TBP Balochi

بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں بیان ءِ تہ ءَ گْوشت کہ دمگی ٹرانسپورٹ پاکستانی فوج ءِ کمکاری ءُ آئی ءِ سامانانی رسینگ ءِ بھر جوڑ مہ بنت –

میجر گْوھرام ءَ گْوشت کہ کیچ ءِ دمگ دشت ھوچات ءَ سرمچاراں فوجی کاروان نشانگ کنگ ءَ شورو کَل کرتگ -فوجی کاروان گیشتر وتی پھزگ ءَ دمگی مردماں کامرد کنت، اے رند ءَ ھم فوجی بنجل ءِ وردنی مڈی سر کنوکیں یک گاڑی ءِ کاروان ءَ ھوار کرتگ، بمب تراک ءَ ھواریں گاڑی شوروانی زد ءَ اتکگ –

ما یک رندے پد ءَ سرجمیں بلوچستان ءِ دمگی ٹرانسپورٹاں دزبندی کن ایں آ کجام رنگ ءَ پاکستانی فوج ءِ کمکاری ءَ گِستا بہ بنت اگاں ناں گڑا آ وتی زمہ واری وت بہ اَنت –

پاکستانی فوج ءَ اے اُرش ءَ پد جتائیں نیمگاں تیرگواری کنگ ءِ ھمراھی ءَ مارٹر گولہ آس داتگ-

میجر گوھرام بلوچ ءَ گْوشت دیمترا گْوشت کہ مھلوک پاکستانی فوج ءِ کاروان آئی ءِ کمکاراں چَہ گِستا بہ بنت سرمچار کجام ھم وھد ءَ نشانگ کت کن اَنت –

بلوچستان ءِ جتائیں جاھاں دگ ءِ ویلاں یازدہ مردم زدگ، یک مردمے بیران

دی بلوچستان پوسٹ

سر بیتگیں ھالانی رد ءَ گوستگیں روچ ءَ کلات ءِ دمگ ملگزئی ءَ مزن شھدگ ءَ سواری گاڑی ءُ یک پک اپ گاڑی ءَ ٹکر وارتگ چریشی ءَ چَہ سَے زالبول ءَ ھوار پنچ مردم زدگ بیتگ اَنت-

زدگ بیتگیں مردم ریسکیو ٹیم ءِ مردماں چِست کرتگ ءُ ڈی ایچ کیو کلات ءَ سر کرتگ اَنت –

ھمے وڑ ءَ نسیر آباد ءِ دمگ منگولی ءِ نزیک ءَ مزن شھدگ ءَ دگ ءِ ویل ءَ سَے زالبول ءَ ھوار شش مردم زدگ بیتگ اَنت –

پولیس ءِ رد ءَ مزن شھدگ ءَ بس ءُ رکشھے ءِ ٹکر ورگ ءَ رکشہ ءَ سواریں شش مردم زدگ بیتگ اَنت کہ اشانی تہ ءَ زالبول ھم ھوار اَنت-

زدگ بیتگیں مردم درمان کنگ ءَ ڈیرہ مراد جمالی ءِ نادراہ جاہ ءَ سر کنگ بیتگ اَنت –

بلوچستان ءِ جتائیں جاھاں دگانی سر ءَ پیش اتکگیں ویلانی سوب گاڑیانی ڈرائیورانی نادلگوشی ءَ بیگ ءَ اَنت کہ آ ترندی ءُ روگ ءُ پرشتگیں دگ سواریں مردمانی ساہ ءِ اجل جوڑ بنت –

ھمے وڑ ءَ وندر ءِ نزیک ءَ ٹرک ءُ ٹرالرے ءِ ٹکر ورگ ءَ یک مردمے بیران بیتگ، بیران بیتگیں مردم ءِ سیادی پشین ءَ اِنت –

