TBP Balochi

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ دلگان ءَ ناشناسیں مردماں تیرگواری کرتگ ءُ یک مردمے کُشتگ ءُ یکے زدگ کرتگ –

اھوالکار ءِ رد ءَ گوستگیں شپ ءَ دلگان ءَ ناشناسیں مردماں یک گاڑی ءِ سر ءَ تیرگواری کرتگ ءُ چریشی ءِ آسر ءَ یک مردمے بیران بیتگ ءُ یکے زدگ بیتگ –

تیرگواری کنوک تیرگواری ءَ پد تچگ ءُ روگ ءَ سوبمند بیتگ اَنت ءُ جون ءُ زدگ بیتگیں مردم چِست کنگ ءُ نادراہ جاہ ءَ برگ بیتگ اَنت –

دمگی مردمانی گوشگ اِنت سلاہ بندیں مردم روچ ء رھمان ترگ ءُ مردماں جنگ ءَ اَنت چریشی ءَ چہ مئے گمان سرکار ءِ پُشت ءُ پناھی ءَ شت کنت –

آیاں گْوشت کہ اے وڑیں وئیل بلوچستان ءِ بازیں ھند ءُ دمگاں بیگ ءَ اَنت بلے اُرشکاراں جست ءُ پرس بیگ ءَ نہ اِنت –

دی بلوچستان پوسٹ

سربیتگیں ھالانی رِد ءَ بلوچستان ءِ دمگ خضدار وڈھ ءَ چہ ناشناسیں مردماں محمد جان گرکناڑی آوار جتگ –

ھمے گوشگ بوھگ انت کہ آوار جنگ بوتگیں مردمے سیادی گوں بلوچستان نیشنل پارٹی ءَ اِنت –

محمد جان ءِ آوار جنی ءِ بگیری ءَ وڈھ ءَ بی این پی ءِ مردماں کراچی تاں شال ءَ رؤکیں شاھدگ ءِ سرا ٹائیر روک کُتگ دگ بند کُرتگ-

ھر وڑیں رؤگ آوکیں اولاک دارگ بوتگ انت، زھر شانی ءِ سوب ءَ مساپر بازیں جنجالانی آماچ اَنت –

اے درگت ءَ زھرشانی کنوکانی گوشگ انت کہ داں ھما وھد ءَ محمد جان یل کنگ نبیتگ، مئے زھرشانی ھلاس نبیت-

آھانی گوشگ انت کہ مھمد جان ریاست ءِ چیردستی ءَ کار کنوکیں دمگی ڈیتھ اسکواڈ ءِ کارمنداں آوار جتگ –

سربیتگیں ھالانی رِد ءَ بلوچستان ءِ بنجاھی شھر شال ءُ چاگی ءَ دومردمے جون دست کپتگ –

دی بلوچستان پوسٹ

دمگی پولیس ءِ رِد ءَ مروچی پنچ شمبے ءَ شال ءِ دمگ سیٹلائٹ نیو اڈہ ءِ کبرستان ءِ نزیک ءَ یک مردمے ءِ جون دست کپتگ، پجار ءِ ھاتر ءَ ھسپتال ءَ برگ بوتگ ءُ اے درگت ءَ گیشیں پٹ پول برجاہ انت –

ھمے وڑ بلوچستان ءِ دمگ چاگی ءَ ھم لیوز کارمنداں ءَ تیر سپتگیں جون ءِ دست کپتگ –

جون چاگی ءِ کوھی دمگ درمن ءَ دست کپتگ، آئی ھم دنیگت ءَ پجار نبوتگ، جون دمگی نادراھجاہ ءَ برگ بوتگ –

نبشتانک: جنرل اسلم ءِ کاروان

نبشتہ کار: اکیل مراد

پنچمی بھر

دی بلوچستان پوسٹ

اے ھشتیں ھمراھانی زمین زادگیں جنرل ءَ کوھلو، کاھان، بولان ءَ ھوار ھوار بلوچستان ءِ کوھاں پجار شناسیں گھگیر ءَ شپ ءُ روچ بندیں تلارانی بُرگ ءُ گچین کرتگیں راہ ءِ شوھاز ءَ درکپوکیں جنرل ءَ مَل مزاریں سنگتانی پتر ءِ دراج کنگ ءَ شھری ءُ میتگانی تہ ءَ ایرگیجوکیں زرمبشت ءِ مھکمی ءَ الم جیڑ اِتگ اَت کہ اے زرمبشت تھنا ھشت سنگتانی ھمراھی ءَ سرجم نہ اِنت تانکہ ایشی ءِ پُشت ءَ یک مھکمیں آشوبے گون مہ بیت –

