لورالائی ءَ سینیٹر سرپراز بگٹی ءِ گاڑی ویل ءِ آماچ بیتگ چریشی ءِ سوب ءَ ھپت لیویز ءِ کارمند مرتگ اَنت۔
دی بلوچستان پوسٹ ءَ سر بیتگیں ھالانی رد ءَ بلوچستان ءِ دمگ لورالائی ءَ اُستانی سنٹور ءَ سرپراز بگٹی ءِ پھزدارانی گاڑی چَپ بیتگ چریشی ءَ چَہ لیویز ءِ ھپت مرتگ اَنت –
ویل لورالائی ءِ دمگ میکتر ءَ پیش اتکگ، ویل ءَ سرپراز بگٹی ءِ ٹپی بیگے ھال اِنت –
ویل ءَ سینیٹر ءِ گاڑی ءُ یک ٹرکے ءِ میان ءَ بیتگ – موٹروے پھزداراں دراھیں مردم نادراہ جاہ ءَ برتگ اَنت –
بلوچستان ءِ دمگ ھزدار ءِ ھند زھری ءَ ناشناسیں مردماں تیرگواری کرتگ ءَ چار مردم کُشتگ –
تیرگواری زھری ءِ ھند بدوگشت ءَ پیش اتکگ، یک مردمے زدگ ھم بیتگ –
دمگی پھزداراں جون چِست کرتگ ءُ نادراہ جاہ ءَ سرکرتگ اَنت اود ءَ اژدری چار ءُ ٹپاس ءَ پد کھول ءِ گور ءَ رسینگ بیتگ اَنت –
دمگی مردمانی رد ءَ تیرگواری ءِ سوب ءَ بیران بیتگیں مردمانی سیادی جتک ٹک ءَ اِنت، تنی وھدی کوش ءِ گیشیں سوب زانگ نہ بیتگ –
ھمے گْوشگ بیگ ءَ اِنت کہ ویل کوھنیں دشمنی ءِ سوب بیتگ کنت –
زاھدان یونیورسٹی آف میڈیکل سائنس ءِ واکداراں گْوشتگ کہ بلوچستان ءُ سیستان ءِ نادراہ جاھاں روچ پہ روچ نادراھانی کَچ گیش بیان اِنت –
یونیورسٹی ءِ شاھزانتاں گْوشت کہ بلوچستان ءِ گیشتریں نادراہ ڈنی اَنت کہ بلوچستان ءَ اتکگ ءُ چریشی ءَ چَہ نادراھانی کَچ گیش بیتگ –
آئی ءَ گْوشت کہ روکپتی بلوچستان ءِ گوریچانی دمگاں نادراھانی کَچ گیش بیگ ءِ سوب ءَ دمگانی جانسلامتی ءِ جاور روچ پہ روچ نگیگ بیان اَنت –
مھمد گاشمی شاھراھگی ءَ گْوشت کہ گوستگیں بیست ءُ چار ادارانی تہ ءَ ھپتاد ءُ ھشت دگہ مردم کورونا وائرس ءَ گورجتگ اَنت –
ھمے وھد ءَ یونیورسٹی آف میڈیکل ءِ ڈپٹی ڈائریکٹر ٹریٹمنٹ ءَ گْوشت کہ نادراھاں پیسر ءَ کورونا ءِ نادراہ مان بیتگ ءُ چریشی ءَ نوکیں نادراھانی سوب ءَ نادراہ جاہ گیشتر پُر بیگ ءَ اَنت –
کاسم میری الی آبادی ءَ گْوشت کہ کورونا وائرس ھما نادراھیانی تہ ءَ گون اِنت کہ مردماں گپت ءُ کُوش اِیت اگاں نادراھانی کَچ گیش بیت گڑا بزانکہ بیرانیانی کَچ گم گیش بیت کنت-
آئی ءَ گْوشت کہ تنی وھدی اے نادراھی ءِ چوشیں درمانے دز نہ کپتگ ءُ ایشی ءِ مستریں درمان ھمیش اِنت کہ یک ءِ دومی ءَ چَہ گیستا بیگ ءُ بیدے اژدری ءِ کاراں ڈن ءَ نہ کپگ اِنت کہ ایشی ءِ مستریں پھریز اِنت –
تبزانت ءِ پزشگی دزاپ زاھدان ءِ شاھدربرجاھے واکداراں گْوشت کہ بازیں مردماں گْوشتگ اے نادراھی ءَ گرم نیزور کنت بلے گرم ءَ نیزور بیت نہ کنت ایشی ءِ یکیں پھریزگ ءِ راہ اِنت دور دوری اِنت –
نبشتانک: سنگت شاری ءَ کینسر اِنت
چارمی بهر 4
نبشتہ کار: شُپانک بلوچ دی بلوچستان پوسٹ
من دار آؤرت اَنت ءُ آس روک کت گوشت پرپٹے گوُن ءَ اَت ءُ آرت سنگت ءَ زرت ءُ چمگ ءِ سر ءَ آرت تَر کنگ ءَ پہ شُت من سنگت توار جت کہ گوانکو ءَ هیال ءَ کن گوں بلکیں سنگت ھال کن اَنت کاروان ءِ دیم ءَ روگی اِنت مارا سرگوز مہ کن اَنت نوں امیتیں کہ نزیک بنت.
