُ جیڑھانی تہ ءَ گیشنگ ءِ جوانیں درے کہ چریشی ءِ سرجمی ءَ دلگوش کنگ بہ بیت دانکہ امریکہ ءِ لشکر ءِ روگ ءُ اوگستان ءُ دمگ ءَ ایمنی ءِ مھکم بندی ءِ راہ روان بہ کنت –

ایشانی ھمراھی ءَ تالبان ءِ سروک ءَ کورونا ویروس، تالبان ءِ بندی، اوگستان ءِ کارندہ ءُ دگہ جتائیں بنگپانی سر ءَ وتی اے کلوہ ءِ توک ءَ گپ جتگ۔

بلوچستان ءِ دمگ پنجگور ءَ پیش اتکگیں تیرگواری ءُ دگہ ویلاں لیویز کارمندے ءَ ھوار سَے مردم بیران ءُ سَے زدگ –

سر بیتگیں ھالانی رد ءَ پنجگور ءِ دمگ بالگتر سھاکی ءَ ناشناسیں سلاہ بندیں مردماں یک لوگے ءِ سر ءَ اُرش کرتگ، چریشی ءِ آسر ءَ یک مردمے بیران ءُ سَے زدگ بیتگ اَنت –

ویل گوستگیں شپ ءَ پیش اتکگ زدگ بیتگینانی تہ ءَ یک زالبولے ھم ھوار اِنت –

گوستگیں روچ ءَ پنجگور وشبود ءَ ناشناسیں سلاہ بندیں مردماں یک دکانے ءِ سر ءَ تیرگواری کرتگ اود ءَ لیویز ءِ کارمند جھانزیب ء سلام تیرانی نشانگ بیتگ ءُ بیران بیتگ –

ھمے وڑ ءَ پنجگور ءِ دمگ چتکان جھلگ ءِ ھند ءَ کارچ جنی ءَ یک مردمے کُشتگ –

پولیس ءِ رد ءَ ویل لوگی جیڑھے ءِ سر ءَ پیش اتکگ ءُ پولیس ءَ کاروائی کنان ءَ جرمکار دزگیر کرتگ –

ھمے وڑ ءَ گوستگیں روچ ءَ بلوچستان ءِ بنجاھی شھر شال ءِ دمگ جناہ دگ ءَ ٹریکٹرے ءُ پرپٹے ءَ ٹکر وارتگ چریشی ءَ چَہ دو مردم بیرانبیتگ-

پولیس ءِ رد ءَ پرپٹ ءَ سواریں مردمانی تہ ءَ یکے ءَ ویل جاہ ءَ ھما دمان ءَ ساہ داتگ اَنت ءُ دومی ءَ نادراہ جاہ ءَ سر بیگ ءَ ھمود ءَ آئیءَ وتی ساہ داتگ اَنت –

بیران بیتگیں مردمانی تہ ءَ یکے ءِ پجار رھمان ھان ء سلتان مھمد جھمنند کلہ سیپ اُلا ءِ نام ءَ زانگ بیتگ ءُ دومی ءِ پجار گڈی ھالانی تہءَ زانگ نہ بیتگ –

