TBP Balochi

رسانکدراں ھمراھانی نمیرانی پاکستانی ڈاھانی بے بنیں پندلے، براس

دی بلوچستان پوسٹ

چار بلوچ سلاہ بندیں آجوئی لوٹوکیں گل بلوچ لبریشن آرمی، بلوچستان لبریشن فرنٹ، بلوچ ریپبلکن آرمی ءُ بلوچ ریپبلکن گارڈ ھم سنتی بلوچ راجی آجوئی سنگر (براس) ءِ جارکش ءَ رسانکدراں شنگ کُتگیں درشان ءِ تہ ءَ وتی گل ءِ سرمچارانی نمیران بیگ ءِ ھال پاکستانی پوج ءِ پندل سازی گُشان ءَ اے گپ رد کُتگ ۔

بلوچ خان ءَ شنگ کُتگیں درشان ءَ گُوشتگ براس ءِ ھم سنتیں گلانی نیمگ ءَ چہ بلوچستان ءَ پاکستانی پوج ءُ آئی ءِ چاریگانی سر ءَ اُرشانی تہ ءَ ترندی ءُ آیاں مزنیں کساسے ءَ تاوان رسگ ءَ پد دشمنیں پوج گوستگیں دو ھپتگاں چہ رسانکدراں یک نوکیں بے پندل سازی ءِ بندات کُتگ ۔ ھمیشی ءِ سوب ءَ اے ھال شنگ کنگ بیگ ءَ اِنت کہ دشمنیں پوج ءَ یک مزنیں بیڑ ءِ بنگیج کُتگ، سرمچارانی راہ بستگ، ءُ کمانڈران ھوار بازیں سرمچار نمیران ءُ دزگیر کُتگ اَنت۔ اے وت سریں ءُ بے بنیں دروگانی کامیات کنگ ءِ ھاتر ءَ، پیسر ءَ چہ بلوچ آجوئی لوٹوکانی نیمگ ءَ رسانکدر ءَ شنگ بیتگیں نمیرانی ءِ گپ سھرا وتی داشتگیں رسانکدرانی تہ ءَ پیش دارگ ءَ اَنت ءُ گوشگ بیگ ءَ اِنت اے سرمچار نوکتریں آپریشنانی تہ ءَ شھید کنگ بیتگ اَنت۔

براس اے درستیں گپاں رد کنت، براس ءِ کجام ھم ھم سنتیں گل ءِ یک ھم سرمچار اگاں کمانڈرے اے آپریشنانی تہ ءَ نا نمیران بیتگ ناکہ دزگیر،

بلوچ خان ءَ گیشتر گوشت کہ پاکستان چہ اولی روچ ءَ دروگ ءُ وت سریں پندل سازی ءِ کمک ءَ زیرگ ءُ بلوچستان ءَ وارتگیں وتی تاوانان چیر دیگ ءَ اِنت، ءُ راستی ءَ ابید کامیاتی ءِ مزن مزنیں بٹاک جنگ ءَ اِنت، کہ ایشانی تہ ءَ جتائیں وھداں بازیں بلوچ رھشونانی نمیرانی ءِ دروگیں ھال شنگ کنگ ھم ھوار اَنت، کہ رند ءَ رسانک ءِ تہ ءَ رد منّگ بیتگ اَنت۔ ایشی ءِ مول یک نیمگے بلوچستان ءَ ڈیوٹی کنوکیں تُرس آماچیں پوج ءِ دل ءَ چہ تُرس ءَ کَشَگ ءُ آیانی دل بڈی کنگ اِنت، ءُ دومی نیمگ ءَ میان اُستمانی زرکارانی دیم ءَ بلوچستان ءِ تہ ءَ ایمنی ءُ مھکمی پیش دارگ اِنت۔

