TBP Balochi

نبشتانک: سازندہ گشندہ ءُ راجی جُنز

نبشتہ کار: سلمان ھَمل

دی بلوچستان پوسٹ

بلوچ راجی جنز بازیں جھلی ءُ برزیاں گوستگ نوں یک انچیں جاھے ءَ سر بوتگ کہ اود ءَ زند ءِ ھر تک ءُ پھنات ءَ گوں بندوکیں مردم ھوار بوتگ اَنت، شوانگ دھکان، مزدور ، گریب سردار، بزگر۔ جنز ءِ دراھیں تک ءُ پھنات مھکم کنگی انت، سیاسی پھنات ءَ بِہ گر داں ایندگہ پھناتاں، بلے چوش کہ وھد ءِ زوراکی ءُ نگیگیاں بازیں اڑاند دیم ءَ آورتگ انت ءُ دیم ءَ آرگ بنت، بلے اے جنز ءِ یک بلاھیں بھرے کہ آ ساز ءُ زیمل انت، اشی ءِ یک بلاھیں کرد ءِ ما راجی ءُ آشوبی جنزانی تہ ءَ بوتگ ءُ بیت، بلے اے پڑ ءَ گوں بندوکیں مردم ھسابی انت کہ آ گوں لنککاں ھساب بنت۔ گشندہ تئی چاگرد ءِ ھما بھر انت کہ ھر کجا اِشکنگ ءُ گوشدارگ بیت۔ آئی ءَ را ڈرائیور، مزدور، مرد جَن، وانندہ درس گوش کن انت۔ بلے اے پڑ ءَ مئے کر ءَ ادارہ نیست کہ آ بلوچ سازندہ ءُ گشندھاں یکجاہ بہ کنت ءُ آھاں پہ راجی جنز ءَ کار بہ گیپت۔ بلوچی زبان ءِ سازندہ ءُ گشندہ کہ پہ آشوب ءَ باز واھگ ءُ مراد دل ءَ داشتگ آ پہ بے وسی مُرتگ انت کہ آھانی نام ءَ مردم بہ گیپت آ وت یک تاریکے جوڑ بیت۔ استاد ستار مرگ ءِ تھت ءِ سرا ھم پنجابی ءِ چمانی تہ ءَ چماں سک دنت وتی بلوچی زھرگ ءَ پیشدار اِیت، بلے یک چمشانکے ما دنیا ءِ گشندھانی سر ءَ بہ دے اِیں کہ آھاں چوں وتی راجی آشوبانی ھمراہ داری کُتگ ءُ چونیں سَکّی ءُ تکلیپیاں چہ گوستگ انت، گڑا مارا سرپدی بیت کہ آ پرچا دشمن ءُ زوراکاں ھاموش کنگ لوٹ اِتگ انت۔

یانزدہ ستمبر ءَ وھد ءِ جرنل پنوشے چِلّی ءِ مھلونکی ھکومت ءَ پروش اِیت پوجی ھکومت ءِ سربراہ جوڑ بیت گڑا مھلونک مزاھمت کنت آئی ءَ گوں جنگ کنت۔ ھمک نیمگ ءَ جنگی گرابانی توار راہ ءُ دگانی سر ءَ پوجی گاڑیانی گِرّ ءُ گار، دمک ءُ میتگانی تہ ءَ پوجیانی بوٹانی توار ءُ تُپنگی ئیں سپاھانی رپت ءُ آمد۔۔۔ چِلی ءِ سرمایہ دار بہءَ بوتگیں سیاستدان، کلم بھا کنوکیں تاکار۔۔۔ درسانی زبان پہ پنوشے مھر گْوار اِیت ءُ آیانی ھمراہ داری ءَ لبیک کنت، ھما پنوشے کہ نوزدہ روچ پیسر پوج ءِ کماندار جوڑ کنگ بوتگ اَت۔ امریکہ ءِ دست ءُ کُمک ءَ چی ھکومت ءِ سر ءَ کبزہ کنت۔ سدر سلوا دورالاندے ءَ گش اِیت کہ تو دست کش بو، کہ آ سَے سال پیسر گچینکاریاں سَدر گچین کنگ بوتگ اَت، آئی ءِ گناہ ھمیش ات کہ آئی ءَ زردار ءُ نیزگار ءِ تپاوت ھلاس کنگ ءِ ھبر کُرتگ اَت، تانبہ ءُ دگہ مڈیاں راجی مڈی ءِ درج ءَ داتگ اَت۔ امریکی سی آئی اے ءِ ھمراھی ءَ اے سوڑگ بوتگ اَت کہ ھر وڑ بیت الاندے ھکومت ھلاس کنگی اِنت۔ الاندے پاد میھ کنت، بلے پوجی سدر ءِ ماڑی ءِ سر ءَ اُرش کنت۔۔۔ ریڈیو ءَ الاندے آواز جکس اِیت کہ چِلی مھلونک شمے ووٹ منی امانت اَنت، آوانی اّزت ءَ کنیں ءُ اے ھاتر ءَ ما وتی ساہ ءَ دے اِیں، اے فوجی مارا کُشت کن اَنت بلے مئے سیاسی اَمل ءَ پہ تُوپگ داشت نہ کن اَنت اے پیسلہ ءَ تاریک کنت، تاریک ھما کہ آئی ءَ مھلوک جوڑ کنت۔ چِلی ءِ دارلھکومت سان تیاگو ءِ باکسنگ ماڈی، پنچ ھزار سیاسی بندیگ، اے پنچیں ھزارانی تہ ءَ وکٹر جارا چِلی کمیونسٹ پارٹی ءِ باسک الاندے ءِ رھبندانی منوک دست ءَ گٹار پنوشے ءِ پوجی وکٹر جارا گِرّان کنگ ءَ اَنت۔ آئی گٹار چہ آئی دست ءَ پُلگ بیت۔ پوجی گنڈہ گوں وتی توپکانی کُنداکاں جارا ءِ لنککاں بُر انت ءُ دور کن انت، بلے آ پیش ءَ چہ زانت کہ اے آشوب انت آشوب ءِ تہ ءَ ھرچی بوت کنت، آ پوجیانی تیلانک ءَ گوں کپ اِیت پد ءَ پاد کَیت گوں وش گُٹی ءَ گُش اِیت ما باج ءَ بَر ایں۔

