TBP Balochi

شال ءَ بیگواھیں مردمانی درگیجگ ءَ زھرشانی برجاہ

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی گدان ءَ 3ھزار 9 سد ءُ شست ءُ پنچ روچ سرجم بیتگ -جتائیں تکاں گوں بندوکیں مردماں بنجل ءِ تر ءُ تاب کرتگ ءُ بیگواھیں مردمانی کھولاں پدردی درشانیتگ –

وی بی ایم پی ءِ کسان کمک سرکماش ماما قدیر بلوچ ءَ ھمے وھد ءَ گپ کنان ءَ گْوشت کک وی بی ایم پی بیگواھیں بلوچانی واستا پاکستانی رھبند ءُ کانود ءُ آمدگسانی سر ءَ اوست داروکیں یک گلے، چُشکہ گوستگیں یازدہ سالاں چَہ ھمے لوٹ ءَ کنگ اِنت اگاں آمدگس سرپد بنت کہ کجام ھم شھری ریاست ءِ ھلاپ ءَ کجام ھم گیر رھبندی تراگامیاں گوں دزمانجن اِنت گڑا آئی ءَ دزگیر بہ کن ءُ آمدگساں پیش بہ کن ءُ آمدگس ھما سزا آئی ءَ بند اَنت ھما سزا ءَ ما منّیں بلے لشکر شھریاں بیگواہ کنگ ءُ پاکستانی آمدگسانی رھبندانی بگیری ءَ کنگ ءَ اِنت –

آئی ءَ گْوشت کہ کرونا ءِ نادراھی ءِ روچ ءُ رمزان ءِ پاکیں ماہ ءَ لشکری لشکر کشی، بلوچانی زورانسری بیگواہ کنگ، لوگانی سوچگ، پَس ءُ گوکانی برگ، اولاکانی دُزگ ءُ برگ ءَ پد آیاں سوچگ ءِ کار تینزی ءَ گوں برجاہ اَنت -اے وھد ءَ بازیں ھند ءُ دمگ لشکری انگیر ءِ تہ ءَ اَنت ءُ مارا نلوچستان ءِ بازیں جاھانی ھالانی سربیگ ءِ تچکیں راہ ءُ رھواری نہ بیگ اِنت –

ماما قدیر بلوچ ءَ گْوشت کہ اے وھد ءَ یک اندازوے ءِ رد ءَ پنجاہ ءُ سَے پُسگ بیگواہ ءُ ھژدہ ھزار ءَ گیش پُسگ پاکستانی لشکر ءَ شھید کرتگ – اے زُلم ءُ زوراکیانی سوب ءَ وائس فار بلوچ مسنگ پرسنز ھمک ائیدانی وڑ ءَ اے ائید ءَ ھم شال ءِ پریس کلب ءِ دیم ءَ زھرشانی کنت –

آئی ءَ گْوشت کہ ائید ءِ روچ ءَ وی بی ایم پی یازدہ سالاں چہ برجاھیں بنجل ءَ سھب ءِ ساھت یازدہ ءَ داں بیگاہ ءِ ادار چار ءَ پچ کنگ بیت ءُ ساھت دو ءَ زھرشانی کنت – اے وھد ءَ چاگردی رسانکجاھاں بلوچ مسنگ پرسنز ءِ نام ءَ کیمپئن ءِ کنگ بیت اِنت –

آئی ءَ گوشت کہ شال ءَ جاڑیگیں دراھیں تکاں گوں بندوکیں انسان دوستاں گوں دزبندی اِنت کہ مئے زھرشانی ءَ بھر بہ زور اَنت ءُ اگاں شما جھان ءَ کجام ھم جاہ ءَ جاڑیگے گڑا منتواری ءَ آن لائن کیمپئن ءَ وت ءَ بے بھر مہ کن اِت –