براس اے رند ءَ پاکستانی پوج ءِ دروگیں پندل سازی ءَ اے درشان ءِ دروشم ءَ پسہ دیگ پمیشکا المی سرپد بیت کہ انیگیں پندل سازیانی پُشت ءَ چیریں راستی پدر بہ بیت۔ ما پاکستانی پوج ءِ بیڑ برگ ءِ گپاں رد نہ کنیں، اے وھد ءَ بلوچستان ءِ جتاجتائیں دمگاں آپریشن برجاہ اِنت بلے اے آپریشن بلوچ سرمچارانی دست ءَ پروش ورگ ءَ پد لس بلوچ مھلوکانی سر ءَ کنگ بیگ ءَ اَنت – دشمنیں پوج دیر ءُ درازیں بلوچ میتگانی بندگ مردماں مزنیں کساسے ءَ بیگواہ کنگ ءَ پد آیانی میتگاں ماندراگ ءَ اِنت۔ ایشی ءَ ابید پیش ءَ ھم پاکستانی پوج ءِ آپریشن ءِ ھالانی شنگ بیگ ءَ پد پیسر ءَ چہ بیگواہ کُتگیں بلوچ سیاسی جھد کار نمیران کنگ ءُ آیانی جون ھمود ءَ دور دیگ ءُ سلاھبندیں گلانی باسک پیش داشتگ اَنت ئِے یا اگاں بیگواھیں مردمانی دیم ءَ آرگ ءُ اے گُشگ بیتگ کہ اے چہ ھمے آپریشنانی تہ ءَ دزگیر کنگ بیتگ اَنت، گواچن ءَ چُشیں بیگواھیں مردمانی درستیں کاگد ھم ھست بنت۔ ایشی ءِ مول بے میاریں سیاسی جھد کاراں کشگ ءُ دروگیں سوبمندی ءِ بٹاکاں ھوار، بیگواھیں بلوچانی ھاتر ءَ جنزوکیں جھد ءَ تاوان بار دیگ اِنت۔

پوج ءِ انیگیں پندل سازی یکشلی ءَ چہ، یک برے پد ءَ اے گپ ءِ گمان ھست کہ گوست ءِ وڑ ءَ بیگواھیں بلوچ سیاسی جھد کاراں شھید کنگ ءَ پد، آیاں دروگی ءِ بنیاد ءَ جنگ ءِ تہ ءَ نشانگ بیتگیں پیش دارگ ءِ جھد ءَ اِنت ۔

بلوچ خان ءَ گیشتر گوشت کہ بلوچ سرمچار نمیرانی ءَ پہ وت ءَ یک مزنیں پھر ءِ سرپد بنت، ھمک سرمچار شھیدی ءِ جزبگ ءَ چکار اِنت ءُ گوں دشمن ءَ جنگ ءِ میدان ءَ دیم پہ دیم اِنت۔ دشمنیں پوج ءِ وڑ ءَ نمیرانی مئے سنگتانی ءُ مئے راج ءِ اوست ءَ پروش نہ دنت بلکیں گیشتر مھکم کنت۔ پمیشکا ما وتی ھمک سنگت ءِ نمیرانی ءَ منّیں ءُ وتی راج ءَ ھم سرپد کن ایں۔ گون اے درشان ءَ ما جتا اِنت ءُ رسانک ءَ داں اے کلوہ ءَ سرکنگ لوٹ ایں کہ مئے کجام ھم سنگت نمیرانی ءِ ھال ءِ درگت ءَ زانگ ءِ ھاتر ءَ مئے جند ءِ رسانکدرانی ودار ءَ بہ کن اَنت۔ اگاں ما کسے ءِ نمیرانی ءِ گپ نہ من اِتگ ءُ کجام یک رسانک ترامگیج، مردمے ءَ اگاں رکینگی اھوالانی سر ءَ سرپدی داروکیں گل ابید چہ دلجم کنگ ءَ پاکستانی پوج ءِ گپانی پندل سازی ءِ ریپکاں دیم ءَ بارت، گُڑا آئی ءَ ھم پاکستانی پوج ءِ پندل سازی ءِ گوات دیوکیں مشن ءِ بھر سرپد بہ ایں –

ٹی بی پی ءَ سر بیتگیں ھالانی رد ءَ نوشکی ءَ دگ ءِ ویل ءَ یک مردمے بیران بیتگ ءُ چار زدگ بیتگ اَنت –

لیویز بنشون ءِ رد ءَ نوشکی ءِ دمگ جنگلات ءَ مزن شھدگ ءَ ترند روکیں مساپر بریں پیک اپ گاڑی ءِ چپ بیگ ءَ نیمت اُلا بیران بیتگ ءُ ھلیل اھمد، سنا اُلا، نجم الدین نورشاہ زدگ بیتگ اَنت۔

لیویز ءَ بیران ءُ زدگ بیتگین مردم چِست کرتگ ءُ نادراہ جاہ ءَ سر کرتگ اَنت اود ءَ اژدری چار ءُ ٹپاس ءَ پد جون کھول ءِ گور ءَ سر کنگ بیتگ-

زانگ بہ بیت کراچی ءُ بلوچستان ءَ رؤکیں جتائیں جاھاں دگانی سر ءَ ھمک وھد ءَ ناوشیں ویل بیگ ءَ اَنت –