” منی راگ نہ اَنت درباری
کہ ھر ڈھل ءِ توار ءَ ناچ بہ کنت
منی سوت پہ باندا اُمیت ءِ
منی ترز استالانی لوٹ اَنت
من گُڈی ساہ ءَ گوں بہ مِڑاں
منی دُرسیں سُر راستی ءِ بہ بنت ”

ھمے سوت ءِ اِشکنگ ءَ گوں پوجی کاینت جارا ءَ بے وڑ لٹ ءُ کُٹ کن اَنت، تیرانی توار بیت آئی جون زمین سر ءَ کپ اِیت کمے رندتِر ءَ آئی ءَ سان تیاگو ءِ دمکانی تہ ءَ چَگل دیگ بیت، اے پانزدہ ستمبر نوزدہ سد ءُ ھپتاد سَے اِنت ۔ وھد بدل بیت چِلی ءِ نامی ئیں شائر پابلو نرودا گوں وتی نزیکیں سنگتاں جَنگ بوتگ۔ وکٹر جارا ءِ شھیدی ءِ ھشتمی روچ ءَ بیست ءُ سَے ستمبر ءَ شست نھ سالیگیں پابلو نرودا ءِ لاش چست کنگ بیت۔ پابلو نرودا ھمے ھاتر ءَ کُشگ بیت کہ آ شئر بند اِیت جارا آئی ءِ سوتاں گُش اِیت، مھلونک گوشدار اِیت سرپد بیت، پنوشے ھلاپ ءَ اوشت اِیت جنگ کنت۔ اے ھمے تُرس انت کہ پنوشے ءِ پوج ءَ مجبور کنت پہ سازندہ ءُ شائرانی کُشگ ءَ۔

ھمے وڑ بلوچ راجی جنز ءَ ھواریں شائر ءُ سازندہ ھم پنجابی پوجیانی دست ءَ آوار جَنگ بنت کُشگ بنت کہ آیانی توار لس مھلوک ءَ سر بوگ انت۔ اَلی جان ساکب، نسیر کمالان، میرجان میرل، نثار سبا ءُ دگہ باز ھمے پَیم دشمن ءِ تیرانی آماچ بنت، ساہ ءَ دے اَنت، بلے پد نہ کِنز اَنت ۔ بلے مروچی ھم اے تَک ءَ باز کار کنگ لوٹ اِیت باز دیمروئی کَنگ لوٹ اِیت، وتی سازندہ ءُ گشندہ رکینگ لوٹ اَنت شائر پھازگ لوٹ اَنت کہ آیانی راجی جنز ءَ زرورت اِنت، شوھازگ لوٹ اَنت، وتی گنج ءُ گوھر پھازگ لوٹ انت۔ اے راجی مڈی انت چو مہ بیت باندا اے چو استاد ستار ءُ آ دگرانی وڑ ءَ پہ بے وسی مرگ ءِ نپادانی سر ءَ پہ بے وسی مِر اَنت۔ بلوچ سازندہ ءُ گشندہ ھم بزان اَنت کہ آ راج ءِ توار اَنت راج ءِ آواز اَنت، آیاں اے جنگ ءِ آواز گِس گِس ءَ سر کنگی اِنت۔ چہ نشہ ءُ سِلیں آدتاں وت ءَ بہ رکین اِت، بلوچ جُنز ءِ توار بہ بہ ِت راجی جنز ءَ دیم ءَ بَر اِت۔

آجوئی جُنز زندگ بات

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: من جیڑ اِت

نبشتہ کار: فضل شیر بلوچ

دی بلوچستان پوسٹ

رسول ھمزہ وتی کتاب میرا داغستان ءِ تہ ءَ جاگھے ءَ گْوش ایت، “وتی ھیال ءُ جیڑگاں مہ ڈبّ اِت چیر مہ دے اِت، اگاں شما اے پئیم کت گڑا بیھیال بہ بہ اِت کہ اے کجا ایر کتگ انت-

پد ءَ اوں گْوش ایت کہ وتی ھیال ءُ جیڑگاں دگر ءِ دست ءَ مہ دے ات، چکان ءَ پہ لئیب ءُ گوازی ءَ لئیبوک ءِ جاگہ ءَ وتی گرانبھائیں ءُ نازرکیں چیز دیگ نہ لوٹ اِیت، چک آئی ءَ باھین ایت، پروشیت، یا وتی جند ءَ زدگ ءُ ٹپیگ کنت-

من یک برے جیڑ اِت، دل ءُ دیدگاں گْوشت کہ اے توامیں شنگ ءُ شانگیں ھیال ءُ جیڑگاں نزّآر یک گُلدانے بکن آں، پد ءَ جیڑ اِت، گلدان ءِ ھواری ءَ یک آسیں ساوڑے بکنان اش داں وانوک ءُ پھموک وشبوھانی ھمراھی ءَ آسیں ساوڑ ءَ اوژناگ کت بکن انت-

من جیڑ اِت کہ منی ماتیں گلزمین ءِ ھشیمیں ماتکوھانی باتن ءَ رأستگیں ھمک میزریں کاہ ءُ بوچ ءَ وت ءَ لھم کتگ ءُ منی پادانی دیم ء وت ءَ چیر گیتکگ اِت اَنت، ھمک ھجگیں گواڈگ ءَ اچ کرومگ ءَ سرکش اتگ منی وش اتک ءَ وتی مھلبیں بوہ ءَ شنگ ءُ تالان کنگ ءَ اَنت، مسکیں ھاک ءَ منا وتی کراربکشیں امبازاں زرتگ ات، ھمک درچک ءُ دار شیشار، تلنمب ءُ کرود، ڈوک ءُ ڈالبار ءَ وتی نودشنزیں ساھگ دستانی دل ءَ کتگ ات منی گامانی دیم ءَ ساھیل ات، مھلبیں سرگوات گوں وتی بانزلاں منی دیم ءَ نرم نرم ءَ گوات کنان ات، شھدشنزیں ھوٹگانی زم زمیں آپ ءِ پنژاراں منی اندر ءِ ھوشام پروشتگ اَت ءُ من ءَ ابدی سیرآپ کتگ ات، کبگ ءُ سیسیگاں پہ منی وشنودی ءَ کوھسراں شادھانی زیمر ساز کتگ ات انت، سید ءُ آھوگ منی راھچار ات اَنت، شانتل ءُ کپوتاں کوکوآنی بے آسریں درچے بندات کتگ ات، ژیمبیں گر ءُ رگ لیٹیں کنڈگاں تلاھیں پترے تالان کتگ ات، ھمک ساہ دیوک ءُ مزارباھندیں ھمبل منی راستیں باسک ات اَنت، وت ءَ دیمھونی کناں ءُ من ءَ رکیناں ات اَنت، چی ءَ کہ من پہ ایردستیں ءُ زدگیں راج ءَ پند جنگ ءَ ات اَنت، منی زند ءُ مرگ گوں ھاک ءَ بندوک ات، منی الماسیں پگر ءَ من ءَ اچ ایدگہ لس مھلوک ءَ یک جتائیں نام ءُ پجارے داتگ اَت، من ء راج ءِ تُپک بڈا ات، ھما توپک کہ آئی ءِ نَل ءَ چے دراتکگیں ھمک گونڈلیں تیر ءِ توار منی راج ءَ یک رژنائیں بانداتے ءِ مستاگ ءَ دیگ ءَ ات، ھما تُپک کہ آئی ءں میگزین ءَ ساھگریں تیر ءُ ھجگیں پل ھوار ات انت، بلے مروچی من ھما ھمک ءَ چے دور یک تھنائیں کوٹی ءَ نشتگاں ءُ سگریٹ ئِے روک کناں ءُ سگریٹ ئِے کُش آں، وتی جند ءَ جیڑگایاں، وتی باتن ءِ ژند ءُ پندیں مردم ءَ جست گرگ ءَ آں، دائم جُتک ءَ بندیگیں سگار (زھم) ءِ آپ نہ مانیت، ءُ دائم بوپ ءُ بکملاں وپسوکیں شھسوار وتی چست ءُ چالاکی، زھم جنی ءِ رپک ءُ رھبنداں چے شمشکار بیت-

