TBP Balochi

دی بلوچستان پوسٹ

سر بیتگیں ھالانی رد ءَ گوستگیں شپ ءَ روکپتی بلوچستان ءِ دمگ سرباز ءَ ناشناسیں مردمانی تیرگواری ءَ ملک مھمد گوں کسان سالیں چُک ءَ ھوار لوگ بانک ءِ ھمراھی ءَ بیران بیتگ اَنت –

اھوالکار ءِ رد ءَ گوستگیں شپ ءَ سرباز ءِ دمگ دپ کور ءَ ناشناسیں مردماں ملک مھمد ءِ سر ءَ تیرگواری کرتگ کہ چریشی ءَ ملک مھمد ءُ آئی ءِ کسان سالیں زھگ ءُ آئی ءِ لوگ بانک بیران بیتگ اَنت –

اھولکار ءِ رد ءَ بیران بیتگیں زھگ ءِ اُمر شش ماہ اِنت ءُ ملک مھمد ءِ سر ءَ ھما وھد ءَ تیرگواری کنگ بیتگ کہ آ دپ کور ءَ وتی گاڑی ءِ سر ءَ گوزگ ءَ بیتگ ءُ آئی ءِ سر ءَ پجاہ نیاؤرتگیں مردماں تیربارانی کرتگ ءُ گاڑی ءَ سواریں ھرسئیں پت، مات، چُک کُشتگ اَنت –

بیتگیں وئیل ءِ بارو ءَ دگہ سرپدی نہ بیتگ ءُ اھوالکار ءِ رد ءَ چوشیں وئیل ھروھد ءَ بیگ ءَ اَنت ءُ جتائیں وئیلاں جتائیں کُتگکار ھوار اَنت –

نبشتانک: لاگر بدن مھکمیں سنگتے اَت

نبشتہ کار: شیردل بلوچ

دی بلوچستان پوسٹ

بلوچ ماتاں پہ لج ءُ ننگ ءِ پھازگ ءَ نرمزاریں بچ ودی کرتگ اَنت، راج دپتر انچیں بچّانی کسھاں سرکیل اِنت اگاں نامان اِش بِہ نبیس ئے ند ءِ سیاھی ھلاس بنت ءُ کاگد پُر بنت، نبیسوک دمبارت ندر بوؤکانی نامانی لڑ انگت ھلاس نہ بنت، بلکیں روچ پہ روچ لڑ انگت دراج بوگ ءَ اَنت –

پہ زمین ءُ کوم ءِ ھاتر ءَ کربان بوتگیں پرزند مدام نمیران اَنت، اگاں مرچی بلوچ راج ءِ نام ماں جھان ءَ ھست اِنت گڑا زمین ءِ دلبند ءَ رِتکگیں ھونانی برود اَنت۔

بَلے!بلوچ کوم ءِ گوست بہ بیت یا انوگیں جاور بہ بنت بلوچ راج ءَ جھان ءِ دیم ءَ وت ءَ را منائینتگ وتی کوم ءُ زمین ءِ دژمن ءِ دیم ءَ سر جھل نہ کرتگ اَنت، بلکیں زوراک ءِ دیم ءَ مِکیں دیوال بوتگ ءُ جنگ داتگ ءُ زگریں ھون رِتکگ اَنت –

انچو گوش اَنت کوم پہ مِرگ ھلاس نہ بنت، بلکیں سر ءِ جھل دارگ ءَ پجار ھلاس بیت، سر ندر کنوکیں راج تاں دیر ءَ گلام دارگ نہ بیت ،گلامی ءِ سیاھیں شپ یکروچے آسر بیت آجوئی ءِ بام دنت ـ

