TBP Balochi

دو لاش دزکپتگ، سَے بیگواھیں مردم یلہ کنگ بیتگ

دی بلوچستان پوسٹ

سر بیتگیں ھالانی رد ءَ شش مئی ءَ مند ءِ دمگ مھیر ءَ پاکستانی لشکر ءِ دست ءَ آوار جنگ بیتگیں تنگی ء ھاشم، ولی مھمد ء دودا ءُ نزیر ء دود ءَ گوستگیں روچ ءَ مند ءِ بنجل ءَ یل کنگ بیتگ ءُ وتی لوگاں سر بیتگ اَنت –

ھمے وڑ ءَ بلوچستان ءِ دمگ سبی ءَ دو جون دزکپتگ، ھردوکیں جوناں چَہ ھمے گمان کنگ بیگ اِنت بیگواھیں مردمانیگ اَنت –

بلوچستان ءَ ائید ءِ روچ ءَ ھم جونانی دزکپگ ءُ مردمانی آوار جنگ ءُ بیگواہ کنگ ءِ درچ برجاہ اِنت –

ھمے درگت ءَ بلوچ راجی رھشون ءُ بلوچستان لبریشن فرنٹ ءِ سروک ڈاکٹر اللہ نزر بلوچ ءَ وتی چاگردی رسانک جاہ ٹوئیٹر ءَ ٹویٹ کرتگ ءُ گْوشتگ کہ ائید ءِ روچ ءَ ھم بلوچستان ءِ سر ءَ زُلم ءُ زوراکی برجاہ اَنت –

آئی ءَ گْوشت ائید ءِ روچ ءَ پاکستانی لشکر ءَ گریشہ ھزدار ءَ بلوچ ورناہ آوار جتگ ءُ بیگواہ کرتگ اَنت ھمے وڑ ءَ سبی ءَ دو جون دزکپتگ، آئی ءَ ہیومن رائٹس آرگنائزیشن، یو این ءُ ایمنسٹی انٹرنیشنل ءَ چَہ لوٹ کرتگ بلوچستان ءَ بیوکیں زُلم ءُ زوراکیانی سر ءَ گامگیج بہ زور اِیت –

پنجگور ءَ ورنایے یل کنگ ءَ چیریں ادارھانی کارمنداں بیست لَک ءِ لوٹ کرتگ

دی بلوچستان پوسٹ

کھول ءِ رد ءَ پاکستانی ملٹری انٹیلی جنس ءِ کارمنداں مئے بیگواھیں ورنایے یل کنگ ءَ بیست لَک ءِ لوٹ کرتگ، مئے وس ءَ چَہ ڈن اِنت –

ٹی بی پی ءِ پتر ھال ءَ سر بیتگیں ھالانی رد ءَ روکپتی بلوچستان ءِ شھر سرکان ءِ جھمنند زاکر ء مھمد اَسا ھشت ماہ ءَ پیسر پنجگور ءِ بازار ءَ چَہ پاکستانی چیریں ادارھانی کارمندانی ھمراھی ءَ لشکری بیڑی ءَ دزگیر کنگ ءُ بیگواہ کنگ بیتگ –

زاکر ء مھمد اسا ءِ بارو ءَ دمگی مردمانی رد ءَ آ بازیں وھدے ءَ پنجگور ءُ سیمسری دمگ ءَ تیل ءِ باپاری ءَ ھوار ءُ یک گاڑی ءِ ڈرائیور بیتگ –

زاکر ءِ بیگواھی ءَ پد کھول ءَ بازیں براں پنجگور ءَ آئی ءِ یل کنگ ءِ ھاتر ءَ جھد کرتگ، ءُ کھول ءِ رد ءَ گڈی ءَ مارا سرپدی بیتگ کہ زاکر ملٹری انٹیلی جنس ”ایم آئی “ ءِ گور ءَ اِنت آ زاکر ءِ یل کنگ ءَ بیست لَک ءِ لوٹ ءَ کنگ اِنت –

کھول ءِ رد ءَ بازیں دزبندی کرتگ ءُ گْوشتگ ما نیزگاریں مردم ءِ اِنت ءُ بیست لَک ءِ مال دیگ مئے وس ءَ چَہ ڈن اِنت، بلے ایشی ءَ ابید زاکر ءَ یل کنگ ءَ نہ اِنت –