من نوں اچ وتی جند ءَ چے سر آیگ ءَ نہ آں، وت ءَ گوں انچو مانگیشتگ آں، من ھمینچو وت گیشینگ ءِ جھد ءُ کوششت ءَ بکن آں گیشتر ماں گیش آں، من ترا گْوش آں تئی ڈوڈک ءِ شیر ترپش انت، تو من ءَ گوش ئے تئی ھینزک ءِ شیر ترپش انت، چش نہ بیت، کسہ مان اَنت، کسہ کنوک مان انت، راستی ھچبر ریدگیں ریزاں بندیگ کنگ نہ بیت، چی ءَ کہ ماتیں گلزمین ءِ ھشیمیں ماتبند کہ منی النگیں سنگر اَنت، منی کوھیں کلات انت، جناوریں دژمن ءِ ھمک رنگیں بمب ءُ ٹوپ وتی ڈوبر ءَ سارت کت انت من ءَ گوں تمردیں ھمراھاں رکینت، من مرچی چہ آئی ءِ ابدی تاھیربکشیں زانسراں دور یک ویرانیں کوٹی ءَ کپتگ ءُ وتی زات ءَ گوں بند ءُ گلائیش آں، کول ءُ مسام ھمے کتگ ات کہ سرجمیں راج ءِ ڈبہ ءَ زوراں، منی زرد ءِ دریھکگ راج ءِ امانت انت، ھمک درتگ پچ ءُ پادشپاد ءِ سر ءِ سارتیں ساھگ باں، ھمک گیمرتگیں کاہ ءُ بوچانی تہ ءَ پروشیں گم ءُ اندوہ ءَ وتی کن آں، داں گڈی ساہ ءَ اچ وتی کول ءُ مساماں پدکنز نہ باں، بلے مرچی من وتی ماتیں گلزمین ءِ مھروانیں مات بنداں چے دور نشتگ ءُ وتی جند ءِ ٹک ءُ بولکاں چِنگ ءُ دپ ءَ دیگ ءَ آں، انچو آرام پسند بوتگ آں کہ ھما زھم جنیں ھمراھاں کہ وت ءَ دیمھون کتگ ءُ من ءَ رکینتگ اش، آھانی چک ءُ چوریگانی گژنگیں لاپ ءُ ھورکیں شکم ءِ سیاہ ماری پیچ ءُ تاب، انارکاں چے سوالیگیں آبلیں ارسانی نھنگیں ھار منی چماں گندگ نہ بنت، مات بنداں نشتگیں راجی مزن زھرگیں بامرداں چے شمشکاراں، بزاں من اچ وتی باتن ءَ مرتگاں، منی جیڑگ رمیزاں گپتگ ءُ کواپگ انت، انچو گْوش اَنت کہ پہ آشوبی ءُ جنگولیں بامرد ءَ گیشیں نندگ ءُ ایمنی آئی ءِ مرگ انت، من وت ءَ ھروچ تسلہ دے آں ءُ ریپین آں کہ چش نہ انت، بلے اگاں راستی ءَ سگگ ءِ ھاٹیگ بہ بیت انچش انت –

شاھین کاہ دیگ ءُ ھر گوشت دیگ گوں من نہ بیت، راست ءَ راست ءُ دروگ ءَ دروگ گشت کن آں –

دگہ جاگھے رسول ھمزہ گْوش ایت، “من یک آوار شائرے آں، منی دل ءِ بند ءُ ریشگاں (جھلانک) ءَ شھری زمہ واریانی مارشت کہ ھست انت آیانی ھد ءُ سیمسر تھنا داں آوارستان ءَ نہ انت، ءُ نا تھنا داں داغستان ءُ ناکہ داں سرجمیں ملک ءَ انت، من وت ءَ سرجمیں دگنیا ءِ دیم ء پسہ دیوک سرپد باں، اے بیستمی کرن انت، اے مارشت ءُ جیڑگاں ابید کس زندگ بوت نہ کنت-

ما فضل چو منزل ءَ بھ سر نہ بیں
چہ وتی راج ءَ کہ دیم ءَ زات بیت

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سرجمیں دنیا ءَ کورونا ویروس ءَ گپتگیں مردمانی کَچ دو کروڑ ھشتاد ءُ سَے لَک پنجاہ ءُ دوھزار ءُ شش سد ءُ شست ءُ ھپت ءَ سر بیتگ ءُ اے نادراھی ءَ مرتگیں مردمانی کَچ نُھ لَک چاردہ ھزار ءُ دو سد ءُ سشت ءُ شش ءَ سر بیتگ اَنت –

