TBP Balochi

دی بلوچستان پوسٹ

دی بلوچستان پوسٹ ءِ رسانکدر اھوالکار ءِ رد ءَ مُچیں آپانی مُچ بوگ ءِ سوب ءَ دو زالبول ءُ چار چکاں ھوار شش لاش کشگ بیتگ اَنت –

وئیل ءَ دگہ چیر تریتگیں مردمانی چیر ءَ بیگ ءِ گمان کنگ بیگ اِنت –

پولیس ءِ رد ءَ مَچیں آپانی جاہ ءَ لوگانی مردم کَشگ بیتگ اَنت ءُ بازیں جاھاں کمکی کار بیگ ءَ اَنت –

کراچی ءَ بیست ءَ چار ادارانی تہ ءَ ھورانی گوارانی ءَ گوستانک ءَ گورانی ءَ گیش گوستگ اَنت ءُ پشمبے ءِ روچ ءَ دوازدہ اداراں گورتگیں ھور ءَ دو سد ءُ بیست ءُ سَے ملی میٹر ءَ سر بیتگ –

اھوالکار ءِ رد ءَ چریشی ءَ پیسر بیست ءُ شش جولائی نوزدہ سد ءُ شست ءُ ھپت ءَ بیست ءُ چار اداراں گیشتریں ھور دو سد ءُ یازدہ مِلی میٹر بیتگ –

مولم شناس ءِ رد ءَ مروچی نیمروچ ءَ ھم ھورانی گوارگ ءِ گمان اِنت ءُ سندھ ءِ سرکار ءَ مروچی سرجمیں استان ءَ موکل دیگ ءِ جار پِرینتگ –

اھوالکار ءِ رد ءَ مولم شناسانی گوشگ اِنت کہ بحیرہ عرب ءَ جمبرانی بندگ ءَ اِنت ءُ مروچی نیمروچ ءَ کراچی ءِ زرباری دمگ کلفٹن، ڈیفنس ءُ آئی ءِ کَش ءُ گوراں ترندیں ھورانی گوارگ ءِ گمان اِنت –

گمان کارانی گوشگ اِنت ترندیں ھور گوں گرند ءُ گروکاں کراچی دمگ کلفٹن، ڈیفنس ءُ کش ءُ گوری دمگاں گمان بیگ ءَ اِنت ءُ شھر ءِ دگہ دمگاں سُبک سبک ءَ ھور گوار اَنت –

ڈائریکٹر مولم شناس سردار سرفراز ءِ گوشگ اِنت کراچی ءُ ٹھٹھہ ء میان ءَ زر ءِ تہ ءَ تروکیں آپ، سرکیوکیشن جاڑیگ اِنت –

سردار سرفراز ءِ گوشگ اِنت کہ گوات ءِ سبک بیگ ءَ سرکیوکیش جاڑیگ اِنت ءُ گمان ھمے کنگ بیگ ءَ اِنت نیمروچ ءَ ھور گوار اِیت –

دی بلوچستان پوسٹ

دی بلوچستان پوسٹ ءِ رسانکدر اھوالکار ءِ رد ءَ پاکستان ءِ اُستان خیبرپخونواہ ءِ دمگ سوات ءُ کوھستان ءَ توپانی ھاراں چہ بیست ءُ سَے مردم آپ بُڈ اِتگ ءُ نُھ مردمانی لاش درکنگ بیتگ اَنت ءُ آ دگہ لاشانی شوھازگ برجاہ اِنت –

ڈپٹی کمشنر سوات ثاقب رضا اسلم ءِ رد ءَ مدین ءَ شاہ گرام ءُ تیرات ءَ لوھڑیں کور آیگ ءَ بازیں لوگ بُڈ اِتگ اَنت، چِل لوگاں ھوار دگ ءِ پُرشت ءُ پروشاں دگہ چیزاں تاوان بیتگ اَنت وھدیکہ ھبدہ مردم آپ ءُ بڈینتگ اَنت –

ڈپٹی کمشنر ءِ رد ءَ شش مردمانی لاش کشگ بیتگ اَنت ءُ دگہ یازدہ لاشانی شوھاز برجاہ اِنت، دمگ ءَ کُمکی کار بیگ ءَ اَنت –

