TBP Balochi

دی بلوچستان پوسٹ

انڈین پریمیر لیگ دبی انٹرنیشنل اسٹیڈیمے ءَ برجاہ اَنت، مروچی چنئی سپر کنگز ءُ سنرائز ھیدر آباد آئی پی ایل ءِ چار دھمی گوازی ءَ دیم پہ دیم بیتگ اَنت۔

سنرائز ھیدر آباد ءَ پیسر ءَ بیٹنگ کُتگ ءُ بیست اورانی تہ ءَ پنچ وکٹانی تاوان ءَ ابید 164 رنز اڈ کُتگ۔ چہ سنرائز نیمگ ءَ پی. گارگ ءَ 26 بال لیب کُتگ ءُ 51 رنز اڈ کُتگ۔ پی. گارگ ءَ یک شش ءِ ءُ شش چار ھم جتگ۔ وھدیکہ چنئی سپر کنگز ءِ نیمگ ءَ چہ چار اور کنگ ءِ آسر ءَ ڈی . چاھر ءَ 2 وکٹ گپتگ ءُ 31 رنز داتگ۔

دومی نیمگ ءَ چنئی سپر کنگز ءَ بیست اور ءِ آسر ءَ پنچ وکٹانی تاوان ءَ 157 رنز اڈ کُتگ ءُ سنرائز ھیدر آباد ءَ آئی پی ایل ءِ چار دھمی گوازی ھپت رنز ءَ بُرتگ۔ چہ چنئی سپر کنگز ءِ نیمگ ءَ آر . جڈیجہ ءَ 50 ءُ ایم ایس دھونی ءَ 47 رنز اڈ کُتگ، وھدیکہ سنرائز ھیدر آباد ءِ بالر ٹی . ناٹاجارن ءَ چار اور ءِ آسر ءَ 43 رنز داتگ ءُ دو وکٹ گپتگ۔

یات بہ بیت آئی پی ایل کرکٹ گوازی ءِ بیست اورانی یکے انڈین لیگ اِنت کہ ایشی ءِ تہ ءَ جھان ءِ جتائیں ملکانی لیبی لیب کن اَنت ءُ پنجاہ ءُ شش گوازیانی سر ءَ بندوکیں لیگ اِنت۔

کرکٹ زانتکارانی گُشگ ءِ رد ءَ آئی پی ایل نہ تھنا پہ چاروکاں یک وشیں سوگاتے بلکیں آئی پی ایل یک مزنیں باپار ے ھم۔

شاھرگ ءَ پاکستانی پوج ءِ سر ءَ بیتگیں بمب تراک ءِ زمّہ واری ءَ منّیں – بی ایل اے

دی بلوچستان پوسٹ

ٹی بی پی پتر ءَ سربوتگیں ھالانی رِد ءَ بلوچستان ءِ دمگ ھرنائی شاھرگ ءَ ناشُناسیں مردماں پاکستانی پوج تراک ناکیں شوروانی نشانگ جوڑ کتگ ـ تراک ءِ آسر ءَ پاکستانی پوج ءَ جانی تاوان رس اِتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمہ واری منّ اِتگ ءُ گوشتگ کہ مئے سرمچاراں ھرنائی ءِ دمگ شاھرگ ءَ جھالاوان دگ ءِ سر ءَ آئی ای ڈی کل کُرتگ کہ پاکستانی زورگریں پوج ءَ بے سوب کنگ ءِ جھد کرتگ ھمے میان ءَ سرمچاراں آئی ای ڈی تراکینتگ –

اُرش ءَ بم ڈسپوزل اسکواڈ ءِ کارمند مُرتگ وھدیکہ یک کارمندے زدگ بوتگ –

دی بلوچستان پوسٹ

سر بیتگیں ھالانی رد ءَ پنجگور ءِ دمگ گرمکان ءَ ناشناسیں سلاہ بندیں مردماں نشہ باپاری ءِ بنجل ءِ سر ءَ اُرش کرتگ –