زانگ بہ بیت ایشی ءَ پیسر بلوچستان ءَ پاکستانی چیریں ادارھانی نیمگ ءَ چَہ بیگواھیں مردمانی یلہ کنگ ءَ زری لوٹ کنگ ءِ منّانک ھست اِنت –

دالبندین ءَ چَہ سِی اگست دوھزار ءُ شانزدہ ءَ لشکر ءِ دست ءَ آوار جنگ بیتگیں ھَپیز اُلا مھمد ھسنی ءِ مات ءَ ھبدہ نومبر دوھزار ءُ ھژدہ ءَ شال ءِ پریس کلب ءِ دیم ءَ برجاھیں زھرشانی بنجل ءَ گْوشتگ اَت آئی ءِ چُک ایپ سی ءِ میجر نوید ءَ کلی کاسم ھان ءَ دزگیر کرتگ ءُ بیگواہ کرتگ –

بیگواھیں ھَپیز مھمد ھسنی ءِ مات ءَ ھما وھد ءَ گْوشتگ اَت چُک ءِ بیگواھی ءَ پد میجر نوید ءَ مارا شال ءَ لوٹائینتگ ءُ چُک ءِ یل کنگ ءَ شَست ءُ ھشت لَک لوٹ کرتگ –

آئی ءَ گْوشت کہ ما وتی مال ءُ مڈی بھار کرتگ ءُ وتی مردمانی گور ءَ پِنڈ ءُ سِنڈ کرتگ ءُ میجر نوید ءَ شست ءُ ھشت لَک کلدسر داتگ ءُ میجر نوید ءَ مارا زبان کرتگ کہ سَے روچ ءَ پد ھپیز ءَ شمئے گون ءَ گپ ءَ پرمایاں –

ھپیز مھمد ھسنج ءِ بیگواھی ءُ زرانی گرگ ءَ پد پاکستانی لشکر ءَ بیست ءُ یک اگست دوھزار ءُ نوزدہ ءَ یک جارانکے شنگ کرتگ ءُ گوشتگ کہ ملٹری کورٹ ءَ جاڑیگیں میجرے وتی واک ءِ رد کامردی ءِ سر ءَ آئی ءِ ملازمت ءَ ھلاس کنت ءُ آئی ءَ اُمر ءِ گید کنگ ءِ پرمان کنگ بیتگ، کہ ایشی ءِ پرمان مزن اُرد ءِ سرکمان جنرل کمر جاوِد باجوہ ءَ کرتگ –

لشکر ءِ ھمبستگین(آئی ایس پی آر) ءِ نیمگ ءَ شنگ بیتگیں بیان ءَ میجر ءِ ھلاپ ءَ گامگیج کانود ءِ رھبندانی رد ءَ چِست کنگ بیتگ – اے ٹاہ دیگ بیتگ کہ پاکستانی لشکر ادارھانی منّوک ءُ آیانی پلامرزی ءِ سر ءَ اوست داریت –

نبشتانک: ائید گُلامیں کوم ءِ واست ءَ نہ اِنت

نبشتہ کار : شمیم بلوچ

دی بلوچستان پوسٹ

ائید یک مزنیں وشی یے پہ ھر کس ءَ بلے پہ گُلامیں کوم ءِ واست ءَ نا ،، ائید شادھانی روچ اِنت ائید وتی دلے ٹکرانی امبازگ ءِ روچ اِنت ائید یک شوکیں مارشت ءِ دیمروی ءِ روچ اِنت آئید یک مچی یے ءِ روچ اِنت گوں ھمایاں کہ ما گار کُتگ اَنت، ما آیاں لوٹیں بلے مارا نہ رس اَنت، ما آیاناں یک انچیں پیمے ءَ گار کُتگ اَنت ۔ کہ آ مارا کدی ائید کنگ ءَ نیل اَنت۔

ائید وتی جاہ ءَ مارا وشھال بُوَگ ءَ نیل اَنت ھما کہ بازیں وھدے بیت گار انت ھما ٹاچر جاھاں ۔۔۔۔۔۔۔