کوھستان ءِ دوریں میتگ لائچی ءَ برزیں لوھڑ کشیں ھاراں دمگ مَل اِتگ ءُ یکیں کھول ءِ ھپت ھار ءَ برتگ اَنت، کوھستان پولیس ءِ رد ءَ داں انیگ ءَ سَے زالبولانی لاش دزکپتگ اَنت وھدیکہ چُکاں ھوار سَے مردم انگت ءَ بیگواہ اَنت –

قراقرم ءِ شھدگ ءَ آپ سرگوستگ ءُ بازیں گاڑیاں تاوان بیتگ ءُ یک ٹنکرے ءِ ڈرائیور بیران بیتگ ءُ قراقرم ءِ دگ ءِ پُرشگ ءَ دو نیمی روگ ءُ آیگ بند بیتگ ءُ بازیں مردم گَٹ اَنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ چھبار ءَ مروچی بلوچی زبان ءِ نامی ئیں ندکار مھندس مھراب اُمرا بیران بیتگ –

اھوالکارانی رد ءَ مھندس مھراب بازیں وھداں چہ بلوچی زبان ءُ ادب ءَ گوں نزیک بیتگ آئی ءِ نبشتہ کرتگیں لچہ ماں تاک ءُ مھتاکاں ھم شنگ بیتگ اَنت –

اھوالکارانی رد ءَ مھندس مھراب ءَ پہ بلوچی زبان ءُ ادب ءَ جوانیں کرد پیلو کرتگ ءُ مروچی آئی ءِ اناگتیں مرگ ءَ بلوچی زبان ءَ گوں بندوکیں ادب کار پرسیگ کرتگ اَنت –

اھولکار ءِ رد ءَ آئی ءَ لچہ کاری ءَ ابید ھم پہ چاگرد ءَ جوان ءُ بے مٹیں کار کرتگ آ پہ چاگرد ءَ ھمک کار ءِ گھبودی ءَ دیم ءَ بیتگ –

اھوالکار ءِ رد ءَ مھراب اُمر بنکی ءَ شتون ءِ جھمنند اِنت ءُ آئی ءَ پہ چاگرد ءَ دو گَل نوکیں زند ءُ اندیشہ سبز ءِ نام ءَ بیتگ اَنت کہ آئی ءَ اے گلانی زور ءَ چہ نشہ آماچیں مردمانی جاندراھی ءُ نیستوکانی کمک کرتگ –

اھوالکار ءَ گوشت کہ مھراب اُمرا ءَ پہ بلوچی زبان ءَ بے کچیں ھدناکی بیتگ ءُ آئی ءَ پہ لبزانک ءَ بازیں جاھاں زری کمک کرتگ شائرانی چاپ ءُ چاپکاری ءَ دزکمکے بیتگ –

مھندس مھراب اُمرا ءِ اناگتی مرگ ءَ بلوچی لبزانک ءَ بندوکیں مردماں جتائیں چاگردی جاھاں پدری ءِ ھیال درشان کرتگ ءُ گوشتگ اَنت کہ مھندس مھراب بیرانی ءَ بلوچی لبزانک ءَ مزنیں کنڈے ھالیگ کرتگ –

آیاں گوشت کہ اے کنڈ ءِ پرکنگ ءَ لبزانکاراں بازیں وھد ھم پکار بنت ءُ چریشی کہ آ پہ لبزانک ءَ مزنیں دزکمکیں مردمے بیتگ ءُ آئی ءَ بلوچی زبان ءِ تچک رھبندی ءَ مدام گپ ءُ تران کرتگ –

حب ءُ لورلائی ءَ دگے وئیل ءَ کسان سالیں زھگے ھوار چار مردم بیران بوتگ ءُ شش ٹپی ءُ گڈانی ءَ گیس سلینڈر ءِ ترکگے سوب ءَ سئے کس ٹپی بوتگ ـ

ٹی بی پی پتر ءَ سربوتگیں ھالانی رِد ءَ بلوچستان ءِ کاروباری شھر حب چوکی ءَ دگ ءِ وئیل ءَ نُہ سالیں کسانیں زھگے بیران بوتگ ـ

وئیل پیرکس دگ ءِ سرا دیم ءَ اتکگ کہ گاڈی ءَ کسانیں نُہ سالی چُک تعریف گُل ڈیکر کُتگ ـ ڈیک ورگے سوب ءَ گونڈو ھما دمان ءَ بیران بوتگ ـ تعریف گُل پٹھان کالونی نندوک انت ـ
وئیل ءَ پد لاش اژدری چار ٹپاس ءِ ھاتر ءَ ھسپتال ءَ برگ بوتگ ـ