تو آس ءَ روک کن داراں ماندار ءُ وتی ساماناں زور دیم پہ سنگر ءَ برو اود ءَ کوه ءِ سر ءَ دامگ هم کمو شرتِر کار کنت من آرت تَر کت ءَ آس ءَ وت هیال کن آں من کلمسر دست ءَ کت ءُ کوکار کن آں کوہ ءَ سرکپاں بوت آں سنگت ءَ ھاھاھا کند ایت ءُ گشت گنوکے تو همے کہ میرک پیداک بیت یا گوں میرک ءَ ھمراہ بِہ ئے گُش ئے تو گوں شاری هم نیاد ئے !
من پد ءَ ترانگانی زِر ءَ ایر کپت آں گوں شاری ءِ یاتاں داں کوه ءِ سر ءَ شُت سر بیت آں کاروان ءِ دَنز کلبرے پدی نیمگ ءِ کوھاں زاھر اَت اَنت بَلے انگت دور ءَ من تاں لھتے مزنیں سِنگ چِت سر ماں سر ءَ ایر کت ءُ بومایے اَڈ دات ءُ نِشت آں کوش ءِ لھمیں شیکگ ءُ شاری یے بالاد ءِ وشبو کہ انگت منی گھن ءَ اَت من ءَ گیش ملور ءُ بیچاڑے کتگ اَت.
من سگریٹ ءِ ٹالےکَش ات چہ پاکٹ ءَ بُندات ءُ کَشّگ ءَ لگ ات آں سگریٹ هلاس نہ بوت داں کاروان رس ات سنگتان من گوانک جَت بیا جھل ءَ من سنگر یل ءَ کت ءُ جَت جُمپے تچان ءَ ایر کپت آں گیشیں بے وابی ءَ چم پَچ نہ بوت اَنت گُش ئے چمانی دیم ءَ تھاری ءَ مانشانتگ ءَ ارس یکوی هولمب ات اَنت
من اتک آں سنگتانی گور ءَ سنگت وش اتک کت اَنت میرک من ءَ بَگل ءَ کت پُرامباز ءَ زُرت ءُ گُبّے وارت ما ھر دو کندگ ءُ مسکرا ءَ لگ اِت ایں کہ استاد ءَ گشت شپانک تو باریں هال کن شاری چوں اِنت کمبر ءُ پیر زال چوں اَت اَنت ؟
من گُشت وش ءُ سلامت اَت اَنت الحمد الله ۔
شما هال کن اِت سپر وش بوتگ.؟
استاد ! ولله همیش اِنت ما شکار ءَ بوتگ ایں سوبین بوتاں هاهاهاها
من گشت! هو سرپد بوت آں میرو من ءَ پیسر ءَ مِستاگی گپتگ هاهاها
میرک ءَ من گوانک جت تو بیا من ءُ تو ور ءَ ٹَهین ایں گوشت ءَ هم شر کن ایں چاهے اَڈ کن ایں کہ سنگت ژند اَنت،
ھیر اے کاراں وَ کن ایں بَلے شُپانک تو هال کن تو مرچی چو ابیتک ءُ بیچاڑ ئے چی ءَ یار تئی کندگ مسکرا مرچی من ءَ ھچ وش لگگ ءَ نہ انت؟
من گشت آ کسہ ءَ بِلّ یار مرچی من گوں شاری ءَ هم نیاد اَت آں کہ زوراک ءَ میتگ انگیر کت من نَا شِمیں وابے جَت نَا کہ شَرّیں دیدارے نیسب ءَ بوت نوں باریں کدی سر بِہ کپ ایت.
