نبشتانک: ھُدا مرزی ئیں پیرُک ءِ زند ءِ کسہ
نبشتہ کار: بکتیار رھیم بلوچ
دی بلوچستان پوسٹ
ھُدا مرزئیں پِیرُک ءِ نام سردو بوتگ۔ سردو ءِ شش برات بوتگ انت۔
سردو ،گزی ۔ھسن ،باران ۔یارو ،روزی بوتگ انت ایشاں گُھار نہ بوتگ
۔پِیرُک ءَ کَسہ کت منی کستریں برات روزی ءِ ودی بوگ ءَ رند مئے مات ءُ پت گرمپک ءِ نادراھی ءَ گپتگ اَنت ۔مئے مات ءُ پت بیران بوتگ
اَنت گڑا ۔ما چورو ءُ گریب بوتگ ایں کستر کستریں برات روزی کسان بوتگ ھنچوش بزان مات ءِ شیر مچیں چک بوتگ.
۔مات ءُ پت ءِ بیرانی ءَ رند ما سک بزگ ءُ وار بوتگ ایں مئے مزنیں جنجالاں یکے ھمے بوتگ روزی شیر مچیں چکے اَت سک کسان اَت ۔ ما ھم کسان اِت ایں ۔ گڑا روزی ءَ ما گلھیں دان ھش ءِ سر ءَ درشتگ آپ ماں کتگ شردو جوڑ کتگ دپ ءَ چٹینتگ ۔دو سے سال گوازینتگ ۔تانکہ روزی مزن بوتک ۔
روزی ءَ چہ مسترین یارو بوتگ یارو ءِ کسانی ءِ نام ما گژنو کتگ ۔پرچا آ چہ گژن ءُ شد ءَ ھر وھد ءَ گریوگ ءَ ات سیر لاپ بِھ نہ بوتگ۔
ھرچی مئے مستریں براتانی دست ءَ بوتگ چتگ ءُ آؤرتگ گژنو ،روزی کسان بوتگ اَنت ھمیشاں گیشتریں بھر داتگ بلے انکسیں ورگ نہ بوتگ اے گونڈو سیر لاپ بہ بنت۔
ورگ ھمے لھڑیں ،دانکُو ۔آبوس کنر، زُرتی دان، نگن۔اِت اَنت دگہ ھچ نیست اَت۔
آ زمانگ ءَ گرمپک ءِ بیماری ھنچوش باز اَت ھر کس دری ڈیھان پہ پوریات ءَ شتگ بزاں سلامتی ءَ نیا تکگ۔یا گرمپک ءِ آماچ بوتگ مرتگ یا لوگ ءَ سربوتگ گرمپک ءَ گپتگ۔
گرمپک یک سلیں نادراھی یے بوتگ ۔ھرکس گرمپگ ءِ نادراہ ءِ نزیک ءَ بوتگ بزاں آ ھم گرمپگ ءِ آماچ بوتگ ۔
بازیں مردم گرمپک ءَ گپتگ ءُ نادراہ کتگ پد ءَ چہ نادراھی ءَ شر بوتگ اَنت ۔بزاں ھرچ مردمے نادراھی ءَ گپتگ شر بوتگ۔آ مردم پد ءَ گرمپک ءَ نہ گپتگ
۔گرمپگ ءِ نادراہ چہ لوگ ءَ دور یک کسانیں کڈکے ءِ تہ ءَ کنگ بوتگ آئی نان ءُ ورگ ھما مردم ءَ برتگ ءُ رسینتگ اَنت ھما گرمپگ ءَ چہ پش اِتگ (رک اِتگ)
گرُمپک ءِ نادراھانی جان چہ کَِرم ءَ پُر بوتگ اَنت کِرم چہ مود کش ءِ سر ءَ چِتگ ءُ دُور کتگ اَنت دگہ درمان نہ بوتگ ٹپاں سرومگ پر کتگ ۔
اگاں کسے گرمپک ءِ آماچ بوتگ آئی ءَ چل روچ الم لگ اِتگ یا چل روچ ءِ تہ ءَ مرتگ یا نوکین زندے رس اِتگ ئِے جان دراہ بوتگ۔
ھدا مرزی ئیں پیرُک ءَ دیمتر ءَ گْوشت من ءُ منی برات ھمے سلیں گرمپگ ءِ آماچ بوتگ ایں.