ھمے وڈ بلوچستان ءِ دمگ لورلائی ءَ کساس شست کلومیٹر دور ڈی جی خان ءَ تیز رؤکیں کوچ ءَ گوں جیپ گاڈی ءَ ڈیک وارتگ ـ

ڈیک ورگے سوب ءَ سئے مردم عارف ء حسن خان، عمران ء عبدالخلیل ءُ سرباز خان ء عزیزاللہ بیران بوتگ انت ـ بیران بوتگیں مردم پشتون قوم ءِ لونی ٹک ءَ گوں ھمگرنچ انت ـ

وھدیکے اے وئیل ءَ شش مردم ٹپی بوتگ کہ آ کوچ ءَ سوار بوتگ انت ـ

لیویز بنشون ءِ رِد ءَ بیران ءُ ٹپی بوتگیں مردم ھما دمان ءَ لورلائی ھسپتال ءَ برگ بوتگ انت ـ ٹپی بوتگیں مردم درمان کنگ بوھگ انت وھدیکے لاش اژدری چار ءُ ٹپاس پد کھول ءِ ھوالگ ءَ کنگ بوتگ انت ـ

دومی نیمگ ءَ بلوچستان ءِ دمگ گڈانی ءَشب بریکنگ یارڈ ءَ پلاٹ نمبر نود ءُ یک ءَ گیس سلنڈر ءِ ترکّگے سوب ءَ سئے مردم ٹپی بوتگ ۔

ٹپی بوتگیں مردمانی پجار صادق ء عبدالغفور، شاہد ء امین ءُ عزت گل ءِ نام ءَ چہ بوتگ انت ـ
ٹپی بوتگیں مردم ھما دمان پہ درمان کنگ ءَ نادراھجاہ ءَ سرکنگ بیتگ اَنت۔ گیشیں علاج ءِ ھاتر ءَ سند ءِ مزن شھر کراچی ءَ دیم دئیگ بوتگ انت ـ زدگ بوتگیں مردم کے پی کے ءُ پنجاپ ءِ نندوک انت ـ

زانگ بہ بیت بلوچستان ءَ پُرشت پروشیں ءُ تنکیں دگانی سوب ءَ ھمک روچ وئیل دیم ءَ آھگ انت ـ چریشی ءَ سوب ءَ ھر ماہ سدانی کچ ءَ مردم بیران بوھگ انت بازینے ٹپی بوتگ ـ
دومی نیمگ ءَ بازیں مردمے وئیلانی بوھگے سوب ءَ ڈرائیورانی سرا لڈگ انت کہ ھماھانی لاپرواھی ءَ وئیل بوھگ انت ـ

سر بیتگیں ھالانی رد ءَ روکپتی بلوچستان ءِ سیمسری دمگاں سمیسر ءِ گوزگ ءَ ناشناسیں مردماں یک مردمے تیرباران کرتگ ءُ کشتگ –

سر بیتگیں ھالانی رد ءَ گوستگیں روچ ءَ سیمسری دمگ کلہ گان ءَ پجانیارتگیں مردماں اسلم ء ھبیب اُللہ تیر جتگ ءُ کشتگ کہ اسلم پہ لاپ ءِ شوھازگ ءَ سیمسر ءَ کار ءَ بیتگ –

اھوالانی رد ءَ بازیں بلوچے تنی وھدی ھمے سیمسری کار ءُ باراں ایرانی لشکر ءُ دزانی تیرانی آماچ بیتگ اَنت –

گیشتریں ھالانی رد ءَ بارکشیں مردم یکشل ءَ نشانگ کنگ بیگ ءَ اَنت، مردماں دگہ کار ءُ زورگار نیست پرے ھاتر ءَ مردم لاپ ءِ شوھازگ ءَ سیمسری ءَ کار کنگ ءَ اَنت –

دی بلوچستان پوسٹ

سر بیتگیں ھالانی رد ءَ یازدہ دسمبر دوھزار ءُ ھبدہ ءَ بلوچستان ءِ دمگ ناگ واشک ءَ پاکستانی پوج ءِ دست ءَ آوار جنگ بیتگیں زبیر اھمد ء حاجی رمضان یل کنگ بیتگ –