بندر عباس ءَ دو بلوچ ناھدا ءُ یک جانشو ءِ تیرانی زدگ بیگ ءَ پد بیران بیتگ اَنت۔ 

سر بیتگیں ھالانی رد ءَ، مھمد، فریدون ملاھی ءُعلی خیری نامی ئے مردم ءَ تیاب ءِ پھازوکیں کارمندانی تیرانی آماچ بیتگ ءُ بیران بیتگ۔ 

بلوچ جھد کار کمپین ئے شنگ کُتگیں درشان ءِ ردءَ دو شمبے ءِ روچ ءَ بندر عباس ءِ تیاب ءِ پھازوکیں اپسراں یک فیول ٹینک ئے ءِ دارگ ءِ ھاترءَ تیر گواری کُتگ۔

چہ اے تیرگواری ءِ سوب ءَ لانچ ءَ سواریں دو ناھدا، مھمد ءُ فریدون ملاھی ھما جاھ ءَ بیران بیتگ اَنت ءُ یک جانشو ءِ،علی خیری کہ کگران ءِ میتگ ءِجھمنند اِنت، ٹپی بیتگ ءُ نادراہ جاہ ءَ برگ بیتگ۔

سر بیتگیں ھالانی ردءَ ٹپی ایں جانشو علی خیری ھم مروچی نادراہ جاھاں ٹپانی نہ سگگ ءِ سوب ءَ بیران بیتگ۔

یک ءُ دو روچی ءَ پیسر کسانوکیں تپل زرباری افریقہ ءَ وائرس ءِ سوب ءَ بیران بیتگیینانی تہ ءَ درستاں چَہ کستریں تِپل جوڑ بیتگ – اے تپل کورونا وائرس ءِ یک نادراھی ءَ چَہ پیسر ودی بیتگ –

جانسلامتی ءِ وزیر زویلء ایمخیز ءَ گْوشتگ کہ وھد ءَ چَہ پیسر پیداگ بیتگیں تپل ءَ پُپانی جیڑہ بیتگ ءُ آ پیداگ بیگ ءَ رند زوت وینٹیلیشنی ءِ درکار بیتگ –

آئی ءَ گْوشت کہ ایشی ءِ مات ءَ کووڈ 19 بیتگ ءُ چریشی ءَ پد چُک ءَ ھم بیتگ – اے ھم جوان اِنت کہ وھد ءَ پیسر ما آئی ءِ جاورھالاں سرپد بہ ایں –

زرباری افریقہ ءِ برِ آزم افریقہ ءَ یک ڈیھے کہ اود ءَ کورونا وائرس گیش نادراھیانی گورجنی بیت اِنت، چارشمبے ءِ روچ ءَ اود ءَ وائرس ءِ سر ءَ اود ءَ بیست ءُ ھپت مردم مرتگ – ھمے وڑ ءَ داں انیگ ءَ بیران بیتگین مردمانی کَچ سَے سد ءُ سِی ءُ نُہ ءَ سر بیتگ

ڈیھ ءَ وائرس ءَ گورجتگیں نوکیں ھشت سد ءُ سَے مردمانی ھال دیم ءَ اتکگ ءُ درستانی کچ 18 ھزار ءُ 3 بیتگ اَنت –

بلوچستان لبریشن فرنٹ ءِ جارکش میجر گْوھرام بلوچ ءَ کیچ ءِ دمگ ءَ لشکریانی کاروان ءِ سر ءَ بیتگیں اُرش ءِ زمہ واری من اتگ ءُ گشتگ کہ کیچ ءِ دمگ ڈنڈار ءَ سرمچاراں مرچی سھب ءِ ساھت یازدہ ءَ پاکستانی لشکر ءِ سَے گاڑیانی کاروان ءِ سر ءَ ارش کرتگ ۔

جارکش ءَ گْوشت یک گاڑی اُرش ءِ زد ءَ اتکگ ءُ آئی ءِ سواریں شش کارمند مرتگ ءُ دو ٹپی بیتگ اَنت ۔

میجر گْوھرام بلوچ ءَ گْوشت لشکریانی سر ءَ اُرش بلوچستان ءِ آجوئی ءَ داں برجاہ مان انت۔

