نبشانک: من ھم باید وتی ڈگری ءَ یلہ بکناں بلے
نبشتہ کار: جاوید بلوچ
دی بلوچستان پوسٹ
ھیات بلوچ ءِ شھید بوگ ءَ پد منی ھیالاں ناں اے ھون ء ناھکّ ءَ دنیا جَکسینتگ ءُ ناں ھمے زھرشانی ءُ کُکاراں بلے ھو سوشل میڈیا ءُ سوشل میڈیا ءَ اتکگیں ھما اکس ءَ کہ کربلا ءِ دروشم ءَ پیشدارگ ءَ انت، گُش انت وھدے یزید ءِ سپائیاں واجہ ھسین شھید کت ءُ ھچ مردین پَش نہ کپت گڑا بی بی زینب آئی ءِ لاش ءِ دیم ءَ موتک کنگ ءَ لگ ات ءُ برے دیم مدینہ ءِ نیم ءَ ءُ برے بُرز ءَ ھدا ءِ نیم ءَ کُت ءُ جُست کُت واجہ ھدا تو گندگ ءَ ئے؟ پیرک مھمد! پاتمہ ءُ الی شما گندگ ءَ اِت؟۔۔۔۔۔
ھیات ءِ پیریں پت ءُ مات ءِ دیم ءَ کپتگیں لاش ھما کربلا ءِ ءُ یزید ءِ زوراکیانی نشان انت بلے مُلا اشاں بیان زان ئے چے ءَ نہ کنت؟ چے ءَ کہ یزید ءِ دھر ءَ ھم ھمے وڑیں کاسگ چَٹیں ملایاں واجہ ھسین میاریگ کتگ بوتگ ءُ آ ھم ریاست ءِ ھم توار بوتگ انت انچش کہ انی۔
ھیات ءِ یات ءَ 17 اگست ءَ گوادرءَ موم بتی رژنا کنگ بوتگ ات ءُ جیونی ءِ سنگت ھم اتکگ اِت اَنت ھمے روچ ءَ ٹوئیٹر جُنز ھم برجاہ ات۔ موم بتی مراگاہ ءَ چہ پھیک بوگ ءَ پد ما کساس دہ سنگت تیاب ءِ دپ ءَ نشت این ءُ ھمے ٹرینڈ ءَ دمان دمان ءِ سر ءَ چارگ ءَ ات ایں، سلا بلوچ وت ھم چارگ ءَ ات بلے پد ءَ ھم جُست ءَ اَت کہ بچار ٹرینڈ جھل نہ کپت ناں؟ ما درست ھور پد ءَ ریفریش جنگ ءَ لگ اِت اِیں۔۔۔۔ ھمد ءَسر ناسر سھرابی گوزگ ءَ ات ءُ کندگ ءَ لگ اِت ” من گُشت شما درست ھور نشتگ ات ءُ موبایلاں گُلائیش ات شمے اکسے چیروکائی کشّاں بلے ابید شمے ھال دیگ ءَ مناسب نہ انت ءُ شمارا ھال بہ داتیں آ کیپیت نہ بیتگ ات” ما درستاں کند ات۔۔۔۔
بلے آ روچی منی دل ءَ ریاست ءِ ھمے پالیسی بار بار پیداک ات کہ آئی ءَ اے سرمایہ دارانہ میڈیا ءُ رسانکءِ کاروبار ءَ کرونا وئیل ءِ نام ءَ باریں چُنت بلوچ نودربر تالیم جَت کُت ءُ ڈالچاریں بلوچستان ءَ دیم دات تاکہ ملک ءِ وتی نودربراں آن لائن تالیم بدنت ءُ بلوچ چر ایشی ءَ زبھر بہ بنت ۔ مرچی ھمے شُومّیں آن لائن کلاسانی سوب بیت کہ ھیات ملک ءَ اتک ءُ شھید بوت ءُ ما یونیورسٹی ءِ سنگت کہ دور دوریں دمگاں نشتگیں انی ھور ایں پہ شھید ھیات ءَ ٹرینڈ چلائینگ ءَ ایں۔۔۔۔۔۔
مرچی ھیات ءِ شھید کنگ ءَ پد سنگت وتی ڈگریاں یلہ کنگ ءَ انت ءُ ریاست ءِ دیم ءَ وتی زھرشانی ءَ درشان کنگ ءَ انت۔ من نزاناں اے سنگت چونیں لوگاں گوں سیادی دار انت؟ کجام سیاسی گل ءِ نودربر گل ءِ باسک انت؟ یا چون وتی وتی یونیورسٹیانی سیٹ ءِ گرگ ءَ سوبمند بوتگ انت؟ پد ءَ چون چہ کجا وتی داھلہ ءُ سیمسٹر ءِ زر آیاں شوھاز کتگ انت ءُ جم داتگ انت؟ آ شال ءَ ایم پی ہاسٹل ءُ سیکٹریٹ ءَ شُتگ انت یا انا۔۔۔۔ آ وتی ھلک ءِ میر، واجہ، لینڈ مافیا، ڈرگ مافیا، سرکاری آفیسر، سوشل ایکٹویسٹ ءُ وانگ ءَ گوں ھُدوناکیں مردم، آیاں گُشتگ انت یا انا۔۔۔۔۔ بلے من ھیات ءِ بابت ءَ ھمے پوسٹ دیست کہ آئی ءَ شپ ءِ ورگانی توک ءَ وتی سھب ءِ نھاری سَر آؤرتگ ءُ وارتگ۔۔۔۔۔
