TBP Balochi

دی بلوچستان پوسٹ

بلوچ نیشنل مومنٹ ءِ بنجاھی جارکش ءَ مروچی وتی شنگ کرتگیں درشان ءَ گوشتگ کہ بی این ایم ءِ برتانیہ ءِ ھنکین ءِ سروک حکیم بلوچ ءِ سروکی ءَ یک گند ءُ نندے برتانیہ ءِ کنزرویٹو پاٹی ءِ گوستگیں چیئرمین ءُ پارلمینٹ ءِ انیگیں باسک ءُ وزیر ٹرانسپورڑ گرانٹ شپس ءَ بیتگ – گند ءُ نند ءَ بی این ایم ءِ برتانیہ ءِ ھنکین ءِ جنرل سیکریٹری نیاز بلوچ ءُ شھزاد بلوچ ھوار بیتگ اَنت –

جارکش ءَ گْوشت کہ اے گند ءُ نند ءَ برتانیہ ءِ پارلیمنٹ ءُ وزیر ٹرانسپورٹ گرانٹ شپس ءَ گوں بلوچستان ءِ سر ءَ زورگری ءُ پاکستانی زوراکیانی سر ءَ گپ ءُ تران بیتگ – آئی ءَ بلوچستان ءِ انیگیں جاورھالانی بارو ءَ سرجمی سرپدی دیگ بیتگ – برتانیہ ءِ پارلیمنٹ ءِ باسک ءَ بلوچستان ءَ بیوکیں انسانی ھکانی پامالی ءِ سر ءَ بژنی درشان کرتگ ءُ گوشتگ کہ اے نوکیں دور ءَ اے وڑیں زُلم ءُ زوراکیانی ترندیں وئیلانی سر ءَ دنیا ءِ بے تواری بژنیگ ءُ اجکھی کنت – گرانٹ شپس ءَ سدکی داتگ ءُ گوشتگ کہ آ وتی دری کارانی وزیر ءَ اے درگت ءَ نویسی ءِ ھال دنت دانکہ آ پاکستان ءَ بلوچستان ءَ بیوکیں انسانی ھکانی پامالی ءِ سر ءَ جست بہ کنت –

جارکش ءَ گْوشت کہ پاٹی ءِ بنزہ ءِ نیمگ ءَ چہ جتائیں میمبرز آف پارلیمان ءَ دزنویسی نبشتگ کرتگ کہ چریشی ءَ پد جتائیں ممبر آف پارلیمان جوناتھن گولیس ءُ اسٹیفن مارگن ءَ برٹش فارن، کامن ویلتھ اینڈ ڈیولپمنٹ آفس ءُ برتانیہ ءِ ممبر پارلیمان ءَ حیات مرزا بلوچ ءَ ھوار بلوچستان ءَ انسانی ھکانی ترندیں پامالی ءِ بارو ءَ دزنویس نبشتگ کرتگ کہ چریشانی سر ءَ آئی ءَ اے سدکی ءِ ھمراھی ءَ پسو داتگ کہ برتانیہ ءِ سرکار کجام ھم بے ارزی گرزی ءَ کُشت ءُ کوش ءُ زورانسری بیگواھیاں ترندی ءَ ایر جنت – ما دراھیں ڈیھاں اے وڑیں وئیلاں چار ءپ گچاری ءَ، زمہ واریں دزمانجناں سزا دنت ءُ گاری ءِ آماچی ءِ مھلوک ءُ آئی ءِ کھول ءَ انساپ ءِ دیگ ءِ دزبندی کن ایں -ءُ اے جاورھال ءَ زوت ءَ زوت کارگس ءِ دیم ءَ ایر کن آں ءُ چہ آئی ءَ اے درگت ءَ پسوے لوٹ ءَ کن آں

جارکش ءَ گوشت کہ مروچی بیتگیں اے گند ءُ نند ءَ بلوچ نیشنل مومنٹ ءِ میان اُستمانی اے نیادانی بھر اِنت کہ چریشی ءَ ایوک ءَ زھرشانی ءُ دگہ نیادی مراگش کنگ ببت بلکیں دودمانیں دنیا ءُ دگہ مزن اگدو داریں سرکاری ءُ دگہ نامی ئیں مردماں گوں گند ءُ نند کنت ءُ آیاں بلوچستان ءِ راجدپتر ءُ انیگیں جاورھال ءِ سر ءَ سرپدی دنت –

