TBP Balochi

دی بلوچستان پوسٹ

سر بیتگیں ھالانی رد ءَ بلوچستان ءِ دمگ سبی ءَ پاکستانی پوج ءَ چلّا ء جُھڑیا ڈومکی دزگیر کنگ ءَ پد ناشناسیں زنداناں برتگ –

دمگی مردمانی رد ءَ چلّا سبی ءِ دمگ لھڑی ءِ جھمنند اِنت کہ پاکستانی پوج ءُ اسپیت پوشیں کارندھاں دزگیر کنگ ءَ پد بیگواہ کرتگ –

ھمے وڑ ءَ کیچ ءِ بنجاھی شھر تربت آسکانی میتگ ءَ پاکستانی پوج ءَ گوستگیں روچاں جنگ ءُ چوپ ءَ جنگ بیتگیں رامین ءِ سیادانی لوگانی سر ءَ بیڑ برتگ –

دمگی مردمانی رد ءَ پوج ءِ کارندھاں لوگ ءَ جاڑیگیں زالبول توپنکی کندانک جنگ ءَ ھوار زالبول بیگواہ کنگ ءِ بیھار داتگ اَنت ھمے وڑ ءَ دکاندار سرپد کرتگ ءُ گوشتگ اَنت لوگ ءَ وردنی دیگ ءِ ھلاپ ءَ کاروائی کنگ بیت اِنت –

دمگداراں تنی وھدی اے درگت ءَ ھچ گپ دیم ءَ نیاؤرتگ ھمے وڑ رامین بلوچ ءِ پُرسی پتر ءَ نندوکیں مردم توپنکانی کندانکاں گوں مانبندگ بیتگ اَنت –

بلوچستان ءَ زورانسری بیگواھیانی وئیل ھمک روچ بیگ ءَ اَنت وھدیکہ وائس فار بلوچ مسنگ پرسنز شال ءِ پریس کلب ءِ دیم ءَ ھمک وھد زھرشانی کنگ اِنت –

دی بلوچستان پوسٹ

پاکستانی چیریں ادارہ ءُ روکپت ءِ پولیس ءَ سندھ ءِ بنجاھی شھر کراچی بنارس ءَ تھریک تالبان پاکستان ءَ سیادی کنوکیں سَے کس ءُ بلوچ لبریشن آرمی ءِ یک باسکے ءِ دزگیر کنگ ءِ ٹاہ داتگ –

وکداراں اے ھال شنگ کرتگ کہ بی ایل اے ءُ ٹی ٹی پی ءِ باسکانی گور ءَ بازیں کَچے ءَ تراکناکیں تراکانی ازباب دست کپتگ اَنت –

ھالانی تہ ءَ دیمتر ءَ گوشگ بیتگ کہ دزگیر کرتگیں باسک کراچی ءِ روکپتی دمگ بنارس ءَ جھمنند بیتگ اَنت –

واکدارانی رد ءَ بی ایل اے ءِ باسک ءِ گور ءَ تراکناکیں شورو ءُ تراک جوڑ کنگ ءِ ساز ءُ ساماناں کراچی ءَ اتکگ جرمکار ءِ گور ءَ شست میٹر دراجیں وئیر، شانزدہ ڈیٹونیٹرز دزکپتگ اَنت ھمے وڑ ءَ جرمکار ءِ نشانگ کنگ ءَ آئی ءِ گور ءَ سلاہ ھم دزکپتگ اَنت –

بلے تنی وھدی واکداراں گپتگیں مردمانی نام ءُ دگہ ھال شنگ نہ کرتگ اَنت –

زانگ بہ بیت ھمے سال ءِ جولائی ءِ ماہ ءَ پاکستانی واکداراں ٹاہ داتگ اَت بلوچ راجی آجوئی(براس) ءِ شش باسک دزگیر کرتگ پد ءَ ایشی ءِ پُشدر ءَ براس ءِ جارکس بلوچ ھان ءَ وتی بیان ءِ تہ ءَ اے ٹاہ رد کرتگ اَنت –