نبشتانک: بِہ بکش اِت

نبشتہ کار: جاوید لطیف

دی بلوچستان پوسٹ

گندئے ڈنُّک “تُربت” ءِ ویل بلوچ ءِ دست ءَ مہ بیتیں ما انگت ءَ گُنگ ءُ کرّ اِت ایں،، مئے گوشاں مورے ءَ اوں نہ وارت، بلے نی جنجال ایش اِنت کہ اے ویل بلوچ ءِ دست ءَ بیتگ ءُ ماں جھاں سر ءَ زُرتگ، انچو کہ دو ءُ سے سال ءَ پیسر پنچ بلوچ یک سلاھبندیں گلے ءَ چِست کُتگ ءُ بُرتگ اِت اَنت ءُ پد سیاجی کوھاں سجھینانی جون دست کپت اَنت، گڑا آ وھد ءَ اوں ما ھمے بلوچ اِت ایں کہ سلاہ بندیں گل ءِ ھلاپ ءَ تُربت ءَ زھرشانی ءُ جاک ءُ جگّہ کُتگ اَت، چُو وَ چُشیں روچے نہ گوْز ایت کہ پوج ءِ دست ءَ بلوچ نودربر گار ءُ بیگواہ کنگ مہ بنت، کُشگ ءُ دَور دَیگ مہ بنت، چُک ءُ زالبول بے شرپ کنگ مہ بنت، اگاں کسے سرپد بیت کہ بلوچ ءَ وتی ھاموشی پُروشتگ گڑا آ سرپَد بہ بنت کہ زرینہ مری روچ ء مرچیگ ءَ گار انت، زاکر مجید ءِ مات دنیگت ءَ روڑانی سر ءَ در پہ در انت، سمّی بلوچ ءَ سال گوْستگ اَنت وتی ابّا ءِ راہ چار اِنت، بی بی گُل ءَ چُشیں روچے نہ گوْز اِیت اے پریس کلب ءُ آ پریس کلب ءِ دیم ءَ میلانک مہ بیت، مَامَا کدیر ءَ سال گوْستگ اَنت گار ءُ بیگواھیں بلوچانی بنجل ءَ نِشتگ، اے بابت ءَ باریں ما کدی وتی توار ءَ بُرز کن اِیں،کدی روانک کَّش اِیں، کدی گوں زرینہ مری ءَ، گوں بی بی گُل ءَ، گوں سمّی ءَ گوں زاکر مجید ءِ مات ءَ ،گوں ھر ھما بلوچ ءِ مات ءُ گھاراں ھم کوپگ بِہ اِیں کہ سال پِر گوستگ اَنت کس نزانت آیانی چُک ءُ اولاد زندگ اَنت اگاں ناں،، ما اے بابت ءَ پرچے ءَ ھاموش ایں، زاناں اے زلم نہ اَنت، زیادتی نہ اَنت، ناانساپی نہ اَنت.؟ اگاں اے درگت ءَ ما ھمے پیم ءَ زالم ءِ ھلاپ ءَ، ناانساپی ءِ ھلاپ ءَ نا ھکی ءِ ھلاپ ءَ وتی توار چِست کُت ءُ روانک کَش اِت، زھرشانی کُت ءُ یک جاہ بیتیں گڑا ما سرپد بہ اِیں بلوچ ءَ وتی ھاموشی پروشتگ، بلوچ چِد ءُ گیش ناھکی اوپار نہ کنت، اگاں ناں گڑا ما سرپد بہ اِیں دنیگت ءَ بلوچ ءَ وتی چم جَھل جَتگ انت، بلوچ بس ھما زلم ءِ ھلاپ ءَ وتی نُک ءَ ترّکین ایت کہ آ زلم چہ بلوچ ءِ دست ءَ بیتگ..
ءُ بلوچ باید چہ میتگاں در بئیت، چہ ٹکّاں ءُ کُٹماں در بئیت، تَربت ءِ گیرت، گوادر ءِ گیرت، مند ءِ گیرت، پنجگور ءُ بلیدہ ءِ گیرتاں در بئیت.. رئیس، ھوت، آسکانی ءُ رند، شمبے زھی ءُ ملازھیاں در بئیت، چے ءَ کہ گوادر ءِ مکابلہ گوں تَربت ءَ نہ اِنت،تُربت ءِ مکابلہ گوں مند ءَ نہ اِنت، مند ءِ مکابلہ گوں پنجگور ءُ بلیدہ ءَ نہ اِنت،، بلوچستان ءِ کجام دمگ بہ بیت ھِچ ھَلک ءُ میتگ ءِ مکابلہ گوں یک ءُ دومیگ نہ اِنت، ناں مید ءِ مکابلہ گوں رئیس ءَ اِنت، ناں رئیس ءِ مکابلہ گوں آسکانی ءَ اِنت، نہ رند ءِ مکابلہ گوں اے دگران اِنت، نہ بلوچ ءِ مکابلہ گوں بلوچ ءَ اِنت، اے جُھد ءِ تَہ ءَ ھرکسی بَھر مان اِنت، ھر میتگ ءِ بَھر مان اِنت۔
سلامت بات اِت ءُ ھر کُجا اِت بلوچ ءِ بات اِت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ جتائیں جاھاں فوجی آپریشن، چار مردم بیگواہ