کورونا ویروس ءَ سرجمیں دنیا ءَ ھپتاد لَک ھشتاد ءُ یک ھزار ءُ دہ نادراہ نادراہ جاہ، قرنطینہ ءِ بنجلاں جاندراھی ءُ لوگانی تہ ءَ آئسولیشن اَنت، کہ چریشانی تہ ءَ چہ شست ھزار ءُ ھپت سد ءُ چِل ءُ یک مردمانی جاور نگیگ اَنت وھدیکہ دو کروڑ ءُ سَے لَک ءُ پنجاہ ءُ ھپت ھزار ءُ سَے سد ءُ نود ءُ یک نادراہ دراہ بیتگ اَنت –

سِی ءُ سَے کروڑ ءَ گیش آبادی بوج چِست کنوک امریکا کورونا ءَ چہ اسرمند اِنت کہ اود ءَ ویروس ءَ چہ داں انیگ ءَ یک لَک ءُ نود ءُ شش ھزاز ءُ سَے سد ءُ سِی ءُ یک مردم مرگ ءِ دپ ءَ سر بیتگ اَنت وھدیکہ اے نادراھی ءَ نادراہ بیتگیں مردمانی کَچ شست ءُ پنچ لَک ءُ ھشتاد ءُ ھشگ ھزار ءُ یک سد ءُ ھشتاد ءُ یک ءَ سر بیتگ اَنت –

کورونا ویروس ءَ امریکا ءَ بیست ءُ پنچ لَک ءُ یازدہ ھزار ءُ شس سد ءُ نود ءُ ھپت نادراہ ھسپتال، قرنطینہ ءِ بنجلاں جاندراھی ءُ لوگانی تہ ءَ ڈبینگ بیتگ اَنت،چریشانی تہ ءَ چاردہ ھزار ءُ پنچ سد ءُ شش ءِ جاور نگیگ اَنت وھدیکہ سِی ءُ ھشت لَک ءُ ھشتاد ھزار ءُ یک سد ءُ پنجاہ ءُ سَے کورونا ءِ نادراھی ءَ وش بیتگ اَنت –

یک اربے ءَ گیش آبادی ءِ دیھ ھندوستان ءَ کورونا ویروس ءِ نادراھی گیش بیان اِنت کہ انیگیں وھد ءَ دومی نمبر ءَ سر بیتگ، اود ءَ کورونا ویروس ءَ ھپتاد ءُ شش ھزار ءُ سَے سد ءُ سِی ءُ شش مردم مرتگ اَنت وھدیکہ اے نادراھی ءَ اسرمندیں مردمانی کَچ چِل ءُ پنچ لَک ءُ شست ءُ شش ھزار ءُ ھپت سد ءُ بیست ءُ شش ءَ سر بیتگ اَنت –

کورونا ویروس ءِ نادراھی ءَ نادراھی ءِ ڈیھاں ھواریں ڈیھ برازیل سیمی نمبر ءَ سر بیتگ کہ اود ءَ اے ویروس ءَ یک لَک ءُ بیست ءُ نُھ ھزار ءُ پنج سد ءُ ھپتاد پنچ ءَ زندمانی شتگ اَنت کہ اود ءَ اے وھد ءَ کورونا ءَ نادراھانی کَچ چِل ءُ دو لَک ءُ سِی ءُ نُھ ھزار ءُ ھپت سد ءُ شست ءُ سَے ءَ سر بیتگ اَنت –

کورونا ویروس ءَ چہ روس ءَ درستیں بیرانی ھژدہ ھزار ءُ سَے سد ءُ شست ءُ پنچ ءَ سر بیتگ اَنت کہ نادراھانی کَچ دَہ لَک ءُ پنچاہ ءُ یک ھزار ءُ ھشت ءُ ھپتاد ءُ چار ءَ سر بیتگ اَنت –

سرجمیں دنیا ءَ کورونا ءِ نادراھی تنی وھدی زورامند اِنت کہ بازیں مردمانی مرگ ءُ بیرانیانی ھال شنگ بیان اَنت ھمے وڑ ءَ جھانی جانسلامتی ءِ واکداراں گوشتگ کہ سرجمیں ڈیھاں ھمگرنچ بیگ ءُ کورونا ءِ ویروس ءِ واستا المیں درمانے توجیل کنگ بہ بیت آئی ءَ وتی شنگ کرتگیں کلوہ ءَ گُشتگ کہ کورونا ویروس ءِ واستا المی ءِ درمان تنی وھدی دز نہ کپتگ –

پیرو ءَ کورونا ءِ سوب ءَ سِی ھزار ءُ سَے سد ءُ چِل ءُ چار مردم بیران بیتگ اَنت کہ اود ءَ کورونا ءِ ھپت لَک ءُ دَہ ھزار ءُ شست ءُ ھپت نادراھانی کیس رپورٹ بیتگ اَنت –

کولمبیا ءَ کورونا ءَ بیران بیتگیں مردمانی کَچ بیست ءُ دو ھزار ءُ دو سد ءُ ھپتاد ءُ پنچ ءَ سر بیتگ اَنت کہ اود ءَ نادراھی ءَ شش لَک ءُ نود ءُ چار ھزار ءُ شش سد ءُ شست ءُ چار ءَ سر بیتگ اَنت –

میکسیکو ءَ کورونا ویروس ءَ بیران بیتگیں مردمانی کَچ شست ءُ نُھ ھزار ءُ شش سد ءُ چل ءُ نُھ ءَ سر بیتگ اَنت ءُ شش لَک ءُ پنجاہ ءُ دوھزار ءُ سَے سد ءُ شست ءُ چار ءَ سر بیتگ اَنت –

ساؤتھ افریقہ ءَ کورنا ویروس ءِ نادراھی ءَ بیران بیتگیں مردمانی کَچ پانزدہ ھزار ءُ دو سد ءُ شست ءُ پنچ ءَ سر بیتگ اَنت، کہ اود ءَ ویروس ءَ گپتگیں مردمانی کَچ شش لَک ءُ چِل ءُ چار ھزار ءُ چار سد ءُ سِی ءُ ھشت ءَ سر بیتگ اَنت –

اسپین ءَ کورونا ویروس ءِ نادراھی ءَ بیران بیتگیں مردمامی کَچ بیست ءُ نُھ ھزار ءُ شش سد ءُ نود ءُ نُھ ءَ سر بیتگ اَنت کہ اود ءَ داں انیگ ءَ پنچ لَک ءُ پنجاہ ءُ چار ھزار ءُ یک سد ءُ چِل ءُ یک ءَ سر بیتگ اَنت –

ارجنٹینا ءَ کورونا ویروس ءَ دَہ ھزار ءُ نُھ سد ءُ ھپت مردم بیران بیتگ اَنت، کہ اود ءَ داں انیگ ءَ پنچ لَک ءُ بیست ءُ چار ھزار ءُ یک سد ءُ نود ءُ ھشت کیس رپورٹ بیتگ اَنت –