آجوئی ءِ ھاتر ءَ ندر بوتگیں بچّاں چہ یکے “رازک جان اُرپ کھورجان واجہ کادربکش ءِ لوگ ءَ ودی بوتگ اَت، جاھو کوھڑو ءِ جاہ منند اَت، ماں کوھڑو ءِ مزن وانگ جاہ ءَ( ھائی اسکول) پنج تبک دربُرتگ اِت ئِے ءُ گیش وانتگ اِت ئِے، ایدگہ براتانی کسترین اَت، گس ءِ کستریں زھک لاڑلا بنت پہ گُشگ ءَ مات ءُ پِت ءَ را دل نہ بیت انچو ایدگہ برات ءُ گُھار ھم دوست ئِے دار اَنت ، بلوچ روایت گوں کسترین ءَ ھم مھر ءُ دوستی ءِ سکین ءَ دنت ـ

لاگر بدن مھکمیں سنگتے اَت ، جند ءَ را بہ دیستیں انچو مار اِتگ اَت اے لاگر بدن چوں پند جت کنت …؟
گران ءُ دور سریں راھاں سپر کنت …؟
بَلے!سک تمردیں سنگتے اَت، سپر بوتگ اَنت یا جنگ جاہ گونیں ھمراھاں توسیپ کُرتگ اَت، ھرچ وھد ءَ بہ دیستیں بچکندگ ءَ اَت ، وش تب ءُ مھروانے اَت ، پہ آئی ءِ واستا دراھیں سنگتانی مانا یک بوتگ ، گَل ءِ درستیں سنگتاں یک ھساب ءَ مھر ئِے داتگ اَت ـ

بیست ءُ ھشت سارتان ءَ دوھزار ھبدہ ءِ روچ ءَ سپر ءَ دَر کپ اَنت، استان ءِ شوم ءُ شانزدہ ءُ لگوریں پوجیگ پہ چیرُکانی کاینت کوہ ءِ دَمگ ءَ کور ءِ تھ ءَ دازانی توک ءَ نند اَنت ءُ راہ بند بیت، بزان ساری ءِ روچ ءَ بی ایل ایپ ءِ تمردیں سرمچاراں، استان ءِ لشکر ءَ را شَرّیں لٹے داتگ اَت ، لھتیں پوجیگ ، مردار کرتگ اِش، لشکری سک پدرد بوتگ اَنت ـ

ھمے جنگ ءَ پد ءَ کوھڑو بنجل ءِ میجر ءَ میتگ ءِ دراھیں مھلوک زھگ ءُ زالبول گرپتار کتگ اَنت سک ءَ بیم ءُ بیھار اِش دنت،
بَلے! مول ھمے بوتگ سرجمیں ھلک ءِ مردماں گرپتار کنیں سرمچار ھچ ءَ سھی ءُ سرپد مہ بنت راھاں روگ آیگ نہ بیت ما راہ ءَ بند اِیں گندگ مہ بہ ایں ،جنگولیں سنگت ھمے نیمگ ءَ پہ سپر ءَ آیگ ءَ بنت ، راہ بندوک اِنت ، ڈیک وارتگ اِش لشکریاں کوکار داتگ ھمے گوشت اِش سلاھاں دَور بہ دے اِت دست ءُ گوش بہ بہ اِت، گڑا سرمچاراں سنگر گپتگ، جنگ مَچ اِتگ، لشکریاں انگر کنگ ءِ جُھد کتگ اَنت، تاں دیر ءَ جنگ برجاہ بیت “ کماندار اللہ بکش اُرپ بشام بلوچ ءُ رازک جان اُرپ کھورجان بلوچ وتی ایدگہ ھمراھاں دَر کنگ ءَ سوبین بنت، بازیں لشکری یے مردار بیت ءُ دِگہ باز زدگ کن اَنت ءُ وت ھم ھمے جنگجاہ ءَ شھید بنت ـ

سارتان ءِ شھید اللہ بکش اُرپ بشام بلوچ ءُ شھید رازک جان اُرپ کھورجان بلوچ ءَ ھور سرڈگار ءِ شھیداں سھرچکیں دورت پیش کناں ـ

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ نیکشھر ءَ گنداوگ ءِ وزیر تعلیم عبدالناصر ھسین زئی دگ ءِ وئیل ءِ آماچ بیتگ –