دمگی مردمانی رد ءَ پنجگور گرمکان ءَ باسد نامیں نشہ باپاری کنوکیں مردمے ءِ بنجل ءِ سر ءَ ناشناسیں سلاہ بندیں مردماں تیرگواری کرتگ، تیرگواری ءَ پد بنجل ءَ واھوزاری مَچ اِتگ اَنت –

زانگ بہ بیت چریشی ءَ پیسر پنجگور ھدابادان ءَ ھم نشہ باپاری بنجلے ءِ سر ءَ دزبمبے چگل دیگ بیتگ اَت ءُ چریشی ءَ پد بلوچ ریپبلکن آرمی ءِ جارکش بیبگر بلوچ ءَ اُرش ءِ زمہ واری من اِتگ اَت –

زانگ بہ بیت نشہ باپاری ءِ ھلاپ ءَ بلیدہ، تربت، گوادر، دشت، مند ءُ مکران ءِ جتائیں ھند ءُ دمگاں مھلوک ءَ زھرشانی ھم کرتگ ءُ نشہ ءِ بند کنگ ءِ لوٹ ءَ کنگ ءَ اَنت –

دمگی مردمانی رد ءَ نشہ باپاری کنوکانی پُشت ءُ پناھی ءَ سرکاری فرینٹرکور ءُ دگہ چیریں ادارہ کنگ ءَ اَنت –

مروچی بیتگیں اُرش ءِ زمہ واری تنی وھدی ھچ گل ءَ نہ من اِتگ –

دی بلوچستان پوسٹ

سر بیتگیں ھالانی رد ءَ کیچ دشت ءُ تمپ ءِ میان ءَ پاکستانی پوج ءُ بلوچ سلاہ گل ءِ میان ءَ بیتگیں جنگ ءُ چوپ ءَ جنگ بیتگیں عرفان گلام مستپا ءُ نورخان نوربکش ءِ ادیرھانی سر ءَ لیویز لشکر نگھپانی ءَ دارگ بیتگ –

دمگی مردمانی رد ءَ مروچی تمپ ءَ عرفان ءُ نور خان ءِ کھول پاکستانی پوج ءَ کڈن کرتگ ءُ گوشتگ اَنت کہ بیا اِت وتی مردمانی ادیرھاں بہ بند اِنت –

دمگی مردمانی گوشگ اِنت پاکستانی پوج ءَ دو کنڈ جتگ ءُ دو ادیرہ دروشمیں جوڑ کرتگ اَنت ءُ لیویز لشکر ادیرھانی سر ءَ نگھپانی ءَ داشتگ اَنت –

زانگ بہ بیت گوستگیں روچ ءَ عرفان بلوچ ءُ نورخان ءِ کھول ءَ تربت پریس کلب ءَ تران کنان ءَ گوشتگ کہ مارا مئے مردمانی لاشاں دیگ ءَ نہ اَنت ءُ مارا ھچ منّانک ھم پیشدارگ ءَ نہ اَنت کہ اے ادیرہ شمئے مردمانیگ اَنت –

ھمے وڑ گوستگیں روچ ءَ تربت پریس کلب ءَ بیتگیں زھرشانی ءَ ہیومین رائٹس کمیشن آف پاکستان ءِ مکران ءِ چیپٹر کورینٹر غنی پرواز ءَ ھم بھر زرتگ ءُ گوشتگ کہ آ مردمے جنگ ءِ میان ءَ جنگ بیتگ اے ھمک انسان ءِ ھک اِنت بے ساھیں کُنٹاں کھولانی دست ءَ بہ دنت ءُ آئی ءِ پُشت ءِ مردماں اے ھک دیگ بہ بیت –

نورخان ءِ گوھار ءِ گوشگ اِنت کہ منی برات جنگ ءَ جنگ بیتگ بلے پوج ءَ بس دو دو جُتگ چَوٹ آؤرتگ ءُ داتگ کہ اے شمئے مردمانی گڈی نشانی اَنت آئی ءِ گوشگ اِنت کہ منی برات ءَ چَوٹ پادا نہ بیتگ بلکیں آئی ءِ پاد ءِ بُٹ بیتگ ءُ مارا دروگیں منّانک پوج پیشدارگ ءَ اِنت –

