TBP Balochi

دی بلوچستان پوسٹ

کراچی کیماڑی ءَ آئل ٹرمینل ءَ گیٹ نمبر یک ءَ آس لگ اِتگ، چریشی ءَ چار مردم زدگ

ٹی بی پی پتر ءَ سربوتگیں ھالانی رِد ءَ کراچی ءِ دمگ کیماڑی ءَ آئل ٹرمینل ءَ آس لگ اِتگ، چریشی ءَ چار مردم زدگ بوتگ ـ آس لگگ ءَ پد کیماڑی ءِ آئل ٹرمنل ءَ چہ سرجمیں ملک ءَ پٹرول سپلائی بند کنگ بوتگ ـ

ریسکیو بنشون ءِ رِد ءَ کیماڑی ٹرمینل ءِ آس نُہ فائر ٹینڈرز ءِ کمک ءَ چہ کُشگ بوتگ ـ آس لگگے سوب ءَ چار مردم زدگ بوتگ اَنت ـ

دومی نیمگ ءَ آل پاکستان آئل ٹینکرز ایسوسیشن ءَ ھمے ھال شنگ کتگ کہ ھالاتانی شر بوھگ ءَ تاں سرجمیں ملک ءَ کیماڑی آئل ٹرمینل ءَ چہ آئل سپلائی بند کنگ بیت اِنت ـ

دی بلوچستان پوسٹ

ٹی بی پی ھال پتر ءَ سر بوتگیں ھالانی رِد ءَ بلوچستان ءِ دمگ زامران پگنزان ءِ میتگ ءَ پاکستانی پوج ءِ گاڈی ناشناسیں مردماں تراک ناکیں شوروانی نشانگ جوڈ کرتگ ـ

پاکستانی پوج ءِ گاڈی ءِ سرا ھما وھد ءَ اُرش کنگ بوتگ کہ آ یک کاروان ءِ شکل ءَ دمگ ءَ گوزگ ءَ بوتگ ـ

تراک ءَ پد لشکر ءَ دمگ وتی انگیر کُتگ بلے ھچ وڈیں دزگیری ءِ ھال نیست۔

دومی نیمگ ءَ بلوچ آجوئی لوٹوکیں گل بلوچستان لبریشن فرنٹ ءِ جارکش میجر گھرام بلوچ ءَ رسانکدراں وتی شنگ کرتگیں درشان ءِ تھا گوشتگ کہ زامران ءِ دمگ پگنزان ءَ پوجی کاروان ءِ یک گاڈی ءِ ریموٹ کنٹرول بمب ءِ نشانگ جوڈ کرتگ، ـ چریشی ءَ گاڈی سک باز تاوان رستگ ءُ آئی سواریں سئے کارمند مُرتگ ءُ چار ٹپی بوتگ ـ

گڈسر ءَ میجر گھرام بلوچ ءَ گوشتگ کہ بلوچستان ءِ آجوئی تاں زورگریں پوج ءِ سرا اُرش برجاہ مان انت

دی بلوچستان پوسٹ

وائس فار بلوچ مسنگ پرسنز ءَ بلوچ سلاہ بندیں گلانی نام ءَ شنگ کرتگیں دزبندی ءَ گْوشتگ کہ آواران ءَ دزگیر کرتگیں ششیں مردم انسانی ھم دروری ءِ رد ءَ یلہ کنگ بہ بنت –

وی بی ایم پی گوستگیں یک دیھکے ءَ گیش اِنت کہ بیگواھیں بلوچانی آجوئی ءِ واستا پرکار اِنت – گل ءَ اے دزبندی یک ھنچیں وھدے ءَ کرتگ کہ یک بلوچ سلاہ بندیں گلے ءَ گپتگیں مردمانی دزگیری کنگ راست کرتگ ءُ منّ اِتگ –

بلوچ سلاہ بندیں گل بی آر اے ءِ جارکش بیبگر بلوچ ءَ چاگردی رسانکجاہ ءَ گپتگیں مردمانی دزگیری راست کرتگ ءُ گْوشتگ کہ پنجاب ءَ چہ سیادی داروکیں پاکستانی پوج ءِ شش کار کنوکیں مردم دزگیر کرتگ اَنت کہ مئے گل ءِ گور ءَ اَنت –

بیبگر بلوچ ءَ گْوشتگ کہ اشانی زندگی ءِ سھل دراھیں انسانی ءُ سرجمیں کانودانی رد ءَ کنگ بیت اِنت – ما انسانی ھکانی گلاں سرپد کنگ لوٹ ایں کہ مئے جنگی پالیسی زوگریگ ءَ چہ جتا اَنت –