دی بلوچستان پوسٹ

رس اِتگیں ھالانی رد ءَ کیچ ءِ بلیدہ گردانک ءَ پاکستانی لشکر ءَ بیڑ برتگ ءُ سَے مردم آوار جتگ ءُ برتگ –

دمگی مردمانی رد ءَ سھبی مھلہ پاکستانی فوج ءَ گردانک ءَ بیڑ برتگ ءُ شگر اُللہ ء سردو، زاھد ء جنگیان ءُ اکرم ء نوربکش آوار جتگ ءُ برتگ اَنت –

دمگی مردمانی رد ءَ ھمے وڑ ءَ گوستگیں شپ ءَ اِشائے وھد ءَ پاکستانی فوج ءُ آئی ءِ داشتگیں ڈیتھ اسکواڈ ءِ کارمنداں بلیدہ میناز ءَ ابدین ءِ لوگ انگیر ءَ کرتگ ءُ جنین ءُ چُک جتگ اَنت

ھمے ساھت ءَ فوج ءِ گاڑی دیوال ءَ لگ اِتگ ءُ چریشی ءَ چَہ فوج ءِ دو کَس بیران ءُ سَے زدگ بیتگ –

چریشی ءِ پجیگ ءَ فوج ءَ ناسر نامے مردمے ءِ لوگ ءِ سر ءَ بیڑ برتگ ءُ اود ءَ ھم چُک ءُ چوریگ فوج ءَ جتگ اَنت ءُ لوگ ءِ ساز ءُ سامان دُزیتگ ءُ برتگ اَنت –

زانگ بہ بیت ڈیتھ اسکواڈ ءِ کارمنداں گوستگیں ھپتگ ءَ کیچ ءِ دمگ ڈنک ءَ یک لوگے ءِ سر ءَ دُزی ءِ ھاتر ءَ دور کرتگ ءُ چریشی ءَ چَہ اود ءَ ملکناز نامے زالبولے جنگ ءُ آئی ءِ کسانیں زھگ برمش زدگ بیتگ اَت کہ آ تنی وھدی کراچی ءَ درمانی بیگ ءَ اِنت –

چریشی ءِ پژدر ءَ بلوچستان ءِ جتائیں جاھاں بلوچ مھلوک ءُ سیاسی ءُ جتائیں تکاں بندوکیں مردم برانزگپتگ ءُ ڈیتھ اسکواڈ ءِ ھلاسی ءِ جار ءَ جنگ ءَ اَنت –

ھالانی تہ ءَ گوشگ بیتگ کہ مروچی کیچ ءَ ڈنک ءِ ویل ءَ دزمانجنی ءِ مستریں سروک سمیر سبزل پولیس ءَ دزگیر کرتگ –

ھمے وڑ ءَ گوستگیں شپ ءَ تمپ ءِ دمگ گومازی ءَ ھم فوج ءَ بیڑ برتگ ءُ سَے مردم کیپا ء سیٹ الی، آدم ء بکش اللہ ءُ امام جان ء نسرت گپتگ ءُ الکاپ ءَ جتگ ءُ مروچی یلہ کرتگ اَنت –