عرفان بلوچ ءِ گوھار ءَ گوشتگ کہ گوستگیں چار روچاں ما ایپ سی ءِ بنجل ءَ شتگ ءُ پریات کرتگ کہ مئے جتگیں مردمانی لاشاں مئے دست ءَ بہ دے تانکہ ما آیانی گڈی کسارات ءَ انسانی رنگ ءَ کُرت بہ کن ایں –

آئی ءَ گوشت کہ چار روچاں دانکہ ما زگریں روچ ءُ تھاریں شپ ءَ وتی چم داشتگ اَنت کہ مئےلاش مارا دیگ بنت بلے ایپ سی ءَ لاش نداتگ اَنت ءُ گڈی ءَ مارا دو کنڈ پیشداشتگ ءُ گوشتگ کہ شمئے مردم ما اد ءَ کَل ءُ کسارات کرتگ اَنت –

زانگ بہ بیت بیست ءُ ھشت ستمبر ءَ تمپ ءُ دشت ءِ میانی دمگ مزبند ءَ بلوچ سلاہ بند ءُ پاکستانی پوج ءِ میان ءَ بیتگیں جنگ ءُ دو بلوچ سلاہ بند جنگ بیتگ اَنت کہ آیانی تہ ءَ یکے ءِ پجار عرفان بلوچ جھمنند کُنشلات ءُ نور خان جھمنند ھیر آباد ءِ ناماں زانگ بیتگ اِت اَنت –

چِد ءُ پد لاش پوج ءَ چِست کرتگ ءُ تمپ ءَ وتی بنجل ءَ برتگ اَنت اود ءَ تمپ ءَ ایپ سی ءُ گڑیڈ ءِ میان ءَ کَل کرتگ ءُ مردماناں گشتگ کہ شمئے مردم کل کنگ بیتگ اَنت ءُ رند ءَ مردم شتگ انت دو کنڈ اَنت ءُ چِد ءُ پد میتگی مردماں ادیرہ ءِ دروشم ءَ گیشتر ھال پِر کرتگ اَنت بلے پوج ءَ مردم لَٹ ءُ کُٹ کرتگ اَنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ سرباز ءَ ایرانی لشکر ءِ دست ءَ دزگیر کنگ بیتگیں مولانا فضل الرحمن کوھی ءِ سر ءَ شش سال ءُ چار ماہ زندانی بندگ بیتگ اَنت –

اھوالکار ءِ گوستگیں روچ ءَ ایران مشھد ءَ ایرانی آمیدگس ءَ بلوچ عالم دین مولانا فضل الرحمن کوھی ءِ سر ءَ شش سال ءُ چار ماہ زندانی جنگ بیتگ بیتگ –

اھوالکار رد ءَ مولانا فضل الرحمن کوھی ءِ نیکراھی وانگ جاہ سرباز پشامگ ءِ کسان کمک سرکماش مولانا مھمد امین آسکانی ءَ گوشتگ کہ سِی ستمبر ءَ مولانا فضل الرحمن کوھی ءَ گوانکو ءِ سر ءَ گپ جتگ ءُ گوشتگ کہ ایرانی آمیدگس ءَ منی سر ءَ شش سال ءُ چار ماہ زندانی قید جنگ بیتگ –

زانگ بہ بیت مولانا فضل الرحمن کوھی بیست ءُ ھشت نومبر دوھزار ءُ نوزدہ ءَ ایران ءِ واکداراں مشھد ءَ آیگ ءِ پرمان کرتگ ءُ اود ءَ آ گپتگ ءُ زندانی کرتگ –

مولانا فضل الرحمن کوھی ءِ دزگیری ءَ روکپتی بلوچستان ءِ چاگردی ءُ نیکراھی مردمانی گوشگ اِنت کہ مولانا فضل الرحمن کوھی انسان دوستیں مردمے کہ آ ایران ءَ زورانسری گپتگ ءُ بندیگ کرتگ –