دمگدارانی رد ءَ ویلانی گیشتر سوب دگانی پُرشت ءُ پروشی دومی گاڑیانی ڈرائیور بے کساس راہ ءَ نادلگوشی کن اَنت چریشی ءَ چَہ سواریں مساپرانی جان چَہ زندمان ءَ چُٹ اِت –

سر بیتگیں ھالانی رد ءَ دشت ءِ دمگ کمبیل ءَ پاکستانی پوج ءَ بیڑ برتگ ءُ بازار پَٹ ءُ پول کنگ ءَ پد لوگانی کروجگ بندات کرتگ –

دمگی مردماں ٹی بی پی ءَ گوں گپ کنان ءَ گْوشت کہ پاکستانی پوج ءَ مروچی سھب ءَ مھلہ دشت ءِ دمگ کمبیل ءَ بیڑ برتگ ءُ سرجمیں بازار ءِ پَٹ ءُ پول ءَ پد ڈاکٹر گلام رسول ءِ بندیں لوگانی کروجگ بندات کرتگ –

دمگی مردمانی گوشگ اِنت کہ لشکر ڈاکٹر گلام رسول ءِ بستگیں لوگاں کروجگ اِنت ءُ آیانی گاڈر ءُ دگہ ازباباں ھم گون وت برگ اِنت ءُ لشکر ءَ میتگ ءِ مردم پہ زور گِپتگ ءُ کار بستگ اَنت ءُ لوگانی گاڈراں کَشگ ءُ گاڑیاں کنگ ءَ اِنت –

دمگی مردمانی رد ءَ دو رند ءَ پیش ھم پاکستانی پوج ءَ ڈاکٹر گلام رسول ءِ لوگ مانداشتگ اَنت –

چریشی ءَ پد ڈکٹر گلام رسول ءَ میتگ ءَ چَہ لڈ ءُ بار کرتگ ءُ در پہ دری ءِ زند ءَ گوازینگ ءَ اِنت –

زانگ بہ بیت دشت ءِ جتائیں دمگاں پوج ءِ زورانسری ءَ چَہ دشت ءِ گیشتریں بھرانی مردماں وتی بنکی ھنکین یلہ کرتگ ءُ کراچی، تربت، گوادر ءُ روکپتی بلوچستان ءَ شتگ اَنت –

سر بیتگیں ھالانی رد ءَ روکپتی بلوچستان چہ پَندءَ درکپتگیں یک مردمے پنجگور ءِ دمگ ءَ تُن ءَ جتگ ءُ بیران بیتگ –

پنچ شمبے ءِ روچ ءَ شریپ اربابی ء شیھک جھمنند سرباز دیم پہ رودراتکی بلوچستان ءَ روگ ءَ بیتگ راہ ءِ نیم ءَ پنجگور ءِ دمگ ءَ تُ ءُ شُد ءَ جتگ ءُ بیران بیتگ۔

شریپ اربابی مردماں چِست کنگ ءُ دیم پہ نادراہ جاہ ءَ برگ بیتگ اَنت کہ نیم راہ ءَ آئی ءَ ساہ داتگ –

ھمے وڑ ءَ گوستگیں روچ ءَ سیمسر ءَ تیل بروکیں منسور پھرامزئی ء نزر مھمد جھمنند پشین پاکستانی سیمسری پھزدارانی ءَ تمپ ءِ نزیک ءَ تیرانی آماچ کرتگ ءُ کُشتگ۔

منسور پہ وتی چکانی لاپ والینگی ءَ تیل ءِ باپاری ءَ بیتگ ءُ چریشی ءَ چَہ آ تیرانی آماچ کنگ بیتگ ءُ جنگ بیتگ۔

سیستان ءُ بلوچستان ءِ جھمنندیں مردم گیشتر تیل ءِ باپاری ءَ گوں دلگوش اَنت چرے سبب ءَ بازیں مردم سیمسری پھزدارانی تیرانی آماچ بیگ ءُ کُشگ بیگ ءَ اَنت –

سر بیتگیں ھالانی رد ءَ ھپت مئی ءَ مند ءَ پاکستانی پوج ءِ دست ءَ آوار جنگ ءَ پد بیگواہ بیتگیں جاوید ء گوھرام ءَ یل بیگ ءَ پد آئی ءَ زند ءِ روچ چَنڈیتگ اَنت –

جاوید ءَ ھوار بازیں مردم ھپت مئی ءَ بیڑی ءِ وھد ءَ پاکستانی پوج ءَ دزگیر کرتگ ءُ بیگواہ کرتگ اَنت –