یکے گریبی، واری، لنگڑی ،نیستی ،بزگی ، کسانی ،بے مات ءُ پتی اَت۔
دومی نیمگ ءَ ھمے بے الاجیں سلیں نادراھی بزاں گرمپگ اَت اے یک ازابے اَت مئے سر ءَ اتکگ اَت
ما یک دیم ءَ پہ شد ءِ درد ءَ نارگ ءَ اِت ایں دومی نیمگ ءَ گرمپگ ءِ ٹپانی کرم ءُ کِچگ آنی درداں شپ ءَ سر پہ زمین ءَ واب ءَ ایر نہ بوتگ۔
ھچ نہ زانتگ کہ چی بہ کن ایں دراھیں شپ پہ دردانی نارگ ءَ گوازینتگ۔کس مئے نیمگ ءَ نہ اتکگ ھمے ترسءَ مارا ھم ھمے سلین نادراھی ءَ گپت۔
چل روچ پہ ھمے وڑ ءَ سرجم بوتگ وھد گوازان بوتگ اللہ پاک ءَ وتی نیکیں نگاہ مئے نیمگ ءَ کتگ مارا ھمے سلیں گرمپک ءَ یلہ داتگ ما چہ گرمپگ ءَ جان دراہ بوتگ ایں اللہ ءِ شکر ءُ منت گپتگ۔
۔آ وھداں نیکیں،ایمانداریں کوم دوستیں مردم سک باز بوتگ مردم ءَ پہ مردم ءَکار بوتگ ناکہ پہ زر ءُ مال ءَ کار بوتگ۔
پیرک ءَ ھدا مرزی ءَ گْوشت مارا گد پہ گور ءَ کنگ ءَ نہ بوتگ یک جوڑی یے بوتگ بزاں چہ جاہ پہ جاہ ءَ درتگ ءُ کڑک بوتگ اَنت ۔بلوچی گری بوتگ ھرچ بے مال ءُ بے زر ءَ بزاں بلوچی دستار سر ءَ بندوک بوتگ ۔
پیرک ءَ گُشت منی سر ءِ دستار کڑک کڑک بوتگ منی سر ءَ بندوک بوتگ ۔
مئے سند ءَ چہ کمے دور یک مھراب نامیں مردے ھست ات مھراب مزنیں زمینداری اَت ۔ آئی ءَ ھر وھد ءَ وتی زمین ننگار کتگ اَنت یک ملکے آئی ءَ بوتگ نام ئِے بوجی بوتگ بوجی بزاں پہ مھراب ءَ ءُ مئے وڑیں گریب ءُ وارانی واستا بوجی یے بوتگ۔ بزاں لانچے بوتگ۔
اللہ ءَ ھور داتگ مھراب ءَ وتی بوجی کار کتگ گلّہ کِشتگ گڑا جوپاگ ءَ سد گوالگ دان داتگ ئِے۔ ھر کس شتگ مھراب ءَ ھورکیں دستاں پد ءَ راہ نہ داتگ ۔بزاں پنچ ءُ دہ من دان داتگ ئِے۔
من ھم یک روچے باز نیست ءُ لنگڑ اِت اَنت۔ چہ یک مردمے دپ ءَ اشکت کہ مھراب مروچی بوجی ءِ داناں بٹائی کنگ ءَ اِنت من گڑا پہ دان ءِ گرگ ءَ شتگاں مھراب ءَ من ءَ دان دات ۔ بلے منی کر ءَ ھچ پہ دان ءِ مان دیگ ءِ واستا نہ نیست اَت ۔من وتی دستار ءِ تہ ءَ دان ماں کتگ اَنت رھادگ بوتگاں راہ ءَ اتکگاں دستار ءِ کڑکاں دان رچان بوتگ اَنت ھچ نہ زانت چی بہ کن آں تانکہ لوگ ءَ سربوتگاں دان کمے پشکپتگ اَت ۔ گڑا ما ھمے دان ھش ءِ سر ءَ درشتگ اَنت شردو کتگ اَنت ءُ وارتگ اَنت براتاں ھم داتگ اَنت
• وھد پہ ھنچوش جنجالی رواں بوتگ برات مزن بوتگ اَت من مالداریں مردمانی شوانگ کتگاں پس ءُ گوک چارینتگ اَت مارا دگہ ھچ مُز نہ بوتگ مُز بس لاپ بوتگ من چہ درستیں براتاں مستریں بوتگاں ۔من ءَ پوریات نہ بوتگ جند کسان اَت من گڑا برات مالدارانی شوانگ کت اَنت تانکہ مالدار لاپ ء اِش بہ دنت پہ شد ءَ مہ مر اَنت۔ مزن ءُ جوان بہ بنت.