دی بلوچستان پوسٹ

انسانی ھکانی باسک راشد ھسین ءِ بیگواھی ءِ سر ءَ مروچی چارگردی رسانکجاہ ٹوئیٹر ءَ کمپین کارمرد بیگ ءَ اِنت –

چہ امارات ءَ بیگواہ بیتگیں ءُ پد ءَ پاکستان ءِ دست ءَ دیگ بیتگیں بلوچ انسانی اگبالانی جھدکار راشد ھسین بلوچ ءِ ھاتر ءَ مروچی چاگردی رسانکدر ءِ تندجاہ ٹوئیٹر ءَ یک کمپین ءِ جنزینگ بیگ ءَ اِنت۔

راشد ھسین ءِ بیگواھی ءَ ایر جنگ ءُ آئی یل کنگ ءِ ھاتر ءَ بلوچ چاگردی جھدکار، راشد ھسین ءِ کھول ءُ انسانی اگبالانی جھدکارانی نیمگ ءَ چہ جتگیں جار ءِ تہ ءَ گوشگ بیتگ کہ مروچی بلوچستان ءِ وھدے چار بج ءَ پہ بیگواھیں راشد ھسین ءَ یک ٹوئیٹر کمپین ءِ گوں #UAEWhereIsRashidHussain ءِ ھیشٹیگ ءَ جنزینگ بیت۔

زانگ بہ بیت بیست ءُ شش دسمبر دو ھزار ءُ ھژدہ ءَ بیگواہ بیتگیں راشد ھسین شش ماہ ءَ امارات ءَ زوریں بیگواھی ءَ پد پاکستانی چیریں گلانی دست ءَ دیگ بیتگ ءُ آئی ءَ پد راشد ھسین ءِ داں انگت ءَ ھچ وڑیں ھال نیست۔

راشد ھسین ءِ بیگواھی ءَ آئی ءِ کھول ءَ کراچی ءُ شال ءِ پریس کلباں زھرشانی کنگ ءُ پیداک اَنت –

وی بی ایم پی ءِ وائس چیرمین ماما قدیر ءَ ھم وتی یک درشان ءِ تہ ءَ بلوچ راج ءَ چہ دز بندی کُتگ کہ پہ راشد ھسین بیوکیں کمپین ءِ بھر زورگ بہ بیت ءُ بیگواھیں مردمانی کھولاں گوں ھمراہ داری کنگ بہ بیت۔

دی بلوچستان پوسٹ

امریکہ ءِ سروک ڈونلڈ ٹرمپ ءِ مشیر ءُ نزیکیں ھمراہ ھوپ ھکس ءِ کرونا وائرس ءِ پدراھی ءَ پد مھتر ٹرمپ ءُ ءِ آئی ءِ جنین ءِ اوّل میلانیا ءِ ھم کرونا ٹیسٹ پوزیٹیو اتکگ۔ دوئیں قرنطینہ تھنائی ءَ شُتگ اَنت۔

امریکہ ءِ سروک ءِ کمک کار ھوپ ھکس ءِ کرونا ٹیسٹ پوزیٹیو آیگ ءَ پد مھتر ٹرمپ ءَ ٹوئیٹ کُتگ کہ آ ءُ آئی ءِ جنین اوّل میلانیا ءِ ٹیسٹ پوزیٹیو اتکگ۔ ھوپ ءَ یک ھپتگ ءِ پیسر گوں آیاں بالی مساپری ءَ ھوار بیتگ۔

وائٹ ھاؤس ءِ جھگیرانی رد ءَ کمک کار ھوپ ھکس گوں مھتر ٹرمپ ءَ مرین ون ءَ ھم ھیلی کاپٹر ءَ سوار بیتگ اَنت، 31 سالی ئیں ھوپ ھکس سروک ءِ کارگشادانی تہ ءَ درستاں نزیکیں مردم اِنت۔