زانگ بہ بیت گپتگیں مردمانی یلہ کنگ ءِ واستا جتائیں سیاسی ءُ چاگردی مردمانی نیمگ ءَ دزبندی بیگ ءَ اَنت – بلے تنی وھدی یلہ نہ بیتگ اَنت –

بلوچستان ءِ جتا جتائیں جاھاں بیست ءُ چار ادارانی تہ ءَ سَے ورنایاں وتکُشی کرتگ ءُ وتی زندگی ھلاس کتگ اَنت – وئیل نوشکی، ھزدار ءُ ھب ءَ بیتگ اَنت –

دی بلوچستان پوسٹ

گیشیں ھالانی رد ءَ بلوچستان ےِ دمگ نوشکی ءَ سیادی داروکیں ورنایے ءَ دُبئی ءَ ساد گُٹ ءَ کرتگ ءُ وت ءَ پاھو داتگ – ورناہ سیف اللہ نوشکی قاضی آباد ءِ جھمنند اِنت کہ زورگار ءِ ھاتر ءَ دُبئی ءَ بیتگ –

دمگی مردمانی گوشگ اِنت کہ ورناہ زری جاوراں نیزور بیتگ ءُ وتی زندگی ءِ ھلاس کرتگ –

ھمے وڑ ءَ وڈھ ءِ دمگ سارونہ ءَ ورنایے ءَ وت ءَ تیر جتگ ءُ وتکُشی کرتگ –

سارونہ ءِ جھمنندیں منظور اھمد ء سائین بکش نامی ئیں ورنایے ءَ وت ءَ تیر جتگ ءُ وتی دستاں وتی زندگی ھلاس کرتگ – وتکُشی ءِ سوب زانگ نہ بیتگ –

ھمے وڑیں دگہ یک وئیلے باپاری شھر ھب ءَ پیش اتکگ کہ شھدگ ءِ ھند ءَ ھوٹل ءَ اختر مری جھمنند وندر ءَ وتی گُٹ ءَ ساد مان کرتگ ءَ وتکُشی کرتگ وئیل ءِ سوب زانگ نہ بیتگ –

دی بلوچستان پوسٹ

ٹی بی پی پتر ءَ سربوتگیں ھالانی رِد ءَ آواران ءِ دمگ گیشکور ءَ ناشُناسیں سلاہ بندیں مردماں پاکستانی پوج ءِ راشن سرکنوکیں شش مردم دزگیر کُتگ ـ

دزگیر کنگ بوتگیں مردم پاکستان ءِ اُستان پنجاپ ءِ دمگ بہاولپور ءِ جتا جتائیں دمگانی نندوک انت ـ

سلاہ بندیں مردمانی دست ءَ دزگیر کنگ بوتگیں مردمانی پجار منیر احمد ء بشیر احمد، عامر ء فیاض احمد، محمد اکبر ء جان محمد، نزیر احمد ء بشیر احمد، محمد قاسم ء جندن خان، محمد شھزاد ء محمد اقبال ءِ ناماں چہ بوتگ انت ـ

اے مردماں پہ پاکستانی پوج ءِ ھاتر ءَ وتی ٹرکاں راشن لڈیتگ ءُ کیچ ءَ در اتکگ ءُ دیم پہ آواران ءَ رؤگ ءَ بوتگ انت کہ آواران ءِ دمگ گیشکور ءَ سلاہ بندیں مردماں دزگیر کُتگ گوں وت بُرتگ انت ـ

دومی نیمگ ءَ بلوچ آجوئی لوٹوکیں گل بی آر اے ءِ جارکش بیبگر بلوچ ءَ چاگردی ترامجاہ ٹوئیٹر ءَ آواران ءَ دزگیر بوتگیں مردمانی درگت ءَ وتی ٹویٹ ءِ تھا گوشتگ کہ پاکستانی پوج ءِ واست ءَ کار کنوکیں شش مردم پنجاپ ءِ جاھمنند دزگیر کُتگ کہ مئے گل ءَ گون اَنت ـ

جارکش بیبگر بلوچ ءَ دیمتر ءَ گوشتگ کہ آھانی زندگ بوھگے پیسلہ انسانی ءُ سرجمین انسانی ھکانی کانودانی رِد ءَ کنگ بیت ـ آئی ءَ گُشتگ ما انسانی ھکانی گلاں چہ اے گپ ءَ پدر کنگ لوٹیں کہ مئے جنگی پالیسی زوگر ءَ چہ جتا انت ـ