چلی ءَ کورونا ویروس ءَ بیران بیتگیں مردمانی کَچ یازدہ ھزار ءُ ھپت سد ءُ ھشتاد ءُ یک ءَ سر بیتگ اَنت کہ اود ءَ سرجمیں کیس چار لَک ءُ بیست ءُ ھشت ھزار ءُ شش سد ءُ شست ءُ نُھ ءَ سر بیتگ اَنت –

ایران ءَ کورونا ویروس ءَ بیران بیتگیں مردمانی کَچ بیست ءُ دو ھزار ءُ ھپت سد ءُ نود ءُ ھشت ءَ سر بیتگ اَنت کہ اود ءَ سَے لَک ءُ نود ءُ پنچ ھزار ءُ چار سد ءُ ھشتاد ءُ ھشت ءَ سر بیتگ اَنت –

برطانیہ ءَ کورونا ءَ بیران بیتگیں مردمانی کَچ چِل ءُ یک ھزار ءُ شس سد ءُ ھشت ءَ سر بیتگ اَنت کہ اود ءَ ویروس ءَ گپتگیں مردمانی کَچ سَے لَک ءُ پنجاہ ءُ ھشت ھزار ءُ یک سد ءُ سِی ءُ ھشت ءَ سر بیتگ اَنت –

فرانس ءَ کورونا ویروس ءَ سِی ھزار ءُ ھشت سد ءُ سیزدہ مردم بیران کہ اود ءَ سَے لَک ءُ پنجاہ ءُ سَے ھزار ءُ نُھ سد ءُ چِل ءُ چار کیس رپورٹ بیتگ اَنت –

بنگلادیش ءَ کورونا ویروس ءَ چار ھزار ءُ شش سد ءُ سِی ءُ چار مردم بیران ءُ کہ اود ءَ سَے لَک ءُ سِی ءُ دو ھزار ءُ نُھ سد ءُ ھپتاد کیس رپورٹ بیتگ اَنت –

سعودی عرب ءَ کورونا ویروس ءَ داں انیگ ءَ بیران بیتگیں مردمانی کَچ چار ھزار ءُ یک سد ءُ ھشتاد ءُ نُھ رپورٹ بیتگ اَنت ڈیھ ءَ اے وھد ءَ سَے لَک ءُ بیست ءُ سَے ھزار ءُ ھپت سد ءُ بیست ءَ سر بیتگ اَنت –

یک ارب ءُ چِل ءُ سَے کروڑ ءَ گیش آبادی ءِ ڈیھ چین ءَ کہ کورونا ویروس ءِ اولی کیس دیم ءَ اتکگ بیتگ، کہ اود ءَ ویروس ءِ نادراھی ءَ گپتگیں مردمانی کچ ھشتاد ءُ پنچ ھزار ءُ یک سد ءُ شست ءُ ھشت ءَ سر بیتگ اَنت کہ اود ءَ بیران بیتگیں مردمانی کَچ چار ھزار ءَ شس سد ءُ سِی ءُ چار ءَ سر بیتگ اَنت –

پاکستان ءَ نوکیں کورونا ویروس ءِ نادراھی ءُ بیرانیانی تہ ءَ کمی ءُ جاندراھیانی تہ ءَ گیشی ءُ چریشی ءِ سوب ءَ کورونا ویروس ءَ نادراھی ڈیھانی تہ ءَ ھپتمی نمبر ءَ اِنت –

پاکستان ءَ کورونا ویروس ءَ نادراھیانی کَچ سَے لَک ءُ سَے سد ءُ ھپتاد ءُ یک ءَ رپورٹ بیتگ اَنت، کہ اود ءَ بیران بیتگیں مردمانی کَچ شش ھزار ءُ سَے سد ءُ ھپتاد ءَ سر بیتگ اَنت –

کورونا ویروس ءَ پنچ ھزار ءُ ھپت ھزار ءُ نود ءُ پنچ نادراہ ھسپتال، قرنطینہ ءِ بنجل ءُ لوگانی تہ ءَ ڈبگ بیتگ اَنت، کہ چریشانی تہ ءَ پنچ سد ءُ سِی ءُ پنچ نادراھانی جاور نگیگ اَنت وھدیکہ دو لَک ءُ ھشتاد ءُ ھشت ھزار ءُ دو سد ءُ شش نادراہ وش بیتگ اَنت –

دی بلوچستان پوسٹ

یونائیٹڈ بلوچ آرمی ءِ جارکش مزار بلوچ ءَ کوھلو ءُ ڈیرہ بگٹی ءِ میانی دمگ ڈوئی وڈھ ءِ ھند ءَ پوج ءِ چوکی ءِ سر ءَ بیتگیں اُرش ءِ زمہ واری منّ اِتگ –

یونائیٹڈ بلوچ آرمی ءِ جارکش مزار بلوچ ءَ ناشناسیں جاھے ءَ رسانکدراں گوں گپ کنان ءَ گْوشتگ کہ کوھلو ءُ ڈیرہ بگٹی ءِ میانی دمگ ڈوئی وڈھ ءِ ھند ءَ زوگریں پوج ءِ چوکی ءِ سر ءَ مروچی ساھت چار ءَ ھما وھد ءَ سرمچاراں مزنیں ءُ بازیں سلاھانی گون ءَ اُرش کرتگ، اُرش ءَ پوج ءَ جانی ءُ مالی تاوانانی دیمپانی بیتگ –

جارکش ءَ دیمتر ءَ گْوشت مئے اُرش بلوچستان ءِ آجوئی ءَ داں برجاہ مان اَنت –

نبشتانک: آزمانک |جُنزیں دیم پہ سپرے ءَ

نبشتہ کار: سَیپ بلوچ

دی بلوچستان پوسٹ

یک وش الهانیں رگامی مولمے ءَ دل ءَ لوٹ اِت کہ سنگتے ءِ چارگ ءَ بُرواں کِہ مُدّتے ءَ رند سنگت ءَ گوں اهوال ءُ تران نہ بوتگ اَت۔ کمو جیڑ اِت آ جاه چو کمو دور اِنت سَنگتے همراه بہ کن آں سَپر وش نود بہ بیت۔