یک گلگدارے ئے تہ ءَ مھتر ٹرمپ ءَ گوشت ءَ کہ آئی ءَ ءُ میلانیا ءَ گوں ھوپ ءَ بازیں وھد گوازینتگ۔ مھتر ٹرمپ ءَ دیم گرگی ماسک دیم کنگ دوست نہ بیت آ سرکاری مراگشانی تہ ءَ کارمندانی اگاں دگہ مردمانی گون ءَ ابید ماسک ءَ پدرائی گند ءُ نند ءَ گندگ بیت۔

امریکہ ءِ رسانک ءِ ردءَ منی سوٹا ءَ چہ واتری ءَ ھوپ ھکس ءِ تہ ءَ کرونا ءِ چیدگ گندگ بیگ ودی بیتگ اِت اَنت ءُ آ ھما وھد ءَ بالی گراب ءِ تہ ءَ تھنائی ءَ کنگ بیتگ اَت۔

کرونا وائریس ءِ سوب ءَ دان انگت امریکہ ءَ مردمانی کساس 2 لکھ 12 ھزار ءَ چہ ود اِتگ وھدیں کہ کرونا آماچانی کساس 75 لک ءَ داں سر بیتگ اَنت۔

نبشتانک: گُلزمین ءِ مھروانیں بچّ کپٹن اِرپان جان

نبشتہ کار: مھروان کمبر

دی بلوچستان پوسٹ

گُلزمین ءِ مھر ءِ چینچو شیدائیں سر پہ وتی ھیشی سراں سر گْوستگ اَنت ءُ پہ وتن نمیران بیتگ اَنت۔ ھمے کندیلیں سرانی جُتائی ءِ درد ءَ ما مروچی ھم مار اِیں ، ھمے کہ گم چکاریں زندگی گْران ءُ مُشکلیں پنداں سپر پرمائیت گُڑا ھمے مھروانیں ھستیانی پند، رِتکگیں ھون ءُ کُربانی مئے ناتوانیں پاداں ھاٹیگے بکشا اَنت۔ ھمے کہ سپر ءَ دلپروشی ءُ نااُمیتی ءِ جمبر سر ءَ ساھیل بَہ اَنت ، گُڑا ھمے پہ بچکند مرگ امبازیں سرانی سنج رنگیں بچکند مارا چہ نااُمیتی ءُ دلپروشی ءَ در کن اَنت ءُ نوکیں سِکین ءُ جوزگے بکشا اَنت۔

اے ھما مردُم اَنت کہ کِشک ءُ دگاں سمبھین اَنت ءُ پد ءَ ھمے راھانی سر ءَ رَوَگ ءِ سکین ءَ دے اَنت۔ اگاں مُساپر دم بِہ بارت ، آیاں پدکِنِزگ ءِ بدل ءَ ھِمّت ءُ سِکین دے اَنت۔ دست ءَ بڈّ ءَ جن اَنت ءُ گْوش اَنت بچار آ تئی منزل اِنت دنز ءُ گباراں چنڈ ءُ بہ جُنز۔۔۔۔۔۔۔۔۔۔، برو کہ مِنزل ترا گْوانک ءُ توار ءَ اِنت۔ تئی راہ ءَ چارگ ءَ اِنت۔