دی بلوچستان پوسٹ

راج ءِ لوٹانی رِد ءَ نشہ باپاریانی بگیری ءَ کاروائی کنگ ءِ بندات کُرتگ، نشہ ءِ بنجل بند کنگ نہ بوت اَنت، باپاری کنوک تچکی ءَ نشانگ کنگ بنت – بیبگر بلوچ

ٹی بی پی پتر ءَ سربوتگیں ھالانی رِد مروچی سھب ءَ پنجگور ءِ دمگ خدابادان سراوان ءَ ناشُناسیں سلاہ بندیں پرپٹ سواراں نشہ باپاری کنوکیں شبیر نامی ئیں مردمے ءِ بنجل ءِ سر ءَ دز بمب اُرش ءِ کُتگ – اُرش ءِ آسر ءَ ھچ وڑیں جانی تاوان ءِ ھال نہ بیتگ –

دمگی اھوالکارانی رِد ءَ پنجگور ءِ تہ ءَ اے نشہ باپاری ءِ درساں مستریں بنجل انت کہ اود ءَ ھر وڑیں مزن کسانیں نشہ بھا بیت ءُ چہ دوراں مردم نشہ ءِ زورگ ءَ کائنت –

دومی نیمگ ءَ بلوچ آجوئی لوٹوکیں گل بلوچ ریپبلکن آرمی ءِ جارکش بیبگر بلوچ ءَ رسانکدراں اے اُرش ءِ زمّہ واری منّ اِتگ ءُ گوشتگ کہ مروچی سھب ءَ شبیر نامی ئیں نشہ باپاری کنوکیں بنجل ءِ سر ء دزبمب اُرش ءِ کُتگ، اے اُرش پنجگور ءَ ھوار مکران ءِ ایندگے دمگاں نشہ باپاریانی ھاتر ءَ یک بیھارے ، پرچا کہ گیشتر نشہ باپاری کنوک ریاست ءِ سرپرستی ءُ دمگی پولیس ءِ ملام دئیگ ءَ نشہ ءِ باپاری ءُ بلوچ چاگرد ءِ تہ ءَ زھر تالان کنگ ءَ انت –

جارکش ءَ گوشتگ کہ نشہ ءِ بگیری ءَ بلوچ راج گوستگیں بازیں ماھاں چہ زھرشانی کنگ ءَ اِنت بلے ریاستی پولیس ءُ ادارہ وتی داشتگیں مردمانی بگیری ءَ گامگیج نہ زورگ ءَ انت – گل ءَ راجی لوٹانی رِد ءَ نشہ باپاری کنوکانی بگیری ءَ سلاہ بندیں کاروائیانی کنگ بندات کُرتگ ـ ما تچکی ءَ اے جار ءَ پرینیں کہ اگاں نشہ باپاری کنوکاں شھرانی تہ ءَ نشھی بنجل بند نہ کُرتاں گڑا آ تچکی ءَ نشانگ کنگ بنت –

جارکش ءَ گوشتگ کہ اگاں نشہ باپاری کنوکانی بگیری ءَ مئے کاروائیانی میان ءَ دمگی پولیس ءَ مئے سرمچارانی راہ دارگ ءِ جھد کُرت یا تاوان داتاں گڑا ما پولیس ءَ تچکی ءَ آھانی کمکار سرپد بہ ایں ءُ آھانی سر ءَ پسوئی اُرش ءَ کنگ ءَ چک ءُ پد نہ بہ ایں –

دی بلوچستان پوسٹ

بلوچستان ءِ مزن شھر شال ءَ تیرگواری ءِ وئیل ءَ یک مردمے زدگ ءُ شاپک ءَ ناشناسیں مردمانی لٹ شاپی ءَ چار برات زدگ بیتگ اَنت –

ٹی بی پی پتر ءَ سربوتگیں ھالانی رِد ءَ بلوچستان ءِ مزن شھر شال ءَ پیر محمد دگ ءِ سر ءَ تیرگواری ءِ وئیل ءَ یک مردمے ٹپی بوتگ –

ھمے گُشگ بوھگ ءَ اِنت کہ زاتی جیڑو ءِ سر ء گل حسین نامی ئیں مردمے ءَ وتی جندے وارس ءِ سر ءَ تیرگواری کُتگ، تیر گواری ءِ آسر ءَ آئی ءِ سیاد خُدا نور ٹپی بوتگ –