بیگواھی ءِ آماچیں جاوید ھبدہ مئی ءَ ناوشیں جاوراں گوں یلہ کنگ بیتگ اَت،کھول ءَ جاندراھی ءِ واستا کراچی ءَ برتگ ءُ اود ءَ گوستگیں شپ ءَ دردانی نہ سگگ ءَ بیران بیتگ –

زانگ بہ بیت پیش ءَ ھم چَہ بلوچستان ء جتائیں جاھاں ھمے وڑیں ھال اتکگ اَنت چِد ءُ پیسر دشت بلنگور ءَ ھم یک ورنایے پاکستانی پوج ءَ زندانی ءِ وھد ءَ لَٹانی چیر ءَ بیران بیتگ اَت –

ھمے درگت ءَ وائس فار بلوچ مسنگ پرسنز ءِ وائس چیئرمین ماما کدیر بلوچ ءَ اے گپ راست کرتگ ءُ گْوشتگ کہ جاوید گوھرام ءَ ٹپ ءُ ٹور نہ سگیتگ ءُ نادراہ جاہ ءَ بیران بیتگ – جاوید پاکستانی پوج ءَ ھپت مئی ءَ چَہ مند ءَ لوگ ءَ آوار جتگ پانزدہ مئی ءَ آئی ءِ چاردہ سالی ئیں برات انیس ھم آوار جتگ ءُ برتگ-

ماما کدیر ءِ گوشگ اِنت کہ جاود نیم زندی جاوراں پوج ءَ مند سورو ءَ چگل داتگ پد ءَ کھول ءَ درمانی ءَ کراچی ءَ برتگ –

ھمے وڑ ءَ چاگردی رسانکجاہ ٹوئیٹر کارمرد کنوکیں بلوچ جھد کار جمال بلوچ ءَ وتی ٹویٹے ءِ تہ ءَ گْوشت کہ پاکستانی لشکر ھمک وھد ءَ مئے مردماں آوار جنت ءُ چیریں زنداناں بارات ءُ آیانی سر ءَ بے کساس ءَ زُلمانی کوھاں پروشیت-

دیمتر ءَ آئی ءَ گْوشت کہ مند ءَ آوار جنگ ءُ بیگواہ کنگ ءَ پد یلہ بیتگیں جاوید زندانی تہ ءَ جنگ ءُ ژند کنگ بیتگ ءُ پد ءَ چگل دیگ بیتگ ءُ چریشی ءَ چَہ آ بیران بیتگ۔

جمال بلوچ ءَ گْوشت کہ مروچی اے زندانانی لٹاں جاوِد نہ اِنت بیران بیتگ بلکیں ھمک ھما مردم اِنت کہ وتی انسانیت ءِ ھک ءِ توار ءَ پد جنگ اِنت۔

آئی ءَ گْوشت کہ مروچی دنیا ءِ دیم ءَ پاکستان سھر ءَ بیتگ ءُ پدراھی بیگ اِنت پاکستان انسانیت ءِ ھلاپ ءَ چِست بیتگیں آس اِنت۔

ھمے وڑ ءَ ہیومین رائٹس کونسل آف بلوچستان ءِ جنرل سیکریٹری عبداللہ اباس ءَ وتی چاگردی رسانکجاہ ٹوئیٹر ءَ ھم ٹویٹ کنان ءَ گْوشتگ کہ جاوید ءِ گوھرام گوستگیں شپ ءَ ٹپ ءُ ٹورانی سبب ءَ بیران بیتگ –

عبداللہ اباس ءَ گْوشت کہ جاوید ءِ گوھرام پاکستانی پوج ءَ گپتگ ءُ بندیگ جاہ ءَ لٹ داتگ ءُ گڈی زند ءَ رسیتگ چریشی ءَ پد آ ناوشیں جاوراں گوں یلہ داتگ –

آئی ءَ گْوشت کہ جاوید ءِ کستریں برات انیس ھم پوج ءَ گپتگ ءُ برتگ کہ تنی وھدی آئی ءِ ھال نیست –

تربت ءَ دُزی ءِ وھد ءَ جنگ، زالبول گوں چُک ءَ ھوار کُشگ

دی بلوچستان پوسٹ

لوگ ءَ پُترتگیں دُز گِرگ ھم بیتگ –

بلوچستان ءِ دمگ کیچ ءِ بنجاھی شھر تربت ءِ ھند ڈنک ءَ گوستگیں شپ ءَ سلاہ بندیں ڈنگاں یک لوگے ءِ تہ ءَ دُزی ءِ وھد ءَ جنگ ءُ چوپ کرتگ چریشی ءَ چَہ زالبولے گوں چار سالی ئیں چُک ءَ کُشگ بیتگ اَنت –