هاکاں گوں هوار بوتاں مسکانی وشبوه
میرک بس اے دوا پہ مارا نیک دوایے کہ مسکانی وشبو کدی مئے نسیب ءَ بیت یار
تو بِل اے گپ ءَ هال کن نوکیں سنگت لهتیں استاد ءِ همراھاں باریں چونیں سنگتاں ؟
میرک هو جگر اے مهروانیں سنگتاں نوک اتکگاں لهتیں روچ بیت اِش مرچی مئے دست ءَ اَنت تو وَ وت زان ئے استاد ایشان انوں سر ءُ سوج کنت مارا کج ءَ دنت اِش ههههه
من گشت هو
روان انت
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت
بلوچستان ءِ مزن شھر شال ءَ وائس فار بلوچ مسنگ پرسنز ءِ زھرشانی ءَ 3975 روچ سرجم بیتگ ۔ پشتون تحفظ موومنٹ ءِ بنجاھی پتر ءِ باسک آگا زبیر، دمگی کوارڈینٹر نور باچا، اجمل خان، مھمود خان ءُ شیر جان ءَ ھوار دگہ مردم بنجل ءَ اتکگ اَنت ءُ یکجاھی درشان اِتگ۔
زھرشانی ءَ بیگواھیں ھسان کمبرانی، حزب اللہ کمبرانی ءُ جھانزیب کمبرانی ءَ ھوار دگہ بیگواھیں مردمانی کھول ءِ مردماں بھر زرتگ ءُ وتی زھرشانی درشان کُتگ۔
وی بی ایم پی ءِ رھشون ماما کدیر بلوچ ءَ مردماں گوں گپ کنان ءَ گُشتگ کہ استانی چیریں گل گوں یک شلی ءَ بلوچ، پشتون، سندھیاں بیگواہ کنگ ءُ گیر انسانی لٹ ءُ کٹ ءِ کنگ ءَ پد آیاں کُشگ ءَ اَنت ءُ پد ءَ تُرس ءُ بیم ودی کنگ ءِ ھاتر ءَ آیانی جون ءَ دور دیگ ءَ اَنت۔
آیاں گُشت کہ بلوچ، سندھی ءُ پشتون مزنیں وھدے ءَ چہ استان ءُ آئی کجام ھم ترامگیجاں چہ رھم ءُ انساپ ءِ اوست نہ دارنت بلے بہ ایز ء انسان اے راج چہ میان اُستمانی گلاں ھوار ھواریں راجانی گل، ایمنسٹی انٹرنیشنل ءَ چہ اوست دارنت کہ آ بلوچستان، سندھ ءُ خیبرپختونخواہ ءَ جنزوکیں نسل کشی ءُ انسانی ھکانی ترندیں لگتمالیانی سر ءَ گام نہ زیر انت ءُ دارگ ءِ ھاترءَ جھد بہ کن اَنت۔
ماما کدیر ءَ گُشتگ کہ پاکستان ءَ جھانی ایمنی ءَ گوں ھچ وڑیں کار نیست بلکیں پاکستان ءِ جند ءِ کاربءُ بار دھشتگری ءِ سر ءَ جُنز ایت پمیشکا چہ پاکستان ءَ اے اوست کہ آ اے دمگ ءِ تھءَ ایمنی کاریت دروگ اِنت۔
آئی ءَ گوشتگ پاکستان ءِ ھمے ناشرکاریں توجیل نوں پہ جھانی ایمنی ءَ ھترناک جوڑ بیتگ اَنت۔ بلوچستان، سندھ ءُ خیبرپختونخواہ ءَ جنزوکیں زوراکی، زلم استان ءِ ھمے ناشرکار ءُ جنگ دوستیں توجیل نی جھانی ایمنی ءِ ھاترءَ بے کساس تُرس ءِ سوب اَنت۔
آئی ءَ گوشتگ میان اُستمانی جھان ءِ زمہ واری جوڑ بیت کہ آ پاکستان ءِ ھمے ناشرکاریں کارانی دیم ءَ بہ دار انت اگاں نا آیوکیں روچاں ھمے دمگانی تھءَ تھنا گیشتر کُشت ءُ کوش گندگ ءَ کیت ۔
ماما کدیر ءَ گوشتگ کہ پاکستان ءِ زوراکی ءِ کسہ چہ ھمد ءَ دیمتر ءَ روان جھانی ایمنی ءِ ھاترءَ مزنیں تاوانے بیت کنت۔
بلوچستان ءَ کرونا وائرس ءَ چہ یک داکٹرے بیران بیتگ چہ ایشی ءَ پد بیران بیتگیں مردمانی کساس 47 بیتگ۔
ڈاکٹر شاہ ولی ڈی ایچ کیو مستونگ ءَ زھگانی زانتکاریں ڈاکٹرے ءِ ھساب ءَ وتی زمہ واریاں پیلو کنگ ءَ بیتگ۔ آ گوستگیں ماہ ءَ کرونا وائرس ءَ گپتگ ءُ بی ایم سی ءَ آئسولیشن وارڈ ءَ پہ الاج ءَ بیتگ.