زبیر اھمد ءِ یل بیگ ءِ گپ وائس فار بلوچ مسنگ پرسنز ءَ ھم راستگ ءُ گْوشتگ کہ زبیر اھمد یلہ کنگ ءُ وتی لوگ ءَ سر بیتگ –

زانگ بہ بیت بلوچستان جتائیں جاھاں پاکستانی پوج کم کساس مردماں یلہ کنگ ءُ دومی نیمگ ءَ آوار جنیانی ھال ھم پیداک اَنت –

کماشیں بلوچ رھشون بگٹی ٹک ءِ سروک نواب مھمد اکبر خان بگٹی ءِ نمیرانی ءِ چار دھمی سال روچ ءِ درگت ءَ ستاشانی درشانگ بیتگ ءُ جھد، کرد ءُ زند یات کنگ بیتگ اَنت ۔

دی بلوچستان پوسٹ

دی بلوچستان پوسٹ چاگردی رسانکدر ءِ اھوالکار ءِ رد ءَ گوستگیں روچ ءَ کماشیں بلوچ رھشون نواب مھمد اکبر خان بگٹی ءِ چار دھمی نمیرانی ءِ سال روچ دارگ بیتگ ءُ پہ آئی ءِ کرد جھد ءُ زند ءَ ستاشانی درشانگ بیتگ ءُ آئی ءِ مرگ ھم یک جھد ءِ چیدگ ءِ نامینگ بیتگ۔

اے رد ءَ بلوچ ریپبلکن پارٹی ءَ جرمنی ءَ یک مزنیں سیمینار ءِ اڈ داتگ کہ ایشی ءِ تھ ءَ بلوچ رھشون ءُ بی آر پی ءِ سروک نواب براھمدغ بگٹی ءَ ھوار افسریاب خٹک، فرحت اللہ بابر، گلالئی اسماعیل، ڈاکٹر پرویز ھودبائی، ھسین ھقانی، مھسن داوڑ، ڈاکٹر مھمد تقی، طھہ صدیقی ءُ اھمد وقاس گواریہ ءَ ھوار بلوچ جھدکاراں ھم تران کُتگ شھید نواب اکبر بگٹی ءَ را دروت پیش کُتگ۔

ھمے درگت ءَ بلوچ ریپبلکن پاٹی ءِ سروک براھمدگ بگٹی ءَ گپ کنان ءَ گْوشت کہ من ءَ پھر اِنت بلوچ بیگ ءُ بلوچ دودمان ءُ بلوچ گوستانک ءِ سر ءَ کہ نواب اکبر خان بگٹی ءِ رنگیں کماشے ءَ وتی ھون پہ بلوچ سرڈگار ءِ ھاتر ءَ ریتکگ اَنت –

آئی ءَ گوشت کہ ھمے ھون ءُ دیمونیاں چہ اھد بیت ءُ یک روچے ءَ ناں یک روچے ءَ بلوچ راج اے زُلم ءُ زوراکیاں چہ چُٹینگ بیت اِنت –

ھمے وڑءَ بی آر پی ءَ یک سیمینار ءِ برتانیہ ءَ ھم اڈ داتگ کہ آود ءَ ھم نمیرانیں نواب اکبر بگٹی ءَ سھریں دروت پیش کنگ ءُ آئی ءِ کوش ایر جنگ ءُ زند یات کنگ بیتگ۔ اے سیمینار بی آر پی ءِ برتانیہ ءِ مستر منصور بلوچ، بلوچ راجی زرمبش ءِ مستر عبداللہ بلوچ، بی این ایم ءِ میان اُستمانی جھگیر ھمل ھیدر، بی این ایم یوکے ءِ صدر حکیم واڈیلہ، بی ایچ آر سی ءِ جھگیر کمبر مالک ءُ بی آر پی ءِ باسک ھمید بلوچ ءَ تران کُتگ ءُ شھید اکبر خان ءَ دروت پیش کُتگ۔

نواب اکبر خان ءِ نمیرانی ءِ روچ ءِ درگت ءَ بی آر پی ءَ یونان ءُ زرباری کوریا ءَ دیوان برجم داشتگ اَنت ءُ نمیرانیں اکبر بگٹی ءِ زند کرد ءُ آئی ءِ دلیریں نمیرانی ءَ سھریں دروت پیش کُتگ ۔