بلوچ ھان ءَ گوشتگ اَت کہ دزگیری ءُ پدر کنگ ءِ درچ ءِ گامگیج پاکستان ءِ برجاھیں پندلانی بھر اِنت، کہ چریشی ءِ سر ءَ گوستگیں بازیں وھداں سرمچارانی دیم ءَ پروش ورگ ءَ پد پاکستانی پوج ءُ چیریں ادارہ وتی بے سوبی ءِ چیردیگ ءِ ھاتر ءَ لس دست ءُ گوشیں بلوچاں دیربندیں سزایانی نشانگ کنگ ءَ اِنت –

زانگ بہ بیت براس چار بلوچ سلاہ بندیں آجوئی ءِ دوستیں پاٹی ءِ ھمسنت اِنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءَ دگ ءِ وئیلے ءَ دو مردم بیران ءُ سَے زدگ بیتگ اَنت

اھوالکار ءِ رد ءَ پھرہ ءُ لاشار ءِ میانی دمگ ورکات ءَ دو گاڑیانی ٹکر ورگ ءِ سوب ءَ یک زالبول ءُ یک مردینے بیران بیتگ اَنت ءُ دو زالبول ءُ یک مردینے زدگ بیتگ اَنت –

بیران بیتگیں مردمانی پجار زینب کرم زادہ ءُ امیر مھمد کرم زادہ جھمنند ایرندگان ءِ ناماں زانگ بیتگ اَنت –

زدگ بیتگیں مردمانی پجار زھرا، نور مھمد ءُ کسرا کرم زادہ جھمنند ایرندگان ءِ ناماں زانگ بیتگ اَنت –

چاگردی مردمانی گوشگ اِنت بلوچستان و سیستان ءَ ھمک سال دگانی سر ءَ بازیں مردمانی بیرانی ءُ زدگ بیگ ءَ اَنت –

دی بلوچستان پوسٹ

پاکستان ءِ سرکار ءَ بگیر داروکیں پاکستان ڈیموکریٹک موومنٹ ءِ اولی گپ دیم ءَ اتکگ ھمے کاروان ءِ باسک محسن داوڑ ءَ پی ڈی ایم ءَ وت ءَ دزکش کتگ –

برطانیہ ءِ ھالرسانی ادارہ ءَ گوں گپ کنان ءَ یک گچینی ءِ گُلگِدارے ءَ محسن داوڑ ءَ درشان کتگ کہ آ اے موومنٹ ءِ آؤکین مُچی ءَ بھر نہ زور ایت –

محسن داوڑ ءَ گْوشت کہ پشاور ءِ مُچی ءَ نہ لوٹگ ءَ آ اے گامگیج ءَ زورگ ءَ اِنت –

یک جُستے ءِ پَسو ءَ گْوشت کہ سیاست ءَ من ءَ کس کَش اِت نہ کنت ایوک ءَ نندگ ءُ بنزہ ءَ داشت کن آں –

آئی ءَ گْوشت کہ پی ڈی ایم پشتون تھپز موومنٹ ءِ نمائندگ نہ بیتگ ءُ بلکیں اے ھمسنتی ءَ ھنچیں پاٹی ھوار اَنت اشاں راجمان پتر ءَ ھچ نمائندگی نیست اِنت –

زانگ بہ بیت پشتون تھپز موومنٹ ءِ سروک منظور پشتین ءَ بازیں براں اے گپ پدر کرتگ کہ پارلیمانی سیاست ءَ بھر نہ زوریں –

ارجنٹائن ءِ ناموریں فٹبال ءِ لیبی ڈیاگو میرا ڈونا بیران بوتگ۔

دی بلوچستان پوسٹ

درملکی رسانکدر ءِ رپورٹ ءِ رِد ءَ میرا ڈونا شست سال ءِ اُمر ءَ دل ءِ دورہ ءَ گپتگ ءُ بیران بوتگ –

رپورٹ ءِ رد ءَ میراڈونا فٹبال راجدپتر ءَ بے درور ءُ ناموریں لیبیانی تہ ءَ ھوار بیتگ –

میراڈونا ارجنٹائن ءِ بنجاھی شھر بیونس آئرس ءَ ویلا فیوریتو میتگ ءَ ودی بوتگ ءُ نیزگارے بوتگ –