گڑا جنرل ءَ وتی شھری گام ھم تیز تر کنان ءَ ءُ شھرانی تہ ءَ نشتگیں مردمانی دل ءَ ھمے اُوست ءِ ودینگ ءَ کہ شمئے گڈی جنگ بنا بیتگ اے جنگ ءَ ھرچ رنگ ءَ یک منزلے ءِ نیمگ ءَ جنزینان کن ئے تانکہ جھان ءِ مردمانی چم شمئے نِزوریں کوپگاں سک بہ بنت ءُ شمارا دلگوش کرت بہ کنت-

جنرل ءِ نزیکیں مردمے ءَ اے گپ پدر کرتگ اَت کہ جنرل ھما روچ ءَ نوکیں جنگ ءِ بنپد ءَ ایر کنگ ءَ بیتگ گڑا اے جنگ ءَ جنرل ءَ تھنا ھمے جیڑ اِتگ کہ مئے منزل انگت دور اِنت بلے جنزگ کنگ کپ ایت ءُ مردمانی تہ ءَ اُمیت ایرکنگی اِنت کہ شمئے گڈی جنگ بیگ ءَ اِنت ھرکس وتی کَچ ءُ کساس ءَ اے جنگ ءَ وت ءَ ھوار بہ کنت ءُ وتی پجار ءُ زمین ءِ رکینگ ءَ ھرچ رنگیں کربانیاں چَک ءُ پد مہ بیت –

ما ھنچش سما کن ایں کہ بلوچستان ءِ سر ءَ کپتگیں زوراک ھم گلامیں ڈیھے ءِ بستار ءَ زانگ بیت کہ آئی ءَ ھر تک ءَ مردم ھمے شگان ءَ جن اَنت مزن مزنیں ڈیھانی گلام ءُ پِٹو اِنت بلے گلام کہ یک زندگیں راجے ءَ گلام دارگ ءِ جھد ءَ کنت گڑا آ راج ءِ چِست بیتگیں بامرد الم اے گپ ءَ سما کن اَنت کہ گلام ءَ کجام بستار ھست اِنت زندگیں راجے ءَ گلام داشت کُرت بہ کنت –

اگاں تاکت ءُ زور گلامیگ اِنت گڑا گلام ھم وت واکیں راجاں زیردست ءُ لگتمال ءُ آئی ءِ نِزوری ءَ ھرچ ھما شَے ءَ پُل اَنت –

لینن “سامراج اور سامراجی ” ءِ تہ ءَ تاک دیم بیست ءُ دو ءَ نبشتگ کنت “زیرست ءِ دارگ ءُ مھکم کنگ ءَ مزن مزنیں گلامانی واجھانی میان ءَ جنگ بیت ۔”

“زورامندانی پریچگ ءَ ما ھما لبز ءِ مانا ءَ ھما زورانی میان ءَ گوش ایں(آیاں شکساتگیں) گوش اَنت(چُشکہ ھما لُٹ ءُ پُل ءَ سوبمند اَنت) دنیا ءِ بھر بھر کنگ ءَ ھنچیں سرپدی ءِ شوھاز ءَ کنگ ءَ اَنت۔”

چریشی ءَ زانگ بیت کہ 1871 — 1789 آجوئی ءِ جد ءُ جھد ءَ گیشتر دومیگانی سروکان بیتگ اَنت نِی 1876ء پد مزنیں دیمروی ءَ گیش پکاہ بیت اَنت –

سرمایہ دارانی نزام ءِ دراھیں زور ءُ بار جھمنندیں راجانی سر ءَ زوراکی ءُ ایندگہ رپکانی تہ ءَ گلام داشتگیں راج مَٹ بیتگ اَنت –