زانگ بہ بیت نواب اکبر خان بگٹی بیست ءُ شش اگست دوھزار ءُ شش ءَ بلوچستان ءِ دمگ تراتانی ءَ پاکستانی پوج ءِ یک آپریشنے ءِ میان ءَ جنگ بیتگ اَت –

نواب اکبر خان بگٹی ءِ جنگ ءَ پد بلوچستان ءِ مھلوک ءَ پاکستان ءُ آئی ءِ ادارھانی سر ءَ زھر ءِ درانگازی گیش بیتگ اَنت ھما روچ ءَ بہ گر داں ھمک بیست ءُ شش اگست ءَ بلوچ مھلوک نواب اکبر خان بگٹی ءِ یات ءَ یاتگاری دیوان دارگ ءَ اَنت –

نبشتانک: ھیاتُل

نبشتہ کار: ھیرجان کدیر

دی بلوچستان پوسٹ

منی پُلیں ھیات چہ شھدربرجاہ ءِ چھٹیاں اتکگ اَت پد ءَ ھامین ءِ وھد اَت ۔ اے روچی سرکپت پہ مَچ چَنڈگ ءَ، منی بچ مَچ ءِ سر ءَ ناھاں چنڈگ ءَ اَت کہ گش ئے چیزے ترک اِت ءُ تیرانی توار ءَ سرجمیں جھان بَڈ ءَ بوت ،من ھیاتُل ءَ گوانک جت کہ ایر ءَ ایر ءَ جلدی کہ ھُدا مکن، منی دپ ءُ دل اے گپ ءَ گرگ ءَ نیاں تاں کہ کسانیں ساھتے پد داں زالمے اَتک ءُ منی ھیاتُل جان ءَ چہ مَچ ءِ سر ءَ ایر کنگ ءِ کوکار کت تُپنگ ءِ ٹال اَت ، ھیاتُل ءَ گون گور ءِ تور ءَ بُن ءَ دور کُت ، زمین ءِ دلبند ءَ سر نہ بوت ءُ منی پُل اِش گران کت منی چمانی دیم ءَ ۔ ھیات جانی پت ءَ زوراور ءُ زالمانی پاد گپت اَنت کہ منی بچ ءَ یل کن اِت من وتی سر ڈن ءَ کُت ءُ دست بستاں بلے اے زالمانی دل ءَ رھم نہ شُت ،، منی ھیاتُل گِران اَت روڑ ءِ سر ءَ ءُ آئی دپ ءَ ماتی ماتی من ءَ پچ گر ،، من پہ بیوسی رند ءَ کپتگ اِتاں داں من ءَ یک زالمے ءَ جت تُپنگی بُن ءِ ، ءُ دور دات۔

منی چم کپتاں داں منی پُل ھیات جان وتی دست ءَ جیب ءَ برگ ءَ اَت کہ وتی “شناختی کارڈز ” ءَ در کناں بلے زالماں وار نہ دات ھمے ساھت ءَ منی چمانی دیم ءَ منی روکیں چراگ اِش کُشت ءُ منی دست ٹال اِتاں پہ یکے ءَ کہ رھم رھم –

منی چک اِش اِد ءَ چہ جَت انچو “تکلیف ” اِش دات کہ منی جبین ءَ ھزار درد چست بوت ءُ من پریات کت گوں وتی رَب ءَ بلے منی رب ءَ اوں بس چارت من ءَ داں منی جھان اِش ویران کُت ۔۔
ھیاتی پت ءِ دپ چو تپل ءِ پیم ءَ پچ اَت کوکار کنگ ءَ اَت کہ منی چُک ءَ مہ جن اِت ، ما بےگناھیں مردم اِیں ، گون ارس ءُ چیھالاں گُشگ ءَ اَت کی منی چک ءَ مہ کُش اِت من ءَ چہ منی بچ ءَ جتا مہ کن اِت من وتی اے گونڈیں بچ پہ بیوسی رودینتگ ، ما گریب اِیں اے زلمان ءَ بلے انگت بزگ نہ بوت انچیں زالمیں مردم اِتاں کہ اشاں منی ءُ ھیاتُل ءِ پِت ءِ پریات گوش نہ داشت اَنت ءُ منی چمانی دیم ءَ منی تَنسوکیں ھیات جان اِش جت ءُ من ھچ کت نہ کت ۔۔ ھیات ءِ پریاتاں منی جگر بُن دات اَنت بلے من بیوس اِتاں ، آئی سینگ ءَ کہ اولی تیر ءَ لگ اِت منی بچ ءَ پریات کت کہ ماتی ماتی او ماتی
ھمک تیر منی تنسوکو ءِ دلبند ءَ سرد بوؤگ ءَ اَت من بگیر ھُدا ءِ توار جنگ ءَ ھچ کت نہ کت ، داں اناگہ ءَ بےتواری ءِ پُرشت ءُ جھان تھار بوت ءُ منی ھیاتُلی ماتی ماتی گار بوت ، ھاموشی ءَ مانپوشت ءُ گش ئے منی گوش کَرّ بوتاں ، زمین ءِ دلبند ءَ گشئے پاھارے دراتک ، منی ساہ گُش ئے بند بوت ، ہر نیمگ ءَ ھونانی بوّ تالان بوت ۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