نوزدہ سد ءُ ھشتاد ءُ شش ءَ ارجنٹائن ءَ میراڈونا ءِ سرکماشی ءَ جھانی کپ ءَ بھر زرتگ ءُ گڈی دیم پہ دیمی ءَ ٹیم ءَ چہ روکپتی جرمنی ءَ باج بُرتگ ءُ جھانی باج بر چمپئین جوڑ بوتگ –

اشی ءَ ابید آئی ءَ لیگ گوازیانی تہ ءَ بوکا جونئیرز، ایف سی بارسلونا ءُ ایس ایس سی ناپولی کلب ءِ ھاتر ءَ جوانیں داد گپتگ –

وتی میان اُستمانی وھدے تہ ءَ آئی ءَ نود ءُ یک گوازی ءَ بھر زرتگ ءُ سِی ءُ چار گول آورتگ –

میراڈونا ءَ نوزدہ سد ءُ ھشتاد دو، نوزدہ سد ءُ ھشتاد شش ، نوزدہ سد ءُ نود ءُ نوزدہ سد ءُ نود ءُچار ءَ فٹبال ءِ میان اُستمانی گوازیاں بھر زرتگے –

دی بلوچستان پوسٹ

بلوچستان ءِ بنجاھی شھر شال ءَ استانی گلانی دست ءَ گار ءُ بیگواہ بوتگیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ یک سد ءُ چل ءُ دو روچ سرجم بوتگ –

چہ سبی ءَ نور محمد دیپال بلوچ، حفیظ اللہ خجک، نور محمد بلوچ ءَ گون وتی ھمراھاں بنجلے تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اِتگ – بنجل ءَ نصراللہ بلوچ ءُ بیگواھیں سیف اللہ رودینی ءِ کھول ھم ساڑی بوتگ اَنت –

ھمے وھد ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ وتی ھیال درشان اِتگ ءُ گوشتگ کہ اکتوبر ءِ گڈی روچ ءَ زوراکیں پوج ءِ دست ءَ بلوچانی ھون ریچی ءَ گوں ایربُکتگ ءُ نومبر ءِ بنداتی روچ زوراکیں ریاست ءِ زوراکی ءُ زورانسری آوار جنی ءِ گوم ءَ درآتکگ – مند، تربت، مکران ءِ جتا جتائیں دمگاں پاکستانی پوج ءِ زوراکی یکشل ءَ برجاہ انت –

ماما قدیر بلوچ ءَ دیمتر ءَ گوشتگ کہ سرجمیں بلوچستان ءَ برجاھیں زوراکی ءُ زانگولیں لاشانی درآھگے بگیری ءَ زھرشانی کنگ بوتگ، مزنیں کساس ءَ چک ءُ جنیناں بھر زرتگ بلے واکداریں رسانکدر ءُ دمگی انسانی ھکانی گلانی گوشاں کسانیں جنبش ھم نہ بوتگ –

آئی ءَ گوشتگ کہ چیریں گلانی ھمے کوشست انت کہ کشت ءُ کوش ءِ بازاراں بلوچ پرزندانی ھوناں پہ ارزانی گار بہ کن انت بلے اے ھچ وڑ ممکن گندگ بوگ ءَ نہ انت پرچاکہ کہ پہ جھد ءِ ھاتر ءَ وتی سرانی دیمونی دیوکیں پرزندانی کھول ءُ راج وتی شھیدانی راہ ءُ آھانی رتکگیں ھونانی کدر ءَ کنت – بلوچستان ءِ ھکئیں وارس الم اے دو دیمی آدینکی پارلیمانی مردماں پدر کن انت –

گڈسر ءَ ماما کدیر بلوچ ءَ گوشتگ کہ بلوچ راست اِنت کہ پدمنتگ ءُ ایردست انت، گلام انت بلے انچو ھاٹیگ مان کہ گلامی ءِ بگیری ءَ توار چست بہ کنت ۔

