TBP Balochi

شال ءَ بیگواھیں مردمانی درگیجگ ءِ زھرشانی ءَ 3ھزار ءُ 9 سد ءُ شست ءُ شش روچ سرجم بیتگ

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی گدان ءَ 3ھزار ءُ 9 سد ءُ شست ءُ شش روچ سرجم بیتگ – نیشنل پاٹی ءِ باسک امجد بلوچ، رفیق بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولاں گوں پدردی درشانیتگ –

وی بی ایم پی ءِ رھشون ماما قدیر بلوچ ءَ ھمے وھد ءَ گْوشت کہ بیگواھیں بلوچانی مات، گوھار ءُ بلوچ راج رنج ءُ گمانی جاورھالاں گِندیت بیت کنت ھما سنگ دلیں مردم وتی ارساں داشت بہ کنت بلے بلوچ راج ءَ ھما درد ءُ گمانی سگگ ءِ اوپاری وتی سر ءَ زرتگ ءُ اوپار کنگ اِنت ءُ اوپاری ءِ درچ ءَ لھتے مردم سوداگری ءَ لَگ اِتگ اَنت –

آئی ءَ گْوشت کہ گلامیں مات ءُ گوھاراں وتی دوستیگیں مردمانی یلہ کنائینگ ءَ پُرایمنیں جد ءُ جھد ءَ چَہ دنیا ءَ ھمے کلوہ داتگ کہ ما پُرایمنیں جد ءُ جھد کنگ ءَ ایں –

آئی ءَ گْوشت کہ مارا ھمے سما بیت کہ اے رند ءَ بلوچستان ءَ اَئید ءِ شاتمانی ءَ باز کم مردم کنت پد ءَ ھم ھما کھول مروچی وتی چُکانی ھمراھی ءَ اَئید کنگ ءَ اِنت آ ھم یک رندے ءَ گیمرتگیں رنگے ءَ جیڑ اِت کہ کوھن ءُ چاکیں گُدانی ھمراھی ءَ لوگ ءِ در ءَ وتی پِت ءِ ودار ءَ کنگ ءَ اَنت –

ماما قدیر ءَ گْوشت کک مروچی ھما زال ائید ءِ دود ءَ کنگ ءَ اَنت آیاں اے زالانی ھیال کنگی اِنت کہ مروچی ائید ءِ روچ ءَ پریس کلبانی دیم ءَ زھرشانی ءِ بنجل اِش سمبھیتگءُ نیشتگ ءُ وتی دوستیگیں مردمانی راہ ءَ چاریگ اَنت -ورنایاں نوکیں چمپل ءُ پُچانی پِر کنگ ءَ پیسر اے ھزاراں بیگواھیں مردمانی ھیال دارگی اِنت کہ مروچی ائید ءِ روچ ءَ ھم تھاریں زنداناں بندیگ ءُ لٹ ءُ کُٹاں سگگ ءَ اَنت –

آئی ءَ گْوشت کہ ائید ءِ وشیانی دارگ ءَ پیسر ھما ژانگولیں جونانی سر ءَ یک رندے ءَ وتی نگاھاں ایر بہ کن اَنت کہ مروچی جنگل ءُ گیاباناں دزکپگ ءَ اَنت -مروچی مارا وتی وشی ایشانی واستا دیمھون کنگی اَنت کہ مئے باندات ءِ واستا تھار ءُ لٹ ءُ کٹی زنداناں سگگ ءَ اَنت –

بیگواھیں مردم ءِ دزکپتگیں جون ھُزدار ءِ ھنکین ءَ چہ دزکپتگ۔

دی بلوچستان پوسٹ ءِ ھال پتر ءَ سر بیتگیں ھالانی رد ءَ بلوچستان ءِ دمگ ھُزدار ءَ چہ یک جونے دمگی واکداران دست کپتگ۔

واکداران جون چہ ھُزدار ءِ ھنکین پیر عمر ءِ ھند ءَ دست کپتگ۔

جون سول نادراہ جاہ ھُزدار ءَ روان دیگ بیتگ ءُ آود ءَ آئی ءِ پجار عبدالوحید نوشیروانی ءِ نام ءَ بیتگ۔