1876 ءَ داں 1914 ءَ شش مزن نامیں تاکتاں دو کروڑ ءُ نیم ءِ میل یورپ ءِ وتی پنجگانی ءَ آؤرت ءُ نوک آبادیاں نیم ارب ءَ گیش(پنجاہ ءُ دو کروڑ ءُ سِی لَک) نشتگیں مردم وتی گلام کرتگ اَنت –

اشی ءَ درست زان اَنت نوک آبادکار ھر وھد ءَ وتی زُلم ءُ زوراکی ءِ سر ءَ آ دمگ ءَ بربادی ءُ کُشت ءُ ھون ءِ تہ ءَ کنت ءُ نشتگیں مردمانی کُشت ءُ ھون ءَ کن اَنت –

نِی اے ھونانی گندگ ءَ گڑا گھگیر مدام ھمے اوست ءَ راج ءِ دل ءَ ودین اِت ءُ نوک آبادکار ءِ تہ ءَ آؤکیں مردم شمئے کُشت ءُ کوش ءَ اتکگ اَنت ءُ شمئے زمین ءِ اندر ءَ ھما چیر ءُ زیریں مڈیانی ھلاس کنگ ءُ وتی مھکم کنگ ءِ گامان اَنت –

جنرل ءَ ھمے کرد ھم گون بیتگ ءُ راج ءِ تہ ءَ کجام ناں کجام دروشم ءَ اے دل سدکی پِرینتگ ءُ گوشتگ کہ شمئے واستا اگاں یک راھے پُشکپتگ آ یکجاھی ءُ جنزگ اِنت –

ھَنچُش جنرل ءُ آئی ءِ راج ءِ دشمن ھنچیں زورامند ءُ تاکتوریں دشمنے کہ آئی ءِ کارستانی تہ ءَ کُشت ءُ کوش ءُ لُٹ ءُ پُل ءُ دُزی دازی درست گون اَنت ئِے-

اے گپ گش اِتگین ئِے کہ زورامند ھما کساس زورامند بہ بیت بلے زیردست الم روچے ناں روچے وتی باج ءَ بُرت کنت –

سپر روان اِنت ماں جنرل اسلم ءِ کاروان ءَ دسمبر –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: شَے ترا یات انت؟

نبشتہ کار: بالاچ ھمل

دی بلوچستان پوسٹ

شَے هما اِنت کہ ترا گوں من نند ءُ نیاد بوتگاں من چہ وت ءَ گار ءُ بیگواه آں. تئی پِکر ءُ هیالاں جیڑگ ءَ آں-

چی ءَ کہ شَے تو هما مردمانی تہ ءَ هوار بوت ئے کہ آ وتی زبان ءُ کول ءِ پابند انت من وتی سجّویں زندمان ءِ تہ ءَ اے سیاهیں روچ ءَ هچبر پراموش کُت نہ کناں کہ آ روچ ءَ تئی وڑیں تنگوئیں بچ ءِ جسمانی دروشُم ءَ چہ راج ءَ بدواه ءَ دور ءُ جُتا کُت-

برے برے من گوں رب ءَ همے جُست ءَ کناں کہ تو چی ءَ چو کن ئے هما ورنا کہ پہ وتی راج ءُ سرڑگار ءِ هاتر ءَ زندمان ءَ گْوازین انت تو چی ءَ آیاں چو زوت بر ئے ءُ چہ راج ءَ گِستا کن ئے-

آ شهید بالاچ مری ءِ وڑیں بچ بہ بنت یا چو شهید اسلم ءُ اے دگہ زمین زادگیں بچ بہ بنت کہ همک روچ پہ وتی راج ءُ گلزمین ءِ هاتر ءَ وت ءَ ندر کن انت اے وڑیں رهشون چہ کرناں پد ودی بنت-

شَے تو یک زانشتیں سر ءُ روژنائیں پِکرے ءِ واهُند ات ئے ءُ سرڈگار ءِ رکینگ ءَ وتی تنگھیں سر دات بلے بدواهانی دیم ءَ وتی سر جھل نہ کُت ءُ زند ءِ گڈی ساه ءَ هم لگوریں دُشمن ءَ گوں جنگ دیان ات ئے داں نمیران بوت ئے گوں شهید امداد ءِ همبراھی ءَ-