یات بہ بیت ھمے ماہ ءِ تھ ءَ بلوچستان ءِ جتا جتائیں دمگاں لشکریانی سر ءَ بلوچ آجوئی لوٹوکیں سلاہ بندیں گلانی نیمگ ءَ چہ ترندیں اُرشانی تھ ءَ مزنیں کساسے ءَ پوجی اَپسر ءُ کارمند کُشگ بیتگ اَنت-

گوستگیں روچاں بولان پیرگیب ءَ شش کارمند جنگ بیگ ءِ گپ آئی ایس پی آر ءَ وتی درشان ءِ تہ ءَ من اِتگ اَت

دومی نیمگ ءَ بولان ءَ بیتگیں اُرش ءِ زمہ واری بلوچستان ءِ آجوئی لوٹوکیں گل یونائیٹد بلوچ آرمی ءَ من اِتگ اَت۔ ھمے وڑ ءَ مئی ءِ ماہ ءَ تگران ءِ دمگ ءَ بی ایل اے ءِ اُرش ءَ پاکستانی لشکر ءِ میجر ندیم بَٹی گوں وتی دگہ ھمرایاں بمب تراکے ءِ نشانگ کُشگ بیتگ اَت اَنت –

بیست ءُ یک مئی دوھزار ءُ ھژدہ ءَ مَچ بولان ءَ پاکستانی لشکر ءُ چیریں ادارھانی دست ءَ آوار جنگ بیتگیں بلوچ ورناہ ابدلھی کرد ءَ دو سال گوزگ ءَ پد ھم یلہ کنگ نہ بیتگ –

بولان ءِ جھمنندیں ورناہ ابدلھی کرد دو سال ءَ پیسر بولان ءِ دمگ مچ ءَ کوہ باش ھوٹل ءِ نزیک ءَ دزگیری ءَ پد ناشناسیں جاھے ءَ برگ بیتگ –

ابدلھی کرد ءِ گوھار ءَ وتی بیان ءِ تہ ءَ گْوشتگ کہ دو سال ءِ گْوزگ ءَ ابید ھم منی برات ءِ ھِچ وڑیں ھال ءُ اھوال نیست اِنت ءُ ناکہ دگہ آمیدجاھے ءَ پیش کنگ ءُ آئی ءَ کانودانی مسامی ھکے دیگ بیتگ –

آئی ءَ دیمتر ءَ گْوشت کہ میان اُستمانی مردمی اگبالانی ادارہ، بلوچ راجدار ءُ سپریم کورٹ آپ پاکستان ءَ گوں دزبندی کن آں آ منی برات ءِ یلہ کنائینگ ءَ مئے توار جوڑ بہ بیت ءُ منی بے گناھیں برات ءَ دیم ءَ بیاریت ءُ آئی ءَ لس جرمکارے ءِ رنگ ءَ آئی ءَ آمدگس ءِ دیم ءَ پیش بہ دار اَنت –

آئی ءَ گْوشت کہ ما ابدلھی ءِ درگیجگ ءِ ھاتر ءَ شال ءَ ھوار جتائیں پریس کلبانی دیم ءَ وتی توار چِست کنان کرتگ بلے اے جاھاں کَس مئے توار ءَ گوشدارگ ءَ ساجو نہ اِنت-

آئی ءَ گْوشت اگاں ابدلھی ءَ گناہ کرتگ گڑا پاکستان آئی ءَ آمدگِس ءَ بہ یار اِت ءُ آئی ءَ سپاھی دیگ ءِ موہ ءَ بہ دنت –

زانگ بہ بیت ابدلھی کرد ءِ زورانسری بیگواھی ءِ بارو ءَ آئی ءِ کھول ءُ بلوچ چاگردی رسانکارانی نیمگ ءَ چاگردی رسانک جاہ ٹویٹر ءَ یک کمپئین ئِے #SaveAbdulHaiKurd ءِ ھیش ٹیگ کارمرد کنگ بیگ اِنت

هانی تئی ودار ءَ نشتگ

نمدی یے پہ بیگواھیں نسیم جان ءِ نام ءَ

نبشہ کار: زھیر بلوچ

دراه ءُ سلامت بات ئے نسیم جان ،زوت چہ اهد ءِ یزیدانی دست ءَ آجو بات ئے ءُ پہ سلامتی واتر بات ئے.