واکدارانی رد ءَ عبدالوحید شش روچ پیسر ءَ ناشناسیں مردماں بیگواہ کُتگ ءُ گوں وت بُرتگ ا ۔ ویل ءِ درگت ءَ واکدار گیشتر پَٹ ءُ پول کنگ ءَ اِنت۔

ھمے وڑ ءَ پنجگور ءَ جرمکار امام بکش ء مھمد بکش ءَ وت ءَ پاھو داتگ –

پولیس ءِ رد ءَ امام بکش ءَ گوستگیں روچ ءَ وتی براتزتک کُشتگ ءُ چریشی ءَ پد پولیس ءَ آ دزگیر کرتگ –

پولیس ءِ رد ءَ امام بکش ءَ جیل ءِ تہ ءَ سانکلاں چارد مانلگوشتگ ءُ وتکُشی کرتگ –

گوشگ بیگ ءَ اِنت کہ امام بکش نیمساریں مردمے ھم بیتگ –

سر بیتگیں ھالانی رد ءَ آواران ءِ دمگ مشکہ النگی ءَ اَزھر الی ء اسگر الی جھمنند گجر ٹیوشن ءِ وانگ ءِ ھلاسی ءَ پد واتر ءَ لوگ ءَ روگ ءَ بیتگ ھمے میان ءَ ناشناسیں پَرپٹ سواریں مردمے ءَ آئی ءِ سر ءَ اُرش کرتگ ءُ پرپٹ ءَ سوار کرتگ –

زورانسری برگ ءَ پد آئی اَزھر ءِ گون ءَ سلکاری ءِ بدین ھادت کنگ بیتگ ءُ آ پد ءَ یلہ کنگ بیتگ –

آوار جنوکیں مردم ءِ پجار اَئید مھمد پنام ءِ پیرو ء کریم داد اِنت –

چریشی ءَ پد ازھر ءِ مردماں پولیس ءِ گور ءَ آئی ءِ ائید مھمد ءِ ارزی نامہ نبشتگ کنائینتگ ءُ آئی ءِ دزگیری ءِ لوٹ کرتگ –

مردمانی رد ءَ ائید مھمد ءِ سیادی دمگی ڈیتھ اسکواڈ ءَ اِنت آئی ءِ زورانسریانی کرد ھمک جاہ ءَ سھر ءَ اَنت پرے ھاتر ءَ آئی ءَ مھار گُٹ ءَ اَنت ءُ ھمک نیزوردستیں مردمانی سر ءَ اُرش کنان اِنت –

ھمے وڑ ءَ چاگردی رسانکجاہ ٹوئیٹر ءَ ہیومین رائٹس کونسل آف بلوچستان ءِ جنرل سیکرٹری ابد اَباس ءَ ٹویٹ کنان ءَ گْوشتگ کہ دوزادہ سالی ئیں ازھر الی آوار جنگ بیتگ ءُ آئی ءِ گون ءَ بدھادتی کنگ بیتگ –

ابد الا اباس ءَ گپ کنان ءَ گوشتگ کہ آوار جنوکے نام اَئید مھمد اِنت ءُ آئی ءِ سیادی دمگی ڈیتھ اسکواڈ ءَ اِنت ءُ اشانی گیشتر کار ھمیش اَنت مردمانی آوار جنگ ءُ آیانی کُشگ ءُ لٹ شاپ کنگ ءُ جتائیں سلکاریاں ھوار اَنت-

سر بیتگیں ھالانی رد ءَ لشکریاں کوشکوردَپ میتگ ءِ سر ءَ اُرش کُتگ، پہ شیر مھمد بلوچ نامی ئیں مردمے ءِ دزگیر کنگ ءَ۔

گیشتریں ھالانی رد ءَ تیرگواری ءِ سوب ءَ دو ورناہ ارمان اربابی ءُ مسعود شھرکی جنگ بیتگ اَنت ءُ مرتضی اصغریان، اُرش ءِ تھ ءَ ٹپی بیتگ۔

دمگی ھالانی رد ءَ شیر مھمد، کہ آئی ءِ دزگیر کنگ ءَ پہ لشکر ءَ بیڑ بُرتگ بیتگ آ چہ لشکر ءِ دست ءَ لگوشگ ءُ تچگ ءَ سوبمند بیتگ۔