ڈی جی جانسلامتی بلوچستان ڈاکٹر سلیم ابڑو ءَ ھم ڈاکٹر شاہ ولی ءِ بیرانی ءِ ھال راست گوشتگ۔ وتی درشان ءِ تھءَ پدردی درشان کنان ءَ آئی ڈاکٹر شاہ ولی ءِ پہ جانسلامتی ءَ کُتگیں کاراں پہ ءَ دروت ندر کُتگ۔
ڈاکٹر شاہ ولی مرگ ءَ پد بلوچستان ءَ کرونا وائرس ءَ بیران بیتگیں مردمانی کساس 47 بیتگ ۔ داں انگت 4193 مردم سان مند بیتگ اَنت ءُ چہ ایشاں 1471 مردم وش بیتگ ۔
گوادر ءَ جھمندیں اولی بلوچ یوٹوبر ءُ ویلاگر انیتا جلیل ءَ وتی یک پیسبوک پوسٹ ءِ تھ ءَ گوشتگ کہ کیچ دمگ ءِ جتاھیں ھنکینانی تھءَ دُزی ءِ ویلانی تھ ءَ ھواریں ڈیتھ سکواڈیں مردماں چیریں گلانی ءُ چانوگ واریں وزیرانی ھمراہ داری گون اِنت۔
آئی ءَ دیمتر ءَ گوشتگ کہ گوستگیں لھتیں روچانی تھءَ ھمے مدامی ئیں دُز یک لوگے ءَ پترتگ اَنت ءُ یک تپلیں جنکوے برمش ٹپی کُتگ ، آئی ءِ مات ھم ھمے مردمان تیر جتگ ءُ کُشتگ۔
انیتا جلیل ءَ ھمے ویل ءِ درگت ءَ دگہ یک پوسٹے کنان ءَ گوشتگ کہ ما برمش ءُ آئی مات ءِ ھاتر ءَ زوت انساپ ءِ لوٹ کنیں۔
آئی ءَ گوشتگ کہ ڈنک ءِ ویل، کیچ دنگ ءِ واکدارانی دیم ءَ یک شھماتے۔
آئی ءَ دیمتر ءَ نبشتہ کُتگ ایف آئی آر ءِ تھءَ راستیں سلکارانی نام ھوار نہ اِنت ۔
ڈنک ویل ءِ ھلاپ ءَ بیوکیں زھرشانی روانک گوادر ءِ جتائیں دگانی سر ءَ گشت کنان ءَ پریس کلب ءَ سربیتگ کہ اود ءَ رھشوناں تران کُتگ ۔
گوستگیں روچاں کیچ ءِ مزن شھر تُربت ءَ یک لوگے ءَ دُزی ءِ نیام ءَ یک جنین آدمے ءِ کوش ءُ تپلیں جنکو ءِ ٹپی بیگ ءِ ویل ءِ ھلاپ ءَ گوادر ءَ زھرشانی کنگ بیتگ ۔
زھرشانی ءَ گوں ھسین واڈیلہ، زپر ایسا آزاد ءُ شاہ داد شاہ ءَ تران کنان ءَ گوشت کہ ڈنک ءَ دُزانی دستءَ جنگ بیتگیں جنین نہ تھنا برمش ءِ مات اِنت بلکیں مئے درستانی مات اِنت، پمیشکا مئے درستانی زمہ واری جوڑ بیت کہ اے ویل ءِ ھلاپ ءَ توار چِست بہ کنیں۔
آیاں گوشت کہ ڈنک ءَ دُزی ءَ ھواریں سلکارانی درگت ءَ سرجمیں بلوچستان زانت کہ اے سلاہ بندیں مردمانی سر ءَ کئی دست اِنت۔
آیاں لوٹ کُتگ کہ ویل ءَ ھواریں مستریں سلکار سمیر سبزل ءَ ھوار دزگیر کُتگیں مردماں تُربت ءَ چار راہ ءِ سر ءَ پاھو دیگ ءُ پہ دگراں ابرت جوڑ کنگ بہ بیت۔