دمگی پولیس ءَ ٹپی بوتگیں مردم نادراہ جاہ ءَ سرکُتگ ءُ کتکار ءِ رندگیری بندات کُرتگ –

دومی نیمگ ءَ تربت ءِ دمگ شاپُک ءَ ناشُناسیں مردماں لوگے ءَ دور کُتگ ءُ لٹ شاپی کنان ءَ چار برات ٹپی کُتگ –
اھوالکار ءِ رِد ءَ تربت ءِ دمگ شاپُک ءَ ناشُناسیں مردماں مراد بخش نامی ئیں مردمے ءِ لوگ ءَ دور کُتگ ءُ آئی ءِ چُک قادر بخش، محمد جان، رحیم بخش، محمد بخش چاریں برات لٹ شاپ کُرتگ ءُ زدگ کُرتگ انت –

زدگ بوتگیں مردم ٹپانی درمانی ءِ ھاتر ءَ ٹیچنگ ھسپتال ءَ برگ بوتگ انت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ ھاش ءَ ناشناسیں مردمانی تیرگواری ءَ یک مردمے بیران بیتگ ءُ یکے زدگ بیتگ –

اھوالکار ءِ رد ءَ روکپتی بلوچستان ءِ دمگ ھاش بیت آباد ءَ گوستگیں شپ ءَ ناشناسیں مردماں تیرگواری کرتگ ءُ یک مردمے کُشتگ ءُ یکے زدگ کرتگ –

زدگ ءُ بیران بیتگیں مردمانی پجار نہ بیتگ اَنت –

زانگ بہ بیت روکپتی بلوچستان ءَ جتائیں وئیل ءُ تیرگواریانی وئیل ماں چاگردی رسانکجاھاں شنگ بیگ ءَ اَنت کہ نوزدہ ستمبر ءَ روکپتی بلوچستان ءِ دمگ سرباز دپ کور ءَ ناشناسیں مردماں یک گاڑی ءِ سر ءَ اُرش کرتگ ءُ چریشی ءَ چہ چُک، پِت ءُ مات بیران بیتگ اِت اَنت –

وئیلانی درگت ءَ دمگدارانی گوشگ اِنت کہ چوشیں گیشتریں وئیل دُزی ءُ ڈنگی ءِ میان ءَ بنت کہ اشاں ناشریں مردمانی دست ھوار اَنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دنگ ناھوک ءَ پرپٹ ءُ گاڑی ءَ ٹکر وارتگ چریشی ءَ چہ یک مردمے بیران ءُ دو زدگ بیتگ اَنت-

اھوالکار ءِ رد ءَ روکپتی بلوچستان ءِ ھند ناھوک ءَ گوستگیں شپ ءَ یک پرپٹ ءُ گاڑی ءَ ٹکر وارتگ چریشی ءَ چہ یک مردمے بیران ءُ دو زدگ بیتگ اَنت –

بیران ءُ زدگ بیتگیں مردم نادراہ جاہ ءَ برگ بیتگ اَنت ءُ گیشیں پَٹ ءُ پول ءَ پد بیران بیتگیں مردم ءِ جون کھول ءِ گور ءَ سر کنگ بیتگ –

دی بلوچستان پوسٹ

مروچی دبئی انٹرنیشنل کرکٹ اسٹیڈیم ءَ چنئی سپر کنگ ءِ دیم گوں دھلی کیپیٹل ءَ دیم پہ دیمی بیت انت –

گوستگیں بیگاہ ءَ دبئی انٹرنیشنل کرکٹ پَٹ ءَ برجاھیں آئی پی ایل ءِ دو ھزار ءُ بیست ءِ ششمی گوازی ءَ کنگس الیون پنجاپ ءَ چہ رائل چیلنرس بنگلور ءَ باج بُرتگ، گنگس الیون پنجاپ ءَ بندات ءَ بیٹنگ کرتگ ءُ دوسد ءُ شش رن جوڑ کرتگ –
پنجاپ ءِ کیپٹن کے ایل راھل ءَ بنگلور ءِ بالرانی دیم گوں جوانی ءَ داشتگ ءُ بس شست ءُ نُھ بالاں یک سد ءَ سِی ءُ دو رن جوڑ کرتگ – کے ایل راھل ءِ اے سینچری بنگلور ءِ لیبیاں گران ءَ کپتگ -رائل چیلنجرس بنگلور ءِ ٹیم ءَ دو سد ءُ ھپت ٹارگٹ پور ءَ کنگ ءَ بے سوب بوت – بنگلور ءِ ٹیم ءَ واری ءِ یک سد ءُ نُھ رن جوڑ کُرت – آھاں کے ایل راھل ءِ زاتی اسکور ھم گوازینت نہ کُرت – بنگلور ءَ نود ءُ ھپت رن ءَ چہ پنجاپ ءِ ٹیم ءِ دیم ءَ پروش وارتگ –