بہ گند ئے تو همیں جیڑگ ءَ ئے کہ اے کے انت ترا نمدی یے نبشتہ کتگ ئِے. من اوں ترا پیسر ءَ ندیستگ بس هما روچ ءَ چہ ترا زاناں کہ تو آوار جنگ ءُ بیگواه کنگ بوتگ ئے.
بلے تو بس انچو بزان کہ تئی یک بیوسیں براتے کہ ترا یات کنگ ءَ انت تئی یک انچیں براتے کہ همک روچ آئی ءِ تنگوهیں برات چو تئی وڑ ءَ بیگواه کنگ بوگ ءَ انت، همک روچ آئی ءِ براتانی ٹپ ءُ ٹوریگیں لاش دست کپگ ءَ انت…. همک روچ آئی ءِ مات ءُ گهارانی ازت لگتمال کنگ بوگ ءَ انت ءُ مات ءُ گهار زندانیگ کنگ بوگ ءَ انت. بلے آ پہ بیوسی نہ دست رسی نشتگ لگوریں چماں ارس گوار ایت.

نسیم جان ….. تئی بیگواھی ءَ سالے پِرگوستگ من بس ترا همنچو گُشگ لوٹاں تئی هانی تئی ودار ءَ نشتگ. هانی تئی شوهاز ءَ شهر ءِ ریٹائیں دمک ءُ کشکاں چو دیوانگ ءَ گردیت. هانی ءَ تئی اکس ماں امبازاں زرتگ اے بے ریائیں جنگل ءَ هون واریں رسترانی درا ٹک ایت.

هانی برے شال ءُ برے کراچی ءَ پریس کلبانی دیم ءَ نشتگ تئی شوهاز ءِ هاتر ءَ زهرشانی کنگ ءَ انت. بلے اے گُنگدامیں جنگل ءِ اے هون واریں رسترانی بنُجل انت اے هچ نہ گند اَنت اے هچ نہ مار اَنت اے چم نہ دید ءُ گُنگ زبانیں اکس انت. اے هانی ءِ ریتکگیں ارساں نہ گند انت بلے هانی انگت چو باتیل ءَ مک انت تئی شوهاز ءَ زوراکانی دیم ءَ.

ما بلوچ راجدپتر ءَ هانی ءُ شے مرید ءِ کسہ اشکتگ بلے مرچی بیست ءُ یکمی کرن ءَ هانی ءُ شَے مرید ءِ کسہ منی چمانی دیم ءَ گندگ بوگ ءَ انت.
انچو کہ زوراکیں چاکر ءَ پہ لُچی ءُ لگوزی شے مرید ءِ هانی پل اِتگ ….
همیں وڑ ءَ اے اهد ءِ زوراکاں هانی ءَ چہ آئی ءِ نسیم پل اِتگ
انچو کہ شے مرید وتی هانی ءِ ودار ءَ جنگل پہ جنگل ، کوه ءُ گیابان چو گنوک ءَ تر اِتگ.
همیں وڑ ءَ تئی هانی تئی ودار ءَ شهر ءُ بازاراں میتگ ءُ کشکاں دمک ءُ دراں چو دیوانگ ءَ تئی شوهاز ءَ گرد اِیت.