ھمے وڑ ءَ گوستگیں روچ ءَ آواران ءِ دمگ جائو ءَ یاسین ء پیر جان دو روچ ءَ پیسر وتی لوگ ءَ چَہ بازار ءَ روگ ءَ بیتگ ءُ پد ءَ راہ ءَ گار کنگ بیتگ –

گاری ءَ پد آئی ءِ پرپٹ دزکپتگ بلے آئی ءِ جند گار اِنت – یاسین جائو ءِ دمگ واجہ باگ شاھی تریپ ءِ جھمنند اِنت –

روکپتی بلوچستان ءَ یک زالبولے ءَ رسانکدراں گپ کنان ءَ گْوشتگ کہ من وت یکے چہ چلّگی ءِ وھداں بیتگ کہ چلّگی واستا ماں شستون ءِ نادراھجاہ ءَ شُت آں ، کہ من ءَ گوں ایمبولانس ءَ بُرت اِش، بژنی گپے، وھدیکہ لوٹ اِش من ءَ چہ ایمبولانس ءِ تھت ءَ ایر بگیج اَنت ءُ جلّگ جاہ ءِ تھت ءَ سوار بہ کن اَنت، کمپوڈریں جنینے کہ اود ءَ اَت ،ایمبولانس ءِ ڈرایوَر توار کت ئِے کہ ایشی ءَ چست کن ءُ آ تھت ءِ سر ءَ بر ئِے –
من گْوشت ایشی نامھرمے،
دگہ یک جنینے کہ آئی ءَ ھچ ھجاب نیست اَت ءُ وتارا انگریزانی وڑ ءَ کتگ اِت ئِے من ءَ گْوشت ئِے تو چِلّ ءَ پُرّ ئے بزاں ( ما اگاں ترا دست بہ جنیں، نادراہ بہ ایں)
ھَیر اے بیت ءُ شت!
گُدانی بدل کنگے وھد ءَ من آ گْوشت اَنت کہ من ءَ مدت کن اِت من گداں بدل کن آں، آیاں گْوشت؛ ما زاناں تئی نوکر ایں؟
منی چِلّگی ءَ رند منی ھمراہ / بالا سر / ءِ گْوانکو پچ اِش گپت ءُ دلمانگ اِت اَنت بہ جن اَنت ئِے دیوال ءَ ءُ بہ پْروش اَنت ئِے کہ دگہ کمپوڈرے ءَ تہ ءَ دور کُت ءُ مئے گوانکو پچ گپت،
منی چِلّگی ءَ چہ رند منی گونڈو نیمگ ءَ بِھ چَکّے اوں نہ جت اِش،
منی چمّاں آس کپت ءُ دیم دینّبوگ نیمگا کرت ءُ گْوشت، منی گونڈو ءَ چست کن، زھر ءَ پُرّ بیت گوں بد روھی ءَ من ءَ گوشت ئِے ۔ ما کسی نوکر نہ ایں، تئی لوگمان ءِ مردم کاینت گْونڈو ءَ چست کن اَنت –

گپ ءَ گْونڈ گِر آں، من اود ءَ وڑ وڑیں گپ ءُ بے اھترامی دیست کہ لھتیں آڈالیں مردم اَنت ناں آیاں ھجابے ھست ءُ ناں اِکلاکے، ( اخلاق ) ءُ ناں انسانیت ءُ زمیرے –
اگاں شستون ءِ چلّگی جاہ ءِ اے بدیں جاورانی دیم ءَ در میا اَنت ءُ مشکلاں اڈ مہ کن اَنت، دل ءَ سدّک آں کہ ماں چلّگی جاہ ءَ، مات ءُ چُک سر ءَ سِلّیں ویل کپ ایت، شکے نیست اے ویل چُک ءُ ماتانی مرگ ءِ سوَب ھم بوت کنت ۔
دزبندی اِنت کہ اگاں واگدار یا دوزواھے اے شھر ءَ ھست گڑا اے مشکلاں اڑ بہ کن اَنت ۔