بنگلور ءِ ٹیم ءِ بیٹسمین نیمگ ءَ چہ کیپٹن وراٹ کوھلی ءَ بس یک رن ءِ ءُ فنچ ءَ بیست رن جوڑ کرتگ، فلپ ءَ رن ءِ جند جوڑ نہ کرتگ ءُ اے بی ڈیویلیئرس ءَ بندات ءَ جوانی ءَ گوازی کُرتگ بلے بیست ءُ ھشت رن جور کنگ ءَ پد آوٹ بوتگ – شیوم دوبے ءَ دوازدہ رن جوڑ کرت ءُ واشنگٹن سندر ءَ سِی رنانی اننگ ءِ گوازی کُرت بلے اے پہ ٹارگٹ ءِ سرجم کنگ ءَ بس نہ ات انت – پنجاپ ءِ ھاتر ءَ آئی ءَ دؤئیں لیگ اسپنرس ءَ جوانی ءَ گوازی کُرت – مروگن اشون ءُ اور روی بشنوی ءَ سَے سَے وکٹ گپت ءُ شیلڈن کاٹریل ءَ دو وکٹ گپتگ ، محمد شمی ءُ میکسویل ءَ یک یک وکٹے ءِ گرگ ءَ سوبمند بوتگ اَنت –

بنگلور ءَ ٹاس کٹتگ بلے پد ءَ ھم آئی ءِ بالنگ کنگے شور کرتگ ـ کے ایل راھل ءُ مینک اگروال ءَ پاور پلے ءَ پنجاہ رن ھواری جوڑ کرتگ پد ءَ مینک اگروال بیست ءُ شش رن ءِ سر ءَ بولڈ کنگ بوتگ بلے کے ایل راھل ءَ وتی رناں جوڑ کنان ات ، کی ایل راھل ءَ سِی ءُ شش بالاں پنجاہ رن کُرت – دومی نیمگ ءَ پنجاپ ءِ اسٹار لیبی نیکولس پورن ھبدہ ءُ میکسویل ءَ بس پنچ رن جوڑ کرت – اشی ءَ پد کرون نائز بالنگ ءَ اتک گڑا آئی ءَ کے ایل رائل اسٹرائیک سر ءَ کُرت –
چاراں چاران ءَ کے ایل راھل ءَ ھشتاد رن جوڑ کُرت اشی ءَ پد کیپٹن وراٹ کوھلی ءَ دو بلاھیں ردی کُرت کہ آئی ءَ کے ایل رائل ءِ دو برز شتگیں بال یلا دات – اشی ءَ پد کے ایل رائل ءَ دہ بالانی تہ ءَ چل ءُ چار رن جوڑ کرت وتی سنچری سرجم کنگ ءِ ھواری ءَ آئی وتی ٹیم ءِ رن دوسد ءَ سر کُتاں – کے ایل رائل ءَ وتی رننگ ءِ تہ ءَ چاردہ چوکاہ ءُ ھپت چکا جتگ – آئی ءِ اسکور آئی پی ایل ءِ ھندوستان ءِ تہ ءَ جوانتریں اسکور انت اشی ءَ پیش ریکارڈ رشبھ پنت نام ءَ بوتگ کہ 128 ءَ ناٹ آوٹ بوتگ –