گوستگیں روچ ءَ مند ءِ دمگ باگزو ءُ تمپ ءَ پاکستانی پوج ءِ چوکیانی سر ءَ سلاھیں بندیں مردماں اُرش کرتگ ـ اُرش ءِ آسر ءَ پاکستانی پوج ءَ جانی ءُ مالی تاوان رس اِتگ ـ

دومی نیمگ ءَ بلوچ سلاہ بندیں گل بلوچ لبریشن ٹائیگرز ءِ جارکش میران بلوچ ءَ رسانکدراں وتی شنگ کرتگیں درشان ءِ تھا اے اُرشانی زمہ واری منّ اِتگ ءُ گُشتگ کہ مئے سرمچاراں کیچ ءِ دمگ مند باگزو ءَ برجاھیں پاکستانی پوجی چوکی ءِ سر ءَ راکٹ ءُ دگہ وتکاراں سلاھاں گوں اُرش کُتگ ـ
جارکش ءَ دیمتر ءَ گشتگ کہ کیچ ءِ دمگ تمپ ءَ ھم بلوچ سرمچاراں پوجی چوکی ءِ سر ءَ راکٹ ءُ دگہ وتکاریں سلاھاں گوں اُرش کُتگ ـ اُرش ءَ پاکستانی پوج ءِ یک کارمندے مرتگ وھدیکہ بازینے ٹپی بوتگ ـ

گڈسر ءَ جارکش ءَ گوشتگ کہ گل ءِ کاروائی بلوچ ریاست ءِ آجوئی تاں برجاہ مان انت-

دی بلوچستان پوسٹ

آشوبی گُشندہ میر احمد بلوچ ءِ چُک بلال احمد ءِ زورانسری آوار جنی ءُ بیگواھی ءَ دو سال سرجم بوھگ ءِ ھاتر ءَ مروچی شال ءَ پریس کانپرنس ءُ چاگردی ترامجاھاں کمپئین چلائینگ بوھگ ءِ اِنت ـ
ھمے درگت ءَ بانک ھوران بلوچ ءَ بیگواھیں بلال احمد ءِ درگت ءَ پریس کانفرنس کنان ءَ وتی ھیال درشان کُتگ ءُ گُشتگ کہ
ھنچیں چاگردے کہ اود ءَ انساپ آھگے درسیں دروازگ بند کنگ بوتگ انت ـ اود ءَ انساپ ءَ سر بوھگے درسیں امید گوں صحافت ءَ ھمگرنچ بنت ھمے سوب ءَ بلوچستان ءِ کُنڈ کُنڈ ءَ ھمک روچ ھک لوٹوک وزیر، جج یا پولیس ءِ سروکاں وئیل کن انت شال ءِ پریس کلب ءَ وت ءَ سر کن انت ـ دراہ ھمے امیت ءَ گوں کائینت کہ صحافت ءَ گوں ھمگرنچیں یک راستیں صحافی آھانی اے درد ءِ توار جوڑ بیت ءُ ھما زمداراں سر کنت کہ سائل ءِ توار اود ءَ سر بوھگ ءَ نہ اَنت ـ