بُلیدہ گردانک ءَ ایف سی بُنجل ءِ سر ءَ بیتگیں اُرش ءِ زمہ واری ءَ منّیں – بی آر اے

دی بلوچستان پوسٹ

اُرشءَ چَہ دو سپاھی کُشتگ ءُ یکے ٹپی کُتگ۔ بیبگر بلوچ

بلوچ ریپبلکن آرمی ءِ جارکش بیبگر بلوچ ءَ رسانکدر ءَ چَہ شِنگ کُتگیں وتی درشان ءِ تھا گُشتگ کہ گْوستگیں روچ ءَ دیگر ءِ وھد ءَ بُلیدہ ءِ دمگ گردانک ءَ مئے سرمچاراں پاکستانی لشکر ءِ بُنجل ءِ سر ءَ نوکین ءُ وتکاریں سلاھانی گون ءَ اُرش کُتگ ءُ دو نپر کُشتگ ءُ یک ءِ ٹپّی کُتگ،
آئی ءَ گُشتگ کہ سرمچاراں ھما وھد ءَ اُرش کُتگ کہ لشکر ءِ کارمند وتی سنگراں چَہ ڈن گام جنگ ءَ بوتگ اَنت ۔

بیبگر بلوچ ءَ دیمترا وتی درشان ءِ تھا گُشتگ کہ بلوچستان ءِآجوئی ءُ زورگیریں لشکر ءِ درایگ ءَ داں مئے جنگ ھمے وڑ ءَ برجاہ مان اِیت –

شال ءَ بیگواھیں مردمانی درگیجگ ءِ ھاتر ءَ زھرشانی برجاہ

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل 3 ھزار 9سد ءُ ھپتاد نُھ روچ سرجم بیتگ –

این ڈی پی ءِ رھشون سناء بلوچ، بلوچ اسٹوڈنس ایکشن کمیٹی ءِ باسک ءُ لس مھلوک ءَ بنجل ءِ تر ءُ تاب کُتگ بیگواھیں مردمانی کھولاں گوں دلپدردی درشان کرتگ –

ھمے درگت وائس فار بلوچ مسنگ پرسنز ءِ رھشون ماماقدیر بلوچ ءَ گْوشتگ کہ بلوچستان ءَ اے ایمن ءُ سارتیں جُھد ءَ بلوچ راج ءِ کسان سالاں بگر تاں ھشتاد سالی ئیں کماشاں وتی جان ندر کُرتگ۔گْوست ءِ ھستیں وھد ءُ باندات بلوچ جنینانی دلیری،بھادری،جزبگ ءُ کِرد ءَ یات کنگ ءَ اِنت ءُ یات کنت-

آئی ءَ دیمترا گْوشتگ کہ جھان ءِ دیمروی ءَ جنین ءِ یک جوانیں کِردمانے ھست۔ مرچی ھم بلوچ جنیناں ھما دود برجاہ داشتگ۔ایشے درور جنینانی مُچے،روانک ءُ زھرشانیاں بھرزیرگ اِنت،وانگ ءُ زانگ،سیاسی دیواناں،ھیلکاری ءِ ردوم زیرگ،یک منگھیں درورے۔

ماما قدیر ءَ گْوشتگ کہ مرچی اے ایمنیں جُھد ءَ ھواریں جنین بازیں گلانی سروکے ءَ کنگ ءَ اَنت۔جنینانی راجداری،چاگردی ءُ سَسّائی ھیلکاری ءِ ھواری ءَ اے لُٹ ءُ پُل ءُ زورگِری ءِ بگری ءَ جوانیں کردمان ءَ پیلوکنگ ءَ اَنت –

آئی ءَ گْوشتگ کہ اے جاوراں پاکستان بھمنتگے ءِ آماچ اِنت ءُ اے بھمنتگے ءَ آ جنین،کماش ءُ زھگانی سر ءَ زوراکی کنگ ءُ شھید کنگ ءَ اِنت۔بلے اے دُرس پاکستانی لشکر ءِ سَسّائی نادراھی ءُ ناگیگی ءَ ابید دگہ ھچ نہ اِنت،چہ اے بےدلیں پندلاں بلوچ جنین چہ وتی کاراں گستا نہ بنت،بلکیں پاکستان ءِ چوشیں کاراں آھانی دلانی تہ ءَ زھر گیش ودی بیت-

ڈنک ویل ءِ ھلاپ ءَ بلوچستان ءِ مزن شھر شال ءَ ھوار، ھاران، وڈھ ءُ دگہ دمگانی تھ ءَ روانک کَشگ بیتگ ءُ زھرشانی کنگ بیتگ ۔

پنچ شمبے ءَ ھاران ءِ ھنکین ءَ سول سوسائٹی ءِ نیمگ ءَ چہ زھرشانی روانک ءِ کَشگ بیتگ کہ جتائیں دمکاں چہ گوزان ءُ پریس کلب ءَ سربیتگ کہ اود ءَ یک زھرشانی ءِ دروشمے زرتگ ئِے۔

زھرشانی ءَ زند ءِ جتائیں تکاں گوں سیادی داروکیں مردماں ھوار جنین ءُ زھگاں ھم بھر زرتگ۔ زھرشانی کنوکاں گوشتگ شھید ملکناز ءَ سرجمیں بلوچستان زلم ءُ زوراکیانی ھلاپ ءَ اوشتارینتگ۔ ڈنک ءِ ویل تھنا یک ھنکینے ءِ کسہ نہ اِنت بلکیں اے ھاران ءَ ھوار سرجمیں بلوچستان ءِ کسہ ءَ درشان کنگ ءَ اِنت۔

زھرشانی ءَ گوں تران کنوکانی گوشتگ اَت کہ پاکستان ءِ رھبند مارا گپ کنگ ءِ ھک دنت بلے گوستگیں بازیں سالاں چہ ادے مھلوک ترسینگ ءُ بے توار کنگ بیتگ اَنت ۔ ھمے وڑ ءَ اے رھبند مردمانی پھازگ ءِ گپ ءَ کنت بلے اد ءَ لس مردماں ابید سلکاراں ڈنک ءِ ویل ءِ دروشم ءَ پھازگ ءَ اَنت۔

برمش یکجھتی کمیٹی ءِ نیمگ مزن شھر شال ءَ زھرشانی کنگ بیتگ کہ آئی ءِ تھ ءَ نودربر، سیاسی ءُ چاگردی جھد کاران ھوار لس مھلوک ءَ ھم بھر زرتگ۔

زھرشانی روانک جتائیں راھاں چہ گوزان شال ءِ پریس کلب ءَ سربیتگ ءُ ھمے میان ءَ زھرشانی کنوکاں ڈنک ءِ ویل ءُ بلوچستان ءَ ڈیتھ اسکواڈ ءِ مستری کنوکانی ھلاپ ءَ اوگام جتگ –

زھرشانی کنوکانی گْوشت کہ یک نیمگ ءِ گوشگ بیت کہ بلوچستان ءِ جاورھال شر اَنت بلے دومی نیمگ ءَ اگاں ماچاریں تاں گندگ بیت زوراکیانی آماچ کنگ بیتگ۔

ڈنک ءِ ویل ءِ کارمندانی درگت ءَ ھال اِنت کہ ھمے ڈیتھ اسکواڈ پارلیمان ءَ نشتگیں بازیں مردمانی مستری گون اِنت کہ ایشانی تھ ءَ درست سلکاریں مردم ھوار اَنت ءُ ایشاں وتی ھندانی تھ ءَ سلکاری ءِ آزاتی دیگ بیتگ۔

زھرشانی کنوکانی گْوشت کہ ھمے مردم روچ ء ٹِک ءَ ٹراسپورٹرانی کرا بھتہ زیرگ، مردمانی بیگواہ کنگ، داں انچو کا کہ لوگاں چہ جنکاں بیگواہ کنگ ءُ زور سیر کنگ ءِ جرمکاریانی تھ ءَ ھوار اَنت۔ ءُ اے یک انچائیں ٹولی اَنت کہ ایشی سیادی گوں جرمکاریں سیاسی گلانی گوم ءَ اِنت ھم۔