ھمے اے ریاست ءُ نزام ءِ توک ءَ نودربر بوگ ءِ درد ءَ پدر کنت، منی ھیالاں اد ءَ ھر چیز بوگ سک ارزان انت بلے نودربر بوگ سک گران انت۔ نودربری ترا بَگا جوڑ کنت (بَگا ھما کہ تئی چمانی آپ کپ ایت ءُ تو ھما مردم ءِ کر ءَ ھم رو ئے کہ آئی ءَ تئی زمیر ھچ بر یک انسانے، بلوچے یا اِلم دوستے نہ لِیک ایت، ھما دُز ءُ زمیر پُروشیں واپاری ءِ کر ءَ وتی بزگی ءُ بے وسی ءِ داستان ءَ بیان کن ئے کہ آ ھمیشانی سود ءَ گر انت) نودربر بوگ پینڈوک، متلبی، نالائکیں مردمانی جھنڈھانی زوروک، پہ آیاں تران کنوک ءُ چاپلوس جوڑ کنت۔
وتی ھمروچی ئیں پگرانی تہ ءَ جُشوک، بلڈ پریشر ءِ نادراہ، وتی مات ءُ پت ءُ برات ءُ گوھارانی دیستگیں وابانی پان پاہ ءُ کھول ءِ کَشی ءُ کِرّی ءُ میتگ ءِ مردمانی بٹاک ءُ توراکیں باپُشتی گپ ءُ دیم پہ دیمی شگاناں اِش کُنگ پرمائیت۔۔۔۔ دل تنگ ءُ دل سِند کنت۔۔۔۔ ارزانی ءَ یلہ دیگ بیت کنت؟
ھدا بکنت درست چُش مہ بنت۔ بلے اگاں شھید ھیات ءِ داستان ھما ھُشکیں نان کہ آئی ءَ شپ ءَ سَرآؤرتگ ءُ روچ ءَ وارتگ گڑا الم آئی ءَ منی وڑ ءَ وتی دمگ ءِ میر ءُ مُتبر، وتی دمگانی نمائندگ ءُ واجہ کار وتی شُناسائیں ھر شَر ءُ شِریں مردمانی سر ءَ یک ناں یک کلوھے الم دیم داتگ وھدے آئی ءِ سیمسٹر یا ہاسٹل یا اسکالرشپس ءِ جیڑھے بوتگ۔۔۔۔۔
برے برے وھدے کلوہ ءِ تہ ءَ سرجم وتی پجار ئِے نبشتہ کنگ ءَ (وتی نام، پت ءِ ءُ پیروک ءِ نام، کھول ءِ چاپلوس یا نامدار تریں مردم ءِ نام، جاگہ ءُ میتگ ءِ نام) نبشتہ کنگ ءَ پد ھم جواب نیاتکگ گڑا بگند ئے شھید ھیات ءَ اے ھم جیڑ اِتگ ءُ وت ءَ رَد داتگ کہ مزنیں مردم بلوچی وانگ نہ زان انت ءُ کلوہ پد ءَ اردو ءُ انگلش ءَ نبشتہ کتگ کہ بلکیں جوابے بئیت بلے۔۔۔۔۔ “خبردار اپنی نسلوں کو تعلیم سے دور رکھو اور چاپلوس بڑھاتے جاؤ”
من ھچ آن لائن کلاس نہ گپت ءُ وتی کلاسانی گروپاں ھچ بر جواب نہ دات بلے شھداد ءِ جنگ ءَ پد یک بلوچ نودربرے ءِ درشان یک بلاگے ءِ توک ءَ نبشتہ کت انت کہ “بلوچ طالب علموں کا یونیورسٹیوں سے پہاڑوں تک کا سفر” ءُ حال حوال ءَ پبلش کُت اے من پہ زور وتی کلاسانی گروپاں دیم دات۔ منی یک میڈم ءِ من ءَ پون کنت ءُ جُست کنت کہ اے کھریں ءُ ازابیں دھر ءَ تو آن لائن کلاس گرگ ءَ و نہ ئے بلے موبایل ءِ سر ءَ ھم ھال ءُ اھوال نہ کن ئے؟
منی کر ءَ جواب ایوک ءَ پہ بلوچ نودربرے ءَ ھما ات اَنت کہ من آ نبشتانک ءِ توک ءَ نویس اتگ ات اَنت ۔۔۔۔ گوں تتروکیں زبان ءَ من ءَ بانک گش ایت اناں! ترا وانگی انت، اگاں ھچ نہ بیت وتی سیمسٹراں ھم بدار بلے ترا ڈگری سرجم کنگی انت۔