زھرشانی ءَ تران کنان ءَ گوشت لس مردماں ناکُن چِنے کیسگ ءَ کنگ ءُ گردگ ءِ ھک نیست بلے سلاہ بندیں سلکار سر زاھر ءَ کئی رزا ءَ گوں توپنگاں گوں چکرگ ءَ اَنت۔
ھمے درگت ءَ وی بی ایم پی ءِ رھشون ماما کدیر ءَ چاگردی رسانکدر ءِ تندجاہ ٹوئٹر ءَ یک تامرے ٹوئٹ کنان ءَ گوشت کہ من گوادر ءِ سنگتانی منتواراں کہ آیاں ڈنک ءِ ویل ءِ ھلاپ ءَ زھرشانی کُتگ۔
آیاں گوشت کہ درست زان اَنت ڈیتھ اسکواڈاں پوج ءِ کمک گون اِنت ءُ اے مردم بلوچ پسگانی بیگواھی ءُ آپریشنانی تھءَ پوج ءِ ھمراہ اَنت ۔
ماما کدیر ءَ وتی ٹوئیٹ ءِ گُڈسر ءَ گُشت کہ بلوچانی زوریں بیگواھی ءِ تھءَ ھواریں پوج ءُ ڈیتھ سکواڈانی ھلاپ ءَ سرجمیں پاکستان ءِ تھءَ پر ایمنیں زھرشانی کنگ بہ بیت۔
دومی نیمگ چاگردی رسانکدر ٹوئیٹر ءَ ھم بلوچ سیاسی ءُ چاگردی جھدکار ڈنک ویل ءِ ھلاپ ءَ برمش بلوچ ءَ انساپ دیگ ءِ ھاتر ءَ کمپین کنگ ءَ اَنت ءُ #JusticeForBramsh ءِ ھیشٹیگ ءَ کارمرز کنان ءُ ٹوئٹ کنگ ءَ اَنت۔
نبشتانک: منی بُن گپتگیں چاگرد ءِ تہ ءَ مھر ءِ ارزشت
نبشتہ کار: سکی ساوڑ
دی بلوچستان پوسٹ
برے برے من وت جیڑاں ءُ وت ءَ جُست کن آں” مھر چی یے، مھر چوں بیت، مھر ءِ لوٹ چے اَنت، مھر پرچا بیت، مھر گوں چی ءَ بیت ءُ مھر کدی ودی بوتگ”؟
اے کُل جُست مدام منی دیم ءَ چوں مِستاگریں گْوات ءِ وڑ ءَ چکروکی ورگ ءَ اَنت،من مدام جیڑگ ءَ آں من ھمے جُستانی پسّھاں کجا شوھاز بہ کناں ءُ کئی کِرّ ءَ شوھاز اِش بہ کناں ، چونیں پسہ بدے آں دانکہ دلجم بہ باں مھر چی یے؟
بس مدام وتی ھیال ءِ تہ ءَ ھمے جُستاں ایر کن آن ءُ کمو دزھورک بوگ ءَ پد الّم اے بارو ءَ جُست ءُ پد یا پَٹ ءُ پول ءَ بنا کن آں، بلکیں من ءَ منی پسہ دست بہ کپ اَنت،بلے یک پَسّھے مدام منی دیم کیت ءُ من ھمے سرپد بہ آں کہ مھر گوں دیداں بندوک اِنت کہ ترا درستیں شری ءُ ھرابیاں پیشدار اِیت، ترا بزگی ءُ پدمنگتیانی شوھازگ ءَ پرما اِیت، مھر گوں ھر کس ءَ بیت، مھر گوں یک چیزے ءَ ھچ بندوک نہ اِنت کہ آئی ءَ را مکن کنگ بہ بیت کہ تو گوں ایشی ءَ مھر بہ کن ءُ ترا گوں آئی ھچ کار نیست، اِنّاں مھر اے وڑ نہ اِنت،مھر مدام تر ءُ تاب کنگ ءَ اِنت.