بلے شَے من نوں تئی داتگیں سوگنداں چتور بُہ پْروشاں یا پراموش بہ باں تو اگاں اے دُگنیا ءَ بوتین ئے من اتک ءُ ترا گُشتگ اَت شَے جان — گوں من بہ گند ئے مہ بیت تئی کولانی پاسداری تو ءُ تئی داتگیں پنت ءُ سوجانی رندگیری ءَ الم کناں. من هم لگوریں لشکر ءِ دیم ءَ وتی سر ءَ جھل نہ کناں چہ مرگ ءِ تُرس ءَ-

شَے ترا یات انت؟-
گند ئے تو گُشت کہ بازیں مردمے گُش ایت کہ شَے مُرید گنوک انت — ءُ تو پد ءَ درائینت ءُ گُشت ھو راست گُش انت من گنوکاں پہ وتی گُلزمین ءِ هاتر ءَ وتی راج ءِ واستا دیوانگاں انچو کہ شَے مُرید پہ هانی ءَ گنوک بوتگ
شَے جان نوں تو تھنا نہ ئے تئی وڑیں هزاراں گنوک مئےشیرزالیں ماتاں ودی کُتگ انت کہ پہ اے گُلزمین ءَ دیوانگ اَنت ءُ همک روچ وتی سالونکیں سراں ندر کنان انت-

ندر پہ شَے مُرید ءَ شَے پہ گُلزمین دیوانگ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ سراوان ءَ ناشناسیِں مردمانی تیرگواری ءَ یک مردمے زدگ بیتگ –

اھوالکار ءِ رد ءَ سراوان ءِ بازار ءَ ناشناسیں مردماں یاسین برھانزئی ءِ بیڑ برتگ ءُ آئی ءِ گاڑی ءِ برگ ءِ جھد کرتگ ھمے میان ءَ ناشناسیں مردماں تیرگواری کرتگ ءُ یاسین زدگ کرتگ –

ھمے وڑ ءَ ایرانی لشکر ءَ یک گاڑی ءِ سر ءَ تیرگواری کرتگ ءُ پنچ مردم زدگ کرتگ اَنت –

اھوالکار ءِ رد ءَ روکپتی بلوچستان ءِ دمگ بزمان ءَ ابولفضل مسیت ءِ گور ءَ یک گاڑی ءِ سر ءَ ایرانی لشکر ءَ تیرگواری کرتگ ءُ پنچ مردم زدگ کرتگ اَنت –

اھوالکار ءَ گوشت کہ ایرانی لشکر ءِ تیرگواری ءَ گاڑی ءَ دگہ گاڑیاں گوں ٹکر وارتگ ءُ چریشی ءَ سَے گاڑی سوتکگ اَنت –

ھالانی تہ ءَ گوشگ بیتگ کہ گاڑی سواریں پنچ مردم زدگ بیتگ اَنت ءُ اشانی تہ ءَ یک زالبولے ءُ چُکے ھم ھوار اَنت –

دگہ یک تیرگواری وئیلے ءَ سراوان ءِ دمگ غفور آباد ءَ ناشناسیں مردمانی تیرگواری ءَ یک مردمے زدگ بیتگ –

اھوالکار ءِ رد ءَ گوستگیں روچ ءَ سراوان غفور آباد ءَ ناشناسیں مردماں یک پرپٹ سواریں مردمے ءِ دارگ ءِ جھد کرتگ ءُ چریشی ءَ پرپٹ سوار نہ اوشتاتگ ءُ آیاں تیرگواری کرتگ ءُ پرپٹ سوار زدگ بیتگ –

زدگ بیتگیں مردم ءِ پجار حفیظ سورزئی ءِ نام ءَ زانگ بیتگ ءُ وئیل ءِ سوب زانگ نہ بیتگ –

دومی نیمگ ءَ چاگردی مردمانی گوشگ اِنت کہ سراوان ءَ پیش اتکگیں وئیلاں دُزانی دزمانجنی ھست اِنت ءُ بازیں وھد بنت کہ سراوان ءِ کَش ءُ گوری دمگاں دُزی ءُ ڈنگیانی وئیل گیش بیان اَنت –