بلوچستان ءِ دمگ چاگی ءِ بنجاھی شھر دالبندین ءِ نزیک ءَ یک مردمے ءِ جون دست کپتگ-

دی بلوچستان پوسٹ

کیو آر ایف ءِ کماندار عبدالکریم نوتیزئی ءِ رد ءَ دالبندین بالی پَٹ دگ ءِ نزیک ءَ یک مردمے ءِ جون دست کپتگ- جون چست کنگ ءُ نادراہ جاہ ءَ سرکنگ بوتگ – اود ءَ آئی ءِ پجار عبدالمالک ءِ نام ءَ بوتگ –

عبدالمالک ءِ کھول ءِ رِد ءَ آ سھب ءَ ماھلہ ءَ چہ گِس ءَ درآتکگ کہ رندا آئی ءِ مرگ ءِ ھال بوتگ –

نادراہ جاہ ءِ رِد ءَ اے مرد دلترک “دل ءِ دورہ ” ءِ سوب ءَ مرگ ءِ دیمپان بوتگ –

بلوچستان نوکنڈی ءَ ٹریلر ءُ زمباد گاڑی ڈیک ورگ ءَ یک مردمے بیران ءُ دو زدگ بوتگ اَنت –

دی بلوچستان پوسٹ

گوستگیں شپ ءَ نوکنڈی ءِ نزیک ءَ بھتر لانڑی ءَ ٹریلر ءُ پٹرول کشیں زمباد گاڑی ءَ ڈیک وارتگ، ڈیک ورگے آسر ءَ ٹریلر ءُ زمباد گاڑی ءَ آس لگ اِتگ چریشی ءَ زمباد گاڑی ءِ ڈرائیور نصیر احمد شیرزئی پنام ءِ بورجان جاھمنند نوکنڈی سوتکگ ءُ بیران بوتگ – وھدیکہ ٹریلر ءِ ڈرائیور ءُ گوں ھمراہ ءَ ٹپی بوتگ اَنت –

نوکنڈی لیویز فورس ءَ ٹریلر ڈرائیور گوں ھمراہ ءَ دزگیر کرتگ ءُ گیشیں پٹ ءُ پول کنگ انت ئِے ءُ دگ ءِ سر ءَ گاڑی چست کنگ بوتگ انت –

بیران بوتگیں زمباد گاڑی ڈرائیور نصیر احمد شیرازئی نوکنڈی ءِ مانش جاہ ءَ کل ءُ کسارت کنگ بوتگ –

دی بلوچستان پوسٹ

بلوچانی چار گلانی آجوئی ءِ دوستیں سلاہ بندیں گلانی ھمسنتیں بلوچ راجی آجوئی سنگر ءِ جارکش بلوچ ھان ءَ یک لیکھے درشان کنان ءَ گْوشتگ کہ بلوچ راجی جنز یک دراجیں پَندے ءَ گوستگ ءُ ھما ھَد ءَ سر بیتگ کہ مروچی بلوچ راج ءُ گیشتر راج ءِ ورنایاں دراھیں زانت ءُ زانشت ٹپاس اِتگ ءُ سرپد بیتگ اَنت مئے بستار ءِ مول ءُ مراد چی اَنت، مئے راجی پجار ءِ واستا کجام چیز اژدری اَنت ءُ اشانی گرگ چون بنت – ھمے واستا راجی آجوئی ءِ پھگ ءُ پلگاریں پگر ءِ دیم ءَ پندل کنوکیں رپینوک ءُ وت سریں پگر ءِ ودینوک وت سر ءَ وت مرتگ ءُ مروچی اُستانی وتواجھی، بتیں بنجاھی پارلیمانی سیاست کنوکیں لھتے بس ایوک ءَ وتی جند ءِ زندگ کنگ ءَ بندوک اَنت -ٹک ءُ ٹولی ءَ گیشتر ھما مردمانی پگری، راجمانی ءُ راجی وھد ءِ واستا ھچ پش نہ کپتگ – دومی نیمگ ءَ بلوچ راجی آجوئی ءِ پگر ھَنچُش مھکم بیتگ کہ راج سرانی کربان کنگ ءَ لرزگ ءَ نہ اِنت،ھزارانی کچ ءَ شھیدی ءُ بیگواھیاں ابید ھم راج ءِ پیر ءُ ورناہ ھما مھکمیں پگر ءِ رکینگ ءَ وتی سرانی نھاد ءَ دیگ ءَ اَنت ءُ اے کاروان دیم ءَ جنزان اِنت –