نسیم جان …. .. اِد ءَ جاور انچوش انت کہ همک روچ چو تئی وڑ ءَ بلوچ نودربر ءُ ورنا آوار جنگ ءُ بیگواه کنگ بوگ ءَ انت. مردم گوں همروچیگیں جاوراں دلگوش ءُ ترس ءِ آماچ انت بہ گندئے ترا باز یات مکن انت بلے……. تئی هانی همک روچ ترا یات کنت پہ تو ارس شل ایت تئی ودار ءِ درچک ءَ وتی ارواه ءِ پیژگاه ءَ آپ دنت ءُ آئی ءَ گیمرگ ءَ نیل اِیت.

همیں زوراکاں کہ ترا بیگواه کتگ همک روچ تئی هانی ءَ پادتراپ دے انت بیھار دے اَنت کہ هچ مہ گْوش گُنگ بہ بو اگاں نہ ترا پد ءَ بیگواه کن اِیں ترا کُش اِیں …..
بلے تئی هانی پد نہ کنزاتگ تئی هانی نزور نہ بوتگ تئی هانی نہ پرشتگ تئی هانی ….. انگت چو باتیل ءِ کوه ءَ مهکم انت گوں وتی توکل ءَ اهد ءِ زوراکانی دیم ءَ چو شیرزال ءَ اوشتاتگ تئی شوهاز ءِ هاتر ءَ ۔

نسیم جان گپ و باز انت نزاناں تو انوں کجام جاورانی دیمپان ئے بدواه ءِ زندان ءَ بلے بس همنچو ترا گُشگ لوٹاں کہ ………. هانی تئی ودار ءَ نشتگ.
تو زوت واتر بات ئے آجو بات ئے سلامتی پہ وتی هانی ءَ.
سلامت بات ئے.

تئی دوزواھیں برات زھیر بلوچ

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سرجمیں جھان ءَ کورونا وائرس ءِ نادراھی ءَ نادراھانی کَچ پنجاہ لَک ءَ سر بیتگ اَنت

دی بلوچستان پوسٹ

گوستگیں ھپتگ ءَ لاطینی امریکہ ءَ ھمک روچ ءِ ڈول ءَ کورونا وائرس ءِ ھال امریکہ ءُ یورپ ءَ چَہ گیشتر رپورٹ بیتگ –

تاکارانی رد ءَ نادراھی ءِ نوک گیش کپتگیں ھالانی تہ ءَ ھمے سما بیگ اِنت کورونا وائرس یک نوکیں دورے ءِ ٹِک ءُ نشان کنگ ءَ اِیں –

چین ءَ فروری ءَ کورونا ءِ نادراھی ءِ گیش بیتگ اِت اَنت چریشی ءَ پد امریکا ءُ یورپ ءَ وائرس بازیں کَچے ءَ شنگ ءُ تالان بیت –

درستاں چَہ گیشتر نادراھی ھال برازیل ءَ کنگ بیتگ، برازیل ءَ جرمنی، فرانس ءُ برتانیہ پُشت ءَ گار کرتگ جھان ءِ سیمی نمبر ءَ سر بیتگ کہ اود ءَ امریکہ ءُ روس ءَ پد کورونا وائرس ءِ گیشتریں کیس دیم ءَ اتکگ اَنت –

جان ھاپکنز یونیورسٹی امریکہ ءِ رد ءَ برازیل ءَ کورونا ءَ بیران بیتگیں مردمانی کچ 18 ھزار 859 ءَ سر بیتگ ءُ وھدیکہ نادراھانی کَچ 2لَک 91ھزار 579 ءَ سر بیتگ اَنت –

کیسانی گیش بیگ ءَ ابید دنیا ءِ بازیں ڈیھاں وانگجاہ پچ کنگ ءُ بلکیں کار ءُ بار یک پچ کنگ بیتگ اَنت –

دومی نیمگ ءَ میان اُستمانی جانسلامتی ءِ گر ءُ دار کنوکاں گْوشتگ کک بیست ءُ چار ادارانی وھد ءَ کورونا وائرس ءِ کیس یک لَک ءُ شش ھزار گیش بیتگ اَنت –

تاک دزنویس ءِ رد ءَ نادراھی ءِ آیگ ءَ پد یکیں روچ ءَ کورونا وائرس ءِ کیساں چَہ درستاں گیشتریں کیس اَنت –