چیزے ھما کڈ ءُ کورانی توک ءَ کُنٹ نھاراں وارتگ اَنت، ھما کہ مئے ڈیھ شھید کنگ بوتگ اَنت ھما کہ مئے دیم ءَ برگ بوتگ اَنت ۔۔۔

کجام مات ائید بہ کنت کجام چُک ائید بہ کنت کجام گھار ائید بہ کنت۔۔۔۔

اِے ھما درد اَنت مارا اَئید کنگ ءَ نیل اَنت۔
مارا وشھال بُوَگ نیل اَنت ۔۔۔
ھر روچ ھر ساھت ءُ دمان مارا گریواین اَنت۔۔۔۔۔۔

گُلامی ءُ گریبی۔۔

ما گُلام ایں، ما ایردست ایں، ما لگتمال کنگ بوتگ ایں مئے ھک پہ زور برگ بوتگ ما زلیل کنگ بوتگ ایں ، مئے لوگ سوچگ بوتگ اَنت، ما دران ڈیھ کنگ بوتگیں ما چہ دوست ءُ ازیزاں واھگاں جتا کنگ بوتگیں۔۔مئے وشی برگ بوتگ اَنت ما کجا ائید کُت کنیں۔۔

مئے ھمساھگ گژن ءَ زر اَنت آ کجا ائید کن اَنت مں کجام شرم ءَ ائید کُت بہ کن آں ۔۔۔
مئے ائید کہ ھون ءِ ارس شل اَنت ما نوکیں پوشاک پر کنیں نوکیں گڑیال دست ءَ بندیں۔۔۔۔۔۔چون بیت مئے ائید ما گُلام ایں۔۔۔۔۔۔۔ ۔۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بس ندارہ بچار

آھوگ گُل

دی بلوچستان پوسٹ

مھر وھدے وپا ءِ نگاھاں کپیت
سنگتی دوستی گاریں راھاں کپیت
نیکیں نیّت دل ءِ نکس ءُ سیت ءَ کپیت
سُجدگ ءَ سر پہ لالچ مسیت ءَ کپیت
بس ندارہ بچار

شپ تا چمّاں نہ کنت بند روچ ءِ تب ءَ
داں کہ کینگ نزانت کینگ ءِ متلب ءَ
دانکہ ننگ ءَ پہ گیرت نکنت زِرد تئی
دوزہ ءِ چارگ ءَ جنت چاگرد تئی
بس ندارہ بچار

ناں من ءَ پکر تئی ناں ترا مئے ھیال
بس گوز انت زار ءُ زِد روچ ءُ شپ ماہ ءُ سال
درد ءُ گم پہ ھسد دست ماں دست باں
پہ شگان ءُ ھبر تئی کدم چِست بنت
بس ندارہ بچار

پرچی ءَ؟ جنگ پہ ساھگاں ما ءُ تو
یکّیں راہ ءِ مساپر اگاں ما ءُ تو
آزمان ءُ زمین ءِ اے دوری چی ءَ؟
آھنیں باسکاں چو نزوری چی ءَ؟
بس ندارہ بچار

دود ءُ شھدیں زبان جنگ باھوٹ مئے
چی اِنت منزل بچار چی گرز لُوٹ مئے
مارگ ءُ پھمگ ءِ چی گلگ ھمبلاں
گُل وت ءَ گُنگ کن ھچ مہ گُش جاھلاں
بس ندارہ بچار

یونائٹیڈ بلوچ آرمی ءِ جارکش مرید بلوچ ءَ کولواہ آواران ءَ گوستگیں روچ ءَ شھید بیتگیں سرمچاراناں سھر چکیں دروت ندر کرتگ ءُ گْوشتگ کہ شمبے ءِ روچ ءَ پاکستانی لشکر ءَ آواران ءِ دمگ کولواہ جت بازار ءَ بلوچ سرمچارانی دیم پہ دیمی بیتگ اَنت، ءُ زورگریں لشکر ءُ بلوچ سرمچارانی میان ءَ جنگ بندات بیتگ کہ کم چَہ کم دو ادار ءَ جنگ برجاہ بیتگ -بلوچ سرمچاراں بامردی ءَ گوں جنگ کنان ءَ زورگریں لشکر ءَ را ھم تاوان داتگ –