دی بلوچستان پوسٹ

ٹی بی پی ءِ چاگردی اھوالکار ءِ رِد ءَ ملار تامر زوت تامری رسانکجاہ زامر ءِ یوٹیوب چینل ءَ شنگ بیگی اِنت –

ملار تامر ءَ بلوچستان ءَ جوانیں نامانی کَشگ ءَ پد نہ دیستگیں مردمانی ھاتر ءَ چاگردی رسانکجاھاں شنگ بیگی اِنت –

ملار تامر بلوچستان ءِ بازیں جاھاں تامر تلاراں چارگ بیتگ کہ آئی ءِ چارگ ءَ بلوچستان ءَ ھوار ڈراں ڈیھاں ھم چارگ بیتگ –

چاگردی رسانکجاھاں تامرانی شنگ کنوکیں تندجاہ زامر تندجاہ ءَ وتی یک جارے ءَ گوشتگ کہ تامر ملار بیست دسمبر ءَ زامر یوٹیوب چینل ءَ شنگ کنگ بیت اِنت –

ٹی بی پی ءِ اھوالکار ءِِ گون ءَ تامر ملار ءِ ازمکار کمالان بیبگر ءَ گپ کنان ءَ گوشتگ کہ بازیں اُمیت ءُ ھما مردمانی ودار آسری بیگ ءَ اَنت کہ تامر ملار بیست دسمبر ءَ زامر یوٹیوب چینل ءَ شنگ کنگ بیت اِنت –

کمالان بیبگر ءَ گوشتگ ما تامر ملار ءِ سر ءَ ھما کچ ءَ شری ءِ جھد کرتگ ھما کچ کہ مئے دست ءَ جوان ءُ شریں رنگے ءَ ندارگ پیشدارگی بیتگ اَنت ما وتی جھد ءَ کرتگ اَنت ءُ اشی ءَ تامر تلاراں چاروکانی مردماں دیستگ ءُ چاگردی رسانک جاھاں بندوکیں مردمانی دیم ءَ زوت بیت اِنت آ وتی ھیالاں ھم درشان کرت کن اَنت –

کمالان بیبگر ءَ گْوشت کہ تامر ملار ءِ تہ ءَ بلوچی زبان ءِ تامرکاری ءَ بندوکیں جوانیں ازمکاراں وتی ازمکاری کرتگ کہ آیانی تہ ءَ بلوچستان ءِ مزن نامیں تامر کار عومر کیّا، رفیق گُل، راشد حسن، مھراب خالد، رابعہ، عزت بوھیر، ماھر مزار، جمشیر بلوچ ءُ دگہ بازیں ازمکاراں وتی ازم کار بستگ –

کمالان بیبگر ءَ گْوشت کہ تامر ءِ جوڑ کنگ ءَ پیسر مئے جھد ھمے بیتگ کہ تامر ءِ سرجم بیگ ءَ پد تامر ءَ ھر کجا بلوچ نندوک اَنت ھما جاھاں تامر سر کنگ بہ بیت چوشیں بازیں جاھاں بیتگ اَنت آیاں دست نہ رس اِتگ بلے ھما جاھاں کہ مئے وس ءُ واک ءَ بیتگ ما سر کرتگ –

کمالان بیبگر ءَ گْوشت کہ بلوچی تامرانی واستا ادارہ نہ بیگ ءِ سوب ءَ ازمکاراں بازیں جیڑہ ءُ جنجالانی دیمپانی کنگ کپ ایت –

آئی ءَ گْوشت کہ تامرکاری ءِ واستا مستریں لوٹانی تہ ءَ کہ تامرکار ءِ گور ءَ زر، ساز ءُ سامان، کواس ءُ سوھویں مردم اے درست درکار اَنت بلے بلوچی تامرکارانی گور ءَ اے چیزانی باز کمی اِنت ءُ تامراں بازیں مُشکل ءُ جیڑھاں گوں جوڑ کن اَنت –

آئی ءَ گوشت کہ ما وتی کچ ءَ وتی زراں تامر ملار جوڑ کرتگ ءُ دگہ ھچ چوشیں ادارھے ءَ مئے چم نہ کپتگ اَنت کہ آ مارا تامر ملار ءِ واستا دزکمکی بہ بیت –