کوش ءَ پد لوگ ءَ جاڑیگیں دومی مردماں دُز گپتگ ءَ پولیس ءِ دست ءَ داتگ –

پولیس ءِ رد ءَ بنداتی پَٹ ءُ پول ءَ پد دُز ءِ آدگہ ھمراہ ھم دزگیر کرتگ اَنت –

پولیس ءَ گیش گْوشت کہ ڈُنگی ءُ کوش ءِ ویل ءَ کامرد بیتگیں سِی تیری ءُ پرپٹ ھم گپتگ ءُ گیشیں پَٹ ءُ پول بیگ اِنت –

زانگ بہ بیت گوستگیں بازیں وھداں چَہ تربت ءِ کَش ءُ گوری دمگاں ڈنگی ءُ دُزی ءِ ویلاں بازیں گیشی اتکگ –

یک دمگی مردمے ابدلوھید دشتی ءَ دی بلوچستان پوسٹ ءَ گپ کنان ءَ گْوشت کہ تربت ءِ شھر ءَ ایپ سی، پولیس ءُ دگہ پھزدارانی انگیر بیگ ءَ ابید اِد ءَ دُزی ءُ ڈُنگیانی ویلانی یک اجب رنگیں اجکھی یے –

آئی ءَ گیش گْوشت کہ لشکر ءُ چیریں ادارھانی نیمگ ءَ برجاہ کرتگیں دمگی سلاہ بندیں ٹولی کہ آئی ءِ نام ڈیتھ اسکواڈ ءَ زانگ بیت ایشانی کارمند روچ ءِ رھمانی بے لگام اَنت ءُ چریشانی سبب ءَ دُزی ءُ ڈنگیانی ویلانی تہ ءَ گیشی بیتگ

نبشتانک: نمدی یے پہ وتی سنگت ءَ

نبشتہ کار: سکی ساوڑ

دی بلوچستان پوسٹ

روچ: دوشمبے ءُ وھد 01:00

رمس: 25 سوچکان( مئی) 2020

دروتے پہ ترا منی ارواہ ءِ چراگ

من وش ءُ نا وش آں بلے اللہ ءِ شگر اِنت، چَہ ھداوند ء پاک ءَ تئی وش ءُ سلامتی ءِ لوٹوک آں ھر کجائے وش ءُ سلامت بات ئے.
منی بچکندگانی بچکند پل، برے من ھمے جیڑ آں من یک بے ساھیں جونے آں ءُ ماں بانے ءِ تہ ءَ کپتگ آں، ھما جون کہ بے کَس بہ بیت ءُ کس ئِے وتیگ مہ کنت انچوش بہ پھم من ھما وڑ آں، اے وھد ءَ من بان ءِ تہ ءَ کپتگ آں ءُ تئی بارو ءَ جیڑگ ءَ آں، اے اوں گپ نہ اِنت من چَہ ترا بے ھیال بوتگ آں ءُ مروچی تئی یات ءَ کپتگ آں، اے وڑ بوت نہ کنت کہ من بے ھیال بہ باں، مردم چَہ وتی مھروانیں سنگت ءَ کدی پراموش بوت نہ کنت، اگاں یکے پراموش بہ بیت گڑا تو ھمے بہ پھم آ سنگتے نہ اِنت، آ سنگتی ءِ ارزشت ءَ سرپد نہ اِنت ءُ نہ زانت کہ سنگتی ءِ بزانت چے اِنت.

منی دیدگیں سنگت، اُمیت اِنت تو اے وھد ءَ ھم وش ءُ سلامت ئے بلے چوں اوں من زان آں تو ھم چو منی وڑ ءَ تھنا بانے ءِ تہ ءَ کپتگ ئے ءُ جیڑگ ءَ ئے، پرچاکہ اے دَور ءَ ورنا گیش ایوکی ءِ آماچ اَنت،پمیشکا من ھمے جیڑ آں تو ھم تھنا ئے، بلے من دل ءَ جزم آں اے ایوکی یکروچے الّم یک بازارے جوڑ بیت ءُ بازار ءِ تہ ءَ چاپ ءُ نازینک بیت، داں کد ابیتکی ھمراھداری کرت کنت، الّم اے ابیتکی اوں بیزار بیت ءُ وتی راہ ءَ مَٹین اِیت.
چمروکیں سنگت، من ءَ تئی ھما گُڈی گِند ءُ نند یات پیداک اِنت کہ تو من ءَ ھال کرت ءُ گْوشت”سکُل تو اگاں دزھورک ئے ءُ ترا وھد ھست گڑا تو چوش کن انور بلوچ ھوٹل ءَ بیا من تئی وداریگ آں”.