شیر: دشت ءِ جنگل ءِ ماندارگ ءِ پشدر ءَ

شائر: آرپ وپا بلوچ

دی بلوچستان پوسٹ

او ستکگیں جنگل منی
سوتکگ من ءَ تو سرجم ءَ
دیستگ ترا من رستگاں
تئی مهلبیں اے پلکگاں
هون چہ رگاں پیداک کتگ
دشت ءِ نپس رنگیں چشاں
گورونڈ کهیری ناهڈاں
مرگانی چوگان ءُ رماں
ساز ءُ سروزی زیمراں
بانور دابیں کهچراں
او ستکگیں جنگل منی
تئی ابرم ءِ زیبائی ءَ
دیستگ هدا من هرگورا
تئی کوکوهاں سهڑینتگ انت
ارس ءِ لڑی آ بتُکگیں
تاهیر ءِ چیپی روک کتگ
کاه ءُ کڈباں رستگیں
درچکاں تئی گوں لُڈگاں
لڈینتگ انت واهگ منی
چنڈینتگ انت ترانگ منی
تئی پلو ءَ سنج بیتگ اَنت
شاری ءِ مهنائیں گشان
گشتہ ترا جنّت وتی
سول ءُ تئی ایرلمب کنر
ساه کشّ اتگ چیرا تئی
ما مولمے ،موجان کتگ
ٹپ ءِ کدینتگ تراولیں
ٹپ ءِ وتی درمان کتگ
شوانگ تئی گوں چاگلاں
میش ءُ رمگ ماں ساهگاں
شیر ءُ پنیر باد ءُ کٹاں
تئی هالکو گوں گرنچیناں
او ستکگیں جنگل منی
سوتکگ من ءَ تو سرجم ءَ
گلہ کناں من گوں کئےءَ
انسان چتو هیوان بنت
آرپ چتو تاوان بنت
کهت انت منی بس سینگ ءَ
ماری دجیں درداں رُداں
او ستکگیں جنگل منی
سوتکگ من ءَ تو سرجم ءَ

دی بلوچستان پوسٹ

کیچ کور پُھل ءِ سر ءَ دو گاڑیانی ڈیک ورگ ءَ یک مردمے زدگ ءُ سوراب ءَ مساپر بریں بس ءُ گاڑی ءَ ٹکر وارتگ ءُ یک مردمے بیران ءُ بازینے زدگ بوتگ اَنت –

ٹی بی پی پتر ءَ سربوتگیں ھالانی رِد ءَ بلوچستان ءِ دمگ کیچ ءَ کیچ کور پُھل ءِ سر ءَ دو گاڑیانی ڈیک ورگ ءِ سوب ءَ عامر ء حامد سنگھور جاھمنند سری کھن سک باز زدگ بوتگ –

ٹپی بوتگیں مردم ھما دمان ءَ نادراہ جاہ ءَ سرکنگ بوتگ –

دومی نیمگ ءَ شال داں کراچی ءِ شھدگ ءِ سر ءَ مساپر کشیں بس ءُ گاڑی ءَ ڈیک وارتگ – ڈیک ورگ ءِ سوب ءَ یک مردمے بیران ءُ بازیں مردمے زدگ بوتگ اَنت –

گیشیں ھالانی رِد ءَ حاجیکہ ءِ دمگ ءَ شال داں بسیمہ ءَ رؤکیں مساپر بریں وین ءَ گوں وٹس کار ءَ ڈیک وارتگ، ڈیک ورگ ءِ سوب ءَ یک مردمے بیران ءُ بازینے زدگ بوتگ، زدگ بوتگیں مردمانی تہ ءَ زالبول ھم ھوار انت –
زدگ بوتگیں مردم سوراب ءُ بسیمہ جاھمننند انت وھدیکہ بیران بوتگیں مردم بسیمہ جاھمنند بوتگ –
بیران ءُ زدگ بوتگیں مردم ھما دمان ءَ دمگی نادراھجاہ ءَ سر کنگ بوتگ انت ٹپانی درمان کنگ ءَ پد پہ گیشیں درمانی ءِ ھاتر ءَ ڈی ایچ کیو ھسپتال سوراب ءَ دیم دیگ بوتگ اَنت ءُ لاش ءِ ھژدری چار ءُ ٹپاس پد کھول ءِ گور ءَ سر کنگ بوتگ –

دی بلوچستان پوسٹ

مروچی دبئی ءِ انٹرنیشنل کرکٹ اسٹیڈیم ءَ کنگس الیون پنجاب ءِ دیم گوں رائل چیلنجرس بنگلور ءِ دیم ءَ بیت انت –