دگہ یک ھالے ءِ رد ءَ روکپتی بلوچستان ءِ دمگ دشتیاری ءِ ھند ءَ چہ دست ءُ پاد بستگیں جون ءِ دز کپتگ۔

اھوالانی رد ءَ دشتیاری ءِ دمگ ھورکی ءَ دز کپتگیں جون یک بلوچ ورنایے حمید بلوچ ء بیگول ءِ بیتگ، گیشتریں ھالانی رد ءَ جون ءِ دست ءُ پاد بستگ بیتگ اَنت ءُ جان ءَ لَٹ ءُ کُٹانی نشان بیتگ اَنت۔

ھالانی رد ءَ ورناہ ءِ جون پکیر زھی ءُ کوھدیم ءَ میتگانی نیام ءَ یک راھگوز ئی ءَ دیستگ ءُ کُوش ءِ سوب داں انگت ءَ زانگ نہ بیتگ –

اُستاد میر اھمد ئے نوکتریں نوار پہ بلوچ راجءَ کسانیں ائید ءِ مستاگ ءِ دروشم ءَ مروچی اُستاد میر اھمد ءُ اُستاد مھناج مختار ءِ آفیشل ساونڈ کلاوڈ چینل ءَ چہ شنگ کنگ بیتگ۔

اُستاد میر اھمد ءِ نوکتریں نوار ئے تھءَ مدامی ایں وڑ بلوچی ءُ براھوئی دوھیں زبانی سوت گون اَنت ءُ سوتانی لڑ چو اے وڑ ءَ اِنت ۔

اولی سوت سنج جڑکیں اِنت کہ نامداریں بلوچ شائر مجید عاجز ءِ نبشتگیں شئر اِنت۔

دومی سوت ہلک سوتکگے اِنت کہ ایشی شائر ادنان مکبول اِنت ۔

سئمی سوت اوار ئسون براھوئی زبان ءَ گشتگیں شئر اِنت کہ بلوچ سلاہ بندیں گل بی ایل اے ءِ سروک بشیر زیب ءَ نبشتگ۔

ھمے وڑ دگہ یک براھوئی سوت ءِ کہ عمران فریق ءَ نبشتگ آئی سرھال اِنت او اسلم۔ اے شئر پہ مزن نامیں بلوچ راھشون بی ایل اے ءِ گوستگیں سروک نمیرانیں اسلم بلوچ کہ بی ایل اے ءَ “جرنیل” ءِ پنام داتگ اَت ھمائی ءِ نام ءَ ندر کنگ بیتگ۔

سوتانی لڑ ءَ مزن نامیں براھوئی زبان ءِ شائر مرید بلوچ ءِ نبشتگیں شئر ننا ھر قُدم ھم ھوار اِنت۔

زانگ بہ بیت کہ اُستاد میر اھمد بلوچ گشندہانی تھءَ ھما ناماں چہ یک اِنت کہ وتی ازم ءِ گوما سرزمین ءِ درد ءُ رنجان بیان کنگ ءَ اِنت ءُ آئی سوتانی گیشتریں بھر آشوب ءُ بلوچستان پہ نازینک اَنت۔

بلوچستان ءِ تیاب دپی شھر گوادر ءُ بنجاھی شھر شال ءَ پیش اتکگیں ویلانی تھءَ دو زالبول بیران ءُ چار مردم زدگ بیتگ اَنت –

سر بیتگیں ھالانی رد ءَ چَہ گوادر ءَ تربت ءَ رؤکیں گاڑی شم کلانچ ءِ دمگ ءَ کزا ءِ آماچ بیتگ چریشی ءَ چَہ آفرین ء نئیم جھمنند بلوچ پاڑہ گوادر بیران بیتگ –

گوادر بلوچ پاڑہ ءِ جھمننندیں زالبول ءَ چِلگی ءِ واستا تربت ءَ برگ ءَ بیتگ اَنت کہ راہ ءَ کزا بیتگ – زدگ بیتگینانی تہ ءَ نئیم ء ھسن، نئیم ءِ لوگبانک لیلہ، ھمیدہ ء اِیسا ءُ یاکوب ءِ لوگبانک درھاتون ءِ ناماں زانگ بیتگ اَنت –