آ دگہ ھردوکیں ویلانی بارو ءَ سرپدی نہ بیتگ –

نبشتانک: جھدے پہ فیروز ءَ

نبشتہ کار: سُمعیہ بلوچ

دی بلوچستان پوسٹ

پِت گُش ایت گریمپُک ءِ سال ءَ لھتیں بلوچ “سردار ءِ”چات ءِ نیمگ ءَ شُتگ کہ اود ءَ ایش نادراهی نیست انت بلے درست مرتگ انت کس پشت نہ کپتگ.هو اڑے بلوچ !تو دگنیا ءِ هر کنڈ ءَ برو ترا کس رکینت نہ کنت مرگ تئی همراه انت ءُ دگنیا ءِ هر جاه ءَ ترا جنگ کنگی انت،سرڈگار ءِ جنگ و ترا چہ کرناں گون انت کہ تئی زمین دگنیا ءِ انچیں دمگ ءَ انت کہ دگنیا ءِ هر جنگ ءَ زورآور ایشی ءَ کارمرز کنگ لوٹ اِیت بلے تئی جنگ تنها سرڈگار ءِ جنگ نہ انت ،وانگ ءُ وانگ جاه آیانی جنگ, نودربرانی هاتر ءَ جنگ ،کینسر ءِ هلاپ جنگ ، نشہ ءِ هلاپ جنگ ، لسبیلہ ءِ هونی راه ءِ هلاپ ءَ جنگ.
بہ گند ئے بلوچ ءِ جنگ نہ سرجمیں جنگے، الّم بلوچ ءَ جنگ کنگی انت گڑا بیا ات یک جنگے پہ پیروز ءِ هاتر ءَ هم بندات کن اِں ، انچیں جنگ اے گند ئے زاکر ءِ مات پہ زاکر کنگ ءَ اِنت،زاهد ءِ زال پہ زاھد کنگ ءَ انت،سیما ءِ پیمیں جنگےِ ، منی مات ءِ ودارانی پیمیں جنگے کن ئے کہ نہ سرجمیں ودارے اود ءَ کہ کسے ءِ واتر آیگ ءِ اومیت نیست انت، سوبیں بوگ ءِ اومیت نیست بلے پیروز ءِ مات ءِ ودار آسر کنگی انت ءُ هانی ءِ پیمیں جنگے بندات کنگی انت پہ پیروز ءِ پچکندانی هاتر ءَ کہ بے آ پچکندگاں ما نہ سرجم اِیں ، بے آ پچکندگاں شال تهار انت بیا ات شال ءِ روژنائی ءِ هاتر ءَ یک جنگے کن اِیں.
سلامت بات ئے سنگت!تو گشتگ ات دیم ءِ دیوان ءَ تنکید تئی سر ءَ کن آں!
گندگ ئے پیروز تو مسکرا کنگ ءَ ات ئے بلے ایش لبزاں انچش گُش ئے یک ودارے بندات کُت ، ودار پہ دیوان ءَ بلے نزانت ایش گُّڈی دیوان بیت یک ودارے آسر بیت ۔ بیا اِت اے ودار ءِ سرجم کنگ ءِ ھاتر ءَ جُھد کن اِیں ۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کرونا وائرس ءِ شنگ ءُ تالانی ءِ سوب ءَ سَئودی ارب ، ترکی ، شام ، مِسر ، الجزائر ، ءَ ایندگہ ملکاں کسانیں ائید ءِ مُچیانی سر ءَ بندش کتگ ءُ بازیں جاھاں ” کرفیو ” جنگ ءِ جار اوں جتگ ۔

سئودی ارب ، الجزائر ءُ مسر ءَ اَئید ءِ نماز ءِ مُچی ءِ سر ءَ بندش جتگ ۔

شام ءِ سرکار ءَ ھم کسانیں اَئید ءِ مچیانی سر ءَ بندش جتگ ۔

شام ءِ ” نیکراھی گِر ءُ دار کنوکیں وزیر ” ءِ نیمگ ءَ شام ءِ مھلوک ءَ را گُشگ بوتگ کہ آ گوں وتی لوگ ءِ مردماں ائید ءِ نماز ءَ لوگ ءَ بوان اَنت ۔

ترکی ءِ سرکماش رجب تیب ء اردگان ءَ سرجمیں ملک ءَ اَئید ءِ سر ءَ ” کرفیو ” جنگ ءِ جار جتگ ۔

چہ مھتر پتر ءِ دیوان ءِ تران ءَ رند ترک ءِ سرکماش رجب تیب اردگان ءَ گُشت کہ اَئید ءَ لاک ڈاؤن شمبے ءَ بہ گر داں سَے شمبے ءَ یکشل ءَ دارگ بیت ۔

آئی ءَ دیمتر ءَ گُشت کہ کرونا وائرس ءِ نادراھی ءِ گر ءُ دار ءِ واستا استنبول ، انکرہ ءُ ایندگہ ھند ءُ دمگاں ” کرفیو ” جنگ ءَ آں ۔

ترک ءِ سرکماش ءِ گوستگیں جار ءِ رد ءَ مسیت 29 مَئی ءَ پچ بنت ءُ ترکی ءَ وانگجاھانی وانگ ستمبر بندات بنت ۔

سر بیتگیں ھالانی رد ءَ گوستگیں روچ ءَ بولان ءِ دمگ پیر گیب ءِ نزیک ءَ ایف سی ءِ گاڑی ءِ سر ءَ تراکے کنگ بیتگ – تراک ءَ ششکارمند کُشگ ءُ چار زدگ بیتگ اَنت 

دمگی مردمانی رد ءَ ناشناسیں سلاہ بندیں مردماں دگ ءِ کش ءَ شورو کَل کرتگ ءُ ھمے وھد ءَ لشکری کارمند روگ ءَ بیتگ اَنت کہ اشانی سر ءَ بلاھیں تراکے کنگ بیتگ –