اھوالکار ءِ رد ءَ شانزدہ دسمبر ءَ وزیر تعلیم نیکشھر ءَ دگ ءِ وئیل آماچ بیتگ ءُ آئی ءِ جنف رک اِتگ ءُ آئی ءِ گاڑی ءَ تاوان بیتگ –

ھمے وڑ ءَ ھاش ءُ پھرہ ءِ دگ ءِ وئیل ءَ ھشت مردم زدگ بیتگ اَنت –

وئیل ھاش ءَ ھپتاد ءُ پنچ میل دور بیتگ کہ چریشی ءَ ھشت مردم زدگ بیتگ اَنت، زدگ بیتگیں مردم نادراہ جاہ ءَ برگ بیتگ اَنت-

ڈاکٹر فریبرز راشدی ءَ گوشتگ کہ وئیل ھبدہ ستمبر ءِ شپ ءِ ساھت دَہ ءَ بیتگ کہ اود ءَ نادراہ کشیں گاڑی پجارینگ بیتگ اَنت ءُ زدگ بیتگیں مردم اش چِست کرتگ ءُ نادراہ جاہ ءَ برتگ اَنت ئِے –

ڈاکٹر ءِ گوشگ اِنت کہ گیشتریں وئیل پھرہ ءُ دزاپ ءِ میانی دگ ءَ پیش آیگ ءَ اَنت –

آئی ءَ گوشت کہ وئیلانی بارو ءَ سرکار ھچ گامگیج زورگ ءَ نہ اِنت کہ چریشی ءَ راہ ءَ رؤکیں مردم بے دلگوشی ءَ روانت –

نبشتانک: اَزم ءُ نِشہ

نبشتہ کار: آرپ وپا بلوچ

دی بلوچستان پوسٹ

“اتا شاد ءَ یک گلگدارے ءِ ته‍ ءَ یکے جست کنت
اشکنگ ءَ تو بیست ءُ چار اَدار نشہ ئے؟ “

اتا شاد گش ایت “اگاں من بیست ءُ چار اَدار نشہ آں من سِنچ ءُ زانت ءِ گپ ءَ چون جناں ادب چون ساچاں ؟”
اردو لبزانک ءِ هرچ کرن ءِ بادشاهیں شائر میرزا اسد الله گالب بلکیں آئی ءَ آفاقی لچّہ کارے بہ گُش اَنت انگت جوانتر بیت ۔

گُش اَنت میرزا اسد الله گالب ءَ شراب باز وارتگ شراب ءِ واستا آئی ءَ وتی لچّہ هم بها کتگ اَنت پد ءَ اے هم گُش اَنت آئی ءَ وتی گیشتریں لچّہ سد ءُ سما ءِ پاکی ءِ نماز ءِ وهد ءَ ساچتگ اِت اَنت بزاں آ مسلہ ءِ سر ءَ نشتگ ءُ وتی لچّہ گُکّ بستگ انت پد ءَ سهب ءَ هما گُکّ پچ کتگ انت ءُ لچّہ نبشتہ کتگ انت۔

نامداریں دستونک گش جگجیت سنگھ ءَ یکے وتی گلگدار ءِ ته‍ ءَ جست کنت۔

“شراب ءُ زیمل ءَ تو چون چارئے
آ گش ایت شراب یک ایاشی یے زانگ بیت ایشی ءَ گوں زیمل ءَ هچ نزیکی نیست سُر پاکیں چیزے اے گوں ناپاک ءَ گشگ نہ بیت ”
دومی نیمگ ءَ مئے کلاسیکل شهّلچہ کار بہ بنت گشنده ءُ پهلوان بہ بنت ما هجبر اش نہ کتگ ملا پازل ءَ شراب وارتگ ما هجبر اش نہ کتگ پهلوان ملا کمالان ءَ شراب وارتگ ، یا نشہ کتگ اے دوئیں تئی لبزانک ءِ هما نام انت کہ همک کرن ءَ شاهکاریں ازم ءِ چیدگ زانگ بنت ۔