من ھمے ڈگری ءَ مرچی یلہ بکناں؟ چوناھا روچ ءِ ناں روچے بے زری، اسکالرشپانی بند بوگ ءُ ھمروچی ئیں نوکیں پندلاں، ڈگری وت پچ گرگ بیت سرجمیں راہ وت بند کنگ بوگ ءَ انت ءُ بنت من دست ءِ وت ءُ دپ ء وت یلہ بکناں؟
من شال ءَ وتی یک لائکیں سنگتے دیست، آ پہ ٹیلینٹ ھدائی دادے، نبشتہ کنگ زانت، گپ جنگ زانت، وانیت ءُ درستاں گیش ھمے واجھانی واستا جھنڈا ءَ ھم جنت آیانی پروگراماں سوبمند ھم کنت ءُ نودربری درستیں جیڑھانی سر ءَ توار چست کنت بلے آ داھلہ ءِ واستا درستیں واکدارانی دراں ٹُک ایت یک برے پنجاپ ءِ شاہ دربرے ءِ نام ءَ رَد دیگ بیت، پد ءَ دومی آپشن، سیمی آپشن ءُ گُڈ سر ءَ وتی جِند ءِ واک ءُ زبان دوستی ءَ داھلہ رس اِت ئِے۔۔۔۔۔۔۔۔
اگاں مرچی ما سِتک دل یک جُنزے بنا کتگ کہ بس چد ءُ گیش ھیات چِست کنگ مہ بیت، شھید کنگ یا گار ءُ بیگواہ کنگ مہ بیت گڑا ھمے کاتلانی بلوچستان ءَ چہ کشگ ھمے ڈگری یلہ کنگ ءِ جُنز ءِ بھر انت؟
نودربر بوگ پہ بلوچ ءَ ھما بزگی انت کہ بلوچستان ءَ آئی ءِ مات ءُ گوھار وتی دستاں ٹُنگ کن انت گوں سوچناں گُد دوچ اَنت ھمے زراں وتی گُٹ ءَ بنداں ءُ وتی چکانی واستا دیم دینت یا بارڈر ءَ تیل ءِ ءُ شپُکی ءِ کار کن انت۔ ھمروچ گام گام ءِ سر ءَ مرگ ءَ لگت دیان اَنت یا مائیگیری ءُ دھکان کاری کن انت ءُ بزگی وتی زند ءَ تیلانک دینت ءُ وتی چکاں وانین انت پد ءَ ھمے وانگ اینچو بزگی ءُ لاچاری ءَ پد وت دژمن ءِ چماں آس ماندار ایت، ریاست ءُ ریاست ءِ داشتگیں بھا زُرتانی دیم ءَ مستریں گناہ ءُ ھرابی ھمے نودربر بوگ انت۔ چہ وانگ ءَ وت ءَ گستا کنگ ھمایانی سوبمندی نہ بیت؟
ما نودربری ءِ گپ ءَ جن ایں من زی گوادر ءَ شھدا ءِ جیونی چوک ءُ بی ایس او چوک ءَ روانک گوزگ ءِ وھد ءَ چم کپت انت گڑا یک چوکے ءِ سر ءَ بیچارگیں سردار ءِ بیرک جتگ ات ءُ دومی ئیگ ءَ سرکار ءِ۔۔ دل ءَ ھمے جُست اَتک کہ۔۔ بی ایس او ءِ نام ءِ گروکیں واپاری امینچو کُت نہ کن انت کہ وتی بی ایس او بہ سمجھ انت ءُ چیریں بی ایس او ءَ بے ھیال بکن انت ءُ ھمے آشوبی سھریں بیرک ءَ گوں مشال ءَ پد ءَ ھمے چوکانی سر ءَ بجن انت۔۔۔۔۔
ھو من انچیں لگوریاں کہ نی باور کت نہ کناں کہ من ءَ پد ءَ باریں داھلہ رس ایت یا اناں ، یا دراں ڈیھ ءَ نشتگیں یک ناشناسیں بلوچے گوں سنگتے ءَ پد ءَ سرپدی زور ایت ءُ پہ بزگی ۔۔۔۔۔۔۔ یا پد ءَ باریں من پہ داھلہ ءَ زر پنڈ ات کناں یا اناں ؟ اگاں من ءَ زر بہ رس ایت گڑا من” کشمیر بنے گا پاکستان “ءِ روانک ءُ جھنڈھانی زورگ ءَ کار گرگ باں یا اناں۔۔۔۔
بلے مُشکل پد ءَ منی استاد من ءَ پون بکنت ءُ بہ گُش ایت وتی ڈگری ءَ الم سرجم بکن۔
(نبشتہ کار ءِ درگت ءَ جاوید بلوچ گوادر ءِ جھمنند اِنت ءُ اھوالکاری ءِ نودربر اِنت)
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