میان اُستمانی جانسلامتی ءِ سروک ٹیڈروس ایڈھنوم ءَ گْوشت کہ کم ءُ میانی پیداوریں ڈیھانی سر ءَ گیش کپتگیں کیسانی گیش بیگ پدردیگ آں –

اگاں میان اُستمانی تک ءَ بہ چاریں گڑا سرجمیں دنیا ءَ کورونا وائرس ءَ داں انیگ ءَ 3لَک 28 ھزار ءُ 120 مردم بیران بیتگ اَنت –

امریکہ ءِ جان ھاپکنز یونیورسٹی ءِ رد ءَ کورونا وائرس ءَ آسرمند بیتگیں ڈیھاں چَہ درستاں مستریں ڈیھ امریکہ اِنت کہ اود ءَ داں انیگ ءَ 93 ھزار ءُ 439 مردن بیران بیتگ ءُ وھدیکہ آسرمند بیتگیں مردمانی کَچ 15 لَک 51 ھزار 853 ءَ سر بیتگ اَنت –

اٹلی ءَ 32 ھزار ءُ 330 مردم بیران بیتگ وھدیکہ سرجمیں ڈیھ ءَ نادراھانی کچ 2 لَک ءُ بیست ءُ ھپت ھزار ءُ سَے سد ءُ شست ءُ چار ءَ سر بیتگ اَنت –

ھمے وڑ ءَ فرانس ءَ کورونا وائرس ءَ آسرمند بیتگیں مزنیں ڈیھانی لڑ ءَ ھوار اِنت اود ءَ انیگ ءَ داں بیست ءُ ھشت ھزار ءَ گیش مردم کورونا وائرس ءَ وتی ارجان جتگ اَنت، وھدیکہ سرجمیں ڈیھ ءَ وائرس ءَ نادراھانی کَچ یک لَک ءُ ھشتاد ءُ یک ھزار ءُ ھپت سد ءَ سر بیتگ اَنت –

ہورپ ءِ دگہ یک ڈیھے ءَ کورونا وائرس ءَ ھزارانی کَچ ءَ مردم مرتگ اَنت، اسپین ءَ داں انیگ ءَ بیست ءُ ھپت ھزار ءُ ھشت سد ءُ ھشتاد ءُ ھشت مردم مرتگ ءُ نادراھانی کَچ دو لک ءُ سِی ءُ دوھزار ءُ پنچ سد ءُ پنجاہ ءُ پنچ ءَ سر بیتگ –

ائید ءِ روچ ءَ ھم بیگواھیں مردمانی واستا زھرشانی برجاہ بیت، ماما قدیر بلوچ

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ 3ھزار 9 سد ءُ شست ءُ چار روچ سرجم بیتگ – ایجوکیشنل الائنس ءِ سرکماش زبیر شاہ آگاہ ءُ آئی ءِ ھمرھاں بنجل ءِ تر ءُ تاب کرتگ ءُ بیگواھیں مردمانی کھولاں گوں پدردی درشانیتگ –

وی بی ایم پی ءِ رھشون ماما قدیر بلوچ ءَ ھمے وھد ءَ وتی ھیال ءُ لیکہ درشان کنان ءَ گْوشت کہ ھمک سال ءِ ائیدانی رنگ ءَ اے ائید ءَ ھم زھرشانی شدکشیں بنجل ءَ سھب ءِ ساھت یازدہ ءَ داں بیگاہ ءِ ساھت چار ءَ برجاہ مان اِنت –

آئی ءَ گْوشت کہ ائید ھما روچ اِنت کہ آئی ءِ آیگ ءَ لوگ ءَ کسانیں چکاں بہ گر داں مزنیں درست وشھالی بنت، گریبانی واستا نوکیں پُچ، چمپل ءُ وشیاں کاریت – ائید ھما وھد ءَ لوگ ءَ شاتمانی کنگ بیتگ جاورانی وش ءُ سارتی لوگانی تہ ءَ وشی کیت ھما لوگ ءَ گریوگ ءُ دردانی رنجانی پتر گریوگ ءَ اَنت آ لوگ کجام ھم سنگ دلیں مردم ائید کُت کنت –