پسنی ءِ لیویز ءِ کارمنداں جون گوادر ءَ سر کرتگ-

ھمے درگت ءَ بلوچ اھوالکار کئیا بلوچ ءَ ٹوئیٹ کنان ءَ گُشتگ کہ “پدردیں ھال اِنت کہ ڈسٹرکٹ پسنی گوادر ءِ جھمنندیں یک بلوچ جنین ءِ کہ پہ چلگی ءِ ھاتر ءَ تُربت ءَ روگءَ بیتگ گاڑی ءِ ایکسیڈنٹ ءَ بیران بیتگ۔”

آئی ءَ دیمترا گُشتگ کہ “سی پیک ءَ گوادر ءَ یک شریں نادراہ جاہ ءِ دات نہ کُت، آیوکیں وھدءِ دبئی کہ ادا جنین آدم ءَ پہ چلگی ءَ یک سد ءُ ھشتاد کلومیٹر دیر تُربت ءَ روگ کپ اِیت، نگیگیں جاور اَنت۔”

ھمے وڑ ءَ شال ءَ ھاجی گیبی دگ ءَ ناشناسیں مردمانی تیرگواری ءَ چَہ یک زالبولے بیران بیتگ-

شال ءَ بیتگیں ویل ءِ سوب دنیگت زانگ نہ بیتگ –

نبشتانک:سَنگت شاری ءَ کینسر اِنت

دومی بھر

نبشتہ کار :شپانک بلوچ

دی بلوچستان پوسٹ

شاری کند ات گشت” لالا من گد کش اتگاں بلی ءَ گشاں چاهاں چاریت من چک ءَ آپ ایر کتگ من ءُ تو رو ایں”.
من شر شاری جان شاری شت دیم ءَ بلی ءِ هال دیگ ءَ من گوں شاری ءَ روگ ءَ ات آں جو ءِ سر ءَ کہ شاری ءِ پاد ڈوکے ءَ ڈک لگ ات شاری پریات کت من انچوش بے سما بوت آں کہ زمین چنڈ بوت من زوت زوت وتی شاری پادے لنکک وتی دپ ءَ کت کمو ناکن ءِ سنگ ءَ براتگ ات من هون پهک کتاں شاری بڈ کت من گوں شاری جان ترا براں لوگ ءَ شاری کند ات لالا منی پاد ءَ هچ نہ کومبا زیر رواں جو ءِ سر ءَ من کُمب دستا کت شاری کوپگ ءَ رپتاں دیم پہ جوهے سر ءَ شاری پچ مچ ءَ ٹنگ ات اَنت من جامگ کش ات شاری ءَ منی سر ءَ آپ پریچ ات یکوی کند ات ئِے ءُ گشت ئِے لالا تو میداں وتی مچن تئی ملگور من ءَ سک دوست بہ اَنت .
من گشت شاری جان منی ملگوراں کے کسان کنت اد ءَ نہ بازارے هست نہ هجامے چیزے.
شاری ءَ منی مید سابون جت ششت اَنت کندگ مسکراهی کناں داں من وتی اے تریں پچ جو ءِ سر ءَ من ءُ شاری ءَ ششت اَنت کومب ءَ مان کت اَنت آ پچ من گور کت اَنت کمب دستا کت شاری کوپگ ءَ روان کناں بوت ایں دیم پہ بلک ءِ گدان ءَ ،شاری انچو گل ات کہ کمبر جان ءُ من وهدے یک جاه بوتگ ایں شاری کمو گپ زانتگ انچو گل بوتگ شاری منی میداں برے چکیت برے وتی کسانیں دستاں گوں وتی برزا اش بارت داں ما سر بوت ایں گدان ءِ دپ ءَ بلی ءَ نوار جت منیچو تو وتی لاڑیں گهارک ءَ بزور بیا شاری ءِ مات ءِ لوگ ءَ تیل ایر انت سررند وتی سر ءَرند چاه من جوڑ کتگ کاران اش ،
من! شاری گشت هاهاها لالا دیم ءَ تریں کمب ءَ ایر کن مات کیت تئی گداں تاپ کنت برو آ لوگ ءَ من ایر نیا انت من مرچی هشتر ءَ سواراں هاهاهاها
من ! گشت هو شاری جان مرچی تو گوں من بو لیب کن بلکیں شپ ءَ من شتاں
وهدے کہ من لوگ ءَ اتکاں من همے گپ جت شاری پریشان بوت هچ نہ گوشت
من کن ات هاهاهاهاها
شاری جان من مزاک کناں کولیگاں من همداں نہ رواں شاری کندگ ءَ لگ ات گشت ئِے شر جان هاها تو من ءَ ابیتک کت یک دمانے لالا
من ! شاری تو سکیں شریں چکے من بیتو ساهتے نہ باں منی لاڑیں گهار کمبر نوں کیت ان شاء الله زکت واتر بیت ائید هم نزدیک انت.
من گوں شاری ءَ گپ ءَ اتکاں شاری ءَ منی سر تیل جت ءُ رندگ ءَ لگ ات..