دی بلوچستان پوسٹ

ٹی بی پی ھال پتر ءَ سر بیتگیں ھالانی رد ءَ ڈرگز فری پسنی ءِ ورکنگ کمیٹی ءِ نیمگ ءَ چہ پسنی ءِ جتا جتائیں دمگاں پمپلٹ شنگ ءُ تالان کنگ ءُ نشہ ءِ بگیری ءَ بینر جنگ بوتگ ـ

بینر ءُ پمپلٹاں چہ لس مھلوک ءَ پنچ ستمبر ءَ نشہ ءِ بگیری ءَ بؤکیں روانک ءَ بھر زورگے لوٹ ءُ دزبندی کنگ بیتگ ـ

جار تاکانی رد ءَ نشہ ءِ بگیری ءَ بؤکیں روانک پنچ ستمبر ءِ بیگاہ ءِ ساھت چار ءَ چہ نیادی سر پسنی ءَ بندات کنگ بیت اِنت ـ

روانک ءِ واکداراں ءَ چہ سیاسی ءُ چاگردی، مزھبی ءُ کارباری ءُ پسنی ایندگے دمگ چربندن، نلینٹ، کپر، کلانچ، گرانی ءِ مردماں چہ لوٹ کنگ بوتگ کہ آ اے نشہ ءِ بگیری ءَ بؤکیں روانک ءَ بھر بزور انت وتی پرز ءَ پیلو بہ کن اَنت ـ

زانگ بہ بیت بلوچستان ءِ تھءَ منشیات چو وبا ء وڑ ءَ تالان بوھان اِنت ـ چریشی ءَ چہ بازیں کھولانی وشی پچ گپتگ انت ـ

دومی نیمگ ءَ پنجگور ءَ ھم چار ستمبر ءَ نشہ ءِ باپاری ءِ بگیری ءَ دیوان کنگ ءِ جار پرینگ بیتگ، دیوان ءِ بارو ءَ گوشگ بیتگ کہ چار ستمبر ءَ آدینگ ءِ روچ ےَ دزپروم مدرسہ ءَ بیگاہ ءِ ساھت پنچ ءَ یک دیوانے کنگ بیت کہ سورین، مکد، دزبازار، ھاجی امان اللہ بازار ءُ مراد بازار ءَ نشہ ءِ بگیری ءَ زیلی کمیٹی جوڑ کنگ بیت اِنت –

ھمے جار ءَ گوشگ بیتگ کہ پنچ ستمبر ءَ جائین مدرسہ ءَ دومی دیوان کنگ بیت ءَ اود ءَ جائین، گواش، کلیری، بندیکین ءَ نشہ ءِ بگیری ءَ کمیٹی جوڑینگ بیت ءُ مھلوک ءَ گوں دزبندی کنگ بیتگ کہ اے نیاداں گوں وت ءَ ھوار بہ کن اَنت –

بلوچستان ءِ تھءَ نشہ بگیری ءَ تنی وھدی یک گامگیجے دیم ءَ اتکگ ـ کہ درساں پیسر اے گامگیج چہ بلیدہ ءَ بندات کنگ بیتگ دشت ءُ پسنی ءُ بلوچستان دگہ دمگاں تالان بوھان انت ـ

لس مھلوک ءِ گوشگ اِنت کہ بلوچستان ءِ جتائیں ھند ءُ دمگاں تنی وھدی ھزارانی ورناہ نشہ ءِ آماچ اَنت ءُ نِی نِشہ ھما کچ ءَ سر بیان اِنت کہ نوک رُستگیں چکاں ھم نِشہ پہ وت ءَ وردنی ءِ سرپد بیگ ءَ اَنت چاگردی مردمانی گوشگ اِنت کہ اگاں اے نِشہ گِر ءُ دار کنگ نہ بیت گڑا چرے نشہ ءِ زور ءَ بلوچ چاگرد یک ٹوھیں جنجالاے ءِ دیمپان بیت کنت –

دی بلوچستان پوسٹ

سر بیتگیں ھالانی رد ءَ مند ءِ دمگ گوبرد ءَ پاکستانی پوج ءَ مروچی سھب ءَ بیڑ برتگ ءُ لشکر کشی کنان ءَ دو مردم آوار جتگ ءُ برتگ –