وھدے من تئی اے گپ اِشکرت گڑا سَک گَل بوت آں ءُ من ھندگے جَت ءُ گْوشت” اڑے بچکند( من ترا مدام بچکند ءِ نام ءَ توار کرت پرچاکہ مدام تئی تَل بستگیں لُنٹانی سر ءَ بچکند تالان اَت) تو بہ گْوش ئے ءُ من مَیایاں چوش بوت نہ کنت، من وھدے تئی کرّ ءَ سر بوت آں گڑا تو من ءَ وتی امبازاں زُرت ءُ گْوشت” اڑے سکُل تو روچ پہ روچ لاگر بوان ئے ھیر اِنت”؟
من ھندگے جت ءُ گْوشت” بچکند پُل اے آئی ءِ داتگیں داد اَنت کہ زَنڈ بوگ ءَ نیل اَنت”.
ھمے وھد ءَ مئے ھندگانی توار بُرز بوت ءُ ھوٹل ءِ تہ ءِ مردم درست مئے چارگ ءَ لَگ اِت اَنت بلے ما دلگوش نہ دات ءُ نِشت ایں، داں دو ساھت ءَ ما گپ ءُ دیوان کرت بلے من نہ زانت کہ اے منی ءُ تئی گُڈی دیوان بیت.

منی ھمبلیں سنگت، گڑا من پد ءَ ماھے ءَ پَد مھرُل ءِ شھر ءَ بزاں کیچ ءَ رھادگ بوت آں کہ من بی اے( BA) ءِ چکاس بوگی اَت، من کیچ ءَ شُت آں ءُ اولی روچ ءَ من ءَ وتی بیگ بڈ ءَ اَت ءُ وتی گھارانی گِس ءِ روگ ءَ پیسر من مھرُل ءِ گِسانی توابے جَت ءُ پد ءَ وتی گھارانی گِس ءَ شُت آں، دومی روچ ءَ من اتا شاد شھدربرجاہ ءَشُت آں ءُ پد ءَ بورڈ ءَ شُت آں داں من ءَ ھمے ھال رس اِت کہ چکاس ھزدار ءَ بنت پرچاکہ فارومانی پُر کنگ ءِ وھد ءَ من بے ھوشی ءَ ھزدار بورٍڈ ءِ نام نبشتہ کرتگ( منی گنوکی ءَ وَ تو وت سرپد ئے) ءُ پد ءَ کیچ ءَ دامگ( نیٹ) نیست اَت ترا ھالے بہ کن آں گڑا پد ءَ من ھزدار ءَ شُت آں ءُ چکاس دات آ اود ءَ تئی لمبر ءَ من کلوہ راہ دات بلے روچ ء مروچی پَسّو نیاتک اَنت ، لھتیں روچ ءَ پد شھر ءَ آھت آں تئی لمبر ءَ یکبرے پد ءَ من کلوہ راہ دات ءُ پون کرت، چَہ سنگتانی کرّ ءَ تئی بارو ءَ جُست کرت داں کسے ءَ تئی ھال نہ دات.

منی گلزاریں ارواہ، مروچی ترا چار سال ءَ بُرز اِنت نا تئی ھالے ءُ نا تئی بچکندے منی نَسیب ءَ بوتگ، یکبرے تو من ءَ ھال بہ کن کہ تو کجا ئے ءُ چے کنگ ءَ ئے؟ من ءَ چَہ تئی بچکنداں بیزار اِنت بلے بھتاور پونے وَ بہ کن، من ھمے بزان آں تو وش ءُ سلامت ئے، بچار من گنوکے آں بوت کنت تو منی گپے دل ءَ کرتگ ءُ چَہ من ءَ دلگران بوتگ ئے اگاں تو دلگران ئے گڑا الّم من ءَ بہ گْوش، من ءَ سوگند اِنت کہ من تئی دست ءُ پاداں کپ آں ءُ پَھلی لوٹ آں، بلے برے برے من ھمے ھم جیڑ آں تو وَ دلگران بووکیں سنگتے نہ بوتگ ئے اے وڑ چوں بوت کنت تو دلگران بہ بہ ئے! پرچاکہ من ترا جگر گْوشتگ ءُ تو من ءَ ساہ گْوشتگ اد ءَ دگہ دلگرانی گپے ودی بوت نہ کنت .