روان انت

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: من ءَ تُرس ایت

نبشتہ کار: بلوچ ھُسین

دی بلوچستان پوسٹ

زانتکار انچوش گْوش اَنت کہ داں تُرس ھلاس مہ بیت زندگی بندات نہ بیت بلے یکے من آں کہ منی تُرس بھ ھلاسی ءِ نام ءَ نہ زاَنت گُڑا اے گپ اَلّم راست انت کہ من زندگ نیاں۔ دو شپ ءُ دو روچ اِنت کہ من ءَ واب نئیت ءُ منی لوگ ءِ مردم گْوش اَنت کہ ترا تَبزانتی(سائیکی) نادراھی یے ءُ لھتیں مردماں من ءَ گْوشتگ کہ تئی ملائی نادراھی یے بلکیں ترا مردم ءَ سِھر ءُ موتّ کُتگ چریشی ءَ گْوش اَنت تو مسیت ءِ ملّا اکبر ءِ کرّ ءَ برو کہ ملا اکبر ءِ دم ءُ چوپ یک ءُ ٹیک اَنت ترا آپ دم جنت داں تو وش بَہ ئے۔

دو ھپتگ بیت کہ من ملا اکبر ءِ کرّ ءَ دم کنگ ءَ روگ ءَ آں بلے ھچ پرک نیست مرچی ملّا اکبر ءَ من ءَ تچک ءَ جواب دات ءُ گْوشت ئِے”تئی ملائی جیڑھے وَ نہ اِنت تو گوں ڈاکٹراں جُست بِہ گِر”.
من درائینت کہ من گوں ڈاکٹراں شور ءُ سلاہ کُتگ ڈاکٹراں من گولی داتگ بلے ھچ کار نہ کن اَنت من روچ پہ روچ گڑا زنڈ تر بیگ ءَ آں۔

من مرچاں انچوش بے کار ءَ آں مرچاں برے برے منی سر پر نہ بیت وھدے من پَند ءَ ھرجاھے ءَ دُور رو آں پد ءَ راہ ءَ بے ھیال کن آں پد ءَ من ءَ مردم گر اَنت ءُ کار اَنت ءُ سر کن انت۔ انچو گْوش ئے منی بزّگیں مات پمّن ءَ گریو ایت۔ شمئے سِتک نہ کن اِت کہ اے تُرس ءَ من ءَ ناں مرد جوڑ کُتگ ءُ نیکہ من ءَ زندے ھست منی جان ئِے آچ من ءَ سون لوٹگ ءَ اِنت۔ من ءَ دو شوکیں چکّ ھم ھست بلے اے زالمیں تُرس ءَ من نادراہ جوڑ کُتگ من سک باز تکانسر آں۔
دوزواھیں سنگت، ھمبل، لوگ ءِ مردم ،سیاد، برات ءُ گْوھار بزاں ھر کَسے کُلیں مردم چہ من ءَ نپرت کن اَنت چہ من بہ زھر اَنت دو روچ بیت کہ منی جَن ھم وتی مات ءِ لوگ ءَ شُتگ ءُ من ءَ یلا داتگ ئِے بلے منی مات ترا سلام اِنت تو من ءَ یل نہ داتگ انگت ءَ منی سر ءَ پانگ ءُ پانپا ئے کہ ھر ساھت ءُ دَمان ءَ تو من ءَ دلبڈی دے ئے منی مات من ءَ یک دمانے ءَ ھم من ءَ یلا نہ دنت ءُ آئی ءَ انچوش شک اِنت بلکیں من وتکشی مہ کن آں بلے آ چوش نہ زانت کہ آئی چکّ ٹوھیں ترسّوکے کہ اے کج ءَ وتکوشی کُت کنت منی مات من ءَ ھر روچ نیکراھی گپ گْوش ایت پنت ءُ کڈن کنت بار بار ءَ ھمّے گپ ءَ من ءَ گوش ایت وتکشی بلاھیں گناھے ھُدا پاک ھر مسلمان ءَ بہ رکین ایت ئِے پد ءَ وت گوش ایت آمین۔