آئی ءَ گُشت کہ مروچی من وتی گپ ءَ شمے صحافیانی دیم ءَ ایر کنگ آں اے نوکیں جیڑہ ءِ نہ انت بلکیں بلوچستان ءِ ھر سیمی لوگ اے زورانسری آوار جنی ءِ جیڑہ ءَ گوں دچار انت ـ بلوچستان ءَ زورانسری آوار جنیانی جیڑہ نوں یک انسانی ھلاسی ءِ جوڑ بوتگ ـ زورانسری آوار جنی وڑیں گیر انسانی اے درچ ءِ یک شکار ءِ بلال احمد ء میران بخش پنام میر احمد بلوچ انت ـ

حواران بلوچ تران کنان ءَ دیمتر ءَ گُشت کہ بلال احمد بلوچ ء میر احمد بلوچ جاھمنند مستونگ دو سال ءَ پیسر سی ءُ یک اگست ءَ دوھزار ءُ ھژدہ ءَ نوشکی ءِ یک پکنک پؤنٹ زنگی ٹاور ءَ چہ پاکستانی پوج ءَ ھما وھد ءَ چست کُتگ کہ وتی سنگتانی ھمراھی ءَ پکنک کنگ ءَ بوتگ ـ بلال احمد بلوچ راجی گشندہ میر احمد بلوچ ءِ چُک انت ـ

آئی ءَ گُشت کہ بلال احمد بلوچ ءِ آوار جنی ءَ پد ناں پولیس ءِ ھوالگ ءَ کنگ بوتگ ناکہ آئی ءِ ارزی نبشتہ کنگ بوتگ ءُ ناکہ آمیدگس ءَ آرگ بوتگ ـ وھدیکہ پاکستانی پوج ءَ آئی ءِ دزگیری من اِتگ ـ کہ آئی ءِ ھال ماں روزنامہ جنگ ءِ روتاک ءَ ھم شنگ کنگ بوتگ ءُ بلال احمد ءَ ھوار دگہ آوار جنگ بوتگیں مردمانی اکس ھم دیم اتکگ انت کہ پوج ءِ دست ءَ داتگ انت ـ بلے رندا آھانی درگت ءَ ھچ وڈیں ھال اھوال نیست ـ دزگیری ءِ زاھر کنگ ءَ پد کانون رِد ءَ ناں جیل ءَ برگ بوتگ ءُ ناکے آمیدگس ءَ آرگ بوتگ ـ

آئی گُشتگ کہ مئے لوٹ ملکی کانون رھبندانی مطابق انت کہ پاکستانی پوج ءِ دست گیر ائینی دزگیر کیز بوتگیں بلال احمد ملکی کانون ءُ آئین ءِ رِد ءَ آمیدگس ءَ آرگ بہ بیت ـ اگاں آئی سرا الزام ھست گڈا عدالتی کاروائی پد ملکی کانونانی رِد ءَ سزا دئیگ بہ بیت ـ بلے ھنچو محسوس بیت کہ ریاستی ادارھاں وتی آمیدگس ءُ کانونانی سرا اوست نیست ـ پمے ھاتر ءَ آھاں وتی جتائیں آمیدگس ءُ ھاکمی برجاہ داشتگ ـ

حوران بلوچ ءَ گوشتگ کہ بلال احمد بلوچ ءِ زورانسری آوار جنی سرجمیں ڈٹیل وائس فار بلوچ مسنگ پرسنز ءِ کرا جمع کنگ بوتگ انت ـ وھدیکے ملکی آمیدگس آں ھم اے درگت ءَ کاغزات جمع کنگ بوتگ انت ـ بلے دنیگت ءَ تاں ھچ وڈیں گامگیج زورگ نبوتگ ـ ما اے گُشگ ءَ ھچ رد نہ بئیں کہ ملکی آمیدگس پہ نام بیگواھیں مردمانی کیسانی ھوالہ ءَ کمیشن جوڈ کتگ ـ

آئی گُشتگ کہ چہ اے پریس کانفرنس ءَ ما لوٹ کنیں کہ بلال احمد ءَ ھوار سرجمیں گاریں مردماں اھانی آئینی، کانونی ءُ انسانی ھک دئیگ بہ بنت ـ دانکے مئے گوم ءَ ھک کنگ نبیت ما بیگواھیں مردمانی کھول ءِ گوم ءَ وتی زھرشانی ءَ برجاہ داریں ءُ ملکی عدالتاں مایوس بوھگ ءَ پد میاں استمانی آمیدگس آنی نیمگ ءَ رؤئیں ـ