آئی ءَ گْوشت کہ بلوچستان ءَ جوانیں تامر تلارانی نہ بیگ ءِ سوب ءَ تامر کار تچ ءُ تاکاں پد ھم وتی تامر ءِ پیشدارگ ءَ شپ جاہ ءُ روچ جاہ اَنت ءُ ما ملار ءِ واستا ھم ھمے وڑ ءَ شپ جاہ ءُ روچ جاہ بیتگیں –

زانگ بہ بیت تامر ملار بلوچستان ءِ بازیں جاہ، بلیدہ، بل نگور شال، تربت، مند، تمپ، گومازی، نزر آباد، کوھاڈ، پنجگور، گوادر، پسنی، اورماڑہ، ھاران، ھزدار، اُتھل، کراچی، لاھور، اسلام آباد ءُ دراں ڈیھ امریکہ ءُ نیدر لینڈ ءَ تامر تلاراں چارگ بیتگ –

دی بلوچستان پوسٹ

بلوچستان ءِ دمگ پنجگور ءَ چہ زورانسری آوار جنگ بوتگیں بلوچ نودربر چہ لشکری آزار جاھاں یل بوتگ وھدیکہ چہ ھزدار ءَ دگہ دو ورنا آوار جنگ ءُ بیگواہ کنگ بوتگ اَنت –

ٹی بی پی پتر ءَ سربیتگیں ھالانی رِد ءَ ھزدار ءِ دمگ نال ءَ محمد طارق قمبرانی ء محمد عالم قمبرانی ءُ محبوب علی چنال پنام ءِ بابل جھمنند ٹوبڑو بیگواہ کنگ بوتگ انت –

کھول ءِ رِد ءَ دوئیں ورنا گوستگیں روچ ءَ بیگاہ وھد ءَ نال ءِ بازار ءَ چہ بیگواہ کنگ بوتگ انت کہ آ وتی لوگ ءَ آیگ ءَ بوتگ انت، دنیگت ءَ تاں بیگواہ انت – ورنایانی بیگواھی ءَ لوگ ءِ مردم سک باز پریشان انت –

دومی نیمگ ءَ گوستگیں ماہ ءَ چہ پنجگور ءَ آوار جنگ بوتگیں نودربر مروچی چہ لشکری آزار جاھاں یل بوتگ ءُ گِس ءَ سربوتگ –

اھوالکار ءِ رِد ءَ گوستگیں ماہ ءَ یک نومبر ءَ پنجگور چڑیان ءَ پاکستانی پوج ءِ دست ءَ آوار جنگ بیگواہ بوتگیں ثناء بلوچ مروچی یل بوتگ –

زانگ بہ بیت بلوچستان ءَ زورانسری آوار جنی رِد یکشل ءَ برجاہ انت – ھمے زورانسری آوار جنگ ءُ بیگواہ بوتگیں مردمانی بگیری بیگواھیں مردمانی پانکجنیں گل وائس فار بلوچ مسنگ پرسنز گوستگیِں یک دھکے ءَ چہ زھرشانی کنگ انت –

دومی نیمگ ءَ بلوچ راجداریں گلاں ھوار انسانی ھکانی گلانی گوشگ انت کہ پاکستانی پوج ءَ آھانی چیریں ادارہ اے زورانسری آوار جنی ءَ ھوار انت ـ آوار جنگ بوتگیں مردمانی تہ ءَ کمے کساس ءَ مردم یل کنگ بوتگ بلے دومی نیمگ ءَ آوار جنگ ءُ بیگواہ بوگ انت-

نبشتانک: جنرل اسلم ءِ کاروان

نبشتہ کار: اکیل مراد

چارمی بھر

دی بلوچستان پوسٹ

سال دوھزار ءِ روچ ءَ ٹِک دات جنرل اسلم ءِ کاروان ءَ زمین ءِ جاورانی ھمراھی ءَ ترومبگ بنا کُت جنگی رھبندانی تہ ءَ آئی ءَ وتی کاروان ءَ ھواریں سنگتانی تہ ءَ ھنچیں سنچے پیش کرتگ اَت گوشگی ءَ “ڈاکٹر چی ” دوبر “کیوبیا ” ءِ دمکاں زندگ بیتگ بلے اے دمک کیوبا ءِ نہ اِت اَنت بلکیں بلوچستان ءِ چیریں کوھانی تہ ءَ سِنگ ءُ ڈوکانی تہ ءَ پاد اتکگیں سرمچار اِت اَنت –