نی وتی اهد ءِ سر ءَ چمشانکے دے ایں مارا همے گندگ ءَ کیت مئے لبزانکی ، آروسی کجام هم شرپ داریں ، دیوان ابید ء سلگتیں شراب ءُ نشہ ءَ آسر نہ بنت مئے ازم کاراں گیشتر اے چیز رواج داتگ کہ شائر گشنده شرابی بنت ۔

اے پہ مئے پدمنتگیں چاگرد ءَ یک تباهی ءُ ورناهانی واستا بربادی ءِ شھدگے آ اد ءَ سر جن انت ءُ هچ نہ بنت گار بنت
شریں ساچشت گوں زانشت ءُ زانت ءَ ودی بیت گوں وانگ ءُ زانگ ءَ ودی بیت گوں جهد ءُ تْراشگ ءَ ودی بیت گوں اکیڈمک کاراں ، گوں پُر مڑاهیں زانت ءُ لبزانکی سرچمگ ءُ ادارهاں ودی بنت ، شراب ءُ نشہ انسان ءِ هوش ءَ گار کنت آئی ءَ بے زانت ءُ بے سِنچ کنت جنگ کنگ ءُ چپورتی پرمائیت، ایدگہ کوم ءُ راجانی لبزانکی دیوان بنت آ گوں زانت ءُ سِنچ ءَ آسر بنت مئے گوں جنگ ءُ چوپ ءَ آسر بنت ۔

گشنده نہ زانت من چی گشگ ءَ آں سازنده نہ زانت من چی جَنَگ ءَ آں گوش داروک نزانت من ءَ چی دیگ ءَ اَنت ۔

شائر تلو ءِ سر ءَ لچّہ ءِ وانگ ءَ پیداک انت هزار گوش داروک نشتگ کہ مارا چی دنت بلے واجہ ءِ پاد گون نہ اَنت۔

راج ءُ کومانی جهگیریں انسان شائر ءُ گشنده ندکار پرے هال ءَ بنت آ راج ءِ هال چی بیت۔

دی بلوچستان پوسٹ

سر بیتگیں ھالانی رد ءَ روکپتی بلوچستان ءُ رودراتکی بلوچستان ءِ سیمسری دمگ ماشکیل ءِ سیمسراں ایرانی لشکر ءَ تیرگوار کرتگ ءُ چار مردم کُشتگ ءُ لھتے زدگ کرتگ اَنت –

اھوالکار ءِ رد ءَ گوستگیں روچ ءَ ایرانی لشکر ءَ روکپتی بلوچستان ءُ رودراتکی بلوچستان ءِ سیمسری دمگ ماشکیل ءِ سیمسراں ایرانی لشکر ءَ دو گاڑیانی سر ءَ تیرگواری کرتگ، چریشی ءِ آسر ءَ چار مردم بیران بیتگ ءُ لھتے زدگ بیتگ اَنت –

اھوالکار ءِ رد ءَ ایرانی لشکر ءِ گوشگ اِنت کہ ھردوکیں گاڑیاں بندشی مال مان بیتگ کہ چریشی ءَ ایرانی لشکر ءَ آیانی سر ءَ تیرگواری کُرتگ ءُ مردم کُشتگ اَنت –

اھوالکار ءِ رد ءَ گوستگیں روچ ءَ یک سواری گاڑی ءُ یک بارکشیں گاڑی ءِ کہ راہ ءَ روگ ءَ بیتگ اَنت ایرانی لشکر ءَ ابید آیانی دارگ ءَ آیانی سر ءَ تیرگواری کرتگ-

بیران ءُ زدگ بیتگیں مردمانی نام تنی وھدی ایرانی لشکر ءَ پدر نہ کرتگ اَنت ءُ جون ھرچارینانی لشکر ءَ گون وت برتگ اَنت –

دی بلوچستان پوسٹ

مکران ءِ زر ءَ پاکستانی زر پوج ءَ روکپتی بلوچستان ءِ ھشت مردم دزگیر کرتگ اَنت –

سر بیتگیں ھالانی رد ءَ پانزدہ ستمبر ءَ پاکستانی زر پوج ءَ روکپتی بلوچستان ءِ دمگ دمپگ دشتیاری ءِ جھمنندیں ھشت مردم مکران ءِ زر ءَ گپتگ ءُ برتگ اَنت –

