TBP Balochi

پہ زانت ءِ واستا بلوچ نودربرانی دورپندیں روانک

ٹی بی پی شونگال

پاکستان ءِ پیپلز پاٹی ءِ سرکار ءَ سال 2009 ءَ گوں مزنیں شانے ءَ بلوچستان ءِ ” بزگیانی دور کنگ ” ءِ واستا “آغاز حقوق بلوچستان ” ءِ پوڑی دیگ ءِ جار پِرینتگ اَت۔ اے پوڑی ءِ تہ ءَ جنگ آماچیں دمگ بلوچستان ءِ واستا راجداری، زرکاری، پھزداری ءُ وانگی شوربندی ھوار اِت اَنت ۔زانتکاراں اے پوڑی ریاست ءِ یک دگہ “کاونٹر انسرجنسی ” ءِ گامگیجے گوشتگ اَت، ءُ اے گپ ءِ پیشگوئی کرتگ اَت کہ اے ھم ھمے رنگیں ایندگہ پالیسیانی وڑ ءَ بے سوب بیت اِنت ۔ اے پوڑی ءَ بازیں کول ءُ کرارانی ھمراھی ءَ اے ھم کول کنگ بیتگ اَت کہ بلوچستان ءِ نودربراں گیش ءَ گیش زانت ءِ نیمگ ءَ اسکالرشپس ءِ تہ ءَ یک بھرے دیگ بیت اِنت، کہ چریشی ءِ زور ءَ دمگی ءُ ڈنی ڈیھاں جوانیں وانگ ءُ زانگ ءَ دربرت بہ کن اَنت –

اے کول ءِ سرجم بیگ ءَ دگہ سَے سال گْوست ءُ سال 2012 ءَ دودمانی رنگے ءَ اسکالرشپس ءِ جار پِرینگ بیت، ءُ پنجاب ءِ شھدربرجاھاں اے پرمان دیگ بیت کہ آ بلوچ نودربرانی واستا جاھاں ھالیگ بہ کن اَنت ۔ بنداتی ءَ اے سیٹانی کچ 600 اَت، بلے 2013 ءَ گوستگیں سروزیر بلوچستان ڈاکٹر عبدالمالک ءُ گوستگیں سروزیر پنجاب شھباز شریف ءِ گند ءُ نند ءَ گیش کنگ بیت اَنت۔ شرت ارزان اَت کہ کجام ھم بلوچ نودربر اگاں پنجاپ ءِ کجام شھدربرجاھاں تچک ءَ تچک سیٹاں بہ گِپت گڑا آیاں فیس ءَ ھوار کجام زرگری ھاسٹل ءِگرزانی ھاترءَ بنت گرگ نہ بنت ۔

اے شوربندی بلوچستان ءِ نودربراں باز شریں رنگے اَت، کہ آیانی گور ءَ بلوچستان ءَ وانگ ءِ واستا گچینی نابروبری اَنت ۔ ھزاراں نودربراں بازیں مھنت ءُ جھداں پد پنجاپ ءِ جتاجتائیں شھدربرجاھاں وت ءَ اِش سر کت، بلے گوستگیں شوربندیانی پئیم ءَ اے شوربندی ءِ زندمان ھم گونڈ اَت ۔

گوستگیں دو سالانی وھد ءَ جتائیں وڑ ءُ پیماں اے نودربرانی آسراتی ءُ مُزانی تہ ءَ کمی آرگ بیگ ءَ اِنت ۔ بنداتی ءَ ھاسٹل ءَ ابید ءِ باڑو بُتو ءَ نندگ ھلاس کنگ بیت، ءُ دراھیں نودربراں پرمان دیگ بیت ھاسٹل ءِ واستا زر جَم بہ کن اَنت ۔ بلے بھاوالدین ذکریا شھدربرجاہ ءِ واکدار یک گامے ءَ دیم ءَ شُت اَنت ءُ اے جار اش پِرینت کہ 2020 ءِ بھرزورگ ءِ سال ءَ بلوچ نودربرانی دراھیں اسکالرشپ ھلاس کنگ بنت ۔ شھدربرجاہ ءِ واکدار اشی ءِ سوب پنجاب ءُ بلوچستان سرکار ءِ نیمگ ءَ پوڑی ءِ بندش گوشگ ءَ اَنت، وھدےکہ ھردوکیں سرکار یکے دومی ءِ سر ءَ میار لَڈگ ءَ اَنت ۔