جارکش ءَ گْوشت کہ شھیدیں سرمچار کامریڈ اسد ھسن پنام ءِ کامریڈ بالاچ ریجن ءِ سیکنڈ کمان بیتگ ءُ راشد رمزان پنام ءِ سوبین بلوچ گل ءِ بنجل ءِ کمان بیتگ –

مرید بلوچ ءَ کامریڈ اسد ھسن ءُ سوبین بلوچ گوستگیں سَے سالاں چَہ یو بی اے ءِ پتر ءَ ھوار بیتگ اَنت ءُ راجی آجوئی ءَ اوپاری جد ءُ جھد ءَ بھر مند بیتگ اَنت ءُ بے کساسیں رنگے ءَ وتی اندومیں دروشم ءَ راجی زمہ واریاں پیلو کنگ ءَ بیتگ اَنت، ءُ سلاہ بندیں راھے راہ ءُ رھبنداں ترندی ءَ اوشتوک بیتگ اَنت شمبے ءِ روچ ءَ دشمن ءِ اُرشی ءَ درکپتگ اَنت بلے شست جاھی ءَ پیسر دشمن بازیں کَچے ءَ دمگ انگیر ءَ کرتگ ءُ سنگت شھید کرتگ اَنت –

جارکش ءَ گْوشت کہ مئے گل شھید اسد جسن پنام ءِ کامریڈ بالاچ ءُ سوبین بلوچ ءِ ھردوکانی بامردی ءُ جنگی کارانی سر ءَ گل جوانیں نام زھم جن ءَ شکسائیت ءُ شھیدانی کھول ءُ بلوچ راج ءَ گوں اھد کنت شھیدانی ھوناں ھاکانی تہ ءَ ھُشکی ءَ نیل اِنت ھررنگ ءَ ایشانی ھساب گرگ بیت درستیں بلوچ شھیدانی ھون ھاکانی تہ ءَ ھُشک نہ بنت یک روچے ءَ الم دنیا ءِ دیم ءَ آزاد بلوچستان یک ڈیھے ءِ بستار ءَ زانگ بیت ءُ وتی شھیدانی دیتگیں واب سرجم بنت –

یو بی اے ءِ جارکش مرید بلوچ ءَ گْوشت کہ شھید کامریڈ اسد ھسن پنام ءِ کامریڈ بالاچ بلوچ ءَ وتی راجی جھد سیاسی پارٹی بی این ایم ءَ چَہ بندات کرتگ ءُ شھید کامریڈ بی این ایم آواران ھنکین بازیں اُگدواں بندوک بیتگ ءُ آ یک زمہ وار ءُ ھزمتگاریں مردمے بیتگ شھید کامریڈ دوھزار ءُ نُھ ءَ بلوچ راجی سلاہ بندیں جنز ءَ گوں بھر مند بیتگ شھید اسد بلوچ گل ھں ریجن سیکنڈ کمان بیتگ شھید کامریڈ بلوچ یک بامرد ءُ ایمانداریں سنگتے بیتگ، کامریڈ اسد بلوچ ءَ بلوچستان ءِ بازیں دمگ دشت، زامران ءُ آواران ءَ بازیں زمہ واری پیلو کرتگ اَنت اے دمگاں بازیں جنگانی میان ءَ دشمنیں لشکر دیم پروش کرتگ ءُ بازیں جنگ کرتگ اَنت –

شھید راشد رمزان پنام ءِ سوبین بلوچ ءَ وتی جھد بی ایس او آزاد ءَ چَہ بندات کرتگ شھید سوبین بلوچ بی ایس او آزاد ءِ یک سوبمند ءُ جوانکاریں باسکے بیتگ، بی ایس او ءَ چَہ پارگ بیگ ءَ پد وتی راجی ترامگامیانی برجاہ کنگ ءَ شھید سوبین ءَ بلوچ راجی پاٹی بی این ایم ءَ ھوار بیتگ – شھید سوبین بلوچ بے کساس ھزمتکار ءَ جھد کنوکیں مردمے بیتگ -شھید سوبین بلوچ دو ھزار ءُ نُھ ءَ بلوچ سلاہ بندیں جنز ءِ بھر بیتگ، شھید سوبین گل ءِ بنجل کمان ءِ اگدو ءَ بیتگ شھید ءَ بلوچستان ءِ تیابدپی دمگ ءُ آواران ءِ جتائیں زمہ واریاں داروک بیتگ، شھید یک ایماندار ءُ بامردیں مردمے بیتھ اے دمگاں شھید سوبین ءَ بازیں جنگ کرتگ اَنت –