اھوالکار ءِ رد ءَ ھشتیں مردم ھما وھد ءَ دزگیر کنگ بیتگ اَنت کہ آیاں روکپتی بلوچستان ءَ بار جتگ ءُ دیم پہ رودراتکی بلوچستان ءَ آیگ ءَ بیتگ اَنت کہ پاکستانی زر پوج نیوی ءَ گپتگ ءُ برتگ اَنت –

اھوالکار ءِ رد ءَ گپتگیں مردماں پہ لاپ والینگ ءَ سیمسری ءَ گوزی کرتگ ءُ چریشی ءَ چہ آ دزگیر کنگ بیتگ اَنت کہ ورنایاں دگہ روزگاری ءِ آسراتی ءِ نہ بوگ ءِ سوب ءَ مردم لاچار اَنت کہ ھنچیں کاراں دزمانجن بنت –

دی بلوچستان پوسٹ

بلوچستان ءِ مزن شھر شال ءُ مکران ءِ مزن شھدگ ءِ وئیلاں کسان سالیں زھگے ءَ ھوار سَے مردم بیران ءُ چار زدگ بوتگ-

ٹی بی پی پتر ءَ سر بوتگیں ھالانی رِد ءَ شال ءِ دمگ نواں کلی ءَ مدرسہ دگ ءِ سر ءَ پرپٹ ءِ ٹکر جنگ ءَ کسان سالیں زھگے بیران بوتگ –

بیران بوتگیں زھگ ءِ پجّار زیب رحمان ءِ نام ءَ بوتگ –
دمگی پھازداراں ھما دمان ءَ جون دست گپتگ ءُ نادراہ جاہ ءَ سر کُتگ – اود ءَ اژدری چار ءُ ٹپاس پد زھگ ءِ جون کھول ءِ گور ءَ سر کنگ بیتگ –

دومی وئیل مکران مزن شھدگ ءَ بزی ءِ کنڈگ ءِ نزیک ءَ دیم ءَ اتکگ کہ ٹریلر ءُ گاڑی ءِ ڈیک ورگ ءِ سوب ءَ دو مردم بیران ءُ چار زدگ بوتگ اَنت –

وئیل ءَ آصف ء محمد نادر ءُ رضوان ء عبدالرزاق بیران بوتگ انت وھدیکہ موسیٰ، صادق، سجاد ءُ عزیز ٹپی بوتگ انت –
بیران ءُ ٹپی بوتگیں مردم اورماڑہ ءِ نادراہ جاہ ءَ برگ بوتگ انت –

بیران ءُ ٹپی بوتگیں مردم کراچی ءِ دمگ لیاری ءِ جاھمنند انت –

سر بیتگیں ھالانی رد ءَ روکپتی بلوچستان ءِ تیابدپی شھر چھبار ءَ ایرانی لشکر ءِ زنداناں چہ سَے مردم یلہ کنگ بیتگ اَنت-

دی بلوچستان پوسٹ

یلہ بیتگیں مردمانی پجار مھمدی ھملی ء عبداللہ، ارسلان ھملی ء چراگ ھان ءُ ھسام ھملی ء عبدالغفور ءِ نام ءَ زانگ بیتگ اَنت –

اھوالکار ءِ رد ء اے ھرسئیں مردم کیشکور سرباز ءِ نندوک اَنت ءُ پنچ ماہ ءَ پیسر ایرانشھر ءَ وتی گاڑی ءِ شر کنگ ءَ روگ ءَ بیتگ اَنت کہ ایرانی چیریں ادارھاں دزگیر کرتگ اَنت –

اھوالکار ءِ رد ءَ دزگیر کرتگیں مردم ھما وھد ءَ دزگیر کنگ بیتگ اَنت آ دہ روچ ءَ چیریں زنداناں برگ بیتگ اَنت ءُ آیانی کھول ھچ رنگ ءَ سرپد کنگ نہ بیتگ اَنت چِد ءُ پد آ زاھدان ءَ زندانی کنگ بیتگ اَنت –