منی ارواہ ءِ تاھیر بکشوکیں بچکند، دگہ ترا گپے بہ گْوش آں برے منی مجگ ءَ ھمے ھیال کیت بوت کنت تو چو ایدگہ ورنایانی وڑ ءَ تھاریانی باھوٹ کنگ بوتگ ئے، پرچاکہ تو کتاب ءِ سکیں دوستداروکے اِت ئے ءُ مدام کتاب وانگ ءِ سکین داتگ، بوت کنت ھمے کتابانی سنگتی ءَ ترا تھاریانی باھوٹ کرتگ! پرچاکہ مروچاں اے دیار ءَ کتاب ءِ بھا زورگ ءُ وانگ یک گناھے جوڑ بوتگ، اد ءَ نشہ بھا بہ کن گڑا داد دیگ بیت، واجہ واجہ گْوشگ بیت، شاد ءُ شادکامی کنگ بیت، دھل ءُ چاپ بیت، اگاں کتابے ونت یا سوجے دات گڑا پیسر ءَ تیار بو کہ مھماندار جاڑی اَنت.

دگہ گپے ءَ تو سرپد ئے مروچاں بازیں ماسے وتی زھگاناں وانگ ءَ روگ ءَ نیلگ ءَ اَنت کہ وانگ تھاریانی باھوٹ کنت ءُ پد ءَ ماس ایدگرانی دروراں ھم دے اَنت کہ پلانی زھگ ءَ ونتگ برو ءَ ھال ءَ ئِے پرس کہ چون اِنت.
بچکند پُل ترا باور کنت یکروچے من گوں یک ورنایے ءَ ڈیک وارت گڑا من جُست کرت” یار اے نشہ ءَ سوچ اے نشہ ءَ امارا برباد کرتگ ءُ برباد کنگ ءَ اِنت، بلے آئی ءَ ھچ نہ گْوشت، گڑا یکبرے پد ءَ من جُست کرت زاناں تئی گِس والا ھچ نہ گْوش اَنت کہ تو نشہ کنگ ءَ ئے”؟

آئی ءَ منی اے جُست ءِ پسّو چو اے وڑ ءَ دات” منی ماس سکیں شریں ماسے ،من آئی ءِ یکیں زھگ آں ءُ من آئی ءَ را سک دوست آں پمیشکا من ءَ ھچ نہ گْوش اِیت ،من ءَ منی ماس ءَ ھمے گْوشتگ دگہ جاہ ءَ مَرو گِس ءَ بہ نند من ترا وت نشہ ءِ زر دے آن ءُ تو نشہ بہ کن “.

منی جگر اد ءَ نوں تو وت بجیڑ کہ چے بوگ ءَ اِنت؟ اگاں تو کتاب ءِ وانگ ءِ سَوب ءَ تھاریانی آماچ ئے گڑا وتی کستر ءِ گپ ءَ بزور وتی گناھانی ماپی ءَ بہ لوٹ ءُ بیا ما نشھے بندات کن ایں دگہ وَ ھچ کرت نہ کن ایں کم چَہ کم ما یکے دومی ءِ دیدارے وَ کرت کن ایں .
اڑے جزباتی مہ بو پُل من سوجے دات .

باز نبشتہ نہ کن آں بوت کنت تو دلگران ئے یا جزباتی ئے ءُ دراجیں نمدی ءِ وانگ ءَ واک مہ کنت، اگاں منی بے پایدگیں نمدی ترا سر بوت گڑا پَسّو ءَ ئِے روان بہ دے، من تئی پَسّو ءِ ءُ تئی مھرانی تلبگار آں ،من ھمے جزم آں یکروچے الّم واتر کن ئے پرچاکہ تھنائی داں سرجمیں زند ءَ ھمراھداری کرت نہ کنت.