لشکری بنشون ( آئی ایس پی آر) ءِ رد ءَ بلوچستان ءِ دو جتائیں جاھاں ھپت کارمند جنگ بیتگ اَنت کہ اشانی تہ ءَ شش لشکری جوانیں کارمند ءُ یکے جی سی سی ءِ ڈرائیورے ھوار اِنت-

بیران بیتگیں کارمندانی نام نائک سوبیدار اھسان اُلا ھان، نائک زبیر ھان، نائک اجاز اھمد، نائک مولا بکش، نائک نور مھمد ءُ ڈرائیورابدلجبار ءِ ناماں زانگ بیتگ اَنت۔ 

آئی ایس پی آر ءِ رد ءَ ھمے وڑ ءَ کیچ ءِ دمگ مند ءَ امداد الی ھم تیر جنگ ءُ کُشگ بیتگ –

بلوچستان ءِ جتائیں دمگاں پاکستانی لشکر ءِ سر ءَ بلوچ آجوئی لوٹوکیں گلانی نیمگ ءَ یکشل ءَ اُرش بیگ ءَ اَنت بلوچ سلاہ بندیں گلانی گوشگ اِنت کہ داں پاکستانی لشکر بلوچستان ءَ ھست اِنت آیانی سر ءَ اُرش یکشل ءَ برجاہ مان اَنت –

گوستگیں روچ ءَ بولان ءُ مند ءَ بیتگیں اُرشانی پشدر ءَ جنگ بیتگیں کارمندانی جنگ بیگ ءِ سر ءَ بلوچستان ءِ سر وزیر جام کمال ھان ءَ پدردی درشان کرتگ۔

جام کمال ھان ءَ گوشتگ کہ من ءَ بژن اِنت جھان اے وھد ءَ کورونا ویروس ءَ گوں اڑیتگ بلئے ناشر ڈیھ دشمنی ءِ کار ءَ کنگ ءَاَنت-

آئی ءَ گوشت کہ سیکیورٹی لشکر ءِ سر ءَ اُرش پاکستان ءِ سلامتی ءُ وت واجھی ءِ بگیری ءَ پندلے بیگ ءَ اِنت-

ھمے وڑ ءَ تھی کارانی وزیر میر زیا اُلا لانگو ءَ ھم پدردی درشان کرتگ ءُ گوشتگ ھندوستان ڈیھ دشمناں کمک اِنت ءُ جھان ءِ سر ءَ پرز جوڑ بیت کہ ھندوستان ءَ ناشرکارانی لڑ ءَ ھوار بہ گیج اِت ۔

زیا لانگو ء گوشتگ کہ ڈاکٹر ترندی ءَ پرمان کنگ بیتگ اَنت کہ ٹپیگیں کارمنداں الکاپ ءَ درمان بہ کن اَنت-

میر زیا لانگو ءَ گوشتگ کہ شھید بیتگیں کارمندانی کھولانی گم ءُ درداں بروبری ءَ ھوار اَنت –

دومی نیمگ ءَ بولان ءَ بیتگیں اُرش ءِ زمہ واری یونائیٹڈ بلوچ آرمی ءِ جارکش مرید بلوچ ءَ منّ اِتگ –

مرید بلوچ ءَ وتی شنگ کرتگیں درشان ءَ گُشتگ کہ بولان پیر کوہ ءَ تیل ءُ گیس ءِ شوھاز کنوکیں کمپنی ءِ پھزداری ءَ لشکری کاروان ءِ سرءَ تیرواگ بمب تراکے کرتگ چریشی ءِ سبب ءَ گاڑی سرجم ءَ تباہ بیتگ ءُ چریشی ءَ پد سرمچاراں کاروان ءَ ھواریں گاڑی راکٹ ءُ وتکاریں سلاھانی گون ءَ نشانگ کرتگ اَنت –

جارکش ءَ گوشت کہ سرمچارانی اے اُرش ءَ لشکری ءُ کمپنی ءِ انجینئراں ھوار بازیں کچے ءَ کارمند جنگ بیتگ اَنت –

مرید بلوچ ءَ گوشت کہ اے اُرش ءِ زمہ واری ءَ مئے گل منّ اِت ءُ درملکی کمپنیاں ترندی ءَ سرپد کنگ لوٹیت کہ بلوچستان ءِ مڈیانی پُل ءُ پانچیاں بند بہ کن اَنت اگاں آ دیمتر ءَ ترندتریں وڑے ءَ نشانگ کنگ بنت-

لشکر ءَ مروچی سھب ءَ راہ ءُ در بستگ اَنت ءُ پٹ ءُ پول ءِ وھد ءَ دو مردم دزگیر کرتگ ءُ برتگ –