بلوچ ھان ءَ گْوشت کہ وتی جھل کپتگیں بستار ءُ پگری ردوم ءُ جتائیں بارہ ءِ سر ءَ چارگ ءُ اے پارلیمان پرستیں ٹولیاں راج ءِ گون ءَ دروگیں سیادی ءِ بنزہ ءِ جوڑینگ ءَ، جیڑھاں ابید دپ وشی پگری ءِ شِنگینگ ءِ چِست کنگ ءُ کِشگ بندات کتگ دانکہ کجام ھم رنگ ءَ وتی ھُنڈالاں زندگ داشت بہ کن ایں – اے جیڑھانی سر ءَ بیگواھیں مردم ءُ بلوچستان ءَ برجاھیں پوجی لشکر کشی ءُ کُشت ءُ کوشانی جیڑہ درستاں سر بُر اَنت – اے پارلیمانی ٹولی ھستیں جیڑھاں چِست کن اَنت، اشانی درشاناں شنگ ھم کن اَنت، مراگش ءُ مُچی کن اَنت ءُ ووٹ پِنڈ اَنت بلے آ اے درشان ءَ نہ کن اَنت کہ بلوچانی زورانسری ءِ جیڑہ ھمے واستا اِنت راج ءِ گیشتریں بھر راجی آجوئی ءِ لوٹ ءَ کنگ ءَ اَنت ءُ وتی ھمے راجی لوٹ ءِ واستا جد ءُ جھد کنگ ءَ اَنت، زورانسری بیگواھی ھمے واستا ھست اَنت کہ راج ءِ سر ءَ یک زوراکیں پوجے ءِ الگار اِنت ءُ پوجی لشکر کشی ءُ کُشت ءُ کوشانی پشدر تچکی ءَ بلوچستان ءِ سر ءَ زورگریانی سوب اِنت ءُ ھما وھد ءَ داں زورگر ھست اِنت، بلوچستان ءَ ھونانی ھار تچ اَنت –

جارکش ءَ دیمترا گوشت کہ اے پارلیمانی ٹولیانی بنزہ ھما پگر ءِ سر ءَ ایر بیتگ اے لوٹ ھماھانی کرد ءُ کارپداں پدر اَنت – پاکستانی پوج ءِ اے ھمبستگیں لوٹ بیتگ کہ آ وتی بے ھودیں کار ءُ جاھانی سر بیگ ءِ واستا ھنرسازی کنت ءُ وھدیکہ وتی کاراں سرجم کنت گڑا آیاں دُروش اِیت ءُ گار کنت، ھمے وڑیں کردانی تہ ءَ یکے ملا عمر بیتگ، کہ آ گوستگیں روچاں کیچ ءَ بازیں وھداں کاربندگ ءَ پد پوج ءَ وت کُشتگ ءُ وت ءَ بنجل ءَ رسینتگ -ملا عمر یک ھنچیں ڈیٹھ اسکواڈے ءِ سروکی ءَ کنگ ءَ بیتگ کہ آ سرجمی ءَ بلوچ آجوئی دوستانی کُشگ ءُ بیگواہ کنگ ءَ دزمانجن بیتگ – آئی ءِ ڈیتھ اسکواڈ ءَ کم چہ کم بیست ءُ پنچ بلوچ پُسگ تیرگواری کُرتگ ءُ شھید کتگ اَنت – کہ آیانی تہ ءَ 1: کمال کھدائی ء کھدہ موسیٰ /پیدارک2014-03-22-2 سوپی باھوٹ ء پیر مھمد /سری کلگ 2014-09-23، 3.شجاعت اللہ ء نعمت اللہ / درمکول 2015-01-30 4.ھسن ء زھور) اُمر پنچ سال) /پیدارک 5.جاوید ء پیر بکش /درمکول 2015-06-12 6. داد بکش / شادی کور 2015-10-01. 7 فیصل ء افضل / درمکول 2015-10-01. 8 ھدا بکش ء پُلان / پیدارک، 9 . مقبول ء میار / جمک، 10 گوس بکش / جمک 2014-09-29 .11 . واھد ء سوالی درمکول 2014-10-21. 12 واھگ ء ھدا داد جھمنند بچکول، 13 پولات جھمنند شادی کور 14 . مراد ھاسل ء درویش / درمکول 2014-03-22 . 15 اسلام ء مراد ھاسل / درمکول 2014-03-22 16سمیر ء نسیر کمالان / پسنی 2014-03-22،17 اکرام ء مراد ھاسل / درمکول 2014-03-22، 18 شبیر پنام ازت بلوچ / گورکوپ 2015-07-05-19. کریم جان / گورکوپ 2015-07-05-20. جمیل پنام ءِ کیّا ء شکاری امین / پیدارک 2018-03-09-21. ولی مھمد ء شکاری یوسپ /سولانی 2014-09-23، 22 سپر ھان / سری کلگ 2018-03-09 23. منیر بلوچ 2018-03-09-24. ھکیم بلوچ 2018-03-09-25.نسیم ء جان مھمد / جمک 2014-04-03–