•
• کستریں چار برات من شوانگ کت مز ھمیش اَت لاپ ءَ مال واھند بہ دنت پہ شد ءَ مرگ ءَ میل ایت۔
گڑا سند ءِ کارونی بندات بوت مھلوک پہ سند ءَ کاروانی ءَ شت منی کستریں برات گزی ءِ اولی رند اَت ما ھم گوں کسانی ءُ گریبی ءُ واری ءَ سواب ءَ ھور بوت ایں ۔ گوں مردماں کاروانی شت ایں ۔
آ وھداں گوانکو نیست اَت کسے پہ سند ءَ شت
بزاں زند ءَ شت ۔پرچا گرمپگ ءِ وہلھد اَت بازیں مردم سند ءَ شت اَنت ھمانگو گرمپگ ءِ آماچ بوتگ ات اَنت مرت اَنت کس ءَ پدنءَ ھال نیاؤرت کہ کبر اشکجا اَنت۔ پمیشکا کسے پہ سند ءِ کاروانی ءَ در کپت بزاں پشت ءِ مردم سک بژنیگ بوتگ اَنت ۔ باریں واتر پہ سلامتی کیت یا کہ گرمپک ءِ بھر بیت۔
ما پہ سند ءَ شتگ ایں اود ءَ ھم دگہ ھچ مزوری نیست اَت کہ ما مزوری بہ کن ایں ۔بس ھمے سوزیں درچک ءُ دار وتی مالاں بُر اِتگ ءُ داتگ ۔شد ءَ بیوار بوتگ اَنت گڑا ھمےڈگارانی تہ ءَ ھرچی کشوک بوتگ ما دز اِتگ وارتگ برے برے ھمے ڈگار ءِ مالک ءَ مارا دیستگ مئے رند ءَ کپتگ گپتگ ئِے مارا جوان لٹ ئِے داتگ ءُ یلہ ئِے کتگ شد ءِ درد کم بوتگ اَنت لٹانی درد بندات بوتگ انت ۔
ود ھمے وڑ ءَ گْوازان بوتگ سالے پہ سند ءُ بیلہ۔سالے پہ کراچی ءُ ایدگہ کنڈاں بس وھد وتی گاماں گوں رھادگ اَت مئے پرواہ داری ءَ نہ ات ۔
پیرک ءَ گْوشت کہ من گرمپک ءَ چہ پش اِتگاں ۔گڑا ھر میتگ کسے ءَ گرمپک ءَ گپتگ اَت منی رند ءَ اتکگ اَنت ۔من شتگاں مود کش ءِ سر ءَ جان ءِ کِرم کش اِتگ اَنت بازینے مرتگ من چہ وتی دستاں کنڈ کتگ بازینے جان دراہ بوتگ۔
بازیں وھد ءِ گریبی نزوری نیستی لنگڑی ءُ گرمپک ءِ ارجان لگ اِتگ ۔لھتیں سال ءَ رند اللہ وتی نیکیں نگاہ مئے نیمگ ءَ کتگ اَنت گرمپک ھتم بوتگ برات مزن بوتگ اَنت ۔ھر کس پہ دیمے شتگ مزوری کتگ گڑا مئے گژن ھم ھلاس بوتگ ۔ما پروت ءَ گس ءُ جاہ گپتگ ملک ءُ ڈگار گپتگ مال داشتگ سانگ ءُ سور کتگ ۔اللہ ءَ مارا وتی گنج بکشاتگ دراھیں برات جن ءُ چک بوتگ اَنت۔
راج ءِ تہ ءَ مارا اللہ ءَ وشیں نامے بکشاتگ گریب ءُ وارانی مدت کتگ مدام کوم ءِ تہ ءَ برات ءَ رنج ءَ گپتگ چہ ما ھم یک دو شتگ ھوار بوتگ مدت ءُ کمک کتگ۔
من چہ وتی کماشیں مردماں دَم کنگ ھیل کرتگ گڑا کسے منی کر ءَ پہ دَم ءَ اتکگ من دَم کرتگ اللہ ءَ چہ وتی نیکیں واھگاں بزاں مردم الم جان دراہ کتگ ۔منی ھم شرپ ءُ ازت اللہ ءَ چہ ھمے کار ءَ برز کرتگ ۔نوں پمیشکا من چہ میاں سردو ءِ نام ءِ سر ءَ نامداراں ۔
اے کسہ پیرک ءِ ءُ آئی ایدگہ براتانی کسہ اِنت چہ ھمایانی زبان ءَ اشکتگ ءُ نبشتگ کتگ۔
پیرک ءَ بیست سال بیت چہ اے دنیا یلہ ئِے کتگ ۔سے برات ھم اے دنیا ءَچہ شتگ یارو ءُ روزی انگت ھیات اَنت ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