سال دوھزار ءَ دشمن ءَ اے جنز ءِ بنا بیگ ھم گوست ءِ جنزانی پیم ءَ سما کپتگ اَت کہ بلوچ راجدپتر ءَ بلوچستان ءِ زمین ءَ بندات بیتگیں جنگاں پروش وارتگ اَت –

دشمن ءَ اے جنگ ھچ رنگ ءَ مان نیاتک آئی ءِ مجگانی تہ ءَ ھمے یکیں گپ نشتگ اَت اے جنگ ھم گوست ءِ جنگانی تہ ءَ دیر نہ کنت ھلاس بیت اِنت ءُ ما آسودگی ءِ واباں ملار بہ ایں –

جنرل اسلم ءَ جنگ ءِ مھکم ءُ گھگیریں سنگتانی تہ ءَ اے سنچ ودینتگ اَت اے جنگ گوست ءِ جنگاں جتا بیت ءُ اے جنگ ءَ آسری جنگ کُرت کن ایں –

اے جنگ ءَ ھمے داب ءَ دوھزار ءَ جُنزگ بندات کُرت داں دو ھزار ءُ سَے ءَ اے جنگ ءِ کِسہ گیشتر دراج بیت اَنت بلوچستان ءِ جاہ جاہ ءَ اے جنگ بوہ پیداک اَت –

جنرل ءَ اے جنگ ءَ را تامے بکش اِتگ اَت ھمے ھساب اَت کہ جنگ ءِ ھُنڈال روچ پہ روچ گیشتر جُھل روان اِت اَنت ءُ نوک آباد کاریں مردمانی دل ءَ ترس گیشتر بیگ ءَ اَت کہ جنگ نِی وتی راستیں رنگ ءَ روگ ءَ اِنت ءُ اے جنگ ءِ گھگیر منزل ءِ نیمگ ءَ بران اَنت –

سرکاری ادارھانی سر ءَ کم کم ءَ جنرل ءِ ھواریں سنگت اُرش کنان اِت اَنت ءُ ریڈیو ءُ روتاکاں ھم اے جنگ کم کم ءَ جنزگ ءَ اَت –

جنگانی بستار ھروھد ءَ ھما رنگ ءَ جوان بنت کہ آیانی رو ءُ روان شریں ءُ پھتوئیں مردم بنت آ جنگ کنگ ءُ وتی دیم ءِ برگ ءِ واستا زان اَنت کجام کچ ءَ اے جنگ ءِ ھُنڈال کِشگی اَنت ءُ چون آیانی آپ دیگ ءَ کجام ءُ وھد ءُ روچ ھژدری بنت –

جنگی سپاہ سالار مدام ھمے چیز ءَ جیڑ ایت کہ دشمن ءِ رپک ءُ ھنُر پہ مئے نوک بنا کرتگیں جنگ ءَ چی اَنت ءُ آئی ءِ کَچو کیلو کنگ ءَ سپاہ سالار وتی مزنیں کردے پیلو کنت جنرل اے وڑیں چیزاں یک بلدکاریں مردمے اَت آئی ءَ وتی تہ ءِ مردم ھم زانتگ اَنت ءُ دشمن ءِ رپک ءُ ھُنر ھم جوانیں رنگے ءَ پَھم اِت کرتگ اَنت –

نِی کہ جنرل بلوچستان ءِ کوھاں شاھیگان ءُ پھتو بیتگ گڑا آئی ءِ جنگ ءِ دیم کمے ءَ گیش ترند کرتگ اَت ءُ دشمن ءُ ڈنی سرمایہ دارانی تہ ءَ اے گپ ءُ ٹال ودینگی اَت کہ اد ءَ یک جنگے بنا بیتگ ءُ جنگ وتی گاماں جنان ءُ روان اِنت –

جنرل ءِ سپاہ سالاری ءِ بالاد جنرل ءَ یک کردے بکشگ ءِ نام ءَ وتی رھشونی ءَ کنگ ءَ اَت ءُ جنرل ءَ اے اُمیت ءَ جنگ بنا نہ کرتگ اَت کہ اے جنگ ءَ ما نِزور اِیں ءُ جنگ ءِ سلاہ ءُ تاکت یکدم کم اَنت –

