نبشتانک: منی مھروانیں سنگت شھید فدا جان
نبشتہ کار: پیٹر بلوچ
دی بلوچستان پوسٹ
من برے برے ننداں ءُ آئی ءِ ترانگاں کپ آں من وت ءَ یک وش بھتیں مردمے سرپد باں ھمے ھاتر ءَ من شھید انور پنام فدا جان ءِ وڑیں لائک ءُ بھادریں سنگتے ءَ گوں یک کسانیں وھدے گوازینت من شھید فدا جان چہ باز نزیک ءَ دیستگ آئی ءِ بھادری ءُ آئی ءِ مھروانی کل منی دیم ءَ یک پہ یک ءَ پدر بوتگ اَنت انچُش کہ من وتی گوستگیں نبشتانکے ءِ تہ ءَ آئی ءِ بھادری ءِ سر ءَ کمیں نبشتہ کُتگ اَت بلے اے نبشتانک پہ آئی ءِ گوں مھروانی ءَ اِنت شھید فدا جان اُمر ءَ سک کسان اَت ۔ بلے آئی ءِ کِرادر ءِ سکیں مزن اِنت ۔
منی نام ءِ اُشکنگ ءَ بازیں مردمے ھیران بوتگ ؟ ھمے ھاتر ءَ پیٹربلوچ یک بلائیں کِرادارے ءِ واھند اِنت پیٹر بلوچ ھما دلیر ءُ بھادریں سنگت بوتگ آ مدام گوں شھید سردو جان ءَ ھوار بوتگ اگاں کجام دیوان ءَ شھید سردو جان ءِ نام گرگ بیت گڑا الم آئی نام ھم گرگ بیت،بلوچ راج ءِ تہ ءَ شھید سردو جان ءُ شھید پیٹر جان ءِ نام شریں وڑے ءَ گرگ بنت ، چہ بلوچ راج ءِ جنگول ءُ بھادریں بچاں زانگ بنت ۔ شھید سردوجان ءُ شھید پیٹر جان 13 دسمبر 2015 مشکے تنک ءَ پاکستانی پوج ءَ انگیر کپتگ اَنت ءُ شھید بوت اَنت ۔
اے منی اولی رند نہ اَت من شھید فدا جان دیست من ءَ ساری ءَ سَے ءُ چار رند ءَ دیستگ بلے اے رندی من ھاس پہ شھید فدا جان ءِ شُتگ اتاں 5 جنوری 2016 ءَ منی ارادہ ھمیش اَت من چار روچ ءَ فدا جان ءَ گوں گِندُکے کناں ءُ پد ءَ واتر باں ۔ بلے شھید فدا جان ھما مھروان اَت آئی مھراں چہ کس ءَ جدا بوت نہ کنت آ چَہ جنگ ءِ ھنر ءَ ابید یک مھروانیں سنگتے اَت من یک کسانیں وھدے گوں آئی ءَ ھوار گوازینت ءَ شھید فدا جان اُمر ءَ کسانیں مردمے اَت بلے آئی ءِ کردار سک مزن اِنت ۔
اے منی دومی رند اَت کہ من گوں آئی ءَ سپرے شُت آں ءُ واتر پہ وتی ٹکان ءِ نیمگ ءَ روگ ءَ اتاں راہ ءِ دیم ءَ میتگے اَت ۔ شھید فدا جان ھمے گُشت سنگتاں برو ایں اے میتگ ءَ چاھے ور ایں ءُ دمے کَش ایں گڑا پد ءَ رو ایں ، گڑا ما شُت ایں ھما میتگ ءَ کماشے ساڑی اَت مارا چاہ ءُ آپ ئِے دات ۔ من ءَ روک روک ءَ چارگ ءَ اَت ، من وت ھیران اتاں اے ناکو ءَ من ءَ زند ء وت نہ دیستگ اے وڑ چی ءَ چار ایت ۔ چہ دمانے ءَ پد ناکو ءَ درائینت ءُ گُشت فدا جان من اے زھگ ءَ ھما اِنت چارگ ءَ آں من ءَ اے یک مردمے ءِ گوائی ءَ دنت ۔ شھید فداجان کند ات ءُ گشت ابّا بُگش باریں ۔؟ ناکو ءَ لھمیں آسندے کشت ءُ گُشت فدا جان اے زھگ پورا شھید پیٹر جان ءِ چھرگ ءَ جنت ۔ شھید فدا جان کندگے جت ءُ گُشت ھو ابّا راستے آ شھید سردو جان ءِ پیٹر بوتگ ءُ مرچی ءَ پد اے منی پیٹر اِنت ۔
ھما میتگ ءَ شھید فدا جان ءَ وتی گونیں کلیں سنگتان ءَ گُشت مرچی ءَ پد اے سنگت ءِ نام پیٹر اِنت، آ شھید سردو جان ءِ پیٹر بوتگ اے منی پیٹر اِنت ، من باز گشت شھید پیٹر جان ءِ بلائیں کِردے بوتگ من ءَ آ بود ءُ کمال کُج اِنت کہ تو من ءَ اے وڑیں یک نامے پرکن ئے ؟ آئی ءَ بچکند ات ءُ گشت تو ھما شھید پیٹر جان ءِ کاروان ءَ ھوار ئے اگاں تو دُژمن ءِ دست ءَ شھید بوت ئے گڑا تو آئی ءِ نام ءِ ھک پورا کرتگ آ روچ ءَ اللہ پہ میاریت تو چو آدگیں لگورانی وڑ ءَ دُژمن سلام بہ کن ئے، اے تچکیں گپے تو شھید ءِ نام ءَ نہ بر ئے وتی نام ءَ زانگ بئے ۔ ما وھدے وتی ٹکانہ ءَ شُت ایں ، شھید فدا جان پہ مسکرائی سنگتان ءَ سوگند دات ءُ گشت چہ مرچی ءَ پد اے سنگت ءَ را شما کلیں سنگت پیٹر نام ءَ توار کن اِت ۔
وھد ما وتی آدگیں سنگتانی گندُک ءَ شُت ایں ھر کس ءَ پیٹر ءِ نام اُشکت ھجکہ بوت ۔ گڑا شھید ءِ گپ ھمیش اَت اے منی پیٹر اِنت شھید فدا جان ءِ بھادری ءُ جنگ ستاہ کرز انت ۔ بلے آئی ءِ مھروانی بے مٹ اَت شھید فدا جان ھنچیں مھروانے اَت من کسانیں وھدے گوں آئی ءَ ھمراہ اتاں من نہ دیست کہ یک سنگتے چہ آئی ءَ دلگران ات ، ھر کجام سنگت ءَ ھمے مارت چہ کلیں سنگتاں گیش من ءَ مھر دیگ ءَ اِنت اگاں کسے گوں آئی ھوار بوتیں گڑا آ مردم ءَ شھید فدا جان یلہ دات نہ کُت من پہ چار روچے گندوک ءَ شتگ اَت اوں من داں ھپت ماہ ءَ آئی گندوک ءَ سیر نہ کرت ۔ من ءَ یاد اِنت یک سُھبے ءَ مھلہ شھید فدا جان چہ واب ءَ پاد اتک ءُ من ءَ توار ئِے کرت بیا من ءُ تو دیوانے کن ایں ، گڑا من پاد اتکاں ءُ من ءُ آ شُت ایں یک سیاھگے ءَ نشت ایں، آئی بچکندے جت ءُ گشُت من ءَ شمئے دمگ ءَ کارے ھست ترا سنگتے دیاں تو برو ۔ لھتیں روچ ءَ پد کایاں شمئے نیمگ ءَ تو وتی گونڈلاں ءُ سنگتاں ھم گند ئے ۔ من گشت شر اِنت ترا کار ھست من روان ، پچکندے جت ءُ گشت ئِے پد ءَ ھواراں ۔