زھرشانی کنوکاں گوشت کہ ھمے مردمانی اکس سیاسی گل ءِ رھشونانی ھمراھی ءَ گندگ بنت ۔ ایشاں درست زان اَنت کہ اے یک تُرس پیدا کنوکیں ٹولی اَنت، اے تپنگانی پجیگ ءَ سر زائر ءَ چکر اَنت، پولیس ایشاں دست ھم جت نہ کنت پرچہ ایشانی سر ءَ تاگت وریں مردمانی دست اَنت –

آیاں دیمترا گوشتگ کہ بلوچستان ءِ جاور ھال سک ھراب اَنت، ھزارانی کساس ءَ مردم گار اَنت، ناشناسیں مردمانی دست ءَ مردم مرگ ءَ اَنت، رسانک بے توار اَنت ندارہ ءُ ندارہ چارگ ءَ اَنت۔ بے کاری آسمان ءَ سر اِنت، زھگ ءُ زالبولانی تھ ءَ ورگ ءِ سک باز کمی اِنت، بلوچستان ءِ وسائلانی لُٹ ءُ پُل برجاہ اِنت، گچین کاریانی نام ءَ مردم سلیکٹ کنگ بنت، انٹرنیٹ بند اِنت، اے درستیں جاور یک جنگ زدگیں چاگردے ءِ تہ ءَ ھمے دروشم ءَ پیش دارنت۔

زھرشانی کنوکاں سرکار ءَ گوں دلگوش کنان ءَ گوشتگ کہ جاورانی تھ ءَ شرتر اِنت کہ شما بلوچستان ءَ یک جنگ زدگیں دمگے نامین اِت، دانکہ مردماں تسلی بہ بیت آ یک جنگ زدگیں چاگرد ے ءِ بھر کہ اود ءَ گپ کنگ گناہ اِنت۔

زھرشانی کنوکاں گوشت کہ ما اے زھرشانی ءِ پتر ءَ چہ ھمے لوٹ ءَ کن ایں ڈیتھ اسکواڈ وڑیں ٹولی زوت ھلاس کنگ بہ بنت ءُ ڈنک ءِ ویل ءَ ھواریں درستیں اسل جرمکاراں ءُ آیانی کمکاراں دزگیر کنگ ءُ ترند ءَ چہ ترندتریں سِزا دیگ بہ بیت، ھاس بلوچستان ءَ تاگت وریں گلانی مستری ءَ ردوم زیروکیں سلاہ بندیں ٹولی ھلاس کنگ بہ بنت ۔

ھمے وڑ ءَ آل اسٹوڈنٹس اتھاد ءُ سول سوسائٹی وڈھ ءِ نیمگ ءَ چہ ڈنک ویک ءِ ھلاپ ءَ وڈھ ءَ یک زھرشانی روانک ءِ کُشگ بیتگ کہ جتائیں دگانی سر ءَ جُنزگ ءَ پد وڈھ پریس کلب ءِ دیما یک مُچی ءِ رنگ ءَ اتکگ-

ھمے وڑ ءَ کیچ ءِ دمگ دشت ءَ زھگاں ھوار دگہ مردماں گوں برمش ءَ یکجاھی ءِ ھاترءَ وتی زھرشانی درشان کُتگ۔

زانگ بہ بیت کہ ڈنک ءِ ویل ءِ ھلاپ ءَ گوستگیں بازیں روچاں بلوچستان ءِ جتائیں دمگانی تھ ءَ کسانیں ءُ مزنیں زھرشانی کنگ بیگ ءَ اِنت کہ ایشانی تھ ءَ سرجمیں بلوچستان ءَ سرکار ءِ داشتگیں سلاہ بندیں مردماں چہ سلاھاں زبھر کنگ ءَ ھوار ڈنک ءِ ویل ءَ ھواریں مردمانی مستر سمیر سبزل ءِ دزگیری ءِ لوٹ اِنت۔