شال ءَ ائید ءِ روچ ءَ بیگواھیں مردمانی واستا زھرشانی

دی بلوچستان پوسٹ

بلوچستان ءَ زورانسری بیگواھیانی کَچ دو دھک ءَ چَہ برجاہ اِنت -نواب اکبر ھان بگٹی ءِ شھیدی ءَ پد زورانسری مردمانی بیگواہ کنگ ءُ چریشی ءَ پد آیانی لَٹ شاپ کرتگیں جونانی دزکپگ بندات بیتگ –

وائس فار بلوچ مسنگ پرسنز یک دھکے ءَ چَہ گیش زورانسری بیگواہ کرتگیں مردمانی واستا زھرشانی کنگ اِنت -گل ءِ نیمگ ءَ شال ءُ کراچی ءِ پریس کلبانی دیم ءَ ھمک وھد ءَ زھرشانی بیگ اِنت وھدیکہ شال داں کراچی داں اسلام آباد ءَ گل ءِ مردماں پندی روان بُریتگ –

بنجاھی شھر شال ءَ مروچی کسانوکیں ائید ءِ روچ ءَ ھم وی بی ایم پی ءَ پریس کلب ءِ دیم ءَ زھرشانی کرتگ – ایشی ءِ ھمراھی ءَ بیگواھیں مردمانی زھرشانی بنجل ءَ 3ھزار9سد ءُ شست ءُ ھشت روچ سرجم بیتگ –

زھرشانی ءَ بلوچستان ءَ چَہ جتائیں دمگاں سیادی کنوکیں بیگواھیں مردمانی کھولاں بھر زرتگ – زھرشانی ءِ سروکی وائس فار بلوچ مسنگ پرسنز ءِ کسان کمک سرکماش ماما قدیر بلوچ ءَ کرتگ وھدیکہ ہیومین رائٹس کونسل آف بلوچستان ءِ بی بی گل بلوچ ءُ بلوچستان نیشنل پاٹی ءِ شمائلہ اسمائیل ءُ دگہ مردماں بھر زرتگ –

وائس فار بلوچ مسنگ پرسنز ءِ رھشون ماما قدیر بلوچ ءَ گْوشت کہ ھمک سالانی وڑ ءَ اے سال ءَ ھم بیگواھیں مردمانی کھول وتی دوستیگیں مردمانی یلہ کنائینگ ءَ زھرشانی کنگ ءَ اَنت پرچاکہ دوستیگیں مردمانی دوری ءَ ھچ کسے ءِ ائید ءِ وشی سرجم بیت نہ کن آں –

آئی ءَ گْوشت کہ اے ائید ءِ وھد ءَ بیگواھیں مردمانی یل کنگ ءَ ابید گیشی گندگ پیداک اِنت -ھزارانی بیگواھیں مردمانی واستا جوانیں گام گندگ بیگ ءَ نہ اِنت -میان اُستمانی ادارہ اے درگت ءَ وھد پہ وھد ءَ گپ کنگ ءَ اَنت بلے آیاں جوان ءُ مھکمیں رنگے ءَ گامگیج زورگی اِنت –

ماما قدیر ءَ گْوشت کہ میان اُستمانی ادارہ پاکستان ءَ زری کمک ءَ ابید ایشی ءِ سر ءَ کڈن کنگی اِنت انسانی ھکانی لگتمالی ءِ سر ءَ بندش جنگی اِنت –

شال ءِ پریس کلب ءِ دیم ءَ کھولانی دست ءَ وتی دوستیگیں بیگواھیں مردمانی اکس بیتگ ءُ بیگواھیں مردمانی یلہ کنائینگ ءِ اوگام جتگ –