چریشاں ابید ملا عمر ءِ ٹولی ءَ تنی وھدی بازیں کَچے ءَ بلوچ راجکاریِں باسک آوار جتگ ءُ بیگواہ کتگ اَنت ئِے – بلے بے چارگیں پارلیمانی ٹولی یک نیمگے ءَ ھمے کُشت ءُ ھونانی سر ءَ راجکاری کنگ ءَ اَنت ءُ ھما بیگواھیں مردماں چہ ووٹ پنڈگ ءَ گندگ بیگ ءَ اَنت، دومی نیمگ ءَ آیانی دمگی لیڈرشپ ملا عمر ءِ کوش ءَ ایرجنگ ءَ اَنت، ءُ آئی ءِ لوگ ءَ پدردی ءِ درشانگ ءَ روگ ءَ گندگ بیگ ءَ اَنت –

بلوچ ھان ءَ دیمتر ءَ گوشتگ کہ اے ھما ٹولی اِنت کہ بلوچانی کُشندہ شفیق مینگل ءِ ھمسنتی ءَ ھمسنت بنت، پد ءَ گاریں گورانی ھلاپ ءَ گپ کن اَنت- ڈنک ءِ ناوشیں وئیل ءِ بارہ ءَ ایرجنگی بیان شنگ کن اَنت، بلے کُشندھاں ھم زان اَنت – بلوچانی زورانسری بیگواہ کنگ ءَ کَے ھوار اِنت اے مردم الکاپ ءَ شری ءَ زان اَنت، بندیں دروازگانی پُشت ءَ اشانی گند ءُ نند بیت اِنت، بلوچانی ھون ءِ بھاھی ءَ پارلیمانی سِٹانی نھاد ءَ کن اَنت پد ءَ پی ڈی ایم ءُ دگہ ھنچیں تلوانی سر ءَ رو اَنت ءُ بیگواھیں مردمانی سر ءَ وتی سیاست ءَ ساپ ءُ پلگار اَنت –

بلوچ راجی آجوئی سنگر راج ءِ دیم ءَ اے مردمانی کرد ءُ راستیں چھرگ ءِ پدر کنگ ءَ مول ءَ سرپد کنت – پارلیمان پرستیں ٹولیانی ھنر ءُ پندل سازی راجی رپینگ اِنت – بلوچ راجی جیڑہ تچک اِنت، مئے سرڈگار ءِ سر ءَ زورنسری پوجی زوراں گوں زورگری کنگ بیتگ ءُ مئے سرڈگار بھر ءُ بانگ کنگ بیتگ ءُ مئے مڈی ءُ زر ءَ لُٹگ ءَ اَنت – اے زوگری ءِ برجم کنگ ءَ مئے کُشت ءُ کوش ءَ کنگ ءَ اَنت – اے کُشت ءُ کوش، زورانسری بیگواھی، کمتری کنگ ءُ بھر ءُ بانگ زورگری ءِ تہ ءَ اَنت – تنا وھدی تانکہ ما زورگریں پوج ءَ پروش دے ایں آئی ءَ وتی سرڈگار ءِ سر ءَ درکپگ ءَ لاچار نہ کن ایں، تنا وھد ءَ اے سلسلگ چَم ایت اِنت – اگاں کجام ھم مردم، ٹولی یا پگر اے جیڑہ ءِ بنکی زورگری ءَ بے دلگوش کنت اشی ءِ ردوم گپتگیں جیڑہ روچ رھمانی کوش، زورانسری بیگواھی ءُ کمتری ءِ دارگ ءِ واستا دومی دلیل دیم ءَ کار ایت، ءُ آئی ءِ سر ءَ وتی سیاست ءِ لنگی ءَ اوشتارینگ لوٹ ایت، آ دشمن ءِ ھنر ءُ ٹگیاں زانت یا نازانتی جرم ءَ ھوار اَنت –