دمگی مردمانی رد ءَ پاکستانی پوج گوبرد ءِ بازار ءَ مانریتکگ ءُ لوگ لوگ ءَ پَٹ ءُ ھَنڈ کنان بیتگ ھمے میان ءَ پوج ءَ دو مردم آوار جتگ ءُ برتگ –

پوج ءِ دست ءَ آوار جنگ بیتگیں مردمانی پجار جابر ء شریف ءُ نصیر ء پیر مھمد ءِ ناماں زانگ بیتگ اَنت –

اھوالکار ءِ رد ءَ آوار جنگ بیتگیں مردمانی تہ ءَ جابر مگرب ءِ وھد ءَ یلہ داتگ ءُ نصیر تنی وھدی بندیگ اِنت –

اھوالکار ءِ رد ءَ نصیر پاکستانی پوج ءَ مندیگ کور ءَ ھما وھد ءَ آوار جتگ ءُ برتگ کہ آ ٹیکٹر ءِ سر ءَ کار ءَ بیتگ –

زانگ بہ بیت گوستگیں مگرب ءَ مند ڈلسر ءَ ھم پوج ءِ سر ءَ اُرش ءِ ھال بیتگ، بلوچستان ءِ سیاسی ءُ چاگردی مردمانی گوشگ اِنت کہ پاکستانی پوج ءِ سر ءَ ھما وھد ءَ کہ اُرش بیت پد ءَ پوج چریشانی پُشدر ءَ دمگانی سر ءَ بیڑ بارت ءُ لس بے میاریں مردماں لَٹ ءُ کُٹ کنت ءُ بازیں جاھاں جاڑیگیں مردماں آوار ھم جنت –

دی بلوچستان پوسٹ

سر بیتگیں ھالانی رد ءَ گوستگیں روچ ءَ روکپتی بلوچستان ءِ دمگ سراوان ھاش ءَ تیل کشیں گاڑی ءِ چپی بیتگ، چریشی ءِ آسر ءَ یک مردمے بیران ءُ یکے زدگ بیتگ –

اھوالکار ءِ رد ءَ گوستگیں روچ ءَ سراوان ھاش تیل کشیں گاڑی ءِ چپی بیتگ کہ چریشی ءِ آسر ءَ گاڑی ءِ ڈرائیور جلیل شاھوزھی بیران بیتگ ءُ آئی ءِ ھمراہ زدگ بیتگ کہ زدگ بیتگیں مردمے پجار نہ بیتگ –

اھوالکار ءِ گوشگ اِنت کہ ھمک سال چوشیں وئیل بیگ ءَ اَنت کہ مردم وتی لاپ ءِ شوھاز ءَ درکپگ ءُ برے ایرانی پوج ءِ تیرانی آماچ ءُ برے سیمسر ءَ گوزگ ءُ پاکستانی پوج ءِ تیرانی آماچ اَنت –

دی بلوچستان پوسٹ

شال ءِ دمگ ریلوے کالونی ءَ چہ نُھ روچ پیسر آوار جنگ بیتگیں ھشت سالی ئیں لاریب یلہ کنگ بیتگ ءُ آوار جنوک دزگیر کنگ بیتگ –

ایڈیشنل آئی جی پولیس عبدالرزاق چمہ ءَ رسانکدراں گوں گپ کنان ءَ گْوشتگ کہ بیست ءُ چار اگست ءَ لاریب نامی ئیں جنکوے ناشناسیں پرپٹ سواراں لوگ ءِ نزیک ءَ آوار جتگ ءُ برتگ – ارزی نبشتہ کنگ بیتگ ءُ پَٹ ءُ پول بندات کرتگ پد ءَ سرپدی بیتگ کہ دمک ءَ بُٹ پالش کنوکیں مرد ءَ جنکو آوار جتگ –

آئی ءَ ٹاہ داتگ کہ سرپدی کنان ءَ اے مردے لوگ ءَ داں سر بیتگ اِنت ءُ شال ءِ دمگ ھزار گنجی ءِ نزیک ءَ دزگیر کرتگ، آوار جنوک ءَ جنکو یک دگہ لوگے ءَ چیر داتگ –

اے آئی جی پولیس ءَ گْوشت کہ جرمکار دوھزار ءُ پانزدہ ءَ ھمے وڑیں جرمے ءَ دزگیر بیتگ بلے وتی دہ سال ءِ سزایانی سرجم کنگ ءَ ابید پیسرا یلہ کنگ بیتگ –