اے گیدی ءَ اِنسان وهدے کہ زندگی ءِ دمکاں جُنزان کنت ، همُک رنگیں نِدارگاں گوں اڑان ءُ گیشّان ءُ دراهان ءَ سھر کنان کنت۔گُڑا چوشیں وش بھتیں انسان باز کم در کَیت کہ وت ءَ نمیران کنت ءُ پہ ابد زندگ مان اِیت۔ چراھاں چہ یکّے مئے دل ءُ دیدگاں مُدام آشنا اِنت۔ کپٹن اِرپان جان پنّام ئِے امداد اِنت کہ گوں ھاک شیدائیں سر نورھان پنّام ء بْرمش جان ءِ ھمراھی ءَ مزن بند ءَ دُژمن ءِ گوم ءَ دیم پہ دیمی جنگ ءَ وتی ھیشی سر ءَ ندْریگ کنت ءُ پہ بچکند وتن کربان بیتگیں ھمبلانی لڑ ءَ ھوار بیت۔
اِرپان من ھما وھد ءَ دیستگ اَت کہ دومی یا سیمی تبک ءَ وانگ ءَ اَت۔ اے ھمے دَور اَت کہ بلوچ گُلزمین ءَ نوک جنگے رُدان اَت ءُ اے جنگ ءِ آس ھر میتگ ءُ بازاراں مان پتاھان اَت۔ برے روانکے دراتک ءُ برے مُچّی اَت، گُشتانک اَت، جنگ اَت، دیر نہ گْوست کہ اِرپان ءَ وانگجاہ یلہ کُت۔ من ھمے پھم اِت کہ ارپان پد ءَ واتر وتی پت ءِ ھلک کونشکلات ءَ واتر بیتگ۔ وھد دیم ءَ جُنزان اَت ، من پہ دیم مزنیں شھر ءَ پہ وانگ ءِ نیمون ءَ رپت آں۔
دو ھزار شش ءَ بگر تاں دو ھزار یازدہ ءَ بازیں چیزے مٹ بوت۔ اکبر شھید بوت ، واجہ گلام مھمد گوں ھمراھاں چست کنگ ءَ پد شھید کنگ بوت۔ جاور مٹ اِت اَنت ءُ آوار جَنَگ ءَ پد لاشانی دور دَیَگ ءَ گیشی اَتک اَنت۔بازیں ورنا سِلاہ بند بوت ءُ کوھاں رپت اَنت۔ انچیں جاورے ءَ من ھم وتی وانگ ناسرجم کُت ءُ ھلک ءَ اتک آں۔

سال دو ھزار دوازدہ اَت کہ من سنگتانی گِندگ ءَ سپر ءَ در کپت آں ، گُڑا منی اِھوال بوت گْوشت اِش کہ پِلان جاہ ءَ بیا۔جمیل تئی دیم ءَ کَیت ءُ ترا دست گِپت۔ چار ساھت ءِ سپر ءَ پد کوھانی میان ءَ یک نوک ریش ءُ بروتیں ورناھے ءَ تُوپکّے بڈّ ءَ اَت ءُ من ءَ کہ دیست ئِے زیبائیں بچکندے وتی لُنٹاں تالان کُت ئِے۔ من ءَ وش اتک ئِے کُت۔کہ اے ھما اِرپان اِنت کہ نی جمیل اِنت۔
پد ءَ جمیل اَت ، مھروانیں جمیل اَت، دردواریں جمیل اَت ، دم نہ بُرتگیں جمیل اَت۔ تچ ءُ تاگ ءَ اَت، سپر ءَ اَت، گْران ءُ مُشکلیں سپر اَت، لوار سوچوکیں سائجی اَت یا مزن بند اَت ، برے مند برے دشت ءُ تمپ اَت۔ ھر کُجا جمیل گوں ھمراھاں پند ءَ اَت مزاک ءَ اَت، کار ءَ اَت۔
پد ءَ کْوزہ گیریں ریاست سرپد بیتگ اَت کہ اِرپان مٹ بیتگ ءُ کوہ گولیں جمیل اِنت ، گُڑا آئی ءِ گِس ءَ شُت ءُ مردُم ءُ کھول بیھار دات اَنت۔ جمیل ءِ گس سُتک اَنت ۔ آریپیں کماش تیر باران کُت ءُ شھید کُت ، بلے جمیل ءَ اے بیھار، اے کُشگ، بَرگ سُوچگاں نِزور نہ ترّینت بلکیں گیشتر مُھکم ءُ تمرد کُت ءُ آئی ءِ ورنائیں جوزگانی تہ ءَ گیشی آؤرت۔