دی بلوچستان پوسٹ

ھمے ماہ ءَ بلوچستان ءَ گیس ءِ وئیلاں ھژدہ مردم بیران ءُ بیست ءُ سَے زدگ بیتگ کہ اشانی تہ ءَ زالبول ءُ چُک ھم ھوار اَنت –

بلوچستان ءِ دمگ لورالائی ءَ گیس ءِ درایگ ءَ جمال خان ء بخت توخنئی ءُ آئی ءِ لوگبانک بیران بیتگ اَنت، جون لورالائی ءِ نادراہ جاہ ءَ سر کنگ بیتگ اَنت اود ءَ اژدری چار ءُ ٹپاس ءَ پد کھول ءِ گور ءَ رسینگ بیتگ اَنت –

واکدارانی گوشگ اِنت کہ گیس ءِ ٹنگ بیگ ءِ سوب ءَ کوٹی ءِ تہ ءَ دمتوسی ءِ سر ءَ وئیل بیتگ –

زانگ بہ بیت گوھری مولمانی آیگ ءَ گوں بلوچستان ءِ جتا جتائیں جاھاں گیسانی ٹنگ بیگ ءُ دگہ وئیلاں ھمک سال بازیں مردمانی زندگی پُلگ بیت اِنت –

دو روچ ءَ پیسر ھزدار ءِ دمگ زھری سلمانجو ءَ گیس سلینڈرے ءِ ترگ ءِ سوب ءَ دو زالبولاں ھوار چار مردم سُتکگ ءُ باز ٹپیگ بیتگ اَنت –

نادراہ جاہ ءِ رد ءَ دو زالبول، یک ورنایے ءُ یک دوازدہ سالی ءِ چُکے ٹپی ءِ جاوراں نادراہ جاہ ءَ آرگ بیتگ اَنت – آیانی جان ءِ بازیں جاہ سُتکگ اَنت ءُ گیشیں درمان کنگ ءَ برن سینٹر ءَ برگ روان دیگ بیتگ اَنت –

چریشی ءَ پیسر ھمے ھپتگ ءَ شال ءِ ھزار گنجی ءَ گیس ءِ ٹنگ بیگ ءِ سوب ءَ دمتوسی ءَ لوگ واجہ ءُ لوگبانک بیران بیتگ اِت اَنت –

ریسکیو ءِ رد ءَ بڑیچ ٹاؤن ھزار گنجی ءَ گیس ءِ ٹنگ بیگ ءِ سوب ءَ نپس ءِ بند بیگ ءَ جھانگیر ء عالم گل گوں وتی زال ءَ بیران بیتگ –

زانگ بہ بیت بلوچستان ءِ بنجاھی شھر شال ءَ ابید دگہ جاھاں برن سینٹرز نیست اِنت کہ چریشی ءَ سُتکگیں مردمانی ٹپی ءِ جاوراں بیران بیان اَنت –

گوستگیں روچاں کوھلو ءِ دمگ بوھڑی ءَ آروسی مراگشے ءَ گیس سلینڈرے ءِ تراک ءَ سِی ءُ سَے مردم ٹپی بیتگ اِت اَنت کہ اشانی تہ گیشتر چُک ھوار بیتگ اَنت –

بیتگیں وئیل ءَ چاردہ چُک بیران بیتگ اَنت – کوھلو ءِ نادراہ جاہ ءَ سوچکانی درمانی بیتگ گڑا چریشی ءَ آ پنجاپ ءِ شھر ملتان ءَ برگ بیتگ اَنت –