ماما قدیر بلوچ ءَ گْوشت کہ اگاں ما تچک ءُ الکاپ ءَ بلوچ راج ءِ سر ءَ بیوکیں زُلم ءُ زوراکیانی سر ءَ چم نگاھی بہ کن ایں گڑا سرجمیں بلوچ راج اے وھد ءَ درد ءُ رنجانی تہ ءَ کپتگ – بلوچستان ءِ کُنڈ کُنڈ ءَ لشکر ءِ لشکر کشی، ھمک روچ جونانی دزکپگ ءِ سوب ءَ بلوچانی لوگاں گریوگانی توار پیداک اَنت،، ھمک چم چہ ارس ءَ سھر ءُ بلوچستان سوچگ اِنت، ھمک نیمگ ءَ ارسانی ھار تچگ اِنت اے رند ءَ سرجمیں دنیا ءَ مسلمان ائید ءِ وشیانی چِن ءُ لانچ ءَ اَنت بلے بلوچ وتی دوستگیں مردمانی تیر سپتگءں لاشاں چِست کنگ ءَ کَنڈ کنگ ءَ اَنت –

آئی ءَ گْوشت کہ ھما مھتر ءِ آبادیانی سر ءَ تیرگواری کنگ بہ بیت، ورنا لٹ شاپی زنداناں بہ بنت، راج ءِ گیریت زالبول زنداناں بہ بنت ءُ گیرانسانی ھوسانی نشانگ کنگ بہ بنت، مات وتی جگرانی ٹکرانی وداراں چاریگ بہ بنت، گھار پریس کلبانی دیم ءَ میلانک بہ بنت، کسانوکیں چک تیرانی آماچ کنگ بہ بنت وشیانی بدل ءَ سر بریتگیں جون لوگ ءَ سر بہ بنت گڑا چوشیں مھتراں ائید ءِ وشی باز دور تچ اَنت –

آئی ءَ گوشت کہ اے سما کنگ ردوم زیریت لوگ سر ءَ کپگی ءِ بیت گڑا تئی پھریز ءُ سلامتی ءِ واستا ترسی ءِ سما بیگ ءَ اِنت گڑا ائید وشی چون کنگ بنت –

مشکے ءَ پاکستانی لشکر ءِ سر ءَ بیتگیں اُرشانی زمہ واری بی ایل ایف ءَ منّ اِتگ اَنت

دی بلوچستان پوسٹ

بلوچستان لبریشن فرنٹ ءِ جارکش میجر گْوھرام بلوچ ءَ مشکہ ءَ پاکستانی لشکر ءِ سر ءَ بیتگیں اُرش ءِ زمہ واری منّ اِتگ –

میجر گْوھرام بلوچ ءَ رسانکدراں شنگ کرتگیں درشان ءِ تہ ءَ گْوشتگ کہ گوستگیں روچ ءَ مشکہ ءِ دمگ میئی ءَ سرمچاراں لشکری چوکی سناپیر توپک ءِ گون ءَ اُرش کرتگ ءُ چریشی ءَ یک کارمندے کُشتگ –

آئی ءَ گْوشت کہ اُرش ءَ پد زورگریں لشکر ءَ سرمچارانی رندگیری کنگے جھد کرتگ گڑا سرمچار پیش اُرش بیتگ ءُ لشکر پشت گِنزی کرتگ – ھمے وھد ءَ لشکر ءِ بازیں کارمندگ بیران ءُ زدگ بیتگ اَنت –

آئی ءَ گْوشت کہ زیردستیں بلوچستان ءِ آجوئی ءَ داں زورگریں لشکر ءِ سر ءَ اُرش برجاہ مان اَنت