منی سنگتے هست اَت دیم ءِ میتگ ءَ من شتاں سنگت ءَ گوں دُچار کپت آں کہ داں رو اِیں سپر ءَ کہ کوهنیں سَنگتے سک گیر پیداک اَت همائی ءِ چارگ ءَ رو ایں گڑا من ءُ منی سنگت ءَ مشورہ کت سَنگت ءَ پسو دات مرچی درکا اِیں شرتر اِنت بشامی نوداں هم بَستگ کوش کشگ ءَ اِنت سپر وش بیت گڑا مَن گُشت شر اِنت بیا سینکل ءَ سوار بو رو اِیں دکان ءَ سینکل ءَ را تیل ءُ آیل کن اِیں پد ءَ جُنز اِیں دیم پہ سپر ءَ۔۔

گڑا ما اتک اِیں دکان ءَ سینکل تیل ءُ آیل کُت پہ وت سگریٹ ءُ ورگی سامان زُرت جُنزان بوت اِیں۔
ما وت ماں وت گپ ءُ تران کنان اِت اِیں یار ما سک دیر اِنت آ سنگت نہ دیستگ باریں لوگ ءَ بیت یا جاهے شُتگ ؟ سنگت ءَ پسو دات هیر بیت ساڑی نہ بیت لوگ ئِے وَ هست اُود ءَ رو اِیں کلوهے داں سر بیت کہ سنگت اتکگ اَنت تو اود ءَ نہ بوتگ ئے ! من گُشت هو یار اے هم گپے ما جنزان جنزان اِت ایں کشک روان اَت کوچگ ءُ ڈگارانی تہ ءَ گوں موسم ءَ گُش ئے کہ ندارگ اَت۔ هرکس وتی کاراں گوں دلگوش اَت کوچگانی تہ ءَ کاه ءُ کھچر گْوک، هُشتر اے راه ءِ کوچگ ءِ تہ ءَ سک باز اَت ما گپ کنان ءُ کندان روگ ءَ اِت اِیں گُش ئے کہ جنت اَت،،

اے ندارگ پد ءَ موسم بشامی نود اَت نوں وهد ءُ ساهت هم سُبارگ ءِ نزیک بوان اَت مارا موسم ءَ گُژنگ کُتگ اَت سنگت ءَ پسو دات: یار میتگے دار اِیں آپے چاهے بَلکیں رس اِت مارا بلوچی میتگے! من گُشت: تو مدام شومی آدت کتگ رو اِیں دکانے درگیج ایں شرتر اِنت۔ میتگے زاھر بوت گڑا من سینکل ترینت میتگ ءِ نیمگ ءَ راه ءِ سر ءَ یک بلاهیں کرگینے اَت سک باز جنین نشتگ اَت ما سک نی تنیگ اَت اِیں دل ءَ گُشت برو اُود ءَ آپے گر بور بلکیں شریں مردم اَنت پٹے آپ رس اِیت هیر درامدیں میتگے اَت مئے اولی رند اَت چہ اِد ءَ پیداک اَت ایں۔
سنگت ءَ گشت: برو هو من بیواراں گژنگ ایں۔ من گشت: مرگ برات ترا هاهاها شر
گڑا من اتکاں همے کرگین ءِ نزدیک ءَ داشت اِد ءَ مردین آدم هچ زاهر نہ اَت دْرست جنین اَت اَنت گڑا جنینے دراتک گُشت ئِے شما چو اِد ءِ مردم نہ اِت منی هیال ءَ ؟
من گُشت هو گْوهار ما مساپریں دیم ءَ روگ ءَ اِیں تُنیگ اِیں کمو آپ رس اِیت؟
گڑا همے گوهار ءَ پسو دات ایر ءَ اِت برو اِت آ بان ءِ در پچ اِنت۔ شما نند اِت من پہ شما آپ کاراں گڑا ما چہ سینکل ءَ ایر اتک اِیں شت اِیں بان ءَ پیر زالے اَتک وش اتک کت ئِے همے گوهار ءَ آپ آؤرت گش اِیت ورگ تیار اِنت آپ بور اِت من پہ شما ورگ کاراں گڑا اِشاں مارا هنچو گور کت کَندگ مزاک مسکرا هچ جُست اِش هم نہ کُرت کل شما کُج ءَ اتکگ اِت کُج ءَ روگ ءَ اِت۔ هنچیں مهروانیں مردم اِت اَنت،

گڑا ما وتی گرم سرد کُت دیم ءَ رپتیں پہ سَپر ءَ شت اِیں داں سنگت ءَ گوں دُچار کپت اِیں۔ گپ ءُ تران بوت نند ءُ نیاد شپے جل اِت پد ءَ واتر همے راه ءَ جنزان بوتیں پہ هَمے راه ءِ سر ءِ میتگے کشک ءَ داں نزیک ءَ اتک اِیں لهتیں دری مردماں میتگ اِش رمبینتگ واہ ءُ زار اِنت ،
وهدے من هوش کُت تهاریں کوٹی یے اَت چم بَستگ اَنت هون ءِ بوه اَت۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

شال ءَ ڈُنگانی تیرگواری یک مردمے ٹپی بوتگ، گوستگیں روچ ءَ بند مٹھا چوک کبرستان ءَ زالبولے ءِ لاش دزکپتگ ـ

ٹی بی پی ءَ سربوتگیں ھالانی رِد ءَ بلوچستان ءِ مزن شھر شال ءَ پشتون آباد بند مٹھا چوک ءِ نزیکیں کبرستان ءَ زالبولے ءِ لاش دز کپتگ ـ
ایدھی کارمنداں لاش دست گپتگ ءُ اژدری چار ءُ ٹپاس ءِ ھاتر ءَ ھسپتال ءَ بُرتگ ـ

ھمے وڑ ءَ شال ءِ دمگ شھباز ٹاؤن ءَ دزانی تیرگواری ءَ مردمے زدگ بوتگ ـ

پولیس ءِ رِد ءَ دُزاں پرپٹ ءِ پچگرگ ءِ میان ءَ عامر نامی ئیں مردمے ءِ سر ءَ تیرگوری کُتگ ، چریشی ءِ آسر ءَ آ ٹپی بوتگ ـ

ٹپی بوتگیں مردم ھما دمان ءَ ھسپتال ءَ برگ بوتگ ـ گیشیں پٹ ءُ پول برجاہ انت ـ

دی بلوچستان پوسٹ

دی بلوچستان پوسٹ پتر ھال ءَ سر بیتگیں ھالانی رد ءَ بلوچستان ےِ دمگ دالبندین ءَ بیگواہ بیتگیں حفیظ اللہ ء رحیم مھمد ھسنی ءِژانگولیں جون پل چوٹو ءِ ھند ءَ دزکپتگ ۔