جتاھیں شھراں زھرشانیاں ابید چاگردی رسانک دراں ھم #JusticeForBramsh ءِ ھیشٹیگ بازیں روچاں چہ ٹرینڈ کنگ ءَ اِنت۔ ایشی ءَ ھوار نصیر آباد، ھب، مستونگ، کراچی ءُ کلرشاخ ءَ ویل ءِ درگت ءَ زھرشانی ءِ جار پرینگ بیتگ۔

جَوّکْ

ندّر پہ شَھید مَلِکناز ءُ آئی زھگ برمش ءِ نام ءَ

آدلؔ جلالؔ: واھگانی مَتّاہ

دی بلوچستان پوسٹ

برمش ءِ بالاد ءِ براہ بئیں بیا اِت
واھگانی متاہ بئیں بیا اِت

روک کتگ آس کہ بَدّاں جوریں
میر ءُ مھتِر گوں اِشاں شوریں
ھون ءِ شاھجُو تچ ایت شاھکوریں
سِلگتاں چے جتاہ بئیں بیا اِت
واھگانی متاہ بئیں بیا اِت

جان ءَ بکش ءَ اَنت پہ وتی راج ءَ
گوہ نہ وارت دژمِنے بہ بارت باج ءَ
ڈاہ ءُ آشوب انت بے وس اِنت واجہ
نازیں مات ءِ ستاہ بئیں بیا اِت
واھگانی متاہ بئیں بیا ات

دژمِن ءِ کِردے بستگیں بنداں
گژّن وارتگ بلوچ ءِ پَر زِنداں
جَھ جن اِت واھگانی وازمنداں
جُھدے نوکیں سباہ بئیں بیا ات
واھگانی مَتاہ بئیں بیا ات

شیرزالاں چَہ شیر میتکگ ما
پوہ اِنت بدواہ کہ بیر میتکگ ما
پہ کوھی جنگولاں گیر میتکگ ما
راج ءِ جھد ءُ جپاہ بئیں بیا ات
واھگانی متاہ بیئں بیا ات

زُلم ءُ زوراں تئی گراستگ انت مردم
برمش ءِ برمش ءَ چہ جستگ انت مردم
چاریں آتراپاں نشتگ انت مردم
مَل مِڑوکاں پہ راہ بئیں بیا ات
واھگانی متاہ بئیں بیا ات

شھید مَلِکناز ءِ ریتکگیں ھون انت
ھو شھدانی ساہ ءُ سر گون انت
مرزبوم ءَ سرانی سر رون انت
دُزّ ءُ ڈُنگانی پَدءَ بئیں بیا ات
واھگانی متاہ بئیں بیا ات

پشت نہ کپتگ دگہ چشیں ھبرے
بوتگ بندات نوں تچکیں سپرے
جھد ءِ سر ھیلاں پہ جوانیں نپرے
کوم ءِ لوٹ ءُ وپا بئیں بیا ات
واھگانی متاہ بئیں بیا ات

کوہ سیلیمان ءِ ، روانک ءَ گِست ءَ اَنت !!
نال ءِ ورنا گش ئے کہ بے ڈاہ اَنت !!
وڈّ ءِ مینگل چی ءَ چو بے ساہ اَنت ؟
جنگ کن ایں جنگ جاہ بئیں بیا ات
واھگانی متاہ بئیں بیا ات

سی ءُ سے سال پیش ھمے داب ءَ
جوریں بدواہ گَشتّگ انت ٹاب ءَ
یاسمین !! جیونی ءِ اتک واب ءَ
سنگراں تا ماں تا بئیں بیا ات
واھگانی متاہ بئیں بیا ات

چست بنت واھگانی ٹپیں دل
راہ ھمیش انت جلال تئی منزل
کوم ءِ مھرانی مِنّت ءَ آدل
پہ زمین ءَ پِدا بئیں بیا ات
واھگانی متاہ بئیں بیا ات