مھر یک ھنچیں چیزے کہ آ اناگت ءَ بیت ، بازینے گْوش اِیت مھر گوں یک چیزے ءَ بیت، گُڑا من گْوش آں کہ آ مردم چہ مھر ءِ جِند ءَ سرپد نہ اِنت کہ مھر چی یے؟ پرچاکہ مھر گوں یک چیزے ءَ نہ بیت یا یک مردمے ءَ گوں نہ بیت بلکیں گوں ھر یک چیزے ءَ بوت کنت کہ آئی ءِ ھما سھر(کشش) مھر ءَ را وتی نیمگ ءَ ژپ اِیت ءُ وت ءَ آئی ءِ باھوٹ کنت مھر گوں پِس ءَ، ماس ءَ، براس ءَ، گھار ءَ، زمین ءَ ،چاگرد ءَ دگہ دگہ.
بازیں مردمے ھمے گْوش اِیت کہ من ءَ گوں پِلاں جنک یا بچک ءَ گوں مھر اِنت بلے وتی مھر درشان کرت نہ کن آں یا من ءَ گوں پلاں چیز ءَ مھر اِنت،ھَو اے گپ ھست کہ بازیں مردمے مھر ءِ درشان کنگ ءَ تُرس اِیت ءُ درشان کرت ھم نہ کنت پرچاکہ مرچاں مھر ءِ نام ءِ سر ءَ سک باز کار ھرابی بوگ ءَ اِنت ءُ مھر چاگرد ءِ تہ ءَ بنّام بوگ ءَ اِنت، مرچاں مھر یک دروگے جوڑ بوتگ ءُ چاگرد ءِ تہ ءَ دروگیں دروشمے ءَ پیشدارگ بوگ ءَ اِنت، سک باز مردم نند اِیت گڑا ھمے گْوش اِیت” مھر چہ شے مرید ءُ ھانی پد بیگواہ کنگ بوتگ، نوں مھر ءِ جند نیست، نوں مھر یک دروگے، مھر یک لب ءُ لالچے، مھر نوں یک بنّام کنگ ءُ تُنّ پروشگ ءِ لوٹے جوڑ کنگ بوتگ، مھر یک کسانیں واھشتے”.
بلے من گْوش آں “مھر چہ ھوا ءُ آدم بندات بوتگ ءُ داں ابد ھلاس کنگ نہ بیت، ھاں مھر ءِ نام ءِ سر ءَ باز ردیں چیز بیت بلے راستی ئیں مھر مدام زندگ اِنت ءُ جنزان اِنت، راستی ئیں مھر کدی لب ءُ لالچ ءِ مھتاج نہ اِنت ،راستی ئیں مھر کدی تُنّ پروشگ ءِ منوگر نہ اِنت بلکیں راستی ئیں مھر ساہ ءَ چہ سرگْوزگ پرمائیت، آ مھرے نہ اِنت کہ ھلاس بہ بیت، آ مھرے نہ اِنت کہ تُنّ پروشگ ءِ نام دیگ بہ بیت، آ مھرے نہ اِنت کہ درد ئِے ھمراہ مہ بیت، آ مھرے نہ اِنت کہ چاگرد ءِ تہ ءَ بنّامی یے ودی بہ کنت، آ مھرے نہ اِنت کہ کسے ءِ لج ءُ نَنگ ءِ سر ءَ اُرش بہ کنت بلکیں مھر یک بے دروریں ھستی یے کہ مدام ھست اِنت، مھر راستی ءُ یکجاھی ءِ نام اِنت، مھر یک دنیایے کہ ترا سیل ءُ سواد پرما ایت، مھر یک دَرسگاھے کہ ترا زندگ بوگ درس ءَ دنت ، مھر یک راستی یے کہ ترا راستی ءِ سکین ءَ دنت، مھر یک ابابتے کہ ترا پاک ءُ پلگاری ءِ درس ءَ دنت، مھر یک ابابت جاھے کہ ترا وتی تہ ءَ گوں پاک ءُ پلگاری ءِ دروشم ءَ گندگ لوٹ اِیت، مھر یک دریایے کہ گْواز کنگ نہ بیت،مھر چے چے نہ پرما ایت؟مھر ھست کہ جھان ھست”.