بی این پی ءِ شمائلہ اسمائیل ءَ ھمے وھد ءَ گْوشت کہ مارا گوشگ بہ بیت کہ اے مردمانی چی کسور بیتگ کہ بیگواہ کنگ بیتگ اَنت ءُ اے مردماں چی ءَ آمدگساں پیش کنگ ءَ نہ اِنت –

شمائلہ اسمائیل ءَ گْوشت کہ مارا وتی دوستیگیں مردمانی مانشجاھانی باور ءَ سرپدی نیست بلے ما اے زھرشانی ءِ بارو ءَ سرپدی داریں ھمے سوب اِنت کہ ما زالبول کائیں اِد ءَ وتی رنج ءُ گماں تالان کن ایں تانکہ ما وتی توار ءَ میان اُستمان ءَ سر بہ کن ایں –

چریشی ءَ پد نوکیں کاھان ءَ ماما قدیر بلوچ ءِ سروکی ءَ مانشجاھانی سر ءَ روگ ءُ اود ءَ شھیدانی ابدمانی ءِ وش دروھتی ءَ دوا کنگ بیتگ –

ھمے وھد ءَ ماما قدیر بلوچ ءَ گْوشت کہ اے ھما شھید اَنت کہ چیریں ادارھانی مردماں برتگ اَنت ءُ لَٹ شاپ کرتگیِ جون دور داتگ ءُ لھتے ھنچیں شھید اے مانشانی تہ ءَ واب اِنت کہ آیانی جون بے کساس ءَ لٹ دیگ ءُ دور دیگ بیتگ اَنت ءُ چریشی ءِ سوب ءَ پجار ھم نہ بیتگ اَنت –

آئی ءَ گْوشت کہ من انسانی ھکانی ادارھاں دلگوش کنگ لوٹ آں کہ بلوچ شھیدانی مانشانی شَت ھم دور دیگ بیگ ءَ اَنت ءُ ریاستی ادارھانء نیمگ ءَ مانشانی کمشرپی بیگ ءَ اِنت –

کورونا وائرس ءَ انڈیا ءَ یک روچے ءِ تہ ءَ بازیں نادراہ

سر بیتگیں ھلانی رد ءَ سرجمیں دنیا ءَ کورونا وائرس ءِ آماچ بیتگیں مردمانی کَچ پنجاہ ءُ سَے لَک ءَ چَہ گوستگ ءُ سَے لَک ءَ چَہ گیش مردم بیران بیتگ اَنت –

پاکستان ءَ وائرس ءِ گورجتگینانی کَچ پنجاہ ءُ پنچ ھزار ءَ چَہ گیش ءُ بیران بیتگیں مردمانی کچ یازدہ سد ءَ سر بیتگ اَنت –

اے وھد ءَ کووڈ 19 ءَ درستاں چہ گیش اسرمند امریکہ اِنت کہ اود ءَ پانزدہ لَک مردم کورونا وائرس ءِ آماچ اِنت –

سر برزانی تہ ءَ دومی نمبر ءَ برازیل اِنت کہ اود ءَ گورجتگیں مردم روچ پہ روچ گیش بیان اَنت وھدیکہ برتانیہ ءَ وائرس ءَ بیرانیانی تہ ءَ دومی نمبر ءَ اِنت –

چین ءِ سر وزیر ءَ آیوکیں وھدانی سر ءَ زرکاری ءُ پیداوری ءِ تہ ءَ کمی ءِ بازیں پدری درشان کرتگ اَنت –

ھندوستان ءَ کورونا وائرس ءِ ھمراھی ءَ ابرمی توپان ءَ ھم جیڑہ ودینتگ اَنت –

گوستگیں یک روچے ءِ تہ ءَ پاکستان ءَ کورونا وائرس ءَ دوھزار ءُ یک سد مردمانی نوکیں کیس دیم ءَ اتکگ –

پاکستان ءَ کورنا وائر ءَ درستاں چَہ گیش ھیبر پکتونواہ ءَ اسرمند بیتگ اَنت کہ اود ءَ داں انیگ ءَ سَے سد ءُ ھشتاد ءُ نُہ مردم بیران بیتگ اَنت –