جنکوے ءِ پت ءَ شال ءِ پریس کلب ءِ دیم ءَ زھرشانی کرتگ –

دی بلوچستان پوسٹ

بلوچستان ءِ بنجاھی شھر شال ءَ وائس فار مسنگ پرسنز ءِ زھرشانی بنجل ءَ 4057 روچ سرجم بیتگ – نال ءَ چہ چاگردی باسک عبدالحق بلوچ، عبدالمالک بلوچ ءُ دگہ مردماں بنجل ءِ تر ءُ تاب کرتگ –

انسانی ھکانی بیگواھیں باسک راشد حسین بلوچ، بیگواھیں امداد اللہ، بلال احمد بلوچ، جمیل سرپردہ ءُ دگہ بیگواھیں مردمانی کھول اتکگ ءُ وتی زھرشانی اِش نبشتہ کنائینتگ –

زھرشانی بنجل ءِ جاڑیگیں بیگواھیں امداد اللہ ءِ پیر ءُ آجزیں مات ءَ وتی چُک ءِ یلہ کنگ ءِ دزبندی کرتگ ءُ گْوشتگ کہ منی چُک شش سالاں چہ بیگواہ اِنت کہ آئی ءِ بارو ءَ پاکستانی سرکار ءَ ابید دگہ ھچ سرپدی نیست کہ البت منی زھگ ءَ یلہ بہ کن اَنت –

مزن ھور ءُ پد ءَ پاکستان ءَ زورانسری ءِ آماچیں انسانی ھکانی باسک راشد حسین بلوچ ءِ مات ءِ گوشگ اِنت کہ چُک ءِ یلہ کنائینگ ءَ زھرشانی ءَ دو سال سرجم بیتگ بلے تنی وھدءَ من ءَ ڈیھی ادارھانی نیمگ ءَ ھچ پسو نہ رس اِتگ –

آئی ءَ گْوشت کہ راشد حسین ءِ دیمدراھی ءِ واستا شال ءُ کراچی ءِ پریس کلبانی دیم ءَ زھرشانی ءَ ھوار بیگواھیں مردمانی واستا ھستیں کمیشن ءَ ھم ھازری دیگ ءَ آں – آئی ءَ گْوشت کہ مزن ھور ءُ پاکستان منی چُک ءِ آوار جنی ءَ یکدست ءَ ھوار اَنت ءُ من انساپ ءِ راہ ءُ رھبندانی تہ ءَ وتی زھرشانیاں برجاہ داراں –

زھرشانی بنجل ءِ سروکی کنوکیں وی بی ایم پی ءِ کسان کمک سرکماش ماما قدیر بلوچ ءَ ھمے وھد ءَ گْوشت کہ اگست ءِ سرجمیں ءَ ماہ ءَ ھما جاھاں پاکستانی پوج ءُ چیریں ادارھاں ڈیتھ اسکواڈ ءِ ھواری ءَ ھوار بیتگ ءُ زوراکی برجاہ داشتگ اَنت ھمایانی واستا وی بی ایم پی ءِ نیمگ ءَ زھرشانی کنگ بیتگ اَنت بلے ریاستی رسانکدر ءُ پاکستان ءِ تھی انسانی ھکانی گلانی گوشاں ھم مورے نہ وارت –

آئی ءَ گوشت کہ انسانی ھکانی گلاں سوگند وارتگ کہ بلوچ نسل کُشی ءِ وتی گوش ءُ چماں بند کن اَنت –

ماما قدیر ءَ گْوشت کہ پُر ایمنیں جد ءُ جھد ءَ الگردیں سیاسی گلانی رھشون، نودربر گل، کارکنوکانی ھمکوپگیں درد ءَ راجدپتر گوش ایت کہ پاکستانی زوراکیں دستاں مارا نشانگ کرتگ – برے پوجی زوراکیانی دروشماِ برے لوگانی سر ءَ اُرش کنگ ءُ دمگی ڈیتھ اسکواڈ ءِ زورانی سر ءَ نشانگ کنگ –

آئی ءَ گْوشت کہ بنگالی آشوبی گل مھلوک ءِ گون ءَ ھوار بیتگ ءُ ریاست ءِ زوراکیانی بگیری ءَ راجدپتر ءِ بھر جوڑ بیتگ اَنت -سندھی، پٹان ءُ بلوچ راج ءِ سر ءَ زوراکی ءُ پُر ایمنیں جد ءُ جھد کنوکیں باسک، رھشونانی آوار جنگ ءُ کوش کسے ءَ چہ چیر نہ اَنت –