اے شھدربرجاھانی بلوچ ءُ پشتون نودربر گوستگیں دو ماھاں ھمک روچ زھرشانیانی تہ ءَ اَنت۔ زھرشانی بنداتی بُنجل اے نودربراں بھاوالدین شھدربرجاہ ءِ بنجاھی دروازگ ءِ دپ ءَ یک زھرشانی بنجلے جتگ اَت، کہ یک ماھے ءَ گیش وھد برجاہ اَت ۔ زھرشانیاں ابید ھم لوٹانی سرجم نہ بیگ ءِ سر ءَ ھمے نودربراں نِی 800 مِیل ءَ دراجیں پندی روانکے ءِ کشگ بندات کرتگ، کہ چہ ملتان ءَ لاھور ءِ نیمگ ءَ روان اِنت، کہ اشی ءِ منزل پاکستان ءِ بنجاھی شھر اسلام آباد اِنت ۔

زھرشانی کنوکیں نودربرانی بھتام اِنت کہ اسکالرشپس ءِ ھلاسی ھما زات ءِ نابروبری ءِ بھر اِنت، کہ ایشی دیمپانی آیاں پنجاب کنگ کپگ اِنت۔اے بھتاماں راستی ھم ھست پرچاکہ پنجاب شھدربرجاہ، قائد اعظم شھدربرجاہ اسلام آباد، بھاوالدین ذکریا شھدربرھاہ ملتان ءَ ھوار ایندگہ جاھاں وانوکیں بلوچ نودربراں جتا جتائیں وھداں پاکستان ءِ بنجاھی سیاسی گلانی نودربر گلانی دست ءَ لَٹ ءُ کُٹانی آماچ بیان ءُ گندگ بیگ ءَ اِنت ۔

اے اسکالرشپس ءِ دوبر بندات کنگ المی اژدری اِنت تانکہ جھان ءِ ناوانندھیں دمگانی تہ ءَ یکے بلوچستان ءِ نودربر اَنت کہ آ جوانیں زانت ءَ دربہ بر اَنت ءُ وتی دمگ ءِ دیمروی ءُ وشھالی ءِ واستا جوانیں کرداں پیلو بہ کن اَنت ۔ اے مزنیں لوٹے نہ اِنت اگاں ھُرتی ءَ بہ چارے گڑا پنجاپ ءِ فیکٹری بلوچستان ءِ مڈیانی سر ءَ روک اَنت ءُ اود ءِ دیمروی بلوچستان ءِ مڈیانی سر ءِ سواب اَنت ۔زھرشانی کنوکیں نودربر وتی بنکی ھک وانگ ءَ لوٹگ ءَ اَنت آیانی گون ءَ ناوشیں رویش کنگ مہ بیت ۔

سر بیتگیں ھالانی رد ءَ روکپتی بلوچستان ءِ دمگ پنوچ ءَ یک وانگجاھے ءَ اُستاد ءُ نودربراں ھوار دَہ کس کورونا وائرس ءِ نادراھی ءَ گپتگ اَنت –

دی بلوچستان پوسٹ

اھوالکار ءِ ردءَ مروچی پنوچ ءَ یک وانگجاھے ءَ اُستاد ءُ نودربرانی کورونا وائرس ءِ ٹیست کنگ بیتگ اَنت چریشی ءَ دَہ کسانی جان ءَ کورونا نادراھی پدر بیتگ –

کورونا وائرس ءَ گپتگیں مردم ڈبگ ءِ ھاتر ءَ نادراہ جاہ ءَ برگ بیتگ ءُ جتائیں کوٹیانی تہ ءَ کنگ بیتگ اَنت –

اھوالکار ءِ رد ءَ روکپتی بلوچستان ءَ مردمانی ناپھریزی ءَ کورونا وائرس روچ پہ روچ گیش بیان اِنت –

اھوالکار ءِ رد ءَ دمگی مردمانی گوشگ اِنت کہ اد ءَ اے جھانی نادراھی ءِ چوشیں پَٹ ءُ پول نیست اِنت پرے ھاتر ءَ اد ءَ نادراھیانی کچ گیش بیت کنت –

زانگ بہ بیت کورونا وائرس ءِ ایرموش بیگ ءَ پد کورونا وائرس پد ءَ دوبر جھان ءَ زورامند بیگ ءَ اِنت ءُ بازیں ڈیھاں کورونا ءِ گر ءُ دار ءِ ھاتر ءَ وانگ جاہ بند کنگ بیتگ اَنت –

دی بلوچستان پوسٹ

بلوچستان ءِ دمگ کیچ ءُ آواران ءِ جتائیں جاھاں پاکستانی پوج ءِ نیمگ ءَ آپریشن برجاہ اِنت – آپریشن ءِ بندات گوستگیں روچ ءَ کنگ بیتگ کہ مروچی ھم برجاہ اِنت –

دمگی مردماں ٹی بی پی ءَ گوں گوشتگ کہ گوستگیں روچ ءَ پاکستانی پوج ءَ کولواہ ءِ دمگ آشال، رودکان، مراستان ءَ ھوار کش ءُ گوری دمگاں پوجی آپریشن برجاہ کرتگ اَنت – اے وھد ءَ پوج ءَ روگ ءُ آیگی راہ ءُ دربستگ اَنت –

پوجی آپریشن ترند کنگ بیتگ ءُ مروچی ھم دومی روچ ءَ برجاہ اِنت – مروچی کولواہ ءِ زرباری بند (اورماڑہ بند) ءِ ھند بلور، سگک، مراستان، جت، بنگلہ ءُ مادگ ءَ پوج پیش گامی کنگ ءَ اِنت –

پوجی آپریشن ءَ زمینی پوج ءِ ھمراھی ءَ بمبگواریں بالگرد ھم ھوار اَنت –

دمگی مردمانی رد ءَ جتاجتائیں ھند ءُ دمگاں بمبگواریں بالگرد تیرگواری کنگ ءَ گندگ بیتگ اَنت بلے جوانیں دامگی ھالانی نہ بوگ ءِ سوب ءُ پوج ءِ نیمگ ءَ راہ ءُ درانی بند بوگ ءِ سوب ءَ دگہ جانی ءُ مالی تاوانی ھال سر نہ بوتگ اَنت –

زانگ بہ بیت گوستگیں روچاں اورماڑہ ءِ اُرش ءِ آسر ءَ پاکستانی پوج ءُ تیل ءُ گیس ءِ شوھاز کنوکیں کمپجی او جی ڈی سی ایل ءِ چاردہ کارندہ مرتگ اِت اَنت –

بیتگیں اُرش ءِ زمہ واری بلوچ سلاہ بندیں گلانی ھمسنتیں گل بلوچ راجی آجوئی سنگر “براس” ءَ منّ اِتگ اَت – گل ءِ جارکش بلوچ ھان ءَ وتی شنگ کرتگیں درشان ءِ تہ ءَ گْوشتگ اَت کہ بلوچ راجی آجوئی سنگر او جی ڈی سی ایل ءَ ھوار زورگر ءِ دراھیں لُٹ ءُ پُلی کمپنیاں بیھار دنت کہ آ دراھیں لُٹ ءُ پُلی شوربندیاں بند بہ کن اَنت ما چین ءَ ھوار سرجمیں دری زرکاراں اے کلوہ ءَ دے ئِے کہ بلوچستان ءِ مڈیانی پُلگ ءَ زوگر ءِ گوشگ ءَ وتی بگلاں چِست مہ کن اَنت اے مسام بندیاں بلوچ راج نہ منّ اِت اشاں ھچ بستار نیست –

اورماڑہ ءِ اُرش ءَ پد مکران ءِ مزن شھدگ بند کنگ بیتگ ءُ آپریشن بندات اِش کرتگ – وھدےکہ آپریشن ءِ چار ءُ گزاری ءَ برزی ءَ بالگردانی کمک ھم گون اِنت –

اورماڑہ ءِ اُرش ءَ پد بلوچستان ءِ تھی کارانی وزیر ضیاء اللہ لانگو ءَ ھم پوجی آپریشن ءِ شَور ءُ سِلاہ داتگ اَت –

زانگ بہ بیت بلوچ راجدوستانی نیمگ ءَ گوشگ بیتگ پاکستانی پوج آپریشنانی وھد ءَ دمگانی سر ءَ بیڑ بارت ءُ لس دست ءُ گوشیں مردماں نشانگ کنگ ءَ اِنت ءُ چریشی ءَ آیاں جانی ءُ مالی تاوانانی دیمپانی کنگ کپ ایت –

کولواہ ءُ کش ءُ گوری دمگاں بندات بیتگیں پوجی آپریشنانی باور ءَ گڈی ھالانی تہ ءَ تنی وھدی واکدارانی نیمگ ءَ ھچ گوشگ نہ بیتگ –

دی بلوچستان پوسٹ

روکپتی بلوچستان ءِ دمگ لاشار ءَ ناشناسیں مردمانی تیرگواری ءَ یک مردمے بیران بیتگ، بیران بیتگیں مردم ءِ پجار سھراب ء مھمود ءِ نام ءَ زانگ بیتگ –

اھوالکار ءِ رد ءَ لاشار ءِ ھند اسپکہ سرمیچ ءَ ناشناسیں مردماں سھراب ءِ سر ءَ تیرگواری کرتگ ءُ زدگ کرتگ، پد ءَ دمگ ءِ نادراہ جاہ ءَ برگ ءِ وھد ءَ سلاہ بندیں مردماں پد ءَ راہ ءِ نیم گور ءَ گاڑی اش داشتگ ءُ تیرگواری اش کرتگ ءُ سھراب اش کشتگ –

اھوالکار ءِ رد ءَ دمگی مردمانی گوشگ اِنت کہ سپاہ مردماں سلاہ بند کنگ ءُ چرے سوب ءَ ناوشیں وئیل درپیش بیگ ءَ اَنت –

دمگی مردمانی گوشگ اِنت کہ چُشیں وئیل بلوچستان ءِ جتائیں ھند ءُ دمگاں بیگ ءَ اَنت کہ اشانی تہ ءَ سپاہ ھما مردماں سلاہ بند کنگ ءَ اِنت کہ آ پہ ایران ءِ چیریں ادارھانی واستا کار کنگ ءَ اَنت –

دمگی مردمانی گوشگ اِنت کہ مروک ءُ جنوک ھردوک بلوچ وت ماں وت اَنت ءُ ھردوکیں نیمگاں تاوان بلوچاں بیگ ءَ اِنت –

دی بلوچستان پوسٹ

بلوچ یکجھتی کمیٹی کراچی ءِ چیردستی ءَ بلوچ شائر، گشندہ حنیف چمروک ءِ کوش ءِ بگیری ءَ کراچی پریس کلب ءِ دیم ءَ زھرشانی کرتگ –

زھرشانی ءَ سیاسی ءُ چاگردی باسکاں ھوار نودربر ءُ دگہ تکاں بندوکیں مردماں مزنیں کساسے ءَ بھر زرتگ –

زھرشانی ءَ زھرشانی کنوکاں تران کنان ءَ گوشتگ کہ حنیف چمروک شائر ءُ گشندھے ءَ ھوار چاگردی ءُ انسانی ھکانی پانکجن طیبہ بلوچ ءِ کماش بوتگ، طیبہ بلوچ بلوچ ہیومن رائٹس ءِ گوستگیں کسان کمک سرکماش ھم بوتگ ءُ انوں ھم انسانی ھکانی لگتمالی کنوکانی بگیری ءَ جھد ءَ اِنت – بلے بدبھتی ءَ چہ طیبہ بلوچ ءِ کماش ءِ بے رھمیں کوش ءِ بگیری ءَ زمہ واریں ادارھانی بے تواری ناکہ تھنا اجکہ انت بلکیں بلوچستان ءِ تہ ءَ اے ھمکروچی ئیں کشت ءُ کوشانی بلاھیں پدرناکی ءِ کہ مردم چوشیں وئیلاں سرپد بنت ءُ وت ءَ چہ اے زمہ واری شودگ لوٹ انت –

تران کنوکاں گْوشت کہ حنیف چمروک ءِ کوش ناکہ تھنا یک انسانے ءِ کوش انت بلکیں یک شائر ءُ گشندھے ءِ کوش انت، بلوچ چاگردے تہ ءَ زالبولیں بلوچ ایکٹوسٹسانی ھاتر ءَ تُرس ءِ جاور ودینگ ءَ ھنچوش کہ شاہینہ کوش دنیگت ءَ یک دیم ءَ اِنت ھیات ءِ ھون دنیگت ءَ ھما دگ ءِ سر ءَ ھُشک نہ بوتگ انت، برمش دنیگت ءَ وتی مات ءِ کشندھانی سزا ءِ راہ ءَ چارگ ءَ انت، کلثوم ھون ءِ انگت ءَ ھاک ءِ تھتگ ءِ سرون ءَ انت، نون طییبہ ھم اوشتاتگ وتی پت ءِ کوش ءِ بگیری ءَ ھک لوٹگ ءَ اِنت –
آیاں گْوشت کہ بلوچ چاگرد ءِ تہ ءَ اے کُشت ءُ کوشاں تُرس ءِ ودی کرتگ – ھمے ترس ءَ بلوچ چاگرد ءِ تہ زند گوازینوکیں مھلوک ترسے ءِ تہ ءَ دور داتگ مھلوک ھمے ترسی جاوراں بھر ءُ بانگ کرتگ اَنت ءُ ھمے ترس ءَ یک مھکمیں وڑیں زوردست کمک دیگ بوگ ءَ انت –

گڈسر ءَ تران کنوکاں گوشت کہ ابید ءِ ارزی گُرزی ءَ دزگیری بگر تاں ابید ءِ آمیدگسی پرمان ءخ کشت ءُ کوشاں بلوچستان ءِ ھمک ٹک تکانسر کرتگ اَنت، پاکستان ءِ برزی ادارہ ناکہ تھنا حنیف چمروک ءِ کوش ءَ ھواریں کتکاراں سزا بہ دنت بلکیں پہ باندات ءِ ھاتر ءَ اے وڑیں وئیلانی گر ءُ دار ءَ گامگیج بزوریت-

ھمے وڑ ءَ جرمنی ءَ بلوچ نیشنل مومنٹ ءِ چیردستی ءَ حنیف چمروک ءِ کوش ءُ بلوچ نسل کُشی ءِ بگیری ءَ زھرشانی کنگ بیتگ –

بلوچ نیشنل مومنٹ ءِ شنگ بیتگیں درشان ءِ گوشگ بیتگ کہ بلوچستان ءَ دو دھکاں بلوچستان ءَ برجاھیں پوجی آپریشن ءُ انسانی ھکانی لگتمالیانی بگیری ءَ میان اُستمانی سرپدی ءِ پرکاری ءَ جرمنی ءَ زھرشانی کرتگ –

زھرشانی کنوکانی دست ءَ بینر ءُ پلے کارڈ بیتگ اَنت کہ آیانی سر ءَ پاکستان ءِ زُلمانی داستان نبشتگ بیتگ اَنت -زھرشانی کنوکاں پاکستان ءِ بگیری ءَ اوگام جتگ –

جارکش ءَ دیمتر ءَ وتی درشان ءَ گوشتگ کہ پاکستان ءِ دست ءَ بلوچ نسل کُشی ءُ انسانی ھکانی پادمالی ءُ انسانی ھکانی نامی ئیں باسک طیبہ بلوچ ءِ پِت حنیف چمروک ریاست ءِ دست ءَ کوش ءِ بگیری ءَ جرمنی ءَ زھرشانی کرتگ –

بلوچ نیشنل مومنٹ ءَ گوشت کہ حنیف چمروک ءَ ھوار سرجمیں بلوچانی کوش ءَ بلوچ نیشنل مومنٹ دنیا ءِ مزن واکداراں سرپدی دنت ءُ مروچی بیتگیں زھرشانی ءَ بی این ایم ءِ باسکاں ھوار دمگی مھلوک ءَ ھم بھر زرتگ ءُ بلوچستان ءَ بیوکیں زوراکی پدر کرتگ اَنت –

جارکش ءَ گوشت کہ حنیف چمروک ءِ وڑیں ھزاراں بلوچانی کشندہ پاکستان ءِ بگیری ءُ راجی آجوئی ءِ ھاتر ءَ بلوچ نیشنل مومنٹ میان اُستمانی سرپدی ءَ برجاہ داریت – ما انسانی ھکانی میان اُستمانی ادارھاں اے ھال دیگ لوٹ ایں کہ شمئے بے تواری ءَ بلوچانی ھون گیشتر ریچگ ءَ اَنت ءُ اے بے تواری ءِ سوب ءَ میان اُستمانی ادارہ زیردستیں بلوچانی ھونانی وامداری لڈگ بیتگ اِنت –

آسٹریلیا ءِ تہ ءَ بیوکیں گوازی اوپن گالف ٹورنامنٹ دارگ بوتگ، اے اولی رند انت کہ دومی جھانی جنگ ءَ پد اوپن گالف مراگش دارگ بوتگ –

دی بلوچستان پوسٹ

دری رسانکانی رِد ءَ جھانی وبا کرونا وائرس ءِ پژدر ءَ آسٹریلین اوپن گولف ٹورنامنٹ دومی جنگ عظیم ءَ پد اولی رند انت کہ دارگ بوتگ –

ٹورنامنٹ واکدارانی رِد ءَ آسٹریلیا ءِ ت ءَ بندی ءِ سوب ءَ گولف آسٹریلیا ءُ پی جے اے آسٹریلیا پیش ءَ وتی درسیں ایونٹ آنی دارگے جار پرینتگ –

کرونا وائرس ءِ نادراھائی پژدر ءَ نوں اسٹریلیا ءِ زمانگی گولف ٹورنامنٹ آسٹریلین اوپن ھم دارگ بوتگ –

ٹورنامنٹ ءِ نوکیں رمس جار ھم جنگ بوتگ کہ اے ایونٹ دیم ءِ سال جنوری 18 ءَ بگر تاں 31 جنوری ءَ برجاہ بنت – ٹورنامنٹ ءِ بندات میلبورن کنگسٹن ہیلتھ گولف کلب نیمگ ءَ بوھگی بوتگ –

اے اوپن گولف ءِ یکسدءُ پنچمی مراگش بوتگ، اے مراگش 1905 ءِ سال ءَ بندات کنگ بوتگ –

اے تاکبند ءِ تہ ءَ نمیرانیں نثار سباہ ءِ شئر، آزمانک ءُ نبشتانکاں ھوار آئی سر ءَ نبشتہ بیتگیں نبشتانک ھوار اَنت۔

دی بلوچستان پوسٹ

سباہ ءِ گرنچ ھلیل بلوچ ءِ نز آورتگ ءُ دی بلوچستان پوسٹ پبلیکشنز ءِ چیر دستی ءَ چاپ ءُ شنگ بیتگ۔

نثار سباہ ءِ گونڈیں پجار ءِ

شھید نثار سباہ ۱۷ مئی ۱۹۹۰ ءَ حاجی عبدالواحد سیاپاد ءِ لوگ ءَ ھاران ءِ دمگ سرگُردان ءَ ودی بیتگ اَت۔ گوں وتی ماتی زبان ءَ مھر ءِ سوب ءَ آ ھاران ءَ نصیر کُبدانی لبزانکی گل ءِ باسک جوڑ بیتگ اَت ءُ پدا پہ وتی بزگ ءُ لگت مالیں راج ءَ جھد کنگ ءِ ھاتر ءَ بلوچ وانندہ گل آزاد ءَ ھوار بوت۔

چہ بی ایس او آزاد ءَ پارغ بوھگ ءَ پد نثار سباہ بی این ایم ءَ گوں ھمگرنچ بوت ءُ دوھزار پانزدہ ءَ رخشان دمگ ءِ ڈپٹی آرگنائزر گچین کنگ بوت۔

شھید نثار سباہ ءِ سرءَ پاکستانی پوج ءِ نیمگ ءَ دروگیں بھتام جنگ بوت، ناشرکاری ءِ کیس ھم اڈ کنگ بوت اَنت ءُ دزگیر کنگ بوت، بلے آمید گِس ءَ اے گپ ھچ وڑ ءَ ثابت کنگ نہ بوت اَنت ءُ آ چہ بندیگ جاہ ءَ آجو بوت۔

نمیرانیں سباہ دشتیاری ءُ نمیرانیں چیرمین گلام مھمد بلوچ نثار سباہ ءِ آئیڈیل بوتگ اَنت ءُ ھمایانی پگر ءُ لیکہ ءَ دیما بران نمیرانیں نثار سباہ ءَ سیاسی ءُ ادبی جھد دیما بران کُتگ اَنت دانکہ یک روچے پاکستانی پوج ءَ مستونگ ءِ دمگ ءَ نثار سباہ ءَ دزگیر کُت ءُ شھید کُت۔

اے تاکبند ھلیل بلوچ ءِ نیمگ ءَ چہ بلوچ راجی جھد کار نمیرانیں نثار سباہ ءِ جھد ءُ آئی کرد ءَ پہ یک ستاشانی اِنت۔

دی بلوچستان پوسٹ

بلوچستان ءِ دمگ کیچ ءِ سیمسری دمگ زامران ءَ سر بیتگیں ھالانی رد ءَ جتائیں جاھاں جنگل سوچگ بیتگ اَنت –

دمگی مردمانی رد ءَ آس مین کور، نوانو ءُ سنبلان ءُ ناگ ءِ دمگاں جنگلاں آس کپتگ، جنگل ءَ کپتگیں آس ءِ سوب ءَ سرپدی نہ بیتگ-

دمگی مردمانی رد ءَ زامران ءِ جنگل ءِ بازیں رستر اناگہ مونڈار اَنت ءُ بازیں رسترانی جون ھم کپگ ءَ گندگ بیتگ اَنت –

دمگی مردمانی رد ءَ آپانی چمگاں زھر مانریچگ بیتگ ءُ چریشی ءِ سوب ءَ رستر مرگ ءَ اَنت بلے تنی وھدی اشی ءِ دگہ راستی نہ بیتگ –

زانگ بہ بیت ھمے گوزکیں ماہ ءَ دشت ءِ جتائیں جاھاں جنگلاں اناگہ ءَ آس چِست بیتگ ءُ دمگی مردماں کپتگیں آس ءِ زمہ واری سیکورٹی ادارھانی سر ءَ داتگ –