اھوالکار ءِ رد ءَ یلہ بیتگیں مردم سَے روچ پیسر چھبار ءَ یلہ کنگ بیتگ اَنت ءُ اشانی سر ءَ بھتام بیتگ کہ اے ڈیھ دشمنیں کاراں دزمانجن بیتگ اَنت –

اھوالکار ءِ رد ءَ بازیں مردم ھمے رنگ ءَ زندانی کنگ بیگ ءَ اَنت بلے اشانی تہ ءَ بازیں مردم پد ءَ یلہ کنگ ءُ آیانی سر ءَ بے سریں بھتام جنگ ءُ پد ءَ آیانی پشتی ھچ زاھری پیداک نہ اِنت –

دی بلوچستان پوسٹ

بلوچستان ءِ دمگ کیچ ءِ بنجاھی شھر تربت ءَ جسٹس فار شاھینہ شاھین کمیٹی ءِ نیمگ ءَ انساپ ءِ نہ رسگ ءِ ھلاپ ءَ پبلک لائبریری ءَ چہ شھید فدا چار راہ ءَ مروچی یک روانکے کشگ بیتگ –

روانک ءِ بھر زیروکیں مردمانی دست ءَ نبشتگیں کاگد ءُ بینر بیتگ اَنت کہ آیانی سر ءَ اھوالکار شاھینہ ءِ انساپ ءِ رسگ ءِ اوگام نبشتگ بیتگ اَنت –

شاھینہ ءِ کھول ءَ ھوار ال پاٹی کیچ، ایچ ار سی پی، بی ایس او ءُ جتائیں چاگردی ادارھاں بندوکیں باسکاں روانک ءَ بھر زرتگ –

روانک ءِ مھلوک شھدربرجاہ ءِ دگ ءَ تھرما میٹر چار راہ ءَ گوزان ءُ شھید فدا چار راہ ءَ زھرشانی اش کرتگ –

زھرشانی ءَ ایچ ار دی پی ءِ ریجنل کوارڈی نیٹر پروفیسر غنی پرواز ءَ ھوار دگہ سروکاں کُشتگیں اھوالکار شاھینہ ءِ کوش ءَ دو ھپتگ گوستگ بلے تنی وھدی دزگیری ءَ دمگدار ءُ پولیس ءِ کرد ءِ سر ءَ ایراد گپتگ –
سروکانی گوشگ انت کہ پولیس تلبگاری ءِ کنگ ءَ اِنت جرمکار ءَ رکینگ ءَ اِنت –

روانک ءَ بھرزیروکیں مردماں کیچ ءِ دمگدار ایراد گپتگ ءُ گوشتگ کہ کشندہ ءِ سر ءَ مزنیں دستانی ھواری ءَ پولیس دزگیر کنگ ءَ ترسگ ءَ اِنت –

زانگ بہ بیت شاھینہ شاھین ءِ کوش ءِ بگیری ءَ بلوچستان ءِ جتائیں جاھاں زھرشانی برجاہ اَنت –

ھمے وڑ ءَ بلوچ کمیونٹی نیدر لینڈ ءَ ھم زھرشانی ءِ جار پرینتگ –
ھمے وڑ ءَ نیشنل پاٹی ءَ ھم مروچی بیتگیں زھرشانی ءِ پلامرزی کرتگ ءُ شاھینہ شاھین ءِ کشندہ ءِ دزگیری ءِ لوٹ کرتگ ءُ کھول ءِ انساپ رسینگ ءِ لوٹ کرتگ –

زانگ بہ بیت شاھینہ شاھین دو ھپتگ ءَ پیسر آئی ءِ لوگ واجہ ءَ کُشتگ ءُ تتکگ –

شاھینہ شاھین بلوچ بتکار، ٹی وی اینکر ءُ بلوچ زالبولانی اولی تاک دزگوھار ءِ شونکار بیتگ –