پاکستان ءِ مسترین اُستان پنجاپ ءَ سھب ءِ ساھت نُہ ءَ داں شپ ءِ ساھت دَہ ءَ نھاد جاہ کنگ بنت کہ اود ءَ تنی وھدی نوزدہ ھزار مردم وائرس ءَ گورجتگ اَنت –

ھمے وڑ ءَ اسرمندینانی تہ ءَ سندھ ھم ھوار اِنت کہ اود ءَ وائرس ءَ گورجتگیں مردمانی کَچ بیست ءُ دوھزار ءَ سر بیتگ اَنت

پاکستان ءِ اُستان پنجاپ ءَ نوزدہ ھزار ءُ پنچ سد ءُ پنجاہ ءُ ھپت، سندھ ءَ بیست ءُ دوھزار ءُ چار سد ءُ نود ءُ یک، ھیبر پکتونواہ ءَ ھپت ھزار ءُ شش سد ءُ ھشتاد ءُ پنچ، بلوچستان ءَ سَے ھزار ءُ سَے سد ءُ سَے، اسلام آباد ءَ پانزدہ سد ءُ نود ءُ دو، بلتسان ءَ شش سد ءُ نوزدہ، پاکستان ءِ زیردستیں کشمیر ءَ یک سد ءُ نود ءُ ھپت، بیرانی کچ یازدہ سد ءُ چِل ءُ ھپت ءَ سر بیتگ ءُ ھبدہ ھزار ءُسَے سد ءُ چِل ءُ دو مردم وش بیتگ اَنت –

مانگیشتگیں این ایف سی

ٹی بی پی شونگال

دی بلوچستان پوسٹ

دوازدہ مئی ءَ پاکستان ءِ سروک (صدر) ءَ آئین ءِ لوٹ دیرگوست ءَ چہ سرجم کُت اَنت، دھمی راجی مڈی کمیشن (این ایف سی) اڈ دات، کہ بنجاھی پتر (وفاق) ءُ بھرانی (اُستانانی) نیام ءَ زرانی آسراتی ءِ بھر کنگ ءِ ھستیں وڑ ءُ پئیم ءِ سر ءَ جیڑگ ءَ پد وتی نوکیں دزبندی ءَ دیم ءَ کاریت۔

بنجاھی پتر ءِ لائکیں بھر بیوکیں پول ( ڈویزیبل پول) ءِ تہ ءَ وتی ھاتر ءَ گچین کُتگیں بھر ءَ گوستگیں این ایف سی ءِ منگ بیتگیں بھر ءَ چہ گیشتر ودینت نہ کنت، ایشی زمانداری ءِ ھشدمی بدلی ھم دنت کہ
بنجاھی پتر ءَ 42.5 ءُ اُستاناں 57.5 درسد بھر رس اِیت ۔ اے بھر ءِ تہ ءَ گیشی آرگ ءِ ھاتر ءَ بنجاھی پتر ءَ رھبند (آئین) ءِ تہ ءَ بدلی آرگ لوٹ اِیت کہ یک گرانین کارے ءِ کنگ اَنت ءُ اے گپ ءِ باز گمان ھست کہ اے کار ءِ پُشدر ءَ یک نوکیں راجداری جیڑہ ءِ پیداک بیت کَنت۔

زانت کارانی رد ءَ کجام ھم گمانی راجداری جیڑہ ءَ چہ وت ءَ رکینان اَنت ، بنجاھی پتر ءِ برز ءُ جھلی ءِ بھر ءُ بانگ ءَ ابید کش ءُ کِر ءِ بھر ءُ بانگ ءَ نشانگ کن اَنت دانکہ اُستان ءَ چہ بھراں رکینگی بہ بیت، راجی گھبودی ءِ شَوربندی، جھانی لس ءُ گلگت ءُ کشمیر ءِ دیمروئی ءَ بھر بہ دی اَنت آ کہ مدامی ءَ سرجم ءَ بنجاھی پتر ءِ بھر ءَ چہ دیگ بیتگ اَنت ءُ اُستان اے درگت ءَ کمک کنگ ءِ زمہ وار نہ اَنت۔