مکران ءِ دمگانی تہءَ گوستگیں بازیں روچاں چَہ پاکستانی لشکر ءِ زمینی لشکری بیڑ برجاہ اَنت –

سر بیتگیں ھالانی رد ءَ کیچ ءِ دمگ تمپ کوھاڈ ءَ مروچی پاکستانی لشکر ءَ راہ بستگ ءُ پَٹ ءُ پول ءِ وھد ءَ دو مردم گپتگ ءُ بیگواہ کرتگ اَنت –

بیگواہ بیتگیں مردمانی پجار اشتیاق ء ماسٹر سدیر ءُ عبید ء آدم ءِ ناماں زانگ بیتگ اَنت –

بلوچستان ءَ گوستگیں دو ھپتگانی تہ ءَ چِست کنگ ءُ بیگواھیانی ویلانی تہ ءَ گیشی اتکگ چریشی ءِ سبب ءَ جتائیں دمگاں چَہ بازیں کَچے ءَ ورنا گیشتر نودربر پاکستانی لشکر ءُ چیریں ادارھانی دست ءَ بیگواہ کنگ بیتگ اَنت –

دومی نیمگ ءَ بلوچستان ءِ جتائیں سیاسی پاٹی ءُ گلانی نیمگ ءَ بیگواھیانی ھلاپ ءَ توار ءَ برز کنان اَنت –

بیگواھیں مردمانی درگیجگ ءَ شال ءُ کراچی ءَ گوستگیں یک دھکے ءَ پُرایمنیں جد ءُ جھد برجاہ اِنت –

نیشنل پاٹی ءِ بنجائی رھشون سنیٹر میر ھاسل ھان بیزنجو ءَ گُشتگ شش ماہ اِنت نیشنل پاٹی ءِ بنجائی رھبر ءُ بنیادم ءِ اُگبالانی پلامرز ادریس ھان کٹک بیگواہ اِنت کہ آئی آجوئی ءِ واستا ھر پلامرزیں گَلانی کر ءَ توار چِست کتگ بلے ھاکماناں ھچ سُد ءِ پر نیست کہ ملک ءِ یک بے کَچیں زمہ واریں شھری ءِ ریاستی ادارہ روچ ءُ رَھمانی چِست کن اَنت ءُ بر اَنت کہ آئی گناہ ءُ میار بس ھمیش اِنت کہ آ ملک ءِ بنیادمی اگبالانی پد جنی ءِ سر ءَ توار چِست کتگ ئے کہ ملک ءِ کانود ءُ ھاکمی ءِ واھگدار اَت ، ملک ءِ جمھوریت ءُ پارلمنٹ ءِ جوانی ءِ واستا شپ ءُ روچ کار اَت ادریس کٹک ءَ ھمے چیز ءِ شزا ءَ دیگ ءَ اَنت ۔

آئی ءَ گُشت کہ بلوچستان ءُ کے پی کے ءِ مستریں جیڑہ بنیادم ءِ اُگلبالانی لگتمالی ءُ سیاسی باسکانی بیگواہ کنگ اِنت ۔

آئی ءَ گُشت کہ بلوچستان ءِ ھزاراں سیاسی باسک چینچو سال اِنت بیگواہ اَنت ءُ دردناکیں بندیگجاھاں لٹ ءُ کُٹ ءُ انسانیت ۔۔۔ ۔۔۔ دیمپانی ءِ جنگ ءَ اَنت ، ءُ ملک ءَ را بندیگجاہ ءُ زوراں سری ءِ سر ءَ ایمن کنگ یک وتساچیں ھیالے ءَ ابید دگہ ھچ ۔

آئی ءَ گُشت اگاں پاکستان ءَ مُھکم دار ئے گڑا آجوئی ءِ واھشت دارگ ءِ چکرگ ھلاس کنگی اِنت ءُ پارلمنٹ ءَ وتواکی ءُ راجانی اگبال ءِ واجھی منّگ لوٹ اِیت ، راجانی ” خلاف ” ءَ ھُنرسازگ کوتا کنگی اِنت ، ایشی ھمراھی ءَ بلوچستان ءِ جیڑہ راجی ءُ سیاسی ءِ زور ءُ زوراکی ءَ ناں بلکیں گوں نند نیاد ءَ گیش ءُ گیوار کنگی اِنت ۔

آئی ءَ لوٹ کت کہ ” عیدالفطر ” ءَ چہ پیسر سرجمیں بیگواھیں سیاسی باسکاں آجو بہ کن دانکہ بیگواھیں مردم گوں وتی کھولانی ھمراھی ءَ اَئید ءِ وشیاں بہ گوازین اَنت ۔