البت اے ترس ءِ آماچ تھنا من نہ آں بلکیں مُچ بلوچستان ءِ نوجوانانی ھمے ھال ءَ اَنت کہ درست ھمّے زوراکیں نادراھی ءِ آماچ اَنت من ءَ دِگہ یک سنگتے ھست انت آ چہ میٹرک کلاس ءِ وھدیگ انت کہ ٹرامال گولیِانی سر ءَ اِنت داں گولی مہ وارت آئی ءَ واب نئیت ھمے سنگت گوش ایت من ڈاکٹر بنگ لوٹ اِتگ بلے وھدیکہ 2013 سال ءَ مئے میتگ ءَ ھالت ءُ جاور ھراب بوتگ اَنت مئے بازار ءَ مزنیں مردے سرکار دست ءَ بیگواہ کنگ ءُ رند ءَ شھید کنگ بوتگ اَنت ءُ منی جِند ءِ لوگ ءِ پنچ مردم ھم جنگ بوتگ اَت ءُ آئی ءِ یک براتے ھم جنگ بوتگ اَت انت پد ءَ آئی برات ءِ مرگ ءَ آئی مات دل ترک بوتگ ءُ دنیا ئِے یلا کتگ گُڑا من ءَ منی ناکو ءَ شال ءَ پہ اِلاج ءَ آرت ئِے ڈاکٹر الیاس ءَ وتی جُھد کُت کہ منی اِلاج ءَ بہ کنت بلے ھچ نہ بوت منی ترس ءُ لرزگ ھلاس نہ بوت۔ گْوش ایت کہ چہ اے ترس ءُ بے وابی ءَ منی جان کُشت ءُ ھلاس بوان اَت گُڑا من یک روچے گوں وتی سنگت ءَ وتی بے وابی ءِ گپ کُت اَنت گُڑا ھما سنگت ءَ من ءَ ڈرامال گولی یے سوج دات اے گولی ءَ شش سال بیت کہ من ورگ ءَ آں، بلے نوں منی میدہ سک ھراب ئِے کتگ بلے ترس انگت منی جان ءَ مان اِنت من وتی میتگ ءَ دو سال ءِ سر ءَ یک رندے بس پہ پنچ روچے واست ءَ رو آن ءُ پد ءَ شال ءَ کایاں بلے میتگ ءُ روگ ءَ ھچ پرک نیست ۔

چوناھیگا منی ھم کسہ انچوش اِنت اے 2011 گپّے کہ من تربت ءَ آپبستگ (برپ) ءِ کار جاگاہ ءَ کار کنگ اَت آں شُما وَ درست شَرّی ءَ سرپد اِت کہ تربت ءَ چون گرمیں انت ءُ پد ءَ لین (بجلی)ھم نیست انت ئِے پمیشکا مردم پہ سردیں آپ ءِ ترمپے ءَ بزگ اَنت ھمے درگت ءَ یک روچے چیریں ادراہ ءِ مردم پہ آپبستگ ءِ رند ءَ کارجاگاہ ءَ آتکگ انت بلے آپبستگ وَ ھلاس بوتگ اِت اَنت تھنا یک لادی یے آپبستگ ءِ ھست اَت بلے اے یکّیں لادی ئیں آپبستگ یک ورنایے ءَ ساری ءَ زرتگ اَت آئی ءَ من ءَ کلدار ھم داتگ اَت بلے بازیں کلدار ئِے نہ داتگ اَت ءُ من ءَ گوشت ئِے منی آپبستگاں کسّ ءَ مہ دے من درمان جاہ ءَ درمانے زور آن ءُ بس دمانے ءَ رند کا آں وتیگاں بر آں گُڑا من سرکار ءِ مردم گْوشت واجہ اے آپبستگاں انوں یک مردمے ءَ زرتگ ءُ دیگہ آپبستگ نیست بلے اے زور ءَ وریں مردم اِت اَنت آپبستگ ءِ چست کنگ ءَ لگ ات انت من آپبستگ ءِ برگ ءَ نہ اشت آں مئے ھمد ءَ کمّیں چِلّ پنچ بوت اَنت گْڑا منی پادانی دیم ءَ دو تیرے آس دات اِش بلے شگر اِنت من ءَ تیر نہ لگ ات مردم تیرانی توار ءَ آتکگ ءُ مُچ بوت اَنت بلے اِداراہ ءِ مردم زیت تتک۔ پد ءَ ھما آپبستگ ءِ واجہ آتک ءُ سر بوت من کسہ کُت گُڑا درائینت ئِے تو آپبستگ بہ داتیں مسلھے نہ اَت بلے من گْوشت من ترا زبان داتگ من پمیشکا آپبستگ دات نہ کُتگ۔