ھمے جاوراں کہ ھر کس پہ وت سارتیں ساھگے ءِ شوھاز ءَ اَت ، بلے امداد گوں ھمراھاں انگت زگریں روچانی سر ءَ پاد شپاد ءَ پند بُرّگ ءَ اَت ءُ جنگ ءَ اَت۔

پد ءَ ھلک ءُ بازاراں مردُم اِرپان ءَ چہ گیش جمیل ءَ زان اَنت، ھمے وھد ءَ کہ بازیں دمبرتگیں سنگت وتی دستاں کوزہ گیریں ریاست ءِ دیم ءَ چِست کن اَنت ءُ گلامی ءَ منّ اَنت۔ جمیل پد ءَ وت ءَ را امداد ءِ نام ءَ دنت۔ پد ءَ کپٹن امداد بیت ءُ پہ لجوزیں دژمن ءَ کھرے بیت۔

بیست ءُ ھشت ستمبر ءَ مزن بند تیرانی توار ءَ جکسینت ، چار ءُ پنچ ساھت ءَ چہ گیش جنگ ءَ کوزہ گیریں ریاست ءِ بازیں سِپاھیگ گوں چاریگاں مُردار بیتگ اَت۔ کپٹن اِرپان گوں وتی سنگت کُمک لپٹننٹ نورھان پنّام ء بْرمش ءِ ھمرائی ءَ ماتیں گلزمین ءِ کُٹّ ءَ واب کپت۔ گُلزمین ءِ گھیں بچّ ، پہ گُلزمین نمیران بیت اَنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: گلزمین ءِ باندات

نبشتہ کار: شناس بلوچ

دی بلوچستان پوسٹ

امّا منی دیری ئیں واهشتے بوتگ کہ من ترا اجازت بہ کناں پہ وتی ماتیں گلزمین ءِ وشیں بانداتے ءِ ھاتر پ کوه ءَ بہ رواں وتی ھون ءِ ترمپ ترمپ ءَ گلزمین ءِ هاک ءَ پہ ندر بہ کناں۔ ھاک ءِ وشبوھاں ھوار بہ باں

امّا من ءَ دست ءَ بڈ ءَ بہ جن کہ منی همراه روگ ءَ اَنت گلزمین ءِ رکینگ ءَ من اوں رواں گون وتی دوستانی همراھی ءَ بگند ئے باندا منی نام ءُ نشان اے گیدی ءَ پشت بہ کپ ایت۔

امّا اگاں من پہ گلزمین مُرتاں پمن ھچ زاری ءُ پریاتاں مکن موتکاں میار تو بزاں تئی چُک پہ گلزمین ءَ رپتگ۔۔ پہ گلزمین ءَ ندر بیتگ۔۔۔ پہ گلزمین ءَ شیدا بیتگ۔۔ ھما گُلزمین کہ مئیگ ءُ شمئے دُرستانی پجار انت۔۔۔ زمین بیت گڑا راج مان اَنت۔۔۔ زمین بیت گم چکاریں زندگی وشیانی منگیراں بیت۔۔

امّا
تو گپے زان ئے تئی چُک یکیں گلزمین ءِ چکے بوگ لوٹ ایت پہ گلزمین ءَ وتی ھوناں ریچگ لوٹ ایت وتی مادریں هاک ءَ چہ دشمنانی دست ءَ آجو کنگ لوٹ اِیت۔۔۔ آجوئی پہ ھلو ھالو نئیت۔۔۔ آجوئی ءِ ھاتر ءَ ھونانی شھجو تاچینگی انت۔۔۔ پند برگی انت۔۔۔ ھید ریچگی اَنت۔۔۔ واھشت ءُ ارمانانی، ھر وڑیں وشیانی کربانی دیگ لوٹ اِیت۔۔۔