لیویز ءِ رد ءَ دزکپگ راست کرتگ ءُ گْوشتگ کہ ژانگولیں جون پرنس پھد ھسپتال دالبندین ءَ سر کرتگ ۔

دمگی مردمانی رد ءَ جون دمگ ءَ کَل کنگ بیتگ ءُ گوستگیں ھوراں کَل کرتگیں جون پدر کرتگ چریشی ءَ پد دمگ ءِ پھازدار ھال داتگ اَنت۔

حفیظ اللہ مھمد ھسنی کلی قاسم ءِ جھمنند بیتگ ءُ دھکانکار ءِ بیتگ ءُ سِی اگست دوھزار ءُ شانزدہ ءَ بیگواہ کنگ بیتگ ۔

حفیظ اللہ ءِ کستریں برات نعمت اللہ ءَ شال ءَ یک پریس کانپرنسے ءَ گپ کنان ءَ گْوشتگ کہ آئی ءِ برات پوج ءِ یک میجرے ءَ سِیاگست دوھزار ءُ شانزدہ ءَ آئی ءِ لوگ ءَ کلی قاسم ھان ءَ چہ دزگیر کُتگ ءُ برتگ ۔

آئی ءَ گْوشت کہ ٹک ءِ مردمانی گمان بیتگ کہ مئے مردم پَٹ ءُ پولے ءِ واستا برگ بیتگ ءُ پَٹ ءُ پول ءِ سرجم بیگ ءَ پد بلکیں آئی ءَ یلہکن اَنت بلے بازیں وھدے ءِ گوزگ ءَ پد آئی ءِ ھچ وڑیں ھال ء اھوال نہ بیتگ ۔

آئی ءَ گْوشت کہ برات بازیں مدتاں لوگ ءَ نیاتکگ ءُ نانکہ آیاں گوشگ بیتگ کہ کجا اِنت کھول ءِ جیڑہ گیش بیان بیتگ اَنت گڑا آیاںمیجر ءَ را ھال کرتگ ۔

حفیظ اللہ مھمد ھسنی ءِ مات ءَ گوستگیں سال ءَ شال ءِ پریس کلب ءِ دیم ءَ وی بی ایم پی ءِ بنجل ءَ اے پدر کرتگ کہ منی چُک ءِ یلہکنگ ءِ واستا میجر نوید ءَ شست ءُ ھشت لَک لوٹ اِتگ چریشی ءَ پد کھول ءَ زر سرجم کرتگ ءُ داتگ اَنت بلے حفیظ اللہ یلہ کنگ نہبیتگ۔ حفیظ اللہ ءِ کھول ءِ پدر کنگ ءَ پد زرواریں میجر ءَ فیلڈ جنرل کورٹ مارشل بیتگ ۔ فیلڈ جنرل کورٹ ءِ راستانکی ءِ منّانکاںآئی ءَ را اُمر ءِ بندیگی ءِ سزا رس اِتگ ۔

پوج ءِ ادارہ آئی ایس پی آر ءِ نیمگ ءَ اگست دوھزار ءُ نوزدہ ءَ اے بارو ءَ ھما درشان شنگ کرتگ کہ ایشی ءَ گوشگ بیتگ پوج ءِسروک جنرل قمر جاوید باجوہ ءَ فیلڈ جنرل کورٹ ءِ سزا دیگ ءِ ھک ءَ منّ اِتگ ۔

درشان ءَ گوشگ بیتگ ک سلاہ بندیں پوج ءَ وتی گل ءِ رھبندی ھیال گور اِنت ءُ وت زانت ۔ چریشی ءَ چہ اے آفسر ءِ ملازمی ءَھلاس کنت ءُ ایشی ءَ جیل ءَ روان دنت ۔

سیکورٹی پوج ءِ آفسر ءِ سزا بیگ ءَ ابید حفیظ اللہ ءِ دیمدری سرجم نہ بیتگ –

حفیظ اللہ ءِ کستریں برات نعمت اللہ ءَ گوشت کہ وھدیکہ اے گپ راست بیتگ کہ گپتگیں افسر ءِ واک پچ گرگ بیتگ گڑا یکرندے پد ءَ مئے کھول ھمے اُمیتانی ودار ءَ نشتگ کہ حفیظ اللہ دیمدراھی بیت کنت بلے مروچی حفیظ اللہ ءِ لَٹ ءُ کُٹ کرتگیں جوندزکپتگ ۔

دی بلوچستان پوسٹ

شال ءَ گوستگیں روچ ءَ سروزیر بلوچستان جام کمال خان ءِ سروکی ءَ بلوچستان ءِ بنجاھی پتر ءَ بی ایم سی ءِ بارو ءَ بیتگیں نیاد بی ایم سی ءِ سر سبزینگ ءِ زْرمبشت ءَ رد کرتگ اَنت –

نودربرانی شد داں مرگ ءِ ھرتال ءَ ھپت سرجم بیتگ ، بی ایم سی ءِ نودربرانی گوشگ اِنت کہ بنجاھی پتر ءَ بیتگیں نیاد ءَ مئے ھک ءَ ھچ گمانی مان نہ بیتگ چریشی ءَ چہ ما اے پیسلات ءَ رد کن ایں –

نودربرانی گوشگ اِنت کہ اے دروگیں کول ءُ کرارانی ودار ءَ ما دمبرتگ چریشی ءَ چہ ما چوشیں گپانی سر ءَ اُوست نہ داریں ءُ آیوکیں وھد ءَ بی ایم سی ءِ سر سبزینگ ءِ زْرمبشت ءِ گام ترندتر بنت –

آیاں گوشت کہ اے پنچ سال اِنت مارا ھمے وڑیں دروگیں گپ ءُ سدکی دیگ ءَ اَنت بلے مئے گپاں بس یک گوشے ءَ اِش کُنگ ءُ دومی گوش ءَ گوات اش برگ ءَ اِنت ھروھد ءَ بی ایم سی ءِ نودربر ءُ ملازمانی گپ دلگوش کنگ نہ بیتگ اَنت –

زانگ بہ بیت مروچی ھپت روچ اِنت کہ بلوچستان ءِ بنجاھی شھر شال ءَ بلوچ نودربرانی زھرشانی ءُ شد داں مرگ ءِ ھرتال برجاہ اِنت بلے تنی وھدی سرکار ءُ آئی ءِ واکدار نودربرانی مھکمیں سَدکی ءَ بے سوب بیتگ اَنت –