دومی سُھب ءَ من پد ءَ آپبستگ ءِ کارجاہ ءَ آتک آں وتی کار بندات کُت گْڑا من پہ پیشیم ءِ نماز ءَ مسیت ءَ شت ءُ نماز وانت ءُ پد ءَ من آیگ ءَ اِت آں کہ راہ ءِ سر ءَ پنچ سلاہ بندیں مردماں من ءَ چِست کُت “اسپتیں” گاڑی یے توک ءَ دور دات ءُ منی چمّ اِش بست اَنت من چہ ھمّے پنچیں مردماں چَہ یک کاسگ چٹّے ءَ من ءَ بلوچی گْوشت تو اڑے !! مارا آپبستگ نہ دے ئے ھاں؟ نوں ترا ما پریج ءَ کن ایں ترا برپ کن ایں چریشی ءِ آسر ءَ من پَکّ ءَ دلترک بوت آں۔
ایشاں من ءَ بُرت یک کسانیں سیاہ ءُ تیاریں کوٹی یے ءَ بند کُت بلے گپ کنگ نہ بیت کہ ایشاں منی گون ءَ چے کُت بلکیں شمارا ستک نہ کنت کہ منی گون ءَ چونیں کار ءُ کَردَگار اِش کُت ھُدا دژمناں ھم اِشانی دست ءَ مہ دیات!! منی دوا اِنت۔ سے ماہ ءَ منی چمّ ھم پچ اش نہ کُتگ البت من وَ یک پوریاگرے اِت آں مرگ من ھر ساھت ءُ روچ گوں وتی چمے ءَ دیستگ، شود ءِ رنگ ءَ، نادراھی ءِ رنگ ءَ، تنگ دستی ءِ رنگ ءَ، من ءَ مرگ ءَ باز رنگ ءَ دیستگ۔
وھدے کہ من سے ماہ اے آپبستگ ءِ گناہ ھلاس کُت آں گُڑا ایشاں من ءَ شپ ءِ سے ءِ ساھت ءَ یک مچکدگ ءَ یلہ دات ءُ دست اِش پچ کُت انت ءُ وت ماں وت ءَ ھلوت اِش کُت یک ءُ دومی گوشت اِش تو بجن ئِے گُڑا سَک گِریو ات ءُ کلمہ ونت بلے من ءَ نہ جت اِش بلکیں یلہ دات اِش ءُ شُت اَنت۔ من چمانی پُچ کُت ءُ دنیا تھار اَت من ھچ نہ دیست یک وَ سے ماہ بوتگ ءَ کہ منی چمّاں پٹی بندوک بوتگ بس مِس ءِ وھد ءَ دو ملٹ ءَ چم پچ کتگ اَنت اش بس دومی شپ ءِ سے ساھت اَت سیاھیں شپے اَت پمیشکا ھچ میم نہ بوگ ءَ اِت ءُ وھدے روچ دار آتک من وتی راہ دارگیتک آں ءُ بلے من ءَ انگت سما نہ بوت منی راہ گار اِنت!!

اے کسہ ھما دوستیں بلوچ نوجواناں یات کیت وھدے دبّوج ءِ آپبستگ ءِ ترماس ءَ مان کنگ ءَ بنت۔ گلامی ءَ پِٹ انت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