امّا
تئی چک چٹیں گنوکے ھچ ترس ئِے دل ءَ نہ اِنت مدام وتی آزادی ءِ گپ ءَ کنت ءُ ھنچو گش اِیت ” امّا من رواں پہ گلزمین ءِ باندات ءَ ” ھما زیبائیں باندات ءَ کہ کس وتی لوگاں چہ تھاریں شپاں آوار جنگ ءُ بیگواہ کنگ مہ بیت۔۔۔ ھچ گھار وتی براتانی شوھاز ءَ دگانی سر ءَ ارس گوارگ ءَ مہ بیت۔۔۔۔ ھچ ماتی بچ تیرانی آماچ مہ بیت۔۔۔ بلکیں ھر گور ءَ وشیانی زیمرے بندات بہ بیت۔۔ نوکیں ھزام ءُ بھارگاھے بئیت۔۔ ھون ششتگیں زمین پد ءَ سبز بہ بیت بالی مُرگانی کوکوئیں الھان بہ بنت ھر کس گل ءُ شات بہ بیت۔۔۔ انچیں بانداتے ءِ ھاتر ءَ من سر گپتگاں-
اما
بگند ئے روچے منی ھون پہ تئی واستا یک شوکیں بچکندگے جوڑ بنت۔۔ پاتو رنگیں بچکندے۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

بیست ءُ ھشت ستمبر ءَ دشت مزنبند ءَ پاکستانی پوج ءِ لشکر کشی ءِ میان ءَ جنگ ءُ چوپ ءَ دو بلوچ سلاہ بند بیران بیتگ اَت –

سر بیتگیں ھالانی رد ءَ کیچ ءِ دمگ تمپ ءَ پاکستانی پوج ءِ گون ءَ جنگ ءَ جنگ بیتگیں بلوچ سلاہ بندانی غائبانہ نماز جنازہ وانگ بیتگ اَنت –

دمگی مردمانی رد ءَ غائبانہ نماز جنازہ ءَ بازیں کَچے ءَ مھلوک ءَ بھر زرتگ ءُ آئی نمیران بیتگیں ھردوکیں سرمچارانی ارواہ ءَ دروتی ندر کرتگ –

زانگ بہ بیت گوستگیں روچاں تمپ ءُ دشت ءِ میانی دمگ مزبند ءَ پاکستانی پوج ءُ سرمچارانی میان ءَ جنگ ءُ چوپ بیتگ اَت اے جنگ ءُ چوپ ءَ بلوچستان ءِ آجوئی لوٹوکیں گل بلوچستان لبریشن فرنٹ ءِ دو سرمچار جنگ بیتگ اَت کہ آیانی نام ارپان ءُ نورخان ءِ نام ءَ زانگ بیتگ اَنت –

پاکستانی پوج ءَ بیران بیتگیں مردمانی لاش چِست کرتگ ءُ دیم پہ تمپ ءَ برتگ اَنت ءُ اود ءَ کھول ءِ مردماں ابید لاش گوستگیں روچ ءَ کَل ءُ کسارات کرتگ اَنت –

بیران بیتگیں مردمانی کھولاں تمپ ءَ زھرشانی کرتگ ءُ گوشتگ کہ مئے مردم ابید ءِ پیشدارگ ءَ رستری رنگ ءَ کَل ءُ کسارات کنگ بیتگ اَنت کہ کس انسان ءَ اے وڑ ءَ کَل ءُ کسارات نہ کنت –

ھمے وڑ ءَ مروچی تمپ ءَ بیران بیتگیں ھردوکیں سلاہ بندانی غائبانہ نماز جنازہ وانینگ بیتگ اَنت ءُ بازیں کَچے ءَ مھلوک ءَ بھر زرتگ ءُ سرکار ءِ ھلاپ ءَ زھر درشانیتگ –

ھمے وڑ ءَ چاگردی رسانکجاھاں ھم بلوچستان ءَ بندوکیں سیاسی ءُ چاگردی مردمانی مردمانی گوشگ اِنت کہ اے انسانی ھکانی ھلاپ بگیری اِنت کہ یک بے ساھیں کُنٹے ءَ آئی ءِ مردمانی دست ءَ نہ دیگ ءُ رستری رنگ ءَ کَل ءُ کسارات کنگ –