اللہ تئی پُشت ءُ پناہ بات

تئی مھرانی ودار سَکُل

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ زرباری روکپتی بلوچستان ءِ مزن شھر ءِ پولیس ءِ سروک ءَ گْوشت کہ گوستگیں ھپتگ ءَ اُستان ءِ زرباری دمگاں بیتگیں ویلاں سَے مردم بیران ءُ یازدہ زدگ بیتگ اَنت –

ٹریفک پولیس ءِ سرکماش کرنل مُستپا کولزادہ ءَ گْوشت کہ گوستگیں ھپتگ ءَ زرباری دمگاں دگ ءِ ویلاں سَے مردم بیران ءُ یازدہ زدگ بیتگ اَنت –

آئی ءَ گْوشت بیران ءُ زدگ بیتگیں روکپتی بلوچستان ءِ نُہ ویلاں چَہ بیتگ اَنت –

آئی ءَ گْوشت کہ روکپتی بلوچستان ءِ زرباری دمگ ءَ گیشتریں ویل دگ ءِ سر ءَ ترند سپر کنوکیں مردمانی سوب ءَ بیگ ءَ اَنت –

آئی ءَ گْوشت کہ بلوچستان ءِ بیست ءُ دو درسد ویل چَہ گیشتر ھمے سوب ءَ بنت کہ ڈرائیور دمبردگی ءِ سر ءَ راہ ءَ واب کپ اَنت ءُ چریشی ءَ یک ءِ دومی ءَ ٹکر جنت آئی ءَ گوشت چرے چیزاں ڈرائیور سپر کنگ اِنت آ باید پانزدہ پانزدہ دمان ءِ سر ءَ واب بہ جنت ءُ نِی آ راہ ءَ سپری ءِ بندات بہ کنت چرے تاواناں چَہ بھتر اِنت کہ آ بہ وپس اِت ءُ پد ءَ دس ادارانی سپر ءَ بندات بہ کنت –

کرنل کولزادے ءَ گْوشت شھری وتی رکینگ ءَ راہ ءُ پند ءَ دلگوش ءُ ھیالی بہ کن اَنت ءُ وتی جان ءِ رکینگ ءَ دومی مردمانی جاناں ھم بہ رکین اَنت –

آئی ءَ گوشت کہ بلوچستان ءُ سیستان ءِ دو دگانی سر ءَ باز جاہ ءَ پولیس ءِ کارگس ھست اَنت کہ چریشانی تہ ءَ گوریچان دُزاپ “زاھدان ” ءُ زرباری ءَ پھرہ “ایرانشھر” دو کارگس ھست کہ شھریانی سازمان ءَ کنگ ءَ اَنت ءُ چریشانی تہ ءَ گوریچانی دمگ ھوار اَنت نسرآباد، زابُل، ھیرمند، زھگ، نمروز، ھمون، زاھدان، میرجاوہ، ھاش، شسٹن، سراوان، سیب سوران میہ گاس، مھرانستان ءُ زرباری شھر پیراھہ “ایرانشھر، دلگان پینوج، گنداوگ، کسرکند، گیہ نیکشھر، سرباز ءَ کنارک ءُ چھبار ءَ پولیس ءِ کارگس ءُ دگ ءَ گوں بندوکیں کارمند ھست اَنت،

زانت شناسانی رد ءَ ترند رؤکیں گاڑیانی تہ ءَ گیشتر گیرکانودیں ازباب مان اَنت چریشی ءَ چَہ گیشتر دگانی سر ءَ بیوکیں ویلاں وتی جان ءِ پرواہ ءَ ھم نہ کن اَنت دومی ءِ جان ءَ ھم تاوانباری دے اَنت۔

لشکر ءُ چریکانی اُرش بے سوب کرتگ ءُ بازیں کارمند کُشتگ اَنت، بی آر اے

دی بلوچستان پوسٹ

کانی کور ءَ جنگ ءَ مئے سرمچار سلامتی ءَ درایگ ءَ سوبمند بیتگ اَنت – بیبگر بلوچ

بلوچ ریپبلکن آرمی ءِ جارکش بیبگر بلوچ ءَ رسانکدراں شنگ کرتگیں بیان ءِ تہ ءَ گْوشت کہ بیست ءُ دو مئی ءَ آدینگ ءِ روچ ءَ آواران ءِ دمگ جھل جائو کانی کور ءَ مئے سرمچارانی گشتی ٹولی ءِ سر ءَ سر بستگیں چریک ءُ لشکری کارمنداں اُرش کرتگ -مئے سرمچاراں زمین پھزی کنان ءَ یک ادارے ءَ داں جنگ برجاہ داشتگ ءُ جنگ ءُ چوپ ءَ بازیں کارمند مرتگ ءُ زدگ بیتگ اَنت –

آئی ءَ گْوشت کہ سرمچارانی جوان ءُ سوھیں جنگی ریپکاں انگیر پروشتگ ءُ درایگ ءَ سوبمند بیتگ اَنت –

آئی ءَ گْوشت کہ مئے کاروائی داں زورگریں لشکر ءِ درایگ ءُ آئی داشتگیں چریکانی ھلاسی ءَ برجاہ مان اِت –