ھمے وڑ ءَ بلوچ چاگردی رسانک کامرد کنوکیں نمرا بلوچ ءَ چاگردی رسانکجاہ ٹویٹر ءَ ٹویٹے ءَ گوشتگ کہ دَہ ماہ اِنت کہ اے رھبند ءِ بگیری ءَ نودربر گل ءُ ملازم زھرشانی کنگ ءَ اَنت ءُ اے زھرشانی ءَ دروگیں اُوستانی سر ءَ یلہ کُت نہ کن ایں-

آئی ءَ گوشت کہ سرکار وتی پیسلات ءَ ھُرت بہ چار اِت ءُ وتی راہ ءَ تچک بہ کنت ما انگت ءَ دم نہ برتگ ءُ مئے آؤکیں گام ترندتر بنت –

ھمے وڑ ءَ بلوچ ایکشن کمیٹی ءِ کسان کُمک سرکماش سبیہ بلوچ ءَ وتی ٹویٹے ءِ تہ ءَ گْوشتگ کہ شد داں مرگ ءَ نشتگیں نودبرانی جاور نگیگ اِنت ءُ آیانی بلڈ پریشر ءُ بلڈ شوگر جھل بیان اِنت –

آئی ءَ گوشت کہ سرکار انگت ءَ ھم مئے سدکی دیگ ءَ بے سوب بیتگ ءُ آئی ءَ گوشت کہ وت پرستانی دست ءَ بلوچستان ءِ آؤکیں پولینگ لِچ اِتگ –

بلوچستان ءِ دمگ ھاران ءَ تیرگواری ءِ وئیل ءَ دو برات بیران بیتگ اَنت –

دی بلوچستان پوسٹ

تیرگواری ءِ وئیل شال ءِ دگ ءَ ھاران ءَ گرڈ اسٹیشن ءِ نزیک ءَ پیش اتکگ کہ اود ءَ ناشناسیں سلاہ بندیں مردماں تیرگواری کرتگ ءُ دو برات نشانگ کرتگ اَنت –

لیویز بنشون ءِ رد ءَ ھردوکیں برات چہ لوگ ءَ کارگس ءَ روگ ءَ بیتگ اَنت کہ ناشناسیں سلاہ بندیں مردماں تیرگواری کرتگ ءُ زدگ کرتگ اَنت ناگیگیں جاوراں ڈی ایچ کیو ھاران شیخ زید نادراہ جاہ ءَ برتگ انت اِش اود ءَ ھردوکیں براتاں وتی ٹپ نہ سگ اِتگ ءُ بیران بیتگ اَنت –

لیویز بنشون ءِ گوشگ اِنت وئیل ءِ پٹ ءُ پول برجاہ اِنت –

زانگ بہ بیت بلوچستان ءَ چوشیں وئیل ھمک وھد پیش آیگ ءَ اَنت بلے سرکاری گامگیج ھچ رنگ ءَ گندگ ءَ بیگ ءَ نہ اَنت –

نبشتانک: کنّو یار واتر کن

نبشتہ کار : چوکّین بلوچ

وھدیکہ تو سرپد بہ ئے زان ئے مار ئے گِند ئے گُڑا تو کُربانی دیگ ءَ چَک ءُ پد نہ بئے وتی بزگّیں راج ءَ گِند ئے بدانی لَگتانی چیر ءَ اِنت تو الم جُھد کن ئے کہ آیاں چہ بَداں بِہ رکّین آں وتی زمین ءِ واھُند وت بِہ باں جُھد کن ئے الم سوبین بہ ئے –

اڑے کنّو تو گپے زان ئے من ترا مُدام یاتانی تہ ءَ یات کن آں بلے تو اِشتاپ کُت اڑے نِند شپ وتی اِنت ھو شپ وتی اِنت بلے مروچگیں شپ شپر ءِ گین من رواں کہ کار ھست بلے زوت واتر بہ من ترا رکست کُت اگاں من بہ زانتیں کہ من ترا دو بر مہ گِند آں من ترا دل ءِ سیر ءَ رکست کُتگ اَت بلے کنّو تو ھم نام نہ گِپت کہ من اِے رند ءَ واتر نباں تو پون کُت یار من پیداک آں تو بُرو جاگہ ءِ سر ءَ نند من رس اِتگاں من گل ءَ بال بوت آں کنّو پیداک اِنت بلے کنّو تو سر نہ بوت ئے من جیڑ اِت کنّو ءَ من ءَ پون کہ من پیداک آں جلدی کایا دیر ئِے کُت بلے کیت من ءَ گُشتگ ئِے من پیداک آں لازم کیت من نِشتگ تاں تیراں توار کُت نزّیک ءَ بازیں تُپنگے ءِ تیر ءَ توار کُت یا ھُدا اِے چی یے بوت؟ من ھُدا گور ءَ گُشت ھُدا زمین ءِ بچ تئی میار اِنت ساتے ءَ رند سنگت اتک اَنت بلے کنّو تو گون نہ اِت ئے سنگت سک پریشان اَنت کنّو تئی جُدائی ءَ من زانت ھیر نہ اِنت بلے من ھچ نہ گُشت رند ءَ من ءَ سنگتاں ھال دات کنّو جنگ بیتگ منی ارس رِتک اَنت من دل ءَ گُشت کنّو نیآتک گوں چی ءَ من کنّو ءِ دوار ءَ تو زان ئے مارا چی کنّو زمین ءَ گیشتر دوست اَت زمین ءَ اِشتاپ اَت پہ کنّو ءَ کنّو زوت کن منی سالونک من سمبھیتگ بانور ءَ بلے کنّو تو منی گْور ءَ چے ءَ نیآتک ئے ؟ تو شت ئے من ءَ یَکیم ھم نہ کُت من انگت ءَ ودار کنگ ءَ آں تو کا ئے-

کُنّو تئی مھروانی ءِ کِسّہ منی کِر ءَ گوں ھچ گال ءَ نہ بیت من نزان آں تئی مِھروانی ءِ کسّہ ءَ کُجام گالاں گوں نبشتہ بکن آں کنّو تو سک مھروان اِت تئی مِھر کسان ءُ مزن گور ءَ یک وڑ اَت کنّو مروچی تئی جُدائی ءَ چار سال سرجم اِنت تئی جتائی ءِ انگریں یات روچ پہ روچ ودّان اَنت-

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