18 جولائی 2016 اَت شھید فدا جان منی اُلاک ءُ سامان ٹھینت اَنت موکل وھد ءَ من چٹ دگہ وڑ بوگ ءَ اتاں ایمانداری من ءَ آئی ءِ جدائی بے کساس تورگ ءَ اَت ۔ آئی ءَ منی تب مارت ءُ من ءَ ھمباز ئِے کُت گشُت ئِے انشااللہ زوت ءَ ھوار بہ ایں ۔ زندگ بہ ایں گندگ بہ ایں ، گڑا ما موکل کُت ءُ رھادگ بوت ایں دیم پہ وتی سپر ءَ دہ روچ ءَ چہ پد ، آ گوں وتی سنگتاں اھت مئے نیمگ ءَ پنچ روچ ءَ داشت ئِے ءُ پد ءَ موکل ئِے کرت ءُ شُت وتی نیمگ ءَ منی ءُ آئی ھال ءُ اھوال ھست اَت ۔ من پازدہ روچ ءَ پد شھید فدا جان ءِ نیمگ ءَ چکرے جت دو روچ گندُک کرت ۔ آئی من ءَ موکل دات گُشت ترا اَئید ءَ آھگی انت اَئید ءَ منی نیمگ ءَ بیا.من گشُت شر انشااللہ الّم کایاں روچ گوزان ات اَنت اَئید اھت من دو روچ ساری شُت آں من اَئید ءَ ھمود ءَ داشت اَئید ءَ دو روچ گوست من ءَ آئی ءَ یک موٹر سائیکلے دات یک شپے دورگندے ءُ یک واکی ٹاکی یے دات ءُ گُشت ئِے اے منی نیمگ ءَ تی ٹیکی اَنت ،من ءَ کولواہ ءِ نیمگ ءَ سپرے ھست ۔ من ءَ موکل دات گُشت ئِے انوں برو انشااللہ زوت وت ءَ گندایں ، رخصت اف اواران سنگت ۔
گڑا من موکل کرت ءُ دیم پہ وتی نیمگ ءَ رھادگ بوت آں ، بلے من اے گپ نزانت منی گوں شھید فداجان ءَ گڈی دیدار بیت ۔ شھید سردو جان وتی سنگت پیٹر ءَ گوں وت ھوار بُرت من اے گپ نزاں انت شھید فدا جان وتی پیٹر ءَ یلہ کنت ءُ ساری ءَ روت من وھدے وتی جاہ ءَ سربوت آں لھتیں کار ءِ ھاتر ءَ چہ فون ءِ نیٹورک ءَ در آھتاں من اوتاکے ءَ شُتگ اتاں لھتیں روچ ءَ پد سنگتے اتک ءُ ھمے گپ ئِے جت دو روچ ساری ( 5 اکتوبر 2016 ) ءَ شھید فدا جان ءُ دگہ دو سنگت شھید بوتگ یکے سنگتے اللہ بکش پنام گوھرام اِنت ءُ دومی سنگت ھاسل کازی پنام کندیل اِنت ھال ( نیوز ) ھمے وڑ اِنت ھاسل کازی ءَ پوج ءَ کولواہ ءَ دستگیری ءَ پد شھید کُتگ ۔ شھید انور بلوچ پنام فدا ، شھید اللہ بکش بلوچ پنام گوھرام ءَ پاکستانی بالی گراباں تیرگواری ءَ شھید بوتگ اَنت ۔ بلے منی زھن اے گپ ءَ باور کنگ ءَ نہ اَت فدا جان شھید کنگ بوتگ من ھمے سرپد بوت آں اے دروگے بیت دو روچ ءَ پد من وت فون ءِ نیٹورک ءَ اھتاں ھرکس ءَ فون کناں ھمے گپ اِنت گڑا من ءَ باور بوت شھید فدا جان وتی گلزمین ءِ ھک اد ءَ کرتگ ۔ داں جھان ھست شھید فدا جان گوں کل شھیداں ابدمان ءُ نمیران اِنت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت
