TBP Balochi

اے پاکستانی چاریگ گوارگو ءَ لشکر کشی ءُ لس مھلوک ءِ گسانی سوچگ ءَ گوں پاکستانی پوج ءَ ھوار بوتگ – بیبگر بلوچ

دی بلوچستان پوسٹ

بلوچ آجوئیں لوٹوکیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ پاکستانی چاریگ غلام جان ءِ کوش ءِ زمّہ واری منّ اِتگ ءُ گوشتگ کہ مئے سرمچاراں چار نومبر ءَ پنجگور ءِ دمگ گوارگو ءَ پاکستانی چاریگ غلام جان دزگیر کرتگ ءُ آئی ءِ کتکاریانی درگت ءَ جست ءُ پد کرتگ ءُ کہ آئی ءَ دپ ءِ وت منّ اِتگ کہ آ بازیں براں گوارگو، گچک ءَ پاکستانی پوج ءِ ھمراہ بوتگ لس مھلوک ءِ بگیری ءَ پاکستانی پوج ءِ لشکر کشیاں ھوار بوگے ھمراھی ءَ ورنایانی آوار جنی ءَ آئی ءِ دست مان بوتگ – ءُ گوارگو ءَ انوگیں لشکر کشی ءَ ھم ھوار بوتگ ءُ کہ پاکستانی پوج ءِ نیمگ ءَ درزنانی کچ ءَ لس مھلوک ءِ گس سوچگ بوتگ انت –

جارکش ءَ گوشتگ کہ اے درسیں کتکاریاں پد پاکستانی چاریگ ءَ مرگ ءِ سزا دیگے پیسلہ کنگ بوتگ ءُ ھشت نومبر ءَ کتکار گوارگو ءِ میتگ ءَ تیر جنگ ءُ کُشگ بوتگ –

گُڈسر ءَ بی آر اے جارکش بیبگر بلوچ ءَ گوشتگ کہ ما یکرندے پد ءَ دمگی مردماں چہ لوٹ کنیں کہ آ پاکستانی پوج ءِ دست ءَ رد مہ کپ انت پرچا کہ ریاست یک شَوربندی ءِ رد ءَ ورنایاں راجی زرمبشت ءِ بگیری کارمرز کنگ ءَ پرکار انت –

آئی ءَ گوشتگ کہ مئے جنگ بلوچستان ءِ آجوئی ءَ تاں برجاہ مان ایت-

سر بیتگیں ھالانی رد ءَ روکپتی بلوچستان ءِ ھاش ءَ ناشناسیں مردمانی تیرگواری ءَ پِت ءُ چُک بیران بیتگ اَنت-

دی بلوچستان پوسٹ

اھوالکار ءِ مروچی ھاش ءَ ناشناسیں مردماں یک گاڑی ءِ سر ءَ تیرگواری کرتگ ءُ گاڑی ءَ سواریں کسان سالیں چُک ءُ پِت بیران بیتگ اَنت –

بیران بیتگیں مردم ءِ پجار رضا بھادری پنام ءِ رزُک ء ھان مھمد ءِ جھمنند ایرندگان ءِ نام ءَ زانگ بیتگ –

اھوالکار ءِ رد ءَ وئیل ھما وھد ءَ پیش اتکگ کہ رضا بھادری وتی چک ءِ ھمراھی ءَ راہ ءَ روگ ءَ بیتگ کہ ناشناساں تیرانی آماچ کرتگ ءُ کشتگ اَنت ءُ بیران بیتگیں چُک ءِ اُمر یک سالے گوشگ بیگ ءَ اِنت –

اھوالکار ءِ وئیل کوھنیں دشمنی ءِ گوشگ ءَ بیگ ءَ اِنت ءُ تیرگواری ءَ پد تیرگواری کنوک تتکگ ءُ شتگ اَنت –

نسیر آباد ءَ تیرگواری پِت ءُ چُک بیران، یک جونے دزکپتگ، شال ءَ تاجر ءِ کوش ءِ بگیری ءَ زھرشانی

دی بلوچستان پوسٹ

سر بیتگیں ھالانی رد ءَ ڈیرہ اللہ یار ءِ نزیک ءَ تیرگواری ءَ چہ پِت ءُ چُک بیران بیتگ اَنت کہ آیانی پجار پلیا خان ءُ مھمد دین مندرانی ءِ ناماں زانگ بیتگ اَنت –

پولیس ءِ رد ءَ یکیں برادری ءِ دو ٹولیانی میان ءَ دشمنی ءِ سوب ءَ وئیل پیش اتکگ – تنی وھدی پولیس ءِ نیمگ ءَ ھچ دزگیریانی ھال دیم ءَ نیاتکگ اَنت –

ھمے وڑ ءَ اوستہ مھمد ءَ کرکٹ اسٹیڈیم ءِ نزیک ءَ یک جونے دزکپتگ کہ چِست کنگ ءُ اوستہ مھمد ءِ نادراہ جاہ ءَ برگ بیتگ –

جون کوھنی ءِ سوب ءَ پجار نہ بیگ گوشگ بیگ ءَ اِنت –

سَے شمبے ءِ روچ ءَ شال ءُ پشین ءَ باپاری رھشون اللہ دین ترین ءِ کوش ءِ بگیری ءَ دربندیں ھرتال کنگ بیتگ – کہ گوستگیں روچ ءَ پشین ءَ ناشناسیں مردماں تیرگواری کرتگ ءُ بنجاھی سکریٹری جنرل انجمن تاجر کُشتگ –

شال ءِ شھر ءِ دراھیں بازار بند، باپاری بنجل ءُ دکان بند کنگ بیتگ اَنت – انجمن تاجران بلوچستان ءُ پشتونکواہ ملی عوامی پاٹی( پی کے ایم اے پی) ءَ اللہ داد ترین ءِ کوش ءِ سر ءَ ھرتال ءِ جار پِرینتگ اَت – شھر ءَ دربندیں ھرتال ءَ پد دگانی سر ءَ گاڑیانی روگ ءُ آیگ ھم کم گندگ ءَ اتکگ –

دی بلوچستان پوسٹ

سر بیتگیں ھالانی رد ءَ روکپتی بلوچستان ءَ ناشناسیں مردماں گوستگیں شپ ءَ یک ٹنکرے ئِے سر ءَ تیرگواری کرتگ ءُ چریشی ءَ چہ ٹنکر بُنگپتگ –

اھوالکار ءِ رد ءَ پھرہ ءُ ھاش ءِ میانی دمگ گھورکوہ ءَ تیلے بنجلے ئِے سر ءَ ناشناساں یک ٹنکرے ئِے سر ءَ تیرگواری کرتگ ءُ چریشی ءَ ٹنکر بُنگپتگ –

اھوالکار ءِ رد ءَ ٹنکر تیل ءَ پُر بوتگ ءُ اوشتوک بیتگ کہ سلاہ بندیں مردم اتکگ ءُ ٹنکر ءِ ڈرائیور ءُ کلینڈر ایر اش کرتگ ءُ ٹنکر ءِ سر ءَ تیرگواری اش کرتگ –

اھوالکار ءِ رد ءَ گھورکوہ ءَ تیل بنجلانی نزیک ءَ ایرانی پھزدار ھم جاڑیگ اَنت – ٹنکر ءِ سر ءَ تیرگواری ءِ سوب زانگ نہ بیتگ –

دی بلوچستان پوسٹ

سر بیتگیں ھالانی رد ءَ بلوچی زبان ءِ نامی ئیں ازمکار سبزل سامگی بازیں نادراھیاں پد بیران بیتگ – آ گوستگیں بازیں روچاں کراچی ءَ یک نادراہ جاھے ءَ تھتیگ بیتگ –

سبزل سامگی ءَ کسان اُمری ءَ بلوچی زبان ءَ سوت گوشتگ ءُ داں پنجاہ سالاں آ گوں بلوچی ءَ بندوک بیتگ –

ھالانی تہ ءَ گوشگ بیتگ کہ آ پُپ ءُ جگرانی ءَ ھوار بازیں نادراھیانی آماچ بیتگ ءُ مروچی مگرب ءِ وھد ءَ کراچی ءَ نادراہ جاھے ءَ بیران بیتگ –

سبزل سامگی ءِ بیرانی ءِ سر ءَ پرسیگ ءُ اے وھد ءَ چاگردی رسانکجاھاں ھزارانی کچ ءَ مردم پرسیگ ءُ پدردی درشان کنگ ءَ اَنت –

سبزل سامگء بلوچستان ءِ دمگ کیچ ءَ ودی بیتگ ءُ ھمود ءَ آئی ءَ وتی گیشتریں زند گوازینتگ –

سبزل سامگی ءَ بلوچستان ءِ بازیں جاھاں وتی ازم جتائیں رنگاں پیش کرتگ ءُ آ گیشتر وش الھانیں سوت ءِ گوشگ ءَ نامان بیتگ –

نبشتانک: براس واهگانی درپشوکیں استال

نبشتہ کار: ابدالله بلوچ

دی بلوچستان پوسٹ

مروچی من 8 نومبر ءَ بیگاه ءِ ساهت ءَ گوں وتی موبائل ءَ دلگوش اِتاں پیسبک ءَ اکس ءُ ویڈیو چارگ ءَ اِتاں اچانگ ءَ منی دیم ءَ براس ءِ نوکیں تامر اتک بُرز ءَ نبشتگ اَت براس پہ وتن روکیں وهدے کہ تامر من چار ات من ءَ سک باز وشی بوت گُش ئے  یک امیتے مئے دمبرتگیں بالاد ءَ رس ات-

من یک گپے گشینگ لوٹاں کہ منی جند هچ رنگیں پارٹیاں هوار نہ انت ناں سیاسی ناں کہ آزادی پسند من بس تهنا یک بلوچے آں منی پرز انت کہ من وتی بلوچ آزادی پسندیں سنگتانی جد ءُ جھد ءَ شر بگشاں چی ءَ کہ شریں کاراں هر کس گش ایت شر هرابیں کاراں هراب گش ایت –

من ءَ یات انت من باز جاه ءَ وتی راجی سپاهیانی همایت کتگ گڑا باز انچیں مردماں من ءَ گشتگ تو گڑا وت تنزیماں چی ءَ هوار نہ بئے اِد ءَ چے لوٹ ئے برو تنزیماں هوار بو کوه ءَ بہ نند اِد ءَ بازار ءَ وسر ءَ گپ کن ئے پارٹی اے کار کتگ پارٹی ءَ کار کتگ من گڑا یک برے هاموش بوتگاں داں کہ دیم ءِ سنگت ءَ وتی هبر سرجم کتگ گڑا نوں من سنگت ءِ پسّہ داتگ کہ تئی گپ راست انت من لوگ ءَ نشتگاں پارٹیاں هوار نیاں کوه ءَ نیاں بلے منی واجہ ما دراه کوه ءَ شُت نه کنیں کوه ءَ همک مردم نشت نکنت اگاں مئے دست ءَ جنگ ءُ کوه ءِ نندگ نہ بیت گڑا متلب اے نه انت کہ ما هاموش بہ باں بہ ننداں هچ مہ گشاں بلے مئے اکلاکی همایت هر وهد ءَ وتی راجی جهدکاراں گون انت دوا انت کہ هر جنگ ءِ میدان ءَ مدام سوبین بات انت-

هر کجام پارٹی بہ بیت آ پہ بلوچ راج ءِ هاتر ءَ پہ شریں جوانیں رنگے جہد ءَ انت گڑا آئی ءِ دلبڈی المی انت چی ءَ کہ آ پہ بلوچ راج ءِ هاتر ءَ جھد ءَ انت اگاں بلوچستان یک روچے آجو بیت گڑا ما شما دراه وش ءُ وشهال باں اے زند کہ ما دیستگ ما گوازینگ ءَ ایں اے رنگیں زند مئے آوکیں پدریچاں نسیب مہ بات آ وش ءُ وشهالیں زندے ءُ وتی پلیں آزاد بلوچستان ءِ واهنند بات انت-

آزاد بلوچستان ءِ واب مئے چماں براس ءِ نام ءَ نزیک بوان انت مارا امیت انت همے رنگ ءَ سنگتانی جُہد دیم ءَ روان کنت وتی بزگیں راج ءَ منزلے سر کنت
براس مئے واهگانی درپشوکیں استال اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ پنجگور ءَ یک جونے دزکپتگ کہ آئی ءِ پجار غلام جان ء عید مھمد جھمنند گوارگو گْونی ءِ نام ءَ زانگ بیتگ –

دمگی مردمانی رد ءَ غلام جان چار روچ ءَ پیسر گوارگو گْونی ءَ ناشناسیں سلاہ بندیں مردماں آوار جتگ ءُ برتگ کہ آئی ءِ جون مروچی گوارگو ءَ دزکپتگ –

دمگدار ءِ رد ءَ کُشتگیں مرد ءِ بارو ءَ تنی وھدی ھچ سرپدی نہ بیتگ –

نبشتانک: پروم نوں آ پروم نہ اِنت

نبشتہ کار: ھدایت بلوچ

دی بلوچستان پوسٹ

وشکوشیں پروم یک نامدار ءُ ڈولداریں جاھے ۔ پروم کوچگ ءُ کوہ ءُ گواش دیماں سک براہ دار کُرتگ۔ کپ ءَ بگر داں شم ءَ سگارکنڈ ءَ بگر داں جوئی ءَ ھمک شیپ ءُ ڈلدیمانی چارگ ءَ دل سیر نہ بیت پروم ءَ ھُداوند ءَ یک گران بھا ءُ بے مٹیں کوشے داتگ ھمک بیگاہ کہ کوش چہ نمبیان ءِ گْور ءَ ایر دنت مردم زند ءِ گماں بے گم بیت پمشکا پروم وشکوشیں پروم ءِ نام ءَ چہ زانگ بیت۔

پروم شکار ءُ پکنک ءُ سیل ءُ گردگ ءِ یک بے مٹیں جاگھے پہ سیل ءُ گردگ ءَ دور ءُ دری مردم کاینت پروم ءِ مردم پہ مھمانداری ءُ وت ماں وت ءَ تپاکی ءُ یکے ءُ دومی ءِ درد واری ءَ چہ زانگ بنت پروم بھارگاہ ءَ یک جتائیں رنگے کار اِیت مردم وتی مال ءُ دلوتاں زور اَنت ءُ رو اَنت گواش دیماں نند اَنت۔

ھمُک گدان ءَ شیر ءُ شیلانچ بیت۔۔ مردم گلءُ شادان بنت پروم ءِ کجام موسم ءَ ما بچار اِیں ھامین بیت یا جوپاگ پروم وتی مٹءُ درور وت اِنت۔

بلے دْریگتیں! اے دْرست کْوھنیں گپ اَنت پروم نوں آ پروم نہ اِنت
ھر یکے ءَ بہ چار گوں دومی ءَ سُک ءُ ڈُک اِنت –

نا کہ تپاکی ھست ءُ نا کہ درد واری کُشت ءُ ھون دُزی ءُ دری ھرکس پہ مڑاھے کنت تنگ دست ءُ گریبیں مردم زوراکانی چامپٹانی چیر ءَ چیر ترّ اِتگ اَنت در کوم ءُ درامد ءِ ھم کوپگ بوَگ ءَ مردم پھر بند اَنت-

نامداری ءُ درد واری ءُ مھمانداری ءِ ھچ نام پشت نہ کپتگ۔۔ ھرکسءَ بہ گند وتی گماں گار اِنت ھرکسی واھگ ھمیش اِنت من چہ وت ءَ ایردسترین ءِ سر ءَ پادا ایر بہ کنان ءُ سر بہ کپاں۔

نامدار ءُ سریں مردم یک یک ءَ دژمن ءُ درامداں گارءُ بے گواہ کُرتگ اَنت، لھتیں کُشتگ ءُ دور داتگ پروم رسترانی دیمپان اِنت نا کہ سیلءُ گردگی جاھے پشت کپتگ ءُ نا کہ پکنک ءُ شاتکامی ھر کس وتی وتی گماں گار اِنت درامد ءُ زوراکانی بیم ءَ ھمک مات ءُ گُھار دلترک کُرتگ اَنت کوہ ءُ کوچگاں یک ابیتکی یے ءَ مانشانتگ-

برے برے پروم ءِ مردمے گنداں جُست ئِے کناں چون اِنت پروم مدام ھمے پسّو رس اِیت پروم نوں آ پروم نہ اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ سراوان ءَ سَے گاڑیاں ٹکر وارتگ ءُ پنچ مردم بیران بیتگ اَنت –

اھوالکار ءِ رد ءَ مروچی سراوان ءُ سیرکان ءِ میانی دمگ ھمزہ جاھان ءَ سَے گاڑی دگ ءِ وئیل آماچ بیتگ اَنت کہ چریشی ءِ سوب ءَ پنچ مردم بیران بیتگ اَنت –

اھوالکار ءِ رد ءَ گاڑیانی ٹکر ورگ ءَ پد گاڑی سُتکگ اَنت ءُ پنچ مردم بیران بیتگ اَنت –

بیران بیتگیں مردمانی تہ ءَ دو مردمانی پجار نزیر دریدری یگانہ ء عبدالوحید جھمنند دریدرو ءُ نادر بلوچزھی ء شیخ مھمد جھمنند دموکی ءِ ناماں زانگ بیتگ اَنت –

بلوچستان ءِ بنجاھی شھر شال ءَ اشکرانی کاریز ءَ دو مردم بیران ءُ کوھلو ءَ آروسی مراگش ءَ گیس سلینڈر ءِ ترکگ سِی مردم زدگ بیتگ اَنت –

دی بلوچستان پوسٹ

سربوتگیں ھالانی رِد ءَ بلوچستان ءِ بُنجاھی شھر شال ءِ دمگ سورینج ءَ زگال ءِ کھن ءِ گیس ءِ پُر بوگ ءِ سوب ءَ دو کاریزکار بیران بوتگ اَنت –

بیران بوتگیں مردمانی پجار برکت علی  ءُ عثمان علی ءِ ناماں بوتگ اَنت- کہ دوئیں مردم کاریز ءَ گیس ءِ پُر بوگے سوب ءَ دمتوس بوتگ ءُ بیران بوتگ انت –

بیران بوتگیں مردمانی جون چہ کھن ءَ کشگ ءُ دمگی ھسپتال ءَ برگ بوتگ اَنت ءُ ھژدری چار ءَ ٹپاس ءَ پد جون کھولانی گور ءَ سر کنگ بوتگ اَنت-

کوھلو ءَ آروسی مراگشے ءَ سلینڈرے ترک اِتگ، سِی مردم ٹپی-

بلوچستان ءِ دمگ کوھلو ءَ آروسی مراگشے ءَ سلینڈر ءِ ترکگ ءِ سوب ءَ کساس سی مردم ٹپی بوتگ اَنت، ٹپی بوتگیں مردمانی تہ ءَ چُک ءُ زالبول ھم ھوار انت –
سلینڈر ترکگ ءِ وئیل کوھلو ءِ دمگ بوھڑی میتگ ءَ دیم ءَ اتکگ-

ھسپتال ءِ پھازدارانی رِد ءَ دراھیں ٹپی بوتگیں مردمانی ٹپ درمان کنگ بوتگ انت بلے آھانی تہ ءَ درزنے ءَ گیش مردمانی جاور نگیگ انت آ پہ گیشیں درمانی ءِ ھاتر ءَ پنجاپ ءَ دیم دیگ بوتگ انت-