بژن ءِ گپے کہ ما انگت مھر ءِ جند ءَ سرپد نہ ایں کہ مھر چی یے، بلکیں ما ھمے پوہ بہ ایں کہ مھر مئے چاگرد ءِ تہ ءَ یک آسے جوڑ بوتگ ءُ کہ چاگرد ءَ را بن دیان اِنت، نا اے وڑ نہ اِنت،اے بُن گپتگیں چاگرد چے زانت کہ مھر چی یے ءُ مھر ءِ ارزشت چی یے ؟ اے آس ءِ تہ ءَ مھر ءَ را چوں جاگہ بیت؟
مھر ھما چیز اِنت کہ آس ءَ مھروان کنت ءُ گڈسر ءَ آس ءَ کُش اِیت ءُ چاگرد ءَ را سبز ءُ آباد کنت، مھر تپاکی ءُ یکجاھی ءِ اولی نام اِنت ، مھر یک پاکیں چیزے، مھر یک تپاکی یے، مھر یک مِنزلے، مھر یک وشھالی یے، مھر بھشت ءِ دروازگ اِنت ،مھر گناہ ءِ چَپ اِنت ، مھر بھشت میدان اِنت ءُ مھر دو دلانی پریات ءُ لوٹ اِنت بلے امئے چاگرد ءِ تہ ءَ مھر یک کُشت ءُ ھونے جوڑ کنگ بوتگ یا لَج ءُ ننگ ءِ پادمالی ءِ نام دیگ بوتگ.
نزاناں ما کدی مھر ءَ سرپد بہ ایں، آ روچ باریں کدی کیت کہ ما اے بے مھری ءِ بُن گپتگیں چاگرد ءَ آجو بہ بہ ایں ءُ وتی اے نِزوریں گاماں دو گام پر کرت بہ کن ایں ءُ مھر ءِ بادشاھی ءَ وتی بنگپتگیں چاگرد ءِ تہ ءَ بہ گند ایں ؟
مارا مھر زانگ لوٹ اِیت، مارا مھر وانگ لوٹ اِیت، مارا مھر پوہ بوگ لوٹ اِیت، مھر سِلکاری ءُ بدکاری ءِ نام نہ اِنت بلکیں زندگ بوگ ءِ نام اِنت، اگاں کسے زندگ بوگ لوٹ اِیت گڑا وتی تہ ءَ مھر ودی بہ کنت ءُ مھر ءَ را جاہ بہ دنت گڑا آ مدام گوں مھر ءَ ھوار زندگ ءُ نمیران بیت.
مھر ابدمان اِنت ءُ ابدمان بات.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت
یونائیٹڈ بلوچ آرمی ءِ جارکش مرید بلوچ ءَ ناشناسیں جاھاں چہ رسانکدراں شنگ کُتگیں وتی یک درشانے ءِ تھ ءَ گوشتگ کہ بلوچستان ءِ دمگ مستونگ، اسپلنجی ءَ پاکستانی پوج ءِ سر ءَ کُتگیں اُرش ءِ زمہ واری ءَ من ایں۔
آئی ءَ گوشت کہ گوستگیں روچ ءَ نیم روچ ءِ وھد ءَ مئے گل ءِ نہ تُرسیں سرمچاراں پاکستانی پوج ءِ کارمندانی سر ءَ پُشت مہ پُشت دو ریموٹ کنٹرول بمب تراک کُتگ ۔ بلوچ سرمچارانی اُرش ءَ مزنیں کساس ءَ کارمند ٹپی ءُ کُشگ بیتگ اَنت۔
مرید بلوچ ءَ دیمتر ءَ گْوشت کہ مئے اُرش انچش ترند بیتگ کہ ایندگہ پشت کپتگیں کارمنداں تُرس ءِ سوب ءَ لس بلوچ ھندانی سر ءَ داں دو ادار ءَ تیر گواری کُتگ ءُ ھندانی تھءَ تُرس ءُ بیم ودی کُتگ ءُ پد ءَ بازیں بے میاریں بلوچ دزگیر کُتگ ءُ بیگواہ کُتگ اَنت۔
مُرید بلوچ ءَ دمگی مردماناں وتی درشان ءِ تھءَ دلگوش گور کنان ءَ گوشتگ وتی جزبگ ءَ مھکم بہ دار ات ءُ پاکستانی پوج ءِ ھمک گامانی سر ءَ چم ایر بہ کن اِت۔
جارکش ءَ گوشت کہ مئے چُشیں اُرش داں بلوچستان آجوئی ءَ برجاہ مان اَنت ۔