بلوچستان ءِ این ایف سی ءِ پیسرگیں نمائندگ نامی ئیں پیداوری ءِ زانتکار ڈاکٹر قیصر بنگالی ءَ پاکستانی روتاک ‘دی نیوز’ ءَ گوں کچ ءُ کساس پیش داران ءَ گوشت کہ اگاں سرجمیں 99 درسد ءَ پانزدہ درسد کُشگ بہ بیت گُڑا اُستانانی بھر وت 57.5 چہ کپان ءَ 39.6 پشت کپ اِیت۔

بھر ھال، کجام ھم اُستان اے گپ ءَ وشی ءَ جاڑیگ نہ اِنت نا کہ اُستانانی بھر ءِ 57.5 درسد ءَ چہ 15 درسد کشگ بہ بیت ءُ اُستانانی نیام ءَ پہ بھر کنگ ءَ تھنا 39.6 درسد پشت بہ کپ اِیت۔ سر بری ءَ انچو گمان بیگ ءَ اِنت کہ اُستانانی منارینگ ءِ ھاتر ءَ ھمراھے درگیجگ بیتگ ۔

پہ درور، بلوچستان ءِ نمائندگی کنوک ءُ آئی ءِ (کیس) ءَ “مڑگ” ءِ ھاتر ءَ اُستانی وزیر ءِ ھزانگ ظھور بلیدی ءِ پجیگ ءَ جاوید جبار نامیں نبشتہ کارے یک تکنیکی زانتکاری ءِ ھساب ءَ گچین کنگ بیتگ۔

جاوید جبار ءِ گچین کنگ ءَ نا تھنا لس مردم ءُ اپوزیشن ءِ تہ ءَ ناوشی ءَ گوں چارگ بیگ ءَ اِنت، بلکہ سرکار ءِ کرسیانی سر ءَ نیشتگیں راجی اسمبلی ءِ باسکاں ھم ایشی ءِ سر ءَ وتی زھرشانی درشان کُتگ اَنت۔

گوادر- لسبیلہ ءِ دمگ ءَ گچین بیتگیں بنجاھی پتر ءِ باسک اسلم بھوتانی ءَ آمد گِس ءَ جاوید جبار ءِ گچین کنگ ءِ ھلاپ ءَ پٹیشن ھم داتگ ۔ آئی ءِ رد ءَ جاوید جبار یک شریں ادب زانت ءُ نبشتہ کاریں مردمے بیت کنت، بلے آئی گوں پیداوری ءَ ھچ وڑیں سیادی ءِ گندگ نہ بیت، ءُ بلوچستان ءِ مپاداں گوں ھچ وڑیں جزباتی ےِ نزیک ءَ نیست۔

پرچاکہ چُشیں یک مردم ءِ نامینگ بیتگ، کہ آئی ءِ سیادی نہ بلوچستان ءِ گون ءَ اِنت ءُ نہ آ بلوچستان زرکاری جاورءُ نگیگی آں چہ آشنا اِنت؟ زانت کارانی رد ءَ چُشیں مردمانی گچین کنگ “ تاگت ورانی” نیمگ ءَ چہ تھنا پہ “ ھئو واجہ” کنگ ءِ ھاتر ءَ بیتگ، دانکہ اُستانانی بھر ءَ چہ اگاں شئے ءِ رؤت ھم پد ءَ ھم اے ھچ مہ گُش اَنت۔

اے سرجمیں جیڑھانی تہ ءَ چم جھلی ءُ پشیمانی دیمپانی بلوچستان ءِ سرکار ءَ کنگ کپ اِیت، چہ ایشی ءَ پیسر ءَ بلوچستان چہ سک کسانوکیں بھر ءَ چہ ھم گیشتر زبھر کنگ بیت بزان 5.17 درسد کستر کنگ ءُ 4.39 درسد پشت کپ اِیت بلکیں مستریں جیڑگی گپ ایش بیت کہ ھما زر پہ وانگ ءُ جان سلامتی ءِ پِڑ ءَ ھرچ کنگ بہ بنت، رند ءَ آ زر ھم پھریزوکیں ترامگیجاں دیگ بنت، ھما ترامگیج کہ آیانی سر ءَبلوچستان ءَ جنگی جرمانی ءِ تہ ءَ ھوار بیگ ءِ بھتام جنگ بیت ۔