بلکیں آئی ءَ وتی راجی پجار ءِ برز کنگ ءُ دیم ءِ اُمیت ءَ گندگ ءَ اَت آئی ءِ شاہ سسائیں زانت ءِ کوپگانی تہ ءَ تمردی ءِ گون اَت ءُ چم پروشیں دشمن ءِ نگاھاں وت ءَ زیر ءُ چیر کرتگ اَت ئِے –

شاہ سسائیں سید ھاشمی گوش ایت

“ھچ باج نہ بارت اچ من ءَ گپتار ء سکندر”
“من کورشاں گالانی نیاں پُرشتگیں داریوش”

نِی دریگت ءَ زانگ بیت کہ جنرل اسلم ءَ وت ءَ مھکم کرتگ ءُ جنگ ءِ پِڑ ءَ دور کرتگ جنرل ءِ گل ءِ سنگت ءُ بلوچستان ءَ سیاسی ءُ جنگی رپکاں “سوھوئیں مرد بشیر زیب گوش ایت جنرل اسلم وتی وھد ءِ کارستاں درستاں دیم ءَ بیتگ جھانی جنرل گیاب، ھوچی منہ، چی گویرا ءُ دگہ بازیں بامرد جھان ءَ اتکگ ءُ وتی چاگرد ءِ واستا جھد ءُ دیمونی اش داتگ ءُ آشوب ءِ بھر جوڑ بیتگ اَنت بلے اود ءَ چاگرد آشوب ءِ بھر بیگ ءَ جاڑیگ بیتگ اَنت، جنرل اسلم بیت کنت وھد ءَ پیسر ودی بیتگ ءُ آ تھنا ھشت ھمراھانی ھمراہ بیتگ ءُ چاگرد آئی ءِ ھمراہ نہ بیتگ ”

اگاں جنرل اسلم آیانی رنگ ءَ آشوب ءِ واستا ھوار بیوکیں چاگردے ءَ ودی بیت اِنت گڑا جنرل آ نامناکیں مردماں گیش دیم ءَ جنز اِتگ اَت بلے پد ءَ ھم آئی ءِ بامردی ءُ آئی ءِ جنزگ ءَ چاگرد وتی نیمگ ءَ کش اِتگ ءُ دلگوش بلوچستان ءِ زیردستیں زمین ءَ داتگ –

روان اِنت سپر ماں جنرل اسلم ءِ کاروان ءَ دسمبر –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سانگان سفری ءَ پاکستانی پوج ءِ پانگس ءِ سرءَ اُرش کتگ جانی ءُ مالی تاوان داتگ – جئیند بلوچ

دی بلوچستان پوسٹ

سربوتگیں ھالانی رِد ءَ بلوچستان ءِ دمگ بولان ءَ ناشناسیں سلاہ بندیں مردماں پاکستانی پوج ءِ پانگس ءِ سرءَ اُرش کُتگ، اُرش سانگان ءِ دمگ سفری ءَ شپ ءِ وھد ءَ کنگ بوتگ –

اُرش ءَ پاکستانی پوج ءَ جانی ءُ مالی تاوان رستگ – اُرش ءَ پد سلاہ بندیں مردم درآھگ رؤگ ءَ سوبمند بوتگ انت –

دومی نیمگ بلوچ راجی آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تھا اے اُرش ءِ زمّہ واری منّ اِتگ گوشتگ کہ مئے سرمچاراں بولان ءِ دمگ سانگان سفری ءَ برجاھیں پاکستانی پوج ءِ یک پانگس ءِ سرءَ اُرش کُتگ –

جارکشءَ گوشتگ کہ اُرش ءِ آسرا پاکستانی پوج ءِ یک کارمندے ھما دمان ءَ مرتگ وھدیکے اے اُرش ءَ پاکستانی پوج ءِ پانگس ءَ سک باز تاوان بوتگ –

گڈسرءَ بی ایل اے جارکش ءَ گوشتگ کہ دژمن پوج ءِ سرءَ مئے اُرش برجاہ بنت –