دی بلوچستان پوسٹ

دلگان، پھرہ ءُ نیکشھر ءِ میان ءِ دگ ءَ جتائیں وئیلاں دَہ مردم زدگ بیتگ اَنت –

سر بیتگیں ھالانی رد ءَ روکپتی بلوچستان ءِ دمگ پھرہ ءُ نیکشھر ءِ میانی دگ ءَ دگ ءِ وئیلے ءَ دَہ مردم زدگ بیتگ اَنت –

اھوالکار ءِ رد ءَ پھرہ ءُ نیکشھر ءِ میانی دمگ بزپیران ءَ سَے گاڑیانی میان ءَ دگ ءِ وئیل ءَ دَہ مردم زدگ بیتگ اَنت –

زدگ بیتگیں مردم نادراہ جاہ ءَ سر کنگ بیتگ اَنت ءُ دمگی مردمانی گوشگ اِنت کہ دگانی سر ءَ تابلوے نہ بوگ ءِ سوب ءَ گاڑیانی وئیل پیش اتکگ –

ھمے وڑ ءَ گوستگیں روچ ءَ دلگان ءَ دگ ءِ وئیل ءِ بیتگ ءُ مردمانی زدگ بیگ ء ھال سر بیتگ اَنت –

اھوالکار ءِ رد ءَ اسپند ءَ دراتکگیں گاڑی جلگہ ءِ میانی جاہ ءَ دگ ءِ وئیلے ءِ آماچ بیتگ ءُ گاڑی ءَ سواریں مردم زدگ بیتگ اَنت –

اھوالکار ءِ رد ءَ پانزدہ اکتوبر ءَ ھم دلگان ءُ پھرہ ءَ رؤکیں گاڑی ءِ وئیل ءِ آماچ بیتگ بلے دگی گیشیں ھال سر نہ بیتگ اَنت –

چمن شاھدگ ءِ سر ءَ یارو ءِ نزیک ءَ دگ ءِ وئیل، زالبول ءَ ھوار سئے مردم بیران ءُ ھپت مردم زدگ بوتگ ۔

دی بلوچستان پوسٹ

ٹی بی پی پتر ءَ سربوتگیں ھالانی رِد ءَ بلوچستان ءِ مزن شھر شال ءَ چہ چمن ءَ رؤکیں وین کاڑی ءَ یارو میتگ ءِ نزیک ءَ گوں دگے گاڑی ءَ ڈیک وارتگ، ڈیک ورگے سوب ءَ سئے مردم بیران بوتگ وھدیکے ھپت مردم زدگ بوتگ ۔ زدگ بوتگیں مردم ھما دمان ءَ دمگی نادراھجاہ ءَ برگ بوتگ انت ۔

بیران بوتگیں مردمانی پجار نجیب اللہ کاکڑ ءِ لوگی دولت بی بی جاھمنند شال ، گل محمد ء دین محمد کاکڑ جاھمنند پشین ءُ عبدالروف کاکڑ جاھمنند کلی مچان ءِ ناماں چہ بوتگ انت۔ وھدیکے زدگ بوتگیں مردمانی تہ ءَ محمد یوسف ء حاجی عبدالروف کاکڑ جاھمنند توبہ کاکڑی، محمد عمر ء فضل محمد درانی جاھمنند آمیر آباد پشین، ظہور احمد ء ولی محمد کاکڑ جاھمنند بالاوڑی پشین، عبدال ء فراز احمد سلیمان خیل جاھمنند نواں کلی شال ءُ محمود خان ء سردار محمد سلیمان خیل جاھمنند نواں کلی شال ھوار انت ۔

دمگی لیویز کارمنداں ھما دمان ءَ وت ءَ وئیل جاہ ءَ سر کُتگ ءُ کمکی کاراں بھر زرتگ، زدگ بوتگیں مردم نادراھجاہ ءَ برتگ انت وھدیکے وئیلے گیشیں پٹ پول برجاہ انت –