گوستگیں بیگاہ ءَ شارجہ شیخ زائد کرکٹ پَٹ ءَ برجاھیں آئی پی ایل ءِ دو ھزار ءُ بیست ءِ گوازی ءَ ممبئی انڈینس ءِ ٹیم ءَ شاہ رخ خان ءِ ٹیم کُلکَتا نائٹ رائیڈس چِل ءُ نُھ رن ءَ پروش داتگ ءُ باج بُرتگ –

ممبئی انڈینس ءَ پیسر ءَ بیٹنگ کُرتگ ءُ پنچ وکٹ ءِ تاوان ءَ یک سد ءُ نود ءُ پنچ رن جوڑ کُرتگ، بلے آئی ءِ پسو ءَ کُلکَتا ءِ ٹیم ءَ نُھ وکٹ ءِ تاوان واری ءِ یک سد ءُ چل ءُ شش رن جوڑ کُرتگ –

ممبئی انڈینس ءِ نیمگ ءَ چہ کیپٹن روھِت شرما ءَ جوانیں وڑے ءَ بیٹنگ کرتگ ءُ ھشتاد رن آورتگ، وھدیکہ سوریہ کمار یادو ءَ چل ءُ ھپت رن ءِ جوانیں اننگ گوازی کرتگ ـ کُلکَتا نائٹ رائیڈرس ءِ نیمگ ءَ شیوم ماوی ءَ دو وکٹ گپتگ وھدیکہ یک وکٹے سنیل نارائن ءُ یکے آندرے رسیل ءَ گپتگ –
کُلکَتا ءِ نیمگ ءَ چہ پیٹ کمنس ءَ 33 ءُ دنیش کارتک ءَ 30 رنانی اننگ گوازی کرتگ – وھدیکہ نتیش رانا بیست ءُ چار رن جوڑ کرتگ – اشی ءَ ابید کے کے آر ءِ ایندگے بیٹس مین جوانیں اسکور کنگ ءَ سوبین نہ بوتگ انت –

ممبئی انڈینس نیمگ ءَ ٹی بولٹ، پیٹنشن، جسپریت بمراہ ءُ راھِل چھر ءَ دو دو وکٹ گپتگ ءُ وھدیکہ یک وکٹے کیرون پولارڈ ءَ گپتگ ـ ھمے وڑ ممبئی ءِ بالراں جوانیں وڑے ءَ بالنگ کنان ءَ کُلکَتا ءِ ٹیم وار ندات کہ وتی ٹارگٹ ءَ سرجم کُرت بہ کن اَنت ءُ بازی وتی ٹیم ءِ نام ءَ کُرتگ –

زانگ بہ بیت آئی پی ایل دوھزار ءُ بیست ءِ سینزدھمی سیزن نوزدہ ستمبر ءَ بندات بوتگ ءُ داں دہ نومبر ءَ برجاہ بیت –

دی بلوچستان پوسٹ

کلات ءَ سیادی داروکیں بی سی ایس ءِ نودربر ثناء اللہ شاھوانی بیست ءُ چار ستمبر دوھزار ءُ سیزدہ سیکیورٹی کارمنداں دزگیر کرتگ ءُ ناشناسیں جاھاں برتگ کہ ھما وھد ءَ آ ڈگری کالج کلات ءَ چکاس ءِ دیگ ءَ پد واتر وتی لوگ ءَ اسکلکو ءَ روگ ءَ بیتگ –

بیست ءُ چار ستمبر ءَ ثناء اللہ شاھوانی ءِ بیگواھی ءَ ھپت سال سرجم بیتگ، آئی ءِ کھول ءَ چہ انسانی ھکانی ادارھاں لوٹ کرتگ ءُ گوشتگ کہ ثنا ء اللہ شاھوانی ءِ یلہ کنائینگ ءَ وتی کرد ءِ پیلو کنگ ءِ دزبندی کرتگ –

زانگ بہ بیت اے وھد ءَ بلوچستان ءِ جتائیں جاھاں پاکستانی پوج ءُ چیریں ادارھانی دست ءَ ھزارانی کَچ ءَ بلوچ بیگواہ اَنت کہ چریشانی تہ ءَ بازینے ءِ ٹپ ءُ ٹوریں جون جتائیں ھند ءُ دمگاں وھد وھد ءِ سر ءَ دزکپتگ اَنت –

بیگواھیں مردمانی یلہ کنگ ءِ واستا شال ءِ پریس کلب ءِ دیم ءَ یک دیھکے ءَ پرایمنیں جد ءُ جھد برجاہ اِنت –